tamaloloa o loo talanoa

32.

Salamo ma Fono o Tagata o le Ekalesia

32.0

Faatomuaga

O le tele o le salamo e tupu i le va o se tagata, le Atua, ma i latou na aafia i agasala a se tagata. Peitai, o nisi taimi e manaomia ai e se epikopo po o se peresitene o le siteki ona fesoasoani i tagata o le Ekalesia i a latou taumafaiga ia salamo.

Pe a fesoasoani i tagata ia salamo, o epikopo ma peresitene o siteki e alolofa ma amana’ia. Latou te mulimuli i le faataitaiga a le Faaola, o lē sa si’iina a’e tagata taitasi ma sa fesoasoani ia fulitua mai le agasala ae liliu atu i le Atua (tagai i le Mataio 9:10–13; Ioane 8:3–11).

32.1

Salamo ma le Faamagaloga

Ina ia faataunuuina Lana fuafuaga o le alofamutimutivale, na auina mai ai e le Tama Faalelagi Lona Alo Pele e Toatasi na Fanaua, o Iesu Keriso, e togiola mo a tatou agasala (tagai i le Alema 42:15). Sa puapuagatia Iesu i le faasalaga e moomia e le tulafono o le faamasinotonu mo a tatou agasala (tagai i le Mataupu Faavae ma Feagaiga 19:15–19; tagai foi i le Alema 42:24–25). E ala i lea taulaga, na faaalia ai e le Tama ma le Alo lo La’ua alofa e le i’u mo i tatou (tagai i le Ioane 3:16).

Pe a tatou faaaoga le “faatuatua e oo i le salamo,” e faamagaloina i tatou e le Tama Faalelagi, ma tuuina mai ai le alofa mutimutivale e ala i le Togiola a Iesu Keriso (Alema 34:15; tagai foi i le Alema 42:13). Pe a ua faamamaina i tatou ma faamagaloina, e mafai ona tatou mautofi i le malo o le Atua i le i’uga (tagai i le Isaia 1:18; Mataupu Faavae ma Feagaiga 58:42).

O le salamo e sili atu nai lo na o le suia o le amio. O le liliu ese lea mai le agasala ma agai atu i le Tama Faalelagi ma Iesu Keriso. E tau atu i se suiga o le loto ma le mafaufau (tagai i le Mosaea 5:2; Alema 5:12–14; Helamana 15:7). E ala i le salamo, tatou te avea ai ma tagata fou, ua toefaalelei ma le Atua (tagai i le 2 Korinito 5:17–18; Mosaea 27:25–26).

O le avanoa e salamo ai o se tasi lea o faamanuiaga silisili ua tuuina mai e le Tama Faalelagi ia i tatou e ala i le meaalofa o Lona Alo.

32.2

O Faamoemoega o Tapuia’iga po o le Soloia Mai le Avea ma Tagata Auai o le Ekalesia

Afai e solia e se tagata se agasala matuia, e fesoasoani le epikopo po o le peresitene o le siteki ia te ia ia salamo. I le avea ai o se vaega o lenei faagasologa, e ono manaomia ona ia tapui mai nisi o avanoa o le avea ma tagata auai o le Ekalesia mo se taimi. I nisi o tulaga, e ono manaomia ona ia soloia le tagata mai le avea ai ma se tagata auai o le Ekalesia mo se taimi.

O le tapui po o le soloia o se tagata mai le avea ma tagata o le Ekalesia e le o faamoemoe e faasala ai. Ae, o nei faatinoga o nisi taimi e tatau ai ina ia fesoasoani ai i se tagata ia salamo ma ia lagona ai se suiga o le loto. E avatu ai foi i se tagata le taimi e sauniuni ai faaleagaga e toefaafou ma toe tausi ana feagaiga.

O faamoemoega e tolu o tapuia’iga po o le soloia mai le avea ma tagata auai o le Ekalesia o loo ta’ua i lalo.

O Faamoemoega e Tolu o Tapuia’iga po o le Soloia Mai le Avea ma Tagata o le Ekalesia

1. Fesoasoani e puipuia isi

2. Fesoasoani i se tagata ia maua le mana togiola a Iesu Keriso e ala i le salamo

3. Puipuia le amiotonu o le Ekalesia

32.2.1

Fesoasoani e Puipuia Isi

O le faamoemoega muamua o le fesoasoani lea e puipuia isi. O nisi taimi e faaalia ai e se tagata se taufaamata’u faaletino pe faaleagaga. O amioga faatautala e faamalieina ai tuinanau, faamanu’aina faaletino, sauaga faalefeusua’iga, faaaoga sese o fualaau ma vailaau, taufaasese, ma le liliuese o nisi ia o auala e mafai ai ona tupu lenei mea. Faatasi ai ma musumusuga, e galue ai se epikopo po o se peresitene o le siteki e puipuia isi pe a faaalia e se tasi se taufaamata’u i nei auala ma isi auala matuia (tagai i le Alema 5:59–60).

