34.

Kuwarta kag mga Awdit

34.0

Introduksyon

Ang ikapulo kag mga halad nagatugot sa Simbahan nga himuon ang buluhaton sang Ginuo para sa kaluwasan kag pangkahitaasan (tan-awa sa 1.2). Ini nga pondo sagrado. Ginarepresentar sini ang sakripisyo kag pagtuo sang mga miyembro sang Simbahan (tan-awa sa Marcos 12:41–44).

34.2

Pinansyal nga mga Lider sang Ward

34.2.1

Bishopric

Ang bishop may masunod nga mga responsibilidad parte sa kuwarta sang ward. Ginadelegar niya ang iban sining mga buluhaton sa iya mga manuglaygay kag mga klerk.

Ang bishop:

• Nagatudlo kag nagainspirar sa mga miyembro nga magbayad sang kompleto nga ikapulo kag maghatag sang maalwan nga mga halad (tan-awa sa 34.3).

• Nagasiguro nga ang pondo sang ward ginagamit kag ginakwenta sing husto (tan-awa sa 34.5).

• Nagarebyu sang financial statement kada bulan kag ginasiguro nga ang bisan ano nga mga isyu naresolbar gilayon.

• Nagasiguro nga ang mga lider sang organisasyon kag mga klerk nagatuon sang ila responsibilidad nahanungod sa sagrado nga pondo sang Simbahan.

• Nagahanda kag nagadumala sang tuigan nga badyet sang ward (tan-awa sa 34.6).

• Nagapakighambal sa mga miyembro sang ward kada tuig para sa ila tithing declaration.

34.2.2

Mga Ward Clerk

Ginaasayn sang bishop ang ward clerk ukon ang assistant ward clerk para buligan sia sa pagtipig sang pinansyal nga rekord sa ward. Maid-id nga ginasunod sang mga klerk ang napahamtang nga mga polisiya para halungan ang pondo sang Simbahan kag para siguruhon nga ang mga rekord sang Simbahan husto.

Ang klerk may masunod nga mga responsibilidad:

• Ireport kag ideposito ang bisan ano nga kuwarta nga nabaton upod ang isa ka miyembro sang bishopric.

• Rebyuhon ang financial statement kada bulan kag siguruhon nga ang bisan ano nga mga isyu maresolbar gilayon.

• Buligan ang bishopric sa paghimo sang tuigan nga badyet sang ward (tan-awa sa 34.6.1 kag 34.6.2).

• Siguruhon nga ang mga miyembro may access sa ila mga statement of contribution kag buligan sila kon kinahanglan.

Ang mga klerk dapat nagakapot sang Melchizedek Priesthood kag may current temple recommend.

34.3

Mga Kontribusyon

34.3.1

Ikapulo

Ang ikapulo donasyon sang ika-pulo nga bahin sang kita sang isa ka tawo sa Simbahan sang Dios (tan-awa sa Doktrina kag mga Kasugtanan 119:3–4; ang interes ginahangop nga ang buot silingon kita (income)). Ang tanan nga miyembro nga may kita dapat magbayad sang ikapulo.

34.3.1.2

Tithing Declaration

Ang bishop nagapakighambal sa kada miyembro sa katapusan nga mga binulan kada tuig para mabaton ang iya tithing declaration.

Ang tanan nga miyembro ginaagda sa pagpakigkita sa bishop para:

• Ideklarar sa bishop ang ila estado bilang mga nagabayad sang ikapulo.

• Siguruhon nga ang ila mga rekord sang kontribusyon insakto.

Kon posible, dapat nga ara ang tanan nga mga miyembro sang pamilya, pati na ang mga kabataan.

34.3.2

Mga Fast Offering

Ginapaisog sang mga lider sang Simbahan ang mga miyembro nga ipangabuhi ang layi sang puasa. Dala diri ang paghatag sang maalwan nga halad-puasa (tan-awa sa 22.2.2).

Ang mga giya sa paggamit sang halad-puasa ara sa 22.5.2.

34.3.3

Mga Missionary Fund

Ang mga kontribusyon sa ward missionary fund ginagamit una gid para masabat ang kontribusyon nga pangako sang full-time nga mga misyonero sa ward.

Ang mga kontribusyon sa General Missionary Fund ginagamit sang Simbahan para sa kabilogan sini nga pangmisyonaryo nga buluhaton.

34.3.7

Ang mga Kontribusyon Indi Na Mabalik

Kon ang ikapulo kag iban pa nga mga halad ginhatag na sa Simbahan, iya na ini sang Ginuo. Ginkonsagrar na ini sa Iya.

Ginapahibalo sang mga stake president kag bishop ang mga nagahatag sang ikapulo kag mga halad nga ining mga kontribusyon indi na mabalik.

