“17. Ko Hono Akoʻi ʻo e Ongoongoleleí,” Ngaahi Konga naʻe Filifili mei he Tohi Tuʻutuʻuni Fakakātoá (2023).
“17. Ko Hono Akoʻi ʻo e Ongoongoleleí,” Ngaahi Konga naʻe Filifili mei he Tohi Tuʻutuʻuni Fakakātoá
17.
Ko Hono Akoʻi ʻo e Ongoongoleleí
ʻOku tau akoʻi ʻa e ongoongoleleí ke tokoni ki he kakaí ʻi hono fakamālohia ʻenau tui ki he Tamai Hēvaní mo Sīsū Kalaisí.
17.1
Ko e Ngaahi Tefitoʻi Moʻoni ʻo e Faiako Hangē ko Kalaisí
Ko e taimi ʻoku akoʻi ai e ongoongoleleí, ʻe muimui ʻa e ngaahi mātuʻá, kau faiakó, mo e kau takí ʻi he sīpinga ʻa Sīsū Kalaisí, ko e Faiako Mataotaó.
ʻE vahevahe ʻe he kau takí ʻa e ngaahi tefitoʻi moʻoni ko ʻeni ʻo e faiako hangē ko Kalaisí mo e kau faiako ʻi heʻenau ngaahi houalotú. ʻOku fakamatalaʻi fakaʻāuliliki ange ʻa e ngaahi tefitoʻi moʻoni ko ʻení ʻi he Ko e Faiako ʻi he Founga ʻa e Fakamoʻuí.
17.1.1
ʻOfa ʻi he Niʻihi ʻOkú ke Akoʻí
Ko e meʻa kotoa pē ʻoku fakahoko ʻe he Fakamoʻuí ko hano fakafōtunga ia ʻo ʻEne ʻofá (vakai, 2 Nīfai 26:24).
17.1.2
Faiako ʻaki e Laumālié
ʻE feinga ʻa e kau faiakó ke maʻu e fakahinohino ʻa e Laumālié ʻi heʻenau teuteu ke faiakó, pea te nau feinga ke moʻui taau mo Hono ivi tākiekiná he ʻaho takitaha.
17.1.3
Akoʻi ʻa e Tokāteliné
ʻE tokanga taha ʻa e kau faiakó ki he ngaahi moʻoniʻi meʻa mahuʻinga mo fakamoʻui ʻo e ongoongoleleí, ʻo muimui he sīpinga ʻa e Fakamoʻuí. Te nau faiako ʻo fakaʻaongaʻi ʻa e folofolá, ngaahi akonaki ʻa e kau palōfita ʻo e ngaahi ʻaho kimui ní, mo e ʻū naunau fakalēsoni kuo ʻosi fakangofuá.
17.1.4
Fakaafeʻi ʻa e Ako Fakamātoató
ʻE poupouʻi ʻe he kau faiakó ʻa e kāingalotú ki honau fatongia ke akó.
17.2
Ko Hono Ako mo Akoʻi ʻo e Ongoongoleleí ʻo Fakatefito ʻi ʻApí
ʻE fakalotolahiʻi mo poupouʻi ʻe he kau taki mo e kau faiako ʻo e Siasí ʻa hono fakatefito ʻo e ako mo hono akoʻi ʻo e ongoongoleleí ʻi ʻapí.
ʻE poupouʻi ʻe he kau takí mo e kau faiakó ʻa e kāingalotú ke nau kumia ha tataki fakalaumālie fekauʻaki mo e founga ke ako pea mo akoʻi ai ʻa e ongoongoleleí. ʻOku totonu ke hoko e ngaahi folofolá mo e ngaahi pōpoaki ʻo e konifelenisi lahí ko ʻenau tefitoʻi maʻuʻanga tokoní ia.
17.3
Ngaahi Fatongia ʻo e Kau Takí
-
Tā ha sīpinga ʻaki hano ako mo akoʻi ʻa e ongoongoleleí ʻi he founga ʻa e Fakamoʻuí.
-
Fakapapauʻi ko hono akoʻi ʻi heʻenau ngaahi houalotú ʻokú ne langaki ʻa e tuí pea ʻoku tonu fakatokāteline.
-
Hokohoko atu pē hono poupouʻi ʻo e kau faiakó ʻi heʻenau ngaahi houalotú.
17.4
Ngaahi Fakataha Alēlea ʻa e Kau Faiakó
ʻE fealēleaʻaki fakataha ʻa e kau faiakó ʻi he ngaahi fakataha alēlea ʻa e kau faiakó, fekauʻaki mo e ngaahi tefitoʻi moʻoni ʻo e faiako hangē ko Kalaisí. Te nau toe fealēleaʻaki foki fekauʻaki mo e founga ki hono fakaleleiʻi ʻo e ako mo hono akoʻi ʻo e ongoongoleleí. Te nau fakaʻaongaʻi ʻa e Ko e Faiako ʻi he Founga ʻa e Fakamoʻuí ko ha maʻuʻanga tokoni.
ʻOku fakahoko fakakuata ʻa e ngaahi fakataha alēlea fakafaiakó, ʻi he lolotonga ʻo e taimi kalasi miniti ʻe 50 he Sāpaté.