“24. Fautuaina Atu o Faifeautalai ma Auaunaga,” Filifiliga mai le Tusitaulima Aoao (2023).
“24. Fautuaina Atu o Faifeautalai ma Auaunaga” Filifiliga mai le Tusitaulima Aoao.
24.
Fautuaina Atu o Faifeautalai ma le Auaunaga
24.0
Faatomuaga
I aso anamua, na tuuina mai ai e le Alii le poloaiga e faapotopoto Isaraelu mai “nuu uma lava, ma papatiso atu ia te i latou i le suafa o le Tama, ma le Alo, ma le Agaga Paia” (Mataio 28:19); tagai foi i le fuaiupu e 20). Ua toefaafouina e le Alii lena poloaiga i nei aso e gata ai (tagai i le Mataupu Faavae ma Feagaiga 39:11; 68:6–8; 112:28–30).
Ina ia auauna atu i le Alii o se faifeautalai o se avanoa paia. E aumaia ai faamanuiaga e faavavau i le tagata ma i latou e auauna atu i ai (tagai i le Mataupu Faavae ma Feagaiga 18:14–16).
Ua talosagaina e le Alii ia alii talavou uma e agavaa ma malolosi, e saunia ma auauna atu i se misiona.
E talia foi e le Alii ia tamaitai talavou agavaa ma malolosi e auauna atu i ni misiona pe a latou mananao i ai.
E manaomia foi faifeautalai matutua ma e uunaia e saunia e auauna atu.
24.1
O Le Valaauga e Auauna Atu
O faifeautalai e fai ma sui o le Alii ma e tatau ona valaauina i le pule tatau (tagai i le Mataupu Faavae ma Feagaiga 42:11; Mataupu Faavae o le Faatuatua 1:5). O le valaauga e auauna atu i se misiona e masani ona tuuina atu e le Peresitene o le Ekalesia. Mo faifeau matutua mo auaunaga, e tuuina atu le valaauga e le peresitene o le siteki.
24.2
Tofiga Faafaifeautalai
O le valaauga e auauna atu o se faifeautalai e aofia ai se tofiga patino. E matuai eseese lava nei tofitofiga.
24.2.1
Faifeautalai Talavou e Aoaoina [Lesona]
O le tele o faifeautalai talavou e tofia e a’oa’o atu le talalelei i se mea mamao ese mai le aiga. O nei tofitofiga e tuuina atu e ala i faaaliga i Aposetolo. O nei faifeautalai e auauna atu i lalo o le taitaiga a se peresitene o le misiona.
24.2.2
Faifeautalai Talavou mo Auaunaga
O nisi faifeautalai talavou e tofia e auauna atu i le Ekalesia ma nuu a o nonofo i o latou aiga. O nei tofitofiga e tuuina atu e ala i faaaliga i Aposetolo ma e tuuina atu i faifeau faaolioli e sili ona fetaui o latou tulaga mo se misiona mo auaunaga (tagai i le 24.3.3).
24.2.3
Faifeau Faamisiona Matutua
O faifeautalai matutua uma e fautuaina e sue ni tagata e a’oa’o ma fesoasoani ia i latou e sauniuni mo papatisoga. E mafai foi ona tofia faifeautalai matutua e lagolago:
-
Tagata o le Ekalesia ma taitai eria ma le lotoifale.
-
Matagaluega ma fale ma fanua o le Ekalesia.
-
Faalapotopotoga o Foai Alofa.
O faifeau faamisiona matutua, e le talosagaina le tutusa o itula e galulue ai, faatino uma gaoioiga e tasi, pe ausia foi ia faamoemoega e pei o faifeautalai talavou.
O tofitofiga mo faifeautalai matutua e tuuina atu e ala i faaaliga i Aposetolo. E mafai e sui faaolioli ona faaali atu se mea e fiafia i ai mo se tofiga ae e tatau ona loto e talia soo se tofiga.
24.2.4
Faifeautalai Matutua mo Auaunaga
E faaopoopo i valaauga i o latou uarota po o siteki tumau, e mafai e tagata o le au paia ona auauna atu i le Alii o ni faifeautalai matutua mo auaunaga. E tuu atu e nei faifeautalai ia auaunaga taua i matagaluega a le Ekalesia, fale ma fanua, ma misiona (tagai i le 24.7.1). E nonofo i o latou aiga.