34.4

Pagtipig sang Impormasyon parte sa Ikapulo kag Iban Pa nga mga Halad

Ang balor sang ikapulo kag iban pa nga mga halad nga ginahatag sang nagdonar pribado nga impormasyon. Ang bishop lamang kag ang mga awtorisado sa pagkapot kag pagtan-aw sining mga kontribusyon ang dapat may access sa sining impormasyon.

34.5

Pagdumala sang Pondo sang Simbahan

Ginasiguro sang stake president kag bishop nga ang tanan nga pondo sang Simbahan ginadumalahan sing husto. Ang mga bishopric kag klerk ginapaisog nga rebyuhon ang video nga “Sacred Funds, Sacred Responsibilities” bisan kaisa kada tuig.

34.5.1

Companionship Principle

Ang companionship principle nagapangayo nga duha ka tawo—isa ka miyembro sang bishopric kag isa ka klerk, ukon duha ka miyembro sang bishopric—ang mangin imbolbado sa pagrekord kag pagpanagtag sang pondo sang Simbahan.

Dapat nga protektahan sang mga lider kag indi pag-ipanghatag ang ila mga password (tan-awa sa 33.9.1.1).

34.5.2

Pagbaton sang Ikapulo kag Iban Pa nga mga Halad

Ginhatagan sang Ginuo ang mga bishop sang sagrado nga pagsalig sa pagbaton kag pagkwenta sang mga ikapulo kag iban pa nga halad sang mga Santos (tan-awa sa Doktrina kag mga Kasugtanan 42:30–33; 119). Ang bishop lang kag ang iya mga manuglaygay ang pwede magbaton sang mga ikapulo kag iban pa nga mga halad. Sa bisan ano nga sitwasyon, ang ila mga asawa, iban pa nga miyembro sang ila pamilya, mga klerk ukon iban pa nga miyembro sang ward indi dapat magbaton sining mga kontribusyon.

34.5.3

Pag-usisa kag Pagrekord sang Ikapulo kag Iban Pa nga mga Halad

Ang mga kontribusyon dapat nga maisip kag marekord sa Domingo kon san-o ini nabaton. Isa ka miyembro sang bishopric kag klerk, ukon duha ka miyembro sang bishopric, ang nagabukas sang sobre nga ululupod. Ginasiguro nila nga ang kuwarta nga nasulod pareho sa balor nga ginsulat sa Tithing and Other Offerings form. Ginarekord nila ang kada donasyon sing husto. Kon ang kuwarta kag ang balor nga nasulat lain-lain, ginakontak nila gilayon ang naghatag para maresolbar ang kinalain.

34.5.4

Pagdeposito sang Ikapulo kag Iban Pa nga mga Halad

Ang deposito dapat nga ihanda pagkatapos nga masiguro nga ang mga balor nga narekord pareho sa kuwarta nga nabaton.

Kon may bangko nga madepositohan sing 24-oras, ang miyembro sang bishopric kag isa pa ka nagakapot sang Melchizedek Priesthood ang nagadeposito sang kuwarta sa bangko sa mismo adlaw nga ginbuksan ini kag gin-usisa.

Kon wala sang bangko nga madepositohan sing 24-oras kag sirado ang bangko kon Domingo, nagadesignar ang bishop sang isa ka nagakapot sang Melchizedek Priesthood nga ideposito ini pagkadason nga adlaw nga may bangko. Dapat niya:

• Siguruhon nga ang kuwarta ginahalungan tubtob nga madeposito na ini.

• Kuhaon ang resibo sang deposito nga nagapakita sang petsa kag balor sang gindeposito.

34.5.5

Paghalong sang Pondo sang Simbahan

Ang mga miyembro nga responsabe sa pondo sang Simbahan indi gid magbilin sini sa meetinghouse sa gab-i ukon bayaan ini nga wala natago bisan ano nga oras, pareho kon may mga miting ukon aktibidades.

34.5.7

Pagdumala sang mga Bayad sang Stake kag Ward

Wala sang gasto sang stake ukon ward ang pwede bayaran nga wala sang pahanugot sang presiding officer.

Duha ka awtorisado nga mga lider ang kinahanglan mag-apruba sang tagsa ka bayad. Isa sa ila kinahanglan miyembro sang stake presidency ukon bishopric. Bisan nga pwede ang mga manuglaygay magpahanugot sang bayad, kinahanglan rebyuhon sang stake president ukon bishop ang tagsa ka ginbayad. Indi dapat mag-apruba ang mga lider sang bayad sa ila kaugalingon.

