“34. ການເງິນ ແລະ ການກວດສອບບັນຊີ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“34. ການເງິນ ແລະ ການກວດສອບບັນຊີ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
34.
ການເງິນ ແລະ ການກວດສອບບັນຊີ
34.0
ຄຳນຳ
ສ່ວນສິບ ແລະ ເງິນບໍລິຈາກຊ່ວຍໃຫ້ສາດສະໜາຈັກດຳເນີນວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະຜູ້ເປັນເຈົ້າ (ເບິ່ງ 1.2). ເງິນທຶນເຫລົ່ານີ້ແມ່ນສັກສິດ. ມັນເປັນຕົວແທນຂອງການເສຍສະລະ ແລະ ສັດທາຂອງສະມາຊິກຂອງສາດສະໜາຈັກ (ເບິ່ງ ມາຣະໂກ 12:41–44).
34.2
ການເປັນຜູ້ນຳດ້ານການເງິນຂອງຫວອດ
34.2.1
ຝ່າຍອະທິການ
ອະທິການມີໜ້າທີ່ຮັບຜິດຊອບດັ່ງຕໍ່ໄປນີ້ສຳລັບການເງິນຂອງຫວອດ. ເພິ່ນມອບໝາຍວຽກງານບາງສ່ວນນີ້ຂອງເພິ່ນໃຫ້ກັບທີ່ປຶກສາຂອງເພິ່ນ ແລະ ສະໝຽນ.
ອະທິການ:
-
ສິດສອນ ແລະ ດົນໃຈສະມາຊິກໃຫ້ຈ່າຍສ່ວນສິບເຕັມ ແລະ ຖວາຍເງິນບໍລິຈາກດ້ວຍຄວາມເພື່ອແຜ່ (ເບິ່ງ 34.3).
-
ຕ້ອງແນ່ໃຈວ່າເງິນທຶນຂອງຫວອດຖືກນຳໃຊ້ຢ່າງຖືກຕ້ອງ ແລະ ບັນຊີເງິນຖືກຕ້ອງທຸກຢ່າງ (ເບິ່ງ 34.5).
-
ກວດກາເອກະສານການເງິນໃນແຕ່ລະເດືອນ ແລະ ແນ່ໃຈວ່າບັນຫາທຸກຢ່າງຖືກແກ້ໄຂທັນທີ.
-
ຕ້ອງແນ່ໃຈວ່າຜູ້ນຳອົງການ ແລະ ສະໝຽນຮຽນຮູ້ໜ້າທີ່ຮັບຜິດຊອບຂອງຕົນຕໍ່ເງິນທຶນສັກສິດຂອງສາດສະໜາຈັກ.
-
ກະກຽມ ແລະ ບໍລິຫານງົບປະມານປະຈຳປີຂອງຫວອດ (ເບິ່ງ 34.6).
-
ພົບກັບສະມາຊິກຫວອດປີລະຄັ້ງເພື່ອຮັບການແຈ້ງເງິນສ່ວນສິບ.
34.2.2
ສະໝຽນຫວອດ
ອະທິການມອບໝາຍໃຫ້ສະໝຽນຫວອດ ຫລື ຜູ້ຊ່ວຍສະໝຽນຫວອດຊ່ວຍເລື່ອງການຈັດເກັບບັນທຶກການເງິນຂອງຫວອດ. ສະໝຽນຄວນເຮັດຕາມນະໂຍບາຍປະຈຸບັນຢ່າງຮອບຄອບ ເພື່ອຮັກສາເງິນທຶນຂອງສາດສະໜາຈັກ ແລະ ຕ້ອງແນ່ໃຈວ່າບັນທຶກຂອງສາດສະໜາຈັກຖືກຕ້ອງ.
ສະໝຽນມີໜ້າທີ່ຮັບຜິດຊອບດັ່ງຕໍ່ໄປນີ້:
-
ບັນທຶກ ແລະ ຝາກເງິນທຶນໃດໆທີ່ໄດ້ຮັບເຂົ້າບັນຊີທະນາຄານກັບສະມາຊິກຄົນໜຶ່ງໃນຝ່າຍອະທິການ.
