“26. ໃບຮັບຮອງເຂົ້າພຣະວິຫານ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“26. ໃບຮັບຮອງເຂົ້າພຣະວິຫານ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
26.
ໃບຮັບຮອງເຂົ້າພຣະວິຫານ
26.0
ຄຳນຳ
ການເຂົ້າໄປພຣະວິຫານແມ່ນສິດທິພິເສດອັນສັກສິດ. ຜູ້ນຳຫວອດ ແລະ ສະເຕກຊຸກຍູ້ສະມາຊິກທຸກຄົນໃຫ້ມີຄ່າຄວນສຳລັບພຣະວິຫານ ແລະ ມີໃບຮັບຮອງເຂົ້າພຣະວິຫານ ເຖິງແມ່ນເຂົາເຈົ້າບໍ່ໄດ້ອາໄສຢູ່ໃກ້ພຣະວິຫານກໍຕາມ.
ຜູ້ນຳໃນສາດສະໜາຈັກຄວນໃຊ້ຄວາມພະຍາຍາມໃນທຸກວິທີທາງ ເພື່ອເບິ່ງວ່າ ສະມາຊິກທີ່ເຂົ້າໄປໃນພຣະວິຫານທຸກຄົນມີຄ່າຄວນພໍທີ່ຈະເຂົ້າໄປຫລືບໍ່ (ເບິ່ງ ເພງສັນລະເສີນ 24:3–5).
ສະມາຊິກຕ້ອງມີໃບຮັບຮອງເຂົ້າພຣະວິຫານໃນປະຈຸບັນ ກ່ອນຈະເຂົ້າໄປໃນພຣະວິຫານໄດ້.
ອະທິການຈະປຶກສາກັບປະທານສະເຕກຂອງເພິ່ນ ຖ້າຫາກເພິ່ນມີຄຳຖາມກ່ຽວກັບໃບຮັບຮອງເຂົ້າພຣະວິຫານ ທີ່ບໍ່ໄດ້ຕອບຢູ່ໃນບົດນີ້. ປະທານສະເຕກສາມາດຕິດຕໍ່ຫາຫ້ອງການຂອງຝ່າຍປະທານສູງສຸດຖ້າມີຄຳຖາມ.
26.1
ຊະນິດໃບຮັບຮອງເຂົ້າພຣະວິຫານ
ໃບຮັບຮອງມີສາມຊະນິດດ້ວຍກັນ:
-
ໃບຮັບຮອງເຂົ້າພຣະວິຫານສຳລັບສະມາຊິກທີ່ຍັງບໍ່ໄດ້ຮັບຂອງປະທານສັກສິດເທື່ອ. ໃບຮັບຮອງເຫລົ່ານີ້ແມ່ນສຳລັບສະມາຊິກທີ່ຍັງບໍ່ໄດ້ຮັບຂອງປະທານສັກສິດເທື່ອ ຜູ້ທີ່ຈະຜະນຶກເຂົ້າກັບພໍ່ແມ່ຂອງເຂົາເຈົ້າ ຫລື ປະຕິບັດການບັບຕິສະມາ ແລະ ການຢືນຢັນແທນ. ໃບຮັບຮອງຖືກອອກໃຫ້ຜ່ານທາງ ແຫລ່ງຊ່ວຍຜູ້ນຳ ແລະ ສະໝຽນ (LCR). ສຳລັບຂໍ້ມູນເພີ່ມເຕີມ, ໃຫ້ເບິ່ງ 26.4.
-
ໃບຮັບຮອງເຂົ້າພຣະວິຫານສຳລັບພິທີການຂອງຜູ້ທີ່ມີຊີວິດຢູ່. ໃບຮັບຮອງເຫລົ່ານີ້ແມ່ນສຳລັບສະມາຊິກທີ່ຈະໄປຮັບເອົາຂອງປະທານສັກສິດສຳລັບຕົວເອງ ຫລື ຈະຜະນຶກເຂົ້າກັບຄູ່ຄອງ. ໃບຮັບຮອງພິທີການສຳລັບຜູ້ທີ່ມີຊີວິດຢູ່ຈະຕິດແນບຢູ່ກັບໃບຮັບຮອງເຂົ້າພຣະວິຫານປົກກະຕິສຳລັບສະມາຊິກທີ່ໄດ້ຮັບຂອງປະທານສັກສິດແລ້ວ (ມີອະທິບາຍໄວ້ຢູ່ຂ້າງລຸ່ມ).
