“24. Vakatutu kei na Veiqaravi ni Daukaulotu,” Digitaki mai na iVoladusidusi Raraba (2023).
“24. Vakatutu kei na Veiqaravi ni Daukaulotu,” Digitaki mai na iVoladusidusi Raraba.
24.
Vakatutu kei na Veiqaravi ni Daukaulotu
24.0
Ai Vakamacala Taumada
Ena gauna e liu, a solia na Turaga na ilesilesi me vakasoqoni ira vata na Isireli ena kedra maliwa na “veivanua kecega, ka papitaisotaki ira ena yaca ni Tamada, kei na Luvena, kei na Yalo Tabu” (Maciu 28:19; raica talega na tikina e 20). Sa vakavouya na Turaga na ilesilesi oya ena iotioti ni gauna oqo (raica na Vunau kei na Veiyalayalati 39:11; 68:6–8; 112:28–30).
Na qarava na Turaga vakadaukaulotu e dua na madigi tabu. E kauta mai na veivakalougatataki tawamudu kivua na tamata o ya kei ira e qarava (raica na Vunau kei na Veiyalayalati 18:14–16).
Sa kerea na Turaga vei ira yadua na cauravou bula kilikili ka kaukauwa me ra vakavakarau ka laki veiqaravi vakadaukaulotu.
Na Turaga e kidavaki ira talega na goneyalewa bula kilikili, ka kaukauwa me ra veiqaravi vakadaukaulotu kevaka era gadreva.
Era sa gadrevi talega na daukaulotu qase ka ra sa vakayaloqaqataki me ra vakavakarau ki na veiqaravi.
24.1
Na Kaci ni Veiqaravi
O ira na daukaulotu era matataka na Turaga ka sa dodonu me ra kacivi maivei ira sa taura tu na lewa dodonu (raica na Vunau kei na Veiyalayalati 42:11; Yavu ni Vakabauta 1:5). Na veikacivi me veiqaravi vakadaukaulotu e dau vakayacora ga na Peresitedi ni Lotu. Vei ira na daukaulotu qase, ena vakayacora na veikacivi o peresitedi ni iteki.
24.2
iLesilesi Vakadaukaulotu
Na veikacivi me veiqaravi vakadaukaulotu e okati kina e dua na ilesilesi vakatabakidua. E rabailevu na veilesilesi oqo.
24.2.1
Daukaulotu iTabagone Dauveivakavulici
E vuqa na daukaulotu itabagone era sa lesi me ra vakavulica na kosipeli vakayawa mai vale. Na veilesilesi oqo e soli ena ivakatakila vei ira na iApositolo. O ira na dakaulotu oqo era veiqaravi ena ruku ni veidusimaki ni dua na peresitedi ni kaulotu.
24.2.2
Daukaulotu iTabagone Veiqaravi
Eso na daukaulotu itabagone era sa lesi me ra veiqaravi ena Lotu kei na itikotiko raraba ni ra tiko e vale. Na ilesilesi oqo ena soli mai na ivakatakila vei ira na iApositolo ka soli vei ira era sa vakarau tu ena nodra ituvaki ni bula e ganita vinaka me ra veiqaravi vakadaukaulotu (raica na 24.3.3).
24.2.3
Daukaulotu Qase
Era sa vakauqeti na daukaulotu qase taucoko me ra vaqarai ira na tamata me ra vakavulici ira ka vukei ira ena nodra vakavakarau ki na papitaiso. E rawa talega ni ra lesi na daukaulotu qase me ra veitokoni vei ira na:
-
Lewenilotu kei ira na iliuliu ni iwasewase kei na nodra vanua.
-
Tabacakacaka ni Lotu kei na iyauqaqa.
-
iSoqosoqo ni loloma.
Era na sega ni kerei na daukaulotu qase me ra cakacakataka na veiauwa vata ga, vakayacora na itaviqaravi vata ga, se rawata na veika vata ga e namaki tiko vei ira na daukaulotu itabagone.
