35.

Panangaywan ken Panangusar kadagiti Balay a Pagmimitingan

35.1

Panggep

Mangipaay ti Simbaan kadagiti balay a pagmimitingan tapno ti amin a sumrek mabalinda a:

• Makaaramid ken makapagpabaro kadagiti katulagan babaen kadagiti sagrado nga ordinansa (kitaen iti Doktrina ken Katulagan 20:75; 59:9–12).

• Makapagmimiting a sangkamaysa (kitaen iti 3 Nephi 18:22–23).

• Makapagdaydayaw ken makapagkararag a sangkamaysa (kitaen iti Mosiah 18:25; Moroni 6:9).

• Makapagsisinnuro ken makapagsisinnerbi iti tunggal maysa (kitaen iti Moroni 6:4–5).

• Makiraman kadagiti dadduma pay a naaprobaran a pangusaran kas nailadawan iti daytoy a kapitulo.

35.2

Dagiti Akem ken Pagrebbengan

35.2.2

Manedyer ti Pasilidad iti Simbaan [Church Facilities Manager]

Tulongan ti maysa a manedyer ti pasilidad nga empleado ti Simbaan ti tunggal stake a mangipagna [operate] kadagiti balay a pagmimitingan. Yurnosna dagiti dadakkel a mapatarimaan, nauneg a panagdalus, ken kadawyan a panangmentiner iti pasdek.

Kas kasapulan, tumulong ti manedyer ti pasilidad a mangiwanwan kadagiti pannakabagi ti pasdek [building representative] iti stake ken ward no kasano ti mangdalus iti pasdek ken mangitrabaho ti dadduma pay nga aramiden iti lugar. Isu ti mangted kadagiti instruksion, materiales, ken alikamen.

Mabalinna pay nga irebyu dagiti gastos iti pasdek kadagiti bishop.

35.2.7

Bishopric

Isuro ti bishopric (wenno ti pannakabagi ti pasdek ti ward) dagiti miembro no kasano nga usaren, aywanan, ken saluadan ti pasdek. Ibunong pay ti bishopric dagiti tulbek ti pasdek kadagiti lider ti ward.

Siguraduenda a natalged ti pannakaisayangkat dagiti aktibidad iti pasdek ken iti paraangan (kitaen iti 20.7).

Makiumanda iti manedyer ti pasilidad ti Simbaan maipapan kadagiti kasapulan iti pannakamentiner ken pannakaipagnana. Mabalinda pay nga irebyu dagiti mainaig a gastos iti manedyer ti pasilidad.

35.2.9

Pannakabagi ti Pasdek iti Ward

Ikeddeng ti bishopric no umawag iti pannakabagi ti pasdek iti ward. No ikeddengda nga ited daytoy a calling, mabalin nga awagan ti bishopric ti maysa a nataengan a lalaki wenno babai a miembro. No saan a maawagan ti maysa a pannakabagi ti pasdek iti ward, mabalin nga idutok ti bishop daytoy a pagrebbengan iti maysa kadagiti mamagbagana, iti klerk ti ward wenno iti katulongan a klerk ti ward, wenno iti executive secretary.

Ti pannakabagi ti pasdek iti ward ti mangurnos kadagiti miembro ken volunteer a mangdalus ken mangmentiner iti pasdek. Isurona kadakuada no kasano nga aramiden ti tunggal trabaho babaen kadagiti magun-odan a suplay ken alikamen.

35.3

Panangipaay kadagiti Balay a Pagmimitingan

Agduduma ti kadakkel ken kita dagiti balay a pagmimitingan maibatay kadagiti lokal a kasapulan ken kasasaad. Ti balay a pagmimitingan ket mabalin a maysa a pasdek a binangon wenno ginatang ti Simbaan, pagtaengan ti miembro, maysa a lokal nga eskuelaan wenno sentro ti komunidad, maysa a maabangan a pasdek, wenno sabali pay nga inaprobaran a pagpilian.

Ikagkagumaan dagiti lider ti lugar ken lokal a naan-anay nga usaren dagiti agdama a balay a pagmimitingan ken agbalinda a masirib a mangirekomenda iti nayon pay a space wenno pasdek.

35.4

Panangmentiner kadagiti Balay a Pagmimitingan

35.4.1

Panangdalus ken Panangmentiner kadagiti Balay a Pagmimitingan

Dagiti lokal a lider ken miembro, agraman dagiti agtutubo, ket addaan iti pagrebbengan a tumulong a mangpatalinaed a nadalus ken nasayaat ti kasasaad ti tunggal pasdek.

Saan koma a pakadagsenan dagiti miembro ti eskediul ti panagdalus. Kas pagarigan, no narigat ti panagbiahe a mapan iti pasdek, mabalin nga agdalus dagiti miembro kas paset dagiti linawas a pasken no addadan iti pasdek.

35.4.2

Panagkiddaw iti Panagtarimaan

Mabalin nga ireport dagiti miembro ti konseho ti ward ken stake dagiti kasapulan para iti pannakatarimaan ti pasdek. Maaramid daytoy babaen ti panangusar iti Facility Issue Reporting (FIR) tool.

35.4.5

Kinatalged ken Seguridad

Nasken kadagiti lider ken miembro a:

• Pagtalinaedenda a nalawag dagiti pasilio, agdan, pagruaran, ken utility room para iti natalged nga iseserrek ken iruruar.

