“25. ວຽກງານພຣະວິຫານ ແລະ ປະຫວັດຄອບຄົວໃນຫວອດ ແລະ ສະເຕກ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“25. ວຽກງານພຣະວິຫານ ແລະ ປະຫວັດຄອບຄົວໃນຫວອດ ແລະ ສະເຕກ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
25.
ວຽກງານພຣະວິຫານ ແລະ ປະຫວັດຄອບຄົວໃນຫວອດ ແລະ ສະເຕກ
25.0
ຄຳນຳ
ວຽກງານພຣະວິຫານ ແລະ ປະຫວັດຄອບຄົວແມ່ນວິທີເຕົ້າໂຮມ ແລະ ຜະນຶກຄອບຄົວເຂົ້າກັນຊົ່ວນິລັນດອນ (ເບິ່ງ ມັດທາຍ 16:19). ວຽກງານນີ້ແມ່ນລວມທັງ:
-
ການເຮັດພັນທະສັນຍາເມື່ອເຮົາຮັບເອົາພິທີການພຣະວິຫານຂອງເຮົາເອງ. (ເບິ່ງ ເອຊາຢາ 55:3; ຄຳສອນ ແລະ ພັນທະສັນຍາ 84:19–23).
-
ການຄົ້ນຫາບັນພະບຸລຸດທີ່ລ່ວງລັບໄປແລ້ວຂອງເຮົາ ແລະ ກະທຳພິທີການແທນເຂົາເຈົ້າໃນພຣະວິຫານ ເພື່ອວ່າເຂົາເຈົ້າຈະສາມາດເຮັດພັນທະສັນຍາກັບພຣະເຈົ້າ (ເບິ່ງ ມາລາກີ 4:5–6; 1 ໂກຣິນໂທ 15:29; ຄຳສອນ ແລະ ພັນທະສັນຍາ 128:15–18).
-
ການໄປພຣະວິຫານເປັນປະຈຳ, ເມື່ອເປັນໄປໄດ້, ເພື່ອນະມັດສະການພຣະເຈົ້າ ແລະ ກະທຳພິທີການແທນລູກໆຂອງພຣະອົງ (ເບິ່ງ ລູກາ 24:52–53; ຄຳສອນ ແລະ ພັນທະສັນຍາ 109:13–14).
ສຳລັບຂໍ້ມູນເພີ່ມເຕີມ ມີໃຫ້ທີ່ “Temples” ແລະ “Family History” (Gospel Topics, topics.ChurchofJesusChrist.org).
25.1
ການມີສ່ວນຮ່ວມຂອງສະມາຊິກ ແລະ ຜູ້ນຳໃນວຽກງານພຣະວິຫານ ແລະ ປະຫວັດຄອບຄົວ
ສະມາຊິກຂອງສາດສະໜາຈັກມີສິດທິພິເສດ ແລະ ໜ້າທີ່ຮັບຜິດຊອບໃນການຊ່ວຍເຕົ້າໂຮມຄອບຄົວຂອງເຂົາເຈົ້າຊົ່ວນິລັນດອນ. ເຂົາເຈົ້າກຽມພ້ອມຕົວເອງເພື່ອເຮັດພັນທະສັນຍາຂະນະທີ່ເຂົາເຈົ້າຮັບພິທີການພຣະວິຫານ, ແລະ ຂະນະທີ່ເຂົາເຈົ້າພະຍາຍາມຮັກສາພັນທະສັນຍາເຫລົ່ານັ້ນ.
ສະມາຊິກຂອງສາດສະໜາຈັກຖືກຊຸກຍູ້ໃຫ້ລະບຸລາຍຊື່ຍາດພີ່ນ້ອງຂອງເຂົາເຈົ້າຜູ້ໄດ້ລ່ວງລັບໄປແລ້ວ ທີ່ຍັງບໍ່ໄດ້ຮັບພິທີການພຣະວິຫານເທື່ອ. ແລ້ວສະມາຊິກປະຕິບັດພິທີການແທນຍາດພີ່ນ້ອງເຫລົ່ານັ້ນ (ເບິ່ງ ຄຳສອນ ແລະ ພັນທະສັນຍາ 128:18). ໃນໂລກວິນຍານ, ບຸກຄົນທີ່ຕາຍໄປສາມາດເລືອກຮັບເອົາ ຫລື ປະຕິເສດພິທີການທີ່ໄດ້ຖືກປະຕິບັດແທນເຂົາເຈົ້າ.