Na nodra ilesilesi na daukaulotu qase e soli mai ena ivakatakila vei ira na iApositolo. E rawa ni ra vakaraitaka o ira sa vakarau tu na nodra digidigi baleta e dua na ilesilesi ia sa dodonu mera na ciqoma ga na ilesilesi sa soli mai.
24.2.4
Daukaulotu Qase Veiqaravi
Me ikuri ni veikacivi ena nodra tabanalevu se iteki era tiko kina, sa rawa vei ira na lewenilotu mera qarava na Turaga vakadaukaulotu qase veiqaravi. O ira na daukaulotu oqo era dau veiqaravi yaga sara ena veitabacakacaka ni Lotu, iyauqaqa, kei na tabana ni kaulotu (raica na 24.7.1). Era vakaitikotiko ga e vale.
O ira na daukaulotu qase veiqaravi era sa kacivi maivei peresitedi ni iteki. Era veiqaravi ena ruku ni nona veidusimaki. Na levu ni gauna era veiqaravi kina ena veimacawa ena vakatau ki na nodra gugumatua, madigi ni veiqaravi ena nodra iwasewase, kei na veidusimaki mai na Mataveiliutaki ni iWasewase.
24.2.5
iVakaleka ni iLesilesi Vakadaukaulotu
Na ituvatuva oqo e ivakaleka ni veimataqali ilesilesi vakadaukaulotu.
|
Daukaulotu iTabagone Veivakavulici |
Daukaulotu iTabagone Veiqaravi |
Daukaulotu Qase |
Daukaulotu Qase Veiqaravi | |
|---|---|---|---|---|
|
Ena kacivi mai vei | Daukaulotu iTabagone Veivakavulici Peresitedi ni Lotu | Daukaulotu iTabagone Veiqaravi Peresitedi ni Lotu | Daukaulotu Qase Peresitedi ni Lotu | Daukaulotu Qase Veiqaravi Peresitedi ni iteki |
|
Ena lesi mai vua e | Daukaulotu iTabagone Veivakavulici Dua na iApositolo | Daukaulotu iTabagone Veiqaravi Dua na iApositolo | Daukaulotu Qase Dua na iApositolo | Daukaulotu Qase Veiqaravi Peresitedi ni iteki |
|
Ena tabaki mai vei | Daukaulotu iTabagone Veivakavulici Peresitedi ni iteki | Daukaulotu iTabagone Veiqaravi Peresitedi ni iteki | Daukaulotu Qase Peresitedi ni iteki | Daukaulotu Qase Veiqaravi Peresitedi ni iteki se daunivakasala |
|
E vakaitikotiko | Daukaulotu iTabagone Veivakavulici Vakayawa mai vale | Daukaulotu iTabagone Veiqaravi Ena nona vale | Daukaulotu Qase Vakayawa mai vale se ena nona vale | Daukaulotu Qase Veiqaravi Ena nona vale |
|
iLiuliu vakalotu | Daukaulotu iTabagone Veivakavulici Peresitedi ni kaulotu se peresitedi ni vanua makawa vakairogorogo | Daukaulotu iTabagone Veiqaravi Peresitedi ni iteki | Daukaulotu Qase Peresitedi ni tabana ni kaulotu, valetabu, se vanua makawa vakairogorogo; se Pereitedi ni iWasewase | Daukaulotu Qase Veiqaravi Peresitedi ni iteki |
|
Ripote vei | Daukaulotu iTabagone Veivakavulici Peresitedi ni tabana ni kaulotu se peresitedi ni vanua makawa vakairogorogo | Daukaulotu iTabagone Veiqaravi iLiuliu ni kaulotu veiqaravi | Daukaulotu Qase Peresitedi ni tabana ni kaulotu, valetabu, se vanua makawa vakairogorogo; Peresitedi ni iWasewase; dairekita ni vale ni vulagi; se dua na manidia ni tabacakacaka ni Lotu se iyauqaqa | Daukaulotu Qase Veiqaravi Manidia ni ilesilesi ni veiqaravi |
|
Yabaki ni bula e gadrevi. | Daukaulotu iTabagone Veivakavulici 18–25 (tagane) | Daukaulotu iTabagone Veiqaravi 18–25 (tagane) | Daukaulotu Qase Yabaki 40 se qase cake kevaka e vakawati se dua na marama sega ni vakawati | Daukaulotu Qase Veiqaravi 26 se qase cake |
24.3
Vakavakarau kei na Rawati ni Veiqaravi ena Kaulotu
Era sa vakayaloqaqataki na vakavakarau me ra laki kaulotu baleta ni ra lomana na Turaga kei ira na Luvena. E dodonu me ra kila vinaka tu na taro ni veivakatarogi ni vakaturi ni daukaulotu.
