“24. Givim Ol Nem blong Kam Wan Misinari mo Seves Misinari,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2024).
“24. Givim Ol Nem blong Kam Wan Misinari mo Seves Misinari,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent.
24.
Givim Nem blong Wan long Misinari Seves mo Misinari Seves
24.0
Fas Toktok
Long taem bifo, Lod i bin givim wok ia blong mekem Isrel i kam tugeta long medel blong “ol man long olgeta ples long wol, mo baptaesem olgeta long nem blong Papa, … blong Pikinini … , mo … blong Tabu Spirit” (Matiu 28:19; luk tu long ves 20). Lod i bin givimbak wok ia bakegen long ol las dei ia (luk long Doktrin mo Ol Kavenan 39:11; 68:6–8; 112:28–30). Evri memba blong Jos oli mekem kavenan, long taem blong baptaes blong oli stap ol witnes blong God, mo blong oli givhan long ol narawan (luk long Mosaea 18:8–10).
Blong wok blong Lod olsem wan misinari, hem i wan tabu spesel janis. Hem i tekem ol blesing we oli no save finis i go long hem we i givim seves, mo long olgeta we hem i givim seves long olgeta (luk long Doktrin mo Ol Kavenan 18:14–16).
Ol misin koling, insaed i gat wok ia blong tijim gospel, sapotem wok blong ol dipatmen o yunit blong Jos, o givim seves long lokol komuniti.
Lod i askem evri yang man we i klin inaf mo i save mekem, blong hem i mas rere from mo givim seves long wan misin. Long ol Lata-dei Sent yang man, misinari seves i wan prishud responsabiliti (luk long Doktrin mo Ol Kavenan 36:1, 4–7).
Lod i welkamem tu evri yang woman we i klin inaf mo i save mekem, blong givim seves long wan misin sapos hem i wantem. Long yufala, ol yang woman, wan misin i wan janis we i gat paoa, be, i no wan mas. Blong stap rere from wan misin bae i blesem wan yang woman nomata se hem i disaed blong kam wan misinari o no.
I nidim ol senia misinari tu mo oli leftemap tingting blong olgeta blong rere blong givim seves long wan misin.
24.1
Koling Ia blong Givim Seves
Wanwan misinari, oli singaotem hem blong hem i helpem Papa long Heven mo Jisas Kraes long wok blong Tufala. Ol misinari oli ripresentem Jisas Kraes mo Jos blong Hem we i kambak. Ol misinari oli no selfis mo oli wok blong Lod long wan wok we i gat lav, long medel blong ol pikinini blong Hem. Ol misin long stap tij mo givim seves i blesem tugeta, misinari mo ol nara wan. (Luk long Matiu 16:25; 22:36–40.)
Ol misin koling, oli givim long ol memba we oli gat hat blong wantem givim seves, oli klin inaf, mo oli save givim seves. Ol memba ia, oli traehad blong givim seves long Lod “wetem ful hat, ful paoa blong tingting, ful maen mo ful paoa.” Oli developem “fet, hop, bigfala hat mo lav.” Oli kipim “wan ae we i lukluk nomo long glori blong God.” Taem oli stap mekem ol samting ia, Lod i mekem olgeta oli kwalifae from wok ia. (Doktrin mo Ol Kavenan 4:2, 5; luk long ol ves 1–7.)
Ol misinari oli stap ripresentem Lod, mo wan we i gat stret atoriti nao i singaotem olgeta (luk long Doktrin mo Ol Kavenan 42:11; Ol Toktok blong Bilif 1:5). Koling ia blong givim seves long wan misin, plante taem, Presiden blong Jos nao i givim long wan. Long saed blong ol senia seves misinari, stek presiden nao i givimaot koling ia.
24.2
Misinari Asaenmen
Singaot ia blong givim seves olsem wan misinari, i tekem wan spesifik wok o asaenmen. Ol asaenmen ia oli defdefren long wanwan long olgeta. Plante taem, i gat:
-
Wan asaenmen blong stap wan misinari blong stap tij o wan seves misinari.
-
Wan ples.
-
Wan taem blong givim seves, olsem hamas manis o yia.
Wanwan asaenmen ia, oli givim tru long revelesen, mo i go stret wetem misinari ia mo ol nid blong ol pikinini blong God.
Wan asaenmen i save jenis mo i kam tru long revelesen we i gogohed semtaem we ol situesen oli jenis. Hem i impoten blong i mas gat wan spesifik asaenmen. Be, asaenmen ia i kam long nambatu ples long koling ia blong givim seves olsem wan misinari. (Luk long Doktrin mo Ol Kavenan 80:3.)
24.2.1
Ol Yang Tijing Misinari
Oli asaenem ol yangfala misinari we oli stap tij blong tijim gospel longwe long hom. Ol asaenmen ia, Ol Aposol oli mekem tru long revelesen. Ol misinari we oli givim seves anda long daereksen blong wan misin presiden.
