“13. Reirei n Tabati,” Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira (2024).
“13. Reirei n Tabati,” Aeniboki ni Kabuta.
13.
Reirei n Tabati
13.1
Kantaninga
E ibuobuoki te Reirei n Tabati ni kakoroan nanon ana mwakuri te Atua ibukin te kamaiuaki ao te karietataaki. E kakoroa nanon aei man buokakiia natin te Atua n reiakina ao ni maiuakina ana euangkerio Iesu Kristo. Taan kairiiri n te Reirei n Tabati, taan reirei, ao kiraati:
-
A kakorakora te onimaki iroun Tamara are i Karawa ao Iesu Kristo man reiakinan “reirein te abanuea” (Reirei ao Berita aika Tabu 88:77).
-
Reiakinan ao reirein te euangkerio ae boboto n te mweenga ao e boutokaaki n te Ekaretia.
-
E buokiia membwa n anga reirei n ana kawai te Tia Kamaiu.
13.2
Kairiiri n te Reirei n Tabati n te Uoote
13.2.1
Bitiobiriki
Te bitiobiriki e tararua te Reirei n Tabati. N angiin te tai ao te bitiobi e mwiokoa temanna ana kauntira bwa e na karaoa te tabe aei iaan ana kairiiri.
Te kauntira ae mwiokoaki aei e na bowi ma te beretitenti n te Reirei n Tabati n te tai ae mwaiti. Ana marorooakini kainnanon te Reirei n Tabati, e kanga ni kakoroa nanon te kantaninga, ao taabe ake a kaotaki i nanon 13.2.2.2.
13.2.2
Beretitenti ibukin te Reirei n Tabati
13.2.2.1
Wetean te Beretitenti n te Reirei n Tabati
Te bitiobi e wetea ao e kaokoroa temanna ae iai irouna te Nakoanibonga ae te Merekitereka bwa te beretitenti n te Reirei n Tabati. A na marorooakinna ngkana e riai weteaki kauntira. Ngkana a kainnanoaki kauntira, ao ngkana e tau mwaitia mwaane ni beku n nakoa aikai, te beretitenti n te Reirei n Tabati e na uotarake temanna ke uoman ana kauntira. Ngkana e kariaia te bitiobiriki, kaain te bitiobiriki e weteia.
Te membwa n te bitiobiriki e uotarake araia kain te beretitentii n te Reirei n Tabati n te bootaki n toa ibukin kamatoakiia n te kateibai irouia kaain te uoote. Kaain te bitiobiriki ae e na kaokoroia naba.
N te uoote ae bubura, e kona te bitiobi ni wetea ao ni kaokoroa te mwaane bwa te tia koroboki n te Reirei n Tabati. Te beretitenti n te Reirei n Tabati e kona n anga ana iango bwa antai ae na weteaki. Te tia koroboki e kona ni buoka te beretitentii n tau mwiin mwioko ao aara ngkana e tangiraki.
13.2.2.2
Taabe
Te beretitenti n te Reirei n Taabati iai tabena aikai. Ngkana iai ana kauntira, a na ibuobuoki nakoia.
-
Ngaia kaain te kauntira n te uoote. E beku bwa (1) kaain te kauntira ae e ibuobuoki n tobwai kainnano n te uoote mani karekei aron tobwakiia (2) te tia tei ibukin te Reirei n Tabati (taraa 29.2.5).
-
E tararuai waaki ni katamaroa iaon reiakinan ao te anga reirei n te euangkerio n te mwenga ao n te taromauri.
-
E barongai kiraati n te Reirei n Taabati, man ana kariaia te bitiobiriki (taraa 13.3). E anga araia membwa aika ikawai nakon te bitiobiriki bwa a na beku bwa taan reirei n te Reirei n Taabati.
-
E boutokaia, e kaungaia, ao e reireiniia taan reirei n te Reirei n Taabati. E buokiia n riki bwa taan reirei n te euangkerio aika a tamaroa man irakin moan reirei inanon koroboki aika a tabu ao Reirei n ana Kawai te Tia Kamaiu. E kaungaiia bwa a na kamatebwaia Reirei n ana Kawai te Tia Kamaiu.
-
E kairaki aia bowi ni kauntira taan reirei ae tararuaaki iroun te bitiobi (taraa Reirei n Ana Kawai te Tia Kamaiu,, 38-39).
-
E kaungaia taan reirei ni mwananoia membwa ake aki roroko n te kiraati.
-
Mwakuri ma taan reirei ni kawakin mwiin te roko irouia kaain te taromauri. Ribotina mwiin te roroko n te kuata nakon te kiraaka n te uoote ke n te LCR ke n te Member Tools. E kona ni ibuobuoki n te tibwanga aei, te tia Koroboki, ngkana e weteaki.