-
ກວດກາເອກະສານການເງິນໃນແຕ່ລະເດືອນ ແລະ ແນ່ໃຈວ່າບັນຫາທຸກຢ່າງຖືກແກ້ໄຂທັນທີ.
-
ຊ່ວຍຝ່າຍອະທິການກະກຽມງົບປະມານປະຈຳປີຂອງຫວອດ (ເບິ່ງ 34.6.1 ແລະ 34.6.2).
-
ຕ້ອງແນ່ໃຈວ່າ ສະມາຊິກເຂົ້າເຖິງເອກະສານການບໍລິຈາກຂອງເຂົາເຈົ້າ ແລະ ຊ່ວຍເຫລືອເມື່ອຈຳເປັນ.
ສະໝຽນຄວນດຳລົງຖານະປະໂລຫິດແຫ່ງເມນຄີເສເດັກ ແລະ ມີໃບຮັບຮອງເຂົ້າພຣະວິຫານໃນປະຈຸບັນ.
34.3
ການບໍລິຈາກ
34.3.1
ສ່ວນສິບ
ສ່ວນສິບຄືການບໍລິຈາກໜຶ່ງສ່ວນສິບຂອງລາຍຮັບໃຫ້ສາດສະໜາຈັກຂອງພຣະເຈົ້າ (ເບິ່ງ ຄຳສອນ ແລະ ພັນທະສັນຍາ 119:3–4; ລາຍໄດ້ ເຂົ້າໃຈວ່າໝາຍເຖິງລາຍຮັບ). ສະມາຊິກທຸກຄົນທີ່ມີລາຍຮັບຄວນຈ່າຍສ່ວນສິບ.
34.3.1.2
ການແຈ້ງເງິນສ່ວນສິບ
ອະທິການພົບກັບສະມາຊິກລະຫວ່າງສອງສາມເດືອນທ້າຍປີຂອງແຕ່ລະປີ ເພື່ອຮັບການແຈ້ງເງິນສ່ວນສິບ.
ສະມາຊິກທຸກຄົນຖືກເຊື້ອເຊີນໃຫ້ພົບກັບອະທິການເພື່ອ:
-
ແຈ້ງຕໍ່ອະທິການກ່ຽວກັບສະຖານະ ການຈ່າຍສ່ວນສິບຂອງເຂົາເຈົ້າ.
-
ຕ້ອງແນ່ໃຈວ່າບັນທຶກການບໍລິຈາກຂອງເຂົາເຈົ້າຖືກຕ້ອງ.
ເມື່ອໃດກໍຕາມທີ່ເປັນໄປໄດ້, ສະມາຊິກທຸກຄົນໃນຄອບຄົວ, ລວມທັງເດັກນ້ອຍ, ຄວນໄປນຳກັນ.
34.3.2
ການບໍລິຈາກດ້ວຍການຖືສິນອົດເຂົ້າ
ຜູ້ນຳຂອງສາດສະໜາຈັກຊຸກຍູ້ສະມາຊິກໃຫ້ດຳລົງຊີວິດຕາມກົດຂອງການຖືສິນອົດເຂົ້າ. ນີ້ລວມທັງການບໍລິຈາກເງິນຖືສິນອົດເຂົ້າຢ່າງເພື່ອແຜ່ (ເບິ່ງ 22.2.2).
ແນວທາງຊີ້ນຳສຳລັບການໃຊ້ເງິນທຶນບໍລິຈາກໂດຍການຖືສິນອົດເຂົ້າ ມີຢູ່ໃນ 22.5.2.
34.3.3
ເງິນທຶນຜູ້ສອນສາດສະໜາ
ການບໍລິຈາກສົມທົບເງິນທຶນຜູ້ສອນສາດສະໜາຂອງຫວອດຖືກໃຊ້ໂດຍສະເພາະຕາມຄຳໝັ້ນສັນຍາເລື່ອງການບໍລິຈາກຂອງຜູ້ສອນສາດສະໜາຈາກຫວອດ.
