17.

Stap Tijim Gospel

Yumi stap tijim gospel blong helpem ol memba blong mekem fet blong olgeta long Papa long Heven mo long Jisas Kraes i kam strong moa. Yumi lukaot blong helpem ol pipol blong oli kam moa olsem Sevya, kasem paoa blong Hem insaed long laef blong yumi, mo long en, kasem laef we i no save finis. Taem we oli tijim toktok blong God mo oli kasem toktok ia tru long Spirit, hem i gat paoa blong jenisim ol hat mo givim insperesen long man blong jenisim fasin. Tingbaot se trutok “hem i gat moa bigfala paoa long tingting blong ol pipol bitim … eni narafala samting” (Alma 31:5).

17.1

Ol Prinsipol blong Tijing Olsem Hemia blong Kraes

Taem oli stap tijim gospel, ol papa mo ol mama, ol tija, mo ol lida oli folem eksampol blong Jisas Kraes we hem i Masta Tija. Blong stap tij folem wei blong Sevya, i wan tabu tras mo responsabiliti we yumi gat.

Ol lida oli serem olgeta prinsipol ia blong tij olsem Sevya wetem ol tija insaed long oganaesesen blong olgeta. Olgeta prinsipol ia, oli eksplenem long moa ditel insaed long Teaching in the Savior’s Way.

17.1.1

Lavem Olgeta we Yu stap Tijim Olgeta

Evri samting we Sevya i stap mekem, i soemaot lav blong Hem (luk long 2 Nifae 26:24). Ol lida mo ol tija oli folem eksampol blong Hem taem oli soem lav long olgeta we oli stap tijim olgeta. Oli prea from olgeta we oli tijim olgeta, mo talem nem blong olgeta, mo oli lukaot blong joen wetem olgeta mo andastanem olgeta, mo lukluk nomo long ol nid blong wanwan long olgeta. Oli go aot mo go luk ol memba blong klas o kworom blong olgeta we oli no stap kam.

17.1.2

Tij wetem Spirit

Blong givim insperesen long ol pipol blong oli gat fet long Jisas Kraes, ol tija oli mas tij wetem Spirit. Ol tija oli wantem blong Spirit i soem rod long olgeta taem we oli stap rere mo stap tij, mo oli traehad blong laef long wan klin laef blong save gat paoa blong Hem evri dei.

17.1.3

Stap Tijim Doktrin

Sevya i tijim doktrin blong Papa blong Hem. Folem eksampol blong Sevya, ol tija oli lukluk nomo long ol trutok blong gospel we oli impoten mo oli sevem man. Oli tij mo oli yusum ol skripja, ol tijing blong ol lata-dei profet, mo ol kurikulom tul we oli apruvum. Ol tija oli lidim ol storian toktok we oli kam wetem insperesen mo oli mekemsua se ol tijing blong olgeta i stap leftemap tingting mo oli stret long saed blong doktrin. Ol kos we oli apruvum, oli stap long lis insaed long las buk blong Instraksen blong Kurikulom long ChurchofJesusChrist.org.

17.1.4

Invaetem Fasin blong Wok Strong blong Stap Lanem Samting

Ol tija oli leftemap tingting blong ol memba blong oli mas responsibol blong lanem samting blong olgetawan. Oli sapotem ol memba long ol hadwok blong olgeta blong lanem gospel olgetawan mo wetem famli blong olgeta. Oli invaetem ol memba blong oli serem wanem we oli stap lanem mo oli tekem aksen folem. Fet blong wan i stap kam bigwan taem we hem i strong blong tekpat blong stap lanem gospel mo praktisim gospel ia insaed long evri dei laef blong hem.

17.2

Hom I Senta blong Stap Lanem mo Tijim Gospel

Blong jenisim laef i kam long Lod Jisas Kraes, wanwan memba blong Jos i responsibol blong lanem gospel blong hemwan. Ol papa mo mama oli responsibol blong tijim gospel long ol pikinini blong olgeta. Blong stap lanem mo tijim gospel, senta blong hem i mas stap insaed long hom. Ol lida mo ol tija blong Jos oli leftemap tingting mo sapotem fasin blong lanem mo tijim gospel insaed long hom we i senta.

Ol lida mo ol tija oli leftemap tingting blong ol memba blong lukaotem insperesen blong olgetawan abaot wei blong stadi mo tijim gospel. Ol stamba risos blong olgeta oli ol skripja mo ol mesej blong jeneral konfrens. Ol risos we oli givim sapot i save tekem tu Kam Folem Mi mo ol magasin blong Jos.

17.3

Ol Responsabiliti blong Ol Lida

Ol lida oli responsibol long wok blong tij mo lanem samting insaed long ol oganaesesen blong olgeta. Sam wei we oli stap mekem responsabiliti ia, oli stap andanit ia:

• Stap olsem wan eksampol taem oli lanem gospel mo tijim gospel ia long wei we Sevya i mekem.