• Saanda nga agusar wenno mangidulin kadagiti napeggad wenno mauram a materiales kadagiti pasdek.

• Mangipasdek ken surotenda dagiti pamay-an iti building lockup.

• Aramidenda a natalged dagiti alikamen a kukua ti Simbaan manipud iti panagtakaw.

• Ammoda no kasano nga iddepen dagiti utility kas iti danum, koriente, ken gas wenno gasolina.

No kasapulan, ti manedyer ti pasilidad ti makaipaay iti mapa a mangipakita kadagiti fire extinguisher, first aid kits, ken dagiti lokasion a pangserra kadagiti utility. Adda a magun-od ti ad-adu pay nga impormasion maipapan iti kinatalged iti “Security and Lockup Procedures” iti “Maintaining Meetinghouses” (Meetinghouse Facilities Guide). Kitaen met iti 20.7.

35.5

Dagiti Annuroten iti Panangusar iti Sanikua ti Simbaan

35.5.1

Aramid iti Arte

Nasken a mangyanninaw dagiti balay a pagmimitingan iti maysa a kababalin a panagraem ken ni Jesucristo ken mangipaneknekda iti pammati dagiti miembro Kenkuana. Nasken a maikabil ti arte a mangiladawan ken Jesucristo kadagiti lugar ti foyer ti balay a pagmimitingan tapno makatulong a mangipakita iti daytoy kangrunaan a pammati.

35.5.2

Panangusar iti Pasdek a Saan a Maipalubos

35.5.2.1

Dagiti Pangusaran a Mainaig iti Komersio

Mabalin a saan a mausar ti sanikua ti Simbaan para iti panggep a mainaig iti komersio. Kas pagarigan, mabalin a saan a mausar daytoy a mangsuporta iti ania man a kita ti negosio. Ti kasta a pannakausar ket saan a maitunos kadagiti panggep dagiti sanikua ti Simbaan. Mabalin pay a maikontra daytoy kadagiti lokal wenno nasional a linteg a mabalin a mangipalubos iti eksempsion iti buis iti sanikua ti Simbaan.

Panangsangaili kadagiti ispiker wenno instruktor a mangrekrut kadagiti makipaset, agkiddaw kadagiti kustomer wenno kliente, wenno mabayadanda bayat ti panangtedda kadagiti seminar, dagiti leksion (malaksid iti pribado a panangisuro iti piano wenno organo; kitaen iti 19.7.2), dagiti klase ti panagehersisio, ken dadduma pay nga aktibidad ket saan a maanamongan.

35.5.2.2

Dagiti Panggep a Mainaig iti Politika

Mabalin a saan a mausar ti sanikua ti Simbaan para iti panggep a mainaig iti politika. Karaman kadagitoy ti panangangay kadagiti miting wenno kampania a mainaig iti politika. Ti Simbaan ket neutral iti politika (kitaen iti 38.8.30)

35.5.2.3

Dadduma pay a Pangusaran

Dagiti dadduma pay a pangusaran iti sanikua ti Simbaan a saan a maipalubos ket iramanna dagiti:

• Panangangay kadagiti nabukel a panagsanay wenno dadduma pay a pasken a saan nga isponsoran ti Simbaan. Mabalin nga eksepsion dagiti koro ti komunidad ken dagiti sibil a kallaysa (kitaen iti 38.3.4 maipapan kadagiti kallaysa a sibil).

• Panangipalubos iti agpatpatnag a panagdagus (malaksid kadagiti saan a ninamnama a pasamak; kitaen iti 35.5.4).

• Panagkamping wenno dadduma pay nga aktibidad a pakairamanan ti pannaturog iti agpatnag.

Gagangay a saan a maanamongan dagiti sumaganad a pangusaran. Kontaken dagiti lokal a lider ti facilities manager no mariknada a kasapulan ti eksepsion.

• Panagabang wenno panagupa kadagiti pasdek ken sanikua ti Simbaan.

• Panangusar kadagiti sanikua para iti panagrehistro dagiti botante iti politika wenno kas lugar a pagbutosan; mabalin a maaramid ti eksepsion iti kiddaw dagiti opisial ti gobierno no awan ti nainkalintegan nga alternatibo ken ti pasken ket saan a mangdadael iti imahe wenno neutral a posision ti Simbaan (kitaen iti 38.8.30)

35.5.4

Dagiti Saan a Ninamnama a Pasamak wenno Emerhensia

Bayat ti emerhensia, ikeddeng ti stake president no mangangay kadagiti miting iti ward ken stake. Mabalinna pay nga ipalubos dagiti pasdek ken sanikua ti Simbaan nga usaren dagiti ahensia a mangsaranay iti didigra ken para kadagiti mainaig a panagkagumaan.

35.5.10

Dagiti Naala a Ladawan ken Video Recording bayat ti Miting ti Sakramento

Sagrado dagiti miting ti sakramento. Gapu iti daytoy, saan a maipalubos ti panagretrato wenno panagrekord kadagiti miting ti sakramento.

Para iti impormasion maipapan iti panagbrodkas wenno panag-stream kadagiti miting ti sakramento ken dadduma pay a miting, kitaen iti 29.7.