Ang sinulat nga pahanugot sang stake president ginakinahanglan antes makagamit ang bishop sang halad-puasa ukon mag-apruba sang order sang bishop para sa iya kaugalingon ukon sa iya pamilya. Ang sinulat nga pahanugot halin sa miyembro sang Area Presidency ginakinahanglan antes makagamit ang bishop sang halad-puasa ukon mag-apruba sang order sang bishop para sa stake president ukon sa iya pamilya. Tan-awa sa 22.5.1.2 para sa pagsulundan.

Ang miyembro nga nagapangayo sang reimbursement nagahatag sang pisikal ukon digital nga kopya sang bisan ano nga resibo ukon invoice. Ginasulat man niya ang katuyuan, presyo, kag petsa sang pagbakal.

Kon ginhatag una ang kuwarta, nagapasa ang miyembro sang payment request form, nga nakalista ang katuyuan, presyo, kag petsa. Pagkatapos nga mabayran ang gingasto, ang miyembro dayon (1) mahatag sang mga resibo ukon mga invoice sa pondo nga gingasto kag (2) mag-uli sang wala magasto nga pondo. Ang gin-uli nga pondo dapat ideposito liwat.

34.5.9

Pagtipig sang Pinansyal nga mga Rekord

Ang kada stake kag ward dapat magtipig sang pinakaulihi kag husto nga pinansyal nga mga rekord.

Para sa impormasyon parte sa paggamit kag pagtago sang mga rekord kag report, ang mga klerk dapat nga magsunod sa mga instruksyon halin sa headquarters sang Simbahan ukon sang area office. Ang pinansyal nga mga rekord dapat nga taguon sa indi magnubo tatlo ka tuig dugang sa karon nga tuig.

34.6

Badyet kag mga Galastuhan

Ang budget allowance program nagatigana sang pangkabilogan nga pondo sang Simbahan para ibayad sa mga aktibidades kag mga programa sang mga stake kag ward.

Kalabanan sa mga aktibidades dapat simple lang kag diutay lang ukon wala sing gasto.

34.6.1

Mga Badyet sang Stake kag Ward

Ang tagsa ka stake kag ward nagahimo kag nagagiho sa sulod sang tuigan nga badyet. Ang stake president ang nagadumala sang badyet sa stake, kag ang bishop ang nagadumala sang badyet sa ward.

Ang mga pagsulundan nalista sa idalom:

• Rebyuhon ang mga balor nga gingasto sang nagligad nga tuig para masiguro nga mabinagbinag ang sulit-sulit nga mga ginagastuhan.

• Hambalon ang mga organisasyon nga bantaon ang ila kinahanglan nga badyet upod ang mga detalye.

• Maghimo sang badyet gamit ang aprubado nga mga pamaagi.

34.6.2

Budget Allowance

34.6.2.1

Pagbahin-bahin sang Badyet

Ang pondo sa badyet ginahatag kada quarter base sa attendance sa masunod nga mga kategorya:

• Sakramento nga miting

• Young men

• Young women

• Kabataan sa Primary nga nagaedad 7–10 katuig

• Mga young single adult

Importante nga mareport ang attendance sing husto kag sa insakto nga tion (tan-awa sa 33.5.1.1).

34.6.2.2

Husto nga Paggamit sang Badyet

Ginasiguro sang mga stake president kag bishop nga ang budget allowance ginagamit sing maalamon.

Ang pondo sa badyet sang stake kag ward dapat gamiton sa pagbayad sang tanan nga aktibidades, programa, mga manwal, kag mga suplay.

34.6.2.3

Sobra nga Badyet

Ang sobra sa pondo sang budget allowance indi dapat paggastuhon. Ang sobra nga pondo sa ward dapat ibalik sa stake.

34.7

Mga Awdit

34.7.1

Stake Audit Committee

Ang stake president nagabutang sang stake audit committee. Ginasiguro sini nga komite nga ang kuwarta sa stake kag ward ginagamit suno sa polisiya sang Simbahan.

34.7.3

Ang Pinansyal nga Awdit

Ang mga stake auditor naga-awdit sang pinansyal nga mga rekord sang stake, mga ward, kag mga family history center kaduha kada tuig.

Ang presiding officer sang yunit kag ang klerk nga naasayn sa pinansyal nga mga butang dapat ara para magsabat sang mga pamangkot sa oras sang pag-awdit.

34.7.5

Pagkadula, Pagkawat, Pagpalapaw, ukon Indi Husto nga Paggamit sang Pondo sang Simbahan

Ang stake president ukon chairman sang stake audit committee dapat pahibal-on dayon kon:

• Ang pondo sang Simbahan nadula ukon ginkawat.

• Ginpalapaw sang isa ka lider ukon wala gingamit sang husto ang pondo sang Simbahan.