32.

Paghinulsol ug mga Konseho sa Pagkamiyembro diha sa Simbahan

32.0

Pasiuna

Kasagaran sa paghinulsol mahitabo tali sa usa ka indibidwal, sa Dios, ug niadtong kinsa naapektohan sa mga sala sa usa ka tawo. Hinoon, usahay ang bishop o ang presidente sa stake kinahanglan nga motabang sa mga miyembro sa Simbahan sa ilang mga paningkamot sa paghinulsol.

Kon magtabang sa mga miyembro nga maghinulsol, ang mga bishop ug ang mga presidente sa stake mahigugmaon ug maamumahon. Sila mosunod sa ehemplo sa Manluluwas, kinsa mibayaw sa mga indibidwal ug mitabang nila nga makapalayo sa sala ug mopaduol ngadto sa Dios (tan-awa sa Mateo 9:10–13; Juan 8:3–11).

32.1

Paghinulsol ug Pagpasaylo

Aron mahitabo ang Iyang plano sa kaluoy, ang Langitnong Amahan mipadala sa Iyang Bugtong Anak, si Jesukristo, aron moula alang sa atong mga sala (tan-awa sa Alma 42:15). Miantos si Jesus sa silot nga gipangayo sa balaod sa kaangayan alang sa atong mga sala (tan-awa sa Doktrina ug mga Pakigsaad 19:15–19; tan-awa usab sa Alma 42:24–25). Pinaagi niini nga sakripisyo, ang Amahan ug ang Anak mipakita sa Ilang walay kinutoban nga gugma alang kanato (tan-awa sa Juan 3:16).

Kon kita mopakita og “hugot nga pagtuo ngadto sa paghinulsol,” ang Langitnong Amahan mopasaylo kanato, mohatag og kaluoy pinaagi sa Pag-ula ni Jesukristo (Alma 34:15; tan-awa usab sa Alma 42:13). Kon kita nalimpyohan ug napasaylo, kita sa kataposan makapanunod sa gingharian sa Dios (tan-awa sa Isaias 1:18; Doktrina ug mga Pakigsaad 58:42).

Ang paghinulsol mas labaw pa kay sa pag-usab og binuhatan. Kini mao ang pagpahilayo gikan sa sala ug pagpadulong ngadto sa Langitnong Amahan ug ni Jesukristo. Mosangput kini ngadto sa kausaban sa kasingkasing ug hunahuna (tan-awa sa Mosiah 5:2; Alma 5:12–14; Helaman 15:7). Pinaagi sa paghinulsol, mahimo kitang bag-ong mga nilalang, napasig-uli ngadto sa Dios (tan-awa sa 2 Mga Taga-Corinto 5:17–18; Mosiah 27:25–26).

Ang oportunidad nga maghinulsol mao ang usa sa labing mahinungdanon nga mga panalangin nga gihatag kanato sa Langitnong Amahan pinaagi sa gasa sa Iyang Anak.

32.2

Mga Katuyoan sa mga Restriksiyon o Pagbakwi sa Pagkamiyembro diha sa Simbahan

Kon ang usa ka miyembro makabuhat og seryoso nga sala, ang bishop o ang presidente sa stake motabang niya nga maghinulsol. Isip kabahin niini nga proseso, siya mahimong mohatag og restriksiyon sa pipila ka pribilehiyo sa pagkamiyembro diha sa Simbahan sulod sa usa ka panahon. Sa pipila ka sitwasyon, tingali kinahanglan nga iyang bakwion ang pagkamiyembro sa tawo sulod sa usa ka panahon.

Ang paghatag og restriksiyon o pagbakwi sa pagkamiyembro sa usa ka tawo wala gituyo aron sa pagsilot. Hinoon, kini nga mga aksiyon usahay gikinahanglan aron sa pagtabang sa tawo nga maghinulsol ug makasinati og kausaban sa kasingkasing. Makahatag usab kini sa tawo og panahon nga mangandam sa espirituwal nga paagi sa pagbag-o ug pagtuman pag-usab sa iyang mga pakigsaad.

