17.

Vakatavulici ni Kosipeli

Eda vakatavulica na kosipeli me vukea na tamata ni vaqaqacotaka na nodra vakabauta na Tamada Vakalomalagi kei Jisu Karisito. Eda qara ni vukea na tamata me ra vakataka vakalevu na iVakabula, ciqoma na Nona kaukauwa ena nodra bula, ka yaco me rawata na bula tawamudu. Ni sa vakatavulici na vosa ni Kalou ka ciqomi tu mai ena Yalotabu, sa tiko kina na kaukauwa me veisautaka na yalo ka vakauqeta na saumaki. E sa “kaukauwa sara ki na nodra vakanananu na tamata mai na … dua tale na ka” (Alama 31:5).

17.1

iVakavuvuli eso ni Veivakatavulici va-Karisito

Ni vakatavulici tu na kosipeli, era muria na itubutubu, qasenivuli, kei na iliuliu na ivakaraitaki i Jisu Karisito, na Qasenivuli Levu. Na veivakatavulici ena ivakarau ni iVakabula e sa dua na veivakabauti ka ilesilesi tabu sara.

Era wasea na iliuliu na ivakavuvuli eso oqo ni veivakatavulici va-Karisito vei ira na qasenivuli ena nodra isoqosoqo. Era sa vakamacalataki tu vakamatailalai na ivakavuvuli oqo ena Veivakatavulici ena iVakarau ni iVakabula.

17.1.1

Lomani Ira o Vakavulica

Na veika kece e cakava na iVakabula e sa ivakaraitaki ni Nona loloma (raica na 2 Nifai 26:24). Era muria na Nona ivakaraitaki na iliuliu kei na qasenivuli ena vakaraitaki ni loloma vei ira era vakavulica. Era masulaki ira era vakavulica ena yacadra, qara mera semati ka kilai ira vakamatata, ka raica matua na gagadre ni tamata yadua. Era sudra yani kivei ira na lewe ni nodra kalasi se kuoramu ka sega ni tiko rawa.

17.1.2

Veivakatavulici ena Yalotabu

Me vakauqeti na tamata me ra vakabauti Jisu Karisito, sa dodonu me ra veivakavulici na qasenivuli ena Yalotabu. Era qara na veituberi ni Yalotabu na qasenivuli ni ra vakavakarau ka veivakavulici, ka segata me ra bula kilikili kaya na Nona veivakayarayarataki ena veisiga.

17.1.3

Vakatavulica na iVunau

A vakatavulica na iVakabula na ivunau i Tamana. Ni vakamuri na ivakaraitaki ni iVakabula, era raica matua na qasenivuli na dina yaga, veivakabulai eso ni kosipeli. Era veivakavulici ena vakayagataki ni ivolanikalou, na nodra ivakavuvuli na parofita edaidai, kei na ivola vakadonui eso. Era liutaka na qasenivuli na veivosaki veivakauqeti ka vakadeitaka ni sa veilaveti ka dodonu tu vakaivunau na nodra veivakavulici. Era sa lisitaki tu na ivola vakadonui ena iDusidusi ni Lewenivuli ena ChurchofJesusChrist.orgni gauna oqo.

17.1.4

Sureta na Vuli Gugumatua

Era vakauqeti ira na lewenilotu na qasenivuli me ra tutaka na nodra vuli vakai ira. Era tokoni ira na lewenilotu ena nodra sasaga ni vulica na kosipeli vakayadua kei na nodra matavuvale. Era sureti ira na lewenilotu me wasea na ka era sa vulica tiko ka cakacakataka. Sa tubu na vakabauta ni dua na tamata ni sa vakaitavi vagumatua tu ena vulici ni kosipeli ka tutaka tiko na kena ivakavuvuli ena bula ni veisiga.

17.2

Vulici kei na Vakatavulici ni Kosipeli Yavutaki e Vale

Me da saumaki tu kivua na Turaga o Jisu Karisito, sa itavi ni lewe ni Lotu yadua me vulica vakataki koya na kosipeli. Kena ikuri, sa itavi ni tubutubu me ra vakatavulica na kosipeli vei ira na luvedra. Na vulici kei na vakatavulici ni kosipeli sa dodonu me yavutaki e vale. Na iliuliu kei na qasenivuli ni Lotu era vakauqeta ka tokona na vulici kei na vakatavulici ni kosipeli yavutaki e vale.

Era vakayaloqaqataki ira na lewenilotu na iliuliu kei na qasenivuli me qara na nodra veivakauqeti vakai ira ena sala me vulici ka vakatavulici kina na kosipeli. Sa dodonu me nodra ivurevure levu na ivolanikalou kei na itukutuku ni koniferedi raraba. Na ivurevure veitokoni eso rawa ni oka kina na Lako Mai, Mo Muri Au kei na mekasini ni Lotu.

17.3

Nodra iTavi na iLiuliu

Sa nodra itavi na iliuliu na veivakatavulici kei na vuli ena nodra isoqosoqo. Eso na sala era vakayacora kina na itavi oqo sa tuvai koto e ra.

• Tuva e dua na ivakaraitaki ena vulici ni kosipeli kei na kena vakatavulici ena ivakarau ni iVakabula.

• Vakadeitaka ni sa tara na vakabauta na veivakatavulici ena nodra isoqosoqo ka sa dodonu vakaivunau.

