pamilya nga nagalakat malapit sa templo

18.

Paghikot sang mga Ordinansa kag mga Bendisyon sang Priesthood

18.0

Introduksyon

Ang mga ordinansa kag mga bendisyon sagrado nga mga buhat nga ginahimo sa awtoridad sang priesthood kag sa ngalan ni Jesucristo. Ang mga ordinansa kag mga bendisyon sang priesthood nagapatigayon sang gahum sang Dios (tan-awa sa Doktrina kag mga Kasugtanan 84:20).

Dapat nga ginahikot ang mga ordinansa kag bendisyon nga may pagtuo sa Amay nga Langitnon kag kay Jesucristo kag suno sa giya sang Balaan nga Espiritu. Ginasiguro sang mga lider nga ginahikot ang mga ini nga may husto nga pahanugot (kon kinahanglanon), may husto nga awtoridad sang priesthood, sa husto nga pamaagi, kag sang kaangay-angay nga mga partisipante (tan-awa sa 18.3).

18.1

Mga Ordinansa sang Kaluwasan kag Pangkahitaasan

Dala sang priesthood ang awtoridad sa pagdumala sang mga ordinansa sang ebanghelyo nga kinahanglanon para sa kaluwasan kag pangkahitaasan. Nagahimo ang mga tawo sang sagrado nga mga kasugtanan upod sa Dios sa pagbaton nila sining mga ordinansa. Ang mga ordinansa sang kaluwasan kag pangkahitaasan nalista sa idalom:

• Bunyag

• Kumpirmasyon kag dulot sang Balaan nga Espiritu

• Pagtugyan sang Melchizedek Priesthood kag ordinasyon sa isa ka palangakuan (para sa mga lalaki)

• Endowment sa templo

• Pagselyo sa templo

Kon ang bata nga born in the covenant mapatay antes mag-edad 8 anyos, wala na sang mga ordinansa nga kinahanglan hikoton. Kon ang bata indi born in the covenant, ang solo nga ordinansa nga iya kinahanglan amo ang sealing sa iya mga ginikanan. Bangud sa Pagbayad-Sala sang Manluluwas, ang tanan nga kabataan nga napatay antes mag-edad 8 anyos “maluwas sa selestiyal nga ginharian sang langit” (Doktrina kag mga Kasugtanan 137:10; tan-awa man sa Moroni 8:8–12).

18.3

Pagpartisipar sa Ordinansa ukon Pagbendisyon

Ang mga nagahikot ukon nagapartisipar sa ordinansa ukon pagbendisyon kinahanglan nga may nagakaigo nga awtoridad sang priesthood kag kaangay-angay sa paghimo sini. Sa kabilogan, ang talaksan sang pagkaangayan pareho sinang pagkapot sang temple recommend. Pero, sa giya sang Espiritu kag sa mga instruksyon sa sining kapitulo, ang mga bishop kag stake president pwede magtugot sa mga tatay kag bana nga nagakapot sang nagakadapat nga palangakuan sang priesthood nga maghikot ukon magpartisipar sa pila ka mga ordinansa ukon pagbendisyon bisan pa nga indi sila lubos nga bagay para sa templo. Ang nagakapot sang priesthood nga may wala pa maresolbar nga seryoso nga mga sala indi dapat magpartisipar.

Ang paghikot ukon pagbaton sang pila ka mga ordinansa kag bendisyon nagakinahanglan sang pahanugot halin sa nagapamuno nga lider nga nagakapot sang kinahanglanon nga mga yabi sang priesthood (tan-awa sa 3.4.1). Kon kinahanglanon, pwede maghatag sang pahanugot ang manuglaygay nga ginhatagan niya sang awtoridad. Tan-awa ang masunod nga mga tsart. Ang mga pagtumod sa mga stake president magamit man sa mga mission president. Ang mga pagtumod sa mga bishop magamit man sa mga branch president.

Sin-o nga mga Lider ang Nagakapot sang Yabi sa Pagpahanugot nga Maghikot ukon Magbaton sang mga Ordinansa sang Kaluwasan kag Pangkahitaasan?

Ordinansa	Sin-o ang Nagakapot sang mga Yabi
Ordinansa Bunyag	Sin-o ang Nagakapot sang mga Yabi Bishop (para sa 8-anyos nga kabataan kag sa mga bata sang miyembro nga nagaedad 9 anyos pataas nga ang mga bunyag ginpaisol tungod sa mga kasablagan sa pamensaron) Mission president (para sa mga convert)
Ordinansa Kumpirmasyon kag dulot sang Balaan nga Espiritu	Sin-o ang Nagakapot sang mga Yabi Bishop (para sa 8-anyos nga kabataan kag sa mga bata sang miyembro nga nagaedad 9 anyos pataas nga ang mga bunyag ginpaisol tungod sa mga kasablagan sa pamensaron) Mission president (para sa mga hinaylo)
Ordinansa Pagtugyan sang Melchizedek Priesthood kag ordinasyon sa isa ka palangakuan (para sa mga lalaki)	Sin-o ang Nagakapot sang mga Yabi Stake president
Ordinansa Endowment sa templo	Sin-o ang Nagakapot sang mga Yabi Bishop kag stake president
Ordinansa Pagselyo sa templo	Sin-o ang Nagakapot sang mga Yabi Bishop kag stake president

Sin-o nga mga Lider ang Nagakapot sang Yabi sa Pagpahanugot nga Maghikot ukon Magbaton sang mga Ordinansa kag mga Bendisyon?

Ordinansa ukon Bendisyon	Sin-o ang Nagakapot sang mga Yabi
Ordinansa ukon Bendisyon Paghatag sang ngalan kag bendisyon sang kabataan	Sin-o ang Nagakapot sang mga Yabi Bishop
Ordinansa ukon Bendisyon Sakramento	Sin-o ang Nagakapot sang mga Yabi Bishop
Ordinansa ukon Bendisyon Pagtugyan sang Aaronic Priesthood kag ordinasyon sa isa ka palangakuan (para sa young men kag mga lalaki)	Sin-o ang Nagakapot sang mga Yabi Bishop
Ordinansa ukon Bendisyon Pag-set apart sang mga miyembro nga magserbisyo sa mga calling	Sin-o ang Nagakapot sang mga Yabi Tan-awa sa 30.8
Ordinansa ukon Bendisyon Pagkonsagrar sang lana	Sin-o ang Nagakapot sang mga Yabi Indi kinahanglan sang pahanugot
Ordinansa ukon Bendisyon Pagbendisyon sang nagamasakit	Sin-o ang Nagakapot sang mga Yabi Indi kinahanglan sang pahanugot
Ordinansa ukon Bendisyon Mga bendisyon sa pagpaumpaw kag laygay, dala na ang mga bendisyon sang amay	Sin-o ang Nagakapot sang mga Yabi Indi kinahanglan sang pahanugot
Ordinansa ukon Bendisyon Pagdedikar sang mga balay	Sin-o ang Nagakapot sang mga Yabi Indi kinahanglan sang pahanugot
Ordinansa ukon Bendisyon Pagdedikar sang mga lulubngan	Sin-o ang Nagakapot sang mga Yabi Ang lider sa priesthood nga nagapanguna sa programa
Ordinansa ukon Bendisyon Mga bendisyon sang patriarka	Sin-o ang Nagakapot sang mga Yabi Bishop

