13.

Sandei Skul

13.1

Stamba Tingting

Sandei Skul i stap help blong mekem wok blong God blong fasin blong sevem man mo fasin blong kam olsem wan god, i hapen. Sandei Skul i mekem hemia taem hem i helpem ol pikinini blong God blong oli lan mo oli laef folem gospel blong Jisas Kraes. Ol lida blong Sandei Skul, ol tija, mo ol klas:

• Oli mekem bilif long Papa long Heven mo Jisas Kraes i kam strong moa taem oli stap tijim “doktrin blong kingdom” (Doktrin mo Ol Kavenan 88:77).

• Oli sapotem fasin blong lanem mo tijim gospel insaed long hom we i senta mo Jos i sapotem.

• Oli helpem ol memba blong tij long wei blong Sevya.

13.2

Wod Sandei Skul Lidasip

13.2.1

Bisoprik

Bisoprik i lukluk ova long Sandei Skul. Plante taem, bisop i givim wok long wan long ol kaonsela blong hem blong mekem responsabiliti ia anda long daereksen blong hem.

Kaonsela ia we i kasem wok ia, i mit wetem presiden blong Sandei Skul, oltaem. Oli kaonsel abaot nid blong Sandei Skul, olsem wanem hem i mekem ol stamba tingting blong hem i hapen, mo olsem wanem i mekem ol responsabiliti we oli aotlaenem insaed long 13.2.2.2.

13.2.2

Sandei Skul Presiden

13.2.2.1

Stap Singaotem wan Sandei Skul Presiden

Bisop i singaotem mo i setem apat wan we i holem Melkesedek Prishud blong i givim seves olsem presiden blong Sandei Skul. Oli tokbaot se i nid blong singaotem ol kaonsela, o nogat. Sapos i nid blong gat ol kaonsela, mo sapos i gat inaf man blong givim seves long ol posisen ia, presiden blong Sandei Skul i save givim nem blong wan o tu kaonsela. Sapos bisoprik i apruvum, wan memba blong bisoprik i singaotem olgeta.

Wan memba blong bisoprik i presentem ol memba blong presidensi blong Sandei Skul long sakramen miting blong ol memba blong wod oli sastenem olgeta. Wan memba blong bisoprik i setem olgeta apat.

Long wan wod we i bigwan, bisoprik i save singaotem mo setem apat wan man blong i sekretari blong Sandei Skul. Presiden blong Sandei Skul i save givim nem blong huia blong singaotem. Sekretari i save helpem presidensi blong folemap ol asaenmen, o atendens, sapos oli wantem.

13.2.2.2

Ol Responsabiliti

Sandei Skul presiden i gat olgeta responsabiliti ia. Sapos hem i gat ol kaonsela, oli helpem hem.

• I stap olsem wan memba blong wod kaonsel. Hem i givim seves olsem (1) wan memba blong kaonsel we i stap help blong lukluk long ol nid insaed long wod, mo blong faenem ol ansa, mo (2) olsem wan ripresentativ blong Sandei Skul (luk long 29.2.5).

• Hem i lukluk ova long ol hadwok blong mekem fasin blong lanem mo tijim gospel long hom mo long jos, i kam antap.

• Hem i oganaesem ol klas blong Sandei Skul wetem raet blong bisoprik (luk long 13.3). Hem i givim nem blong ol adalt memba i go long bisoprik blong oli stap olsem ol tija blong Sandei Skul.

• Hem i sapotem, leftemap tingting, mo givim instraksen long ol tija blong Sandei Skul. Hem i helpem olgeta blong oli kam ol gospel tija we oli wok gud taem oli stap folem olgeta prinsipol insaed long ol skripja mo insaed long Stap Tij Folem Wei blong Sevya. Hem i leftemap tingting blong olgeta blong stadi long Stap Tij Folem Wei blong Sevya.

• Hem i lidim ol miting blong kaonsel blong ol tija olsem we bisop i gaedem hem (luk long Stap Tij Folem Wei blong Sevya,, 38–39).

• Hem i leftemap tingting blong ol tija blong go toktok long ol memba we oli no stap kam long ol klas.

