22.

Panangipaay kadagiti Temporal a Kasapulan ken Panangbangon iti Panagpannuray iti Bukod a Kabaelan

22.0

Pakauna

Makitulag dagiti miembro ti Simbaan a “makipagbaklay iti imet ti tunggal maysa, … makipagladingit kadagiti agladladingit … , ken manglinglingay kadagiti makasapul iti pannakalinglingay” (Mosiah 18:8–9).

Mabalakadan met dagiti miembro ti Simbaan a mangpapigsa iti bukodda a panagpannuray iti bagida babaen ti napasnek a panagtrabaho ken babaen ti tulong ti Apo. Ti panagpannuray iti bukod a kabaelan ket ti abilidad, panagkumit, ken panagkagumaan a mangipaay kadagiti naespirituan ken temporal a kasapulan ti biag para iti bukod a bagi ken iti pamilia.

---

DAGITI PANAGKAGUMAAN A BUKOD KEN SANGAPAMILIAAN

---

22.1

Mangbangon iti Panagpannuray iti Bukod a Kabaelan

Babaen ti tulong manipud iti Apo, mangbangon dagiti miembro iti panagpannuray iti bagida kadagiti sumaganad a wagas:

• Mangpadur-as iti naespirituan, pisikal, ken emosional a pigsa.

• Manggun-od iti edukasion ken panggedan.

• Mangpadur-as iti temporal a kinamanagsagana.

22.1.4

Temporal a Kinamanagsagana

Isuro dagiti nasantuan a kasuratan ti kinapateg ti panagsagana (kitaen iti Ezequiel 38:7; Doktrina ken Katulagan 38:30). Mabalakadan dagiti miembro nga agbalin a nakasagana tapno maaywananda ti bagbagida, ti pamiliada, ken dagiti dadduma iti panawen ti panagkasapulan.

Padur-asen dagiti miembro ti pinansial a panagsaganada babaen ti:

• Panagbayad iti apagkapullo ken daton (kitaen iti Malakias 3:8–12).

• Panangikkat ken panangliklik iti utang agingga a mabalin.

• Panagsagana ken panagbiag iti uneg ti badyet.

• Panagurnong para iti masakbayan.

• Pananggun-od iti maitutop nga edukasion a tumulong kadakuada a mangted iti kasapulanda ken iti pamiliada (kitaen iti 22.3.3).

Karaman pay iti panagsagana ti panangaramid iti plano no kasano nga asikasuen dagiti kangrunaan a kasapulan bayat ti emerhensia [emergency]. Maallukoy dagiti miembro a mangbuangay nga agpadpada iti ababa ken napapaut a suplay ti taraon, danum, ken dadduma pay a kasapulan.

22.2

Agminister kadagiti Addaan iti Temporal ken Emotional a Kasapulan

Masursuruan dagiti disipulo ti Apo nga “agpipinnateg … ken agpaay iti tunggal maysa” ken “tulongan dagiti makasapul iti … tulong” (Mosiah 4:15–16). Ikagumaan dagiti miembro a mangkita kadagiti dadduma a kas iti panangkita ti Mangisalakan kadakuada, a maawatanda dagiti naidumduma a pagpigsaan ken kasapulanda. Mabalin a karaman kadagitoy a kasapulan ti taraon, kawes, balay, edukasion, panggedan, salun-at iti bagi, ken pagimbagan ti rikna.

22.2.1

Ti Pagurnongan a Balay ti Apo

Amin dagiti resources a sidadaan a magun-od iti Simbaan a tumulong kadagiti addaan iti temporal a panagkasapulan ket maawagan iti pagidulinan wenno pagurnongan a balay ti Apo (kitaen iti Doktrina ken Katulagan 82:18–19). Karaman kadagitoy ti panangidaton dagiti miembro iti panawen, talento, pannakipagrikna, material, ken pinansial a pamataudan tapno matulongan dagiti agkasapulan.