-
ໃບຮັບຮອງເຂົ້າພຣະວິຫານສຳລັບສະມາຊິກທີ່ໄດ້ຮັບຂອງປະທານສັກສິດແລ້ວ. ໃບຮັບຮອງເຫລົ່ານີ້ແມ່ນສຳລັບສະມາຊິກທີ່ໄດ້ຮັບຂອງປະທານສັກສິດກ່ອນແລ້ວ. ໃບຮັບຮອງຖືກອອກໃຫ້ຜ່ານທາງ LCR. ໃບຮັບຮອງອະນຸຍາດໃຫ້ສະມາຊິກເຂົ້າຮ່ວມພິທີການພຣະວິຫານທັງໝົດສຳລັບຄົນທີ່ເສຍຊີວິດແລ້ວ. ໃບຮັບຮອງກໍຍັງຖືກໃຊ້ເມື່ອສະມາຊິກທີ່ໄດ້ຮັບຂອງປະທານສັກສິດແລ້ວຖືກຜະນຶກເຂົ້າກັບພໍ່ແມ່ ຫລື ລູກທີ່ມີຊີວິດຢູ່ ຫລື ເສຍຊີວິດແລ້ວ. ສຳລັບຂໍ້ມູນເພີ່ມເຕີມ, ໃຫ້ເບິ່ງ 26.3.
26.2
ການເກັບຮັກສາໃບຮັບຮອງເຂົ້າພຣະວິຫານ
26.2.1
ການເກັບຮັກສາໃບຮັບຮອງເຂົ້າພຣະວິຫານໂດຍຜູ້ນຳຖານະປະໂລຫິດ
ຜູ້ນຳຖານະປະໂລຫິດຜູ້ທີ່ຖືກອະນຸຍາດໃຫ້ມີປຶ້ມໃບຮັບຮອງເຂົ້າພຣະວິຫານ ຄວນເກັບຮັກສາມັນໄວ້ໃຫ້ດີ.
ຜູ້ນຳຖານະປະໂລຫິດກໍຍັງຕ້ອງແນ່ໃຈວ່າ ບຸກຄົນທີ່ບໍ່ໄດ້ຮັບອະນຸຍາດ ຈະບໍ່ສາມາດເຂົ້າເຖິງຂໍ້ມູນຂອງໃບຮັບຮອງເຂົ້າພຣະວິຫານໃນ LCR.
26.2.3
ໃບຮັບຮອງທີ່ເສຍ ຫລື ຖືກລັກໄປ
ອະທິການຂໍໃຫ້ສະມາຊິກແຈ້ງໃຫ້ເພິ່ນຊາບໃຫ້ໄວເທົ່າທີ່ຈະເປັນໄປໄດ້ ຖ້າຫາກເຂົາເຈົ້າເຮັດໃບຮັບຮອງເສຍ ຫລື ຖືກລັກໄປ. ເພິ່ນ ຫລື ທີ່ປຶກສາ ຫລື ສະໝຽນທີ່ຖືກມອບໝາຍຈະໃຊ້ LCR ເພື່ອຍົກເລີກໃບຮັບຮອງໃຫ້ໄວເທົ່າທີ່ຈະເປັນໄປໄດ້. ຖ້າຫາກລະບົບນີ້ບໍ່ມີໃຫ້ໃຊ້, ອະທິການຈະຕິດຕໍ່ຫາຫ້ອງການພຣະວິຫານ ເພື່ອຍົກເລີກໃບຮັບຮອງ.
