“35. ການດູແລ ແລະ ການໃຊ້ອາຄານປະຊຸມ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“35. ການດູແລ ແລະ ການໃຊ້ອາຄານປະຊຸມ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
35.
ການດູແລ ແລະ ການໃຊ້ອາຄານປະຊຸມ
35.1
ຈຸດປະສົງ
ສາດສະໜາຈັກຈັດຫາອາຄານປະຊຸມໃຫ້ເພື່ອວ່າທຸກຄົນທີ່ເຂົ້າໄປໃນນັ້ນຈະສາມາດ:
-
ເຮັດ ແລະ ຮັກສາພັນທະສັນຍາຜ່ານທາງພິທີການສັກສິດ (ເບິ່ງ ຄຳສອນ ແລະ ພັນທະສັນຍາ 20:75; 59:9–12).
-
ພົບປະນຳກັນ (ເບິ່ງ 3 ນີໄຟ 18:22–23).
-
ນະມັດສະການ ແລະ ອະທິຖານນຳກັນ (ເບິ່ງ ໂມໄຊຢາ 18:25; ໂມໂຣໄນ 6:9).
-
ສິດສອນ ແລະ ປະຕິບັດສາດສະໜາກິດຕໍ່ກັນແລະກັນ (ເບິ່ງ ໂມໂຣໄນ 6:4–5).
-
ມີສ່ວນຮ່ວມໃນການໃຊ້ທາງອື່ນທີ່ອະນຸມັດຕາມທີ່ບັນຍາຍໄວ້ໃນບົດນີ້.
35.2
ບົດບາດ ແລະ ໜ້າທີ່ຮັບຜິດຊອບ
35.2.2
ຜູ້ຈັດການສະຖານທີ່ຂອງສາດສະໜາຈັກ
ຜູ້ຈັດການສະຖານທີ່ ທີ່ສາດສະໜາຈັກວ່າຈ້າງ ຊ່ວຍເຫລືອແຕ່ລະສະເຕກດຳເນີນການເລື່ອງອາຄານປະຊຸມ. ລາວຈັດການເລື່ອງການສ້ອມແປງຄັ້ງໃຫຍ່, ການທຳຄວາມສະອາດ, ແລະ ການບຳລຸງຮັກສາອາຄານຕາມປົກກະຕິ.
ເມື່ອຈຳເປັນ, ຜູ້ຈັດການສະຖານທີ່ຊ່ວຍແນະນຳຕົວແທນອາຄານສະເຕກ ແລະ ຫວອດໃຫ້ຮູ້ວິທີທຳຄວາມສະອາດອາຄານ ແລະ ເຮັດວຽກງານອື່ນໃນທ້ອງຖິ່ນ. ລາວໃຫ້ຄຳແນະນຳ, ຈັດຫາວັດສະດຸ, ແລະ ອຸປະກອນ.
ລາວອາດທົບທວນຄ່າໃຊ້ຈ່າຍຂອງອາຄານກັບຝ່າຍອະທິການ.
35.2.7
ຝ່າຍອະທິການ
ຝ່າຍອະທິການ (ຫລື ຕົວແທນອາຄານຫວອດ) ສິດສອນສະມາຊິກໃຫ້ຮູ້ວິທີໃຊ້, ດູແລ, ແລະ ເຮັດໃຫ້ອາຄານປອດໄພ. ຝ່າຍອະທິການກໍຍັງແຈກຢາຍກະແຈອາຄານໃຫ້ຜູ້ນຳຫວອດນຳອີກ.
ພວກເພິ່ນຕ້ອງແນ່ໃຈວ່າກິດຈະກຳໃນອາຄານ ແລະ ໃນບໍລິເວນດຳເນີນຢ່າງປອດໄພ (ເບິ່ງ 20.7).
ພວກເພິ່ນສື່ສານກັບຜູ້ຈັດການສະຖານທີ່ຂອງສາດສະໜາຈັກກ່ຽວກັບຄວາມຈຳເປັນຕ້ອງບຳລຸງຮັກສາ ແລະ ການດຳເນີນການ. ພວກເພິ່ນອາດຍັງຕ້ອງທົບທວນຄ່າໃຊ້ຈ່າຍທີ່ກ່ຽວຂ້ອງກັບຜູ້ຈັດການສະຖານທີ່ນຳອີກ.