Ol singgel man, we oli gat 18 kasem 25 yia, oli save givim seves olsem ol tijing misinari. Plante taem bae oli givim seves blong 24 manis.
Ol singgel woman, we oli gat 19 kasem 29 yia, oli save givim seves olsem ol tijing misinari. Plante taem, oli givim seves blong 18 manis.
24.2.2
Ol Yang Seves Misinari
Ol yangfala seves misinari, oli givim wok long olgeta blong oli givim seves insaed long Jos mo long komuniti, mo semtaem oli stap laef long hom blong olgeta nomo. Ol asaenmen ia, Ol Aposol oli mekem tru long revelesen. Oli givim long olgeta we situesen blong olgeta i stret blong wan seves misin (luk long 24.3.3).
Wanwan man o woman ia, oli gat ol semfala standet blong stap rere from, mo blong folem blong stap klin inaf, semmak olsem olgeta ia we oli kasem wok i go long wan tijing misin. Evri yang misinari kandidet, oli stap sendem nem blong olgeta tru long semfala rod.
Ol seves misinari oli givim seves long lokol homples blong olgeta anda long daereksen blong wan misin presiden, wetem fulap sapot blong ol seves misin lida. Stek presiden i givim sapot long eklesiastik saed, (luk long 24.7.3).
Wetem help blong ol seves misin lida blong olgeta, wanwan seves misinari i kasem ol asaenmen we oli stret long situesen blong olgeta. Ol asaenmen ia tu oli folem ol janis blong givim seves (luk long 24.7.1). Ol misinari ia oli givim seves long ful paoa we oli gat, o save gat.
Ol singgel man, we oli gat 18 kasem 25 yia, oli save givim seves olsem ol seves misinari. Plante taem bae oli givim seves blong 24 manis.
Ol singgel woman, we oli gat 19 kasem 29 yia, oli save givim seves olsem ol seves misinari. Plante taem, oli givim seves blong 18 manis.
Ol seves misin blong ol yangfala misinari, i no stap yet long evri pat blong wol. Blong gat wan lis blong ol eria we ol seves misin oli stap long hem, luk long ChurchofJesusChrist.org/service-missionary. Websaet ia i givim tu moa infomesen long saed blong ol seves misin. Long ol ples we i no gat seves misin, ol yang memba oli save givim seves semmak olsem ol senia seves misinari (luk long 24.2.4).
24.2.3
Ol Senia Misinari
Olgeta memba we oli mared, we oli gat 40 yia i go antap, oli save singaotem olgeta olsem ol senia misinari olsem wan kapol sapos oli no gat pikinini we i dipen long olgeta.
Ol singgel woman, we oli gat 40 yia i go antap, oli save singaotem olgeta tu olsem senia misinari sapos oli no gat pikinini i stap long hom.
Ol singgel man, we oli gat 40 yia i go antap, oli no save givim seves olsem ol senia misinari. Be, oli save givim seves olsem ol senia seves misinari. (Luk long 24.2.4.)
Oli leftemap tingting blong ol senia misinari blong faenem ol pipol blong stap tijim olgeta mo stap helpem olgeta blong rere from baptaes. Ol senia misinari, oli save givim wok tu long olgeta blong sapotem:
-
Ol memba mo ol lida long eria, mo ol lokol lida.
-
Ol Eria, Ol dipatmen blong Jos mo ol Jos fasiliti.
-
Ol jareti oganaesesen.
Ol senia misinari, plante taem, oli givim seves longwe long hom blong 6 kasem 23 manis. Olgeta we oli givim seves aotsaed long kantri we oli stap laef long hem oltaem, plante taem, oli givim seves blong 18 manis.
Oli no askem ol senia misinari blong wok ol semfala aoa, blong mekem ol semfala aktiviti, o blong mekem hamas we ol yang misinari oli stap mekem. Be yet, seves blong olgeta, i askem fulap long olgeta. From risen ia, oli mas stap helti inaf blong givim seves. Oli mas kwalifae tu long saed blong faenens ( luk long 24.3.4.2).
Ol bisop, ol stek presiden mo ol nara lida oli prea mo tingting se huia nao i save givim seves. Ol bisop o ol stek presiden oli save mekem intaviu long ol memba ia blong faenemaot sapos oli fri, mo invaetem olgeta blong rere blong givim seves.
Ol asaenmen blong ol senia misinari, Lod i givim tru long revelesen long Ol Aposol. Oli save rekomendem ol spesifik kaen asaenmen blong ol senia misinari. Be, ol lida oli no mas komitim olgeta long saed blong wok we bae oli kasem. Ol kandidet oli save talemaot se oli laekem moa wan asaenmen, be oli mas glad blong akseptem eni asaenmen.
