18.

Panangannong kadagiti Ordinansa ken Bendision ti Priesthood

18.0

Pakauna

Dagiti ordinansa ken bendision ket sagrado nga aramid a maannong babaen ti turay ti priesthood ken iti nagan ni Jesucristo. Dagiti ordinansa ken bendision ti priesthood ti mangipaay iti pannakagun-od iti bileg ti Dios (kitaen iti Doktrina ken Katulagan 84:20).

Nasken a maannong dagiti ordinansa ken bendision nga addaan pammati iti Nailangitan nga Ama ken ni Jesucristo ken mayannurot iti pannarabay ti Espiritu Santo. Siguraduen dagiti lider a maannong dagitoy nga addaan iti umno a pananganamong (no kasapulan), nga addaan iti kasapulan a turay ti priesthood, iti umno a wagas, ken babaen kadagiti maikari a makiraman (kitaen iti 18.3).

18.1

Dagiti Ordinansa ti Pannakaisalakan ken Pannakaitan-ok

Karaman iti priesthood ti turay a mangidaulo kadagiti ordinansa ti ebanghelio a kasapulan para iti pannakaisalakan ken pannakaitan-ok. Agaramid dagiti tao kadagiti sagrado a katulagan iti Dios bayat ti panangawatda kadagitoy nga ordinansa. Nailista iti baba dagiti ordinansa ti pannakaisalakan ken pannakaitan-ok:

• Panagbuniag

• Kumpirmasion ken sagut ti Espiritu Santo

• Panangi-confer iti Melchizedek Priesthood ken panangorden kadagiti saad [office] (para kadagiti lallaki)

• Endowment iti templo

• Pannakailantip iti templo

No matay ti maysa nga ubing a nayanak iti katulagan sakbay nga agtawen iti 8, awan ti kasapulan wenno maannong nga ordinansa. No saan a nayanak ti ubing iti katulagan, ti laeng ordinansa a kasapulanna ket ti mailantip kadagiti nagannak. Gapu iti Pannubbot ti Mangisalakan, amin nga ubbing a matay sakbay nga agtawen iti 8 ket “maisalakan iti celestial a pagarian ti langit” (Doktrina ken Katulagan 137:10; kitaen met iti Moroni 8:8–12).

18.3

Pannakiraman iti Ordinansa wenno Bendision

Dagiti mangannong wenno makiraman iti ordinansa wenno bendision ket nasken nga addaanda iti kasapulan a turay ti priesthood ken maikarida. Gagangay, ti pagrukodan ti pannakaikari ket adda pakainaiganna iti panangikut iti maysa a temple recommend. Nupay kasta, kas iwanwan ti Espiritu ken dagiti instruksion iti daytoy a kapitulo, mabalin a palugodan dagiti bishop ken stake president dagiti amma ken assawa a lallaki nga addaan iti kasapulan a saad [office] ti priesthood tapno mangannong wenno makiraman iti sumagmamano nga ordinansa ken bendision uray no saanda a naan-anay a maikari iti templo. Saan koma a makiraman ti maysa a priesthood holder nga addaan kadagiti saan pay a narisut a nadagsen a basol.

Ti panangannong wenno panangawat iti sumagmamano nga ordinansa ken bendision ket agkasapulan iti pananganamong manipud iti mangimatmaton a lider nga agig-iggem kadagiti kasapulan a tulbek ti priesthood (kitaen iti 3.4.1). No kasapulan, mabalin nga ited ti pananganamong ti maysa a mamagbaga a dutokanna. Kitaen dagiti sumaganad a tsart. Ti panangibasar kadagiti stake president ket mayaplikar met kadagiti mission president. Ti panangibasar kadagiti bishop ket mayaplikar met kadagiti branch president.

Asino kadagiti Lider nga Agiggem kadagiti Tulbek ti Mangted iti Anamong a Mangannong wenno Mangawat kadagiti Ordinansa ti Pannakaisalakan ken Pannakaitan-ok?

Ordinansa	Asino ti Agiggem kadagiti Tulbek
Ordinansa Panagbuniag	Asino ti Agiggem kadagiti Tulbek Bishop (para kadagiti ubbing nga agtawen iti 8 ken para kadagiti miembro ti rekord nga agtawen iti 9 ken natataengan a naitantan ti panagbuniagda gapu iti pagkurangan iti panunot) Mission president (para kadagiti convert)
Ordinansa Kumpirmasion ken sagut ti Espiritu Santo	Asino ti Agiggem kadagiti Tulbek Bishop (para kadagiti ubbing nga agtawen iti 8 ken para kadagiti miembro ti rekord nga agtawen iti 9 ken natataengan a naitantan ti panagbuniagda gapu iti pagkurangan iti panunot) Mission president (para kadagiti convert)
Ordinansa Panangi-confer iti Melchizedek Priesthood ken panangorden kadagiti saad [office] (para kadagiti lallaki)	Asino ti Agiggem kadagiti Tulbek Stake president
Ordinansa Endowment iti templo	Asino ti Agiggem kadagiti Tulbek Bishop ken stake president
Ordinansa Pannakailantip iti templo	Asino ti Agiggem kadagiti Tulbek Bishop ken stake president

Asino kadagiti Lider nga Agiggem kadagiti Tulbek ti Mangted iti Anamong a Mangannong wenno Mangawat Kadagiti dadduma pay nga Ordinansa ken Bendision?

Ordinansa wenno Bendision	Asino ti Agiggem kadagiti Tulbek
Ordinansa wenno Bendision Panangnagan ken panangbendision kadagiti ubbing	Asino ti Agiggem kadagiti Tulbek Bishop
Ordinansa wenno Bendision Ti sakramento	Asino ti Agiggem kadagiti Tulbek Bishop
Ordinansa wenno Bendision Panangi-confer iti Aaronic Priesthood ken panangorden iti saad [office] (para kadagiti agtutubo a lallaki ken lallaki)	Asino ti Agiggem kadagiti Tulbek Bishop
Ordinansa wenno Bendision Panang-set apart kadagiti miembro nga agserbi kadagiti calling	Asino ti Agiggem kadagiti Tulbek Kitaen iti 30.8
Ordinansa wenno Bendision Panangkonsagrar iti lana	Asino ti Agiggem kadagiti Tulbek Saan a kasapulan ti pananganamong
Ordinansa wenno Bendision Panangannong iti masakit	Asino ti Agiggem kadagiti Tulbek Saan a kasapulan ti pananganamong
Ordinansa wenno Bendision Dagiti bendision ti liwliwa ken balakad, agraman dagiti bendision ti ama	Asino ti Agiggem kadagiti Tulbek Saan a kasapulan ti pananganamong
Ordinansa wenno Bendision Panangidaton kadagiti pagtaengan	Asino ti Agiggem kadagiti Tulbek Saan a kasapulan ti pananganamong
Ordinansa wenno Bendision Panangidaton kadagiti tanem	Asino ti Agiggem kadagiti Tulbek Ti priesthood leader a mangimaton iti serbisio
Ordinansa wenno Bendision Dagiti bendision ti patriarka	Asino ti Agiggem kadagiti Tulbek Bishop