25.1.1
ໜ້າທີ່ຮັບຜິດຊອບສ່ວນຕົວສຳລັບການໄປພຣະວິຫານ
ສະມາຊິກພິຈາລະນາເອງວ່າ ຈະໄປນະມັດສະການໃນພຣະວິຫານເມື່ອໃດ ແລະ ເລື້ອຍປານໃດ. ຜູ້ນຳຈະບໍ່ຈັດສ້າງໂຄຕ້າ ຫລື ລະບົບລາຍງານການໄປພຣະວິຫານ.
25.2
ການຈັດລະບຽບວຽກງານພຣະວິຫານ ແລະ ປະຫວັດຄອບຄົວໃນຫວອດ
25.2.1
ຝ່າຍອະທິການ
ຝ່າຍອະທິການປະສານງານກັບຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະ ຂະນະທີ່ພວກເພິ່ນນຳພາວຽກງານພຣະວິຫານຫວອດ ແລະ ປະຫວັດຄອບຄົວ. ຜູ້ນຳເຫລົ່ານີ້ປຶກສາຫາລືນຳກັນເປັນປະຈຳ.
ຝ່າຍອະທິການກໍມີໜ້າທີ່ຮັບຜິດຊອບດັ່ງຕໍ່ໄປນີ້ສຳລັບວຽກງານພຣະວິຫານ ແລະ ປະຫວັດຄອບຄົວໃນຫວອດເຊັ່ນກັນ:
-
ຕ້ອງແນ່ໃຈວ່າຄຳສອນ ແລະ ພອນຂອງວຽກງານພຣະວິຫານ ແລະ ປະຫວັດຄອບຄົວຖືກສິດສອນທີ່ໂບດ.
-
ຕ້ອງແນ່ໃຈວ່າວຽກງານພຣະວິຫານ ແລະ ປະຫວັດຄອບຄົວຖືກປະສານງານໃນການປະຊຸມສະພາຫວອດ ແລະ ໃນການປະຊຸມສະພາຊາວໜຸ່ມຫວອດ.
-
ດູແລການຈັດຫ້ອງຮຽນກຽມໄປພຣະວິຫານ (ເບິ່ງ 25.2.8).
-
ອອກໃບຮັບຮອງເຂົ້າພຣະວິຫານ (ເບິ່ງ ບົດທີ 26).
25.2.2
ຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະ
ຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະນຳພາວຽກງານພຣະວິຫານ ແລະ ປະຫວັດຄອບຄົວໃນຫວອດທຸກວັນ (ເບິ່ງ 8.2.4 ແລະ 9.2.4). ເຂົາເຈົ້າເຮັດວຽກງານນຳກັນເພື່ອນຳພາວຽກງານເຫລົ່ານີ້ຢູ່ໃນສະພາຫວອດ, ພາຍໃຕ້ການປະສານງານຂອງອະທິການ.
ຜູ້ນຳເຫລົ່ານີ້ມີໜ້າທີ່ຮັບຜິດຊອບດັ່ງຕໍ່ໄປນີ້:
-
ຊ່ວຍສະມາຊິກກຽມຮັບພິທີການພຣະວິຫານ ແລະ ເຮັດພັນທະສັນຍາພຣະວິຫານ.
-
ຊຸກຍູ້ໃຫ້ສະມາຊິກນະມັດສະການໃນພຣະວິຫານເລື້ອຍໆ ເທົ່າທີ່ສະຖານະການຈະເອື້ອອຳນວຍ.
-
ຊຸກຍູ້ໃຫ້ສະມາຊິກຮຽນຮູ້ກ່ຽວກັບບັນພະບຸລຸດຂອງເຂົາເຈົ້າ ແລະ ປະຕິບັດພິທີການພຣະວິຫານເພື່ອເຂົາເຈົ້າ.
-
ນຳພາວຽກງານຂອງຜູ້ນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດ. ຖ້າຫາກຜູ້ນຳຝ່າຍນີ້ບໍ່ໄດ້ຖືກເອີ້ນ, ສະມາຊິກຄົນໜຶ່ງໃນຝ່າຍປະທານກຸ່ມແອວເດີຈະຮັບເອົາບົດບາດນີ້ (ເບິ່ງ 25.2.3).