O faifeautalai matutua mo auaunaga e valaauina e le peresitene o le siteki. Latou te galulue i lalo o lana taitaiga. O le telē o le taimi latou te auauna atu ai i vaiaso taitasi e faalagolago i lo latou gafatia, avanoa mo auaunaga i lo latou eria, ma le taitaiga mai le Au Peresitene o le Eria.
24.2.5
Aotelega o Tofiga Faafaifeautalai
O le siata lea o loo aotele atu ai ituaiga o tofiga faafaifeautalai.
|
Faifeautalai Talavou e A’oa’oina [Lesona] |
Faifeautalai Talavou mo Auaunaga |
Faifeautalai Matutua |
Faifeautalai Matutua mo Auaunaga | |
|---|---|---|---|---|
|
E valaauina e le | Faifeautalai Talavou e A’oa’oina [Lesona] Peresitene o le Ekalesia | Faifeautalai Talavou mo Auaunaga Peresitene o le Ekalesia | Faifeautalai Matutua Peresitene o le Ekalesia | Faifeautalai Matutua mo Auaunaga Peresitene o le siteki |
|
E tofia e | Faifeautalai Talavou e A’oa’oina [Lesona] Se Aposetolo | Faifeautalai Talavou mo Auaunaga Se Aposetolo | Faifeautalai Matutua Se Aposetolo | Faifeautalai Matutua mo Auaunaga Peresitene o le siteki |
|
E vaetofia e le | Faifeautalai Talavou e A’oa’oina [Lesona] Peresitene o le siteki | Faifeautalai Talavou mo Auaunaga Peresitene o le siteki | Faifeautalai Matutua Peresitene o le siteki | Faifeautalai Matutua mo Auaunaga Peresitene o le siteki po o se fesoasoani |
|
E nofo | Faifeautalai Talavou e A’oa’oina [Lesona] Mamao ese mai le aiga | Faifeautalai Talavou mo Auaunaga I le aiga | Faifeautalai Matutua Mamao ese mai le aiga po o i le aiga | Faifeautalai Matutua mo Auaunaga I le aiga |
|
Taitai faale-ekalesia | Faifeautalai Talavou e A’oa’oina [Lesona] Peresitene o le misiona po o le peresitene o le nofoaga faaletalafaasolopito | Faifeautalai Talavou mo Auaunaga Peresitene o le siteki | Faifeautalai Matutua Peresitene o le misiona, malumalu, po o le peresitene o le nofoaga faaletalafaasolopito, po o le Peresitene o le Eria | Faifeautalai Matutua mo Auaunaga Peresitene o le siteki |
|
E lipoti atu i le | Faifeautalai Talavou e A’oa’oina [Lesona] Peresitene o le misiona po o le peresitene o le nofoaga faaletalafaasolopito | Faifeautalai Talavou mo Auaunaga Taitai misiona mo auaunaga | Faifeautalai Matutua Peresitene o le misiona, malumalu, po o le peresitene o le nofoaga faasolopito; Peresitene o le Eria, faatonu o le nofoaga tutotonu mo tagata asiasi mai, po o se pule o le matagaluega po o fale ma fanua o le Ekalesia | Faifeautalai Matutua mo Auaunaga Pule o tofiga mo auaunaga |
|
Tulaga manaomia o tausaga | Faifeautalai Talavou e A’oa’oina [Lesona] 18–25 (alii) | Faifeautalai Talavou mo Auaunaga 18–25 (alii) | Faifeautalai Matutua 40 pe matutua atu pe afai ua faaipoipo pe o se tuafafine nofofua | Faifeautalai Matutua mo Auaunaga 26 pe matutua atu |
24.3
Sauniuni ma le Agavaa e Auauna Atu i se Misiona
E fautuaina faifeautalai faaolioli e auauna atu i misiona ona o lo latou alolofa i le Alii ma Ana fanau. E tatau ona latou faamasani i fesili o faatalanoaga mo le fautuaina atu o faifeautalai.
24.3.1
Liua ia Iesu Keriso
O faifeautalai faaolioli e taumafai malosi e faamalolosia o latou liua ia Iesu Keriso ma Lana talalelei toefuataiina.
