35.

Paghalong kag Paggamit sang mga Meetinghouse

35.1

Katuyuan

Ang Simbahan nagatigana sang mga meetinghouse para ang tanan nga nagasulod:

• Makahimo kag makabag-o sang ila mga kasugtanan paagi sa sagrado nga mga ordinansa (tan-awa sa Doktrina kag mga Kasugtanan 20:75; 59:9–12).

• Magtililipon sing tingub (tan-awa sa 3 Nefi 18:22–23).

• Magsimba kag magpangamuyo sing tingub (tan-awa sa Mosias 18:25; Moroni 6:9).

• Magtudlo kag mag-alagad sa isa kag isa (tan-awa sa Moroni 6:4–5).

• Magpartisipar sa iban pa nga aprubado nga mga paggamit nga ginlaragway sa sining kapitulo.

35.2

Mga Tulumanon kag mga Responsibilidad

35.2.2

Church Facilities Manager

Isa ka facilities manager nga empleyado sang Simbahan ang nagabulig sa tagsa ka stake nga magpalakat sang mga meetinghouse. Sia ang nagapatigayon sang dinalagko nga mga pagkay-o, pagpaninlo, kag regular nga pagmentinar sang bilding.

Kon kinahanglanon, nagabulig ang facilities manager tudlo sa mga building representative sang stake kag ward kon paano tinloan ang bilding kag himuon ang iban pa nga lokal nga mga hilimuon. Nagahatag sia sang mga instruksyon, materyales, kag gamit.

Pwede man niya rebyuhon ang galastuhan sa bilding upod sa mga bishopric.

35.2.7

Bishopric

Ginatudloan sang bishopric (ukon sang ward building representative) ang mga miyembro kon paano gamiton, halungan, kag proteksyunan ang bilding. Ang bishopric man ang nagapanagtag sang mga yabi sang bilding sa mga lider sang ward.

Ginasiguro nila nga ang aktibidades sa bilding kag sa palibot sang bilding ginahiwat nga hilway sa peligro (tan-awa sa 20.7).

Ginahambal nila sa facilities manager sang Simbahan ang mga panginahanglan sa pagmentinar kag pagpalakat sini. Pwede man nila nga rebyuhon ang naangot nga mga galastuhan upod sa facilities manager.

35.2.9

Ward Building Representative

Ang bishopric ang nagadesisyon kon dapat magtawag sang ward building representative. Kon makadesisyon sila nga maghatag sini nga calling, pwede nga tawgon sang bishopric ang isa ka hamtong nga lalaki ukon babayi nga miyembro. Kon wala sang gintawag nga ward building representative, pwede nga i-asayn ini nga responsibilidad sang bishop sa isa niya ka manuglaygay, sa ward clerk ukon sa assistant ward clerk, ukon sa executive secretary.

Ang ward building representative nagaorganisar sang mga miyembro kag mga boluntaryo sa paglimpyo kag pagmentinar sang bilding. Ginatudloan niya sila kon paano himuon ang tagsa ka ulobrahon gamit ang gintigana nga mga suplay kag equipment.

35.3

Paghatag sang mga Meetinghouse

Ang mga meetinghouse lainlain ang kadakuon kag klase base sa lokal nga panginahanglan kag mga kondisyon. Ang meetinghouse pwede nga ginpatindog ukon ginbakal nga ispasyo sang Simbahan, balay sang miyembro, lokal nga eskwelahan ukon sentro sang komunidad, gin-arkilahan nga lugar, ukon iban pa nga aprubado nga opsyon.

Ginatinguhaan sang area kag lokal nga mga lider ang lubos nga paggamit sang tanan nga meetinghouse nga ara na kag mangin maalam sa pagrekomendar sang dugang nga lugar.

35.4

Pagmentinar sang mga Meetinghouse

35.4.1

Pagtinlo kag Pagmentinar sang mga Meetinghouse

Ang lokal nga mga lider kag miyembro, pati na ang mga lamharon, may responsibilidad sa pagbulig mentinar sang bilding nga matinlo kag maayo ang kondisyon.

Ang iskedyul sang pagpaninlo indi dapat mangin pabug-at sa mga miyembro. Halimbawa, kon mabudlay magbiyahe pakadto sa bilding, pwede gid nga magpaninlo ang mga miyembro bilang bahin sang semanal nga mga aktibidades kon ara sila sa bilding.

35.4.2

Pag-request sang Pagpakay-o

Ang mga miyembro sang ward kag stake council pwede magreport kon kinahanglanon na nga ipakay-o ang bilding. Pwede ini himuon paagi sa paggamit sang Facility Issue Reporting (FIR) nga tool.

35.4.5

Kahilwayan sa Katalagman kag Seguridad

Ang mga lider kag mga miyembro dapat:

• Maghawan sang mga alagyan, hagdan, exit, kag bulutangan sang mga gamit para wala sing peligro kon magsulod kag maggwa.