18.4

Mga Ordinansa para sa Menor de Edad nga Kabataan

Ang menor de edad nga bata pwede nga bendisyunan, bunyagan, kumpirmahan, maordin sa palangakuan sang priesthood, ukon ma-set apart sa calling kon may pahanugot sang (1) ginikanan nga may legal nga kinamatarong sa paghimo sang desisyon ukon sang mga (2) legal guardian.

18.6

Paghatag Ngalan kag Bendisyon sa Kabataan

Ang mga kabataan ginahatagan sang ngalan kag ginabendisyunan sa oras sang fast and testimony meeting sa ward kon diin nagaestar ang ila mga ginikanan.

18.6.1

Sin-o ang Nagahatag sang Bendisyon

Ang ordinansa sang paghatag sang ngalan kag bendisyon sa bata ginahiwat sang mga nagakapot sang Melchizedek Priesthood, suno sa instruksyon sa Doktrina kag mga Kasugtanan 20:70.

Ang tawo ukon pamilya nga gusto nga ang bata makabaton sang ngalan kag bendisyon nagapakig-angot sang ordinansa sa bishop. Sia ang nagakapot sang mga yabi sang priesthood sa paghatag sang ngalan kag bendisyon sa kabataan sa ward.

Ang bishop pwede magtugot sa tatay nga nagakapot sang Melchizedek Priesthood sa paghatag sang ngalan kag bendisyon sa iya bata bisan pa nga ang tatay indi pa lubos nga nagakabagay para sa templo (tan-awa sa 18.3). Ginapaisog sang mga bishop ang mga tatay nga ihanda ang ila mga kaugalingon sa pagbendisyon sang ila kaugalingon nga kabataan.

18.6.2

Mga Instruksyon

Sa direksyon sang bishopric, ang mga nagakapot sang Melchizedek Priesthood nagatindog palibot sa paghatag sang ngalan kag bendisyon sa bata. Ginabutang nila ang ila mga kamot sa idalom sang lapsag, ukon ginatakdong nila sing mamag-an ang ila mga kamot sa ulo sang mas gulang na nga bata. Dayon ang isa nga amo ang nagahambal:

1. Magatawag sa Amay nga Langitnon nga daw pareho sa pangamuyo.

2. Mahambal nga ang pagbendisyon ginahikot paagi sa awtoridad sang Melchizedek Priesthood.

3. Hatagan ang bata sang ngalan.

4. Lawagon ang ngalan sang bata.

5. Hatagan ang bata sang bendisyon suno sa giya sang Espiritu.

6. Magatakop sa ngalan ni Jesucristo.

18.6.3

Child Record Form kag Blessing Certificate

Antes bendisyunan ang bata, ang klerk nagagamit sang Leader and Clerk Resources (LCR) para ihanda ang Child Record Form. Pagkatapos sang bendisyon, nagahimo sia sang membership record kag nagahimo sang Blessing Certificate. Ini nga sertipiko ginapirmahan sang bishop kag ginahatag sa mga ginikanan ukon guardian sang bata.

Ang ngalan sa membership record kag sertipiko dapat nga pareho sa ngalan sa birth certificate, civil birth registry, ukon legal nga ngalan.

18.7

Bunyag

Ang bunyag paagi sa pagtugmaw sa tubig sang isa nga may awtoridad kinahanglanon gid para ang tawo mangin miyembro sang Simbahan kag makabaton sang Balaan nga Espiritu. Ang tanan nga nagahandum sang pangkahitaasan kinahanglan nga magsunod sa ehemplo sang Manluluwas paagi sa pagbaton sining mga ordinansa.

18.7.1

Pahanugot para Mabunyagan kag Makumpirma ang isa ka Tawo

18.7.1.1

Mga Kabataan nga mga Member of Record (Kabataan nga Natawo sa mga Ginikanan nga Miyembro na sang Simbahan)

Ang bishop ang nagakapot sang mga yabi sang priesthood sa pagbunyag sang 8-anyos nga mga member of record sa ward. Ini nga mga bata dapat mabunyagan kag makumpirmahan sa adlaw gid ukon pagkatapos lang gid sang ila ika-8 nga kaadlawan kon mahimo (tan-awa sa Doktrina kag mga Kasugtanan 68:27). Ini nga kabataan may ara na sang mga membership record sa simbahan (tan-awa sa 33.6.2). Paglab-ot nila sa edad nga 8 anyos, ginasiguro sang bishop nga makabaton sila sang tanan nga oportunidad para batunon ang ebanghelyo kag mabunyagan kag makumpirma.

Ang bishop ukon isa ka naasayn nga manuglaygay ang nagainterbyu sang mga child of record para sa bunyag kag kumpirmasyon. Ang mga instruksyon ara sa 31.2.3.1.

Para sa impormasyon parte sa paghimo sang Baptism and Confirmation Record, tan-awa sa 18.8.3.

18.7.1.2

Mga Convert

Ang mission president ang nagakapot sang mga yabi sang priesthood para mabunyagan ang mga convert sa isa ka mission. Tungod sini, ang mga full-time nga misyonero ang nagainterbyu sang mga convert para sa bunyag kag kumpirmasyon.