24.3.2
Ausia o Tulaga Faatonuina o le Agavaa
O faifeautalai faaolioli e taumafai malosi ia agavaa mo le mafutaga a le Agaga. E manaomia lenei mea mo le mataalia o le galuega faafaifeautalai (tagai i le Mataupu Faavae ma Feagaiga 42:13-14).
24.3.2.1
Salamo
O le salamo e manaomia ai le faatino o le faatuatua ia Keriso, i ai le manatu moni, ma le tausiga o poloaiga. E aofia ai le ta’uta’u atu ma le lafoa’i o agasala. Mo agasala matuia, o le salamo e manaomia ai le ta’uta’u atu i le epikopo po o le peresitene o le siteki.
O se tagata ua salamo e faamagaloina ma faamamaina e ala i le Togiola ma le alofa tunoa o Iesu Keriso. E le toe manatuaina e le Alii le agasala. (Tagai i le Isaia 43:25; Iakopo 6:5; Alema 34:15–17; Helamana 5:10–11; Mataupu Faavae ma Feagaiga 58:42–43. Tagai foi i le 32.1 i le tusitaulima lenei.)
O se faifeautalai faaolioli e tatau ona salamo i agasala matuia a o le’i mafai e le peresitene o le siteki ona auina atu lana talosaga (tagai i le 32.6; tagai foi i le 24.4.4). O le faagasologa o le salamo e aofia ai le lava o le taimi mo le tagata e faaalia ai e ala i le ola amiotonu ua ia maua le agaga o Keriso e oo atu i le faamagaloga o agasala.
24.3.3
Soifua Maloloina Faaletino, Faalemafaufau, ma Faalelagona
O le galuega faafaifeautalai e lu’itauina. E tatau i faifeautalai talavou e a’oa’oina [lesona] ona tautino atu atoa ma ia gafatia faaletino, faalemafaufau, ma faalelagona ona galue i le faatulagaga atoa a le faifeautalai faamisiona.
24.3.4
Tupe
24.3.4.1
Faatupeina o Faifeautalai Talavou e Auauna Mamao Ese mai Aiga
O sui talavou faaolioli o e ua saunia e tusa ai ma o latou gafatia e le tatau ona faatuai ona auauna atu ona o ni mafuaaga tautupe. O i latou e manaomia le fesoasoani tautupe ina ia faafetaia’ia ai tautinoga mo saofaga, e mafai ona maua mai i aiga lautele ma uo.
Afai o totoe pea se tulaga manaomia, e mafai e le epikopo po o le peresitene o le siteki ona talosaga atu i tagata o le au paia i le uarota po o le siteki e foai atu i le tupe mo faifeautalai a le uarota.
E le mafai ona faaaoga ai tupe o paketi a le iunite i le lotoifale ma tupe o le taulaga anapogi.
Tautinoga mo saofaga faalemasina. O faifeautalai talavou e a’oa’oina [lesona] ma o latou aiga e saofaga i se aofaiga patino i masina taitasi e fesoasoani ai mo le totogiina o tau o le polokalama faafaifeautalai.
O saofaga e totogi i le tupe mo faifeautalai faamisiona a le uarota. E faamaonia e epikopo, o loo tuuina atu tupe i masina taitasi. O tupe e sili atu ma le aofaiga e totogi faalemasina, e le tatau ona vave totogia. O tupe e vave ona totogi atu i saofaga e le mafai ona toe faafoi atu pe afai e vave ona toe faafoi atu i le fale se faifeautalai.
Tupe faaalu i le galuega tala’i. O masina taitasi, e maua ai e faifeautalai talavou ia tupe mai le misiona mo a latou meaai, femalagaaiga, ma isi tupe faaalu e ola ai. O nei tupe e paia. E na o faamoemoega e faatatau i le misiona e faaaoga ai e faifeautalai na tupe. E le tatau ona faaaoga mo le totogiina o ni mea faaletagata lava ia, teu, pe auina atu i tagata o le aiga po o isi. E toe faafoi atu e faifeautalai i le misiona soo se tupe latou te le manaomia.
