27.

Cakacaka Vakalotu ni Valetabu vei ira na Bula

27.0

iVakamacala Taumada

Na valetabu e vale ni Turaga E dusimaki keda yani vua na noda iVakabula, o Jisu Karisito. Ena valetabu, eda vakaitavi ena veicakacaka tabu vakalotu ka veiyalayalati kei na Tamada Vakalomalagi ka na vauci keda Vua kei na noda iVakabula. Na veiyalayalati kei na cakacaka vakalotu oqo ena vakarautaki keda mda lesu tale kina iserau nei Tamada Vakalomalagi ka vauci vata vakamatavuvale me tawamudu.

Ena veiyalayalati kei na cakacaka vakalotu ni valetabu, “ena vakatakilai mai na kaukauwa ni bula vakalou ena kena veicakacaka vakalotu” (Vunau kei na Veiyalayalati 84:20

E ka tabu na veiyalayalati kei na cakacaka vakalotu ni valetabu. Na ivakatakarakara e salavata kei na veiyalayalati ni valetabu e sega ni dodonu me veitalanoataki ena taudaku ni valetabu. Me kakua talega nida veitalanoataka na itukutuku bibi eda yalataka vakayadudua ena loma ni valetabu. Ia, e rawa nida veitalanoataka na inaki taumada kei na ivunau ni veiyalayalati kei na cakacaka vakalotu ni valetabu kei na vakanananu vakayalo e yaco mai vei keda ena valetabu.

Era na veitalanoataka na iliuliu ni tabanalevu kei na iteki na itukutuku ena wase oqo vata kei ira na lewenilotu era sa vakavakarau tiko me ra ciqoma na cakacaka vakalotu ni edaumeni se veivauci.

27.1

Na Ciqomi ni Cakacaka Vakalotu ni Valetabu

27.1.1

Vakavakarau me Ciqomi na Cakacaka Vakalotu ni Valetabu

O ira na lewenilotu e dodonu me ra vakarautaki ira vakayalo me ra ciqoma na cakacaka vakalotu ni valetabu ka mera vakayacora ka rokova na veiyalayalati ni valetabu.

Sa nodra itavi taumada na itubutubu mera vukei ira na luvedra mera ciqoma na cakacaka vakalotu ni valetabu. O ira na iliuliu ni iteki kei na tabanalevu, na turaga kei na marama veiqaravi, kei ira na lewe ni matavuvale era tokoni ira na itubutubu ena itavi oqo.

Na ivurevure eso me vukei ira na lewenilotu ena nodra vakavakarau me ra ciqoma na cakacaka vakalotu ni valetabu sa vakarautaki tu ena temples.ChurchofJesusChrist.org

O ira na lewenilotu era sa vakavakarau tiko mera ciqoma na nodra dui edaumeni se mera vauci vei watidra era sa vakayaloqaqataki mera vakaitavi ena dua na vuli ni vakavakarau kina valetabu (raica na 25.2.8).

27.1.3

Lewenilotu Era Vakaleqai Tu Vakayago

O ira na lewenilotu bula kilikili ka vakaleqai tu na yagodra e rawa nira ciqoma na veicakacaka vakalotu kece sara ni valetabu. Era sa vakauqeti na lewenilotu oqo mera lako kina valetabu vata kei ira na wekadra se itokani era sa vakaedaumeni oti era rawa ni vukei ira. Kevaka e dua na lewenilotu e sega ni rawa ni lako vata kei na dua na lewe ni matavuvale se itokani, sa rawa vei ira mera qiri taumada ki na valetabu me raici se ituvatuva cava e rawa ni caka.

27.1.4

Veivuke ni Vakadewa se Vakadewa Vosa

Kevaka era gadreva na lewenilotu na vakavakadewa se vakavakadewa ena vosa, e dodonu mera veitaratara taumada kina valetabu me laurai ke tiko.

27.1.5

iSulusulu me Daramaki ena Valetabu

Ni dua e lako kina valetabu, e dodonu mera dau daramaka na lewenilotu na mataqali isulu era dau daramaka ena veisoqoni ni sakaramede.