32.2.2

Fesoasoani i se Tagata Ia Maua le Mana Togiola o Iesu Keriso e ala i le Salamo

O le faamoemoega lona lua o le fesoasoani lea i se tagata ia maua le mana togiola o Iesu Keriso e ala i le salamo. E ala atu i lea faagasologa, e mafai ai e ia ona toe mamā ma agavaa e maua faamanuiaga uma a le Atua.

32.2.3

Puipuia le Amiotonu o le Ekalesia

O le faamoemoega lona tolu o le puipuia lea o le amiotonu o le Ekalesia. O le tapuia’ia po o le soloia mai le avea ma se tagata o le Ekalesia e ono tatau ai pe afai o lana amio ua matuai faatauma’oia ai le Ekalesia (tagai i le Alema 39:11). O le amiotonu o le Ekalesia e le puipuia i le faalafi po o le tuuitiitia o agasala matuia—ae e ala i le talanoaina.

32.3

O Le Matafaioi a Faamasino i Isaraelu

O epikopo ma peresitene o siteki, ua valaauina ma vaetofia e avea ma faamasino i Isaraelu (tagai i le Mataupu Faavae ma Feagaiga 107:72–74). Latou te umia ki o le perisitua e avea ai ma sui o le Alii e fesoasoani ai i tagata o le Ekalesia ia salamo (tagai i le Mataupu Faavae ma Feagaiga 13:1; 107:16–18).

E tele taimi e fesoasoani ai epikopo ma peresitene o siteki i le salamo e ala i fautuaga patino. O lenei fesoasoani e mafai ona aofia ai tapuia’iga māmā o nisi o avanoa o le avea ai ma tagata o le Ekalesia mo se taimi.

Mo nisi o agasala matuia, e fesoasoani taitai i le salamo e ala i le faia o se fono o le tagata auai o le Ekalesia (tagai i le 32.6). O lea fesoasoani e mafai ona aofia ai le tapuia’iga mamafa o nisi o avanoa mai le avea ai ma tagata o le Ekalesia po o le soloia mai le avea ma tagata o le Ekalesia mo se taimi.

O epikopo ma peresitene o siteki e alolofa ma amana’ia a o latou fesoasoani i tagata ia salamo. O le fegalegalea’iga a le Faaola ma le fafine na molia atu i le mulilua o se taiala lea (tagai i le Ioane 8:3–11). E ui sa le’i fetalai atu o Ia ua faamagaloina ana agasala, ae sa Ia le’i ta’usalaina foi o ia. Ae, sa Ia ta’u atu ia te ia “aua e te toe agasala”—ia salamo ma suia lona olaga.

E a’oa’o atu e nei taitai e faapea, o loo i ai le “olioli … i le lagi i le tagata agasala e toatasi e salamo” (Luka 15:7). Latou te onosai, lagolagosua, ma vaai i itu lelei. Latou te uunaia le faamoemoe. Latou te a’oa’o atu ma molimau atu e faapea, ona o le taulaga togiola a le Faaola, ua mafai ai e tagata uma ona salamo ma mamā.

E saili e epikopo ma peresitene o siteki le taitaiga mai le Agaga ia iloa ai le auala e fesoasoani ai i tagata taitasi ia salamo. E mo na o agasala sili ona matuia e i ai tulaga faatonuina a le Ekalesia ua faatulagaina ai po o a faaiuga e tatau i ona taitai ona fai (tagai i le 32.6). E leai ni tulaga se lua e tutusa. O fautuaga e tuu atu e taitai ma le faagasologa o le salamo latou te faatonutonuina, e tatau ona musuia ma e ono eseese mo tagata taitoatasi.

32.4

Ta’uta’u Atu, Lē Faalaua’iteleina, ma le Lipoti atu i Taitai o le Malo

32.4.1

Ta’uta’u Atu

O le salamo e moomia ai le ta’uta’u atu o agasala i le Tama Faalelagi. Ua fetalai mai Iesu Keriso, “O le mea lenei e mafai ai ona outou iloa pe afai ua salamo se tagata i ana agasala—faauta, e ta’uta’u atu e ia ma lafoaia” (Mataupu Faavae ma Feagaiga 58:43; tagai foi i le Mosaea 26:29).