24.3.1
Saumaki vei Jisu Karisito
O ira era vakarau laki kaulotu era segata me ra vaqaqacotaka na nodra saumaki mai vei Jisu Karisito kei na Nona kosipeli vakalesuimai.
24.3.2
Rawati na iVakatagedegede ni Bula Kilikili
O ira era vakarau laki kaulotu era saga mera bula kilikili kaya ki na veitokani ni Yalotabu. E gadrevi sara oqo me baleta na veiqaravi vakadaukaulotu e mana (raica na Vunau kei na Veiyalayalati 42:13–14).
24.3.2.1
Veivutuni
Na veivutuni e gadrevi kina na cakacakataki ni vakabauti Karisito, ena kena inaki dina, ka muria na ivakaro. E oka kina na vakatutusa kei na vakanadakui ni ivalavala ca. Me baleta na ivalavala ca bibi, na veivutuni e gadrevi kina na vakatutusa vei bisopi se peresitedi ni iteki.
Na tamata e veivutuni e sa vosoti ka vakasavasavataki ena Veisorovaki kei na loloma soliwale i Jisu Karisito. Sa sega tale ni nanuma na Turaga na ivalavala ca. (Raica na Aisea 43:25; Jekope 6:5; Alama 34:15–17; Ilamani 5:10–11; Vunau kei na Veiyalayalati 58:42–43. Raica talega na 32.1 ena ivoladusidusi oqo.)
Sa dodonu me sa veivutunitaka na nona ivalavala ca bibi o koya me laki kaulotu ni bera ni vakauta yani na nona vakatutu o peresitedi ni iteki (raica na 32.6; raica talega na 24.4.4). Na iwalewale ni veivutuni e okati kina na gauna veirauti me vakaraitaka kina na tamata oqo ena bula dodonu ni sa ciqoma o koya na yalo i Karisito me bokoci kina na ivalavala ca.
24.3.3
Na Bula Vakayago, Vakasama kei na Yalo
E dau veibolei na cakacaka ni kaulotu. Sa dodonu vei ira na daukaulotu itabagone veivakavulici me ra yalodina sara ka gugumatua na yagodra, vakasama, kei na yalodra mera cakacakataka rawa na nodra veigauna taucoko ni kaulotu.
24.3.4
Veika vakailavo
24.3.4.1
Nodra Vakailavotaki na Daukaulotu iTabagone Era Veiqaravi Vakayawa mai Vale
O ira na itabagone era sa vakarau laki kaulotu era sa vakarau tu ena kena era sa rawata rawa me kakua ni vakataotaka na nodra laki kaulotu ena vuku ga ni leqa vakailavo. O ira era gadreva na veivuke vakailavo me ra rawata kina na yalayala ni cau namaki e rawa ni ra ciqoma maivei ira na isema ni matavuvale kei na itokani.
Kevaka e gadrevi, sa rawa vei bisopi se peresitedi ni iteki me kerei ira na lewenilotu ena tabanalevu se iteki mera cau ki na ilavo ni kaulotu ni tabanalevu.