• Wok wetem ol tija blong kipim ol atendens rekod. Ripotem atendens long evri kwota blong yia i go long wod klak o insaed long LKR o Member Tools. Sapos oli singaotem wan sekretari, hem i save help wetem responsabiliti ia.

13.2.3

Ol Sandei Skul Tija

Presiden blong Sandei Skul i save givim nem blong ol memba blong oli stap olsem ol tija blong Sandei Skul. Sapos bisoprik i apruvum, wan memba blong bisoprik i singaotem olgeta mo presentem olgeta long sakramen miting blong ol memba blong wod i sastenem olgeta, afta i setem apat olgeta.

Ol tija blong Sandei Skul oli kam blong save wanwan memba, wetem olgeta tu we oli no stap kam long ol klas. Ol tija oli sapotem ol memba long ol hadwok blong olgeta blong lanem mo stap laef folem gospel blong Jisas Kraes.

Blong stap rere blong tij, ol Sandei Skul tija oli yusum ol skripja mo Kam Folem Mi. Oli folem olgeta prinsipol insaed long Stap Tij Folem Wei blong Sevya mo japta 17 blong hanbuk ia.

Ol tija blong Sandei Skul oli go tu long kwota tija kaonsel miting (luk long 17.4).

13.3

Ol Sandei Skul Klas

Ol Sandei Skul klas oli stap tekples long evri fas mo nambatri Sandei blong manis. Oli blong 50 minit. Ol klas oli stat mo finis wetem wan prea.

Wetem raet blong bisoprik, presiden blong Sandei Skul i oganaesem ol klas blong ol adalt mo blong ol yut. Sapos hem i gat ol kaonsela, oli helpem hem.

Namba blong ol klas i dipen long (1) hamas memba i stap insaed long wod, mo (2), namba mo saes blong ol rum we oli stap. Plante taem, ol smol klas i mekem se i isi moa blong moa pipol oli save tekpat gud mo lanem samting. Wod kaonsel i save helpem presiden blong Sandei Skul blong disaed se bae hem i oganaesem hamas klas blong Sandei Skul.

Ol yang man mo ol yang woman, oli stat blong go long wan yut Sandei Skul klas long stat blong yia ia we oli kasem 12 yia. Oli save stat blong go long wan adalt klas taem oli kasem 18 yia.

Sandei Skul presiden i oganaesem ol yut klas olsem we i nid. Ol yut, oli mas putum olgeta i go long ol klas folem yia we oli gat. Sapos i no gat tumas yut blong wan yia grup, bae oli save kombaen long wan klas grup we oli gat wan semmak yia. Ol yut oli stap long sem klas kasem manis Jenuware long yia afta.

I mas gat tu (2) responsibol adalt we i mas stap long wanwan klas blong ol yut. Tufala adalt ia, i save tu man, tu woman, o wan mared kapol. Blong mitim standet ia, maet bae i nid blong kombaen long ol klas.

Evri adalt we oli wok wetem ol yut i mas finisim proteksen trening blong ol pikinini mo ol yut, hemia bifo wan manis i pas afta we oli sastenem olgeta (ProtectingChildren.ChurchofJesusChrist.org). Oli ripitim trening ia evri tri yia afta long hemia.

13.3.1

Ol Smol Branj

Long wan smol branj, Sandei Skul presiden, bae hemwan nomo i Sandei Skul lida mo tija. Hem i stap tijim wan klas blong Sandei Skul blong evri yut mo adalt insaed long branj.

13.3.2

Ol Sandei Skul Klas blong Ol Spesifik Grup

Olsem we i nid, Sandei Skul presiden i save oganaesem ol Sandei Skul klas blong ol spesifik grup. Ol kurikulom blong ol klas ia hem i Kam Folem Mi.

Ol grup we oli save lanem moa sapos oli gat wan stret Sandei Skul klas blong olgeta, oli:

• Ol yang singgel adalt.

• Ol memba we oli no toktok mama lanwis blong wod.

• Ol niu memba, ol memba we oli kambak, mo olgeta we oli stap lanem samting abaot Jos.

• Ol nara grup, olsem we bisop i teknot long olgeta.