Blong kasem moa infomesen, luk long SeniorMissionary.ChurchofJesusChrist.org.
24.2.4
Ol Senia Seves Misinari
Antap long ol koling insaed long homwod o homstek blong olgeta, ol memba oli save givim seves long Lod olsem ol senia seves misinari. Ol misinari ia, oli givim ol impoten seves long ol dipatmen blong Jos, ol fasiliti, mo ol misin (luk long 24.7.1). Oli laef, o slip long hom.
Ol man mo ol woman, we oli gat 26 yia i go antap, oli save singaotem olgeta olsem ol senia seves misinari.
Antap long hemia, ol yang man we oli gat 18–25 yia, mo ol yang woman we oli gat 19–25 yia, oli save givim seves semmak long ol senia misinari sapos oli stap laef long ol ples we i no gat ol seves misin blong ol yang misinari. Mo tu, oli save givim seves sapos oli mared, o sapos oli bin givim seves finis olsem ol yang tijing, o seves misinari.
Stek presiden nao i singaotem ol senia jos seves misinari. Oli givim seves anda long daereksen blong hem. Hamas taem oli givim seves long hem evri wik i dipen long hamas oli save mekem, ol janis blong givim seves long eria blong olgeta, mo daereksen we i kam long Eria Presidensi.
Stek presiden nao i apruvum ol asaenmen blong ol senia seves misinari. Hem i toktok wetem misinari mo ol narawan, mo wetem prea, i askem revelesen abaot wanwan asaenmen. Hem i save luklukbak long wanem i stap long SeniorMissionary.ChurchofJesusChrist.org taem hem i disaed long saed blong asaenmen.
Blong gat moa infomesen long saed blong ol senia seves misinari, luk long 24.7.
24.2.5
Wan Sot Lis blong Ol Misinari Asaenmen
Tebol ia we i kam afta i tokbaot smol ol defren kaen misinari asaenmen.
|
Yang Tijing Misinari |
Yang Seves Misinari |
Senia Misinari |
Senia Seves Misinari | |
|---|---|---|---|---|
|
Hu I Singaotem | Yang Tijing Misinari Presiden blong Jos | Yang Seves Misinari Presiden blong Jos | Senia Misinari Presiden blong Jos | Senia Seves Misinari Stek presiden |
|
Hu I Givimaot Asaenmen | Yang Tijing Misinari Wan Aposol | Yang Seves Misinari Wan Aposol | Senia Misinari Wan Aposol | Senia Seves Misinari Stek presiden |
|
Hu I Stap Setem Apat | Yang Tijing Misinari Stek presiden | Yang Seves Misinari Stek presiden | Senia Misinari Stek presiden | Senia Seves Misinari Stek presiden mo kaonsela |
|
Hem i stap laef | Yang Tijing Misinari Longwe long hom | Yang Seves Misinari Long Hom | Senia Misinari Longwe long hom, o long hom | Senia Seves Misinari Long Hom |
|
Eklesiastik lida | Yang Tijing Misinari Misin presiden o histri saet presiden | Yang Seves Misinari Stek presiden | Senia Misinari Misin, tempol, o histri saet presiden; o Eria Presiden | Senia Seves Misinari Stek presiden |
|
I Ripot I Go long | Yang Tijing Misinari Misin presiden o histri saet presiden | Yang Seves Misinari Misin presiden, tru long ol seves misin lida | Senia Misinari Misin, tempol, o histri saet presiden; Eria Presiden; daerekta blong senta blong ol visita; o wan Jos dipatmen o bilding maneja. | Senia Seves Misinari Operesen maneja blong seves asaenmen |
|
Ol Samting we Wan I Mas Gat Folem Yia blong Wanwan | Yang Tijing Misinari 18–25 (man) | Yang Seves Misinari 18–25 (man) | Senia Misinari 40 yia o moa, sapos i mared o sapos i wan singgel sista | Senia Seves Misinari 26 o moa |
24.3
Stap Rere mo Stap Kwalifae blong Givim Seves long Wan Misin
Oli leftemap tingting blong ol fiuja misinari blong givim seves long wan misin from oli lavem Lod mo ol pikinini blong Hem. Oli mas save gud wanem i stap long ol intaviu kwestin blong sendem nem blong misinari.
24.3.1
Jenisim Laef I Go long Jisas Kraes
Ol fiuja misinari oli traehad blong jenisim laef blong olgeta moa long Jisas Kraes mo gospel blong Hem we i bin kambak. Oli:
-
Wok blong mekem bilif blong olgeta long Papa long Heven mo Jisas Kraes i kam strong moa.
-
Mekem testemoni blong olgeta abaot gospel ia blong Jisas Kraes, we i kambak, i kam strong moa (luk long Alma 5:45–47).
