« ១. ផែនការរបស់ព្រះ និងតួនាទីរបស់អ្នកនៅក្នុងកិច្ចការនៃសេចក្តីសង្គ្រោះ និងភាពតម្កើងឡើង » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( ឆ្នាំ ២០២០ ) ។
« ១. កិច្ចការនៃសេចក្តីសង្រ្គោះ និងភាពតម្កើងឡើង » ក្បួនខ្នាតទូទៅ ។
១.
ផែនការរបស់ព្រះ និងតួនាទីរបស់អ្នកនៅក្នុងកិច្ចការនៃសេចក្តីសង្រ្គោះ និងភាពតម្កើងឡើង
១.០
សេចក្តីផ្ដើម
អ្នកត្រូវបានហៅឲ្យបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ សូមអរគុណចំពោះការបម្រើរបស់អ្នក ។ អ្នកនឹងផ្តល់ពរជ័យដល់ជីវិតជាច្រើន ហើយដកពិសោធន៍សេចក្តីអំណរ កាលណាអ្នកបម្រើដោយស្មោះត្រង់ ។
ក្បួនខ្នាតនេះនឹងជួយអ្នកឲ្យរៀនពីគោលការណ៍នៃការបម្រើដូចជាព្រះគ្រីស្ទ ហើយយល់ដឹងពីការទទួលខុសត្រូវទាំងឡាយរបស់អ្នក ។ អ្នកនឹងជាបុគ្គលដែលធ្វើការមានប្រសិទ្ធភាពបំផុត នៅពេលអ្នកដាក់ការបម្រើរបស់អ្នកនៅក្នុងសាសនាចក្រឲ្យស្របជាមួយកិច្ចការរបស់ព្រះជាព្រះវរបិតា និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទ ។ ជំពូកនេះនឹងជួយអ្នកឲ្យទទួលបាននូវទស្សនវិស័យអំពី ៖
-
ផែនការនៃសុភមង្គលរបស់ព្រះ ។
-
កិច្ចការនៃសេចក្តីសង្រ្គោះ និងភាពតម្កើងឡើង ។
-
គោលបំណងនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
១.១
ផែនការនៃសុភមង្គលរបស់ព្រះ
ព្រះវរបិតាសួគ៌បានប្រទានដល់យើងនូវផែនការនៃសុភមង្គល ដើម្បីធ្វើឲ្យយើងអាចរីករាយនឹងពរជ័យទាំងអស់របស់ទ្រង់ ។ កិច្ចការ និងសិរីល្អរបស់ទ្រង់គឺដើម្បី « នាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។ អមតភាពគឺជាការរស់នៅជារៀងរហូតជាមួយនឹងរូបកាយដែលបានរស់ឡើងវិញ ។ ជីវិតដ៏នៅអស់កល្បជានិច្ច ឬភាពតម្កើងឡើងគឺជាការប្រែក្លាយដូចជាព្រះ ហើយរស់នៅក្នុងវត្តមានរបស់ទ្រង់ជាក្រុមគ្រួសារដ៏នៅអស់កល្បជានិច្ច ។
យើងមិនអាចទទួលបានអមតភាព និងជីវិតដ៏អស់កល្បជានិច្ចដោយគ្មានជំនួយរបស់ព្រះនោះទេ ។ នៅក្នុងជីវិតនេះ យើងរងនូវអំពើបាប និងសេចក្តីស្លាប់ ដែលវាបំបែកយើងចេញពីព្រះវរបិតាសួគ៌ ហើយរារាំងយើងមិនឲ្យប្រែក្លាយកាន់តែដូចទ្រង់បាន ។