Pe a soli e tagata o le Ekalesia ni agasala matuia, o lo latou salamo e aofia ai foi le ta’uta’u atu i lo latou epikopo po o le peresitene o le siteki. Ona mafai lea e ia ona faaaoga ia ki o le talalelei o le salamo mo i latou (tagai i le Mataupu Faavae ma Feagaiga 13:1; 84:26–27; 107:18, 20). E fesoasoani lea ia i latou ia faamaloloina ai ma toefoi mai i le ala o le talalelei e ala i le mana o le Togiola a le Faaola.

O le faamoemoega o le ta’uta’u atu o le faamalosi’auina lea o tagata o le Ekalesia e faasaoloto i latou lava mai avega ina ia mafai ona latou saili atoatoa atu i le fesoasoani a le Alii i le suiga ma le faamalologa. O le atia’eina o se “loto momomo ma le agaga salamo” e lagolagoina e le ta’uta’u atu (2 Nifae 2:7). O le ta’uta’u atu i le lotofuatiaifo, e faaalia ai ua naunau se tagata ia salamo.

Pe a ta’uta’u atu e se tagata o le Ekalesia se agasala, e mulimuli le epikopo po o le peresitene o le siteki i taiala mo fautuaga o loo i le 32.8 Na te sailia ma le agaga tatalo le taitaiga e uiga i le faatulagaga talafeagai mo le fesoasoani i le tagata ia salamo. Na te lauliliuina pe mata o le a aoga se fono o le tagata o le Ekalesia. Afai e manaomia e aiaiga faavae o le Ekalesia se fono o le tagata o le Ekalesia, na te faamalamalama atua le mea lenei (tagai i le 32.6).

O nisi taimi e sese ai se tagata o le Ekalesia i se toalua po o se isi tagata matua. E avea o se vaega o le salamo, o le mea masani lava e tatau ona ia ta’uta’u atu i lena tagata ma saili se faamagaloga. O se talavou e faia se agasala matuia, e masani ona uunaia e fefautuaa’i ma ona matua.

32.4.4

Lē Faalaua’iteleina

Ua i ai i epikopo, peresitene o siteki, ma o latou fesoasoani se tiute paia e puipuia faamatalaga uma e lē faalaua’iteleina e faasoa atu ia i latou. O nei faamatalaga e ono oo mai i faatalanoaga, fefautuaa’iga, ma le ta’uta’u atu. O lea lava tiute e tasi o le lē faalaua’iteleina e faatatau foi ia i latou uma e auai i fono o tagata o le Ekalesia. E taua tele le lē faalaua’iteleina aua e ono le ta’uta’uina e tagata a latou agasala pe sailia se taitaiga pe afai o le a lē tausisia le lē faalaua’iteleina o mea latou te faasoa maia. O le solia o se talitonuga mautinoa lea e iloa ai e isi tagata faamatalaga e lē faalaua’iteleina e faalataina ai le faatuatuaga o tagata o le Ekalesia ma mafua ai ona latou lē talitonuina o latou taitai.

I le ogatusa ai ma lo latou tiute o le lē faalaua’iteleina, e na o le pau nei o vaega e mafai e se epikopo, peresitene o le siteki, po o o la’ua fesoasoani ona faasoa atu ai ni faamatalaga faapena:

• E manaomia ona latou feūtaga’i ma le peresitene o le siteki, peresitene o le misiona, po o le epikopo a le tagata e uiga i le faia o se fono o le tagata o le Ekalesia po o ni mataupu e faatatau i ai.

• Ua masii atu le tagata i se uarota fou (pe ua faamalolo le taitai perisitua), a o faatalitali le faai’uga o le avea ai ma tagata o le Ekalesia po o isi atugaluga matuia.

• Ua silafia e se epikopo po o se peresitene o le siteki e faapea, o se tagata o le Ekalesia o loo nofo i fafo atu o le uarota po o le siteki atonu na aafia i se agasala matuia.

• E alagatatau ona faailoa atu faamatalaga i le taimi o le fono o se tagata o le Ekalesia.

• E filifili se tagata o le Ekalesia e tuu atu le faatagaga mo le taitai e faasoa atu ai faamatalaga i ni tagata patino.

• E ono tatau foi ona faasoa atu faamatalaga faatapulaaina e uiga i le faai’uga o se fono o le tagata o le Ekalesia.