Raica na 27.3.2.6 me baleta na itukutuku ni isulusulu me daramaki kina vakamau se veivauci ena valetabu.

Raica na 38.5 me baleta na itukutuku ni:

• iSulusulu me daramaki ena gauna ni cakacaka vakalotu ni edaumeni kei na veivauci.

• Kena tauri, daramaki, kei na qaravi ni isulu ni soqo ni valetabu kei na qameni.

27.1.6

Nodra Taqomaki na Gone

E dodonu me ra dau qarauni tiko na gone mai vei ira na uabula kevaka era tiko ena lomanibai ni valetabu. Era sa tu vakarau na liganicakacaka ni valetabu mera raici ira na gone ena gauna vakaoqo:

• Kevaka era sa na vauci vei rau na itubutubu

• Kevaka era tiko mera sarava na nodra vauci na tacidra era bula tiko, tacidra vakacabecabe, se tacidra vakaveimama vei ira na nodra itubutubu

27.1.7

Sota kei ira na Lewenilotu ni Oti Nodra Ciqoma na Cakacaka Vakalotu ni Valetabu

E dau tu na nodra taro na lewenilotu nira sa ciqoma oti na cakacaka vakalotu ni valetabu. O ira na lewe ni matavuvale era sa vaka edaumeni oti, na bisopi, na iliuliu ni tabanalevu eso, kei na tacida kei na ganeda veiqaravi e rawa nira sota vata kei ira na lewenilotu mera veitalanoataka na veika era sotava ena valetabu.

Na ivurevure me vukea na saumi ni taro e tiko ena temples.ChurchofJesusChrist.org.

27.2

Na Edaumeni

Na vosa edaumeni e kena ibalebale “e dua na isolisoli.” Na edaumeni ni valetabu sa isolisoli dina mai vua na Kalou ka na vakalougatataki ira kina na luvena. Eso na isolisoli era ciqoma na lewenilotu mai na edaumeni ni valetabu e oka kina na:

• Kila vakalevu cake na inaki kei na ivakavuvuli ni Turaga.

• Na kaukauwa meda vakayacora na veika taucoko e vinakata na Tamada Vakalomalagi meda vakayacora na luvena.

• Na idusidusi vakalou nira veiqaravi vua na Turaga, nodra matavuvale, kei ira tale eso.

• Vakalevutaki na inuinui, veivakacegui, kei na sautu.

Na vakayacori ni veivakalougatataki oqo ena vakatau ena yalodina kina kosipeli i Jisu Karisito.

Na edaumeni ena ciqomi ena rua na iwasewase. Ena imatai ni wasewase, ena ciqoma e dua na tamata e dua na cakacaka vakalotu taumada e vakatokai na inisitori. Na inisitori e oka kina e tolu na cakacaka vakalotu: veisavai, veilumuti, kei na veivakasulumi (raica Na Lako Yani 29:4–9). E oka kina na veivakalougatataki digitaki ka semati kina ivotavota vakalou kei na rawa-ka ni tamata oya.

Ena gauna ni inisitori, sa yalataka na lewenilotu me daramaka na qameni ni valetabu. Na qameni e matataka na nona veiwekani kei na Kalou kei na yalayala me talairawarawa kina veiyalayalati e vakayacori ena valetabu. Ni ra yalodina na lewenilotu kina nodra veiyalayalati ka daramaka vakadodonu na qameni ena nodra bula taucoko, ena veitaqomaki talega. Me baleta na ivakamacala ni kena daramaki kei na qaravi ni qameni, raica na 38.5.5.

Ena ikarua ni tiki ni edaumeni, e vakavulici kina na yavu ni veivakabulai, oka kina na Veibuli, na Lutu nei Atama kei Ivi, na Veisorovaki i Jisu Karisito, na Vukitani, kei na Veivakalesui mai. Era ciqoma talega na lewenilotu na idusidusi ni sala mera lesu kina kina iserau ni Turaga.

Ena edaumeni, era sa sureti kina na lewenilotu mera vakayacora na veiyalayalati tabu me vakaoqo:

• Bulataka na lawa ni talairawarawa ka saga vakaidina mera muria na ivakaro ni Tamada Vakalomalagi.

