12.

Praemeri

12.1

Stamba Tingting mo Oganaesesen

Oganaesesen blong Praemeri i helpem ol pikinini blong God blong oli rere blong gobak long ples blong Hem. Taem oli kam blong lavem gospel blong Jisas Kraes, bae oli “stanap strong mo no muvmuv, mekem plante gudfala wok oltaem” (Mosaea 5:15).

12.1.1

Ol Stamba Tingting

Praemeri i helpem ol pikinini:

• Blong oli filim lav we Papa long Heven i gat long olgeta, mo blong oli lanem abaot plan blong Hem blong man i stap hapi.

• Blong oli lan abaot Jisas Kraes mo rol blong Hem insaed long plan blong Papa long Heven.

• Lanem mo laef folem gospel blong Jisas Kraes.

• Blong oli filim, luksave mo mekem samting folem wanem Tabu Spirit i lidim olgeta blong mekem.

• Blong oli rere from, blong oli mekem mo stap kipim ol tabu kavenan.

• Tekpat long wok blong God blong fasin blong sevem man mo fasin blong kam olsem wan god.

12.1.2

Praemeri Stamba Toktok

Stamba toktok blong Praemeri i stap rimaenem yumi abaot ol blesing blong stap givim seves insaed long Praemeri:

“Mo evri pikinini blong yu bae Lod i tijim olgeta; mo pis we i stap wetem ol pikinini blong yu bae i bigwan” (Aesea 54:13; 3 Nifae 22:13).

12.1.3

Neseri

Neseri i helpem ol pikinini we oli gat 18 manis i go kasem 3 yia blong oli filim lav we Papa long Heven i gat long olgeta, mo blong oli lanem abaot plan blong Hem blong man i stap hapi.

Ol lida blong neseri oli lavem, oli tijim, mo oli givhan long ol pikinini. Mo tu, oli meksua we ol pikinini oli stap sef mo oli stap gud.

I mas gat tu (2) pipol we bae oli mas singaotem olgeta blong wanwan klas blong neseri. Sapos ol lida blong neseri oli no wan hasban mo waef, nao tufala pipol ia, tufala i mas tu sista o tu brata.

Taem blong neseri i stap long ful taem ia we Praemeri i stap tekples long hem. Blong moa infomesen, luk long 12.1.4 mo 12.3.5.

12.1.4

Ol Klas

Ol Praemeri klas oli helpem ol pikinini blong oli filim lav blong Papa long Heven mo lanem abaot plan blong Hem blong stap glad. Ol lesen oli folem kurikulom blong Kam Folem Mi . Long ol namba faef Sandei, oli leftemap tingting blong ol tija blong yusum “Apendiks B: Blong Praemeri—Stap Mekem Rere Ol Pikinini from wan Laeftaem long Kavenan Rod blong God.”

Ol Praemeri klas, oli oganaesem olgeta i folem yia mo namba blong ol tija we oli stap. Ol yunit we oli no gat wan bigfala namba blong ol pikinini o tija oli save kombaenem tu o moa yia grup long wan klas. Long ol yunit we oli bigwan, ol lida blong Praemeri oli save mekem moa long wan klas blong wan semfala yia grup, mo i save gat moa bitim wan neseri klas.

Taem i gat inaf pikinini, oli serem olgeta long ol klas we i folem yia blong olgeta long 31 Disemba blong yia bifo, olsem we oli soem long jat ia we i kam afta:

Yia long 31 Disemba blong Yia Bifo	Yia long namba 1 Jenuware
Yia long 31 Disemba blong Yia Bifo 2	Yia long namba 1 Jenuware Neseri (ol pikinini oli joenem neseri taem oli gat 18 manis)
Yia long 31 Disemba blong Yia Bifo 3	Yia long namba 1 Jenuware Sanbim
Yia long 31 Disemba blong Yia Bifo 4	Yia long namba 1 Jenuware JR 4
Yia long 31 Disemba blong Yia Bifo 5	Yia long namba 1 Jenuware JR 5
Yia long 31 Disemba blong Yia Bifo 6	Yia long namba 1 Jenuware JR 6
Yia long 31 Disemba blong Yia Bifo 7	Yia long namba 1 Jenuware JR 7
Yia long 31 Disemba blong Yia Bifo 8	Yia long namba 1 Jenuware Valien 8
Yia long 31 Disemba blong Yia Bifo 9	Yia long namba 1 Jenuware Valien 9
Yia long 31 Disemba blong Yia Bifo 10	Yia long namba 1 Jenuware Valien 10

Plante taem, ol pikinini oli muv long Praemeri i go long Ol Yang Woman o kworom blong ol dikon long Jenuware blong yia ia we oli kasem 12 yia. Oli save kasem setifiket blong advensmen. Ol setifiket ia, oli save mekem olgeta wetem Ol Risos blong Ol Lida mo Klak.