Ina ia lagolago atu i taitai i le puipuia o isi ma ia tausisia le tulafono, e tuuina atu e le Ekalesia le fesoasoani e tauala mai i tagata ua aoaoina faapitoa. Ina ia maua lenei taitaiga, e vili vave e taitai le laina fesoasoani a le Ekalesia mo sauaga i nofoaga o maua ai (tagai i le 32.4.5). I nofoaga e le o maua ai, e faafesootai e le peresitene o le siteki le loia a le eria i le ofisa o le eria.

E na o le tasi le tulaga e tatau ai i se epikopo po o le peresitene o le siteki ona faailoa atu faamatalaga e lē faalaua’iteleina e aunoa ma le sailia muamua o sea taitaiga. Pe afai lea ua tatau ai ona faailoa atu ina ia taofia ai se aafiaga e lamatia ai le ola po o se manu’aga matuia ae leai se taimi e sailia ai se taitaiga. O tulaga faapena, e sili atu ai ona taua le tiute o le puipuia o isi nai lo le tiute o le lē faalaua’iteleina. E tatau i taitai ona faafesootai vave loa ia taitai faalemalo.

32.6

O Le Matuia o le Agasala ma Aiaiga Faavae a le Ekalesia

O le matuia o se agasala o se iloiloga taua lea i le filimaotiina po o le fuafuaina o le faatulagaga o le a (1) fesoasoani ai e puipuia isi ma le (2) fesoasoani ai i se tagata ia salamo. Ua fetalai mai le Alii e faapea, Na te “le mafai ona vaai i luga o le agasala ma sina tikeri itiiti o le faatagaina” (Mataupu Faavae ma Feagaiga 1:31; tagai foi i le Mosaea 26:29). E lē tatau i Ana auauna ona lē amana’iaina faamaoniga o agasala matuia.

O agasala matuia o se tausuai tele ma le loto i ai e faasaga i tulafono a le Atua. O loo lisi atu i lalo ia faavasegaga o agasala matuia.

• Amioga Pa’a’ā ma sauaga

• Feusua’iga lē mamā

• Amioga taufaasese

• Soliga o le faatuatuaga

• O nisi o amioga

Pe A Manaomia se Fono o le Tagata o le Ekalesia pe Atonu e Ono Tatau Ai Foi

Ituaiga o Agasala	E Manaomia le Fono o le Tagata o le Ekalesia	E Ono Tatau Ai se Fono o le Tagata o le Ekalesia
Ituaiga o Agasala Amioga Pa’a’ā ma Sauaga	E Manaomia le Fono o le Tagata o le Ekalesia Fasioti tagata Fai’aīga faamalosi Faamaoniaga o le faaoolima faalefeusua’iga Sauaina o le tamaitiiti po o le talavou Amioga saua faatautala e faamalieina ai tuinanau	E Ono Tatau Ai se Fono o le Tagata o le Ekalesia Fuafua e faaoo le oti Sauaga faalefeusua’iga, e aofia ai le faaoolima ma le taufaamata’u (tagai i le 38.6.18 mo le taimi e manaomia ai se fono) Sauaina o se toalua po o se isi tagata matua (tagai i le 38.6.2.4 mo le taimi e manaomia ai se fono)
Ituaiga o Agasala Feusua’iga Lē Mamā	E Manaomia le Fono o le Tagata o le Ekalesia Mata’ifale po o le toe ui i fanau Ponokalafi po o ata mataga o fanau Autaunonofo Amioga faatautala faalefeusua’i e faamalieina ai tuinanau	E Ono Tatau Ai se Fono o le Tagata o le Ekalesia Mulilua, faitaaga, sootaga faalefeusuaiga itupa e tasi, ma isi sootaga feusuai uma i fafo atu o se faaipoipoga faaletulafono i le va o se alii ma se tamaitai, e aofia ai feusuaiga faafesagai i luga o le initoneti po o luga o le telefoni Nonofo faapouliuli, faaipoipoga faalemalo ma le nonofo faaulugalii ae le faaipoipo, ma faaipoipoga o le itupa e tasi Malosi po o le lē pulea o le faaaogaina o ponokalafi ua afua ai se faatauma’oiga tele i se faaipoipoga po o le aiga o se tagata o le Ekalesia.
Ituaiga o Agasala Amioga Taufaasese	E Manaomia le Fono o le Tagata o le Ekalesia Amioga faatautala i mea tautupe, e pei o le taufaasese ma gaoioiga faapena (tagai i le 32.6.3.3 pe afai sa aafia se tagata i le faaaogaina sese o tupe po o meatotino a le Ekalesia)	E Ono Tatau Ai se Fono o le Tagata o le Ekalesia Faomea, talepe fale, gaoi, po o le faaaogaina sese (tagai i le 32.6.3.3 pe afai sa aafia se tagata o le ekalesia i le faaaogaina sese o tupe po o meatotino a le Ekalesia) Tauto pepelo
Ituaiga o Agasala Soliga o le Faatuatuaga	E Manaomia le Fono o le Tagata o le Ekalesia Agasala matuia a o umia se tofiga lauiloa o le Ekalesia	E Ono Tatau Ai se Fono o le Tagata o le Ekalesia Agasala matuia a o umia se tofiga o le pule po o le faatuatuaina i le Ekalesia po o le nuu (tagai i le 32.6.3.3 pe afai sa aafia se tagata i le faaaogaina sese o tupe po o meatotino a le Ekalesia) Agasala matuia ua iloa e le toatele
Ituaiga o Agasala O Nisi o Amioga	E Manaomia le Fono o le Tagata o le Ekalesia Solitulafono sili ona matuia e faamaonia	E Ono Tatau Ai se Fono o le Tagata o le Ekalesia Faapau pepe (sei vagana ua i ai se tuusaunoaga i le 38.6.1 e faatatau i ai) Mamanu o agasala matuia Lafoaia ma le loto i ai o tiute faaleaiga, e aofia ai ma le le totogia o le lagolagoina ma le tausiga o le fanau Faatau atu o fualaau faasaina O isi amioga faasolitulafono matuia