ព្រះយេស៊ូវគ្រីស្ទគឺជាអង្គដ៏សំខាន់នៅក្នុងផែនការរបស់ព្រះ ។ ដោយសារតែសេចក្តីស្រឡាញ់ដ៏គ្មានព្រំដែនរបស់ព្រះវរបិតាសួគ៌ចំពោះពួកយើង នោះទ្រង់បានបញ្ជូនព្រះរាជបុត្រារបស់ទ្រង់ឲ្យមកប្រោសលោះយើងពីអំពើបាប និងសេចក្តីស្លាប់ តាមរយៈពលិកម្មដ៏ធួនរបស់ព្រះរាជបុត្រាទ្រង់ ( សូមមើល យ៉ូហាន ៣:១៦ ) ។ តាមរយៈដង្វាយធួនរបស់ទ្រង់ ព្រះយេស៊ូវគ្រីស្ទបានធានាថា ពួកយើងម្នាក់ៗដែលបានកើតនៅលើផែនដីនេះនឹងរស់ឡើងវិញ ហើយទទួលបានអមតភាព ។ ដង្វាយធួនរបស់ទ្រង់ក៏អាចធ្វើឲ្យយើងបានជ្រះស្អាតពីអំពើបាប ហើយធ្វើឲ្យដួងចិត្តរបស់យើងបានផ្លាស់ប្តូរ ដើម្បីយើងអាចទទួលបានជីវិតដ៏នៅអស់កល្បជានិច្ច និងសេចក្តីអំណរដ៏ពេញលេញផងដែរ ។
ដើម្បីទទួលបានជីវិតដ៏នៅអស់កល្បជានិច្ច យើងត្រូវតែ « មករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ » ( មរ៉ូណៃ ១០:៣២ ) ។ ការអញ្ជើញនេះគឺសម្រាប់អ្នកដែលបានរស់នៅ ឬនឹងរស់នៅលើផែនដីនេះ ។ ព្រះវរបិតាសួគ៌មានព្រះទ័យចង់ឲ្យបុត្រាបុត្រីរបស់ទ្រង់ជ្រើសរើសត្រឡប់ទៅរកទ្រង់វិញ ។
១.២
កិច្ចការនៃសេចក្តីសង្រ្គោះ និងភាពតម្កើងឡើង
នៅពេលយើងមករកព្រះគ្រីស្ទ ហើយជួយអ្នកដទៃឲ្យធ្វើដូចគ្នានេះ នោះយើងចូលរួមក្នុងកិច្ចការនៃសេចក្តីសង្រ្គោះ និងភាពតម្កើងឡើងរបស់ព្រះ ។ កិច្ចការនេះត្រូវបានដឹកនាំដោយបទបញ្ញត្តិធំពីរ គឺឲ្យស្រឡាញ់ព្រះ និងស្រឡាញ់អ្នកជិតខាងរបស់យើង ( សូមមើល ម៉ាថាយ ២២:៣៧–៣៩ ) ។ យើងបង្ហាញសេចក្ដីស្រឡាញ់របស់យើងចំពោះព្រះ នៅពេលយើងគោរពតាមបទបញ្ញត្តិរបស់ទ្រង់ និងបម្រើដល់បុត្រាបុត្រីរបស់ទ្រង់ ( សូមមើល យ៉ូហាន ១៤:១៥ ) ។
កិច្ចការនៃសេចក្តីសង្រ្គោះ និងភាពតម្កើងឡើងផ្តោតទៅលើការទទួលខុសត្រូវចំនួនបួន ដែលបានតែងតាំងដោយព្រះ ។ ការទទួលខុសត្រូវទាំងនេះត្រូវបានគូសបញ្ជាក់ដូចខាងក្រោម ។
ក្បួនខ្នាតនេះនឹងជួយអ្នកឲ្យយល់ពីផ្នែកទាំងបួននេះនៃកិច្ចការរបស់ព្រះ ។ ព្រះវិញ្ញាណបរិសុទ្ធនឹងណែនាំអ្នក នៅពេលអ្នកធ្វើចំណែករបស់អ្នកនៅក្នុងការបំពេញតាមផ្នែកទាំងនេះ ( សូមមើល នីហ្វៃទី២ ៣២:៥ ) ។
១.២.១
ការរស់នៅតាមដំណឹងល្អរបស់ព្រះយេស៊ូវគ្រីស្ទ
ការរស់នៅតាមដំណឹងល្អរបស់ព្រះយេស៊ូវគ្រីស្ទ រួមមាន ៖
-
ការអនុវត្តសេចក្តីជំនឿទៅលើព្រះគ្រីស្ទ ការប្រែចិត្តជារៀងរាល់ថ្ងៃ ការចុះសេចក្តីសញ្ញាជាមួយព្រះ នៅពេលយើងទទួលពិធីបរិសុទ្ធនៃសេចក្តីសង្រ្គោះ និងភាពតម្កើងឡើង ហើយនិងការស៊ូទ្រាំដល់ទីបំផុត តាមរយៈការគោរពតាមសេចក្តីសញ្ញាទាំងនោះ ( សូមមើល ៣.៥.១ ) ។