18.4

Dagiti Ordinansa para kadagiti Ubbing a Menor de Edad

Mabalin a mabendisionan, mabuniagan, makumpirmaan, maordenan ti maysa nga ubing a menor de edad iti saad ti priesthood, wenno mai-set apart iti maysa a calling babaen laeng ti pammalubos dagiti (1) nagannak nga addaan iti legal a kalintegan a makipaset iti desision wenno (2) legal a guardian.

18.6

Panangnagan ken Panangbendision kadagiti Ubbing

Gagangay a mainaganan ken mabendisionan dagiti ubbing bayat ti miting ti panagayuno ken panagpaneknek iti ward a pagnanaedan dagiti dadakkelda.

18.6.1

Asino ti Mangted iti Bendision

Ti ordinansa ti panangnagan ken panangbendision iti maysa nga ubing ket aramiden dagiti Melchizedek Priesthood holder, a maitunos iti Doktrina ken Katulagan 20:70.

Ti maysa a tao wenno pamilia nga agtarigagay nga umawat ti maysa nga ubing iti nagan ken bendision ket mangitunos iti ordinansa iti bishop. Iggemna dagiti tulbek ti priesthood para iti panangnagan ken panangbendision kadagiti ubbing iti ward.

Mabalin a palubosan ti maysa a bishop ti maysa nga ama nga addaan iti Melchizedek Priesthood a mangnagan ken mangbendision iti anakna uray no saan a naan-anay a maikari ti ama iti templo (kitaen iti 18.3). Allukoyen dagiti bishop dagiti amma a mangisagana iti bagbagida a mangbendision kadagiti bukodda nga annak.

18.6.2

Dagiti Instruksion

Iti babaen ti panangiturong ti bishopric, agguummong dagiti Melchizedek Priesthood holder iti sirkulo tapno mangnagan ken mangbendision iti maysa nga ubing. Ikabilda dagiti imada iti baba ti maladaga, wenno ipatayda a silalag-an dagiti imada iti ulo ti in-inauna nga ubing. Kalpasanna ti maysa nga agak-akem a para sao:

1. Awaganna ti Nailangitan nga Ama kas iti kararag.

2. Dakamatenna a maan-annong ti bendision babaen ti turay ti Melchizedek Priesthood.

3. Ikkanna ti ubing iti nagan.

4. Kasaritana ti ubing.

5. Mangted iti bendision iti ubing kas iwanwan ti Espiritu.

6. Gibusanna iti nagan ni Jesucristo.

18.6.3

Porma ti Rekord ken Sertipiko ti Bendision ti Ubing

Sakbay a mabendisionan ti maysa nga ubing, usaren ti clerk ti Leader and Clerk Resources (LCR) tapno mangisagana iti Porma ti Rekord ti Ubing [Child Record Form]. Kalpasan ti bendision, mangaramid iti rekord ti kinamiembro iti dayta a sistema ken mangisagana iti Sertipiko ti Bendision [Blessing Certificate]. Daytoy a sertipiko ket pirmaan ti bishop ken maited kadagiti nagannak wenno guardian ti ubing.

Ti nagan iti rekord ken sertipiko ti kinamiembro ket nasken a maipada iti sertipiko ti pannakayanak, sibil a rehistro ti pannakayanak, wenno agdama a legal a nagan.

18.7

Panagbuniag

Ti panagbuniag babaen ti pannakairarem iti danum babaen ti maysa nga addaan turay ket kasapulan para iti maysa a tao nga agbalin a miembro ti Simbaan ken umawat iti Espiritu Santo. Amin nga agkalikagum iti pannakaitan-ok ket nasken a mangsurot iti pagwadan ti Mangisalakan babaen ti panangawat kadagitoy nga ordinansa.

18.7.1

Pananganamong iti maysa a Tao a Mabuniagan ken Makumpirmaan

18.7.1.1

Ubbing a Miembro ti Rekord

Iggem ti bishop dagiti tulbek ti priesthood para iti panangbuniag kadagiti 8 ti tawenna a miembro ti rekord iti maysa a ward. Dagitoy nga ubbing ket nasken a mabuniagan ken makumpirmaan kabayatan wenno kalpasan ti maika-8 a panagkasangayda kas nainkalintegan (kitaen iti Doktrina ken Katulagan 68:27). Dagitoy ket ubbing nga addaanen kadagiti rekord ti kinamiembro iti Simbaan (kitaen iti 33.6.2). No madanonda ti tawen nga 8, siguraduen ti bishop nga addaanda iti tunggal gundaway nga umawat iti ebanghelio ken mabuniagan ken makumpirmaan.

Ti bishop wenno ti maysa a nadutokan a mamagbaga ti manginterbyu kadagiti ubbing ti rekord [children of record] para iti panagbuniag ken kumpirmasion. Adda dagiti instruksion iti 31.2.3.1.

Para iti impormasion maipapan iti panangpunno iti Rekord iti Panagbuniag ken Kumpirmasion, kitaen iti 18.8.3.

18.7.1.2

Dagiti Convert

Iggem ti mission president dagiti tulbek ti priesthood para iti panangbuniag kadagiti convert iti maysa a mision. Gapu iti daytoy, aginterbyu dagiti full-time a misionario kadagiti convert para iti panagbuniag ken kumpirmasion.