E faaaoga e faifeautalai tupe a le tagata lava ia e taulima ai isi tupe faaalu. E tatau ona tuuitiitia tupe faaalu faaletagata lava ia. (Tagai i le Tulaga Faatonuina Faafaifeautalai mo Soo o Iesu Keriso, 4.8.)
24.3.4.2
Faatupeina o Faifeautalai Matutua e Auauna Mamao Ese mai Aiga
Tautinoga mo saofaga faalemasina. O faifeautalai matutua e auauna mamao ese mai le aiga, latou te saofaga i le tupe mo faifeautalai a o latou uarota tumau i masina taitasi. O nei foai e fesoasoani e totogi ai le tau o fale ma taavale.
E faamaonia e epikopo, o loo tuuina atu tupe i masina taitasi. E le tatau ona vave totogia tupe e sili atu ma le aofaiga faalemasina.
Tupe faaalu faaopoopo. E faaopoopo atu i le saofaga faalemasina na tautinoina, lea e fesoasoani i le totogiina o fale ma tupe faaalu o taavale, e tatau i faifeautalai matutua ona totogi atoa isi tupe faaalu e aofia ai ma meaai.
24.3.4.3
Faatupeina o Faifeautalai e Auauna Atu mai le Fale
O faifeautalai e auauna atu mai le fale e nafa ma o latou manaoga uma tautupe.
24.3.4.4
Inisiua Faafomai ma Tupe Faaalu
Ua uunaia malosi faifeautalai uma ina ia tausisia pea a latou inisiua faafomai o loo i ai i le taimi nei pe a mafai, e aofia ai ma faifeautalai talavou e a’oa’oina [lesona].
O faifeautalai e auauna atu mai le fale, e tatau ona i ai a latou lava inisiua faafomai ma isi. O faifeautalai matutua e auauna mamao ese mai aiga e tatau foi ona i ai lenei inisiua. O faifeautalai matutua o e o le a auauna atu i fafo atu o o latou atunuu tumau, e mafai ona maua se inisiua e ala i le Senior Service Medical Plan.
24.3.5
Matafaioi a Tagata o le Aiga ma Taitai i le Sauniaina o Faifeautalai
E fesoasoani tagata o le aiga, epikopo, ma isi taitai i le autalavou ia saunia e auauna atu i se misiona.
E fautuaina e tagata o le aiga ma taitai ia faifeautalai faaolioli uma e suesue:
-
Le Tusi a Mamona ma isi tusitusiga paia.
E fesoasoani tagata o le aiga ma taitai i sui faaolioli uma ia tautino e mulimuli i tulaga faatonuina faafaifeautalai. Latou te uunaia sui faaolioli e suesue i le tusitaulima o tulaga faatonuina faafaifeautalai e faatatau i o latou tofiga atonu e tofi i ai:
-
Mo faifeautalai talavou e a’oa’oina [lesona]: Tulaga Faatonuina Faafaifeautalai mo So’o o Iesu Keriso
24.4
Fautuaina Atu o Faifeautalai
24.4.1
Iloiloga Faalesoifua Maloloina
E manaomia sui faaolioli uma ia iloiloina e polofesa faafomai lo latou saunia faalesoifua maloloina.
24.4.2
Fomu o Faatalanoaga ma le Talosaga
E faatautaia e le epikopo ma le peresitene o le siteki ia faatalanoaga mae’ae’a, ia vailiili faaleagaga ma siitia, ma sui faaolioli taitasi. Latou te faaaogaina le fesili o faatalanoaga mo le fautuaina atu o faifeautalai.
E iloiloina foi e le epikopo ma le peresitene o le siteki ia faamatalaga e uiga i le saunia i tulaga faatonuina o le agavaa ma le soifua maloloina i le Polokalama mo le Fautuaina atu o Faifeautalai i le Initoneti E le faaopoopoa e le epikopo ma le peresitene o le siteki se isi tulaga faatonuina mo le agavaa. Latou te le suia foi fesili o le faatalanoaga.