Long samfala situesen, wan we i gat 11 yia maet bae i rere blong aot long Praemeri. Bisop, papa mo mama, mo pikinini oli kaonsel tugeta abaot taem blong muv.

Ol pikinini oli no save komplitim Praemeri bifo manis Jenuware blong yia ia we oli kasem 12 yia. Mo tu, ol yang man oli no save odenem olgeta oli kam dikon bifo long tetaem ia.

12.1.5

Taem blong Singsing

Singsing taem i helpem ol pikinini blong oli filim lav we Papa long Heven i gat long olgeta, mo blong oli lanem abaot plan blong Hem blong man i stap hapi. Taem ol pikinini oli stap singsing abaot ol prinsipol blong gospel, Tabu Spirit i stap testifae se ol prinsipol ia oli tru. Ol toktok mo miusik bae i stap insaed long maen mo hat blong ol pikinini truaot long laef blong olgeta.

Singsing taem, hem i defren long klas taem. Long taem blong singsing taem, ol pikinini oli stap lanem samting long semtaem we oli stap singsing. Ol Praemeri miusik lida oli tijim ol gospel prinsipol, be tu, oli mekem hemia faswan tru long miusik.

Praemeri presidensi mo miusik lida i jusum ol singsing blong wanwan manis blong sapotem ol gospel prinsipol we ol pikinini oli stap lanem insaed long ol klas blong olgeta, mo insaed long hom. Ol singsing we oli kam sapotem ol prinsipol ia, oli stap tu insaed long Kam Folem Mi.

Blong gat moa infomesen, luk long “Ol Instraksen blong Singsing Taem mo Sakramen Miting Presentesen blong Ol Pikinini.” Luk tu long 12.1.6 mo 12.3.4 insaed long hanbuk ia.

12.1.6

Sakramen Miting Presentesen blong Ol Pikinini

Yia sakramen miting presentesen blong ol pikinini, oli holem long ol las manis blong yia. Pikinini i presentem wanem we oli bin lanem long hom mo long jos long taem blong yia. Oli helpem kongregesen blong lukluk nomo long Papa long Heven, Sevya mo ol tijing blong Tufala.

Praemeri presidensi mo miusik lida oli prea mo mekem plan blong presentesen. Bisoprik i givim daereksen. Ol pikinini oli save singsing, givim ol toktok, mo serem ol stori, ol skripja o ol testemoni.

Presentesen ia, i save tekem ful pat, o wan pat blong miting taem afta long sakramen. Ol yunit we oli gat samfala pikinini nomo oli save invaetem ol memba blong famli blong tekpat.

Blong kipim sakramen miting i tabu, insaed long presentesen ia i no mas gat ol samting we bae ol pikinini i soem olsem ol pikja, i no mas gat ol yunifom, o ol media presentesen.

Blong gat moa infomesen, luk long “Ol Instraksen blong Singsing Taem mo Sakramen Miting Presentesen blong Ol Pikinini” long Kam Folem Mi.

12.1.7

Miting blong Rere from Tempol mo Prishud

Ol papa mo mama oli gat fasfala responsabiliti ia blong tijim ol pikinini blong olgeta.abaot tempol mo prishud. Blong sapotem olgeta, Praemeri presidensi i mekem plan blong holem wan miting, evri yia, blong Rere from Tempol mo Prishud. Bisoprik i givim daereksen. Miting ia, hem i blong ol pikinini insaed long Valien 10 klas. Oli invaetem ol papa mo mama blong kam. Miting ia, ol stamba tingting blong hem i go olsem:

• Helpem ol pikinini blong oli andastanem ol stamba tingting, ol responsabiliti mo ol blesing blong prishud.

• Helpem ol pikinini blong tekpat long wok blong tempol mo famli histri, mo blong oli rere blong mekem mo kipim ol tabu kavenan.

• Helpem ol boe blong rere blong kasem Aronik Prishud.

• Helpem ol pikinini blong rere blong kasem wan tempol rekomen.

Miting ia, bae oli save holem long taem blong Praemeri long Sandei, long wan nara taem long Sandei, o long wan defren taem. Wan memba blong bisoprik i lidim miting. I mas gat wan memba blong Praemeri presidensi i stap long miting ia.

Sapos wan yunit i no gat tumas pikinini, bae oli save holem miting ia anda long daereksen blong stek presidensi. Sam, mo evriwan long ol wod insaed long stek oli save mit tugeta.

Blong gat moa infomesen, luk long Rere from Tempol mo Prishud long ChurchofJesusChrist.org.

12.2

Stap Tekpat long Wok blong God blong Fasin blong Sevem Man mo Fasin blong Kam Olsem Wan God

God i stap invaetem evriwan blong i go long Kraes mo help long wok ia blong Hem taem oli:

• Stap laef folem gospel blong Jisas Kraes.

• Yumi stap kea long olgeta we oli stap long nid.

• Yumi stap invaetem evriwan blong akseptem gospel.