Ang tulo ka katuyoan sa mga restriksiyon o pagbakwi sa pagkamiyembro mao ang mosunod.

Tulo ka Katuyoan sa mga Restriksiyon o Pagbakwi sa Pagkamiyembro diha sa Simbahan

1. Pagtabang sa pagpanalipod sa uban

2. Pagtabang sa usa ka tawo nga makagamit sa matubsanong gahom ni Jesukristo pinaagi sa paghinulsol

3. Pagpanalipod sa integridad sa Simbahan

32.2.1

Pagtabang sa Pagpanalipod sa Uban

Ang unang katuyoan mao ang pagtabang sa pagpanalipod sa uban. Usahay ang usa ka tawo mahimong hulga sa pisikal o espirituwal. Ang mga binuhatan nga motuyo sa pagpasakit, pisikal nga pagdagmal, sekswal nga pag-abuso, makadaot nga paggamit sa droga ug ubang butang, pagpanglimbong, ug apostasiya mao ang pipila ka paagi nga kini mahitabo. Uban sa inspirasyon, ang bishop o ang presidente sa stake molihok aron sa pagpanalipod sa uban kon adunay tawo nga naghulga sa ingon niini ug sa ubang seryoso nga mga paagi (tan-awa sa Alma 5:59–60).

32.2.2

Pagtabang sa usa ka Tawo nga Makagamit sa Matubsanong Gahom ni Jesukristo pinaagi sa Paghinulsol

Ang ikaduha nga katuyoan mao ang pagtabang sa usa ka tawo nga makagamit sa matubsanong gahom ni Jesukristo pinaagi sa paghinulsol. Pinaagi niini nga proseso, siya mahimong malimpyo pag-usab ug takos nga modawat sa tanang panalangin sa Dios.

32.2.3

Pagpanalipod sa Integridad sa Simbahan

Ang ikatulo nga katuyoan mao ang pagpanalipod sa integridad sa Simbahan. Ang paghatag og restriksiyon o pagbakwi sa pagkamiyembro sa usa ka tawo diha sa Simbahan mahimong kinahanglanon kon ang iyang pamatasan makadaot og dako sa Simbahan (tan-awa sa Alma 39:11). Ang integridad sa Simbahan dili mapanalipdan pinaagi sa pagtago o pagpagamay sa seryoso nga mga sala—apan pinaagi sa pag-asikaso niini.

32.3

Ang Tahas sa mga Maghuhukom sa Israel

Ang mga bishop ug ang mga presidente sa stake gitawag ug gi-set apart aron mahimo nga mga maghuhukom sa Israel (tan-awa sa Doktrina ug mga Pakigsaad 107:72–74). Sila naghupot sa mga yawe sa pagkapari sa pagrepresentar sa Ginoo sa pagtabang sa mga miyembro sa Simbahan nga maghinulsol (tan-awa sa Doktrina ug mga Pakigsaad 13:1; 107:16–18).

Kasagaran ang mga bishop ug ang mga presidente sa stake motabang sa paghinulsol pinaagi sa personal nga pagtambag. Kini nga pagtabang mahimong maglakip sa paghatag og dili pormal nga restriksiyon sa pipila ka pribilehiyo sa pagkamiyembro diha sa Simbahan sulod sa usa ka panahon.

Alang sa pipila ka seryoso nga mga sala, ang mga lider motabang sa pagpahinulsol pinaagi sa pagpahigayon og konseho sa pagkamiyembro (tan-awa sa 32.6). Kini nga pagtabang mahimong maglakip sa paghatag og pormal nga restriksiyon sa pipila ka pribilehiyo sa pagkamiyembro diha sa Simbahan o pagbakwi sa pagkamiyembro sa usa ka tawo sulod sa usa ka panahon.