Afai e i ai ni atugaluga o le epikopo ma le peresitene o le sieki e uiga i le ausiaina e le sui faaolioli o tulaga faatonuina o le agavaa, pe uiga foi i le saunia faalesoifua maloloina, latou te fefautuaai faatasi ma le tagata. Faatasi ma le faatagaga a se sui faaolioli, e mafai foi ona latou fefautuaai faatasi ma ona matua. E le tatau i le epikopo ma le peresitene o le siteki ona auina atu se pepa o talosaga se’i iloga ua salamo le tagata i se agasala matuia (tagai i le 24.3.2.1). E faalagolago i le soifua maloloina faaletino, faalemafaufau, pe faalelagona o le tagata, e mafai ona latou talanoaina le avanoa e tofia ai e avea ma se faifeautalai mo auaunaga.
I tulaga faavavevave pe afai e le o avanoa le epikopo po o le peresitene o le siteki, e mafai ona ia faatagaina se tasi o ona fesoasoani e faatautaia nei faatalanoaga.
I itu, o le peresitene o le misiona po o se fesoasoani e tofia, e faatalanoaina ma fautuaina atu faifeautalai faaolioli. E le faia e peresitene o itu nei faatalanoaga.
24.4.4
O i Latou e Le Mafai ona Auauna Atu o ni Faifeautalai Faamisiona
O nisi taimi e i ai se tagata o le Ekalesia e manao e auauna atu ae le mafai ona valaauina o se faifeautalai faamisiona. E ono afua ona o luitau faalesoifua maloloina, lē ausia tulaga faatonuina o le agavaa, faafitauli faaletulafono, po o isi tulaga. E mafai e le peresitene o le siteki ona tuusaunoa mai o ia mai le galuega faafaifeautalai faamisiona.
24.5
Pe A Mavae Ona Maua se Valaauga Faamisiona
O faifeautalai faamisiona fou faato’ā valaauina e fautuaina ia faitau pe toe faitau le Tusi a Mamona a o le’i amataina a latou misiona. Latou te mulimuli i fautuaga a le Tupu o Peniamina ia “vaavaaia outou lava, ma o outou mafaufauga, ma a outou upu, ma a outou galuega” (Mosaea 4:30).
24.5.1
Faaeega Paia o le Malumalu ma Auaunaga i le Malumalu
Afai e le’i mauaina e faifeautalai fou faato’ā valaau ia saungia o le faaeega paia o le malumalu, e tatau ona latou faia a o le’i amataina le auaunaga faafaifeautalai i nofoaga e mafai ai (tagai i le Mataupu Faavae ma Feagaiga 43:15–16; 105:33). E aofia ai faifeautalai mo auaunaga pe a talafeagai ma o latou tulaga.
O faifeautalai faato’ā valaauina, o ē ua maua faaeega paia, e mafai ona auauna atu o ni tagata faisauniga i le malumalu a o le’i amataina le galuega faafaifeautalai pe a talafeagai ai (tagai i le 25.5).
24.5.2
Lotu Faamanatuga
E valaaulia e le au epikopo ia faifeautalai faato’ā valaauina e lauga i le lotu faamanatuga a o le’i amataina a latou misiona. O se lotu faamanatuga masani lava lea. O le taulaiga e tatau ona i luga o le faamanatuga ma le Faaola.
24.5.3
Vaetofiaina o Faifeautalai
O le peresitene o le siteki tumau e vaetofiaina faifeautalai taitasi i le latalata e mafai ai i le aso e amata ai lana misiona. I tulaga faavavevave pe afai e le o avanoa le peresitene o le siteki, e mafai ona ia faatagaina se tasi o ona fesoasoani e vaetofiaina faifeautalai.
O le peresitene o le misiona po o se tasi o ona fesoasoani e vaetofiaina faifeautalai e valaauina mai itu o lana misiona. E le vaetofiaina e le peresitene o le itu ia ni faifeautalai.
O se uso o le a auauna mamao ese mai le aiga, e tatau ona maua le Perisitua Mekisateko a o le’i vaetofiaina o ia o se faifeautalai. O se uso o le a galue o se faifeautalai mo auaunaga, e tatau ona umia le Perisitua Mekisateko pe a talafeagai ma ona tulaga.