-
ការរៀនសូត្រ និងការបង្រៀនដំណឹងល្អរបស់ព្រះយេស៊ូវគ្រីស្ទនៅឯផ្ទះ និងនៅឯព្រះវិហារ ។
-
ការធ្វើជាមនុស្សដែលមានភាពខ្លួនទីពឹងខ្លួននៅក្នុងការផ្គត់ផ្គង់ដល់ខ្លួនរបស់យើង និងក្រុមគ្រួសាររបស់យើង ទាំងខាងវិញ្ញាណ និងខាងសាច់ឈាម ។
១.២.២
ការមើលថែដល់អ្នកខ្វះខាត
ការមើលថែដល់អ្នកខ្វះខាត រួមមាន ៖
-
ការបម្រើ និងការផ្ដល់ការងារបម្រើដល់បុគ្គលម្នាក់ៗ ក្រុមគ្រួសារ និងសហគមន៍ ។
-
ការចែករំលែកធនធានទាំងឡាយជាមួយអ្នកដែលខ្វះខាត រួមទាំងការជួយដល់សាសនាចក្រផងដែរ ។
-
ការជួយអ្នកដទៃឲ្យធ្វើជាមនុស្សដែលមានភាពខ្លួនទីពឹងខ្លួន ។
១.២.៣
ការអញ្ជើញមនុស្សទាំងអស់ឲ្យទទួលយកដំណឹងល្អ
ការអញ្ជើញមនុស្សទាំងអស់ឲ្យទទួលយកដំណឹងល្អ រួមមាន ៖
-
ការចូលរួមនៅក្នុងកិច្ចការផ្សព្វផ្សាយសាសនា និងការបម្រើជាអ្នកផ្សព្វផ្សាយសាសនា ។
-
ការជួយដល់សមាជិកថ្មី និងសមាជិកដែលត្រឡប់មកកាន់សាសនាចក្រវិញឲ្យរីកចម្រើននៅលើផ្លូវនៃសេចក្តីសញ្ញា ។
១.២.៤
ការបង្រួបបង្រួមក្រុមគ្រួសារសម្រាប់ភាពអស់កល្បជានិច្ច
ការបង្រួបបង្រួមក្រុមគ្រួសារសម្រាប់ភាពអស់កល្បជានិច្ច រួមមាន ៖
-
ការចុះសេចក្តីសញ្ញានៅពេលយើងទទួលពិធីបរិសុទ្ធនៅក្នុងព្រះវិហារបរិសុទ្ធសម្រាប់ខ្លួនយើងផ្ទាល់ ។
-
ការស្វែងរកបុព្វការីជនរបស់យើងដែលបានទទួលមរណភាពទៅ ហើយធ្វើពិធីបរិសុទ្ធសម្រាប់ពួកគាត់នៅក្នុងព្រះវិហារបរិសុទ្ធ ដើម្បីពួកគាត់អាចចុះសេចក្តីសញ្ញាជាមួយព្រះបាន ។
-
ការទៅព្រះវិហារបរិសុទ្ធជាប្រចាំតាមដែលអាចធ្វើបាន ដើម្បីថ្វាយបង្គំព្រះ និងធ្វើពិធីបរិសុទ្ធឲ្យបុត្រាបុត្រីរបស់ទ្រង់ ។
១.៣
គោលបំណងនៃសាសនាចក្រ
ព្រះយេស៊ូវគ្រីស្ទបានស្ថាបនាសាសនាចក្ររបស់ទ្រង់ដើម្បីឲ្យបុគ្គលម្នាក់ៗ និងក្រុមគ្រួសារទាំងឡាយអាចធ្វើកិច្ចការនៃសេចក្តីសង្រ្គោះ និងភាពតម្កើងឡើងបាន ( សូមមើល អេភេសូរ ៤:១១–១៣; សូមមើលផងដែរ ២.២ នៅក្នុងក្បួនខ្នាតនេះ ) ។ ដើម្បីជួយសម្រេចគោលបំណងដ៏ទេវភាពនេះ នោះសាសនាចក្រ និងថ្នាក់ដឹកនាំរបស់សាសនាចក្រផ្តល់ជូននូវ ៖
-
សិទ្ធិអំណាចបព្វជិតភាព និងកូនសោទាំងឡាយ ។
-
សេចក្ដីសញ្ញា និងពិធីបរិសុទ្ធ ។
-
ការណែនាំពីព្យាការី ។
-
ព្រះគម្ពីរ ។
-
ជំនួយក្នុងការរៀនសូត្រ និងការបង្រៀនដំណឹងល្អ ។
-
ឱកាសក្នុងការបម្រើ និងភាពជាអ្នកដឹកនាំ ។