• Talairawarawa ki na lawa ni solibula, sa kena ibalebale na solibula me tokona na cakacaka ni Turaga ka veivutuni ena yalo raramusumusu kei na yalo bibivoro.

• Muria na lawa ni kosipeli i Jisu Karisito.

• Maroroya na lawa ni tiko savasava, ka kena ibalebale na vakuwai ni veiyacovi ena taudaku ni vakamau vakalawa ni dua na tagane kei na dua na yalewa, me vaka na lawa ni Kalou.

• Maroroya na lawa ni solibula, ka kena ibalebale me ra solia na nodra gauna, taledi, kei na veika kece e sa vakalougatataki ira kina na Turaga mera tara cake kina na Lotu i Jisu Karisito e vuravura.

Me kena isau, e yalataka na Tamada Vakalomalagi nio ira era yalodina tiko ga kina nodra veiyalayalati ni valetabu era na vaka edaumenitaki “ena kaukauwa mai lomalagi” (Vunau kei na Veiyalayalati 38:32, 38; raica talega na Luke 24:49; Vunau kei na Veiyalayalati 43:16).

27.2.1

O Cei e Rawa ni Ciqoma na Edaumeni

Era sa sureti kece sara na uabula ena Lotu mera vakavakarau ka ciqoma na nodra dui edaumeni. Na cakacaka vakalotu kece ka gadrevi taumada e dodonu mera vakayacori ka volaitukutukutaki ni bera nira ciqoma na lewenilotu na edaumeni (raica na 26.3.1).

27.2.1.1

Lewenilotu Papitaiso Vou

Sa rawa vei ira na lewenilotu vou uabula bula kilikili me ra ciqoma na nodra edaumeni me kua ni lailai mai na dua na yabaki mai na tikinisiga ni nodra vakadeitaki.

27.2.1.2

Lewenilotu Ka Sa Bera ni Edaumeni o Watina

Na lewenilotu bula kilikili e sega ni vaka edaumeni na watina sa rawa ni ciqoma na nona edaumeni ni sa sotavi na veika oqo:

• Ni sa solia na watina sega ni vaka edaumeni na veivakadonui.

• Sa vakadeitaka o lewenilotu, bisopi, kei peresitedi ni iteki ni itavi sa okati tu ena veiyalayalati ni valetabu ena sega ni veivakataotaki kina vakamau.

Na ituvaki vakaoqo e rawa ni vakayagataki kevaka e lewe ni Lotu se sega o watina.

27.2.1.3

Lewenilotu e Vakaleqai Tu Na Nodra Vakasama

O ira na lewenilotu era vakaleqai tu na nodra vakasama e rawa nira ciqoma ga na nodra edaumeni kevaka:

• Era sa ciqoma taucoko na cakacaka vakalotu taumada (raica na 26.3.1).

• Sa tu vei ira na kila-ka mera kila vakavinaka, vakayacora, ka maroroya na kena veiyalayalati.

E na veivakasalataki na bisopi ki vua na lewenilotu, kevaka e gadrevi, vei nona itubutubu. Ena vakasaqara talega na veidusimaki ni Yalotabu. Ena rawa me veivakasalataki vata kei peresitedi ni iteki.

27.2.2

Vakadeitaka na Gauna me Ciqoma kina na Edaumeni

Na vakatulewa ni kena ciqomi ni edaumeni e ka ni tamata yadua ka dodonu me caka ena masumasu. Na edaumeni sa dua na veivakalougatataki ni kaukauwa kei na ivakatakila vei ira kece era vakavakarau me ra ciqoma. E rawa nira digitaka na lewenilotu mera ciqoma na nodra edaumeni nira sotava na veituvaki kece oqo:

• Era sa yabaki 18 oti.

• Era sa vakacavara se sa tini na nodra vuli tiko ena koronivuli torocake, koronivuli cecere, se na kena e tautauvata.

• Sa sivi e dua taucoko na yabaki mai na gauna era a vakadeitaki kina.