Adda dagiti pagurnongan a balay ti Apo iti tunggal ward wenno stake. Masansan a matulongan dagiti lider dagiti indibidual ken pamilia a mangbirok kadagiti pangrisut kadagiti kasapulanda babaen ti pananggun-od iti pannakaammo, paglaingan, ken serbisio nga ited dagiti miembro ti ward ken stake.

22.2.2

Ti Linteg ti Panagayuno ken Daton iti Panagayuno

Impasdek ti Apo ti linteg ti panagayuno ken dagiti daton iti panagayuno tapno mangbendision kadagiti taona ken tapno mangipaay iti wagas a pakapagserbianda kadagiti agkasapulan. Dumur-as a nasingsinged dagiti miembro iti Apo ken naespirituan a pumigpigsada bayat ti panagtungpalda iti linteg ti panagayuno. (Kitaen iti Isaias 58:6–12; Malakias 3:8–12.)

Mabalin nga aramiden ti panagayuno iti ania man nga oras. Nupay kasta, gagangay a ngilinen dagiti miembro ti umuna a Domingo ti bulan kas aldaw ti panagayuno. Gagangay nga iraman iti aldaw ti panagayuno ti sumaganad:

• Panagkararag

• Pananglangan a mangan ken uminum iti 24 nga oras (no kabaelan ti bagi)

• Panangted iti nawadwad a daton iti panagayuno

Maysa a donasion a pangtulong kadagiti agkasapulan ti daton iti panagayuno. No agayuno dagiti miembro, maawisda a mangted iti daton a di kumurang a kapada ti pateg dagiti taraon a saan a nakan.

Mabalin nga ited dagiti miembro ti daton ti panagayunoda ken ti nakompleto a porma ti Apagkapullo ken Dadduma Pay a Daton iti bishop wenno iti maysa kadagiti mamagbagana. Iti sumagmamano a lugar, mabalinda pay nga ited ti kukuada a donation online.

---

DAGITI PANAGKAGUMAAN TI LIDER

---

22.3

Pagtuladan para iti Panangbangon iti Panagpannuray iti Bukod a Kabaelan ken Panagminister kadagiti Agkasapulan

22.3.1

Sapulen dagiti Agkasapulan

Adda sagrado a pagrebbengan ti bishop a mangsapul ken mangaywan kadagiti agkasapulan (kitaen iti Doktrina ken Katulagan 84:112). Dagiti dadduma pay nga addaan iti napateg nga akem iti panangtulong iti bishop iti daytoy a pagrebbengan iramanna:

• Dagiti ministering brother ken sister.

• Dagiti panguluen ti Relief Society ken korum dagiti elder.

• Dagiti mamagbaga ti bishop.

• Dadduma pay a miembro ti konseho iti ward.

22.3.2

Tulongan dagiti Miembro a Mangtingiting ken Mangtaming kadagiti Kasapulan iti Ababa a Panawen

Ikagumaan dagiti miembro a maipaay dagiti kangrunaan a kasapulanda babaen kadagiti bukodda a panagregget ken tulong manipud iti kabagianda. No saan nga umdas daytoy, mabalin a kasapulan dagiti miembro ti tulong manipud kadagiti dadduma a pagtaudan kas iti:

• Dagiti resources ti gobierno ken komunidad (kitaen iti 22.12).

• Tulong ti Simbaan.

Mabalin a karaman iti tulong ti simbaan ti tulong kadagiti kasapulan iti ababa a panawen kas iti taraon, banag a pagdalus, kawes, balay, wenno dadduma pay a pamunganayan. Mabalin nga usaren dagiti bishop dagiti daton iti panagayuno a mangipaay kadagitoy a kasapulan. No addan a magun-od dagiti order dagiti bishop, gagangay nga usaren dagiti bishop dagitoy a mangipaay iti taraon ken dadduma pay a kangrunaan a banag (kitaen iti “Bishops’ Orders and Referrals” iti Leader and Clerk Resources [LCR]).