26.2.4
ຜູ້ຖືໃບຮັບຮອງທີ່ບໍ່ດຳລົງຊີວິດຕາມມາດຕະຖານຄວາມມີຄ່າຄວນ
ຖ້າຫາກອະທິການພິຈາລະນາວ່າສະມາຊິກຜູ້ມີໃບຮັບຮອງ ບໍ່ໄດ້ດຳລົງຊີວິດຕາມມາດຕະຖານຄວາມມີຄ່າຄວນ (ເບິ່ງ 26.3), ເພິ່ນຈະຂໍເອົາໃບຮັບຮອງຈາກສະມາຊິກ. ເພິ່ນໃຊ້ LCR ເພື່ອຍົກເລີກໃບຮັບຮອງ. ຖ້າຫາກລະບົບນີ້ບໍ່ມີໃຫ້ໃຊ້, ອະທິການຈະຕິດຕໍ່ຫາຫ້ອງການພຣະວິຫານ ເພື່ອຍົກເລີກໃບຮັບຮອງ.
26.3
ແນວທາງຊີ້ນຳທົ່ວໄປສຳລັບການອອກໃບຮັບຮອງເຂົ້າພຣະວິຫານ
ຜູ້ນຳຖານະປະໂລຫິດຄວນອອກໃບຮັບຮອງໃຫ້ ພຽງແຕ່ເມື່ອຖ້າຫາກສະມາຊິກຕອບຄຳຖາມສຳລັບໃບຮັບຮອງເຂົ້າພຣະວິຫານຢ່າງເໝາະສົມເທົ່ານັ້ນ.
ການສຳພາດເອົາໃບຮັບຮອງເຂົ້າພຣະວິຫານບໍ່ຄວນກະທັດລັດ. ການສຳພາດຄວນເປັນສ່ວນຕົວ. ເຖິງຢ່າງໃດກໍຕາມ, ບຸກຄົນທີ່ຖືກສຳພາດອາດເຊື້ອເຊີນໃຫ້ຜູ້ໃຫຍ່ມີໜ້າຢູ່ນຳ.
ຜູ້ນຳຖານະປະໂລຫິດບໍ່ຄວນຕື່ມຂໍ້ກຳນົດໃດໆໃສ່ກັບຄຳຖາມທີ່ລະບຸໄວ້ຢູ່ໃນປຶ້ມໃບຮັບຮອງເຂົ້າພຣະວິຫານ. ທັງບໍ່ຄວນຕັດຂໍ້ກຳນົດໃດອອກ.
ໃນສະເຕກ, ສະມາຊິກຄົນໜຶ່ງໃນຝ່າຍປະທານສະເຕກ ຫລື ສະໝຽນສະເຕກຈະເປີດໃຊ້ງານໃບຮັບຮອງເຂົ້າພຣະວິຫານໃນ LCR ຫລັງຈາກມັນຖືກອອກໃຫ້ແລ້ວ. ໃນທ້ອງຖິ່ນ, ສະມາຊິກຄົນໜຶ່ງໃນຝ່າຍປະທານເຜີຍແຜ່ ຫລື ສະໝຽນເຂດເຜີຍແຜ່ຈະເປີດໃຊ້ງານໃບຮັບຮອງ. ໃບຮັບຮອງສຳລັບການກະທຳການບັບຕິສະມາ ແລະ ການຢືນຢັນແທນ ຈະຖືກເປີດໃຊ້ງານເມື່ອໃບຮັບຮອງຖືກພິມໂດຍສະມາຊິກຄົນໜຶ່ງໃນຝ່າຍອະທິການ ຫລື ໂດຍປະທານສາຂາ.
26.3.1
ການສຳພາດໃບຮັບຮອງເຂົ້າພຣະວິຫານສຳລັບສະມາຊິກຫວອດ ແລະ ສາຂາ
ໃນຫວອດ, ອະທິການ ຫລື ທີ່ປຶກສາທີ່ຖືກມອບໝາຍ ຈະດຳເນີນການສຳພາດໃບຮັບຮອງເຂົ້າພຣະວິຫານ ແລະ ອອກໃບຮັບຮອງໃຫ້ຜູ້ທີ່ມີຄ່າຄວນ. ໃນສາຂາ, ພຽງແຕ່ປະທານສາຂາເທົ່ານັ້ນທີ່ດຳເນີນການສຳພາດ ແລະ ອອກໃບຮັບຮອງເຂົ້າພຣະວິຫານໃຫ້.