• Mekemsua se tijing insaed long oganaesesen blong olgeta i bildimap fet mo i stret long saed blong doktrin.

• Anda long daereksen blong bisoprik, ol memba blong wod kaonsel oli kaonsel oltaem tugeta abaot wei blong kam antap long fasin blong lanem mo tijim gospel insaed long wod. Bisop i save invaetem presiden blong Sandei Skul blong lidim ol toktok storian ia.

• Olsem we i nid, hem i givim ol nem blong ol memba blong wod i go long bisoprik, blong oli singaotem olgeta olsem ol tija insaed long ol oganaesesen blong olgeta, hemia folem ol gaedlaen we i stap long 30.1.

• Hem i mit wetem ol niufala tija we oli singaotem mo i helpem olgeta blong oli rere from koling blong olgeta (luk long Stap Tij Folem Wei blong Sevya,40).

• Givim mo gogohed blong givim sapot long ol tija insaed long ol oganaesesen blong olgeta. Toktok long ol tija oltaem abaot ol hadwok blong olgeta blong bildimap fet long ol pipol ia we oli stap tijim. Sapos i nid, askem presiden blong Sandei Skul blong kasem help.

17.4

Ol Tija Kaonsel Miting

Insaed long ol tija kaonsel miting, ol tija oli kaonsel tugeta abaot ol prinsipol blong stap tij olsem Kraes. Oli kaonsel tu abaot wei blong mekem fasin blong lanem mo tijim gospel i kam gud moa. Oli yusum Teaching in the Savior’s Way olsem wan risos.

Ol tija kaonsel miting, oli holem olgeta evri kwota long taem blong wan klas we i tekem 50 minit, long wan Sandei.

• Ol miting blong ol tija blong prishud, Rilif Sosaeti, mo Ol Yang Woman, oli save holem olgeta long fas Sandei o long nambatri Sandei.

• Ol miting blong ol tija blong Sandei Skul, oli save holem olgeta long nambatu o nambafo Sandei.

Praemeri presidensi i toktok wetem wan memba blong bisoprik blong faenemaot olsem wanem blong mekem tijing long Praemeri i kam strong moa. Sandei Skul presiden i save help olsem we i nid. Sam wei blong help, oli stap andanit ia:

• Ol Praemeri tija oli save go long wan kaonsel miting blong ol tija wetem ol tija blong ol nara oganaesesen.

• Oli save holem ol seperet miting blong ol tija kaonsel miting blong ol Praemeri tija. Ol miting ia, oli save holem olgeta long wan Praemeri singsing taem we i tekem 20 minit. Wan nara wei, oli save holem olgeta miting ia bifo o afta ol nomol miting long Sandei, o long wan nara dei long wik.

• Ol memba blong presidensi blong Praemeri oli save visitim ol klas blong Praemeri mo kaonsel wetem ol tija afta abaot fasin blong tij long wei blong Sevya.

Wod kaonsel i lukluk ova mo i putum taem blong ol tija kaonsel miting. Plante taem, wan memba blong Sandei Skul Presidensi nao i stap lidim ol miting. Be, bisoprik i save askem wan nara memba blong i lidim ol miting ia.

Blong kasem moa infomesen, luk long,“Ol Tija Kaonsel Miting” insaed long Stap Tij Folem Wei blong Sevya (ol pej 38–39).

17.5

Ol Tija Kaonsel Miting blong Ol Papa mo Mama

Wod kaonsel i save oganaesem ol tija kaonsel miting blong ol papa mo mama blong helpem olgeta blong mekem wok blong tijim gospel insaed long hom i kam antap moa. Olsem ol nara tija kaonsel miting, oli holem olgeta long taem blong klas we i tekem 50 minit, long wan Sandei.

Long ol miting ia, ol papa mo mama oli kaonsel tugeta abaot olsem wanem blong yusum ol prinsipol blong stap tij olsem Kraes, taem oli stap tijim ol pikinini blong olgeta. Oli yusum Stap Tij Folem Wei blong Sevya olsem wan risos, we i tekem tu seksen we taetol blong hem “Hom mo Famli” (ol pej 30–31). Oli save tokbaot tu ol tingting blong stap tij mo skripja stadi insaed long Kam Folem Mi, olsem seksen we taetol blong hem “Stap Rere Ol Pikinini blong Yu blong Stap long Kavenan Rod blong God blong wan Laef Taem.”

Wod kaonsel i lukluk ova mo i putum taem blong ol tija kaonsel miting wetem ol papa mo mama. Oli talemaot sapos bae oli invaetem sam papa mo mama nomo blong oli kam, o, blong oli invaetem evri papa mo mama long wod.

Plante taem, wan memba blong Sandei Skul Presidensi nao i stap lidim ol miting. Be, bisoprik i save askem wan nara memba blong i lidim ol miting ia.

Blong kasem moa infomesen, luk long,“Ol Tija Kaonsel Miting” insaed long Stap Tij Folem Wei blong Sevya (ol pej 38–39).