• Indi maggamit ukon magtago sang delikado ukon madali masunog nga materyales sa mga bilding.

• Magbutang kag magpatuman sang mga proseso sa pagsira sang bilding.

• Mag-amlig sang mga equipment sang Simbahan para indi makawat.

• Makahibalo kon paano patyon ang tubig, kuryente, kag gas ukon gatong.

Kon kinahanglan, pwede ang facilities manager magbutang sang mapa nga nagapakita kon diin ang mga fire extinguisher, first aid kit, kag lugar kon diin pwede patyon ang kuryente, tubig kag iban pa nga mga utility. Ang dugang nga impormasyon parte sa seguridad ara sa “Security and Lockup Procedures” sa “Maintaining Meetinghouses” (Meetinghouse Facilities Guide). Tan-awa man sa 20.7.

35.5

Mga Polisiya sa Paggamit sang Propiyedad sang Simbahan

35.5.1

Artwork

Ang mga meetinghouse dapat magpakita sang balatyagon sang pagtahod kay Jesucristo kag nagapamatuod sang pagpati sang mga miyembro sa Iya. Ang art nga nagapakita kay Jesucristo dapat ibutang sa mga salamputan sang meetinghouse para makabulig sa pagpakita sining sentro nga pagpati.

35.5.2

Mga Paggamit sang Bilding nga Wala Ginapahanugotan

35.5.2.1

Mga Komersyal nga Paggamit

Ang propiyedad sang Simbahan indi pwede gamiton para sa komersyal nga mga tuyo. Halimbawa, indi ini pwede gamiton para suportahan ang bisan ano nga klase sang negosyo. Ang ini nga paggamit wala nagasunod sa mga katuyuan sang mga propiyedad sang Simbahan. Mahimo nga nagakontra man ini sa lokal ukon nasyunal nga mga layi nga nagatugot sang tax exemption sa propiyedad sang Simbahan.

Ang mga pagtililipon para sa mga manughambal ukon manunudlo nga nagapang-engganyo sang mga partisipante, nagapangita sang mga kustomer ukon kliyente, ukon ginabayran sa paghatag sang mga seminar, mga leksyon (magluwas sa pribado nga pagtudlo sang piano ukon organ; tan-awa sa 19.7.2), klase sa pag-ehersisyo, kag iban pa nga aktibidades wala ginapahanugotan.

35.5.2.2

Pulitikal nga mga Katuyuan

Ang propiyedad sang Simbahan indi pwede gamiton sa mga katuyuan sang pulitika. Dala diri ang paghiwat sang mga miting ukon kampanya sa pulitika. Ang Simbahan wala sang ginadampigan sa pulitika (tan-awa sa 38.8.30).

35.5.2.3

Iban Pa nga mga Paggamit

Iban pa nga paggamit sang propiyedad sang Simbahan nga wala ginapahanugotan:

• Paghiwat sang organisado nga mga praktis sa isports ukon iban pa nga aktibidades nga wala gina-isponsoran sang Simbahan. Mahimo nga mangin eksepsyon ang mga choir kag sibil nga mga kasal (tan-awa sa 38.3.4 parte sa sibil nga mga kasal).

• Pagtugot nga magpaligad sang gab-i (magluwas kon sa mga emerhensya; tan-awa sa 35.5.4).

• Camping ukon iban pa nga aktibidades nga kinahanglan magpaligad sang gab-i.

Ang masunod nga mga paggamit kinaandan nga wala ginaaprubahan. Dapat nga kontakon sang lokal nga mga lider ang facilities manager kon pamatyag nila kinahanglan sang eksepsyon.

• Pagparenta ukon pagpaarkila sang mga bilding kag propiyedad sang Simbahan.

• Paggamit sang mga propiyedad sa pagrehistro sang mga botante sa pulitika ukon bilang presinto sa pagboto; pwede nga magpangayo sang eksepsyon sa pangabay sang mga opisyal sang gobyerno kon wala na gid sang iban nga magamit kag ang hitabo indi makahalit sang imahe ukon neutral nga panindugan sang Simbahan (tan-awa sa 38.8.30)

35.5.4

Mga Emerhensya

Kon may emerhensya, ang stake president ang nagadesisyon kon maghiwat sang mga miting sa ward kag stake. Pwede man niya ipagamit ang mga bilding kag propiyedad sang Simbahan sa mga ahensya nga nagabulig sa emerhensya kag sa pareho sini nga mga buluhaton.

35.5.10

Mga Litrato kag mga Video Recording sa Oras sang Sakramento nga Miting

Ang sakramento nga mga miting sagrado. Tungod sini, wala ginapahanugotan ang paglitrato ukon pagrekord sang sakramento nga mga miting.

Para sa impormasyon parte sa pag-broadcast ukon pag-stream sang sakramento nga mga miting kag iban pa nga mga miting, tan-awa sa 29.7.