22.3.3

Tulongan dagiti Miembro a Mangbangon iti Napapaut a Panagpannuray iti Bukod a Kabaelan

Mabalin a kasapulan dagiti miembro ti agtultuloy a suporta tapno mataming dagiti napapaut a karit. Makatulong kadakuada ti edukasion, panagsanay iti bokasional, wenno dadduma pay a resource a mangbangon iti panagpannuray iti kabaelanda ken mangipaay kadagiti napapaut a kasapulanda.

Tumulong ti Self-Reliance Plan kadagiti miembro a mangilasin kadagiti pagpigsaan ken kasapulanda. Tumulong pay daytoy kadakuada a mangilasin kadagiti makatulong a resources. Nasken a mausar daytoy a plano tunggal maibilang ti tulong ti Simbaan.

22.3.4

Agminister kadagiti Addaan iti Emosional a Kasapulan

Mapaspasaran dagiti adu a miembro ti Simbaan dagiti emosional a karit. Makatulong dagiti ministering brother ken sister ken dagiti lider ti ward kadagiti miembro nga addaan kadagitoy a karit.

22.4

Dagiti Pagbatayan para iti Panangipaay iti Tulong ti Simbaan

Babaen ti tulong ti Apo, ikalikagum dagiti miembro nga ipaay ti kasapulanda ken dagiti pamiliada.

Ti tulong ti simbaan nairanta a tumulong kadagiti miembro a mangpadur-as iti panagwaywayas, saan a panagpannuray. Ania man a maited a tulong ket mangpapigsa koma kadagiti miembro iti panagkagumaanda nga agbalin a makapagpannuray iti bagida.

22.4.1

Yallukoy ti Pagrebbengan a Bukod ken iti Pamilia

Isuro dagiti lider nga addaan dagiti indibidual ken pamilia iti kangrunaan a pagrebbengan para iti bukodda a temporal, emosional, ken naespirituan a pagimbagan.

Sakbay a mangipaay iti tulong ti Simbaan, irebyu ti bishop (wenno sabali pay a lider wenno miembro a dutokanna) kadagiti miembro no ania dagiti resources nga us-usarenda a mangipaay kadagiti bukodda a kasapulan.

22.4.2

Mangipaay iti Temporario a Tulong para kadagiti Napapateg a Kasapulan

Ti panggep ti tulong ti Simbaan ket temporario a mangipaay kadagiti kangrunaan a kasapulan bayat ti panagkagumaan dagiti miembro nga agbalin a makapagpannuray iti kabaelanda.

Nasken nga usaren dagiti bishop ti nasayaat a pangngeddeng ken agkiddaw iti naespirituan a panangiturong no ibilangda ti kaadu ken kapaut ti maited a tulong. Agbalinda a mannakipagrikna ken managparabur idinto a saanda a mangparnuay iti panagpannuray.

22.4.3

Mangipaay kadagiti Pamataudan wenno Serbisio Imbes a Kuarta

No mabalin, liklikan koma ti bishop ti mangted iti kuarta. Ketdi, usarenna koma dagiti daton iti panagayuno wenno dagiti order ti bishop a mangipaay kadagiti miembro kadagiti grocery wenno serbisio. Kalpasanna mabalin nga usaren dagiti miembro ti bukodda a kuarta a pangbayad iti dadduma pay a kasapulan.

No saan nga umdas daytoy, mabalin a tumulong ti bishop babaen ti panangusar kadagiti daton iti panagayuno a temporario a mangbayad kadagiti nasken a bayadan (kitaen iti 22.5.2).

22.4.4

Mangidiaya kadagiti Gundaway iti Trabaho wenno Serbisio

Awisen dagiti bishop dagiti umawat iti tulong nga agtrabaho wenno mangipaay iti serbisio agingga iti kabaelanda. Makatulong daytoy kadagiti miembro a mangpatalinaed iti kaipapanan ti dignidad. Daytoy pay ti mangpadur-as iti kabaelanda a makapagpannuray iti bagida.