ການບໍລິຈາກສົມທົບເງິນທຶນຜູ້ສອນສາດສະໜາທົ່ວໄປຖືກໃຊ້ໂດຍສາດສະໜາຈັກ ໃນວຽກງານເຜີຍແຜ່ໂດຍລວມ.
34.3.7
ການບໍລິຈາກບໍ່ສາມາດສົ່ງຄືນໃຫ້ໄດ້
ເມື່ອສ່ວນສິບ ແລະ ເງິນບໍລິຈາກອື່ນໆຖືກມອບໃຫ້ສາດສະໜາຈັກ, ມັນເປັນຂອງພຣະຜູ້ເປັນເຈົ້າ. ມັນຖືກອຸທິດຖວາຍໃຫ້ແກ່ພຣະອົງ.
ປະທານສະເຕກ ແລະ ອະທິການບອກຜູ້ບໍລິຈາກສ່ວນສິບ ແລະ ອື່ນໆວ່າ ການບໍລິຈາກເຫລົ່ານີ້ບໍ່ສາມາດສົ່ງຄືນໃຫ້ໄດ້.
34.4
ການຮັກສາຄວາມລັບຂອງສ່ວນສິບ ແລະ ເງິນບໍລິຈາກອື່ນໆ
ຈຳນວນສ່ວນສິບ ແລະ ເງິນບໍລິຈາກອື່ນໆ ທີ່ຜູ້ບໍລິຈາກໄດ້ຈ່າຍ ຖືວ່າເປັນຄວາມລັບ. ພຽງແຕ່ອະທິການ ແລະ ຜູ້ທີ່ຖືກອະນຸຍາດໃຫ້ຈັດການ ຫລື ກວດກາເບິ່ງການບໍລິຈາກເຫລົ່ານີ້ເທົ່ານັ້ນ ທີ່ສາມາດເຂົ້າເຖິງຂໍ້ມູນນີ້.
34.5
ການຈັດການກັບເງິນທຶນຂອງສາດສະໜາຈັກ
ປະທານສະເຕກ ແລະ ອະທິການຕ້ອງແນ່ໃຈວ່າເງິນທຶນຂອງສາດສະໜາຈັກທັງໝົດຖືກຈັດການຢ່າງຖືກຕ້ອງ. ຝ່າຍອະທິການ ແລະ ສະໝຽນຖືກຊຸກຍູ້ໃຫ້ທົບທວນວິດີໂອ “Sacred Funds, Sacred Responsibilities” ຢ່າງໜ້ອຍປີລະຄັ້ງ.
34.5.1
ຫລັກທຳການທຳງານເປັນຄູ່
ຫລັກທຳການທຳງານເປັນຄູ່ຮຽກຮ້ອງໃຫ້ສອງຄົນ—ສະມາຊິກຄົນໜຶ່ງໃນຝ່າຍອະທິການ ແລະ ສະໝຽນ, ຫລື ສະມາຊິກສອງຄົນໃນຝ່າຍອະທິການ—ມີສ່ວນຮ່ວມຢ່າງແຂງຂັນເມື່ອບັນທຶກ ແລະ ເບີກຈ່າຍເງິນທຶນຂອງສາດສະໜາຈັກ.
ຜູ້ນຳຄວນປົກປ້ອງ ແລະ ບໍ່ບອກລະຫັດຜ່ານຂອງຕົນ (ເບິ່ງ 33.9.1.1).