Me na kakua ni vakayagataki na ilavovakarau ni tabanilotu kei na isolisoli ni lolo.
Yalayala ni cau vakavula. O ira na daukaulotu itabagone veivakavulici kei na nodra matavuvale era na cau ki na dua na ilavo lavaki digitaki ena veivula me vukea na isau ni parokaramu ni kaulotu.
Na cau vakailavo ena vakacurumi ki na ilavo ni daukaulotu ni tabanalevu. Me na vakadeitaka tiko o bisopi ni ra sa soli tiko na ilavo oqo ena veivula. Na ilavo e sivia na iwiliwili vakavula e sega ni dodonu me sa soli rawa tu e liu. Na ilavo sa soli rawa tu e liu ena sega ni rawa me soli lesu mai kevaka sa lesu totolo mai vale o daukaulotu.
Vakayagataki ilavo ena gauna ni kaulotu. Ena veivula, era dau ciqoma na daukaulotu itabagone na ilavo mai na tabana ni kaulotu me vakarautaki kina na kakana, sala ni veilakoyaki, kei na vakayagataki ilavo ni veika ni bula tale eso. Era sa ka tabu na ilavo oqo. Era na vakayagataka ga na daukaulotu me baleta na inaki kece vakadaukaulotu. Me ra kakua ni vakayagataki ena veika e baleti ira ga, maroroi tiko, se vakau ki na lewe ni matavuvale se so tale. Era na vakalesuya tale na daukaulotu ki na tabana ni kaulotu e dua na ilavo ni kaulotu era sega ni gadreva.
Era na vakayagataka na daukaulotu na nodra ilavo ga me saumi kina eso tale na ka. Na vakayagataki ni nodra ilavo ga vakataki ira e dodonu me lailai sara. (Raica na iVakatagedegede ni Daukaulotu Vei Ira na Tisaipeli i Jisu Karisito, 4.8.)
24.3.4.2
Vakailavotaki ni Daukaulotu Qase Era Veiqaravi Vakayawa mai Vale
Yalayala ni cau vakavula. O ira na daukaulotu qase era veiqaravi vakayawa mai vale era na cau ki na nodra ilavo ni daukaulotu ni tabanalevu ena veivula. Na cau oqo ena vukea na kena saumi na vale kei na lori.
Me na vakadeitaka tiko o bisopi ni ra sa soli tiko na ilavo oqo ena veivula. Na ilavo e sivia na iwiliwili vakavula e sega ni dodonu me sa soli rawa tu e liu.
iKuri ni vakayagataki ilavo. Me ikuri ni yalayala ki na cau vakavula, ka na vukea na kena saumi na veivakavaletaki kei na motoka, sa dodonu vei ira na daukaulotu qase me ra na sauma taucoko na veika kece tale eso, oka kina na kakana.
24.3.4.3
Vakailavotaki ni Daukaulotu Veiqaravi e Vale
O ira na daukaulotu era veiqaravi tiko e vale sa nodra itavi ga na nodra gagadre vakailavo taucoko.
24.3.4.4
Inisua ni Veiqaravi Vakavuniwai kei na Vakayagataki iLavo
Era sa vakauqeti vakaukauwa sara na daukaulotu me ra inisua tiko vakavuniwai kevaka e rawa, oka kina o ira na daukaulotu itabagone veivakavulici.
O ira na daukaulotu era veiqaravi e vale e dodonu me ra vakarautaka ga na nodra inisua ni tiko bulabula vakai ira kei na inisua veitaqomaki tale eso. Sa dodonu talega vei ira na daukaulotu qase era veiqaravi vakayawa mai vale mera na vakarautaka talega na veitaqomaki oqo. O ira na daukaulotu qase era na laki veiqaravi ena taudaku ni nodra vanua era na rawa ni inisua ena iTuvatuva ni Veiqaravi Vakavuniwai ni Qase Veiqaravi.