-
សហគមន៍នៃពួកបរិសុទ្ធ ។
១.៣.១
សិទ្ធិអំណាចបព្វជិតភាព និងកូនសោទាំងឡាយ
តាមរយៈបព្វជិតភាព ព្រះសម្រេចបាននូវកិច្ចការនៃសេចក្តីសង្រ្គោះ និងភាពតម្កើងឡើង ។ សិទ្ធិអំណាចបព្វជិតភាព និងកូនសោទាំងឡាយដែលចាំបាច់ដើម្បីដឹកនាំកិច្ចការរបស់ព្រះនៅលើផែនដី ត្រូវបានស្តារឡើងវិញដល់ព្យាការីយ៉ូសែប ស្ម៊ីធ ( សូមមើល គោលលទ្ធិ និង សេចក្ដីសញ្ញា ១១០:១១–១៦; ១១២:៣០; សូមមើលផងដែរ ៣.១ នៅក្នុងក្បួនខ្នាតនេះ ) ។ កូនសោទាំងនេះត្រូវបានកាន់ដោយថ្នាក់ដឹកនាំនៃសាសនាចក្រនាសព្វថ្ងៃនេះ ។ ពួកលោកហៅ ហើយផ្តល់សិទ្ធិអំណាចឲ្យអ្នកផ្សេងទៀតដើម្បីជួយនៅក្នុងកិច្ចការរបស់ព្រះ ( សូមមើល គោលលទ្ធិ និង សេចក្ដីសញ្ញា ១០៧:៨, ៦៥–៦៧ ) ។
១.៣.២
សេចក្ដីសញ្ញា និងពិធីបរិសុទ្ធ
នៅក្នុងផែនការរបស់ព្រះវរបិតាសួគ៌ យើងចុះសេចក្តីសញ្ញានៅពេលយើងទទួលពិធីបរិសុទ្ធនៃសេចក្តីសង្គ្រោះ និងភាពតម្កើងឡើង ដូចជា ពិធីបុណ្យជ្រមុជទឹកជាដើម ( សូមមើល យ៉ូហាន ៣:៥; សូមមើលផងដែរ ជំពូកទី ១៨ នៅក្នុងក្បួនខ្នាតនេះ ) ។ សេចក្តីសញ្ញា និងពិធីបរិសុទ្ធទាំងនេះ គឺសំខាន់សម្រាប់យើងដើម្បីប្រែក្លាយកាន់តែដូចជាព្រះ ហើយត្រឡប់ទៅរស់នៅក្នុងវត្តមានរបស់ទ្រង់វិញ ( សូមមើល គោលលទ្ធិ និង សេចក្ដីសញ្ញា ៨៤:១៩–២២ ) ។
១.៣.៣
ការណែនាំពីព្យាការី
តាមរយៈពួកព្យាការីដែលបានជ្រើសរើសរបស់ទ្រង់ នោះព្រះបើកសម្តែងសេចក្តីពិត និងផ្តល់ការណែនាំដ៏បំផុសគំនិត និងការព្រមានទាំងឡាយ ( សូមមើល អេម៉ុស ៣:៧; គោលលទ្ធិ និង សេចក្តីសញ្ញា ១:៤ ) ។ សេចក្តីណែនាំនេះជួយយើងឲ្យដើរចូល និងបន្តដើរនៅលើផ្លូវដែលដឹកនាំទៅរកជីវិតដ៏នៅអស់កល្បជានិច្ច ។
១.៣.៤
ព្រះគម្ពីរ
ក្រោមការណែនាំពីព្យាការី និងពួកសាវករបស់ព្រះអម្ចាស់ នោះសាសនាចក្រផ្តល់ឲ្យ និងរក្សាព្រះបន្ទូលនៃព្រះដូចដែលមាននៅក្នុងព្រះគម្ពីរដ៏បរិសុទ្ធទាំងឡាយ ។ ព្រះគម្ពីរថ្លែងទីបន្ទាល់អំពីព្រះគ្រីស្ទ បង្រៀនដំណឹងល្អរបស់ទ្រង់ ហើយជួយយើងឲ្យអនុវត្តសេចក្តីជំនឿលើទ្រង់ ( សូមមើល យ៉ាកុប ៧:១០–១១; ហេលេមិន ១៥:៧ ) ។
១.៣.៥
ជំនួយក្នុងការរៀនសូត្រ និងការបង្រៀនដំណឹងល្អ
សាសនាចក្រគាំទ្រដល់បុគ្គលម្នាក់ៗ និងក្រុមគ្រួសារនៅក្នុងការទទួលខុសត្រូវរបស់ពួកគេដើម្បីរៀនសូត្រពីសេចក្ដីពិតទាំងឡាយនៃដំណឹងល្អ ហើយបង្រៀនសេចក្ដីពិតទាំងនេះដល់សមាជិកគ្រួសារ និងមនុស្សដទៃទៀត ( សូមមើល គោលលទ្ធិ និង សេចក្ដីសញ្ញា ៨៨:៧៧–៧៨, ១១៨; សូមមើលផងដែរ ២.២.៣ នៅក្នុងក្បួនខ្នាតនេះ ) ។