35.2.9
ຕົວແທນອາຄານຫວອດ
ຝ່າຍອະທິການພິຈາລະນາວ່າຈະເອີ້ນໃຜຜູ້ໜຶ່ງໃຫ້ເປັນຕົວແທນອາຄານຫວອດຫລືບໍ່. ຖ້າຫາກພວກເພິ່ນຕັດສິນໃຈມອບການເອີ້ນນີ້, ຝ່າຍອະທິການອາດເອີ້ນສະມາຊິກຜູ້ຊາຍ ຫລື ຜູ້ຍິງທີ່ເປັນຜູ້ໃຫຍ່ຄົນໜຶ່ງ. ຖ້າຫາກຕົວແທນອາຄານບໍ່ໄດ້ຖືກເອີ້ນ, ອະທິການອາດມອບໝາຍໜ້າທີ່ຮັບຜິດຊອບນີ້ໃຫ້ທີ່ປຶກສາຄົນໜຶ່ງຂອງເພິ່ນ, ໃຫ້ສະໝຽນຫວອດ ຫລື ຜູ້ຊ່ວຍສະໝຽນຫວອດ, ຫລື ເລຂານຸການສູງສຸດ.
ຕົວແທນອາຄານຫວອດຈັດກຸ່ມສະມາຊິກ ແລະ ຜູ້ອາສາສະໝັກ ເພື່ອທຳຄວາມສະອາດ ແລະ ບຳລຸງຮັກສາອາຄານ. ລາວສິດສອນເຂົາເຈົ້າໃຫ້ຮູ້ວິທີເຮັດວຽກແຕ່ລະຢ່າງກັບເຄື່ອງໃຊ້ ແລະ ອຸປະກອນທີ່ມີໃຫ້.
35.3
ການຈັດຫາອາຄານປະຊຸມ
ອາຄານປະຊຸມຕ່າງໆມີຫລາຍຂະໜາດ ແລະ ຫລາຍແບບອີງຕາມຄວາມຕ້ອງການໃນທ້ອງຖິ່ນ ແລະ ສະພາບການ. ອາຄານປະຊຸມອາດເປັນຕຶກທີ່ສາດສະໜາຈັກສ້າງຂຶ້ນ ຫລື ຊື້ເອົາ, ເປັນເຮືອນຂອງສະມາຊິກ, ເປັນໂຮງຮຽນໃນທ້ອງຖິ່ນ ຫລື ເປັນສູນຊຸມຊົນ, ເປັນພື້ນທີ່ເຊົ່າ, ຫລື ທາງເລືອກອື່ນທີ່ຖືກອະນຸມັດ.
ຜູ້ນຳເຂດ ແລະ ຜູ້ນຳໃນທ້ອງຖິ່ນໃຊ້ອາຄານປະຊຸມທຸກບ່ອນທີ່ມີຢູ່ ແລະ ຮອບຄອບໃນການສະເໜີຂໍພື້ນທີ່ເພີ່ມເຕີມ.
35.4
ການບຳລຸງຮັກສາອາຄານປະຊຸມ
35.4.1
ການທຳຄວາມສະອາດ ແລະ ການບຳລຸງຮັກສາອາຄານປະຊຸມ
ຜູ້ນຳໃນທ້ອງຖິ່ນ ແລະ ສະມາຊິກ, ລວມທັງຊາວໜຸ່ມ, ມີໜ້າທີ່ຮັບຜິດຊອບຊ່ວຍຮັກສາອາຄານແຕ່ລະແຫ່ງໃຫ້ສະອາດ ແລະ ຢູ່ໃນສະພາບດີ.
ຕາຕະລາງທຳຄວາມສະອາດບໍ່ຄວນເປັນພາລະໃຫ້ແກ່ສະມາຊິກ. ຍົກຕົວຢ່າງ, ຖ້າຫາກການເດີນທາງໄປຫາອາຄານເປັນການທ້າທາຍ, ສະມາຊິກອາດທຳຄວາມສະອາດທຸກອາທິດເມື່ອເຂົາເຈົ້າຢູ່ທີ່ອາຄານນັ້ນຢູ່ແລ້ວ.
35.4.2
ການຮຽກຮ້ອງໃຫ້ສ້ອມແປງ
ສະມາຊິກສະພາຫວອດ ຫລື ສະມາຊິກສະພາສະເຕກສາມາດລາຍງານຄວາມຈຳເປັນຕ້ອງສ້ອມແປງ. ສິ່ງນີ້ສາມາດເຮັດໄດ້ໂດຍການໃຊ້ເຄື່ອງມື Facility Issue Reporting (FIR).
35.4.5
ຄວາມປອດໄພ ແລະ ການຮັກສາຄວາມປອດໄພ
ຜູ້ນຳ ແລະ ສະມາຊິກຄວນ:
-
ຮັກສາຫ້ອງໂຖງທາງຍ່າງ, ຂັ້ນໄດ, ທາງອອກ, ແລະ ຫ້ອງເຄື່ອງໃຊ້ໃຫ້ຮຽບຮ້ອຍສຳລັບຄວາມປອດໄພຂອງການເຂົ້າອອກ.