• Yumi stap joenem ol famli blong taem we i no save finis.

Praemeri i stap helpem ol pikinini, ol famli, ol lida mo ol tija blong tekpat long wok. Blong gat moa infomesen abaot wok blong God blong fasin blong sevem man mo fasin blong kam olsem wan god, stadi long japta 1.

12.2.1

Stap Laef Folem Gospel blong Jisas Kraes

12.2.1.1

Rol blong Ol Papa mo Mama mo Ol Lida

Papa mo mama, tufala i responsibol blong stap tijim ol pikinini blong tufala abaot gospel mo blong stap helpem olgeta blong laef folem gospel ia (luk long Doktrin mo Ol Kavenan 68:25–28). Ol Praemeri lida mo ol tija oli sapotem ol papa mo mama long responsabiliti ia long ol wei ia:

• Oli meksua se ol lesen blong Praemeri, singsing taem, mo seves mo ol aktiviti, oli helpem ol pikinini blong folem eksampol blong Sevya.

• Oli helpem ol pikinini blong rere from baptaes mo konfemesen.

• Oli helpem ol boe blong oli rere from odinesen long prishud.

• Oli helpem ol pikinini blong oli rere blong kasem wan tempol rekomen mo kasem ol odinens blong tempol.

• Oli tijim ol pikinini abaot ol blesing blong stap serem gospel, we i tekem tu fultaem misinari seves.

Ol lida oli mas lisin mo luklukgud long ol ol pikinini we oli no stap kasem famli sapot blong stap laef folem gospel.

Ol papa mo mama, mo ol lida oli traehad blong stap ol gudfala eksampol long ol pikinini. Oli leftemap tingting blong ol pikinini blong olgeta long ol hadwok blong olgeta blong oli kam moa olsem Jisas Kraes. Program ia blong Ol Pikinini mo Ol Yut i save stap olsem wan risos blong helpem ol pikinini we yia blong olgeta i stat long 8–11 (luk long ChildrenandYouth.ChurchofJesusChrist.org).

12.2.1.2

Stap Lanem Gospel

Ol lida blong Praemeri mo ol tija oli leftemap tingting blong ol pikinini mo famli blong olgeta blong oli lanem gospel insaed long hom. Ol lida mo tija ia, oli stadi long gospel, mo oli serem wanem we oli lanem wetem ol pikinini. Oli invaetem ol pikinini blong serem long Jos wanem we oli stap lanem insaed long hom.

Ol Sandei Praemeri miting oli helpem ol pikinini blong mekem i kam tru ol stamba tingting ia blong Praemeri (luk long 12.1.1). Wan memba blong Praemeri presidensi nao i lidim opening blong miting ia. Miusik lida i lidim singsing taem. Ol praemeri tija oli tijim ol pikinini long taem blong ol klas.

Ol praemeri miting blong ol pikinini we yia blong olgeta i stat long 3 kasem 11, oli stap holem olgeta evri Sandei blong 50 minit, mo ol adalt mo ol yut oli go long klas blong olgeta. Taemtebol hem i go olsem:

Pat blong Miting	Hao long
Pat blong Miting Opening (prea, skripja o Toktok blong Bilif, mo toktok—evriwan ia, ol pikinini nao oli givim)	Hao long 5 minit
Pat blong Miting Singsing Taem	Hao long 20 minit
Pat blong Miting Muv i go long nara klas	Hao long 5 minit
Pat blong Miting Ol klas mo las prea	Hao long 20 minit

Long ol wod wetem plante pikinini, ol lida blong Praemeri oli save serem ol pikinini long tufala defren grup. Wan grup i stap long klas mo narawan i stap long singsing taem. Afta, tufala grup i jenisim ples. Ol lida oli stretem taem olsem we i nid.

Neseri, hem i blong ol pikinini we oli gat 18 manis i go kasem 3 yia, mo klas i blong 50 minit. Behold Your Little Ones i givim wan eksampol blong wan taemtebol. Ol pikinini oli stat blong go long neseri taem oli gat 18 manis.

12.2.1.3

Seves mo Ol Aktiviti

Stat long manis Jenuware blong yia ia we bae oli kasem 8 yia, ol pikinini oli save stat blong go long ol Praemeri aktiviti. Blong kasem ol jeneral aktiviti gaedlaen, luk long japta 20.

Ol Praemeri aktiviti lida oli mekem plan blong holem ol seves mo ol aktiviti we oli helpem ol pikinini blong oli tekpat long wok blong God blong fasin blong sevem man mo hemia blong kam olsem wan god, i hapen. Seves mo ol aktiviti oli mas mekem evriwan i gat gud taem mo oli tekpat. Oli bildimap ol testemoni, oli mekem ol famli oli kam strong moa, mo oli pusum wan blong groap long laef blong hem.