• Ke ra sa lewe ni matabose ni tabanalevu na iliuliu, veivosakitaka kei ira na lewe ni matabose tale eso na sala me vakavinakataki kina na vulici kei na vakatavulici ni kosipeli ena tabanalevu. Sa rawa ni sureta na peresitedi ni Matawilivola ni Sigatabu na bisopi me liutaka na veivosaki oqo.

• Ni sa gadrevi, vakatura na yaca eso ki na matabisopi ni lewe ni tabanalevu me ra kacivi vaka qasenivuli ena nodra isoqosoqo, ena muri ni dusidusi ena 30.1.

• Sota vata kei ira na qasenivuli kacivi vou ka vukei ira mera vakavakarau kina nodra veikacivi (raica na Veivakavulici ena Sala ni iVakabula, 40).

• Dau veitokoni tikoga vei ira na qasenivuli ena nodra isoqosoqo. Vosa vakawasoma vei ira na qasenivuli me baleta na nodra sasaga ni tara na nodra vakabauta na tamata era vakavulica. Ke gadrevi tu, kerea na Peresitedi ni Matawilivola ni Sigatabu me veivuke.

17.4

Soqoni ni Matabose ni Qasenivuli

Ena soqoni ni matabose ni qasenivuli, era veivosakitaka vata na qasenivuli na ivakavuvuli eso ni veivakatavulici va-Karisito. Era veivosakitaka talega na sala me vakavinakataki kina na vulici kei na vakatavulici ni kosipeli. Era vakayagataka na Veivakatavulici ena iVakarau ni iVakabula me ivurevure.

Sa dau yaco vakavulatolu na soqoni ni matabose ni qasenivuli donuya na gauna ni kalasi 50 na miniti ena Sigatabu.

• Na soqoni ni qasenivuli ni matabete, iSoqosoqo ni Veivukei, kei na Goneyalewa e rawa ni vakayacori ena matai se katolu ni Sigatabu.

• Na soqoni ni qasenivuli ni Matawilivola ni Sigatabu e rawa ni vakayacori ena karua se kava ni Sigatabu.

Na veivosaki na mataveiliutaki ni Lalai kei na dua na lewe ni matabisopi me navuci na sala me vaqaqacotaki kina na veivakatavulici ena Lalai. Sa rawa ni veivuke na peresitedi ni Matawilivola ni Sigatabu ni gadrevi tu. Sa volai tu e ra eso na digidigi:

• Sa rawa ni ra tiko ena soqoni ni matabose ni qasenivuli na qasenivuli ni Lalai kei ira mai na veisoqosoqo tale eso.

• Na soqoni ni matabose ni qasenivuli duidui e rawa ni vakayacori me baleti ira na qasenivuli ni Lalai. Sa rawa ni vakayacori na veisoqoni oqo donuya na gauna ni lagasere ni Lalai 20 na miniti. Me dua tani tale, e rawa ni ra vakayacori ni bera se oti na soqoni matau ena Sigatabu se dua tale na siga ena loma ni macawa.

• Sa rawa ni ra sikova na kalasi eso ni Lalai na lewe ni mataveiliutaki ni Lalai ka veivosaki kei ira na qasenivuli e muri me baleta na veivakatavulici ena ivakarau ni iVakabula.

Na matabose ni tabanalevu e raica raraba ka tuvalaka na soqoni ni matabose ni qasenivuli. Ena dau liutaka na soqoni e dua na lewe ni mataveiliutaki ni Matawilivola ni Sigatabu. Ia, sa rawa ni kerea na matabisopi e dua tale na lewenilotu me liutaki ira.

Me baleta na ikuri ni ivakamacala, raica na “Teacher Council Meetings” ena Veivakavulici ena iVakarau ni iVakabula (tabana e 38–39).

17.5

Matabose ni Qasenivuli vei ira na iTubutubu

Sa rawa ni yavutaka na soqoni ni matabose ni qasenivuli na matabose ni tabanalevu ena veivuke ni tubutubu vei ira ena vakavinakataki ni vakatavulici ni kosipeli e vale. Vakataka ga na soqoni ni matabose ni qasenivuli tale eso, era sa vakayacori oqo donuya na gauna ni kalasi 50 na miniti ena Sigatabu.

Ena matabose oqo, era dau veitalanoataka na itubutubu na sala me bulataki kina na ivakavuvuli ni veivakatavulici va-Karisito nira vakavulici ira na luvedra. Era na vakayagataka na Veivakavulici ena Sala ni iVakabula me ivurevure, oka kina na iwase ka kena ulutaga na “iTikotiko kei na Vuvale” (tabana e 30–31). Sa rawa mera veivosakitaka talega na vakatutu ni veivakavulici kei na vuli ivolanikalou ena Lako Mai, Mo Muri Au, me vaka na ulutaga ni iwasewase “Nodra Vakarautaki na Luvemu ki na Gauna Taucoko ena Salatu ni Veiyalayalati ni Kalou.”

Na matabose ni tabanalevu ena raica raraba ka tuvalaka na soqoni ni matabose ni qasenivuli baleti ira na itubutubu. Mera vakatulewataka se mera sureti mai na itubutubu digitaki mera tiko se mera veisureti vei ira kece na itubutubu ena tabanalevu.

Ena dau liutaka na soqoni e dua na lewe ni mataveiliutaki ni Matawilivola ni Sigatabu. Ia, sa rawa ni kerea na matabisopi e dua tale na lewenilotu me liutaki ira.

Me baleta na ikuri ni ivakamacala, raica na “Teacher Council Meetings” ena Veivakavulici ena iVakarau ni iVakabula (tabana e 38–39).