18.7.2

Dagiti Serbisio iti Panagbuniag

Nasken a simple, ababa, ken naespirituan a makaitag-ay ti serbisio ti panagbuniag. Mabalin nga iraman daytoy ti sumaganad:

1. Pakauna a musika

2. Ababa a panagkablaaw manipud iti kabsat a lalaki a mangiturturong iti serbisio

3. Maysa a panglukat a himno ken kararag

4. Maysa wenno dua nga ababa a mensahe maipapan iti topiko ti ebanghelio, kas iti panagbuniag ken ti sagut ti Espiritu Santo

5. Maysa a napili a musika

6. Ti panagbuniag

7. Oras ti panagraem bayat ti panagsukat dagiti nakipaset iti panagbuniag iti namaga a kawes (mabalin a maipatokar wenno makanta dagiti himno wenno kanta iti Primary bayat daytoy a kanito)

8. Ti kumpirmasion dagiti agtawen iti 8 a miembro ti rekord; ikeddeng ti bishop ti kumpirmasion dagiti convert (kitaen iti 18.8)

9. Panangted iti pammaneknek dagiti baro a convert, no tarigagayan

10. Maysa a panggibus a himno ken kararag

11. Panggibus a musika

No agsagsagana ti maysa nga anak ti rekord [child of record] a mabuniagan, makiuman ti maysa a miembro ti bishopric ken ti panguluen ti Primary iti pamilia tapno agplano ken mangiskediul iti serbisio ti panagbuniag. Maysa a miembro ti bishopric ti mangiturong iti serbisio. No nasurok a maysa nga ubing ti mabuniagan iti isu met laeng a bulan, mabalinda ti aggigiddan iti serbisio ti panagbuniag.

Kadagiti stake nga aduan iti annak ti rekord, mabalin dagiti ubbing manipud iti adu a ward ti aggigiddan a mabuniagan iti maysa a serbisio ti panagbuniag. Maysa a miembro ti panguluen ti stake wenno ti nadutokan a nangato a konsehal ti mangiturong iti serbisio.

Saan koma a maitantan ti panagbuniag ti maysa a miembro ti pamilia agingga a mabalin nga umawat ti maysa nga ama iti priesthood ken mangannong mismo iti panagbuniag.

Iti babaen ti panangiwanwan ti bishopric, ti lider ti mision ti ward (no maawagan ti maysa) wenno ti miembro ti panguluen ti korum dagiti ti elder a mangidaulo iti aramid ti misionario iti ward ket agplano ken mangiturong kadagiti serbisio ti panagbuniag para kadagiti convert. Makipagtunosda kadagiti full-time a misionario.

18.7.3

Asino ti Mangannong iti Ordinansa

Maysa a priest wenno Melchizedek Priesthood holder ti mangannong iti ordinansa ti panagbuniag. Ti tao a mangannong iti panagbuniag ket nasken nga anamongan ti bishop (wenno ti mission president no ti maysa a full-time a misionario ti mangannong iti panagbuniag).

Mabalin a palubosan ti bishop ti maysa nga ama a priest wenno Melchizedek Priesthood holder a mangbuniag iti anakna uray no saan a naan-anay a maikari ti ama iti templo (kitaen iti 18.3). Allukoyen dagiti bishop dagiti amma a mangisagana iti bagbagida a mangbuniag kadagiti bukodda nga annak.

18.7.4

Sadino a Maannong ti Ordinansa

Nasken a maannong dagiti panagbuniag iti maysa a puente a pagbuniagan [baptismal font] no adda maysa a maaramat. No awan ti puente, mabalin nga usaren ti natalged a bagi ti danum.

Para iti kinatalged, masapul nga adda responsable a nataengan bayat ti panangpunno iti puente iti danum ken agtalinaed agingga a maatianan, madalusan, ken natalged daytoy. Nasken a maatianan a dagus ti puente kalpasan ti tunggal panagbuniag. Nasken a maikandado dagiti ridaw iti puente no saan a mausar daytoy.

18.7.5

Panagkawes

Ti tao a mangannong iti panagbuniag ken ti tao a mabuniagan ket agaruatda iti puraw a kawes a saan nga agsaragasag no mabasa. Agkawes ti na-endow a tao iti garment iti templo a makin-uneg iti daytoy a kawes bayat ti panangannongna iti panagbuniag. Gatangen dagiti lokal a yunit dagiti kawes ti panagbuniag babaen dagiti pondo ti badyet ken dida singiren ti pannakausarna.

Mabalin ti agorder kadagiti kawes ti panagbuniag iti store.ChurchofJesusChrist.org.

18.7.6

Dagiti Saksi

Dua a saksi, nga inanamongan ti mangimatmaton a lider, ti mangpaliiw iti tunggal panagbuniag tapno masigurado a nasayaat ti pannakaannong daytoy. Mabalin nga agserbi a saksi dagiti nabuniagan a miembro ti Simbaan, agraman dagiti ubbing ken agtutubo.

Masapul a maulit ti buniag no saan nga eksakto a naisao dagiti balikas a kas iti naited iti Doktrina ken Katulagan 20:73. Nasken pay a maulit daytoy no saan a naan-anay a nairarem ti paset ti bagi, buok, wenno kawes ti tao.

18.7.7

Dagiti Instruksion

Tapno maannong ti ordinansa ti panagbuniag, ti maysa a priest wenno Melchizedek Priesthood holder:

1. Agtakder iti danum a kaduana ti tao a mabuniagan.

2. Iggamanna ti makannawan a pulso ti tao babaen ti makannigid nga imana (para iti pakagin-awaan ken kinatalged). Iggaman ti tao a mabuniagan ti kannigid a pulso ti priesthood holder babaen ti kannigid nga imana.

3. Itag-ayna ti kannawan a takiagna iti kuadrado.

4. Dakamatenna ti naan-anay a nagan ti tao ket kunana, “Babaen ti turay nga inted ni Jesucristo kaniak, buniaganka iti nagan ti Ama, ken ti Anak, ken ti Espiritu Santo. Amen” (Doktrina ken Katulagan 20:73).

5. Paiggamanna iti tao ti agongna babaen ti kannawan nga imana (para iti pakagin-awaan); kalpasanna ikabilna ti kannawan nga imana iti ngato iti likud ti tao ket naan-anay nga iraremna ti tao, agraman ti kawes.

6. Tulonganna ti tao a lumung-aw iti danum.

18.8

Kumpirmasion ken ti Sagut ti Espiritu Santo.

Kalpasan ti pannakabuniag ti maysa a tao, makumpirmaan isuna a miembro ti Simbaan ken umawat iti Espiritu Santo babaen ti panangipatay kadagiti ima (kitaen iti Doktrina ken Katulagan 20:41; Dagiti Aramid 19:1–6). Agbalin ti tao a maysa a miembro ti Simbaan kalpasan a makumpleto ken siuumno a mairekord dagitoy nga ordinansa (kitaen iti Juan 3:5; Doktrina ken Katulagan 33:11; 3 Nephi 27:20).