Ang mga bishop ug ang mga presidente sa stake mahigugmaon ug maamumahon samtang sila motabang sa mga miyembro nga maghinulsol. Ang inter-aksiyon sa Manluluwas sa babaye nga gidakop tungod sa pagpanapaw maoy usa ka giya (tan-awa sa Juan 8:3–11). Bisan og wala Siya mosulti nga gipasaylo ang iyang mga sala, Siya wala mopanghimaraot kaniya. Hinoon, Siya misulti kaniya nga “ayaw na pagpakasala”—sa paghinulsol ug pag-usab sa iyang kinabuhi.

Kini nga mga lider motudlo nga adunay “kalipay … didto sa langit tungod sa usa ka makasasala nga magahinulsol” (Lucas 15:7). Sila mapailobon, mosuporta, ug positibo. Sila modasig og paglaom. Sila motudlo ug mopamatuod nga tungod sa maulaong sakripisyo sa Manluluwas, ang tanan makahinulsol ug mahimong limpyo.

Ang mga bishop ug ang mga presidente sa stake magtinguha og giya gikan sa Espiritu aron makahibalo unsaon sa pagtabang ang matag tawo nga maghinulsol. Ang Simbahan adunay gitakda nga sumbanan sa labing seryoso lamang nga mga sala kon unsay himoon nga mga aksiyon sa mga lider (tan-awa sa 32.6). Walay duha ka sitwasyon nga pareha. Ang pagtambag nga ihatag sa mga lider ug ang proseso sa paghinulsol nga ilang ipahigayon kinahanglan nga dinasig ug tingali lahi alang sa matag tawo.

32.4

Pagkompisal, Pagkakompidensiyal, ug Pag-report ngadto sa mga Awtoridad sa Gobyerno

32.4.1

Pagkompisal

Ang paghinulsol nagkinahanglan nga ang mga sala ikompisal ngadto sa Langitnong Amahan. Si Jesukristo miingon, “Pinaagi niini kamo masayod kon ang usa ka tawo naghinulsol sa iyang mga sala—tan-awa, siya mokompisal kanila ug mobiya kanila” (Doktrina ug mga Pakigsaad 58:43; tan-awa usab sa Mosiah 26:29).

Kon ang mga miyembro sa Simbahan makahimo og seryoso nga mga sala, ang ilang paghinulsol maglakip usab og pagkumpisal ngadto sa ilang bishop o sa presidente sa stake. Dayon siya makahimo sa paggamit sa mga yawe sa ebanghelyo sa paghinulsol alang kanila (tan-awa sa Doktrina ug mga Pakigsaad 13:1; 84:26–27; 107:18, 20). Kini makatabang nila nga mamaayo ug mobalik ngadto sa dalan sa ebanghelyo pinaagi sa gahum sa Pag-ula sa Manluluwas.

Ang katuyoan sa pagkumpisal mao ang pag-awhag sa mga miyembro nga tangtangan sa palas-anon ang ilang kaugalingon aron sila hingpit nga magtinguha sa tabang sa Ginoo sa pag-usab ug pagkaayo. Ang pagpalambo og “masulub-on nga kasingkasing ug mahinulsulon nga espiritu” giabagan sa pagkumpisal (2 Nephi 2:7). Ang boluntaryo nga pagkumpisal nagpakita nga ang usa ka tawo nagtinguha nga maghinulsol.

Kon ang usa ka miyembro mokompisal, ang bishop o ang presidente sa stake mosunod sa mga lagda alang sa pagtambag diha sa 32.8. Mainampoon siyang magtinguha og giya mahitungod sa angay nga sitwasyon alang sa pagtabang sa miyembro nga maghinulsol. Siya mokonsiderar kon ang konseho sa pagkamiyembro makatabang ba. Kon ang palisiya sa Simbahan nagkinahanglan sa konseho sa pagkamiyembro, siya mopasabot niini (tan-awa sa 32.6).