ປະທານກຸ່ມແອວເດີ ແລະ ປະທານສະມາຄົມສະຕີສົງເຄາະຕ່າງກໍມອບໝາຍສະມາຊິກຄົນໜຶ່ງໃນຝ່າຍປະທານໃຫ້ຊ່ວຍນຳພາວຽກງານພຣະວິຫານ ແລະ ປະຫວັດຄອບຄົວໃນຫວອດ. ສະມາຊິກໃນຝ່າຍປະທານສອງຄົນນີ້ເຮັດວຽກງານນຳກັນ. ເຂົາເຈົ້າເຂົ້າຮ່ວມການປະຊຸມປະສານວຽກງານພຣະວິຫານ ແລະ ປະຫວັດຄອບຄົວຫວອດ (ເບິ່ງ 25.2.7).
25.2.3
ຜູ້ນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດ
ຝ່າຍອະທິການປຶກສາກັບປະທານສະເຕກ ເພື່ອພິຈາລະນາວ່າຄວນຈະເອີ້ນຜູ້ນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດຫລືບໍ່. ບຸກຄົນນີ້ຄວນດຳລົງຖານະປະໂລຫິດແຫ່ງເມນຄີເສເດັກ.
ຜູ້ນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດຊ່ວຍເຫລືອຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະ ໃນໜ້າທີ່ຮັບຜິດຊອບດ້ານພຣະວິຫານ ແລະ ປະຫວັດຄອບຄົວຂອງເຂົາເຈົ້າ. ລາວກໍມີໜ້າທີ່ຮັບຜິດຊອບດັ່ງຕໍ່ໄປນີ້:
-
ນຳພາການປະຊຸມປະສານວຽກງານພຣະວິຫານ ແລະ ປະຫວັດຄອບຄົວຫວອດ (ເບິ່ງ 25.2.7).
-
ແນະນຳຜູ້ໃຫ້ຄຳແນະນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດ. ປະສານຄວາມພະຍາຍາມຂອງເຂົາເຈົ້າ ເພື່ອຊ່ວຍສະມາຊິກກັບວຽກງານພຣະວິຫານ ແລະ ປະຫວັດຄອບຄົວ.
-
ເຮັດວຽກງານກັບຜູ້ນຳເຜີຍແຜ່ປະຈຳຫວອດ ແລະ ຜູ້ສອນສາດສະໜາ ເພື່ອຊ່ວຍຜູ້ທີ່ຮຽນຮູ້ພຣະກິດຕິຄຸນ, ສະມາຊິກໃໝ່, ແລະ ສະມາຊິກທີ່ກັບຄືນມາ ໃຫ້ມີສ່ວນຮ່ວມໃນວຽກງານພຣະວິຫານ ແລະ ປະຫວັດຄອບຄົວ.
25.2.4
ຜູ້ໃຫ້ຄຳແນະນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດ
ຜູ້ໃຫ້ຄຳແນະນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດ ຮັບໃຊ້ພາຍໃຕ້ການຊີ້ນຳຂອງຜູ້ນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດ ຫລື ສະມາຊິກໃນຝ່າຍປະທານກຸ່ມແອວເດີ ຜູ້ຮັບບົດບາດນີ້. ຝ່າຍອະທິການເອີ້ນສະມາຊິກເຫລົ່ານີ້ໃຫ້ຮັບໃຊ້. ຜູ້ໃຫຍ່ ແລະ ຊາວໜຸ່ມສາມາດໄດ້ຮັບການເອີ້ນ.
ຜູ້ໃຫ້ຄຳແນະນຳມີໜ້າທີ່ຮັບຜິດຊອບດັ່ງຕໍ່ໄປນີ້:
-
ຊ່ວຍສະມາຊິກປະສົບກັບພອນຂອງການຄົ້ນພົບບັນພະບຸລຸດຂອງເຂົາເຈົ້າ ແລະ ປະຕິບັດພິທີການພຣະວິຫານເພື່ອເຂົາເຈົ້າ.
-
ຊ່ວຍສະມາຊິກຽມຮັບພິທີການພຣະວິຫານ ແລະ ເຮັດພັນທະສັນຍາພຣະວິຫານ.
-
ເຂົ້າຮ່ວມການປະຊຸມປະສານວຽກງານພຣະວິຫານ ແລະ ປະຫວັດຄອບຄົວ (ເບິ່ງ 25.2.7).