13.2.3
Taan reirei n te Reirei n Tabati
E kona te beretitenti n te Reirei n Tabati n anga araia membwa bwa a na beku bwa taan reirei n te Reirei n Tabati. Ngkana e kariaia te bitiobiriki, temanna man te bitiobiriki e weteia, uotarake araia n te bootaki n toa ibukin kamatoakiia n te kateibai irouia kaain te uoote, ao e kaokoroia.
Taan reirei n te Reirei n Tabati a kataia ni kinaia kaain te kiraati, ao naake a aki roroko n te kiraati. Taan reirei a boutokaiia membwa n aia waaki n reiakina ao ni maiuakina ana euangkerio Iesu Kristo.
Ni katauraoi n angareirei, taan reirei n te Reirei n Tabati a kabonganai koroboki aika tabu ao Nakomai, Iriira. A irii reirei i nanon Reirei n ana Kawai te Tia Kamaiu ao mwakoro 17 n te aeniboki aei.
Taan reirei n te Reirei n Tabati a kakaea aia bowi ni kauntira taan reirei are katoa kuata (taraa 17.4).
13.3
Kiraati n Reirei n Tabati
Kiraati n te Reirei n Tabati a karaoaki ni moan ao kateniuan Tabatin te namwakaina. Maanna bon 50 te miniti. A moanaki ao ni kabaneaki taian kiraati ma te tataro.
N ana kariaia te bitiobiriki, E kona te beretitenti n te Reirei n Tabati ni bairei aia kiraati ikawai ao te roronrikirake. Ngkana iai ana kauntira, a buokia.
Mwaitin te kiraati e nakon (1) mwaitiia membwa n te uoote (2) mwaitin ao buburan tabo n reirei aika a tauraoi. N angiin te tai, kiraati aika uarereke e mwaiti riki iai aomata aika a kona n taetae ao n reirei. Kauntiran te uoote e kona ni buoka te beretitenti n te Reirei n Taabati ni baireia bwa mwaitira kiraati n te Reirei n Taabati.
Ataeinimwane ao ataeinnaine a waaki ni kaea te Reirei n Taabati ibukiia te roronrikirake ni moan te ririki are e koro iai 12 aia ririki. A kona ni kaea aia kiraati ikawai ngkana e koro 18 aia ririki.
Te beretitenti n te Reirei n Tabati e kamwaita aia kiraati kairake n aron kainanoana. A riai kairake ni kaokoroaki nakon kiraati n aia roro. Ngkana e karako kaain te roro teuana, a kona ni ikotaki bwa teuana te kiraati are bon roroia naba. A tiku n te kiraati anne ni karokoa Tianuare n te ririki are imwina.
E riai n iai uoman ikawai n aia kiraati nako te roronrikirake. Ikawai aikai e kona n ae uoman mwaane, uoman aine, ke te taanga teuana. N ira nanon aei, a kona n ikotaki taian kiraati.
Ni kabane ikawai ake a mwakuri ma kairake a riai ni kabwanina aia reirei ibukin kamanoaia ataei ao kairake teuana te namwakaina man te tai are a kamatoaaki iai (ProtectingChildren.ChurchofJesusChrist.org). A na kaokioka te reirei aei ni katoa teniua te ririki imwin aia moan kataneiai.
13.3.1
Mwaanga aika Uarereke
N te mwaanga ae uarereke, te beretitenti n te Reirei n Tabati tao bon tii ngaia te tia kairiri ao tia reire n te Reirei n Tabati. E anga reirei n aia kiraati n Reirei n Tabati te roronrikirake ao ikawai n te mwaanga.
13.3.2
Kiraati n te Reirei n Tabati ibukiia Kurubu aika Onoti
Ngkana e riai, E kona te beretitenti n te Reirei n Tabati ni karaoi kiraati n Reirei n Tabati ibukiia kurubu aika onoti. Te karikiram ibukin kiraati aikai bon Nakomai, Iriirai.
Aikai kurubu ake a kona ni kabwaia man aia kiraati ae onoti n te Reirei n Tabati:
-
Kairake n ikawai aika a tuai n iein.
-
Membwa ake e okoro aia taetae man te taetae are kabonganaki n te uoote.
-
Membwa aika a boou, membwa ake a tibwa oki, ao naake a tibwa reiakina te Ekaretia.
-
Kurubu riki tabeua n aron are e ataaki iroun te bitiobi.