Ol Praemeri aktiviti, oli holem long wan dei we i no Sandei o i no Mandei. Ol adalt lida oli help blong meksua se ol aktiviti ia oli sef (luk long safety.ChurchofJesusChrist.org; luk tu long 20.7 insaed long hanbuk ia). Meksua se i gat tu (2) adalt lida we oli gat responsibol fasin blong mas stap long evri aktiviti (luk long 12.5.1

Ol gaedlaen ia, bae oli save stretem folem ol lokol situesen:

• Ol praemeri aktiviti, oli holem olgeta tu taem long wan manis taem i posibol. Oli save holem ol aktiviti ia plante moa taem, o oli save daonem namba blong ol aktiviti ia. Ol lida oli lukluk long ol situesen blong famli, ples blong wokbaot o travel long hem, mo mane blong spendem mo sefti.

• Plante taem, oli oganaesem ol pikinini i folem ol yia grup. Ol boe mo ol gel oli mit seperet long nomol taem. Be, oli save kombaen blong holem samfala aktiviti o oli save kombaen long ol ples we i no gat tumas pikinini.

• Ol lida oli save jusum blong mekem plan mo holem ol yia dei kamp blong ol pikinini blong Praemeri, we yia blong olgeta i stat long 8 kasem 11 yia. Ol aktiviti blong Praemeri, we i tekem tu ol kamp long deitaem, i no save stap ovanaet.

Mane blong pem evri saplae mo ol aktiviti, wetem ol dei kamp, i kamaot long bajet blong wod. Travel mo mane we bae oli spendem bae i no mas sas tumas.

Bisoprik i meksua se bajet mo ol aktiviti blong ol boe mo gel long Praemeri oli inaf mo oli serem i ikwol. Oli givim bajet i folem namba blong ol pikinini.

Blong kasem moa infomesen, luk long ChildrenandYouth.ChurchofJesusChrist.org. Luk tu long JustServe.org, long ol ples we i gat hemia i stap. Olgeta risos ia oli givim seves mo ol aedia blong aktiviti.

12.2.1.4

Divelopmen blong Yuwan

Long ol hadwok blong olgeta blong oli kam moa olsem Sevya, oli stap invaetem ol pikinini—stat long yia ia we oli kasem eit yia—blong setem ol gol blong groap long saed blong spirit, sosol laef, bodi mo waes (luk long Luk 2:52). Wetem help blong papa mo mama, ol pikinini oli lukaotem insperesen blong faenemaot wanem blong wok long hem. Oli mekem ol plan, oli tekem aksen folem ol plan blong olgeta, mo oli tingtingbak long wanem we oli bin lanem. Ol lida oli givim sapot olsem we i nid blong mekem. Be, oli no sapos blong folemap ol gol o progres blong ol pikinini.

Stat long yia we oli kasem 8 yia, oli leftemap tingting blong ol pikinini blong komplitim wan gol, o moa long wan gol long wanwan long ol fofala eria ia, evri yia. Oli save yusum Divelopmen blong Yuwan: Gaedbuk blong Ol Pikinini blong setemap mo rekodem ol gol blong olgeta.

Blong kasem moa infomesen, luk long ChildrenandYouth.ChurchofJesusChrist.org.

12.2.2

Stap Kea long Olgeta long Nid

Ol pikinini oli mas gat ol taem we i tekem ples oltaem blong oli givim seves long ol narawan, insaed mo wetem ol famli blong olgeta, mo tu, long taem blong ol Praemeri aktiviti. Ol aedia blong wei blong givim seves oli stap long ChildrenandYouth.ChurchofJesusChrist.org. Long weaples i gat, JustServe.org i givim sam janis blong mekem komuniti seves.

12.2.3

Stap Invaetem Evriwan blong Akseptem Gospel

Ol pikinini oli save invaetem evriwan blong akseptem gospel long plante wei. Sam long ol wei ia oli stap andanit ia:

• Stap olsem wan gud eksampol blong stap wan disaepol blong Jisas Kraes.

• Serem ol testemoni blong olgeta wetem ol fren mo ol memba blong famli.

• Givhan long ol lesaktiv memba blong klas.

• Invaetem ol fren blong oli kam long jos, long ol aktiviti, o long ol baptaes, o blong ol misinari oli tijim olgeta.

• Invaetem ol fren blong oli tekpat long program blong Ol Pikinini mo Ol Yut. Ol lida oli mas wok kolosap moa wetem ol mama mo papa blong ol ol pikinini ia blong helpem olgeta oli andastanem program ia mo blong luksave olsem wanem nao olgeta mo ol pikinini blong olgeta oli wantem pat long program ia.

• Invaetem ol fren mo ol memba blong famli blong kam long yia sakramen miting presentesen blong ol pikinini.

12.2.4

Stap Joenem Ol Famli blong Taem we I No Save Finis

Ol pikinini oli save help blong yunaetem ol famli blong taem we i no save finis long plante wei. Sam long ol wei ia oli stap andanit ia:

• Givim ona long papa mo mama blong olgeta mo stap olsem wan eksampol blong fasin blong stap laef insaed long hom blong olgeta, we i olsem fasin blong Kraes.