ໃນຫວອດ, ອະທິການຈະສຳພາດສະມາຊິກດ້ວຍຕົວເອງ ຜູ້ທີ່:
-
ຈະໄປຮັບເອົາຂອງປະທານສັກສິດສຳລັບຕົວເອງ (ເບິ່ງ 27.1 ແລະ 27.2).
-
ຈະຜະນຶກເຂົ້າກັບຄູ່ຄອງ (ເບິ່ງ 27.3).
ໃນກໍລະນີສຸກເສີນ ເມື່ອອະທິການບໍ່ສະດວກ, ເພິ່ນອາດອະນຸຍາດໃຫ້ທີ່ປຶກສາຄົນໜຶ່ງຂອງເພິ່ນເປັນຜູ້ດຳເນີນການສຳພາດເຫລົ່ານີ້.
ກ່ອນອອກໃບຮັບຮອງ ບໍ່ວ່າຈະເປັນໃນສະຖານະການໃດກໍຕາມທີ່ລະບຸໄວ້ຂ້າງເທິງ, ອະທິການຈະກວດກາເບິ່ງບັນທຶກຂອງສະມາຊິກເພື່ອຢືນຢັນວ່າ ມັນບໍ່ມີໝາຍເຫດປະກອບກ່ຽວກັບການຈຳກັດສະມາຊິກກະພາບໃນສາດສະໜາຈັກ. ສະເພາະສະມາຊິກທີ່ຈະຮັບເອົາຂອງປະທານສັກສິດສຳລັບຕົວເອງ ຫລື ຈະຜະນຶກເຂົ້າກັບຄູ່ຄອງ, ເພິ່ນກໍຕ້ອງແນ່ໃຈວ່າ:
-
ການບັບຕິສະມາ ແລະ ການຢືນຢັນຂອງບຸກຄົນຖືກບັນທຶກໄວ້ໃນບັນທຶກສະມາຊິກກະພາບ.
-
ອ້າຍນ້ອງໄດ້ຮັບຖານະປະໂລຫິດແຫ່ງເມນຄີເສເດັກແລ້ວ.
ຫລັງຈາກໄດ້ຮັບການສຳພາດຈາກສະມາຊິກຄົນໜຶ່ງໃນຝ່າຍອະທິການ ຫລື ຈາກປະທານສາຂາແລ້ວ, ສະມາຊິກຄົນໜຶ່ງໃນຝ່າຍປະທານສະເຕກຈະສຳພາດສະມາຊິກຜູ້ອາໄສຢູ່ໃນສະເຕກ. ສະມາຊິກຄົນໜຶ່ງໃນຝ່າຍປະທານເຜີຍແຜ່ດຳເນີນການສຳພາດເທື່ອທີສອງສຳລັບສະມາຊິກຜູ້ອາໄສຢູ່ໃນທ້ອງຖິ່ນ. ປະທານທ້ອງຖິ່ນບໍ່ດຳເນີນການສຳພາດໃບຮັບຮອງເຂົ້າພຣະວິຫານ ຍົກເວັ້ນແຕ່ໄດ້ຮັບອະນຸຍາດຈາກຝ່າຍປະທານສູງສຸດກ່ອນ.
26.3.2
ການສຳພາດໃບຮັບຮອງເຂົ້າພຣະວິຫານສຳລັບສະມາຊິກໃນພື້ນທີ່ຫ່າງໄກ
ສະມາຊິກບາງຄົນອາໄສຢູ່ໃນພື້ນທີ່ຫ່າງໄກ ຊຶ່ງຕ້ອງເສຍຄ່າເດີນທາງແພງ ຫລື ຫຍຸ້ງຍາກ ເພື່ອມາພົບກັບສະມາຊິກຄົນໜຶ່ງໃນຝ່າຍປະທານສະເຕກ ຫລື ຝ່າຍປະທານເຜີຍແຜ່. ໃນສະຖານະການເຫລົ່ານີ້, ປະທານພຣະວິຫານອາດສຳພາດບຸກຄົນດັ່ງກ່າວ ແລະ ເຊັນໃບຮັບຮອງ. ກ່ອນດຳເນີນການສຳພາດ, ເພິ່ນຈະລົມກັບປະທານສະເຕກ ຫລື ປະທານເຜີຍແຜ່. ອະທິການ, ທີ່ປຶກສາຄົນໜຶ່ງທີ່ໄດ້ຮັບອະນຸຍາດ, ຫລື ປະທານສາຂາ ຄວນໄດ້ສຳພາດສະມາຊິກ ແລະ ໄດ້ເຊັນໃບຮັບຮອງແລ້ວ.