25.2.7
ການປະຊຸມປະສານວຽກງານພຣະວິຫານ ແລະ ປະຫວັດຄອບຄົວຫວອດ
ການປະຊຸມປະສານວຽກງານພຣະວິຫານ ແລະ ປະຫວັດຄອບຄົວຫວອດທີ່ສັ້ນໆຖືກຈັດຂຶ້ນເປັນປະຈຳ. ຖ້າຫາກຄົນໃດຄົນໜຶ່ງຖືກເອີ້ນໃຫ້ເປັນຜູ້ນຳຝ່າຍພຣະວິຫານ ແລະ ປະຫວັດຄອບຄົວປະຈຳຫວອດ, ລາວຈະດຳເນີນການປະຊຸມເຫລົ່ານີ້. ຖ້າບໍ່ດັ່ງນັ້ນ, ສະມາຊິກໃນຝ່າຍປະທານກຸ່ມແອວເດີທີ່ຮັບບົດບາດນີ້ຈະດຳເນີນ.
ຄົນອື່ນໆທີ່ຖືກເຊື້ອເຊີນແມ່ນລວມທັງ:
-
ສະມາຊິກໃນຝ່າຍປະທານສະມາຄົມສະຕີສົງເຄາະ ແລະ ສະມາຊິກໃນຝ່າຍປະທານກຸ່ມແອວເດີທີ່ຖືກມອບໝາຍ.
-
ຜູ້ຊ່ວຍກຸ່ມປະໂລຫິດ.
-
ສະມາຊິກໃນຝ່າຍປະທານຫ້ອງຍິງໜຸ່ມກຸ່ມອາຍຸສູງສຸດ.
-
ຜູ້ໃຫ້ຄຳປຶກສາຝ່າຍພຣະວິຫານ ແລະ ປະຫວັດຄອບຄົວ.
ຈຸດປະສົງຂອງການປະຊຸມເຫລົ່ານີ້ແມ່ນເພື່ອ:
-
ວາງແຜນວິທີຊ່ວຍສະເພາະສະມາຊິກໃນຫວອດກັບວຽກງານພຣະວິຫານ ແລະ ປະຫວັດຄອບຄົວຂອງເຂົາເຈົ້າຕາມທີ່ຮຽກຮ້ອງ.
ການປະຊຸມເຫລົ່ານີ້ຖືກຈັດຂຶ້ນແບບພົບໜ້າກັນ ຫລື ແບບທາງໄກ. ການປະສານງານກໍເກີດຂຶ້ນໃນວິທີອື່ນອີກເຊັ່ນກັນ, ລວມທັງການໂທລະສັບ, ການສົ່ງຂໍ້ຄວາມ, ແລະ ອີເມວ.
25.2.8
ຫລັກສູດການກຽມໄປພຣະວິຫານ
ພາຍໃຕ້ການຊີ້ນຳຂອງອະທິການ, ຫລັກສູດການກຽມໄປພຣະວິຫານສາມາດຖືກຈັດຂຶ້ນ ເພື່ອຊ່ວຍສະມາຊິກກຽມເຮັດພັນທະສັນຍາ ຂະນະທີ່ເຂົາເຈົ້າຮັບພິທີການພຣະວິຫານ. ຫລັກສູດເຫລົ່ານີ້ຖືກຈັດຂຶ້ນຢູ່ນອກການປະຊຸມວັນອາທິດປົກກະຕິ ໃນເວລາທີ່ສະມາຊິກສະດວກ. ຫລັກສູດເຫລົ່ານີ້ສາມາດຖືກຈັດຂຶ້ນໄດ້ທີ່ອາຄານປະຊຸມ ຫລື ໃນບ້ານ.
ບົດຮຽນ ແລະ ຄຳແນະນຳສຳລັບການຈັດຫລັກສູດມີຢູ່ໃນ Endowed from on High: Temple Preparation Seminar Teacher’s Manual [ຂອງປະທານສັກສິດຈາກເບື້ອງບົນ: ຄູ່ມືຄູສອນການສຳມະນາຕຽມໄປພຣະວິຫານ]. ຜູ້ເຂົ້າຮ່ວມຈະໄດ້ຮັບປຶ້ມ ການຕຽມເຂົ້າພຣະວິຫານທີ່ສັກສິດ. ສຳລັບການສຶກສາສ່ວນຕົວ ແລະ ແຫລ່ງຊ່ວຍບົດຮຽນ, ໃຫ້ເບິ່ງ temples.ChurchofJesusChrist.org.