• Rere blong gat stret famli blong olgeta we i no save finis.

• Traehad blong stap klin inaf blong kasem wan tempol rekomen long stret yia blong olgeta.

• Rere blong mekem mo kipim ol kavenan mo kasem ol odinens blong tempol, we i tekem tu mared we i no save finis.

• Lanem abaot ol narafala famli mo bubu blong olgeta (luk long Famli blong Mi: Ol Stori we Oli Karem Mifala I Kam Tugeta).

• Faenemaot nem blong ol bubu we oli nidim blong kasem ol odinens blong tempol (luk long FamilySearch.org).

• Stap rere blong tekpat long ol baptaes mo ol konfemesen long bihaf blong ol dedman.

• Tekpat long wok blong indeksing wetem wan memba blong famli (luk long FamilySearch.org/indexing).

12.3

Wod Praemeri Lidasip

12.3.1

Bisoprik

Fasfala mo moa impoten responsabiliti blong bisop, hem i blong helpem jeneresen ia we i stap kam antap insaed long wod blong hem. Bisop mo kaonsela blong hem we hem i givim wok ia long hem, tufala i mit oltaem wetem Praemeri presiden.

Bisop mo ol kaonsela blong hem oli mekem kwik blong lukluk long ol tingting we oli kam long Praemeri presidensi long saed blong olgeta blong singaotem blong mekem wok insaed long Praemeri. Bisop i wok wetem presidensi blong mekemsua se oltaem i gat ol tija mo ol miusik lida. Taem we i posibol, ol memba we oli holem ol koling ia, oli mas givim seves longtaem inaf blong stap stanemap ol rilesensip blong lav mo tras wetem ol pikinini. Ol kaen rilesensip olsem, i help blong fidim ol testemoni insaed long hat blong ol pikinini.

Bisop mo ol kaonsela blong hem, oltaem oli go long Praemeri. Mo tu, oli lanem ol nem blong olgeta mo oli andastanem hom situesen blong wanwan pikinini insaed long wod.

12.3.2

Praemeri Presidensi

Bisop i singaotem mo i setem apat wan adalt woman blong i givim seves olsem presiden blong Praemeri long wod. Sapos wan yunit i bigwan inaf, presiden blong Praemeri i givim nem blong wan o tu adalt woman, blong bisop i singaotem olsem ol kaonsela blong hem (luk long japta 30). Bisoprik i save tingting long ol nem ia, mo i save givimaot ol koling.

Praemeri presidensi i kasem trening mo sapot oltaem we i kam long stek Praemeri presidensi.

Long wan yunit we i smol, Praemeri presiden bae i wan Praemeri lida ia nomo we bae oli singaotem. Long kes olsem, hem i wok wetem papa mo mama blong ol pikinini blong oli oganaesem ol lesen, gat singsing taem, mo ol aktiviti. Hem i meksua se i mas gat tu adalt wetem responsibol fasin we tufala i stap oltaem long evri miting mo long evri aktiviti. Sapos yunit i bigwan inaf, bae oli save fulumap ol posisen blong ol koling i folem oda ia: ol kaonsela, miusik lida, ol tija mo neseri lida, sekretari, mo ol aktiviti lida.

Long wan branj we i no gat wan presiden blong Praemeri, Rilif Sosaeti presiden i save helpem ol papa mo mama blong oganaesem instraksen blong ol pikinini blong olgeta kasem taem we oli singaotem presiden blong Praemeri.

Praemeri Presidensi i helpem ol papa mo mama blong help mekem rere ol pikinini blong kam insaed mo progres folem kavenan rod ia. Hemia i wan long ol moa impoten responsabiliti blong olgeta.

Blong mekem hemia, Praemeri presiden i save givim wok long wan memba blong presidensi blong hem i helpem ol mama mo papa blong mekem ol pikinini blong olgeta oli rere blong oli kasem baptaes mo kasem konfemesen. Praemeri presiden i save givim wok long wan nara memba blong presidensi blong hem i helpem ol mama mo papa blong ol pikinini blong olgeta oli rere blong go long tempol mo kasem prishud.

Ol memba blong presidensi ia, oli mekem ol papa mo mama oli save abaot ol risos we oli stap insaed long Gospel Library, we i save helpem olgeta. Luk, eksampol: “Stap Mekem Rere Ol Pikinini blong Yu blong Stap long Kavenan Rod blong God blong wan Laef Taeminsaed long Kam Folem Mi. Ol memba blong presidensi oli save wok wetem ol givhan brata mo sista, ol tija, mo ol narawan blong sapotem ol papa mo mama.

Praemeri presiden i gat sam moa responsabiliti ia: Ol kaonsela blong hem oli stap helpem hem.