34.5.2
ການຮັບສ່ວນສິບ ແລະ ເງິນບໍລິຈາກອື່ນໆ
ພຣະຜູ້ເປັນເຈົ້າໄດ້ມອບຄວາມໄວ້ວາງໃຈອັນສັກສິດໃຫ້ແກ່ອະທິການ ເພື່ອຮັບເອົາ ແລະ ເຮັດບັນຊີສ່ວນສິບ ແລະ ເງິນບໍລິຈາກອື່ນໆຂອງໄພ່ພົນ (ເບິ່ງ ຄຳສອນ ແລະ ພັນທະສັນຍາ 42:30–33; 119). ພຽງແຕ່ອະທິການ ແລະ ທີ່ປຶກສາຂອງເພິ່ນເທົ່ານັ້ນທີ່ສາມາດຮັບເອົາສ່ວນສິບ ແລະ ເງິນບໍລິຈາກອື່ນໆ. ບໍ່ວ່າຈະຢູ່ໃນສະຖານະການໃດ ທີ່ພັນລະຍາຂອງພວກເພິ່ນ, ສະມາຊິກຄົນອື່ນໆໃນຄອບຄົວຂອງພວກເພິ່ນ, ສະໝຽນ, ຫລື ສະມາຊິກຫວອດຄົນອື່ນໆ ສາມາດຮັບເອົາການບໍລິຈາກເຫລົ່ານີ້.
34.5.3
ການກວດສອບ ແລະ ການບັນທຶກສ່ວນສິບ ແລະ ເງິນບໍລິຈາກອື່ນໆ
ການບໍລິຈາກຄວນຖືກກວດສອບ ແລະ ບັນທຶກໃນວັນອາທິດທີ່ໄດ້ຮັບ. ສະມາຊິກຄົນໜຶ່ງໃນຝ່າຍອະທິການ ແລະ ສະໝຽນ, ຫລື ສະມາຊິກສອງຄົນໃນຝ່າຍອະທິການ, ເປີດຊອງນຳກັນ. ພວກເພິ່ນກວດສອບເງິນທຶນໃນຊອງວ່າກົງກັບຈຳນວນທີ່ຂຽນໄວ້ໃນໃບສ່ວນສິບ ແລະ ເງິນບໍລິຈາກອື່ນໆຫລືບໍ່. ພວກເພິ່ນບັນທຶກການບໍລິຈາກແຕ່ລະອັນຢ່າງຖືກຕ້ອງ. ຖ້າຫາກເງິນທຶນ ແລະ ຈຳນວນທີ່ຂຽນໄວ້ແຕກຕ່າງ, ພວກເພິ່ນຈະຕິດຕໍ່ຫາຜູ້ບໍລິຈາກທັນທີເພື່ອແກ້ໄຂຄວາມແຕກຕ່າງນັ້ນ.
34.5.4
ການຝາກສ່ວນສິບ ແລະ ເງິນບໍລິຈາກອື່ນໆ
ການຝາກຄວນຈັດການຫລັງຈາກແນ່ໃຈວ່າຈຳນວນທີ່ບັນທຶກກົງກັບຈຳນວນເງິນທຶນທີ່ໄດ້ຮັບ.
ໃນບ່ອນທີ່ມີທະນາຄານຮັບການຝາກຕະຫລອດ 24 ຊົ່ວໂມງ, ສະມາຊິກໃນຝ່າຍອະທິການ ແລະ ຜູ້ດຳລົງຖານະປະໂລຫິດແຫ່ງເມນຄີເສເດັກອີກຄົນໜຶ່ງຈະນຳເງິນທຶນໄປຝາກທະນາຄານ ໃນມື້ທີ່ໄດ້ເປີດຮັບ ແລະ ກວດສອບເງິນທຶນ.
ໃນບ່ອນທີ່ບໍ່ມີທະນາຄານຮັບການຝາກຕະຫລອດ 24 ຊົ່ວໂມງ ແລະ ທະນາຄານປິດໃນວັນອາທິດ, ອະທິການຈະໃຫ້ຜູ້ດຳລົງຖານະປະໂລຫິດແຫ່ງເມນຄີເສເດັກຄົນໜຶ່ງນຳເງິນໄປຝາກໃນມື້ຕໍ່ໄປ. ເພິ່ນຄວນ:
-
ແນ່ໃຈວ່າເງິນທຶນຖືກຮັກສາໄວ້ຢ່າງປອດໄພຈົນກວ່າມັນຖືກນຳໄປຝາກ.