• Era vakila na gagadre me ra ciqoma ka rokova na veiyalayalati tabu ni valetabu ena nodra bula taucoko.

O ira na lewenilotu era sa ciqoma na veikacivi ni kaulotu se vakavakarau tiko mera vauci ena valetabu e dodonu me ra ciqoma na nodra edaumeni.

Ni bera ni soli e dua na ivolatara ni valetabu vua e dua na lewenilotu me ciqoma na nona edaumeni, me rau vakila na bisopi kei na peresitedi ni iteki ni sa vakarau tu na tamata oya me kila vinaka ka maroroya na veiyalayalati tabu ni valetabu. Na veivakadonui va oqo e vakatulewataki vakayadua ki na tamata yadua.

27.2.3

Tuvalaki ka Lokuci na Gauna ni Edaumeni

27.2.3.1

Ciqoma na iVolatara ni Cakacaka Vakalotu vei ira na Bula

E dodonu me ciqoma e dua na lewenilotu e dua na ivolatara ni cakacaka vakalotu ni bula me curu kina valetabu ka ciqoma na edaumeni. Ena ikuri ni itukutuku me baleta na idola eso oqo, raica na 26.5.1.

27.2.3.2

Veitaratara ki na Valetabu

O ira na lewenilotu era sa lalawataka mera ciqoma na edaumeni e dodonu me ra veitaratara taumada e liu kina valetabu me lokuci na gauna ni cakacaka vakalotu.

27.2.3.3

Dauveituberi vei Lewenilotu Ka na Ciqoma Tiko na Nona Edaumeni

O ira na lewenilotu era na ciqoma tiko na nodra edaumeni e rawa ni ra sureta e dua na lewenilotu vaka edaumeni tagane se yalewa vakataki koya me na lako vata yani ka vukei koya ena gauna ni soqoni ni edaumeni. E dodonu me tiko e dua na nona ivolatara ni valetabu o koya ena veituberi yani. Na valetabu e rawa ni vakarautaka e dua na dauveituberi kevaka e gadrevi.

27.3

Vauci nei Tagane kei Yalewa Vakawati

Na veivauci ni valetabu e rau semati vata kina e dua na veiwatini ena bula oqo kei na bula tawamudu taucoko. Era na ciqoma na veivakalougatataki oqo kevaka era yalodina ki na veiyalayalati era cakava ena valetabu. Ena cakacaka vakalotu oqo, na luvedrau na veiwatini ena rawa talega ni tiki ni nodrau matavuvale tawamudu.

O ira na veiliutaki ni Lotu era na vakauqeti ira na lewenilotu mera vakavakarau mera vakamau ka vauci ena valetabu. Na vanua era sega ni kilai vakalawa kina na vakamau ena valetabu, e rawa vei ira na iliuliu vakadonui ni Lotu se so tale me ra qarava na vakamau vakamatanitu ka tarava mai na veivauci ena valetabu. (raica na 38.3). E rawa talega ni vakamuri na iwalewale oqo kevaka e vakavuna nodra nanuma na itubutubu se lewe ni matavuvale voleka nira vakuwai mai kina baleta ni ra sega ni tiko rawa ena vakamau ena valetabu.

27.3.1

O Cei e Rawa ni Vauci ena Valetabu

O ira kece na lewe ni Lotu era sega ni vakawati ka ra bulataka na ivunau ni Lotu era sa sureti mera vakavakarau ki na veivauci ena valetabu. O ira era sa vakamau vakamatanitu era sa vakayaloqaqataki mera vauci me baleta na gauna oqo kei na veigauna tawamudu ena loma ni valetabu nira sa tu vakarau. Sa dodonu mera vaka edaumeni na lewenilotu ni bera nira vauci (raica na 27.2).

Na veiwatini e rau vauci ena valetabu e dodonu me rau (1) vakamau vakamatanitu ni bera ni rau vauci se (2) vakamau ka vauci vata ena dua na soqoni ni valetabu vata ga. Raica na 27.3.2

27.3.1.2

Lewenilotu E Vakaleqai Tu Na Nodra Vakasama

O ira na lewenilotu e vakaleqai tu na nodra vakasama e rawa nira vauci vei watidra, se itau kevaka:

• Era sa ciqoma oti na cakacaka vakalotu taucoko, oka kina na enidaumeni (raica na 27.2.1.3).