• I stap olsem wan memba blong wod kaonsel. Hem i givim seves olsem (1) wan memba blong kaonsel we i stap help blong lukluk long ol nid insaed long wod, mo blong faenem ol ansa, mo (2) olsem wan ripresentativ blong Praemeri. Hem i helpem wod kaonsel blong save nem mo famli situesen blong wanwan pikinini blong mekem se wok blong givhan we i go long ol pikinini mo famli ia, i kam gud moa. Luk long 29.2.5.

• Oltaem hem i holem ol Praemeri presidensi miting mo hem i mit wetem bisop o kaonsela ia we i lukaot long Praemeri.

• Hem i givim nem long bisoprik, blong oli singaotem ol adalt man mo adalt woman blong givim seves insaed long Praemeri.

• Hem i helpem wod kaonsel blong save abaot huia ol pikinini we yia blong olgeta i inaf blong oli kasem baptaes long yia we i stap kam (luk long 18.7.1.1).

• Hem i helpem blong mekem plan blong ol seves blong baptaes blong ol pikinini blong rekod taem oli askem hem ( luk long 18.7.2).

• Mekem plan mo lidim opening blong ol Sandei miting blong Praemeri.

• Hem i givhan long wanwan pikinini, ol tija, mo ol lida insaed long Praemeri.

• Hem i tijim ol lida mo ol tija blong Praemeri long saed blong ol responsabiliti blong olgeta, mo hem i sapotem olgeta long ol responsabiliti ia taem hem i givim trening long olgeta long saed blong ol koling blong olgeta (luk long Teaching in the Savior’s Way [2016], 38).

• Hem i helpem ol lida mo ol tija blong Praemeri long taem blong klas, long taem blong singsing taem, mo blong jenisim klas.

• Hem i visitim ol klas mo i putum taem blong ol tija oli go long tija kaonsel miting.

• Hem i help blong presentem program blong Ol Pikinini mo Ol Yut long ol pikinini we bae oli kasem 8 yia, mo long papa mo mama blong ol pikinini ia. Hemia i hapen insaed long hom mo Praemeri klas blong olgeta (luk long 12.5.7).

• Hem i lukluk ova ol rekod, ol ripot, bajet, mo ol faenens blong oganaesesen blong Praemeri long wod.

12.3.3

Sekretari

Sapos yunit i bigwan inaf, presiden blong Praemeri i save givim nem blong wan adalt woman i go long bisoprik blong hem i stap olsem sekretari. Hem i gat olgeta responsabiliti ia:

• Hem i helpem Praemeri presidensi blong rere long ol ajenda blong holem presidensi miting. Hem i go long ol miting ia, i tekem not, mo i kipim rekod blong ol wok we oli givimaot.

• Hem i wok kolosap wetem ol tija mo ol lida blong holem ol atendens rekod we oli stret evriwan.

• Wetem RLK, yusum blong wok wetem ol sekretari blong kworom blong ol elda mo Rilif Sosaeti blong kipim ol atendens rekod blong ol adalt we oli stap givim seves long Praemeri.

• Hem i meksua se Praemeri Presidensi i save long saed blong:

  • Ol niu pikinini mo visita.

  • Ol pikinini we oli stap kam insaed long neseri mo ol pikinini we oli stap aot long neseri i go long Sanbim klas.

  • Ol pikinini we oli gat yia blong save kasem baptaes.

  • Ol pikinini we oli gat yia blong save kasem baptaes.

• Givim wok long ol pikinini blong givim prea, talem skripja, mo ol toktok long opening taem blong Sandei Praemeri Miting (anda long daereksen blong presidensi). Hem i givim notis tu i go long ol papa mo mama long saed blong ol wok ia.

• Hem i helpem presidensi blong Praemeri blong rere long wan bajet, kaontem ol mane we oli spendem, mo folemap ol lesenbuk mo ol nara risos blong Ol Pikinini mo Ol Yut.

12.3.4

Ol Miusik Lida mo Pianis

Miusik lida mo pianis, tufala i tijim pikinini long saed blong gospel blong Jisas Kraes tru long miusik long taem blong singsing taem. Miusik i wan strong sapot long stadi blong ol skripja evri wik olsem we oli aotlaenem long Kam Folem Mi. Oli save yusum olgeta risos ia:

• Kam Folem Mi

• Ol Instraksen blong Singsing Taem mo Sakramen Miting Presentesen blong Ol Pikinini

• Children’s Songbook o Tabu Singsing mo Singsing blong Ol Pikinini

• Ol Hym

• Primary Music Collections long ChurchofJesusChrist.org

• “Primary Singing Time—Music Can Teach Doctrine” (MediaLibrary.ChurchofJesusChrist.org)

Bisoprik i mas givim raet blong yusum eni nara miusik insaed long Praemeri.

Sapos i no gat wan pianis o i no gat piano i stap, ol lida oli save yusum ol rekoding we oli kamaot long olgeta ples ia:

• Tabu Miusik ap

• Gospel Laebri ap

• Music.ChurchofJesusChrist.org

• Ol CD long store.ChurchofJesusChrist.org.