18.7.2

Programa sang Bunyag

Ang programa sang bunyag dapat nga simple lang, malip-ot, kag makapapagsik sa espirituhanon. Pwede ini magsakop sang masunod:

1. Prelude nga musika

2. Malip-ot nga pag-abiabi sang brother nga nagapamuno sang programa

3. Pangbukas nga himno kag pangamuyo

4. Isa ukon duha ka malip-ot nga mga mensahe parte sa mga topiko sang ebanghelyo, pareho sang bunyag kag dulot sang Balaan nga Espiritu

5. Pinili nga musika

6. Ang bunyag

7. Tiyempo sang pagpamalandong samtang nagailis sang mala nga bayo ang mga nagpartisipar sa bunyag (ang mga himno ukon kanta sa Primary pwede man nga tukaron ukon kantahon sa sini nga tion)

8. Kumpirmasyon sang 8-anyos nga mga member of record; kumpirmasyon sang mga convert kon nadesisyunan sang bishop (tan-awa sa 18.8)

9. Pagpaambit sang mga testimonya sang bag-o nga convert, kon gusto nila

10. Pangtakop nga himno kag pangamuyo

11. Postlude nga musika

Kon child of record ang nagahanda nga mabunyagan, isa ka miyembro sang bishopric kag Primary presidency ang nagahambalanay upod sa pamilya para planuhan kag iiskedyul ang programa sang bunyag. Isa ka miyembro sang bishopric ang nagapamuno sang programa. Kon masobra sa isa ka bata ang bunyagan sa pareho nga bulan, pwede sila nga magdungan sa programa sang bunyag.

Sa mga stake nga madamo sang mga child of record, ang mga bata sa lainlain nga mga ward pwede nga magtingob sa isa ka programa sang bunyag. Isa ka miyembro sang stake presidency ukon isa ka naasayn nga miyembro sang high council ang nagapamuno sa programa.

Ang bunyag sang isa ka miyembro sang pamilya indi dapat pag-ipaisol hasta nga makabaton ang tatay sang priesthood kag sia mismo ang magbunyag.

Sa giya sang bishopric, ang ward mission leader (kon may ara) ukon ang miyembro sang elders quorum presidency nga amo ang nagapanguna sa pangmisyonaryo nga buluhaton ang nagaplano kag nagapamuno sang mga programa sang bunyag para sa mga convert. Nagapakig-angot sila sa full-time nga mga misyonero.

18.7.3

Sin-o ang Nagahikot sang Ordinansa

Ang ordinansa sang bunyag ginahikot sang isa ka priest ukon nagakapot sang Melchizedek Priesthood. Ang tawo nga nagahikot sang bunyag dapat may pahanugot sang bishop (ukon sang mission president kon isa ka full-time nga misyonero ang nagahikot sang bunyag).

Pwede nga tugotan sang bishop ang isa ka tatay ukon nagakapot sang Melchizedek Priesthood nga bunyagan ang iya bata bisan pa nga ang tatay indi pa lubos bagay magsulod sa templo (tan-awa sa 18.3). Ginapaisog sang mga bishop ang mga tatay nga ihanda ang ila mga kaugalingon para mabunyagan ang ila mismo nga kabataan.

18.7.4

Diin Ginahiwat ang Ordinansa

Ang mga bunyag dapat nga hiwaton sa baptismal font kon may ara. Kon wala sang font, pwede sa lugar nga may tubig nga hilway sa katalagman.

Kinahanglan gid may ara sang responsable nga hamtong samtang ginasudlan sang tubig ang font hasta nga mapahubsan ini, matinluan, kag masiguro pagkatapos sang bunyag. Ang font dapat gid nga mapahubsan dayon pagkatapos sang kada bunyag. Ang mga pwertahan sang font dapat nga trangkahan kon wala ginagamit.

18.7.5

Bayo

Ang tawo nga nagahikot sang bunyag kag ang tawo nga ginabunyagan nagasuksok sang puti nga bayo nga wala nagasilang kon mabasa. Ang tawo nga na-endow na nagasuksok sang temple garmet sa dalom sang iya bayo samtang nagahiwat sang bunyag. Ang lokal nga mga yunit nagabakal sang bayo para sa bunyag gamit ang pondo sang badyet kag wala nagapabayad sa paggamit sini.

Ang bayo para sa bunyag pwede nga orderon sa store.ChurchofJesusChrist.org.

18.7.6

Mga Saksi

Duha ka saksi, nga aprubado sang nagapanguna nga lider, ang nagatan-aw sang tagsa ka bunyag para masiguro nga nahimo ini sang husto. Ang mga nabunyagan na nga mga miyembro sang Simbahan, pati na ang kabataan kag mga lamharon, pwede nga magserbe nga mga saksi.

Ginasulit ang bunyag kon ang mga tinaga wala mahambal sang insakto suno sa nasulat sa Doktrina kag mga Kasugtanan 20:73. Kinahanglan man ini suliton kon ang isa ka parte sang lawas sang tawo, buhok, ukon bayo wala matabuni tanan sang tubig.

18.7.7

Mga Instruksyon

Para maghikot sang ordinansa sang bunyag, ang priest ukon nagakapot sang Melchizedek Priesthood:

1. Nagatindog sa tubig upod ang tawo nga bulunyagan.

2. Nagakapot sa tuo nga pulso gamit ang wala niya nga kamot (para mahapos kag sigurado). Ang tawo nga ginabunyagan nagauyat sa wala nga pulso sang nagakapot sang priesthood gamit ang iya wala nga kamot.

3. Nagaalsa sang iya tuo nga kamot.

4. Nagalawag sang kompleto nga ngalan sang tawo kag nagasiling, “Sa awtoridad nga ginhatag sa akon ni Jesucristo, ginabunyagan ko ikaw sa ngalan sang Amay, kag sang Anak, kag sang Balaan nga Espiritu. Amen” (Doktrina kag mga Kasugtanan 20:73).

5. Pakaptan sa tawo ang iya ilong gamit ang tuo nga kamot (para mahapos); dayon ibutang ang iya tuo nga kamot sa likod sang tawo kag itugmaw ang tawo sa tubig, nga matabunan gid dala ang bayo.

6. Buligan pabangon ang tawo halin sa tubig.

18.8

Kumpirmasyon kag Dulot sang Balaan nga Espiritu

Pagkatapos nga mabunyagan ang tawo, ginakumpirma sia nga miyembro sang Simbahan kag nagabaton sang Balaan nga Espiritu paagi sa pagtakdong sang mga kamot (tan-awa sa Doktrina kag mga Kasugtanan 20:41; Mga Binuhatan 19:1–6). Ang tawo mangin miyembro sang Simbahan kon makompleto ining duha ka mga ordinansa kag marekord sing husto (tan-awa sa Juan 3:5; Doktrina kag mga Kasugtanan 33:11; 3 Nefi 27:20).

Ang bishop ang nagadumala sang paghikot sang mga kumpirmasyon. Ang walo-katuig nga kabataan masami ginakumpirma sa adlaw sang ila bunyag. Ang mga convert masami ginakumpirma sa sacrament meeting sa ward kon diin sila nagaestar, pinakamaayo sa Domingo pagkatapos sang ila bunyag.