24.3.5
Nodra iTavi na Lewe ni Matavuvale kei na iLiuliu ena Nodra Vakarautaki na Daukaulotu
Era na vukei ira na itabagone mera vakavakarau ki na kaulotu o ira na lewe ni matavuvale, o bisopi, kei ira na iliuliu tale eso.
Era na veivakayaloqaqataki na lewe ni matavuvale kei na iliuliu vei ira kece na vakarau laki kaulotu mera na vulica:
-
Na iVola i Momani kei na ivolanikalou tale eso.
Era na veivuke na lewe ni matavuvale kei na iliuliu vei ira kece era vakarau laki kaulotu mera yalataka mera muria na ivakatagedegede ni kaulotu. Era na vakayaloqaqataki ira na vakarau laki kaulotu me ra vulica na ivoladusidusi ni ivakatagedegede ni kaulotu e baleta na nodra ilesilesi sa yaco tiko mai:
-
Me baleti ira na daukaulotu itabagone veivakavulici: Na iVakatagedegede ni Daukaulotu vei ira na Tisaipeli i Jisu Karisito
24.4
Vakatututaki ni Daukaulotu
24.4.1
Vakadikevi ni Bula
O ira kece na vakarau laki kaulotu e gadrevi me ra vakadikeva vakavuniwai na tu vakarau ni nodra bula.
24.4.2
Veivakatarogi kei na Fomu ni Veivakaturi
Ena vakayacora vakavinaka sara o bisopi kei peresitedi ni iteki na veivakatarogi matata, e veidigovi vakayalo, ka veilaveti vei ira yadua era vakarau laki kaulotu tiko. Erau na vakayagataka na taro ni veivakatarogi ni vakaturi ni daukaulotu.
Erau na railesuva talega o bisopi kei peresitedi ni iteki na itukutuku me baleta na ivakatagedegede ni bula kilikili kei na tu vakarau ni tiko bulabula ena Parokaramu ni Vakaturi ni Daukaulotu ena Onolaini Na bisopi kei na peresitedi ni iteki rau na sega ni vakuria e dua na ivakatagedegede ni veivakadonui. Erau na sega talega ni veisautaka na taro ni veivakatarogi.
Kevaka erau kauwai na bisopi kei na peresitedi ni iteki me baleta na ivakatagedegede ni bula kilikili se nona tu vakarau ni tiko bulabula o koya e vakarau laki kaulotu, erau na veivakasalataki vata kei koya na tamata oya. Ena nona veivakadonui e dua na itabagone vakarau laki kaulotu, e rawa talega ni rau veivakasalataki vata kei rau na nona itubutubu. Na bisopi kei na peresitedi ni iteki rau na sega ni vakauta e dua na vakatutu me yacova ni sa veivutunitaka na tamata oya na nona ivalavala ca bibi (raica na 24.3.2.1). Vakatau ki na ituvaki ni yagona, vakasama, se lomana na tamata oya, e rawa ni rau veivosakitaka na kena rawa ni lesi me daukaulotu veiqaravi.
Ena veikisi vakatotolotaki eso ni sega ni tiko rawa na bisopi se peresitedi ni iteki, sa rawa ni vakadonuya e dua vei rau na nona daunivakasala me vakayacora na veivakatarogi oqo.
Ena tikina, na peresitedi ni kaulotu se dua na daunivakasala sa lesi ena veivakatarogi ka vakaturi ira mera laki kaulotu. Era na sega ni dau vakayacora na veivakatarogi oqo o ira na peresitedi ni tikina.
24.4.4
O Ira Era Sega ni Rawa ni Veiqaravi Vaka-Daukaulotu Tudei
Eso na gauna o ira na lewenilotu era gadreva me ra kaulotu ena sega ni rawa ni ra kacivi me ra daukaulotu tudei. Oqo e rawa ni baleta na bolebole ni tiko bulabula, sega ni rawata na ivakatagedegede ni bula kilikili, leqa vakalawa, se so tale na ituvaki. Sa rawa vei peresitedi ni iteki me vakuwai koya mai na veiqaravi vakadaukaulotu tudei.