25.4
ແຫລ່ງຊ່ວຍປະຫວັດຄອບຄົວ
25.4.1
ຄອບຄົວຂອງຂ້ອຍ: ເລື່ອງລາວທີ່ພາໃຫ້ເຮົາມາຢູ່ນຳກັນ
ຄອບຄົວຂອງຂ້ອຍ: ເລື່ອງລາວທີ່ພາໃຫ້ເຮົາມາຢູ່ນຳກັນ ຊ່ວຍຜູ້ຄົນຄົ້ນພົບຍາດພີ່ນ້ອງ ແລະ ບັນພະບຸລຸດ ແລະ ຮວບຮວມເລື່ອງລາວຂອງເຂົາເຈົ້າ. ປຶ້ມນ້ອຍນີ້ກໍສາມາດຊ່ວຍໃຫ້ສະມາຊິກເລີ່ມຕົ້ນກຽມລາຍຊື່ສະມາຊິກໃນຄອບຄົວສຳລັບພິທີການພຣະວິຫານນຳອີກ.
ສາມາດດາວໂຫລດປຶ້ມນ້ອຍນີ້ໄດ້ທີ່ ChurchofJesusChrist.org. ສາມາດສັ່ງຈອງຊະນິດເປັນປຶ້ມໄດ້ທີ່ store.ChurchofJesusChrist.org.
25.4.2
FamilySearch.org ແລະ ແອັບ FamilySearch
FamilySearch.org ແມ່ນເວັບໄຊຂອງສາດສະໜາຈັກສຳລັບວຽກງານພຣະວິຫານ ແລະ ປະຫວັດຄອບຄົວ. ມັນສາມາດຊ່ວຍຜູ້ໃຊ້:
-
ສ້າງການເຊື່ອມຕໍ່ ແລະ ຄວາມສຳພັນໃສ່ໃນຕົ້ນຕະກຸນ.
-
ຄົ້ນຫາບັນພະບຸລຸດ ແລະ ເລື່ອງລາວຂອງເຂົາເຈົ້າ.
-
ແບ່ງປັນ ແລະ ຮັກສາເລື່ອງລາວ, ຮູບຖ່າຍ, ແລະ ປະຫວັດຄອບຄົວ.
-
ກຽມລາຍຊື່ຄອບຄົວສຳລັບພິທີການພຣະວິຫານ.
FamilySearch Tree app ແລະ FamilySearch Memories app ຊ່ວຍໃຫ້ຜູ້ຄົນມີສ່ວນຮ່ວມໃນວຽກງານພຣະວິຫານ ແລະ ປະຫວັດຄອບຄົວຈາກເຄື່ອງອຸປະກອນມືຖື.
25.5
ການແນະນຳຊື່ ແລະ ການເອີ້ນໃຫ້ເປັນພະນັກງານພຣະວິຫານ
25.5.1
ການແນະນຳຊື່ເປັນພະນັກງານພຣະວິຫານ
ຜູ້ຄາດຫວັງທີ່ຈະເປັນພະນັກງານພຣະວິຫານຖືກລະບຸໄວ້ໃນວິທີດັ່ງຕໍ່ໄປນີ້:
-
ສະມາຊິກຖືກລະບຸໂດຍອະທິການ ຫລື ຜູ້ນຳຫວອດອີກຄົນໜຶ່ງ
-
ສະມາຊິກທີ່ເຂົ້າພົບອະທິການເລື່ອງການຮັບໃຊ້
-
ສະມາຊິກຖືກແນະນຳຊື່ໂດຍປະທານພຣະວິຫານ, ຫົວໜ້າພະນັກງານພຣະວິຫານຝ່າຍຍິງ, ຫລື ຜູ້ນຳສະເຕກອີກຄົນໜຶ່ງ
-
ສະມາຊິກທີ່ກຳລັງກຽມຮັບໃຊ້ເຜີຍແຜ່ ຫລື ຫາກໍກັບມາຈາກການຮັບໃຊ້ເຜີຍແຜ່ (ເບິ່ງ ບົດທີ 24)
ລາຍຊື່ຂອງຜູ້ຄາດຫວັງຈະເປັນພະນັກງານພຣະວິຫານຖືກສົ່ງໄປຜ່ານທາງເຄື່ອງມື Recommend Temple Worker tool. ເຄື່ອງມືນີ້ມີໃຫ້ບໍລິການສຳລັບອະທິການ, ປະທານສະເຕກ, ແລະ ຝ່າຍປະທານພຣະວິຫານ.