Ang miyembro sang bishopric nagasunod sa mga pagsulundan sa 29.2.1.1 kon magpakilala sang bag-o nga mga miyembro.

18.8.1

Sin-o ang Nagahikot sang Ordinansa

Ang nagakapot lamang sang Melchizedek Priesthood nga angayan magsulod sa templo ang pwede nga mangin tighambal sa kumpirmasyon. Pero, pwede nga tugotan sang bishop ang tatay nga may Melchizedek Priesthood nga magtindog sa bilog upod sa mga magakumpirma sang iya bata bisan pa nga ang tatay indi pa bagay magsulod sa templo (tan-awa sa 18.3).

Isa sa miyembro sang bishopric ang nagapartisipar sa sining ordinansa. Kon misyonero nga mga elder ang nagtudlo sang convert, ginahagad sila sang bishop nga magpartisipar.

18.8.2

Mga Instruksyon

Sa direksyon sang bishopric, isa ukon madamo pa nga mga nagakapot sang Melchizedek Priesthood ang pwede magpartisipar sa kumpirmasyon. Ginapatong nila ang ila mga kamot sa ulo sang tawo. Dayon ang magahatag sang bendisyon:

1. Nagatawag sang tawo sa kompleto niya nga ngalan.

2. Nagahambal nga ang ordinansa ginahikot sa awtoridad sang Melchizedek Priesthood.

3. Ginakumpirma ang tawo nga miyembro sang Ang Simbahan ni Jesucristo sang mga Santos sa Ulihing mga Adlaw.

4. Mahambal nga “batuna ang Balaan nga Espiritu” (indi “batuna ang dulot sang Balaan nga Espiritu”).

5. Nagahatag sang bendisyon suno sa giya sang Espiritu.

6. Nagatakop sa ngalan ni Jesucristo.

18.8.3

Rekord kag Sertipiko sang Bunyag kag Kompirmasyon

Antes interbyuhon ang bata nga member of record para sa bunyag, ang klerk nagagamit sang LCR para maghimo sang Baptism and Confirmation Form. Ang bishop ukon ang naasayn nga manuglaygay ang nagahiwat sang interbyu kag nagapirma sang pormas. Pagkatapos sang bunyag kag kumpirmasyon, ginagamit sang klerk ini nga pormas para i-update ang membership record sang bata sa LCR.

Kon full-time nga misyonero ang nagainterbyu sang convert para sa bunyag, ginahimo niya ang Baptism and Confirmation Record sa Area Book Planner (ABP) nga app. Pagkatapos sang bunyag kag kumpirmasyon, ginarekord sang mga misyonero ang impormasyon sa ABP kag ginapasa online sa ward clerk. Ginarebyu sang ward clerk ang impormasyon sa LCR kag ginahimuan sang membership record.

Pagkatapos nga maghimo sang membership record, nagahimo ang klerk sang Baptism and Confirmation Certificate. Ginapirmahan ang sertipiko sang bishop kag ginahatag sa tawo.

Ang ngalan sa membership record kag sertipiko dapat nga pareho sa birth certificate, civil birth registry, ukon sa iya legal nga ngalan.

18.9

Ang Sakramento

Ang mga miyembro sang Simbahan nagatipon sa Adlaw nga Inugpahuway sa pagsimba sa Dios kag pag-ambit sang sakramento (tan-awa sa Doktrina kag mga Kasugtanan 20:75; 59:9; Moroni 6:5–6). Sa oras sining ordinansa, nagaambit sila sang tinapay kag tubig sa pagdumdom sang pagsakripisyo sang Manluluwas sang Iya unod kag dugo kag sa pagpabakod sang ila sagrado nga mga kasugtanan (tan-awa sa Mateo 26:26–28; Joseph Smith Translation, Mark 14:20–25; Lucas 22:15–20; 3 Nefi 18; Moroni 6:6).

18.9.1

Pahanugot sa Paghikot sang Sakramento

Ang bishop ang nagakapot sang mga yabi sang priesthoot sa pagdumala sang sakramento sa ward. Ang tanan nga nagapartisipar sa paghanda, pagbendisyon, kag pagpanagtag sang sakramento kinahanglan makabaton sang pahanugot halin sa iya ukon sa tawo sa idalom sang iya direksyon.

18.9.2

Sin-o ang Nagahikot sang Ordinansa

• Ang mga teacher, priest, kag mga nagakapot sang Melchizedek Priesthood pwede nga maghanda sang sakramento.

• Ang mga priest kag mga nagakapot sang Melchizedek Priesthood pwede nga magbendisyon sang sakramento.

• Ang mga deacon, teacher, priest, kag mga nagakapot sang Melchizedek Priesthood pwede nga magpanagtag sang sakramento.

18.9.3

Mga Pagsulundan para sa Sakramento

Tungod sang kasagrado sang sakramento, ang mga lider sang priesthood dapat nga maghanda sing maayo para mangin plastado kag may pagtahod sa tion miting.

Ang mga suplay para sa sakramento maorder sa store.ChurchofJesusChrist.org.

Ang mga nagadumala sang sakramento dapat nga maghimo sini sa paagi nga may dignidad, nga nagapamensar nga ginarepresentar nila ang Ginuo.

Ang pagpanagtag sang sakramento dapat nga natural lang kag indi tama ka pormal.

Bisan pa nga ang sakramento para sa mga miyembro sang Simbahan, indi dapat pagpunggan ang iban sa pag-ambit sini.

18.9.4

Mga Instruksyon

1. Ang mga nagahanda, nagabendisyon, ukon nagapanagtag sang sakramento dapat manghugas anay sang ila mga kamot gamit ang habon ukon iban pa nga inugtinlo.

2. Ginasiguro sang mga teacher, priest, ukon mga nagakapot sang Melchizedek Priesthood nga naplastar na ang mga tray sang tinapay nga may bilog pa nga tinapay, ang mga tray sang tubig upod ang matinlo nga tubig sa mga suludlan, kag limpyo nga mantel antes pa sang miting.

3. Samtang nagakanta ang mga miyembro sang pangsakramento nga kanta, ang mga mabendisyon sang sakramento nagatindog nga may pagtahod, ginabuksan nila ang tabon sa mga tray sang tinapay, kag ginasipad-sipad ang tinapay sa magagmay nga parte.

4. Pagkatapos sang himno, ang tawo nga mabendisyon sang tinapay nagaluhod kag nagahambal sang pangsakramento nga pangamuyo para sa tinapay (tan-awa sa Doktrina kag mga Kasugtanan 20:77).