Ol pikinini oli save singsing tu we i no gat miusik i go wetem.

Miusik lida i save help wetem miusik blong neseri taem oli invaetem hem blong mekem. Oli save singaotem wan moa miusik lida sapos i nid.

Miusik lida i wok wetem presidensi blong Praemeri blong helpem ol pikinini blong rere from sakramen miting presentesen blong ol pikinini we i hapen evri yia (luk long 12.2.1.6).

Luk long Singsing Taem long ChurchofJesusChrist.org blong kasem moa aedia mo risos.

12.3.5

Ol Tija mo Ol Neseri Lida

Hem i wan tabu spesel janis blong stap tijim ol pikinini. Jisas Kraes i bin tijim: “Luk ol smolwan blong yufala” mo “fidim ol smol sipsip blong mi” (3 Nifae 17:23; Jon 21:15). Taem oli folem ol invitesen ia, ol Praemeri lida oli lavem mo tijim ol pikinini long wei blong Sevya.

Praemeri presidensi i givim ol nem long bisoprik blong ol man mo ol woman we bae oli givim seves olsem ol tija blong Praemeri mo olsem ol neseri lida. Bisoprik i tingting mo lukluk long ol nem ia, mo i givimaot ol koling. Ol memba ia, oli singaotem olgeta blong tijim mo givhan long ol spesifik yia grup blong ol pikinini.

Ol Praemeri tija oli tij folem Kam Folem Mi (oli yia 3–11). Long ol namba faef Sandei, oli leftemap tingting blong ol tija blong tijim ol lesen long “Apendiks B: Blong Praemeri—Stap Rere Ol Pikinini blong Yu blong Stap long Kavenan Rod blong God blong wan Laef Taem.”

Ol lida blong Neseri oli tij folem Luk Ol Smol Pikinini blong Yufala.

Ol tija mo lida blong neseri oli folem olgeta prinsipol insaed long Stap Tij Folem Wei blong Sevya mo japta 17 blong hanbuk ia.

Taem i gat ol adalt we oli stap tijim ol pikinini long Jos, i mas gat tu responsibol adalt tu, we oli mas stap. Tufala adalt ia, i save tu woman, tu man, o wan mared kapol. Sapos hemia i no posibol, ol lida oli mas mekem ol kombaen klas. Ol lida mo ol tija oli mas komplitim trening we i stap long ProtectingChildren.ChurchofJesusChrist.org. (Luk long 12.5.1.)

Ol yut oli no mas tij long Praemeri, mo hemia i minim tu se oli no save riplesem wan.

Ol Praemeri tija mo neseri lida oli stap wetem ol pikinini long ful taem blong Praemeri we i tekem tu sering taem mo ol sot taem blong muv i go long ol klas. Long taem blong singsing taem, ol tija oli tekpat wetem klas blong olgeta. Ol tija oli mas stap wetem ol smol pikinini afta long Praemeri kasem taem we wan memba blong famli i kam from olgeta.

Ol tija mo ol neseri lida oli go tu long tija kaonsel miting we i hapen evri kwota (luk long 13.4).

12.3.6

Ol Aktiviti Lida

Ol aktiviti lida blong Praemeri oli givhan long ol pikinini long taem we oli stap mekem plan blong holem ol seves mo ol aktiviti blong ol pikinini, hemia stat long manis Jenuware blong yia ia we ol pikinini oli kasem 8 yia (luk long 12.2.1.3). Ol seves mo ol aktiviti oli mas lukluk nomo long wok blong God blong fasin blong sevem man mo fasin blong kam olsem wan god. Oli wan hapi taem mo wan taem blong mekem samting. Oli bildimap ol testemoni, oli mekem ol famli oli kam strong moa, mo oli pusum wan blong groap long laef blong hem.

Ol Praemeri tija blong ol pikinini oli save stap olsem ol Praemeri aktiviti lida. Ol Praemeri aktiviti lida ia tu, oli ol nara memba we Praemeri Presidensi i givim nem blong olgeta, mo bisoprik i singaotem olgeta. Tu lida i mas stap long evri aktiviti. Ol lida ia, oli tu woman, tu man, o wan mared kapol blong lidim ol Praemeri aktiviti. Ol lida ia oli mas mekem flatem trening ia we i stap long ProtectingChildren.ChurchofJesusChrist.org. (Luk long 12.5.1.)

12.4

Stek Praemeri Lidasip

Stek presidensi i singaotem wan adalt woman blong wok olsem stek Praemeri presiden. Sapos wan stek i bigwan inaf, presiden blong Praemeri i givim nem blong wan o tu adalt woman, blong oli singaotem olsem ol kaonsela blong hem, mo wan narawan blong i stap olsem sekretari. Ol woman ia, oli singaotem olgeta mo oli setem apat olgeta tru long wan memba blong stek presidensi o wan hae kaonsela we i kasem wok ia. Blong kasem infomesen abaot ol responsabiliti blong stek Praemeri presidensi mo sekretari, luk long 6.7.1, 6.7.1.3, mo 6.7.3.