26.4
ການອອກໃບຮັບຮອງເຂົ້າພຣະວິຫານໃຫ້ສະມາຊິກທີ່ບໍ່ໄດ້ຮັບຂອງປະທານສັກສິດ
26.4.1
ແນວທາງຊີ້ນຳທົ່ວໄປ
ໃບຮັບຮອງເຂົ້າພຣະວິຫານຖືກອອກໃຫ້ສະມາຊິກທີ່ບໍ່ໄດ້ຮັບຂອງປະທານສັກສິດ ດັ່ງຕໍ່ໄປນີ້:
-
ສຳລັບສະມາຊິກອາຍຸ 11 ປີຂຶ້ນໄປ ທີ່ຈະຮັບການບັບຕິສະມາ ແລະ ການຢືນຢັນແທນຄົນຕາຍ. (ຍິງໜຸ່ມ ແລະ ຊາຍໜຸ່ມທີ່ໄດ້ຮັບການແຕ່ງຕັ້ງແລ້ວ ສາມາດຮັບໃບຮັບຮອງເຂົ້າພຣະວິຫານ ເລີ່ມຕົ້ນໃນເດືອນມັງກອນຂອງປີ ທີ່ພວກເຂົາອາຍຸຄົບ 12 ປີ.)
-
ສຳລັບສະມາຊິກອາຍຸ 8 ປີຫາ 20 ປີ ທີ່ຈະຜະນຶກເຂົ້າກັບພໍ່ແມ່ຂອງເຂົາເຈົ້າ. ເດັກນ້ອຍທີ່ອາຍຸນ້ອຍກວ່າ 8 ປີ ບໍ່ຕ້ອງມີໃບຮັບຮອງເພື່ອຜະນຶກເຂົ້າກັບພໍ່ແມ່ຂອງພວກເຂົາ (ເບິ່ງ 26.4.4).
-
ສຳລັບສະມາຊິກອາຍຸ 8 ປີຫາ 20 ປີ ທີ່ຈະໄປເບິ່ງການຜະນຶກອ້າຍເອື້ອຍນ້ອງຄີງ, ອ້າຍເອື້ອຍນ້ອງລູກນ້າ, ຫລື ອ້າຍເອື້ອຍນ້ອງຕ່າງພໍ່ ຫລື ຕ່າງແມ່ຂອງເຂົາເຈົ້າ.
ສະມາຊິກຜູ້ໄດ້ຮັບຂອງປະທານສັກສິດແລ້ວ ບໍ່ຈຳເປັນຕ້ອງອອກໃບຮັບຮອງໃດໆໃຫ້ ທີ່ອະທິບາຍໄວ້ໃນພາກສ່ວນນີ້.
ສະມາຊິກຜູ້ຊາຍຂອງສາດສະໜາຈັກທີ່ມີອາຍຸສູງພໍ ທີ່ຈະດຳລົງຖານະປະໂລຫິດ ຕ້ອງຖືກແຕ່ງຕັ້ງສູ່ຕຳແໜ່ງໃນຖານະປະໂລຫິດ ກ່ອນລາວຈະໄດ້ຮັບໃບຮັບຮອງເຂົ້າພຣະວິຫານ.
26.4.2
ໃບຮັບຮອງເຂົ້າພຣະວິຫານສຳລັບສະມາຊິກທີ່ຫາກໍໄດ້ຮັບບັບຕິສະມາ
ອະທິການສຳພາດສະມາຊິກໃໝ່ຜູ້ມີອາຍຸເໝາະສົມ ສຳລັບໃບຮັບຮອງເຂົ້າພຣະວິຫານ ເພື່ອການບັບຕິສະມາ ແລະ ການຢືນຢັນແທນ. ເພິ່ນດຳເນີນການສຳພາດນີ້ບໍ່ດົນຫລັງຈາກສະມາຊິກໄດ້ຮັບການຢືນຢັນ, ຕາມປົກກະຕິແລ້ວ ພາຍໃນອາທິດ (ເບິ່ງ 26.4.1). ສຳລັບອ້າຍນ້ອງ, ການສຳພາດອາດຖືກຈັດຂຶ້ນເປັນພາກສ່ວນໜຶ່ງຂອງການສຳພາດຮັບເອົາຖານະປະໂລຫິດແຫ່ງອາໂຣນ.