5. Ginasiguro sang bishop nga ang mga pangamuyo para sa sakramento ginahambal sing maathag, husto, kag may dignidad. Kon nagsala ang tawo sa paghambal kag sia na mismo ang nagtadlong, indi na kinahanglan nga koreksyonan pa liwat. Kon wala gintadlong sang tawo ang iya sayop, ginapangabay sia sang bishop sa maayo nga paagi nga suliton ang pangamuyo.

6. Pagkatapos sang pangamuyo, may pagtahod nga ginapanagtag sang mga nagakapot sang priesthood ang tinapay sa mga miyembro. Ang nagapanguna nga lider ang una nga ginahatagan sini, pagkatapos libre na ini nga ipanagtag sa iban. Pagdaho sang tray sa mga miyembro, pwede nila ini ipanagtag sa iban.

7. Ang mga miyembro nagakuha sang tinapay ukon tubig gamit ang tuo nga kamot kon mahimo.

8. Kon napanagtag na ang tinapay sa tanan nga mga miyembro, ginabalik sang mga nagapanagtag ang mga tray sa lamisa sang sakramento. Ginatabunan sang mga nagabendisyon sang sakramento ang mga tray sang tinapay kag ginabuksan ang mga tray sang tubig.

9. Ang tawo nga mabendisyon sang tubig nagaluhod kag nagahambal sang pangsakramento nga pangamuyo para sa tubig (tan-awa sa Doktrina kag mga Kasugtanan 20:79). Ginaislan niya sang tinaga nga tubig ang alak.

10. Pagkatapos sang pangamuyo, ang mga nagakapot sang priesthood may pagtahod nga nagapanagtag sang tubig sa mga miyembro. Ang nagapanguna nga lider ang una nga nagabaton sini, pagkatapos pwede na ini ipanagtag sa tanan.

11. Kon napanagtag na ang tubig sa tanan nga mga miyembro, ginabalik sang mga nagapanagtag sang sakramento ang mga tray sa lamisa sang sakramento. Ginatabunan sang mga nagbendisyon sang sakramento ang mga tray, kag ang mga nagbendisyon kag nagpanagtag sang sakramento nagabalik sa ila mga pulungkuan sing malinong.

12. Pagkatapos sang miting, ang mga naghanda sang sakramento nagapanglimpyo, nagapiod sang mga mantel, kag nagakuha sang wala magamit nga tinapay.

18.10

Pagtugyan sang Priesthood kag Pag-ordin sa isa ka Palangakuan

May duha ka bahin ang priesthood: ang Aaronic kag Melchizedek (tan-awa sa 3.3; Doktrina kag mga Kasugtanan 107:1, 6). Kon ang priesthood ginatugyan sa isa ka tawo, ginaordin man sia sa isa ka palangakuan sinang priesthood. Pagkatapos nga matugyan ining mga priesthood, ang isa ka lalaki kinahanglan na lang nga maordin sa iban pa nga mga palangakuan sina nga priesthood.

18.10.1

Melchizedek Priesthood

Ang stake president ang nagakapot sang mga yabi sang priesthood sa pagtugyan sang Melchizedek Priesthood kag pag-ordin sa mga palangakuan sang elder kag high priest. Pero, masami, ang bishop ang nagahatag sang mga rekomendasyon para sa sini nga mga ordinasyon.

18.10.1.1

Mga Elder

Ang kaangay-angay nga mga lalaki pwede nga magbaton sang Melchizedek Priesthood kag maordin nga mga elder kon mag-edad na sila nga 18 anyos pataas. Base sa mga sirkumstansya sang indibidwal, ginatan-aw sang bishop kon bala ang pamatan-on dapat na nga maordin bilang elder pagkatapos gid sang iya ika-18 nga kaadlawan ukon magpabilin anay sa korum sang mga priest.

Para makadesisyon, ginakonsulta anay sang bishop ang pamatan-on kag ang iya mga ginikanan ukon mga guardian. Ang kaangay-angay nga mga lalaki dapat nga maordin nga mga elder sa edad 19 ukon antes sila maggwa sa poder sang ila ginikanan para mag-eskwela sa kolehiyo, magserbisyo sa full-time mission, magserbisyo sa militar, ukon magbaton sang regular nga trabaho.

Ang bag-o lang ginbunyagan nga mga lalaki nga nagaedad 18 anyos pataas ginaordin nga mga elder pagkatapos nila nga:

• Mabaton ang Aaronic Priesthood kag nag-alagad bilang mga priest.

• Magtubo sa ila pag-intiendi sang ebanghelyo.

• Magpakita nga nagakabagay sila para diri.

Wala ginapangayo ang partikular nga kalawigon sang pagkamiyembro sa Simbahan.

18.10.1.2

Mga High Priest

Ang mga lalaki ginaordin nga mga high priest kon sila tawgon sa stake presidency, high council, ukon bishopric.

18.10.1.3

Pag-interbyu kag Pag-sustain

Upod ang pahanugot sang stake presidency, ginainterbyu sang bishop ang brother suno sa instruksyon sa Melchizedek Priesthood Ordination Record. Dayon ginainterbyu man sia sang isa ka miyembro sang stake presidency. Upod ang pahanugot sang mission president, pwede nga interbyuhon sang district president ang brother nga ordinan para mangin elder (tan-awa sa 6.3).

18.10.2

Aaronic Priesthood

Ang bishop ang nagakapot sang mga yabi sang priesthood sa pagtugyan sang Aaronic Priesthood kag pag-ordin sa mga palangakuan sang deacon, teacher, kag priest. Ang kaangay-angay nga mga brother masami ginaordin sa sining mga palangakuan sa masunod nga mga pangidaron, pero indi kon mas bata pa:

• Ang mga deacon sa pagsugod sang tuig nga magaedad sila 12 anyos

• Ang mga teacher sa pagsugod sang tuig nga magaedad sila 14 anyos

• Ang mga priest sa pagsugod sang tuig nga magaedad sila 16 anyos

Ang bishop ukon naasayn nga manuglaygay ang nagainterbyu sang mga inug-ordin nga mga deacon ukon teacher para mahibal-an kon handa na sila sa espirituhanon. Ang bishop ang nagainterbyu sang mga inug-ordin nga mga priest.

Antes interbyuhon ang pamatan-on para sa ordinasyon sa priesthood, ang miyembro sang bishopric nagalisensya sa mga ginikanan ukon guardian sang pamatan-on. Kon diborsyado ang mga ginikanan, nagalisensya sia sa (mga) ginikanan nga may legal nga kustodiya sa iya.