Ti bishop ti mangimaton iti pannakaannong dagiti kumpirmasion. Gagangay a makumpirmaan dagiti walo-ti-tawenna nga ubbing iti aldaw a pannakabuniagda. Gagangay a makumpirmaan dagiti convert iti ania man a miting ti sakramento iti ward a pagnanaedanda, nasaysayaat no iti Domingo kalpasan ti panagbuniagda.

Suroten ti maysa a miembro ti bishopric dagiti pangiwanwan iti 29.2.1.1 no mangyam-ammo kadagiti baro a miembro.

18.8.1

Asino ti Mangannong iti Ordinansa

Ti laeng Melchizedek Priesthood holder a maikari iti templo ti mabalin nga agakem a para sao para iti kumpirmasion. Nupay kasta, mabalin a palubosan ti maysa a bishop ti maysa nga ama nga addaan iti Melchizedek Priesthood nga agtakder iti sirkulo para iti kumpirmasion iti anakna uray no saan a naan-anay a maikari ti ama iti templo (kitaen iti 18.3).

Uray maysa laeng a miembro ti bishopric ti makiraman iti daytoy nga ordinansa. No insuro dagiti elder a misionario ti maysa a convert, awisen ida ti bishop a makiraman.

18.8.2

Dagiti Instruksion

Iti babaen ti panangiturong ti bishopric, mabalin a makiraman ti maysa wenno ad-adu pay a Melchizedek Priesthood holder iti maysa a kumpirmasion. Ipatayda a silalag-an dagiti imada iti ulo ti tao. Kalpasanna ti maysa nga agak-akem a para sao:

1. Awaganna ti tao babaen iti naan-anay a naganna.

2. Dakamatenna a maan-annong ti ordinansa babaen ti turay ti Melchizedek Priesthood.

3. Kumpirmaenna a ti tao ket maysa a miembro ti Ti Simbaan ni Jesucristo dagiti Santo iti Ud-udina nga Aldaw.

4. Dakamatenna ti “awatem ti Espiritu Santo” (saan nga “awatem ti sagut ti Espiritu Santo”).

5. Mangted kadagiti balikas ti pammendision kas iwanwan ti Espiritu.

6. Gibusanna iti nagan ni Jesucristo.

18.8.3

Rekord ken Sertipiko ti Panagbuniag ken Kumpirmasion

Sakbay a mainterbyu ti maysa nga ubing a miembro ti rekord para iti panagbuniag, usaren ti clerk ti LCR a mangisagana iti Baptism and Confirmation Form [Porma ti Panagbuniag ken Kumpirmasion. Ti bishop wenno ti maysa a nadutokan a mamagbaga ti mangiturong iti interbyu ken mangpirma iti porma. Kalpasan ti panagbuniag ken kumpirmasion, usaren ti clerk daytoy a porma tapno ma-update ti rekord ti kinamiembro ti ubing iti LCR.

No interbyuen ti maysa a full-time misionario ti maysa a convert para iti panagbuniag, punnuanna ti Baptism and Confirmation Record nga us-usaren ti Area Book Planner (ABP) app. Kalpasan ti panagbuniag ken kumpirmasion, irekord dagiti misionario ti impormasion iti ABP ket isumiteda daytoy iti clerk ti ward babaen ti elektroniko. Irebyu ti clerk ti ward ti impormasion iti LCR ket agaramid iti rekord ti kinamiembro.

Kalpasan a maaramid ti rekord ti kinamiembro, isagana ti clerk ti Sertipiko ti Panagbuniag ken Kumpirmasion [Baptism and Confirmation Certificate]. Pirmaan ti bishop daytoy a sertipiko ken maited iti tao.

Ti nagan iti rekord ken sertipiko ti kinamiembro ket nasken a maipada iti sertipiko ti pannakayanak, sibil a rehistro ti pannakayanak, wenno agdama a legal a nagan.

18.9

Ti Sakramento

Agmimiting dagiti miembro ti Simbaan iti aldaw ti Sabbath tapno agdaydayaw iti Dios ken makiranud iti sakramento (kitaen iti Doktrina ken Katulagan 20:75; 59:9; Moroni 6:5–6). Kabayatan daytoy nga ordinansa, makiranudda iti tinapay ken danum tapno manglaglagip iti sakripisio ti Mangisalakan iti lasag ken darana ken tapno mangpabaro kadagiti sagrado a katulaganda (kitaen iti Mateo 26:26–28; Patarus ni Joseph Smith, Marcos 14:20–25; Lucas 22:15–20; 3 Nephi 18; Moroni 6:6).

18.9.1

Pananganamong a Mangannong iti Sakramento

Iggem ti bishop dagiti tulbek ti priesthood para iti panangannong iti sakramento iti ward. Amin a makiraman iti panagsagana, panangbendision, ken panangipasa iti sakramento ket nasken nga umawat iti pananganamong manipud kenkuana wenno iti maysa a tao iti babaen ti panangiturongna.

18.9.2

Asino ti Mangannong iti Ordinansa

• Mabalin nga isagana dagiti teacher, priest, ken Melchizedek Priesthood holder ti sakramento.

• Mabalin a bendisionan dagiti priest ken Melchizedek Priesthood holder ti sakramento.

• Mabalin nga ipasa dagiti deacon, teacher, priest, ken Melchizedek Priesthood holder ti sakramento.

18.9.3

Dagiti Pangiwanwan para iti Sakramento

Gapu iti sagrado a saguday ti sakramento, nasken a siaannad nga agsagana dagiti priesthood leader tapno naurnos ken naraem daytoy.

Mabalin ti agorder kadagiti suplay iti sakramento iti store.ChurchofJesusChrist.org.

Nasken nga aramiden dagiti mangannong iti sakramento iti nadayaw a wagas, nga am-amirisenda nga isuda ti mangibagbagi iti Apo.

Nasken a gagangay ken saan unay a pormal ti pannakaipasa ti sakramento.

Nupay ti sakramento ket para kadagiti miembro ti Simbaan, nasken nga awan ti maaramid a manglapped kadagiti dadduma iti pannakiranud iti daytoy.

18.9.4

Dagiti Instruksion

1. Dagiti mangisagana, mangbendision, wenno mangipasa iti sakramento ket umuna a bugguanda dagiti imada iti sabon wenno sabali pay a pagdalus.

2. Siguraduen dagiti teacher, priest, wenno Melchizedek Priesthood holder a nakapueston dagiti bandeha ti tinapay, saan pay a napirsapirsay a tinapay, dagiti bandeha ti danum nga addaan kadagiti kopa ti nadalus a danum, ken nadalus a lupot ti lamisaan sakbay ti miting.