26.4.3
ໃບຮັບຮອງເຂົ້າພຣະວິຫານສຳລັບການບັບຕິສະມາ ແລະ ການຢືນຢັນແທນ
ໃບຮັບຮອງເຂົ້າພຣະວິຫານທີ່ອອກໃຫ້ສຳລັບການບັບຕິສະມາ ແລະ ການຢືນຢັນແທນ ສາມາດຖືກໃຊ້ພຽງແຕ່ກັບຈຸດປະສົງນັ້ນເທົ່ານັ້ນ.
26.4.4
ໃບຮັບຮອງເຂົ້າພຣະວິຫານສຳລັບການຜະນຶກລູກທີ່ມີຊີວິດຢູ່ເຂົ້າກັບພໍ່ແມ່
ສະມາຊິກອາຍຸ 21 ປີຂຶ້ນໄປ ສາມາດຜະນຶກເຂົ້າກັບພໍ່ແມ່ຂອງຕົນ ຫລື ເບິ່ງການຜະນຶກພຽງແຕ່ຖ້າຫາກເຂົາເຈົ້າ (1) ໄດ້ຮັບຂອງປະທານສັກສິດແລ້ວ ແລະ (2) ມີໃບຮັບຮອງເຂົ້າພຣະວິຫານໃນປະຈຸບັນ.
26.5
ການອອກໃບຮັບຮອງເຂົ້າພຣະວິຫານກໍລະນີພິເສດ
26.5.1
ສະມາຊິກຮັບເອົາຂອງປະທານສັກສິດສຳລັບຕົວເອງ
ສະມາຊິກທີ່ມີຄ່າຄວນ ຜູ້ປາດຖະໜາທີ່ຈະຮັບເອົາຂອງປະທານສັກສິດສຳລັບຕົວເອງສາມາດເຮັດໄດ້ ເມື່ອເຂົາເຈົ້າປະຕິບັດຕາມຂໍ້ກຳນົດທັງໝົດດັ່ງຕໍ່ໄປນີ້:
-
ເຂົາເຈົ້າມີອາຍຸຢ່າງໜ້ອຍ 18 ປີຂຶ້ນໄປ.
-
ເຂົາເຈົ້າໄດ້ຮຽນຈົບ ຫລື ບໍ່ໄດ້ຮຽນຢູ່ມັດທະຍົມປາຍ, ມັດທະຍົມຕົ້ນ, ຫລື ລະດັບເທົ່າທຽມກັນນັ້ນ ອີກແລ້ວ.
-
ໄດ້ໜຶ່ງປີແລ້ວນັບຕັ້ງແຕ່ເຂົາເຈົ້າໄດ້ຮັບການຢືນຢັນ.
-
ເຂົາເຈົ້າຮູ້ສຶກປາດຖະໜາທີ່ຈະຮັບເອົາ ແລະ ໃຫ້ກຽດແກ່ພັນທະສັນຍາພຣະວິຫານຕະຫລອດຊີວິດຂອງເຂົາເຈົ້າ.
ນອກເໜືອຈາກນັ້ນ, ຜູ້ຊາຍຄວນດຳລົງຖານະປະໂລຫິດແຫ່ງເມນຄີເສເດັກ ກ່ອນຮັບເອົາຂອງປະທານສັກສິດ. ສຳລັບຂໍ້ມູນກ່ຽວກັບສະມາຊິກກຽມພ້ອມທີ່ຈະຮັບເອົາຂອງປະທານສັກສິດສຳລັບຕົວເອງ, ໃຫ້ເບິ່ງ 25.2.8. ສຳລັບຂໍ້ມູນກ່ຽວກັບຜູ້ທີ່ສາມາດຮັບເອົາຂອງປະທານສັກສິດ, ໃຫ້ເບິ່ງ 27.2.1.