24.5
Ni Sa Ciqoma oti na Veikacivi ni Kaulotu
Sa dodonu talega vei ira na kacivi vou mera daukaulotu me ra wilika se wilika tale na iVola i Momani ni se bera ni tekivu na nodra kaulotu. Era muria na ivakasala nei Tui Penijmini “mo dou qarauni kemuni vinaka, kei na nomuni vakanananu, kei na nomuni vosa, kei na nomuni cakacaka” (Mosaia 4:30).
24.5.1
Edaumeni ni Valetabu kei na Veiqaravi ena Valetabu
Kevaka era se bera ni ciqoma na cakacaka vakalotu ni edaumeni ni valetabu o ira na daukaulotu kacivi vou, e dodonu me ra vakayacora vakakina ni bera ni ra tekivu veiqaravi vakadaukaulotu ni sa gadrevi vakakina (raica na Vunau kei na Veiyalayalati 43:15–16; 105:33). Oqo e okati kina na daukaulotu veiqaravi kevaka e ganita na ituvaki ni nodra bula.
O ira na daukaulotu kacivi vou era sa vakaedaumeni e rawa ni ra veiqaravi vakaliganicakacaka vakalotu ni valetabu ni bera ni ra tekivu veiqaravi vakadaukaulotu ni sa gadrevi vakakina (raica na 25.5).
24.5.2
Soqoni ni Sakaramede
Sa rawa vei ira na matabisopi mera sureti ira na daukaulotu kacivi vou mera vosa ena soqoni ni sakaramede ni bera ni ra laki tekivu kaulotu. Oqo na soqoni ni sakaramede e veigauna. Me vakanamata ga ki na sakaramede kei na iVakabula.
24.5.3
Nodra Tabaki na Daukaulotu
Sa itavi nei peresitedi ni iteki me tabaki ira na daukaulotu yadua ena gauna e voleka sara ki na tikinisiga me sa laki kaulotu kina. Ena veikisi vakatotolotaki ena gauna e sega ni tiko kina na peresitedi ni iteki, e rawa vua me vakadonuya e dua vei rau na nona daunivakasala me tabaki ira na daukaulotu.
Na peresitedi ni kaulotu se dua vei rau na nona daunivakasala ena tabaki ira na daukaulotu era kacivi mai na tikina ena loma ni nona tabana ni kaulotu. E sega ni dau tabaki ira na daukaulotu na peresitedi ni tikina.
Vua e dua na tagane ena laki kaulotu vakayawa mai vale e dodonu me sa ciqoma oti na Matabete i Melikiseteki ni bera ni tabaki me daukaulotu. Na tagane ena laki cakacaka vakadaukaulotu veiqaravi e dodonu me sa lewe tiko ni Matabete i Melikiseteki kevaka e ganita na kena ituvaki raraba.
24.6
Veiqaravi Vakayawa mai Vale
24.6.2
Ena Vanua ni Kaulotu
24.6.2.5
Kerekere me Ra Tokoni Vakailavo Eso na Tamata se ena Vuli se BiuVanua
Me ra kakua ni vakarautaka na daukaulotu kei na nodra matavuvale na veitokoni vakailavo vei ira era vakaitikotiko ena vanua era veiqaravi tiko kina na daukaulotu, oka kina na veitokoni vakailavo me baleta na vuli. E sega talega ni dodonu vei ira na daukaulotu kei na nodra matavuvale me ra tokoni ira era vinakata me ra toki ki na veimatanitu tale eso (raica na 38.8.19).