Usahay ang usa ka miyembro nakasala sa kapikas o sa laing hamtong. Isip kabahin sa paghinulsol, siya kinahanglan sa kasagaran mokompisal ngadto niana nga tawo ug mangayo og pasaylo. Ang usa ka batan-on nga makahimo og seryoso nga sala sa kasagaran awhagon nga magpakitambag sa iyang mga ginikanan.

32.4.4

Pagkakompidensiyal

Ang mga bishop, mga presidente sa stake, ug ang ilang mga magtatambag adunay sagradong katungdanan sa pagpanalipod sa tanang kompidensiyal nga impormasyon nga gipaambit kanila. Kini nga impormasyon mahimong moabot pinaagi sa mga interbiyo, pagtambag, ug mga pagkompisal. Ang sama nga katungdanan sa pagkakompidensiyal buhaton sa tanan nga moapil sa mga konseho sa pagkamiyembro. Ang pagkakompidensiyal importante tungod kay ang mga miyembro mahimong dili mokompisal sa mga sala o magtinguha og giya kon ang ilang gipakigbahin dili mahimong kompidensiyal. Ang paglapas sa pagsalig nagbudhi sa pagsalig sa miyembro ug maoy makaingon nga mawala ang ilang pagsalig sa ilang mga lider.

Subay sa ilang katungdanan sa pagkakompidensiyal, ang usa ka bishop, presidente sa stake, o ang ilang mga magtatambag mahimong mopakigbahin lamang sa maong impormasyon sumala sa mosunod:

• Kinahanglang makigsulti sila sa presidente sa stake, presidente sa misyon, o bishop sa miyembro mahitungod sa pagpahigayon og konseho sa pagkamiyembro o sa mga butang nga may kalabotan.

• Ang tawo mibalhin ngadto sa usa ka bag-ong ward (o ang lider sa pagkapari na-release) samtang ang aksiyon sa pagkamiyembro o ubang seryoso nga mga problema wala pa masulbad.

• Ang bishop o ang presidente sa stake nakahibalo nga ang usa ka miyembro sa Simbahan nga nagpuyo sa gawas sa ward o stake nalambigit sa usa ka seryoso nga sala.

• Gikinahanglan nga ibutyag ang impormasyon atol sa konseho sa pagkamiyembro.

• Ang usa ka miyembro mopili sa paghatag og pagtugot alang sa lider nga mopakigbahin sa impormasyon sa piho nga mga tawo.

• Gikinahanglan tingali ang pagpakigbahin og limitado nga impormasyon mahitungod sa desisyon sa konseho sa pagkamiyembro.

Aron sa pagtabang sa mga lider sa pagpanalipod sa uban ug sa pagsunod sa balaod, ang Simbahan naghatag og tabang gikan sa nabansay nga mga propesyonal. Aron makadawat niini nga giya, ang mga lider motawag dayon sa help line sa Simbahan kalabot sa pag-abuso kon kini anaa (tan-awa sa 38.6.2.1). Kon kini wala, ang presidente sa stake mokontak sa legal counsel sa area diha sa buhatan sa area.

Sa usa lang ka sitwasyon nga ang bishop o ang presidente sa stake mobutyag sa kompidensiyal nga impormasyon nga dili una mangayo sa maong giya. Kana kon ang pagbutyag gikinahanglan aron mapugngan ang makahulga sa kinabuhi nga kadaot o seryoso nga kadaot ug wala nay panahon sa pagpangayo og giya. Sa mao nga mga sitwasyon, ang katungdanan sa pagpanalipod sa uban mas importante kay sa katungdanan sa pagkakompidensiyal. Ang mga lider kinahanglang mokontak dayon sa sibil nga mga awtoridad.

32.6

Kagrabe sa Sala ug Palisiya sa Simbahan

Ang kagrabe sa usa ka sala mao ang usa ka importante nga konsiderasyon sa pagtino sa sitwasyon nga (1) motabang sa pagpanalipod sa uban ug (2) motabang sa tawo nga maghinulsol. Ang Ginoo miingon nga Siya “dili makatan-aw diha sa sala uban sa labing gamay nga matang sa pagtugot” (Doktrina ug mga Pakigsaad 1:31; tan-awa usab sa Mosiah 26:29). Ang iyang mga sulugoon kinahanglang dili gayod mobaliwala sa ebidensya sa seryoso nga sala.