26.5.3
ຜູ້ສອນສາດສະໜາໜຸ່ມທີ່ກັບບ້ານຈາກການຮັບໃຊ້ໄກບ້ານ
ປະທານເຜີຍແຜ່ລົງວັນທີ ແລະ ເປີດໃຊ້ງານໃບຮັບຮອງ ເພື່ອມັນຈະໝົດກຳນົດໃນສາມເດືອນ ຈາກວັນທີທີ່ຜູ້ສອນສາດສະໜາກັບຄືນບ້ານ.
ອະທິການສຳພາດຜູ້ສອນສາດສະໜາທີ່ກັບບ້ານ ເພື່ອອອກໃບຮັບຮອງເຂົ້າພຣະວິຫານໃຫ້ ເມື່ອໃກ້ເຖິງວັນໝົດກຳນົດໃນໄລຍະສາມເດືອນ.
26.5.4
ສະມາຊິກທີ່ຍັງບໍ່ໄດ້ອາໄສຢູ່ໃນຫວອດຢ່າງໜ້ອຍໜຶ່ງປີ
ອະທິການ ຫລື ທີ່ປຶກສາຄົນໜຶ່ງທີ່ຖືກມອບໝາຍຈະຕິດຕໍ່ຫາອະທິການເກົ່າ ກ່ອນດຳເນີນການສຳພາດໃບຮັບຮອງເຂົ້າພຣະວິຫານ.
26.5.7
ສະມາຊິກທີ່ລະບຸຕົນເປັນຄົນຂ້າມເພດ
ປະທານສະເຕກຄວນປຶກສາກັບຝ່າຍປະທານເຂດເພື່ອແກ້ໄຂສະຖານະການຂອງບຸກຄົນ ດ້ວຍຄວາມລະມັດລະວັງ ແລະ ດ້ວຍຄວາມຮັກເໝືອນດັ່ງພຣະຄຣິດ (ເບິ່ງ 38.6.23).
26.5.8
ສະມາຊິກທີ່ກະທຳບາບອັນຮ້າຍແຮງ
ສະມາຊິກທີ່ໄດ້ກະທຳບາບອັນຮ້າຍແຮງບໍ່ຄວນໄດ້ຮັບໃບຮັບຮອງເຂົ້າພຣະວິຫານ ຈົນກວ່າເຂົາເຈົ້າຈະກັບໃຈເສຍກ່ອນ (ເບິ່ງ 32.6).
26.5.9
ສະມາຊິກທີ່ໄດ້ຖືກຮັບເຂົ້າເປັນສະມາຊິກຄືນຫລັງຈາກສະມາຊິກກະພາບໃນສາດສະໜາຈັກຖືກຖອນ ຫລື ລາອອກ
26.5.9.1
ສະມາຊິກທີ່ບໍ່ເຄີຍໄດ້ຮັບຂອງປະທານສັກສິດ
ສະມາຊິກເຫລົ່ານີ້ຈະບໍ່ຖືກອອກໃບຮັບຮອງໃຫ້ ເພື່ອຮັບຂອງປະທານສັກສິດສຳລັບຕົວເຂົາເຈົ້າເອງ ຈົນກວ່າຫລັງຈາກໜຶ່ງປີນັບແຕ່ໄດ້ຖືກຮັບເຂົ້າເປັນສະມາຊິກຂອງສາດສະໜາຈັກຄືນອີກ ໂດຍການບັບຕິສະມາ ແລະ ການຢືນຢັນ.
26.5.9.2
ສະມາຊິກທີ່ເຄີຍໄດ້ຮັບຂອງປະທານສັກສິດ
ສະມາຊິກທີ່ເຄີຍໄດ້ຮັບຂອງປະທານສັກສິດຈະບໍ່ຖືກອອກໃບຮັບຮອງເຂົ້າພຣະວິຫານຊະນິດໃດໃຫ້ ຈົນກວ່າຫລັງຈາກພອນພຣະວິຫານຂອງເຂົາເຈົ້າໄດ້ຖືກຟື້ນຟູຄືນໃຫ້ກ່ອນ ຜ່ານທາງພິທີການຂອງການຟື້ນຟູພອນ.