24.6.2.8
iVolatukutuku ni Lewenilotu kei na iKatini
Na nona tabanalevu e dua na daukaulotu ena maroroya tiko na ivolatukutuku ni lewenilotu. Na tabanalevu e vale ena volaitukutukutaka talega na nona ituvaki ni soli ikatini. O ira na daukaulotu era na sega ni sauma na ikatini ena ilavo veitokoni era ciqoma mai na tabana ni kaulotu. Ia, era na saumi ikatini kevaka e dua na nodra ilavo e rawati mai.
24.6.3
Lesu ki Vale mai Na Kaulotu
24.6.3.1
iTuvatuva ni Lesu i Vale me Vaka sa Tuvai Taumada
Me ra kakua ni kerea na daukaulotu kei ira na nodra lewe ni matavuvale na veivagalalataki totolo se na toso ni veiqaravi me baleti ira ga.
Sa dodonu me ra lako vakadodonu sara ki vale mai na nodra tabana ni kaulotu o ira na daukaulotu itabagone. Ena vakatarai walega na veilakoyaki tale eso kevaka e salavata kei daukaulotu e dua na nona itubutubu se dauveisusu.
Era na sega ni vagalalataki na daukaulotu me yacova ni ra sa soli itukutuku oti vei nodra peresitedi ni iteki. Era na vakamuria tiko na ivakatagedegede ni kaulotu me yacova na gauna o ya.
24.6.3.2
Lesu Totolo mai ki Vale
Eso na daukaulotu era sa vagalalataki vakatotolo ena vuku ni nodra tiko bulabula, bula kilikili, se so tale na vuna. Era na veitokoni na bisopi kei na peresitedi ni iteki vei ira na daukaulotu sa lesu mai. O ira na iliuliu ena vukei ira mera bula vinaka tale se lesu tale ki na kaulotu ke rawa.
24.7
Kaulotu Veiqaravi.
24.7.1
Raici ni Madigi Eso me Baleti Ira na Daukaulotu Veiqaravi
Eratou na veivosaki vata na bisopi, peresitedi ni iteki, kei na daukaulotu veiqaravi me kilai kina na madigi eso me ra veiqaravi kina ena nodra vanua. Me baleti ira na daukaulotu itabagone veiqaravi, e dua na iliuliu ni kaulotu dauveiqaravi kei ira na nona itubutubu se dauniveisusu era na vakaitavi ena veivosaki.
24.8
Ni Oti na Cakacaka ni Kaulotu
24.8.2
Veivakatarogi ni Veivagalalataki vei Daukaulotu
Ena vagalalataki ira na daukaulotu o peresitedi ni iteki ka vakayacora e dua na veivakatarogi ni veivagalalataki. Ena tikina, sa kena ivakarau vei peresitedi ni kaulotu se dua na daunivakasala e lesi me vagalalataki ira na daukaulotu.
Ena rawa ni veivuke na idusidusi eso oqo ni veivakatarogi oqo.
-
Vakayaloqaqataki ira me ra tomana tikoga ni ra sa dua na tisaipeli ni bula taucoko i Jisu Karisito.
-
Vakasalataki ira me ra tara cake na itovo vinaka era a tauyavutaka vakadaukaulotu.
-
Vakayaloqaqataki ira mera vakasamataka ka vakavakarau ki na veisiga ni mataka, oka kina na vuli kei na cakacaka baleti ira na daukaulotu itabagone.
-
Vakayaloqaqataki ira mera bula kilikili tikoga ki na ivolatara ni valetabu.
24.8.4
Veikacivi
Era dau solia vakatotolo na veiliutaki na ilesilesi kei na veikacivi kivei ira na daukaulotu se qai vagalalataki wale toka ga. Oqo e okati kina na nodra okati me ra liganicakacaka vakalotu ni valetabu kevaka e ganita (raica na 25.5).
24.9
iVurevure baleta na Vakatutu kei na Veiqaravi ni Daukaulotu
24.9.2
Mataveilawa eso
-
MissionaryRecommendations.ChurchofJesusChrist.org (vakarautaki walega vei ira na iliuliu kei ira na vakarau laki kaulotu)