22.4.5

Pagtalinaeden a Kumpidensial ti Impormasion maipapan iti Tulong ti Simbaan

Pagtalinaeden ti bishop ken dadduma pay a lider ti ward a kumpidensial ti ania man nga impormasion maipapan kadagiti miembro a mabalin a makasapul iti tulong ti Simbaan. Daytoy ti mangsaluad iti kinapribado ken dignidad dagiti miembro.

22.5

Dagiti Annuroten para iti Panangipaay iti Tulong ti Simbaan

Suroten koma dagiti lider ti Simbaan dagiti annuroten a nabalabala iti daytoy a benneg no mangipaay iti tulong babaen kadagiti daton iti panagayuno wenno order dagiti bishop para iti taraon ken dadduma pay a kangrunaan a banag.

22.5.1

Dagiti Annuroten Maipanggep kadagiti Umaw-awat iti Tulong ti Simbaan

22.5.1.1

Tulong kadagiti Miembro ti Ward

Kaaduanna, nasken nga agnaed dagiti miembro nga umawat iti tulong ti Simbaan kadagiti beddeng ti ward ken adda ti rekord ti kinamiembroda iti ward. Mabalin a maited ti tulong uray no regular a dumardar-ay ti miembro kadagiti miting iti Simbaan wenno sumurot kadagiti pagrukodan ti Simbaan.

22.5.1.2

Tulong kadagiti Bishop ken Stake President

Masapul ti naisurat a panangaprobar ti stake president sakbay a mabalin nga usaren ti maysa a bishop dagiti daton iti panagayuno wenno aprobaran ti order ti bishop para iti bagina wenno iti pamiliana.

22.5.1.4

Tulong kadagiti Tao a Saan a Miembro ti Simbaan

Dagiti tao a saan a miembro ti Simbaan ket gagangay a maiturongda iti lokal a resources ti komunidad para iti tulong. Iti manmano a gundaway, kas iwanwan ti Espiritu, mabalin a tulongan ida ti bishop kadagiti daton iti panagayuno wenno order dagiti bishop.

22.5.2

Dagiti Annuroten iti Panangusar kadagiti Daton iti Panagayuno

22.5.2.1

Panangaywan a Medikal ken iti Salun-at

Addaan ti tunggal lugar ti Simbaan iti naipasdek a limitasion ti panangaprobar para iti panangusar kadagiti daton iti panagayuno a pangbayad kadagiti gastos iti medikal, dental, wenno salun-at ti panunot.

Para kadagiti naaprobaran a gatad ken pangiwanwan, kitaen iti “Use of Fast Offerings for Medical Expenses.”

22.5.2.3

Panangbayad kadagiti Daton iti Panagayuno

Saan a bayadan dagiti miembro ti tulong iti daton iti panagayuno nga awatenda manipud iti Simbaan.

22.5.2.4

Dagiti Gatad ti Gastos iti Daton iti Panagayuno ti Ward

Saan a kasapulan a limitaran dagiti bishop ti tulong iti daton iti panagayuno para kadagiti miembro ti ward iti dagup dagiti donasion a makolekta iti uneg ti ward.

22.5.3

Dagiti Annuroten kadagiti Panagbayad

No mabalin, direkta koma dagiti panagbayad kadagiti negosio a mangipaay kadagiti tagilako ken serbisio.

22.5.4

Dagiti Annuroten kadagiti Panagbayad a Mangted Pagimbagan iti maysa a Bishop wenno Stake President

No mangipaay kadagiti miembro iti tulong ti daton iti panagayuno, mabalin a saan nga usaren ti bishop dagiti pondo a mangbayad kadagiti tagilako wenno serbisio iti wagas a mangted pagimbagan kenkuana.

No ti bayad iti daton iti panagayuno para iti maysa a miembro ket mangted pagimbagan iti stake president wenno negosio a kukuana, kasapulan ti panangaprobar ti Panguluen ti Area.