3. Bayat ti panagkanta dagiti miembro ti ward iti himno ti sakramento, siraraem nga agtakder dagiti mangbendision iti sakramento ket ikkatenda ti lupot a mangabbong kadagiti bandeha ti tinapay, ket pirsapirsayenda ti tinapay iti kas kadakkel ti kagat.

4. Kalpasan ti himno, agparintumeng ti tao a mangbendision iti tinapay ket isaona ti kararag ti sakramento para iti tinapay (kitaen iti Doktrina ken Katulagan 20:77).

5. Siguraduen ti bishop a silalawag, siuumno, ken addaan iti dignidad ti pannakaisao dagiti kararag iti sakramento. No agbiddut ti maysa a tao iti pannakaibalikas ket aturenna mismo, saan a kasapulan ti nayon a pannakaatur. No saan nga aturen ti tao ti biddutna, sisasayaat a kiddawen ti bishop kenkuana a mangulit iti kararag.

6. Kalpasan ti kararag, siraraem nga ipasa dagiti priesthood holder ti tinapay kadagiti miembro. Ti mangimatmaton a lider ti umuna nga umawat iti daytoy, kalpasanna awan ti naikeddeng nga urnos. Apaman a maited ti bandeha kadagiti miembro, mabalinda nga ipasa daytoy iti maysa ken maysa.

7. Makiranud dagiti miembro babaen ti kannawan nga imada no mabalin.

8. No naipasan ti tinapay kadagiti amin a miembro, isubli dagiti agipaspasa iti sakramento dagiti bandeha iti lamisaan ti sakramento. Yarpaw dagiti mangbendision iti sakramento ti lupot kadagiti bandeha ti tinapay ken ikkatenda ti arpaw dagiti bandeha ti danum.

9. Agparintumeng ti tao a mangbendision iti danum ket isaona ti kararag ti sakramento para iti danum (kitaen iti Doktrina ken Katulagan 20:79). Sukatanna iti balikas a danum para iti arak.

10. Kalpasan ti kararag, siraraem nga ipasa dagiti priesthood holder ti danum kadagiti miembro. Ti mangimatmaton a lider ti umuna nga umawat iti daytoy, kalpasanna awan ti naikeddeng nga urnos.

11. No naipasan ti danum kadagiti amin a miembro, isubli dagiti agipaspasa iti sakramento dagiti bandeha iti lamisaan ti sakramento. Yarpaw dagiti nangbendision iti sakramento ti lupot kadagiti bandeha, ket siraraem nga agtugaw dagiti nangbendision ken nangipasa iti sakramento.

12. Kalpasan ti miting, agdalus dagiti nangisagana iti sakramento, mangkupin iti lupot ti lamisaan, ken mangikkat iti ania man a di nausar a tinapay.

18.10

Panangi-confer iti Priesthood ken Panangorden iti maysa a Saad [Office]

Adda dua a dibision ti priesthood: ti Aaronic ken Melchizedek (kitaen iti 3.3; Doktrina ken Katulagan 107:1, 6). No mai-confer ti priesthood iti maysa a tao, maordenan pay isuna iti maysa a saad [office] iti dayta a priesthood. Kalpasan a nai-confer ti ania man kadagitoy a priesthood, kasapulan laeng a maordenan ti maysa a lalaki iti dadduma pay a saad iti dayta a priesthood.

18.10.1

Melchizedek Priesthood

Iggem ti stake president dagiti tulbek ti priesthood para iti pannakai-confer ti Melchizedek Priesthood ken panangorden kadagiti saad ti elder ken high priest. Nupay kasta, gagangay a mangipaay ti bishop kadagiti rekomendasion para kadagitoy nga ordinasion.

18.10.1.1

Dagiti Elder

Mabalin nga umawat dagiti maikari a kakabsat iti Melchizedek Priesthood ken maordenanda nga elder no agtawendan iti 18 wenno natataengan. Maibatay kadagiti indibidual a kasasaad, ikeddeng ti bishop no rumbeng a mairekomenda ti maysa nga agtutubo a lalaki a maordenan kas elder iti mabiit kalpasan ti maika-18 a panagkasangayna wenno agtalinaed iti korum dagiti priest iti napapaut pay.

Iti panangaramidna iti daytoy a pangngeddeng, makiuman nga umuna ti bishop iti agtutubo a lalaki ken dagiti nagannak wenno guardianna. Nasken a maordenan dagiti maikari a lallaki nga elder no agtawendan iti 19 wenno sakbay a pumanawda iti pagtaenganda tapno agadal iti kolehio, agserbi iti full-time a mision, agserbi iti militar, wenno umawat iti full-time a pagtrabahuan.

Dagiti nabiit pay a nabuniagan a lallaki nga agtawen iti 18 ken natataengan ket maordenan nga elder kalpasan nga:

• Inawatda ti Aaronic Priesthood ken nagserbi a kas priest.

• Naaddaanda iti umdas a pannakaawat iti ebanghelio.

• Impakitada ti pannakaikarida.

Awan ti naituding a panawen kas miembro ti Simbaan ti kasapulan.

18.10.1.2

Dagiti High Priest

Maordenan a high priest dagiti lallaki no maawaganda iti panguluen ti stake, nangato a konseho, wenno bishopric.

18.10.1.3

Panaginterbyu ken Panagkanunong

Babaen ti pananganamong ti panguluen ti stake, interbyuen ti bishop ti kabsat a lalaki kas naibilin iti Melchizedek Priesthood Ordination Record. Kalpasanna interbyuen met isuna ti maysa a miembro ti panguluen ti stake. Babaen ti pananganamong ti mission president, mabalin nga interbyuen ti district president ti maysa a kabsat a lalaki tapno maordenan nga elder (kitaen iti 6.3).

18.10.2

Aaronic Priesthood

Iggem ti bishop dagiti tulbek ti priesthood para iti pannakai-confer ti Aaronic Priesthood ken panangorden kadagiti saad [office] ti deacon, teacher, ken priest. Gagangay a maordenan dagiti maikari a kakabsat a lallaki kadagitoy a saad kadagiti sumaganad nga edad, ngem saan a nasapsapa:

• Deacon iti rugi ti tawen a panagtawenda iti 12

• Teacher iti rugi ti tawen a panagtawenda iti 14

• Priest iti rugi ti tawen a panagtawenda iti 16

Interbyuen ti bishop wenno maysa a nadutokan a mamagbaga dagiti maordenan a deacon wenno teacher tapno maikeddeng no naespirituan a nakasaganada. Interbyuen ti bishop dagiti kakabsat a lallaki a maordenan a priest.

