“19. ດົນຕີ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“19. ດົນຕີ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
19.
ດົນຕີ
19.1
ຈຸດປະສົງຂອງດົນຕີໃນສາດສະໜາຈັກ
ເພງສັກສິດເພີ່ມພູນສັດທາໃນພຣະເຢຊູຄຣິດ. ມັນເຊື້ອເຊີນພຣະວິນຍານ ແລະ ສິດສອນຄຳສອນ. ມັນກໍຍັງສ້າງຄວາມຮູ້ສຶກທີ່ຄາລະວະ, ສາມັກຄີສະມາຊິກ, ແລະ ໃຫ້ວິທີນະມັດສະການພຣະບິດາເທິງສະຫວັນ ແລະ ພຣະເຢຊູຄຣິດ.
19.2
ດົນຕີໃນບ້ານເຮືອນ
ຜ່ານທາງສາດສະດາຂອງພຣະອົງ, ພຣະຜູ້ເປັນເຈົ້າໄດ້ຊຸກຍູ້ບຸກຄົນ ແລະ ຄອບຄົວໃຫ້ໃຊ້ເພງເພື່ອຍົກລະດັບຊີວິດປະຈຳວັນຂອງເຂົາເຈົ້າ.
ເທັບແຟມສຽງຂອງສາດສະໜາຈັກມີໃຫ້ບໍລິການຈາກແຫລ່ງຊ່ວຍເຫລືອດັ່ງຕໍ່ໄປນີ້:
-
ແອັບເພງສັກສິດ
-
ແອັບຫ້ອງສະໝຸດພຣະກິດຕິຄຸນ
-
ຊີດີ ທີ່ store.ChurchofJesusChrist.org
19.3
ເພງໃນການປະຊຸມຕ່າງໆຂອງສາດສະໜາຈັກ
19.3.1
ການວາງແຜນເພງສຳລັບການປະຊຸມຕ່າງໆຂອງສາດສະໜາຈັກ
ຜູ້ປະສານງານດ້ານດົນຕີຫວອດ ແລະ ສະເຕກ ເຮັດວຽກງານກັບຜູ້ນຳຖານະປະໂລຫິດ ເພື່ອວາງແຜນເພງສຳລັບພິທີນະມັດສະການ. ເຂົາເຈົ້າເລືອກເພງທີ່ຍົກລະດັບວິນຍານຂອງການນະມັດສະການໃນການປະຊຸມ.
19.3.2
ເພງໃນກອງປະຊຸມສິນລະລຶກ
ເພງໃນກອງປະຊຸມສິນລະລຶກແມ່ນລວມທັງການຮ້ອງເພງສວດໃນບ່ອນຊຸມນຸມ ເພື່ອເປີດ ແລະ ປິດກອງປະຊຸມ ແລະ ກ່ອນການປະຕິບັດສິນລະລຶກ. ເພງສວດສິນລະລຶກຄວນກ່າວເຖິງສິນລະລຶກ ຫລື ກ່າວເຖິງການເສຍສະລະຂອງພຣະຜູ້ຊ່ວຍໃຫ້ລອດ.
ຈະມີການຫລິ້ນເພງກ່ອນກອງປະຊຸມຂະນະທີ່ສະມາຊິກມາຮ່ວມກັນກ່ອນກອງປະຊຸມ. ຫລັງຈາກການອະທິຖານປິດ, ຈະມີການຫລິ້ນເພງຂະນະທີ່ສະມາຊິກອອກຈາກກອງປະຊຸມ.
ກອງປະຊຸມສິນລະລຶກກໍສາມາດລວມເພງສວດໃນບ່ອນຊຸມນຸມເພີ່ມເຕີມ ເພື່ອຮ້ອງຂັ້ນກອງປະຊຸມໄດ້—ຍົກຕົວຢ່າງ, ຂັ້ນການກ່າວປາໄສ.
19.3.3
ເພງໃນຫ້ອງຮຽນ ແລະ ການປະຊຸມອື່ນໆຂອງຫວອດ
ຜູ້ນຳຊຸກຍູ້ຄູສອນໃຫ້ໃຊ້ເພງສວດ ແລະ ເພງສັກສິດອື່ນໆເພື່ອຍົກລະດັບການສິດສອນຂອງເຂົາເຈົ້າ.
19.3.6
ເຄື່ອງດົນຕີ
ຕາມປົກກະຕິແລ້ວ ເຄື່ອງດົນຕີສົດຈະຖືກໃຊ້ສຳລັບການຫລິ້ນກ່ອນ ແລະ ຫລັງຈາກການປະຊຸມ ແລະ ສຳລັບເພງສວດໃນການປະຊຸມຕ່າງໆຂອງສາດສະໜາຈັກ. ໃນບ່ອນທີ່ມີໃຫ້ໃຊ້ ແລະ ໃນບ່ອນທີ່ສະມາຊິກສາມາດຫລິ້ນດົນຕີ, ອໍແກນ ແລະ ປີອາໂນຈະເປັນເຄື່ອງດົນຕີມາດຕະຖານ. ຝ່າຍອະທິການອາດອະນຸມັດໃຫ້ໃຊ້ເຄື່ອງດົນຕີອື່ນໆເພື່ອປະກອບການຮ້ອງເພງໃນບ່ອນຊຸມນຸມ, ສຳລັບກ່ອນ ແລະ ຫລັງຈາກກອງປະຊຸມ, ແລະ ໃຊ້ກັບການຮ້ອງເພງພິເສດອື່ນໆ.