13.4
Karikirakean te Reiakinaki ao te Angareirei inanon te Uoote
A katabeaki taan kairiiri n te uoote ni katamaroa te reirei ao te anga reirei n aia bootaki nako. N reitaki ma aei a na ti te arona ma weteakiia taan reirei aika a boou (taraa Reirei n Ana Kawai te Tia Kamaiu,40). A kona ni karekea buokaia iroun te beretitenti n te Reirei n Tabati ngkana a kainnanoia.
Aia bowi ni kauntira taan reirei e karaoaki ni katoa kuata inanon 50 te miniti n te Tabati (taraa 17.4). Oin bukin te bowi bon katamaroan te reirei ma te anga reirei. Te Reirei n Ana Kawai te Tia Kamaiu bon te boki ae riai ni kabonganaki ibukin bowi aikai.
Kauntiran te uoote e tararuai ao e katei tain aia bowi ni kauntira taan reirei. N angiin te tai te beretitenti n te Reirei n Tabati e kairi bowi aikai. Ma, e kona te bitiobiriki ni butiia temanna kaaina bwa e na kairia.
Ibukin rongorongo riki tabeua, taraa “Ibukiia Taan Kairiiri—Buokiia Taan Reirei n Tokanikai” inanon Reirei n Ana Kawai te Tia Kamaiu (iteraniba 38–40).
13.5
Kamataroan te Reirei ao te Anga Reirei n te Mwenga
A katabeaki kaaro bwa a na reirei te euangkerio nakoia natiia.
Te boowi ni kauntira n te uoote e na bairea aia boowi ni kauntira taan reirei ibukiia kaaro ni karaoaki n tain te 50 ni miniti ni kiraati n te Tabati. Boowii aikai a kairaki iroun te membwa n te beretitentii n te Reirei n Taabati ke temanna riki are e mwiokoia te bitiobi. Te Reirei n Ana Kawai te Tia Kamaiu bon te boki ae riai ni kabonganaki ibukin bowi aikai.
Ibukin rongorongon riki aia boowi ni kauntira taan reirei ibukiia kaaro, taraa 17.5.
13.6
Taan Kairiri n te Reirei n Tabati n te Titeiki
Te beretitenti n te titeiki e na katabea temanna ana kauntira bwa e na tararua te Reirei n Tabati i nanon titeiki. E wetea naba ao ni kaokoroa te kauntira ae rietaata n riki bwa te beretitenti n te Reirei n Tabati.
Taben te beretitenti n te Reirei n Tabati n te titeiki a kaotaki n 6.7.1 ao 6.7.3. Ngkana iai ana kauntira aika a weteaki, a buokia.
13.7
Kainibaire Riki Tabeua
13.7.1
Kaain te aro ae aki Toamau
Taan reirei n te Reirei n Tabati a mwananoiia riki kaain te kiraati ake aki toamau. Ibukin rongorongo i aon reiakinaia membwa ake aki toamau, taraa disability.ChurchofJesusChrist.org; taraa naba 38.8.27 inanon te aeniboki aei.
13.7.2
Te Tabo ni Boki
Tabeua tabo n taromauri iai aia tabo ni boki (raiburari) bwa e na buokiia membwa n reirei ao n anga reirei te euangkerio. Te beretitenti n te Reirei n Tabati n te uoote e tararuaa te tabo ni boki aei. Uoote ake tii teuana aia tabo n taromauri a ibuobuoka naba te tabo ni boki aei. Kiraati n te tieminari ao intitute ao tienta n te FamilySearch a kabongana te tabo ni boki ma uoote.
N tabo n taromauri ake iai te tabo ni boki iai, te bitiobi e wetea te tia tararua te tabo ni boki anne. Te beretitenti n te Reirei n Tabati e kona n anga aran temanna bwa e na weteaki. Ke E kona te bitiobiriki n butiia te membwa n te beretitentii n te Reirei n Tabati bwa e na riki bwa te tia tararuaia. Te aomata aei:
-
E bairei ao n tararuai booki.
-
E buokiia taan kairiiri, taan reirei, ao membwa ni karekei ao ni kabonganai booki aikai.
Te beretitenti n te Reirei n Tabati e reitaki ma te tia tararuaa te tabo ni boki ni baireia ngkana E kainnanoaki te mwane ibukin te tabo ni boki aei. Ngkanne E anga ana iango nakon te bitiobiriki.
Te tia tararuaa te tabo ni boki e riai ni kakaea te botaki n toa ni katoa wiiki ao kiraati ake tabeua n te Tabati. Ngkana e riai, e kona te bitiobiriki ni wetea ana kauoman te tia tararuaa te tabo ni boki.
Ibukin riki rongorongona, taraa “Resource Centers” i aon ChurchofJesusChrist.org.