• Sa tu vei ira na kila-ka ni vakasama me ra kila vakavinaka, vakayacora, ka maroroya na kena veiyalayalati.

Ena veivakasalataki o bisopi vei lewenilotu kei na watina, se itau. Ena vakasaqara talega na veidusimaki ni Yalotabu. Ena rawa me veivakasalataki vata kei peresitedi ni iteki.

27.3.2

Tuvalaki kei na Lokuci ni Gauna ni Vakamau se Veivauci ena Valetabu

27.3.2.1

Ciqomi ni Dua na iVolatara ni Cakacaka Vakalotu vei ira na Bula

Sa dodonu vua e dua na lewenilotu me na ciqoma e dua na ivolatara ni cakacaka vakalotu ni bula me vauci kina vei watina. Me baleta na itukutuku ni ivolatara oqo, raica na 26.3.

27.3.2.2

Veitaratara ki na Valetabu

O ira na lewenilotu era nakinaki tiko mera vakamau se vauci vua na watidra e dodonu mera veitaratara taumada kina valetabu me tuvai na gauna ni cakacaka vakalotu.

27.3.2.3

Tauri ni Laiseni ni Vakamau

Ni bera ni rau vakamau, sa dodonu me sa tiko vei rau na veiwatini e dua na laiseni vakalawa ni vakamau ka vakabau na vanua ena vakayacori kina na vakamau. Kevaka e rau navuca na veiwatini me rau vakamau ka vauci ena dua ga na soqo ni vakamau, sa dodonu me rau kauta mai e dua na laiseni ni vakamau vakabau kina valetabu.

Na veiwatini rau sa vauci ni oti na nodrau vakamau vakamatanitu e sega ni gadrevi me rau kauta mai e dua na laiseni ni vakamau kina valetabu. Ia, me rau na vakaraitaka na tikinisiga kei na vanua e rau a vakamau kina vakamatanitu me tiki ni iwalewale ni veivakadeitaki ena ivolatukutuku.

27.3.2.4

Dauveituberi Vei Yalewa kei Tagane Vakawati

Na marama sa edaumeni oti e rawa ni tomani yalewavou ena rumu ni veisau. Na turaga sa edaumeni oti e rawa ni cakava tale ga vakakina vei taganevou. E dodonu me tiko e dua na nona ivolatara ni valetabu o koya ena veituberi yani. Na valetabu e rawa ni vakarautaka e dua na dauveituberi kevaka e gadrevi.

27.3.2.5

O Cei ena Vakayacora na Vakamau se Veivauci ena Valetabu

Na vakamau se veivauci ena valetabu ena dau qarava e dua na dauveivauci e vakailesilesi kina valetabu e rau na vakamau se vauci kina na veiwatini. Kevaka e dua na lewe ni matavuvale se itokani e taura tu na lewa ni veivauci ka lesi kina valetabu e rau na vakamau se vauci kina na veiwatini, sa rawa ni rau sureti koya me vakayacora na vakamau se veivauci.

27.3.2.6

iSulu Dodonu ni Vakamau se Vauci ena Valetabu

iSulusulu nei Yalewa Vakawati. Na ivinivo kece sara era na daramaki ena valetabu e dodonu me vulavula, me maqosa na kena iculacula kei na kena isulu, ka sega ni ukutaki vakasivia. E dodonu talega me ubia na qameni ni valetabu. Na isulu mamare me tabeirua.

Me salavata kei na ivinivo tale eso e daramaki ena valetabu, na isulu ni yalewa vakawati e dodonu me liga balavu se vakaligana vakarauta. Me kakua ni vakaitiniyara tu na ivinivo ni yalewa vakawati vakavo kevaka e rawa ni pinitaki cake se luva tani ena gauna ni soqotabu ni veivauci.

Na valetabu e rawa ni vakarautaka na ivinivo ke vinakati se gadrevi.