Sakbay ti pananginterbyuna iti maysa nga agtutubo a lalaki para iti pannakaorden iti priesthood, umawat ti maysa a miembro ti bishopric iti pammalubos manipud kadagiti nagannak wenno guardian ti agtutubo a lalaki. No nagdiborsio dagiti nagannak, mangala iti pammalubos manipud (kadagiti) nagannak nga addaan iti legal a panangaywan.

18.10.3

Panangidatag iti maysa a Miembro tapno Makanunongan sakbay a Maordenan

Kalpasan ti pannakainterbyu ti maysa a kabsat a lalaki ken natakuatan a maikari a maordenan iti saad ti priesthood, maidatag isuna para iti panangkanunong (kitaen iti Doktrina ken Katulagan 20:65, 67). Dagiti kakabsat a lallaki a maordenan nga elder wenno high priest ket idatag ti maysa a miembro ti panguluen ti stake iti sapasap a sesion ti komperensia ti stake (kitaen iti 6.3 para kadagiti instruksion para kadagiti district president). Dagiti kakabsat a lallaki a maordenan a deacon, teacher, wenno priest ket idatag ti maysa a miembro ti bishopric iti miting ti sakramento.

Ti tao a mangiturong iti panagkanunong idawatna iti kabsat a lalaki a tumakder. Ipakaammona ti singasing a mai-confer ti Aaronic wenno Melchizedek Priesthood (no kasapulan) ken mangorden iti kabsat a lalaki iti saad ti priesthood. Kalpasanna awisenna dagiti miembro a mangkanunong iti singasing. Kas pagarigan, tapno maidatag ti maysa a kabsat a lalaki a maordenan nga elder, mabalinna nga usaren dagiti balikas kas kadagitoy:

“Isingasingmi nga awaten ni [nagan] ti Melchizedek Priesthood ken maordenan nga elder. Amin nga umanamong mabalinda nga ipakita daytoy babaen ti naitag-ay nga ima. [Agsardeng biit.] Dagiti sumuppiat, no adda, mabalinda met nga ipakita daytoy. [Agsardeng biit.]”

No ti maysa a miembro a nasayaat ti reputasionna ket sumuppiat iti pannakaorden, makipagkita kenkuana iti pribado ti mangimatmaton a lider wenno sabali pay a nadutokan a lider ti priesthood kalpasan ti miting. Ikalikagum a maawatan ti lider no apay a sumuppiat ti miembro. Ammuenna no ammo ti miembro ti ugali a mabalin a mangdiskualipika iti tao manipud iti pannakaorden iti saad ti priesthood.

Iti dadduma a kaso, mabalin a kasapulan ti maysa a kabsat a lalaki a maordenan nga elder wenno high priest sakbay a maidatag isuna iti komperensia ti stake. No mapasamak daytoy, maidatag isuna iti miting ti sakramento iti wardna para iti panangkanunong. Kalpasanna maidatag isuna iti sumaruno a komperensia ti stake tapno mapasingkedan ti pannakaorden (panangibagay iti proseso para iti panangkanunong, a nailadawan iti ngato).

18.10.4

Asino ti Mangannong iti Ordinansa

Ti stake president wenno ti maysa a Melchizedek Priesthood holder iti babaen ti panangiturongna ket mabalinna nga ordenan ti maysa a lalaki iti saad ti elder. Babaen ti pananganamong ti mission president, mabalin ti district president wenno maysa a tao iti babaen ti panangiturongna a mangannong iti pannakaorden (kitaen iti 6.3). Dagiti laeng Melchizedek Priesthood holder ti mabalin nga agtakder iti sirkulo.

Ti stake president wenno ti maysa a high priest iti babaen ti panangiturongna ket mabalinna nga ordenan ti maysa a lalaki iti saad ti high priest. Dagiti laeng high priest ti mabalin nga agtakder iti sirkulo.

Nasken a maikari iti templo ti tao a mangorden iti maysa a lalaki iti Melchizedek Priesthood. Nasken nga adda ti stake president wenno maysa a tao a dutokanna.

Mabalin ti maysa a priest wenno Melchizedek Priesthood holder ti mangorden iti maysa a kabsat a lalaki iti saad ti deacon, teacher, wenno priest. Nasken a pusgan isuna ti bishop. Nasken nga adda ti bishop wenno maysa a tao a dutokanna.

Tapno makiraman iti panagorden iti Aaronic Priesthood, nasken a maysa a priest wenno Melchizedek Priesthood holder ti maysa a tao.

Mabalin a palubosan ti bishop ti maysa nga ama a priest wenno Melchizedek Priesthood holder a mangorden iti anakna a lalaki iti saad ti deacon, teacher, wenno priest uray no saan a naan-anay a maikari ti ama iti templo (kitaen iti 18.3). Allukoyen dagiti bishop dagiti amma a mangisagana iti bagbagida a mangorden iti bukodda nga annak.

18.10.5

Dagiti Instruksion

Tapno mai-confer ti priesthood ken maordenan ti tao iti saad ti priesthood, maysa wenno ad-adu pay a napusgan a priesthood holder ti mangipatay a silalag-an kadagiti imada iti ulo ti tao. Kalpasanna ti maysa nga agak-akem a para sao:

1. Awaganna ti tao babaen iti naan-anay a naganna.

2. Dakamatenna ti turay a personal nga iggemna a mangannong iti ordinansa (ti man Aaronic wenno Melchizedek Priesthood).

3. I-confer-na ti Aaronic wenno Melchizedek Priesthood, malaksid no nalpasen a nai-confer daytoy.

4. Ordenanna ti tao iti maysa a saad iti Aaronic wenno Melchizedek Priesthood ken itedna dagiti karbengan, bileg, ken turay dayta a saad.

5. Mangted kadagiti balikas ti pammendision kas iwanwan ti Espiritu.

6. Gibusanna iti nagan ni Jesucristo.

Tapno maordenan ti maysa a tao iti saad ti priesthood kalpasan a nai-confer idin kenkuana ti maitutop a priesthood, ikkaten ti tao a mangannong iti pannakaorden ti addang 3.

18.10.6

Rekord ken Sertipiko ti Pannakaorden

Sakbay a mainterbyu ti maysa a kabsat a lalaki tapno maordenan iti maysa a saad iti Aaronic Priesthood, agusar ti clerk iti LCR a mangisagana iti Aaronic Priesthood Ordination Record. Ti bishop wenno ti maysa a nadutokan a mamagbaga ti mangiturong iti interbyu ken mangpirma iti porma no matungpal amin a kondision ti pannakaikari.