32.6.3

Taimi e Fefautuaa’i ai le Peresitene o le Siteki ma le Au Peresitene o le Eria Pe Ua Tatau Ai se Fono o le Tagata o le Ekalesia po o Isi Faai’uga

O nisi o mataupu e manaomia ai se nofouta ma se taitaiga faaopoopo. Ina ia iloa le auala sili ona lelei e fesoasoani atu ai, e tatau i le peresitene o le siteki ona fefautuaa’i ma le Au Peresitene o le Eria e uiga i tulaga o loo i le vaega lenei.

32.6.3.2

Liliuese

O faafitauli o le liliuese e tele ina i ai se aafiaga i talaatu o tuaoi o se uarota po o le siteki. E manaomia ona vave talanoaina ina ia puipuia ai isi.

E fefautuaa’i le epikopo ma le peresitene o le siteki pe afai na te lagonaina o se faai’uga mo se tagata o le Ekalesia e ono tulai mai ai se liliuese.

E pei ona faaaogaina i i, o le liliuese e faasino i se tagata o le Ekalesia ua auai i soo se tasi o mea nei:

• Faatinoina pea lava pea i le manino ma le loto i ai o le tetee faalaua’itele i le Ekalesia, o ona aoaoga faavae, o ana aiaiga faavae, po o ona taitai

• Faifai pea le a’oa’o atu e fai ma aoaoga faavae o le Ekalesia ia mea e le o se aoaoga faavae o le Ekalesia, ae ua uma ona faasa’oina e le epikopo po o le peresitene o le siteki

• Faaalia o se mamanu o le galue ma le faamoemoe e faavaivaia le faatuatua ma le toaaga o tagata o le Ekalesia

• Faaauau pea ona mulimuli i aoaoga a vaega ua liliuese ae ua uma ona faasa’oina e le epikopo po o le peresitene o le siteki

• Ua aloaia lona auai i se isi lotu ma faalauiloa ana aoaoga

32.6.3.3

Faaaoga Sese o Tupe a le Ekalesia

Afai e faaaoga sese e se tagata o le ekalesia ia tupe a le Ekalesia, pe gaoia meatotino taua a le Ekalesia, e fefautuaa’i le peresitene o le siteki ma le Au Peresitene o le Eria pe ua tatau ai se fono o le tagata o le Ekalesia po o se isi faatinoga.

Filifiliga mai le Tusitaulima Aoao e le o aofia ai faatonuga atoa ma taiala mo le fautuaina o se tagata ua faia se agasala matuia ma, pe a tatau ai, faia se fono o le tagata auai o le ekalesia.

Afai e i ai ni fesili a se epikopo po o se peresitene o le paranesi e uiga i le auala e fesoasoani ai i se tasi ua faia se agasala matuia (e pei ona faauigaina i le 32.6), e tatau ona ia siaki muamua e vaai pe ua faaliliuina le mataupu atoa e 32 o le Tusitaulima Aoao i se gagana e mafai ona ia faaaogaina. Afai e lei faaliliuina, e tatau ona ia faafesootaia vave lona pulefaamalumalu mo se taitaiga.