13.4

Mekem Fasin blong Lanem Samting mo Fasin blong Tij I Kam Antap insaed long Wod

Ol lida blong wod oli responsibol blong mekem fasin blong lanem samting mo tij insaed long ol oganaesesen blong olgeta, i kam antap. Hemia i tekem blong stap trenem ol niu tija we oli jes singaotem olgeta (luk long Stap Tij Folem Wei blong Sevya,40). Oli save askem presiden blong Sandei Skul blong wod blong kasem help sapos i nid.

Ol tija kaonsel miting, oli holem olgeta evri kwota long taem blong wan klas we i tekem 50 minit, long wan Sandei (luk long 17.4). Stamba tingting blong ol miting ia oli blong mekem fasin blong lanem mo tijim gospel i kam gud moa. Stap Tij Folem Wei blong Sevya i stamba risos blong yusum long olgeta miting ia.

Wod kaonsel i lukluk ova mo i putum taem blong ol tija kaonsel miting. Plante taem, wan memba blong Sandei Skul Presidensi nao i stap lidim ol miting. Be, bisoprik i save askem wan nara memba blong i lidim ol miting ia.

Blong kasem moa infomesen, luk long,“Blong Ol Lida—Helpem Ol Tija blong Oli Mekem Gud” insaed long Stap Tij Folem Wei blong Sevya (ol pej 38–40).

13.5

Mekem Fasin blong Lanem Samting mo Fasin blong Tij Insaed long Hom I Kam Antap

Ol papa mo mama oli responsibol blong tijim gospel long ol pikinini blong olgeta.

Wod kaonsel i save oganaesem ol tija kaonsel miting blong ol papa mo mama long taem blong 50-minit klas long Sandei. Wan memba blong Sandei Skul presidensi o wan we olgeta long bisoprik i givim wok long hem blong i lidim ol miting ia. Stap Tij Folem Wei blong Sevya i stamba risos blong yusum long olgeta miting ia.

Blong kasem moa infomesen abaot ol tija kaonsel miting blong ol papa mo mama, luk long 17.5.

13.6

Stek Sandei Skul Lida

Stek presiden i givim wok long wan long ol kaonsela blong hem blong i lukluk ova long wok blong Sandei Skul insaed long stek. Hem i singaotem mo setem apat wan hae kaonsela blong stap olsem stek Sandei Skul presiden.

Ol responsabiliti blong stek Sandei Skul presiden oli putum i stap long 6.7.1 mo 6.7.3. Sapos oli singaotem ol kaonsela, oli helpem hem.

13.7

Sam Moa Gaedlaen

13.7.1

Ol Memba wetem Ol Disabiliti

Ol tija blong Sandei Skul oli givim spesel kea long ol memba blong klas we oli gat ol disabiliti. Blong kasem moa infomesen long wei blong stap tijim ol memba we oli gat disabiliti, luk long disability.ChurchofJesusChrist.org; luk tu long 38.8.27 insaed long hanbuk ia.

13.7.2

Risos Senta

Samfala mitinghaos oli gat wan risos senta, (wan laebri) i stap blong helpem ol memba blong oli lanem mo tijim gospel. Wod Sandei Skul presiden i lukluk ova long risos senta ia. Ol wod we oli serem wan mitinghaos, oli serem risos senta ia tu. Ol klas blong seminari mo institiut mo ol FamilySearch senta oli serem risos senta wetem ol wod.

Long ol mitinghaos ia we oli gat wan risos senta, bisoprik i singaotem wan risos senta speselis. Sandei Skul presiden i save givim nem blong wan blong oli singaotem hem. O bisoprik i save askem wan memba blong Sandei Skul presidensi blong hem i stap olsem speselis ia. Man o woman ia:

• I oganaesem mo kea long ol risos ia.

• I helpem ol lida, ol tija mo ol nara memba blong oli kasem mo yusum ol risos ia.

Presiden blong Sandei Skul i toktok wetem speselis blong risos senta blong faenemaot sapos i gat nid blong gat wan yia bajet blong risos senta ia. Afta, hem i givim wan tingting i go long bisoprik.

Speselis blong risos senta ia i mas go long sakramen miting evri wik, mo i mas go tu long ol nara Sandei miting, oltaem. Sapos i nid, bisoprik i save singaotem wan asisten blong speselis ia.

Blong gat moa infomesen, luk long “Ol Risos Senta” long ChurchofJesusChrist.org.