Kalpasan ti pannakaorden, ti bishop wenno ti maysa a nadutokan a mamagbaga ti mangkumpleto iti porma ken itedna datoy iti maysa a clerk. Irekordna ti panagorden iti LCR ken mangisagana iti sertipiko ti pannakaorden.

Nasken nga usaren ti agdama a legal a nagan ti maysa a tao iti rekord ken sertipiko ti pannakaorden.

18.11

Panang-set Apart kadagiti Miembro nga Agserbi kadagiti Calling

Nasken a ma-set apart dagiti miembro a naawagan ken nakanunongan iti kaaduan a posision ti Simbaan tapno agserbi iti dayta a posision (kitaen iti Juan 15:16; Doktrina ken Katulagan 42:11; kitaen met iti 3.4.3.1 iti daytoy a handbook). Bayat ti panang-set apart, maikkan ti tao iti (1) turay nga agakem iti calling ken (2) balikas ti pammendision kas iwanwan ti Espiritu.

Umawat dagiti stake president, bishop, ken presidente ti korum kadagiti tulbek ti panguluen no mai-set apartda (kitaen iti 3.4.1.1). Nupay kasta, nasken a saan a mausar ti balikas a dagiti tulbek no mang-set apart kadagiti miembro nga agserbi iti dadduma pay a calling, agraman kadagiti mamagbaga kadagiti panguluen.

18.11.1

Asino ti Mangannong iti Panang-set Apart

Maysa a Melchizedek Priesthood holder ti mangannong iti panang-set apart. Nasken nga umawat iti pananganamong manipud iti lider nga agiggem kadagiti maitutop a tulbek ti priesthood. Dagiti napusgan a mangannong iti panag-set apart ket maipakita iti 30.8. Nasken a saan nga agakem kas para sao ti maysa nga elder wenno agtakder iti sirkulo no mai-set apart ti maysa a lalaki iti maysa a saad a kasapulan kenkuana tapno agbalin a high priest.

Iti babaen ti panangiturong ti mangimatmaton a lider, mabalin a makiraman ti maysa wenno ad-adu pay a Melchizedek Priesthood holder iti panang-set apart. Mai-set apart dagiti presidente iti sango dagiti mamagbagada.

Mabalin a palubosan ti maysa a mangimatmaton a lider ti maysa nga asawa a lalaki wenno ama nga addaan iti Melchizedek Priesthood tapno agtakder iti sirkulo para iti pannakai-set apart ti asawa wenno annakna uray no saan a naan-anay a maikari iti templo (kitaen iti 18.3).

18.11.2

Dagiti Instruksion

Maysa wenno ad-adu pay a Melchizedek Priesthood holder ti mangipatay a silalag-an kadagiti imada iti ulo ti tao. Kalpasanna ti maysa nga agak-akem a para sao:

1. Awaganna ti tao babaen iti naan-anay a naganna.

2. Dakamatenna nga agak-akem isuna babaen ti turay ti Melchizedek Priesthood.

3. Mang-set apart iti tao iti calling iti stake, ward, korum, wenno klase.

4. Mangi-confer kadagiti tulbek no nasken nga awaten ti tao dagitoy.

5. Mangted kadagiti balikas ti pammendision kas iwanwan ti Espiritu.

6. Gibusanna iti nagan ni Jesucristo.

18.12

Panangkonsagrar iti Lana

Masapul nga ikonsagrar dagiti Melchizedek Priesthood holder ti lana ti olibo sakbay a mausar daytoy a mangpulot [anoint] kadagiti masakit wenno agsagsagaba (kitaen iti Santiago 5:14). Saa a mabalin nga usaren ti sabali a lana.

Sidadaan a magun-od dagiti oil vial iti store.ChurchofJesusChrist.org.

Saan koma nga agkonsumo dagiti miembro iti naikonsagrar a lana wenno isapsapo daytoy kadagiti adda saksakitenna a paset ti bagi.

18.12.1

Asino ti Mangannong iti Ordinansa

Maysa wenno dua a Melchizedek Priesthood holder ti mabalin a mangkonsagrar iti lana. Dida kasapulan ti dumawat iti pananganamong manipud iti lider ti priesthood.

18.12.2

Dagiti Instruksion

Tapno maikonsagrar ti lana, ti maysa a Melchizedek Priesthood holder:

1. Iggamanna ti nakalukat a container ti lana ti olibo.

2. Awaganna ti Nailangitan nga Ama kas iti kararag.

3. Dakamatenna nga agak-akem isuna babaen ti turay ti Melchizedek Priesthood.

4. Ikonsagrarna ti lana (saan a ti container) ken i-set apart-na daytoy para iti panangpulot [anointing] ken panangbendision kadagiti masakit ken agsagsagba.

5. Gibusanna iti nagan ni Jesucristo.

18.13

Panangannong iti Masakit

Adda dua a paset ti panangannong iti masakit “babaen ti panangipatay iti ima”: panangpulot iti lana ken panangpasingked iti pannakapulot nga addaan iti bendision. No awan ti magun-od a naikonsagrar a lana, maited ti bendision babaen ti turay ti Melchizedek Priesthood nga awan ti panangpulot.

18.13.1

Asino ti Mangted iti Bendision

Dagiti laeng maikari a Melchizedek Priesthood holder ti mabalin a mangannong kadagiti masakit wenno agsagsagaba. Dida kasapulan ti dumawat iti pananganamong manipud iti lider ti priesthood. No mabalin, ti maysa nga ama nga addaan iti Melchizedek Priesthood ti mangannong kadagiti masakit a miembro ti pamiliana.

Gagangay a maysa wenno dua a Melchizedek Priesthood holder ti mangannong iti masakit. Nupay kasta, mabalin nga annongen ti maysa ti agpadpada a panangpulot ken panangpasingked.

18.13.2

Dagiti Instruksion

Maaramid ti panangpulot iti lana babaen iti maysa a Melchizedek Priesthood holder. Isu ket:

1. Mangipatedted iti naikonsagrar a lana iti ulo ti tao.

2. Ipatayna a silalag-an dagiti imana iti ulo ti tao, ken awaganna ti tao iti naan-anay a naganna.

3. Dakamatenna nga agak-akem isuna babaen ti turay ti Melchizedek Priesthood.

4. Dakamatenna a mangpulpulot isuna iti lana a naikonsagrar para iti pannakapulot ken pannakabendision dagiti masakit ken agsagsagba.