-
ບໍ່ໃຊ້ ຫລື ເກັບວັດຖຸອັນຕະລາຍ ຫລື ໄວໄຟໄວ້ໃນອາຄານ.
-
ກຳນົດ ແລະ ເຮັດຕາມຂັ້ນຕອນການປິດອາຄານ.
-
ເກັບອຸປະກອນທີ່ສາດສະໜາຈັກເປັນເຈົ້າຂອງໄວ້ໃຫ້ປອດໄພຈາກການຖືກລັກ.
-
ຮູ້ຈັກວິທີປິດສິ່ງອຳນວຍຄວາມສະດວກ ດັ່ງເຊັ່ນ ນ້ຳ, ໄຟຟ້າ, ແລະ ແກັສ ຫລື ນ້ຳມັນເຊື້ອໄຟ.
ຖ້າຈຳເປັນ, ຜູ້ຈັດການສະຖານທີ່ສາມາດຈັດຫາແຜນທີ່ສະແດງຈຸດອຸປະກອນດັບເພີງ, ເຄື່ອງປະຖົມພະຍາບານ, ແລະ ສະຖານທີ່ປິດເຄື່ອງໃຊ້ຕ່າງໆ. ຂໍ້ມູນເພີ່ມເຕີມກ່ຽວກັບຄວາມປອດໄພມີຢູ່ໃນ “Security and Lockup Procedures” ໃນ “Maintaining Meetinghouses” (Meetinghouse Facilities Guide). ເບິ່ງ 20.7 ນຳອີກ.
35.5
ນະໂຍບາຍເລື່ອງການໃຊ້ຊັບສິນຂອງສາດສະໜາຈັກ
35.5.1
ງານສິລະປະ
ອາຄານປະຊຸມຄວນສະທ້ອນທັດສະນະຄະຕິຂອງຄວາມຄາລະວະຕໍ່ພຣະເຢຊູຄຣິດ ແລະ ເປັນພະຍານເຖິງຄວາມເຊື່ອຂອງສະມາຊິກໃນພຣະອົງ. ຄວນຕິດຮູບພາບພຣະເຢຊູຄຣິດໃນບໍລິເວນຫ້ອງໂຖງທາງເດີນຂອງອາຄານປະຊຸມ ເພື່ອຊ່ວຍສະແດງຈຸດສູນກາງຂອງຄວາມເຊື່ອນີ້.
35.5.2
ການໃຊ້ອາຄານທີ່ບໍ່ອະນຸຍາດໃຫ້ໃຊ້
35.5.2.1
ການໃຊ້ທາງການຄ້າ
ຊັບສິນຂອງສາດສະໜາຈັກບໍ່ຖືກອະນຸຍາດໃຫ້ໃຊ້ສຳລັບຈຸດປະສົງການຄ້າ. ຍົກຕົວຢ່າງ, ມັນບໍ່ຖືກອະນຸຍາດໃຫ້ໃຊ້ເພື່ອສະໜັບສະໜູນທຸລະກິດປະເພດໃດໆ. ການໃຊ້ເຊັ່ນນັ້ນບໍ່ສອດຄ່ອງກັບຈຸດປະສົງຂອງຊັບສິນຂອງສາດສະໜາຈັກ. ມັນກໍຍັງຂັດກັບກົດໝາຍບ້ານເມືອງ ແລະ ກົດໝາຍປະເທດນຳອີກ ທີ່ໄດ້ຍົກເວັ້ນພາສີຊັບສິນໃຫ້ສາດສະໜາຈັກ.
ການເປັນເຈົ້າພາບຈັດຜູ້ປາໄສ ຫລື ຄູສອນທີ່ຮັບສະໝັກຄົນເຂົ້າຮ່ວມ, ຫາລູກຄ້າ ຫລື ຜູ້ຈ້າງ ຫລື ຮັບຄ່າຈ້າງຂະນະທີ່ໃຫ້ສຳມະນາ, ບົດຮຽນ (ຍົກເວັ້ນການສອນປີອາໂນ ຫລື ອໍແກນເປັນການສ່ວນຕົວ; ເບິ່ງ 19.7.2), ຫ້ອງຮຽນອອກກຳລັງກາຍ, ແລະ ກິດຈະກຳອື່ນໆບໍ່ຖືກອະນຸມັດ.