១.៣.៦
ឱកាសក្នុងការបម្រើ និងភាពជាអ្នកដឹកនាំ
តាមរយៈការហៅ និងការចាត់តាំងទាំងឡាយនៅក្នុងសាសនាចក្រ នោះព្រះប្រទានឱកាសបម្រើ និងដឹកនាំដល់សមាជិកទាំងឡាយ ។ សាសនាចក្រផ្ដល់រចនាសម្ព័ន្ធដើម្បីជួយមើលថែសមាជិកដែលខ្វះខាត ហើយផ្ដល់ជំនួយសប្បុរសធម៌ដល់មនុស្សដទៃ ( សូមមើល ម៉ូសាយ ១៨:២៧–២៩ ) ។
១.៣.៧
សហគមន៍នៃពួកបរិសុទ្ធ
ក្នុងនាមជាសហគមន៍មួយនៃពួកបរិសុទ្ធ សមាជិកសាសនាចក្រប្រមូលផ្ដុំគ្នាជាទៀងទាត់ដើម្បីថ្វាយបង្គំព្រះ ហើយចងចាំដល់ព្រះអង្គសង្គ្រោះតាមរយៈការទទួលទានសាក្រាម៉ង់ ( សូមមើល មរ៉ូណៃ ៦:៤–៦; គោលលទ្ធិ និង សេចក្តីសញ្ញា ២០:៧៧ ) ។ សមាជិកក៏មើលថែ ហើយផ្ដល់ការងារបម្រើដល់គ្នាទៅវិញទៅមកផងដែរ ( សូមមើល អេភេសូរ ២:១៩ ) ។
១.៤
តួនាទីរបស់អ្នកនៅក្នុងកិច្ចការរបស់ព្រះ
ក្នុងនាមជាអ្នកដឹកនាំម្នាក់នៅក្នុងសាសនាចក្រ អ្នកត្រូវបានហៅឲ្យបង្រៀន ហើយគាំទ្រដល់មនុស្សដែលអ្នកបម្រើ ពេលពួកគេចូលរួមនៅក្នុងកិច្ចការនៃសេចក្ដីសង្គ្រោះ និងភាពតម្កើងឡើង ( សូមមើល ១.២ ) ។ អ្នកមានការទទួលខុសត្រូវដើម្បីបំពេញការហៅរបស់អ្នក ហើយ « បង្រៀន … នូវព្រះបន្ទូលនៃព្រះឲ្យអស់ពីសេចក្ដីព្យាយាម » ( យ៉ាកុប ១:១៩ ) ។ ការធ្វើការជាមួយនឹងព្រះអម្ចាស់នៅក្នុងចម្ការទំពាំងបាយជូររបស់ទ្រង់នឹងនាំឲ្យអ្នកមានអំណរដ៏ខ្លាំង ( សូមមើល យ៉ាកុប ៥:៧០–៧២ ) ។
ដោយមានការយល់ដឹងដ៏ច្បាស់មួយអំពីកិច្ចការរបស់ព្រះ អំពីអ្វីដែលទ្រង់បានអញ្ជើញអ្នកឲ្យធ្វើ និងអំពីគោលបំណងនៃសាសនាចក្ររបស់ទ្រង់ នោះវានឹងជួយអ្នកឲ្យផ្ដោតលើការប្រឹងប្រែងរបស់អ្នក ដើម្បីនាំព្រលឹងទាំងឡាយឲ្យមករកព្រះគ្រីស្ទ ។ ការរក្សាទស្សនវិស័យនេះនៅក្នុងគំនិតនឹងធ្វើឲ្យអ្នកដើរស្របគ្នានឹងព្រះអង្គសង្គ្រោះ ហើយដឹកនាំរាល់កិច្ចការដែលអ្នកធ្វើក្នុងនាមជាអ្នកដឹកនាំម្នាក់ក្នុងសាសនាចក្រ ។
សូមយោងជារឿយៗទៅគោលការណ៍ទាំងឡាយនៅក្នុងជំពូកនេះ ។ សូមខិតខំប្រកបដោយការអធិស្ឋានដើម្បីដឹងពីរបៀបដែលអ្នកអាចជួយធ្វើឲ្យព្រះរាជបំណងរបស់ព្រះកើតឡើងនៅក្នុងជីវិតនៃមនុស្សដែលអ្នកបម្រើ ។ ព្រះនឹងដឹកនាំអ្នកតាមរយៈការបំផុសគំនិតនៃព្រះវិញ្ញាណបរិសុទ្ធ ។