18.10.3

Pagpresentar sang Miyembro nga Sakdagon antes Sia Maordin

Pagkatapos nga mainterbyu ang brother kag matakos nga kaangay-angay sia nga maordin sa isa ka palangakuan sang priesthood, ginapresentar sia para sakdagon (tan-awa sa Doktrina kag mga Kasugtanan 20:65, 67). Ang mga brother nga inug-ordin nga mga elder ukon high priest ginapresentar sang isa ka miyembro sang stake presidency sa pangkabilogan nga sesyon sang stake conference (tan-awa sa 6.3 mga instruksyon para sa mga district president). Ang mga brother nga inug-ordin nga mga deacon, teacher, ukon priest ginapresentar sang miyembro sang bishopric sa pangsakramento nga miting.

Ang tawo nga nagapamuno sang pagsakdag nagapangabay sa sining brother nga magtindog. Ginaanunsyo niya ang rekomendasyon nga tugyanan sang Aaronic ukon Melchizedek Priesthood (kon kinahanglanon) ang brother kag nga i-ordin sia sa sinang palangakuan sang priesthood. Dayon ginaagda niya ang mga miyembro nga sakdagon ang rekomendasyon. Halimbawa, sa pagpresentar sang brother para i-ordin nga elder, pwede sia maghambal nga:

“Ginapanugyan namon nga si [ngalan] makabaton sang Melchizedek Priesthood kag i-ordin nga elder. Ang mga pabor pwede magpakita sini paagi sa pag-alsa sang kamot. [Magpundo sang makadali.] Ang nagakontra, kon may ara, pwede man magpahibalo sini. [Magpundo sang makadali.]”

Kon may miyembro nga maayo ang rekord nga magkontra sang ordinasyon, ang nagapanguna nga lider ukon ang isa pa ka naasayn nga lider sang priesthood magapatawag sa iya sing pribado pagkatapos sang miting. Ginatinguhaan sang lider nga intiendihon kon ngaa nagkontra ang miyembro. Ginahibalo niya kon ang miyembro may nahibal-an nga pangginawi nga magahimo sang natungdan nga di-nagakabagay nga maordin sa palangakuan sang priesthood.

Sa iban nga mga kaso, mahimo nga kinahanglan sang isa ka brother nga maordin bilang elder ukon high priest antes sia ipresentar sa stake conference. Kon matabo ini, ginapresentar sia sa pangsakramento nga miting sa iya ward para sa pagsakdag. Dayon ginapresentar sia sa madason nga stake conference para pabakuron ang ordinasyon (nga ginasunod ang proseso sang pagsakdag, nga ginlaragway sa ibabaw).

18.10.4

Sin-o ang Nagahikot sang Ordinansa

Ang stake president ukon isa ka nagakapot sang Melchizedek Priesthood sa idalom sang iya direksyon pwede nga mag-ordin sang isa ka lalaki sa palangakuan sang elder. Upod ang pahanugot sang mission president, ang district president ukon isa pa ka tawo sa idalom sang iya direksyon pwede maghikot sang ordinasyon (tan-awa sa 6.3). Ang mga nagakapot lang sang Melchizedek Priesthood ang magtindog sa bilog.

Ang stake president ukon high priest sa idalom sang iya direksyon pwede mag-ordin sang isa ka tawo sa palangakuan sang high priest. Mga high priest lang ang pwede magtindog sa bilog.

Ang tawo nga nagaordin sang isa pa ka tawo sa palangakuan sang Melchizedek Priesthood dapat kaangay-angay magsulod sa templo. Kinahanglan ara ang stake president ukon ang tawo nga iya gindesignar.

Ang priest ukon nagakapot sang Melchizedek Priesthood pwede nga mag-ordin sang isa ka brother sa palangakuan sang deacon, teacher, ukon priest. Kinahanglan awtorisado sia sang bishop. Kinahanglan ara ang bishop ukon ang tawo nga iya gindesignar.

Para makapartisipar sa ordinasyon sa Aaronic Priesthood, ang tawo kinahanglan nga isa ka priest ukon nagakapot sang Melchizedek Priesthood.

Pwede nga tugotan sang bishop ang tatay nga priest ukon nagakapot sang Melchizedek Priesthood nga i-ordin ang iya bata sa palangakuan sang deacon, teacher, ukor priest bisan pa nga indi pa gid bagay ang tatay nga magsulod sa templo (tan-awa sa 18.3). Ginapaisog sang mga bishop ang mga tatay nga ihanda ang ila mga kaugalingon nga i-ordin ang ila kaugalingon nga mga bata nga lalaki.

18.10.5

Mga Instruksyon

Sa pagtugyan sang priesthood kag pag-ordin sang tawo sa isa ka palangakuan sang priesthood, isa ukon mas madamo pa nga awtorisado nga mga nagakapot sang priesthood ang nagatungtong sang ila mga kamot sa ulo sang tawo. Dayon ang isa nga magahambal sang bendisyon:

1. Nagalawag sang kompleto nga ngalan sang tawo.

2. Nagahambal sang awtoridad nga iya mismo ginakaptan para maghikot sang ordinansa (kon ini Aaronic ukon Melchizedek Priesthood).

3. Nagatugyan sang Aaronic ukon Melchizedek Priesthood, luwas lang kon natugyan na ini sadto.

4. Nagaordin sinang tawo sa isa ka palangakuan sang Aaronic ukon Melchizedek Priesthood kag ginahatag ang mga kinamatarong, mga gahum, kag awtoridad sinang palangakuan.

5. Nagahatag sang bendisyon suno sa giya sang Espiriitu.

6. Nagatakop sa ngalan ni Jesucristo.

Para mag-ordin sang tawo sa isa ka palangakuan sang priesthood kon natugyan na ini sa iya, ginalaktawan sang tawo nga nagahikot sang ordinasyon ang ika 3 nga tikang.

18.10.6

Rekord kag Sertipiko sang Ordinasyon

Antes interbyuhon ang isa ka brother para maordin sa isa ka palangakuan sang Aaronic Priesthood, ginagamit sang klerk ang LCR para maghimo sang Aaronic Priesthood Ordination Record. Ang bishop ukon ang naasayn nga manuglaygay nagainterbyu kag nagapirma sang pormas kon napasaran niya ang tanan nga kondisyones sang katakos.