ຖ້າຫາກບໍ່ມີປີອາໂນ, ອໍແກນ, ຫລື ຜູ້ຫລິ້ນ, ກໍສາມາດໃຊ້ເທັບແຟມສຽງໄດ້ (ເບິ່ງ 19.2).
19.3.7
ກຸ່ມນັກຮ້ອງປະສານສຽງ
19.3.7.1
ກຸ່ມນັກຮ້ອງປະສານສຽງຫວອດ
ບ່ອນທີ່ມີສະມາຊິກພຽງພໍ, ຫວອດອາດຈັດຕັ້ງກຸ່ມນັກຮ້ອງປະສານສຽງຂຶ້ນ ທີ່ຮ້ອງໃນກອງປະຊຸມສິນລະລຶກເປັນປະຈຳ.
ນອກເໜືອໄປຈາກກຸ່ມນັກຮ້ອງປະສານສຽງຫວອດແລ້ວ, ຄອບຄົວ ແລະ ກຸ່ມຜູ້ຍິງ, ຜູ້ຊາຍ, ຫລື ເດັກນ້ອຍ ກໍສາມາດຖືກເຊື້ອເຊີນໃຫ້ຮ້ອງເພງໃນການປະຊຸມຕ່າງໆຂອງສາດສະໜາຈັກໄດ້.
19.4
ການເປັນຜູ້ນຳດົນຕີໃນຫວອດ
19.4.1
ຝ່າຍອະທິການ
ອະທິການຮັບຜິດຊອບຕໍ່ດົນຕີຫວອດ. ເພິ່ນອາດມອບໝາຍໜ້າທີ່ຮັບຜິດຊອບນີ້ໃຫ້ທີ່ປຶກສາຄົນໜຶ່ງຂອງເພິ່ນ.
19.4.2
ຜູ້ປະສານງານດ້ານດົນຕີຫວອດ
ຜູ້ປະສານງານດ້ານດົນຕີຫວອດຮັບໃຊ້ພາຍໃຕ້ການຊີ້ນຳຂອງຝ່າຍອະທິການ. ລາວມີໜ້າທີ່ຮັບຜິດຊອບດັ່ງຕໍ່ໄປນີ້:
-
ເປັນແຫລ່ງຊ່ວຍເຫລືອຝ່າຍອະທິການ ແລະ ຜູ້ນຳໃນຫວອດຄົນອື່ນ ໃນເລື່ອງດົນຕີ.
-
ເຮັດວຽກງານກັບຝ່າຍອະທິການເພື່ອວາງແຜນເພງສຳລັບກອງປະຊຸມສິນລະລຶກ (ເບິ່ງ 19.3.1 ແລະ 19.3.2).
-
ຕາມຄຳຂໍຮ້ອງຂອງຝ່າຍອະທິການ, ຈະແນະນຳຊື່ສະມາຊິກໃຫ້ຮັບໃຊ້ໃນການເອີ້ນດ້ານດົນຕີຫວອດ. ປະຖົມນິເທດຜູ້ທີ່ຮັບໃຊ້ໃນການເອີ້ນເຫລົ່ານີ້, ໃຫ້ການສະໜັບສະໜູນ, ຄຳແນະນຳ, ແລະ ຝຶກອົບຮົມເມື່ອຈຳເປັນ.
19.4.3
ການເອີ້ນເພີ່ມເຕີມ
ຝ່າຍອະທິການອາດເອີ້ນສະມາຊິກເພື່ອຮັບໃຊ້ໃນການເອີ້ນດັ່ງຕໍ່ໄປນີ້.
19.4.3.1
ຜູ້ນຳດົນຕີຫວອດ
ຜູ້ນຳດົນຕີນຳພາເພງສວດໃນບ່ອນຊຸມນຸມສຳລັບກອງປະຊຸມສິນລະລຶກ ແລະ ໃນການປະຊຸມອື່ນໆຂອງຫວອດເມື່ອຖືກຂໍຮ້ອງ.
19.4.3.2
ຜູ້ຫລິ້ນດົນຕີຫວອດ
ຜູ້ຫລິ້ນດົນຕີຫວອດຫລິ້ນເພງ ກ່ອນ ແລະ ຫລັງຈາກກອງປະຊຸມ ແລະ ຫລິ້ນເພງສວດລະຫວ່າງກອງປະຊຸມສິນລະລຶກ ແລະ ຫລິ້ນເພງໃນການປະຊຸມອື່ນໆຂອງຫວອດເມື່ອຖືກຂໍຮ້ອງ.
19.7
ນະໂຍບາຍ ແລະ ແນວທາງຊີ້ນຳເພີ່ມເຕີມ
19.7.2
ການໃຊ້ເຄື່ອງດົນຕີໃນອາຄານປະຊຸມສຳລັບການຝຶກຊ້ອມ, ການສອນສ່ວນຕົວ, ແລະ ການສະແດງດົນຕີ
ເມື່ອບໍ່ມີທາງເລືອກທີ່ເໝາະສົມ, ຜູ້ນຳຖານະປະໂລຫິດອາດອະນຸຍາດໃຫ້ໃຊ້ປີອາໂນ ແລະ ອໍແກນໃນອາຄານປະຊຸມເພື່ອການຝຶກຊ້ອມ, ການຈ້າງສອນສ່ວນຕົວ, ແລະ ການສະແດງດົນຕີທີ່ກ່ຽວຂ້ອງກັບສະມາຊິກຂອງໜ່ວຍທີ່ໃຊ້ອາຄານປະຊຸມ.