“34. Dagiti Pakaseknan iti Kuarta ken Awdit,” Dagiti Napili manipud iti Sapasap a Handbook (2023).
“34. Dagiti Pakaseknan iti Kuarta ken Awdit,” Dagiti Napili manipud iti Sapasap a Handbook
34.
Dagiti Pakaseknan iti Kuarta ken Awdit
34.0
Pakauna
Ti apagkapullo ken daton ti mangipalubos iti Simbaan a mangipatungpal iti aramid ti Apo iti pannakaisalakan ken pannakaitan-ok (kitaen iti 1.2). Sagrado dagitoy a pondo. Isuda ti mangibagi iti sakripisio ken pammati dagiti miembro ti Simbaan (kitaen iti Marcos 12:41–44).
34.2
Panangidaulo iti Pakaseknan iti Kuarta iti Ward
34.2.1
Bishopric
Addaan ti bishop kadagiti sumaganad a pagrebbengan para kadagiti pakaseknan iti kuarta iti ward. Ipakumitna ti sumagmamano iti daytoy nga aramid kadagiti mamagbagana ken kadagiti klerk.
Ti Bishop:
-
Mangisuro ken mangparegta kadagiti miembro nga agbayad iti naan-anay nga apagkapullo ken nawadwad a daton (kitaen iti 34.3).
-
Mangsigurado nga umno a matengngel ken makuenta dagiti pondo ti ward (kitaen iti 34.5).
-
Mangrebyu iti financial statement iti kada bulan ken mangsigurado a marisut a dagus dagiti ania man nga isyu.
-
Mangsigurado a masursuro dagiti lider ti organisasion ken clerk ti pagrebbenganda kadagiti sagrado a pondo ti Simbaan.
-
Mangisagana ken mangimaton iti tinawen a badyet ti ward (kitaen iti 34.6).
-
Tinawen a makipagkita kadagiti miembro ti ward tapno umawat iti deklarasionda iti apagkapullo.
34.2.2
Dagiti Clerk iti Ward
Dutokan ti bishop ti clerk ti ward wenno ti assistant clerk ti ward tapno tumulong iti panangidulin iti rekord ti pakaseknan iti kuarta ti ward. Siaannad a suroten dagiti clerk dagiti agdama nga annuroten tapno masalakniban dagiti pondo ti Simbaan ken siguraduenda nga umiso dagiti rekord ti Simbaan.
Addaan pay ti clerk kadagiti sumaganad a pagrebbengan:
-
Mangirekord ken mangideposito iti ania man a pondo a naawat a kaduana ti maysa a miembro ti bishopric.
-
Mangrebyu iti financial statement iti kada bulan ken mangsigurado a marisut a dagus dagiti ania man nga isyu.
-
Mangtulong iti bishopric a mangisagana iti tinawen a badyet ti ward (kitaen iti 34.6.1 ken 34.6.2).
-
Siguraduen nga adda access dagiti miembro kadagiti statement of contributions-da ken tumulong no kasapulan.
Nasken nga addaan dagiti clerk iti Melchizedek Priesthood ken addaanda iti agdama a temple recommend.
34.3
Dagiti Kontribusion
34.3.1
Apagkapullo
Ti apagkapullo ket ti panangidonar iti maysa nga apagkapullo ti matgedan ti maysa a tao iti Simbaan ti Dios (kitaen iti Doktrina ken Katulagan 119:3–4; ti interes ket maawatan a kaipapananna ti matgedan). Nasken nga agbayad iti apagkapullo ti amin a miembro nga addaan iti matgedan.
34.3.1.2
Deklarasion iti Apagkapullo
Makipagkita ti bishop iti tunggal miembro bayat ti maudi a sumagmamano a bulan ti tunggal tawen tapno umawat iti deklarasionna iti apagkapullo.
Maawis ti amin a miembro a makipagkita iti bishop tapno:
-
Mangideklara iti bishop ti kasasaadda kas agbaybayad iti apagkapullo.