Pagkatapos sang ordinasyon, ginakumpleto sang bishop ukon sang naasayn nga manuglaygay ang pormas kag ginahatag ini sa klerk. Ginarekord niya ang ordinasyon sa LCR kag nagahimo sang sertipiko sang ordinasyon.

Ang legal nga ngalan sang tawo amo dapat ang gamiton sa rekord kag sertipiko sang ordinasyon.

18.11

Pag-set Apart sang mga Miyembro para Magserbisyo sa mga Calling

Ang mga miyembro nga ginatawag kag gina-sustain sa kalabanan sang mga pwesto sa Simbahan dapat ma-set apart sa sina nga posisyon (tan-awa sa Juan 15:16; Doktrina kag mga Kasugtanan 42:11; tan-awa man sa 3.4.3.1 sining libro). Sa tion sang pag-set apart, ang tawo ginahatagan sang (1) awtoridad nga mag-akto sa iya calling kag (2) mga pulong sang bendisyon suno sa giya sang Espiritu.

Ang mga stake president, bishop, kag quorum president nagabaton sang mga yabi sang pagkapangulo kon sila gina-set apart (tan-awa sa 3.4.1.1). Pero, ang tinaga nga mga yabi indi dapat paggamiton sa pag-set apart sang mga miyembro sa pag-alagad sa iban nga mga calling, pati na ang sa mga manuglaygay sa mga pangulohan.

18.11.1

Sin-o ang Naga-Set Apart

Ang pag-set apart ginahimo sang isa ka nagakapot sang Melchizedek Priesthood. Kinahanglan nga may pahanugot sia sang lider nga nagakapot sang nagakabagay nga mga yabi sang priesthood. Ang mga awtorisado sa pag-set apart nalista sa 30.8. Ang isa ka elder indi dapat mangin manughambal ukon magtindog upod sa bilog kon ang tawo ginaset apart sa isa ka palangakuan nga nagapangayo nga dapat high priest sia.

Sa idalom sang direksyon sang nagapanguna nga lider, isa ukon madamo pa nga mga nagakapot sang Melchizedek Priesthood pwede nga magpartisipar sa pag-set apart. Ang mga presidente gina-set apart antes sang ila mga manuglaygay.

Pwede pahanugotan sang nagapanguna nga lider ang bana ukon tatay nga nagakapot sang Melchizedek Priesthood nga magtindog sa bilog sa pag-set apart sang iya asawa ukon kabataan bisan pa nga indi pa sia angayan nga magsulod sa templo (tan-awa sa 18.3).

18.11.2

Mga Instruksyon

Itungtong sang isa ukon madamo pa nga mga nagakapot sang Melchizedek Priesthood ang ila mga kamot sa ulo sang tawo. Dayon ang isa nga amo ang magahambal:

1. Magalawag sang kompleto nga ngalan sang tawo.

2. Magahambal nga nagaakto sia sa paagi sa awtoridad sang Melchizedek Priesthood.

3. Maga-set apart sang tawo sa iya calling sa stake, ward, korum, ukon klase.

4. Magatugyan sang mga yabi kon dapat ini mabaton sang tawo.

5. Magahatag sang bendisyon suno sa giya sang Espiritu.

6. Magatakop sa ngalan ni Jesucristo.

18.12

Pagkonsagrar sang Lana

Ang mga nagakapot sang Melchizedek Priesthood kinahanglan nga magkonsagrar sang olive oil antes ini gamiton sa pag-anoint (pagpahid sang lana) sa nagamasakit ukon ginalisdan (tan-awa sa Santiago 5:14). Indi pwede maggamit sang iban nga lana.

Ang mga suludlan sang lana mabakal sa store.ChurchofJesusChrist.org.

Indi pwede nga imnon sang mga miyembro ang ginkonsagrar nga lana ukon ibutang sa apektado nga mga parte sang lawas.

18.12.1

Sin-o ang Nagahikot sang Ordinansa

Isa ukon madamo pa nga mga nagakapot sang Melchizedek Priesthood ang pwede magkonsagrar sang lana. Indi nila kinahanglan magpangayo sang pahanugot halin sa isa ka lider sa priesthood.

18.12.2

Mga Instruksyon

Sa pagkonsagrar sang lana, ang nagakapot sang Melchizedek Priesthood:

1. Magauyat sang bukas nga suludlan sang lana.

2. Magatawag sa Amay nga Langitnon pareho sa pangamuyo.

3. Magahambal nga nagaakto sia sa awtoridad sang Melchizedek Priesthood.

4. Magakonsagrar sang lana (indi sang suludlan) kag maga-set apart sini para sa pag-anoint kag pagbendisyon sang nagamasakit kag nalisdan.

5. Magatakop sa ngalan ni Jesucristo.

18.13

Pagbendisyon sang Nagamasakit

Ang pagbendisyon sang nagamasakit “paagi sa pagtungtong sang mga kamot” may duha ka parte: ang pag-anoint paagi sa lana kag pagselyo sang anointing upod ang bendisyon. Kon wala sang ginkonsagrar nga lana, pwede nga maghatag sang bendisyon paagi sa awtoridad sang Melchizedek Priesthood bisan nga wala sang anointing.

18.13.1

Sin-o ang Nagahatag sang Bendisyon

Ang kaangay-angay lamang nga mga nagakapot sang Melchizedek Priesthood ang pwede magbendisyon sa nagamasakit ukon nalisdan. Indi nila kinahanglan magpangayo sang pahanugot sang isa ka lider sang priesthood. Kon mahimo, ang tatay nga nagakapot sang Melchizedek Priesthood ang nagabendisyon sang nagamasakit nga mga miyembro sang iya pamilya.

Kasami, duha ukon madamo pa nga mga nagakapot sang Melchizedek Priesthood ang nagabendisyon sang nagamasakit. Pero, pwede himuon sang isa lang ang pareho anointing kag pagselyo sang anointing.

18.13.2

Mga Instruksyon

Ang anointing sang lana ginahimo sang isa ka nagakapot sang Melchizedek Priesthood. Iya:

1. Ginapatuloan sang isa ka tulo sang ginkonsagrar nga lana ang ulo sang tawo.

2. Ginatungtong ang iya mga kamot sa ulo sang tawo kag ginalawag ang kompleto niya nga ngalan.

3. Ginahambal nga nagaakto sia sa awtoridad sang Melchizedek Priesthood.

4. Ginahambal nga naga-anoint sia sang lana nga ginkonsagrar para sa pag-anoint kag pagbendisyon sang nagamasakit kag ginalisdan.