22.6

Dagiti Akem dagiti Lider ti Ward

22.6.1

Ti Bishop ken dagiti Mamagbagana

Adda nadiosan a bilin iti bishop a mangsapul ken mangaywan kadagiti agkasapulan (kitaen iti Doktrina ken Katulagan 84:112). Idutokna ti kaaduan iti daytoy nga aramid kadagiti panguluen ti Relief Society ken korum dagiti elder. Nupay kasta, aramiden laeng ti bishop ti sumagmamano a pagrebbengan. Kas pagarigan, ti bishop:

• Ikeddengna ti kita, gatad, ken kapaut ti ania man a temporal a tulong a maipaay.

• Anamonganna ti tulong manipud iti daton iti panangayuno (kitaen iti 22.4 ken 22.5) ken dagiti order ti bishop para iti taraon ken dadduma pay a kangrunaan a banag (kitaen iti 22.13).

• Personal nga irebyuna dagiti plano dagiti miembro iti panagpannuray iti bagida. Dutokanna dagiti dadduma pay a lider ti ward a mangsurnad [follow up] kadagita a plano no kasapulan.

Addaan ti bishop wenno dagiti mamagbagana kadagiti sumaganad a pagrebbengan:

• Isurona dagiti pagbatayan ken bendision a mainaig iti (1) panangaywan kadagiti addaan iti temporal ken emosional a kasapulan ken (2) panangbangon iti panagpannuray iti bukod a kabaelan (kitaen iti 22.1).

• Isurona ti linteg ti panagayuno ken allukoyenna dagiti miembro a mangted iti nawadwad a daton iti panagayuno (kitaen iti 22.2.2).

• Imatonanna ti pannakaummong ken pannakakuenta dagiti daton iti panagayuno (kitaen iti 34.3.2).

22.6.2

Dagiti Panguluen ti Relief Society ken Korum dagiti Elder

Iti babaen ti direksion ti bishop, addaan dagiti panguluen ti Relief Society ken korum dagiti elder iti kangrunaan nga akem iti panangaywan kadagiti agkasapulan iti ward (kitaen iti 8.2.2 ken 9.2.2). Suruan dagitoy a lider dagiti miembro ti ward nga:

• Ag-minister kadagiti agkasapulan.

• Agbiag iti linteg ti panagayuno.

• Mangbangon iti panagpannuray iti bukod a kabaelan.

• Mangpadur-as iti bukod ken sangapamiliaan a panagsagana.

22.6.3

Dagiti Ministering Brother wenno Sister

Masansan a mangrugi ti tulong kadagiti naespirituan ken temporal a kasapulan kadagiti ministering brother ken sister (kitaen iti 21.1). Ireportda dagiti kasapulan dagiti pagserbianda kadagiti panguluenda iti korum dagiti elder ken Relief Society kadagiti ministering interview ken iti dadduma pay a panawen. Mabalin nga ibinglayda dagiti kasapulan a kumpidensial a direkta iti bishop.

22.7

Akem ti Konseho iti Ward

Maysa a napateg nga akem ti konseho iti ward ket ti panangiplano no kasano nga aywanan dagiti agkasapulan ken tulongan ida nga agbalin a makapagpannuray iti bagida (kitaen iti 4.4). Ibasar dagiti miembro ti konseho dagitoy a plano iti impormasion manipud kadagiti interbyu iti ministering ken manipud kadagiti bukodda a personal a pannakilangen kadagiti agkasapulan. Iti panangilawlawag kadagiti kasapulan dagiti miembro, irespeto ti konseho dagiti tarigagay ti asino man a mangkiddaw iti kumpidensialidad.

22.8

Akem ti Konseho dagiti Agtutubo iti Ward

Maysa a panggep ti konseho dagiti agtutubo iti ward ket tapno matulongan dagiti agtutubo nga agbalin a nakonsagrar a pasurot ni Jesucristo (kitaen iti 29.2.6).

Iti babaen ti panangiwanwan ti bishopric, agplano ti konseho dagiti agtutubo iti ward kadagiti wagas a makapagserbi kadagiti agkasapulan iti ward ken komunidadda.