-
Mangsigurado nga umiso dagiti rekord ti kontribusionda.
No mabalin, aggigiddan koma a dumar-ay ti amin a miembro ti maysa a pamilia, agraman dagiti ubbing.
34.3.2
Dagiti Daton iti Panagayuno
Allukoyen dagiti lider ti Simbaan dagiti miembro nga agbiag iti linteg ti panagayuno. Iraman daytoy ti panangted iti nawadwad a daton iti panagayuno (kitaen iti 22.2.2).
Maipaay dagiti pangiwanwan para iti panangusar kadagiti pondo iti daton iti panagayuno iti 22.5.2.
34.3.3
Dagiti Pondo ti Misionario
Mausar dagiti kontribusion iti pondo ti misionario ti ward a kangrunaan a mangtungpal kadagiti panagkumit iti kontribusion dagiti full-time a misionario manipud iti ward.
Usaren ti Simbaan dagiti kontribusion iti General Missionary Fund iti pakabuklan dagiti panagkagumaanna iti misionario.
34.3.7
Saan a Maisubli dagiti Kontribusion
No maited dagiti apagkapullo ken dadduma pay a daton iti Simbaan, kukua dagitoy ti Apo. Naikonsagrarda Kenkuana.
Ipakaammo dagiti stake president ken bishop kadagiti agkontribusion iti apagkapullo ken daton a saan a maisubli dagitoy a kontribusion.
34.4
Kumpidensialidad ti Apagkapullo ken Dadduma Pay a Daton
Kumpidensial ti gatad ti apagkapullo ken dadduma pay a daton a binayadan ti maysa a nagdonar. Ti laeng bishop ken dagiti napusgan a mangtengngel wenno mangkita kadagitoy a kontribusion ti addaan iti access iti daytoy nga impormasion.
34.5
Panangtengngel kadagiti Pondo ti Simbaan
Siguraduen ti stake president ken bishop a siuumno a matengngel ti amin a pondo ti Simbaan. Maallukoy dagiti bishopric ken clerk a mangrebyu iti video “Sacred Funds, Sacred Responsibilities” iti uray maminsan laeng ti makatawen.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F1f%2F68%2F1f68adec25e13e604ae4234089bcf59f283e97be%2F1f68adec25e13e604ae4234089bcf59f283e97be.jpeg/full/!250,/0/default)
34.5.1
Pagbatayan ti Panagkadua
Agkasapulan iti prinsipio ti panagkadua ti dua a tao—maysa a miembro ti bishopric ken maysa a clerk, wenno dua a miembro ti bishopric—a siaaktibo a makiraman no agirekrekord ken agiwarwaras kadagiti pondo ti Simbaan.
Nasken a salakniban dagiti lider ken saanda iti kaano man nga ibinglay dagiti password-da (kitaen iti 33.9.1.1).
34.5.2
Panangawat iti Apagkapullo ken Dadduma Pay a Daton
Inted ti Apo kadagiti bishop ti sagrado a panagtalek iti panangawat ken panangkuenta kadagiti apagkapullo ken dadduma pay a daton dagiti Santo (kitaen iti Doktrina ken Katulagan 42:30–33; 119). Ti laeng bishop ken dagiti mamagbagana ti mabalin nga umawat kadagiti apagkapullo ken dadduma pay a daton. Iti ania man a kasasaad, nasken a saan nga umawat dagiti assawada, dadduma pay a miembro ti pamiliada, clerk, wenno dadduma pay a miembro ti ward kadagitoy a kontribusion.