5. Nagatakop sa ngalan ni Jesucristo.

Para magselyo sang anointing, isa ukon madamo pa nga mga nagakapot sang Melchizedek Priesthood ang magatungtong sang ila mga kamot sa ulo sang tawo. Dayon ang nagaselyo sang anointing:

1. Magalawag sang kompleto nga ngalan sang tawo.

2. Magahamal nga ginaselyohan niya ang anointing paagi sa awtoridad sang Melchizedek Priesthood.

3. Magahambal sang bendisyon suno sa giya sang Espiritu.

4. Magatakop sa ngalan ni Jesucristo.

18.14

Mga Bendisyon sang Pagpaumpaw kag Laygay, Dala ang mga Bendisyon sang Amay

18.14.1

Sin-o ang Nagahatag sang Bendisyon

Ang mga nagakapot sang Melchizedek Priesthood pwede nga maghatag sang mga bendisyon sang pagpaumpaw kag laygay sa mga miyembro sang pamilya kag sa iban nga nagapangayo sini.

Ang tatay nga nagakapot sang Melchizedek Priesthood pwede maghatag sang mga bendisyon sang amay sa iya kabataan. Ginapaisog sang mga ginikanan ang ila kabataan nga magpangayo sang mga bendisyon sang amay sa panahon sang panginahanglan. Ang mga bendisyon sang amay pwede marekord para sa personal nga gamit.

Ang nagakapot sang Melchizedek Priesthood indi kinahanglan magpangayo sang pahanugot sa isa ka lider sang priesthood para maghatag sang bendisyon sang pagpaumpaw kag laygay ukon bendisyon sang amay.

18.14.2

Mga Instruksyon

Para maghatag sang bendisyon sa pagpaumpaw kag laygay ukon bendisyon sang amay, isa ukon madamo pa nga nagakapot sang Melchizedek Priesthood ang magatungtong sang ila mga kamot sa ulo sang tawo. Dayon ang magahatag sang bendisyon:

1. Magalawag sang kompleto nga ngalan sang tawo.

2. Magahambal nga ang bendisyon ginahikot paagi sa awtoridad sang Melchizedek Priesthood.

3. Magahatag sang mga pulong sang pagpakamaayo, pagpaumpaw, kag laygay suno sa giya sang Espiritu.

4. Magatakop sa ngalan ni Jesucristo.

18.15

Pagdedikar sang mga Balay

Pwede nga ipadedikar sang mga miyembro sang Simbahan ang ila mga balay paagi sa awtoridad sang Melchizedek Priesthood.

18.15.2

Mga Instruksyon

Sa pagdedikar sang balay, ang nagakapot sang Melchizedek Priesthood:

1. Magasambit sa Amay nga Langitnon nga daw pareho sa pangamuyo.

2. Magahambal nga nagaakto sia paagi sa awtoridad sang Melchizedek Priesthood.

3. Magadedikar sang balay bilang sagrado nga lugar kon diin pwede magtiner ang Balaan nga Espiritu kag nagahatag sang iban pa nga bendisyon suno sa giya sang Espiritu.

4. Magatakop sa ngalan ni Jesucristo.

18.16

Pagdedikar sang mga Lulubngan

18.16.1

Sin-o ang Nagadedikar sang mga Lulubngan

Ang tawo nga magadedikar sang lulubngan dapat nagakapot sang Melchizedek Priesthood kag awtoridado sang lider sang priesthood nga nagapamuno sang programa.

18.16.2

Mga Instruksyon

Sa pagdedikar sang lulubngan, ang nagakapot sang Melchizedek Priesthood:

1. Magasambit sa Amay nga Langitnon pareho sang sa pangamuyo.

2. Magahambal nga nagaakto sia paagi sa awtoridad sang Melchizedek Priesthood.

3. Magadedikar kag magakonsagrar sang lulubngan bilang palahuwayan sang lawas sang napatay.

4. Magapangamuyo nga pakabalaanon ang lugar kag maprotektahan tubtob sa Pagkabanhaw (kon nagakabagay).

5. Magapangayo sa Amay nga Langitnon nga paumpawan ang pamilya kag magahambal sang suno sa giya sang Balaan nga Espiritu.

6. Magatakop sa ngalan ni Jesucristo.

Kon ang lawas sang miyembro sang Simbahan gin-cremate, ang nagapangulo nga lider nagagamit sang iya panghunahuna para magdesisyon kon bala idedikar ang lugar kon diin ibutang ang mga abo.

18.17

Mga Bendisyon sang Patriarka

Ang kada nagakabagay, nabunyagan nga miyembro may kinamatarong nga makabaton sang bendisyon sang patriarka, nga nagahatag sang inspirado nga direksyon halin sa Amay nga Langitnon (tan-awa sa Genesis 48:14–16; 49; 2 Nefi 4:3–11).

Ginainterbyu sang bishop ukon naasayn nga manuglaygay ang mga miyembro nga gusto makabaton sang bendisyon sang patriarka. Kon ang miyembro, kaangay-angay, nagahimo ang nagainterbyu sang Patriarchal Blessing Recommend. Ginapasa niya ini paagi sa Patriarchal Blessing System sa ChurchofJesusChrist.org.

Ang tawo nga nagaisyu sang Patriarchal Blessing Recommend nagasiguro nga ang miyembro hamtong na para maintiendihan niya ang kaimportante kag sagrado nga kinaiya sang bendisyon.

18.17.1

Pagbaton sang Bendisyon sang Patriarka

Pagkatapos nga mabaton ang rekomendasyon, ginakontak sang miyembro ang patriarka para magpahimo sang appointment para magbaton sang bendisyon sang patriarka. Sa adlaw nga natalana, dapat magkadto ang miyembro sa patriarka nga may mainampuon nga balatyagon kag nagasuksok sang pangsimba nga bayo.

Ang tagsa ka bendisyon sang patriarka sagrado, pribado, kag personal. Gani, ginahatag ini sang pribado magluwas lamang sa limitado nga mga miyembro sang pamilya nga mahimo mag-upod.

Ang tawo nga nagabaton sang bendisyon sang patriarka dapat nga magtipig sang mga pulong sini, binagbinagon ini, kag magpangabuhi nga angayan sa pagbaton sang ginpromisa nga mga bugay sa sining kabuhi kag sa wala katapusan.

Indi dapat pag-ikumparar sang mga miyembro sang Simbahan ang mga bendisyon kag indi ini dapat isugid sa iban magluwas sa malapit nga mga miyembro sang pamilya. Ang mga bendisyon sang patriarka indi dapat pagbasahon sa mga miting sang Simbahan ukon sa iban pa nga pangpubliko nga mga pagtililipon.