Ang seryoso nga mga sala mao ang tinuyo ug dakong kalapasan batok sa mga balaod sa Dios. Ang mga kategoriya sa seryoso nga mga sala gilista sa ubos.

• Bayolente nga mga buhat ug abuso

• Sekswal nga imoralidad

• Malimbongon nga mga buhat

• Mga kalapasan sa pagsalig

• Ubang mga buhat

Kon ang Konseho sa Pagkamiyembro Gikinahanglan o Mahimong Kinahanglanon

Matang sa Sala	Konseho sa Pagkamiyembro Gikinahanglan	Konseho sa Pagkamiyembro Mahimong Kinahanglanon
Matang sa Sala Bayolente nga mga Buhat ug Abuso	Konseho sa Pagkamiyembro Gikinahanglan Pagpatay Paglugos Pagkakombikto sa sekswal nga pag-ataki Pag-abuso sa bata o batan-on Binuhatan nga motuyo sa pagpasakit sa bayolenting paagi	Konseho sa Pagkamiyembro Mahimong Kinahanglanon Pagsulay sa pagpatay Sekswal nga pag-abuso, lakip sa pagpangataki ug pagsamok-samok (tan-awa sa 38.6.18 kon kanus-a gikinahanglan ang usa ka konseho) Pag-abuso sa usa ka kapikas o laing hamtong (tan-awa sa 38.6.2.4 kon kanus-a gikinahanglan ang usa ka konseho)
Matang sa Sala Sekswal nga Imoralidad	Konseho sa Pagkamiyembro Gikinahanglan Pakighilawas sa duol nga kabanay [Incest] Pornograpiya nga Naggamit og Bata Dinaghan nga kaminyoon Binuhatan nga motuyo sa pagpasakit sa sekswal nga paagi	Konseho sa Pagkamiyembro Mahimong Kinahanglanon Pagpanapaw, pakighilawas nga dili pa minyo, mga relasyon sa managsama og sekso, ug uban pang mga relasyon nga gawas sa legal nga kaminyoon tali sa usa ka lalaki ug usa ka babaye, lakip na ang sekswal nga pagpakigtubay diha sa internet o sa telepono Puyo-puyo, sibil nga panaghiusa ug panag-uban, ug kaminyoon sa managsama og sekso Grabe o dili mapugngan nga paggamit sa pornograpiya nga hinungdan sa dakong kadaot sa kaminyoon o pamilya sa usa ka miyembro
Matang sa Sala Malimbongon nga mga Buhat	Konseho sa Pagkamiyembro Gikinahanglan Ang kinaiya sa pagkamanunukob sa pundo [Financial predatory behavior], sama sa pagpangilad ug sa susama nga mga kalihokan (tan-awa sa 32.6.3.3 kon ang usa ka miyembro nalambigit sa pagpangawkaw sa mga pundo sa Simbahan o kabtangan)	Konseho sa Pagkamiyembro Mahimong Kinahanglanon Pagpangawat, pagpanglungkab, pagpangubit, o pagpangawkaw (tan-awa sa 32.6.3.3 kon ang usa ka miyembro nalambigit sa pagpangawkaw sa mga pundo sa Simbahan o kabtangan) Pagpanumpa nga bakak
Matang sa Sala Mga Kalapasan sa Pagsalig	Konseho sa Pagkamiyembro Gikinahanglan Seryoso nga sala samtang naghupot og prominente nga katungdanan sa Simbahan	Konseho sa Pagkamiyembro Mahimong Kinahanglanon Bug-at nga sala samtang naghupot og usa ka posisyon sa awtoridad o pagsalig diha sa Simbahan o sa komunidad (tan-awa sa 32.6.3.3 kon ang usa ka miyembro nalambigit diha sa pagpangawkaw sa mga pundo sa Simbahan o kabtangan) Seryoso nga sala nga nahibaloan sa kadaghanan
Matang sa Sala Ubang mga Buhat	Konseho sa Pagkamiyembro Gikinahanglan Kadaghanan sa nakombikto og bug-at nga krimen	Konseho sa Pagkamiyembro Mahimong Kinahanglanon Aborsyon (gawas kon ang eksepsiyon diha sa 38.6.1 magamit) Pabalik-balik nga seryoso nga mga sala Mituyo sa pagbiya sa mga responsibilidad sa pamilya, lakip sa wala pagbayad sa suporta sa bata ug panggasto sa kapikas [alimony] Pagbaligya og ginadili nga mga droga Ubang seryoso nga kriminal nga mga buhat