-
ເກັບໃບຢັ້ງຢືນການຝາກທີ່ສະແດງວັນທີ ແລະ ຈຳນວນເງິນທີ່ຝາກ.
34.5.5
ການຮັກສາເງິນທຶນຂອງສາດສະໜາຈັກ
ສະມາຊິກທີ່ຮັບຜິດຊອບຕໍ່ເງິນທຶນຂອງສາດສະໜາຈັກ ບໍ່ຄວນປະເງິນໄວ້ຢູ່ໃນຕຶກໂບດຂ້າມຄືນ ຫລື ບໍ່ຄວນປະເງິນໄວ້ແບບບໍ່ເຝົ້າດູແລ ໃນເວລາໃດກໍຕາມ, ດັ່ງເຊັ່ນລະຫວ່າງການປະຊຸມ ແລະ ກິດຈະກຳ.
34.5.7
ການບໍລິຫານການຈ່າຍເງິນຂອງສະເຕກ ແລະ ຫວອດ
ຄ່າໃຊ້ຈ່າຍຂອງສະເຕກ ຫລື ຫວອດຈະບໍ່ເກີດຂຶ້ນ ຫລື ຖືກຈ່າຍປາດສະຈາກການອະນຸຍາດຈາກເຈົ້າໜ້າທີ່ຄວບຄຸມ.
ຜູ້ນຳທີ່ມີສິດອຳນາດສອງຄົນຕ້ອງອະນຸມັດການຈ່າຍເງິນແຕ່ລະຄັ້ງ. ຜູ້ໜຶ່ງຕ້ອງເປັນສະມາຊິກຄົນໜຶ່ງໃນຝ່າຍປະທານສະເຕກ ຫລື ໃນຝ່າຍອະທິການ. ເຖິງແມ່ນວ່າທີ່ປຶກສາຖືກອະນຸຍາດໃຫ້ອະນຸມັດການຈ່າຍເງິນ, ແຕ່ປະທານສະເຕກ ຫລື ອະທິການຈະຕ້ອງກວດກາເບິ່ງການຈ່າຍເງິນແຕ່ລະຄັ້ງ. ຜູ້ນຳບໍ່ຄວນອະນຸມັດການຈ່າຍເງິນໃຫ້ຕົວເອງ.
ປະທານສະເຕກຕ້ອງໄດ້ອະນຸມັດເປັນລາຍລັກອັກສອນ ກ່ອນທີ່ອະທິການຈະໃຊ້ເງິນບໍລິຈາກດ້ວຍການຖືສິນອົດເຂົ້າ ຫລື ເພິ່ນຕ້ອງໄດ້ອະນຸມັດໃບສັ່ງຊື້ຂອງອະທິການໃຫ້ອະທິການ ຫລື ຄອບຄົວຂອງເພິ່ນ. ສະມາຊິກຄົນໜຶ່ງໃນຝ່າຍປະທານເຂດຕ້ອງໄດ້ອະນຸມັດເປັນລາຍລັກອັກສອນ ກ່ອນທີ່ອະທິການຈະໃຊ້ເງິນບໍລິຈາກດ້ວຍການຖືສິນອົດເຂົ້າ ຫລື ອະນຸມັດໃບສັ່ງຊື້ຂອງອະທິການສຳລັບປະທານສະເຕກ ຫລື ຄອບຄົວຂອງເພິ່ນ. ເບິ່ງ 22.5.1.2 ສຳລັບແນວທາງຊີ້ນຳ.
ສະມາຊິກທີ່ຮ້ອງຂໍການຈ່າຍຄືນໃຫ້ ຕ້ອງມີໃບສຳເນົາເປັນເຈ້ຍ ຫລື ສຳເນົາອີເລັກໂທຣນິກຂອງໃບຮັບເງິນ ຫລື ໃບແຈ້ງໜີ້. ພ້ອມນີ້ເຂົາເຈົ້າຕ້ອງລະບຸທັງຈຸດປະສົງ, ຈຳນວນເງິນ, ແລະ ວັນທີຊື້ນຳອີກ.