Na iSulu nei Tagane Vakawati. E dau daramaka tu ga na tagane na isulu ni valetabu tudei ena gauna ni vakamau se soqoni ni veivauci (raica na 38.5.1 kei na 38.5.2).

iSulu ni Vulagi. O ira era tiko ena soqoni ni vakamau se veivauci e dodonu mera daramaka na isulu e tautauvata kei na veika era na daramaka kina dua na soqoni ni sakaramede. O ira na lewenilotu era lako vakadodonu mai ki na veivauci mai na soqoni ni edaumeni sa rawa me ra dara na nodra isulu ni soqoni e valetabu.

Senikau. Me rau kua ni daramaka na senikau na veiwatini kei ira na nodrau vulagi ena gauna ni vakamau se soqoni ni veivauci.

27.3.2.7

Daramaki ni Mama ni Oti na Vakamau se Veivauci e Valetabu

Na veisoli ni mama e sega ni tiki ni soqoni tabu ni vakamau ena valetabu. Ia, e rawa ni ra veisau mama na veiwatini ni oti na soqonitabu ena rumu ni veivauci. Me rau kakua ni veisau mama na veiwatini ena dua tale na gauna se vanua e loma ni valetabu se loma ni bai ni valetabu.

O ira na veiwatini era sa vakamau ka vauci vata ena soqoni oqo e rawa nira veisoli mama ena dua na gauna e muri me ra qai sotavi ira na lewe ni matavuvale era sega ni tiko rawa ena vakamau ena valetabu. Na veisoli mama oqo me kua ni tokaruataki kina e dua na tiki ni vakamau ena valetabu se soqoni ni veivauci. Me rau kakua ni veisoli yalayala na veiwatini ni oti na nodrau vakamau se vauci ena valetabu.

O ira na veiwatini era sa vakamau vakamatanitu ni sa bera na nodra veivauci ena valetabu e rawa nira veisau mama ena nodra soqoni vakamatanitu, ena nodra veivauci ena valetabu, se ena soqoni ruarua.

27.3.4

O Cei E Rawa ni Tiko ena Vakamau se Veivauci ena Valetabu

O ira na veiwatini e dodonu me ra sureti ira ga na lewe ni matavuvale voleka kei ira na itokani kina vakamau se veivauci ena valetabu. O ira na lewenilotu era bula dodonu ka vaka edaumeni oti ka tiko e dua na nodra ivolatara vakabau ni valetabu e rawa nira tiko kina.

E rawa ni vakadonuya na peresitedi ni iteki e dua na tamata ka sega ni papitaiso se vaka edaumeni ena vuku ni vakaleqai tu na nona vakasama me tiko ena vakamau ena valetabu se na nodra vauci ni tacina era bula tiko. Na tamata oqo e dodonu me:

• Sa yabaki 18 oti.

• Rawa ni dau vakarokoroko ena gauna ni soqoni oqo.

Me vola o peresitedi ni iteki e dua na ivola ka tukuna ni sa vakadonui na tamata oya me na tiko ena veivauci. Na ivola oqo ena soli ena valetabu.

27.4

Vauci ni Gone Era Bula Tiko Vei Rau na iTubutubu

O ira na gone era sucu mai ni sa vauci oti na tinadra vua na watina ena valetabu era sa sucu mai ena loma ni veiyalayalati ni veivauci oya. Ena sega ni gadrevi me ra ciqoma na cakacaka vakalotu ni veivauci kina itubutubu.

O ira na gone era sega ni sucu ena loma ni veiyalayalati era na okati me lewe ni matavuvale tawamudu ena gauna era sa vauci kina vei ira na nodra itubutubu dina se itubutubu dauniveisusu. Sa nodra na gone oqo na veivakalougatataki vata ga e soli vei ira era a sucu ena loma ni veiyalayalati.

27.4.2

Veitaratara ki na Valetabu

Edua na veiwatini ka vinakata mera vauci vei ira na luvedrau, se o ira na gone era gadreva mera vauci vei rau na nodra itubutubu sa mate, sa dodonu mera veitaratara taumada kina valetabu me lokuci na gauna ni cakacaka vakalotu.