34.5.3
Panangpaneknek ken Panangirekord iti Apagkapullo ken Dadduma Pay a Daton
Nasken a mapaneknekan ken mairekord dagiti kontribusion iti Domingo a pannakaawatda. Maysa a miembro ti bishopric ken maysa a clerk, wenno dua a miembro ti bishopric, ti aggigiddan a manglukat iti tunggal sobre. Paneknekanda a dagiti nairaman a pondo ket maipada iti gatad a naisurat iti porma ti Apagkapullo ken Dadduma Pay a Daton. Siuumno nga irekordda ti tunggal donasion. No saan nga agpada ti pondo ken ti naisurat a gatad, kontakenda ti nagdonar iti kabiitan a panawen tapno marisut ti saan a panagtunos.
34.5.4
Panangideposito iti Apagkapullo ken Dadduma Pay a Daton
Nasken a maisagana ti deposito kalpasan a masigurado a maitunos dagiti nairekord a gatad kadagiti naawat a pondo.
Iti lugar nga adda a magun-od ti 24-hour bank depository, ideposito ti miembro ti bishopric ken ti sabali pay a Melchizedek Priesthood holder ti pondo iti banko iti isu met laeng nga aldaw a pannakalukat ken pannakapaneknek dagiti pondo.
Iti lugar nga awan ti magun-od a 24-oras a deposito ti banko ken agserra ti banko iti Domingo, mangituding ti bishop iti maysa a Melchizedek Priesthood holder nga agdeposito iti sumaruno nga aldaw. Nasken a:
-
Siguraduenna a maidulin a natalged dagiti pondo agingga a maidepositoda.
-
Manggun-od iti resibo ti deposito a mangipakpakita iti petsa ken ti gatad ti naideposito.
34.5.5
Panangsaluad kadagiti Pondo ti Simbaan
Dagiti miembro a responsable kadagiti pondo ti Simbaan ket dida koma iti kaano man nga ibati dagitoy iti balay a pagmimitingan iti agpatnag wenno ibati dagitoy nga awan agbantay iti ania man nga oras, kas koma no kabayatan dagiti miting ken aktibidad.
34.5.7
Panangtarawidwid kadagiti Baybayadan ti Stake ken Ward
Awan ti mabalin a maaramid wenno mabayadan a gastos iti stake wenno ward no awan ti awtorisasion ti mangimatmaton a dadaulo [presiding officer].
Masapul nga aprobaran ti dua nga awtorisado a lider ti tunggal bayad. Nasken a maysa kadakuada ti miembro ti panguluen ti stake wenno bishopric. Nupay mabalin nga awtorisado dagiti mamagbaga a mangaprobar kadagiti bayad, nasken nga irebyu ti stake president wenno bishop ti tunggal bayad. Saan koma nga aprobaran dagiti lider ti maysa a bayad iti bagbagida.
Masapul ti naisurat a panangaprobar ti stake president sakbay a mabalin nga usaren ti bishop dagiti daton iti panagayuno wenno aprobaran ti order ti bishop para iti bagina wenno iti pamiliana. Masapul ti naisurat a panangaprobar ti maysa a miembro ti Panguluen ti Area sakbay a mabalin nga usaren ti bishop dagiti daton iti panagayuno wenno aprobaran ti order ti bishop para iti stake president wenno iti pamiliana. Kitaen iti 22.5.1.2 para kadagiti pangiwanwan.
Ti maysa a miembro nga agkidkiddaw iti pannakaisubli [reimbursement] ket mangipaay iti pisikal wenno elektronik a kopia dagiti ania man a resibo wenno invoice. Iramanna pay ti panggep, gatad, ken petsa ti panaggatang.
No nasapsapa dagiti pondo, mangisumite ti miembro iti porma ti panagkiddaw iti panagbayad, a mangdakdakamat iti panggep, gatad, ken petsa. Kalpasan a nabayadan ti gastos, ti miembro kalpasanna (1) mangipaay kadagiti resibo wenno invoice para kadagiti nagastos a pondo ken (2) mangisubli iti ania man a saan a nagastos a pondo. Masapul a maideposito manen dagiti naisubli a pondo.
34.5.9
Panangidulin kadagiti Rekord iti Pakaseknan iti Kuarta
Nasken a pagtalinaeden ti tunggal stake ken ward dagiti agdama, umiso a rekord iti pakaseknan iti kuarta.