ຖ້າຫາກມີການເບີກເງິນທຶນລ່ວງໜ້າ, ສະມາຊິກຈະສົ່ງຟອມຂໍເບີກເງິນ, ລະບຸຈຸດປະສົງ, ຈຳນວນເງິນ, ແລະ ວັນທີ. ຫລັງຈາກຊຳລະຄ່າໃຊ້ຈ່າຍແລ້ວ, ສະມາຊິກຈະ (1) ມອບໃບຮັບເງິນ ຫລື ໃບແຈ້ງໜີ້ສຳລັບເງິນທຶນທີ່ໄດ້ຈ່າຍໄປ ແລະ (2) ສົ່ງຄືນເງິນທຶນທີ່ເຫລືອ. ເງິນທຶນທີ່ຖືກສົ່ງຄືນຄວນນຳໄປຝາກທະນາຄານ.
34.5.9
ການຈົດບັນທຶກການເງິນ
ແຕ່ລະສະເຕກ ແລະ ແຕ່ລະຫວອດຄວນຈົດບັນທຶກການເງິນໃຫ້ຢູ່ໃນປະຈຸບັນ ແລະ ຖືກຕ້ອງ.
ສຳລັບຂໍ້ມູນກ່ຽວກັບການໃຊ້ ແລະ ການຮັກສາບັນທຶກ ແລະ ລາຍງານ, ສະໝຽນຄວນອ່ານຄຳແນະນຳຈາກສຳນັກງານໃຫຍ່ຂອງສາດສະໜາຈັກ ຫລື ຈາກຫ້ອງການເຂດ. ບັນທຶກການເງິນຄວນຖືກຮັກສາໄວ້ຢ່າງໜ້ອຍສາມປີ ບວກກັບປີປະຈຸບັນ.
34.6
ງົບປະມານ ແລະ ຄ່າໃຊ້ຈ່າຍ
ໂຄງການງົບປະມານທີ່ອະນຸມັດ ໃຫ້ເງິນທຶນທົ່ວໄປຂອງສາດສະໜາຈັກເພື່ອຈ່າຍສຳລັບກິດຈະກຳ ແລະ ໂຄງການຕ່າງໆຂອງສະເຕກ ແລະ ຫວອດ.
ກິດຈະກຳສ່ວນໃຫຍ່ຄວນລຽບງ່າຍ ແລະ ມີຄ່າໃຊ້ຈ່າຍເລັກນ້ອຍ ຫລື ບໍ່ມີເລີຍ.
34.6.1
ງົບປະມານຂອງສະເຕກ ແລະ ຫວອດ
ທຸກສະເຕກ ແລະ ທຸກຫວອດກະກຽມ ແລະ ດຳເນີນງານຕາມງົບປະມານປະຈຳປີ. ປະທານສະເຕກບໍລິຫານງົບປະມານຂອງສະເຕກ, ແລະ ອະທິການບໍລິຫານງົບປະມານຂອງຫວອດ.
ແນວທາງຊີ້ນຳໄດ້ຖືກລະບຸໄວ້ຢູ່ຂ້າງຫລຸ່ມ:
-
ກວດກາຈຳນວນທີ່ໃຊ້ໃນປີທີ່ຜ່ານມາ ເພື່ອພິຈາລະນາຄ່າໃຊ້ຈ່າຍທີ່ຈະເກີດຂຶ້ນອີກ.
-
ຂໍໃຫ້ອົງການຕ່າງໆປະເມີນງົບປະມານທີ່ຕ້ອງໃຊ້ໂດຍລະອຽດ.
-
ຮວບຮວມງົບປະມານ ໂດຍໃຊ້ການປະຕິບັດດ້ານງົບປະມານທີ່ອະນຸມັດ.