24.6
Auauna Atu i Nofoaga e Mamao Ese mai le Aiga
24.6.2
I le Galuega
24.6.2.5
O Talosaga e Lagolago Isi i Tulaga Tautupe po o A’oga po o Malaga i Isi Atunuu
E le tatau i faifeautalai ma o latou aiga ona tuuina atu se lagolago tautupe mo i latou e nonofo i nofoaga o loo galulue ai faifeautalai, e aofia ai ma le lagolago tautupe mo a’oga. E le tatau foi i faifeautalai ma o latou aiga ona lagolagoina tagata e mananao e malaga i isi atunuu (tagai i le 38.8.19).
24.6.2.8
Pepa Faamaumau ma Sefuluai
E tuu ai pea pepa faamaumau i le uarota tumau o le faifeautalai. E faamaumau foi e le uarota tumau lona tulaga o sefuluai. E le totogia e faifeautalai ia sefuluai mai tupe lagolago latou te maua mai le misiona. Peitai, latou te totogia le sefuluai pe afai e i ai lava ni a latou tupe maua patino.
24.6.3
Toe foi i le Aiga mai se Misiona
24.6.3.1
Toe Foi i le Aiga e pei ona Faatulagaina Ai Muamua
E le tatau i faifeautalai ma o latou aiga ona talosagaina ina ia vave faamalolo mai pe faaopoopo foi le taimi o le auaunaga ona o ni tulaga e talafeagai mo le tagata lava ia.
E tatau i faifeautalai ona malaga sa’o i le aiga mai i a latou misiona. Soo se isi faigamalaga e ese mai ai, atonu e faato’ā mafai ona faamaoniaina pe afai e malaga faatasi le faifeautalai ma se tasi o matua po o le tagata o loo tausiaina.
E le faamaloloina ia faifeautalai se’i iloga ua latou lipoti atu i lo latou peresitene o le siteki. Latou te mulimulita’ia tulaga faatonuina faafaifeautalai se’ia oo i lena taimi.
24.6.3.2
Toe Vave Faafoi i le Fale
O nisi faifeautalai e vave faamalolo ona o le soifua maloloina, agavaa, po o isi mafuaaga. E tuu atu e epikopo ma peresitene o siteki le lagolago faapitoa i faifeautalai nei ua toe faafoi mai. E fesoasoani taitai ia i latou e galulue ia toe maua le ola maloloina pe toe foi i le galuega pe a mafai ai.
24.7
Misiona mo Auaunaga
24.7.1
Faailoaina o Avanoa mo Faifeautalai mo Auaunaga
E fefautuaai le epikopo, peresitene o le siteki, ma le faifeautalai mo auaunaga e faailoa ai avanoa i le lotoifale e auauna atu ai. Mo faifeautalai talavou mo auaunaga, e auai se taitai misiona mo auaunaga ma matua o le faifeautalai po o lē e vaaia, i le talanoaga.
24.8
Pe a Mae’a le Auaunaga a le Faifeautalai
24.8.2
Faatalanoaga mo le Faamalologa o Faifeautalai
E faamalolo e le peresitene o le siteki ia faifeautalai ma faatautaia se faatalanoaga o le faamalologa. I itu, e masani lava o le peresitene o le misiona po o se fesoasoani e tofia, e faamaloloina faifeautalai.
E mafai ona fesoasoani ia taiala nei mo lenei faatalanoaga.
-
Fautuaina i latou e faaauau pea le avea o se soo o Iesu Keriso i le olaga atoa.
-
Fautuaina i latou e atia’e ni mausa lelei sa latou atia’eina o se faifeautalai.
-
Fautuaina i latou e mafaufau ma sauniuni mo le lumanai, e aofia ai a’oga ma galuega mo faifeautalai talavou.
-
Fautuaina i latou ia ola agavaa e le aunoa mo se pepa faataga o le malumalu.
24.8.4
Valaauga
Ia vave ona tuu atu e taitai ni tofiga faaleauaunaga ma valaauga i faifeautalai faato’ā faamalolo mai. E aofia ai le iloiloina o i latou o ni tagata fai sauniga o le malumalu pe a talafeagai ai (tagai i le 25.5).
24.9
Punaoa mo le Fautuaina Atu o Faifeautalai ma le Auaunaga
24.9.2
Uepisaite
-
MissionaryRecommendations.ChurchofJesusChrist.org (avanoa mo na o taitai i le lotoifale ma faifeautalai faaolioli)