5. Gibusanna iti nagan ni Jesucristo.

Tapno mapasingkedan ti pannakapulot, maysa wenno ad-adu pay a Melchizedek Priesthood holder ti mangipatay a silalag-an kadagiti imada iti ulo ti tao. Kalpasanna, ti maysa a mangpasingked iti pannakapulot:

1. Awaganna ti tao babaen iti naan-anay a naganna.

2. Dakamatenna a paspasingkedanna ti pannakapulot babaen ti turay ti Melchizedek Priesthood.

3. Mangted kadagiti balikas ti pammendision kas iwanwan ti Espiritu.

4. Gibusanna iti nagan ni Jesucristo.

18.14

Dagiti Bendision ti Liwliwa ken Balakad, Agraman dagiti Bendision ti Ama

18.4.1

Asino ti Mangted iti Bendision

Mabalin dagiti Melchizedek Priesthood holder ti mangted kadagiti bendision ti liwliwa ken balakad kadagiti miembro ti pamilia ken iti dadduma pay nga agkiddaw kadagitoy.

Ti maysa nga ama nga addaan iti Melchizedek Priesthood ti mabalin a mangted kadagiti bendision ti ama kadagiti annakna. Allukoyen dagiti nagannak dagiti annakda nga agkiddaw kadagiti bendision ti ama iti oras ti panagkasapulan. Mabalin a mairekord dagiti bendision ti ama para iti bukod a pakausaran.

Saan a kasapulan ti maysa a Melchizedek Priesthood holder ti agkiddaw iti pananganamong manipud iti lider ti priesthood tapno mangted iti bendision ti liwliwa ken balakad wenno bendision ti maysa nga ama.

18.14.2

Dagiti Instruksion

Tapno mangted iti bendision ti liwliwa ken balakad wenno bendision ti maysa nga ama, maysa wenno ad-adu pay a Melchizedek Priesthood holder ti mangipatay kadagiti imada a silalag-an iti ulo ti tao. Kalpasanna ti maysa nga agak-akem a para sao:

1. Awaganna ti tao babaen iti naan-anay a naganna.

2. Dakamatenna a maan-annong ti bendision babaen ti turay ti Melchizedek Priesthood.

3. Mangted kadagiti balikas ti pammendision, liwliwa, ken balakad kas iwanwan ti Espiritu.

4. Gibusanna iti nagan ni Jesucristo.

18.15

Panangidaton kadagiti Pagtaengan

Mabalin a paidaton dagiti miembro ti Simbaan dagiti pagtaenganda babaen ti turay ti Melchizedek Priesthood.

18.15.2

Dagiti Instruksion

Tapno maidaton ti maysa a pagtaengan, ti maysa a Melchizedek Priesthood holder:

1. Awaganna ti Nailangitan nga Ama kas iti kararag.

2. Dakamatenna nga agak-akem isuna babaen ti turay ti Melchizedek Priesthood.

3. Idatonna ti pagtaengan kas sagrado a lugar a mabalin a pagnaedan ti Espiritu Santo ken mangted kadagiti dadduma pay a balikas kas iwanwan ti Espiritu.

4. Gibusanna iti nagan ni Jesucristo.

18.16

Panangidaton kadagiti Tanem

18.16.1

Asino ti Mangidaton iti Tanem

Ti maysa a tao a mangidaton iti tanem ket nasken nga addaan iti Melchizedek Priesthood ken pusgan ti priesthood leader a mangiturong iti serbisio.

18.16.2

Dagiti Instruksion

Tapno mangidaton iti tanem, ti maysa a Melchizedek Priesthood holder:

1. Awaganna ti Nailangitan nga Ama kas iti kararag.

2. Dakamatenna nga agak-akem isuna babaen ti turay ti Melchizedek Priesthood.

3. Idaton ken ikonsagrarna ti lugar a pagitaneman kas paginanaan ti bangkay ti pimmusay.

4. Ikararagna a mapasanto ken masalakniban ti lugar agingga iti Panagungar (no maitutop).

5. Kiddawenna iti Nailangitan nga Ama a liwliwaenna ti pamilia ken yebkasna dagiti kapanunotan kas iwanwan ti Espiritu.

6. Gibusanna iti nagan ni Jesucristo.

No mapuoran ti bangkay ti maysa a miembro ti Simbaan, usaren ti mangimatmaton a lider ti pangngeddengna no idatonna ti lugar a pakaidulinan dagiti dapo.

18.17

Dagiti Bendision ti Patriarka

Tunggal maikari, nabuniagan a miembro ket maikari nga umawat iti bendision ti patriarka, a mangipaay iti naparegta a direksion manipud iti Nailangitan nga Ama (kitaen iti Genesis 48:14–16; 49; 2 Nephi 4:3–11).

Ti bishop wenno ti nadutokan a mamagbaga ti manginterbyu kadagiti miembro nga agtarigagay nga umawat iti maysa a bendision ti patriarka. No maikari ti miembro, mangisagana ti manginterbyu iti Patriarchal Blessing Recommend. Isumitena daytoy babaen ti Patriarchal Blessing System iti ChurchofJesusChrist.org.

Siguraduen ti tao a mangisyu iti maysa a Patriarchal Blessing Recommend a nataenganen ti miembro tapno maawatanna ti kaipapanan ken ti sagrado a saguday ti bendision.

18.17.1

Panangawat iti maysa a Bendision ti Patriarka

Kalpasan ti panangawat iti maysa a recommend, makiuman ti miembro iti patriarka tapno mangituding iti appointment nga umawat iti bendision ti patriarka. Iti aldaw ti appointment, nasken a mapan ti miembro iti patriarka nga addaan iti managkararag nga ugali ken nagaruat iti kawes a para iti Domingo.

Sagrado, kumpidensial, ken personal ti tunggal bendision ti pariarka. Gapuna, maited dayta iti pribado malaksid iti limitado a bilang dagiti miembro ti pamilia a mabalin a mangimatang.

Nasken iti tao nga umawat iti bendision ti patriarka a mangipateg kadagiti balikas daytoy, utobenna dagitoy, ken agbiag tapno maikari nga umawat kadagiti naikari a bendision iti daytoy a biag ken iti kinaagnanayon.

Nasken a saan nga idilig dagiti miembro ti Simbaan dagiti bendision ken nasken a saanda nga ibinglay dagitoy malaksid kadagiti nasinged a miembro ti pamilia. Nasken a saan nga ibasa dagiti bendision ti patriarka kadagiti miting ti Simbaan wenno dadduma pay a panagtitipon iti kaaduan.