32.6.3

Kanus-a ang Presidente sa Stake Magpakitambag sa Kapangulohan sa Area mahitungod Kon ang Konseho sa Pagkamiyembro o Ubang Aksiyon Gikinahanglan Ba

Ang pipila ka butang magkinahanglan og dugang nga pagkasensitibo ug giya. Aron makahibalo unsaon nga labing makatabang, ang presidente sa stake kinahanglan nga magpakitambag sa Kapangulohan sa Area mahitungod sa mga sitwasyon niini nga seksiyon.

32.6.3.2

Apostasiya

Ang mga isyu sa apostasiya sa kasagaran adunay epekto lapas sa mga utlanan sa usa ka ward o stake. Kinahanglang asikasohon dayon kini aron sa pagpanalipod sa uban.

Ang bishop magpakitambag sa presidente sa stake kon siya mobati nga ang aksiyon sa usa ka miyembro nagpakita og apostasiya.

Sumala sa gigamit dinhi, ang apostasiya nagpasabot sa usa ka miyembro nga naghimo sa bisan unsa sa mosunod:

• Nagsige og buhat sa klaro ug tinuyo nga oposisyon sa Simbahan, sa doktrina niini, sa mga palisiya niini, o sa mga lider niini diha sa publiko

• Nagpadayon sa pagtudlo isip doktrina sa Simbahan sa unsay dili doktrina sa Simbahan human korihii sa bishop o presidente sa stake

• Nagpakita og pabalik-balik nga tinuyo nga paningkamot sa pagpahuyang sa hugot nga pagtuo ug kalihokan sa mga miyembro sa Simbahan

• Nagpadayon sa pagsunod sa mga pagtulon-an sa sekta sa mga mi-apostasiya human makorihii sa bishop o presidente sa stake

• Pormal nga nagpasakop sa laing simbahan ug nagpasiugda sa mga pagtulon-an niini

32.6.3.3

Pagpanghilabot sa mga Pundo sa Simbahan

Kon ang usa ka tawo mangawkaw sa mga pundo sa Simbahan o mokawat sa bililhong kabtangan sa Simbahan, ang presidente sa stake magpakitambag sa Kapangulohan sa Area mahitungod kon ang konseho sa pagkamiyembro o ubang aksyon gikinahanglan ba.

Ang Mga Pinili gikan sa Kinatibuk-ang Tamdanan nga Basahon wala maglakip sa tanang instruksiyon ug mga lagda alang sa pagtambag sa usa ka tawo nga nalambigit sa seryoso nga sala ug, kon gikinahanglan,magpahigayon og usa ka konseho sa pagkamiyembro.

Kon ang bishop o presidente sa branch adunay mga pangutana kon unsaon sa pagtabang ang usa ka tawo nga nakahimo og seryoso nga sala (sama sa gipasabot diha sa 32.6), siya kinahanglan mosusi og una aron makita kon ang tibuok kapitulo 32 sa Kinatibuk-ang Tamdanan nga Basahon nahubad ba sa pinulongan nga mahimo niyang gamiton. Kon wala kini mahubad, kinahanglan niyang kontakon ang iyang direkta nga tigdumalang awtoridad alang sa giya.