Wan kaonsela, insaed long stek presidensi, i gat responsabiliti blong lukaotem Praemeri insaed long stek. Hem i gat tu responsabiliti ia blong wok we stek Praemeri presidensi i mekem. Hem i givim instraksen long ol bisop long saed blong ol responsabiliti blong olgeta long Praemeri.

Stek presidensi i givim wok long wan hae kaonsela blong hem i wok wetem stek Praemeri presidensi (luk long 6.5).

12.5

Sam Moa Gaedlaen mo Polisi

12.5.1

Kipim Ol Pikinini Oli Sef Oltaem

Long ol ples long Jos, taem i gat ol adalt we oli stap tijim ol pikinini o ol yut, i mas gat tu responsibol adalt tu, we oli mas stap. Maet bae i nid blong kombaenem ol klas blong mekem hemia i posibol.

Evri adalt we oli wok wetem ol pikinini yut oli mas finisim proteksen trening blong ol pikinini mo ol yut, hemia bifo wan manis i pas afta we oli sastenem olgeta (ProtectingChildren.ChurchofJesusChrist.org). Oli ripitim trening ia evri tri yia afta long hemia.

12.5.2

Ol Pikinini we Oli Gat Ol Spesel Nid

Taem wan pikinini i gat wan longfala sik i stap, o wan disabiliti, o ol nara spesel nid, ol lida blong Praemeri oli toktok wetem papa mo mama blong pikinini mo bisoprik. Tugeta, oli mekem wan plan blong sapotem famli mo helpem pikinini blong tekpat long Praemeri.

Ol pikinini we oli gat disabiliti, oli kam long stret Praemeri klas blong olgeta. Olsem we i nid, oli save singaotem sam moa tija blong oli help long wok.

Ol pikinini we oli gat disabiliti mo ol nara spesel nid, oli komplitim Praemeri long stat blong manis Jenuware long yia ia we oli kasem 12 yia. Sam pikinini bae oli no save finisim Praemeri folem taemtebol ia. Bisop mo ol papa mo mama oli toktok tugeta blong disaed wanem i bes blong wanwan pikinini.

Blong gat moa infomesen, luk long disability.ChurchofJesusChrist.org; luk tu long 38.8.27 insaed long hanbuk ia.

12.5.3

Ol Man we Oli Givim Seves insaed long Praemeri

Bisoprik mo Praemeri presidensi i mas tingbaot gudfala paoa blong olgeta we oli ol man we oli klin inaf we oli stap givim seves insaed long Praemeri. Olgeta we oli ol man, oli save givim seves olsem ol tija, ol neseri lida, ol miusik lida, mo ol pianis, mo ol Praemeri aktiviti lida.

12.5.4

Toelet Sefti

Ol lida mo ol tija oli mas leftemap tingting blong ol papa mo mama blong oli mas tekem ol pikinini blong olgeta i go long toelet bifo oli go long Praemeri. Long taem blong Praemeri, bae wan papa o mama, o wan we i gat raet folem loa blong lukaot long pikinini, i tekem wan smol pikinini i go long toelet. Ol lida mo ol tija oli no mas tekem ol pikinini i go long toelet.

12.5.5

Rolplei Aktiviti

Ol lida mo ol tija oli mas lukaotgud taem oli stap aktem ol tabu taem blong skripja insaed long Praemeri. Oli no mas ripresentem Papa long Heven mo Tabu Spirit. Ol pikinini oli save ripresentem Sevya nomo long wan Nativiti taem (taem we Kraes i bon i kam long wol). Blong kasem sam moa gaedlaen, luk long 20.5.6.

12.5.6

JR Ring

Taem ol pikinini oli statem JR 4 klas, Praemeri presidensi o Praemeri tija blong olgeta i rimaenem olgeta blong “jusum raet.” Ol lida ia oli givim long wanwan pikinini, wan grin JR ring.

12.5.7

Stap Presentem Program blong Ol Pikinini mo Ol Yut

Long stat blong wanwan yia, bisop, wan long ol kaonsela blong hem o ol memba blong Praemeri Presidensi oli save visitim hom o Praemeri klas blong wanwan pikinini we bae i kasem 8 yia long yia. Oli presentem program blong Ol Pikinini mo Ol Yut i go long ol pikinini mo papa mo mama blong olgeta. Wanwan pikinini i kasem ol aedentiti simbol mo wan kopi blong Divelopmen blong Yuwan: Gaedbuk blong Ol Pikinini. Olgeta risos ia, oli stap long store.ChurchofJesusChrist.org.

Blong kasem moa infomesen, luk long ChildrenandYouth.ChurchofJesusChrist.org.