34.6.2
ງົບປະມານທີ່ອະນຸມັດ
34.6.2.1
ການຈັດສັນງົບປະມານ
ເງິນທຶນງົບປະມານຖືກຈັດສັນທຸກໄຕມາດຕາມຈຳນວນຜູ້ເຂົ້າຮ່ວມ ໃນໝວດໝູ່ດັ່ງຕໍ່ໄປນີ້:
-
ກອງປະຊຸມສິນລະລຶກ
-
ຊາຍໜຸ່ມ
-
ຍິງໜຸ່ມ
-
ເດັກນ້ອຍປະຖົມໄວອາຍຸ 7–10 ປີ
-
ຜູ້ໃຫຍ່ໜຸ່ມໂສດ
ມັນສຳຄັນທີ່ຕ້ອງລາຍງານຈຳນວນຜູ້ເຂົ້າຮ່ວມຢ່າງຖືກຕ້ອງ ແລະ ຕົງເວລາ (ເບິ່ງ 33.5.1.1).
34.6.2.2
ການໃຊ້ງົບປະມານຢ່າງເໝາະສົມ
ປະທານສະເຕກ ແລະ ອະທິການຕ້ອງແນ່ໃຈວ່າ ມີການໃຊ້ເງິນທຶນງົບປະມານທີ່ອະນຸມັດຢ່າງສະຫລາດ.
ເງິນທຶນຫງົບປະມານຂອງສະເຕກ ແລະ ຂອງຫວອດຄວນຖືກໃຊ້ເພື່ອຈ່າຍຄ່າກິດຈະກຳ, ໂຄງການ, ຄູ່ມື, ແລະ ອຸປະກອນຕ່າງໆ.
34.6.2.3
ງົບປະມານທີ່ເຫລືອ
ບໍ່ຄວນໃຊ້ຈ່າຍສ່ວນທີ່ເຫລືອຂອງເງິນທຶນງົບປະມານທີ່ອະນຸມັດໃຫ້. ເງິນທຶນຂອງຫວອດສ່ວນທີ່ເຫລືອ ຄວນຖືກສົ່ງຄືນໃຫ້ສະເຕກ.
34.7
ການກວດສອບບັນຊີ
34.7.1
ຄະນະກຳມະການກວດສອບບັນຊີສະເຕກ
ປະທານສະເຕກແຕ່ງຕັ້ງຄະນະກຳມະການກວດສອບບັນຊີສະເຕກ. ຄະນະກຳມະການນີ້ຕ້ອງແນ່ໃຈວ່າການເງິນຂອງສະເຕກ ແລະ ຫວອດຖືກຈັດການຕາມນະໂຍບາຍຂອງສາດສະໜາຈັກ.
34.7.3
ການກວດສອບບັນຊີການເງິນ
ຜູ້ກວດສອບບັນຊີສະເຕກຈະກວດສອບບັນທຶກບັນຊີການເງິນຂອງສະເຕກ, ຫວອດ, ແລະ ສູນສືບປະຫວັດຄອບຄົວ ປີລະສອງຄັ້ງ.
ເຈົ້າໜ້າທີ່ຄວບຄຸມໜ່ວຍ ແລະ ສະໝຽນທີ່ຖືກມອບໝາຍໃຫ້ດູແລການເງິນຄວນຢູ່ຕອບຄຳຖາມຕ່າງໆລະຫວ່າງການກວດສອບບັນຊີ.
34.7.5
ການສູນຫາຍ, ການລັກ, ການຍັກຍອກ, ຫລື ການໃຊ້ເງິນທຶນຂອງສາດສະໜາຈັກໃນທາງທີ່ຜິດ
ປະທານສະເຕກ ຫລື ປະທານຄະນະກຳມະການກວດສອບບັນຊີສະເຕກຄວນຖືກແຈ້ງທັນທີຖ້າຫາກ:
-
ເງິນທຶນຂອງສາດສະໜາຈັກສູນຫາຍ ຫລື ຖືກລັກ.
-
ຜູ້ນຳໄດ້ຍັກຍອກ ຫລື ໃຊ້ເງິນທຶນຂອງສາດສະໜາຈັກໃນທາງທີ່ຜິດ.