35.5.2.2
ຈຸດປະສົງທາງການເມືອງ
ຊັບສິນຂອງສາດສະໜາຈັກບໍ່ຖືກອະນຸຍາດໃຫ້ໃຊ້ສຳລັບຈຸດປະສົງທາງການເມືອງ. ສິ່ງເຫລົ່ານີ້ລວມທັງການຈັດການປະຊຸມທາງການເມືອງ ຫລື ການຫາສຽງ. ສາດສະໜາຈັກເປັນກາງທາງການເມືອງ (ເບິ່ງ 38.8.30).
35.5.2.3
ການໃຊ້ໃນທາງອື່ນໆ
ການໃຊ້ຊັບສິນຂອງສາດສະໜາຈັກໃນທາງອື່ນໆທີ່ບໍ່ອະນຸຍາດແມ່ນລວມທັງ:
-
ການຈັດການແຂ່ງຂັນກິລາ ຫລື ງານອື່ນໆທີ່ບໍ່ສະໜັບສະໜູນໂດຍສາດສະໜາຈັກ. ກຸ່ມນັກຮ້ອງໃນຊຸມຊົນ ແລະ ການແຕ່ງງານຕາມກົດໝາຍສາມາດຖືກຍົກເວັ້ນ (ເບິ່ງ 38.3.4 ກ່ຽວກັບການແຕ່ງງານຕາມກົດໝາຍ).
-
ການໃຫ້ພັກຄ້າງຄືນ (ຍົກເວັ້ນໃນພາວະສຸກເສີນເທົ່ານັ້ນ; ເບິ່ງ 35.5.4).
-
ການຈັດຄ້າຍ ຫລື ກິດຈະກຳອື່ນໆທີ່ລວມທັງການນອນຄ້າງຄືນ.
ໂດຍທົ່ວໄປແລ້ວ ຈະບໍ່ອະນຸມັດໃຫ້ໃຊ້ສຳລັບດັ່ງຕໍ່ໄປນີ້. ຜູ້ນຳໃນທ້ອງຖິ່ນຕິດຕໍ່ຫາຜູ້ຈັດການສະຖານທີ່ຖ້າຫາກເຂົາເຈົ້າຮູ້ສຶກວ່າຕ້ອງມີຂໍ້ຍົກເວັ້ນ.
-
ການເຊົ່າ ຫລື ໃຫ້ເຊົ່າອາຄານ ແລະ ຊັບສິນຂອງສາດສະໜາຈັກ
-
ການໃຊ້ສະຖານທີ່ສຳລັບການລົງທະບຽນຜູ້ລົງຄະແນນທາງການເມືອງ ຫລື ເປັນສະຖານທີ່ເລືອກຕັ້ງ; ຍົກເວັ້ນແຕ່ການເຮັດຕາມຄຳຮຽກຮ້ອງຂອງເຈົ້າໜ້າທີ່ລັດຖະບານ ທີ່ບໍ່ມີທາງເລືອກທີ່ສົມເຫດສົມຜົນ ແລະ ເຫດການດັ່ງກ່າວຈະບໍ່ເປັນອັນຕະລາຍຕໍ່ພາບລັກສະນະ ຫລື ຕຳແໜ່ງເປັນກາງຂອງສາດສະໜາຈັກ (ເບິ່ງ 38.8.30)
35.5.4
ພາວະສຸກເສີນ
ລະຫວ່າງພາວະສຸກເສີນ, ປະທານສະເຕກຈະຕັດສິນໃຈວ່າຄວນຈັດການປະຊຸມຫວອດ ຫລື ການປະຊຸມສະເຕກຫລືບໍ່. ເພິ່ນກໍອາດອະນຸຍາດໃຫ້ອົງການບັນເທົາທຸກໄພພິບັດ ແລະ ໜ່ວຍງານທີ່ກ່ຽວຂ້ອງໃຊ້ສະຖານທີ່ ແລະ ຊັບສິນຂອງສາດສະໜາຈັກ.
35.5.10
ການຖ່າຍຮູບ ແລະ ການຖ່າຍວິດີໂອລະຫວ່າງກອງປະຊຸມສິນລະລຶກ
ກອງປະຊຸມສິນລະລຶກແມ່ນສັກສິດ. ເພາະດ້ວຍເຫດນີ້, ຈຶ່ງຫ້າມບໍ່ໃຫ້ຖ່າຍຮູບ ຫລື ຖ່າຍວິດີໂອລະຫວ່າງກອງປະຊຸມສິນລະລຶກ.
ສຳລັບຂໍ້ມູນກ່ຽວກັບການຖ່າຍທອດ ຫລື ການສະຕຣີມກອງປະຊຸມສິນລະລຶກ ແລະ ການປະຊຸມອື່ນໆ, ໃຫ້ເບິ່ງ 29.7.