Para iti impormasion maipapan iti panagusar ken panamagtalinaed kadagiti rekord ken report, nasken nga agibasar dagiti clerk kadagiti instruksion manipud kadagiti headquarter ti Simbaan wenno iti opisina ti area. Maidulin dagiti rekord iti pakaseknan iti kuarta iti uneg ti uray tallo laeng a tawen agraman ti agdama a tawen.
34.6
Badyet ken Gastos
Mangipaay ti budget allowance program iti sapasap a pondo ti Simbaan a pangbayad kadagiti aktibidad ken programa dagiti stake ken ward.
Nasken a simple ti kaaduan nga aktibidad ken bassit wenno awan ti magastos.
34.6.1
Dagiti Badyet ti Stake ken Ward
Isagana ken imatonan ti tunggal stake ken ward ti tinawen a badyet. Ti stake president ti mangimaton iti badyet ti stake, ken ti bishop ti mangimaton iti badyet ti ward.
Nailista iti baba dagiti pangiwanwan:
-
Irebyu dagiti gatad a nagastos bayat ti napalabas a tawen tapno masigurado a maibilang dagiti maulit-ulit a gastos.
-
Idawat kadagiti organisasion a detaliado a mangpattapatta kadagiti kasapulanda iti badyet.
-
Pagtitiponen ti badyet babaen ti panangusar kadagiti naaprobaran nga aramid iti panagbadyet.
34.6.2
Alawans ti Badyet [Budget Allowance]
34.6.2.1
Alokasion ti Badyet [Allocation of Budget]
Mailatang dagiti pondo ti badyet iti tunggal tallo a bulan maibatay iti attendance kadagiti sumaganad a kategoria:
-
Miting iti sakramento
-
Agtutubo a lalllaki
-
Agtutubo a babbai
-
Ubbing iti Primary agtawen iti 7–10
-
Dagiti young single adult
Napateg a siuumno nga ireport ti attendance ken iti husto nga oras (kitaen iti 33.5.1.1).
34.6.2.2
Umno a Pannakausar ti Badyet
Siguraduen dagiti stake president ken bishop a mabusbos a nainsiriban dagiti pondo ti badyet alawans.
Nasken a mausar dagiti pondo ti badyet ti stake ken ward a mangbayad para iti amin nga aktibidad, programa, manual, ken suplay.
34.6.2.3
Sobra a Badyet [Excess Budget]
Saan koma a mabusbos dagiti sobra a pondo ti badyet alawans. Maisubli koma iti stake dagiti sobra a pondo ti ward.
34.7
Dagiti Awdit
34.7.1
Komite iti Panagawdit ti Stake
Ti stake president ti mangdutok iti audit committee iti stake. Siguraduen daytoy a komite a matengngel ti pakaseknan iti kuarta ti stake ken ward mayannurot iti annuroten ti Simbaan.
34.7.3
Ti Panagawdit iti Pakaseknan iti Kuarta
Agawdit dagiti auditor ti stake kadagiti rekord iti pakaseknan iti kuarta ti stake, dagiti ward, ken dagiti family history center iti mamindua ti makatawen.
Ti mangimatmaton a dadaulo [presiding officer] ken ti clerk a naidutok iti pakaseknan iti kuarta ket addada a mangsungbat kadagiti saludsod kabayatan dagiti panagawdit.
34.7.5
Pannakapukaw, Panagtakaw, Panagdispalko iti Kuarta, wenno Saan nga Umisu a Pannakausar dagiti Pondo ti Simbaan
Nasken a mapakaammuan a dagus ti stake president wenno chairman ti audit committee ti stake no:
-
Napukaw wenno natakaw dagiti pondo ti Simbaan.
-
Maysa a lider ti nagdispalko wenno saan nga umisu a nangbusbos kadagiti pondo ti Simbaan.