-
Laef folem doktrin blong Kraes taem oli “jusum blong sakem sin mo mekem wok we i stret mo gud” (Alma 13:10; luk tu long 2 Nifae 31:9–21).
-
Prea, stadi long ol skripja (speseli Buk blong Momon) mo ol tijing blong ol profet we oli stap laef, mo oli kipim olgeta komanmen (luk long Alma 17:2–3).
-
Tekpat long wok blong tempol mo famli histri (luk long Doktrin mo Ol Kavenan 109:22).
-
Tekpat long seminari mo institiut (blong ol yut mo ol yang adalt).
24.3.2
Stap Mitim Ol Standet blong Fasin blong Stap Klin Inaf
Ol fiuja misinari oli traehad blong oli stap klin inaf blong gat kampani blong Spirit. Hemia i wan nid blong mekem wan misinari seves we i wok (luk long Doktrin mo Ol Kavenan 42:13–14). Blong stap kwalifae from kampani blong Spirit, i blong stap klin mo no gat sin (luk long Hileman 4:24; Doktrin mo Ol Kavenan 38:42).
24.3.2.1
Fasin blong Sakem Sin
Fasin blong sakem sin, mo fasin blong kasem fogivnes from sin, oli ol presen we oli stap mo oli blong evriwan long ol pikinini blong God. Ol presen ia, i posibol blong oli stap ia tru long paoa blong pemaot man, we i kam long Jisas Kraes. Fasin blong sakem sin i askem wan blong i praktisim fet, o bilif blong hem long Jisas Kraes, we i gat tru tingting, mo i stap obei long olgeta komanmen. Hemia i tekem tu fasin blong stap konfes, mo fasin blong lego sin fogud. Long saed blong ol series sin, bae fasin blong sakem sin i minim tu blong konfes long bisop o long stek presiden (luk long 32.3 mo 32.4 insaed long hanbuk ia).
Wan we i sakem sin, i kasem fogivnes mo i kam klin tru long Atonmen mo gladhat blong Jisas Kraes. Lod i nomo tingbaot sin ia. “!Bae glad blong hem i bigwan tumas from sol we i sakem sin!” (Doktrin mo Ol Kavenan 18:13; luk tu long Aesea 43:25; Jekob 6:5; Alma 34:15–17; Hileman 5:10–11; Doktrin mo Ol Kavenan 58:42–43; mo 32.1 insaed long hanbuk ia.)
Ol memba we oli wantem go long wan misin, oli mas tanem olgeta i go long Sevya taem oli stap sakem sin mo stap rere blong givim seves. Mo tu, oli save askem help blong ol memba blong famli, mo hemia blong ol lokol lida blong Jos.
Wan misinari kandidet i mas sakem ol series sin blong hem finis bifo stek presiden i sendem nem blong hem i go (luk long 32.6–32.8; luk tu long 24.4.4). Rod ia blong fasin blong sakem sin, insaed long hem i gat inaf taem blong man o woman ia, i soem, tru long wan stret mo gud fasin blong laef, se hem i bin kasem spirit blong Kraes blong kam klin aot long ol sin. (luk long Doktrin mo Ol Kavenan 20:37). Stek presiden i kaonsel wetem Eria Presidensi (o Eria Seventi we oli givim wok ia long hem) sapos hem i gat ol kwestin abaot hamas taem i nidim blong sakem sin.
24.3.2.2
Ol Konfesen we Oli Hapen Afta
Wan we i kasem wan misin koling, o i statem wan misinari seves be i no sakem ol series sin, maet bae i nid blong i stap long hom nomo, o i gobak hom. Folem situesen we i stap, bae hem i save givim seves bakegen afta we hem i sakem sin (luk long 24.6.3.2).
24.3.3
Helt blong Bodi, Tingting mo Filing
Misinari wok, hem i wan wok wetem jalenj. Fasin blong wok long saed blong bodi, tingting mo filing i wanem oli nidim mo i save mekem tingting i fasfas. Plante taem, ol misinari oli wok long ol situesen o ples we oli defdefren smol. Helt i save godaon from jenis blong fasin blong kaekae, weta, o fasin blong laef. Taemtebol blong misinari tu, i wan heviwan. (Luk long Alma 17:5; 26:27–28, 30.)
Ol yang tijing misinari oli mas komitim olgeta mo oli mas save fit long saed blong bodi, tingting mo filing blong mekem evri wok ia we i stap long taemtebol blong wan misinari. (Luk long Ol Misinari Standet blong Ol Disaepol blong Jisas Kraes [2019], 2.4.)
Ol yang seves misinari oli wok long wan taemtebol we oli givim seves long ful paoa we oli gat, ol talen mo ol skil oli gat.
Ol fiuja misinari oli mas rere blong givim seves taem oli mekem olgetawan oli kam strong moa long saed blong bodi, tingting mo filing. Mo tu, oli wok blong stap developem fasin blong save stanap bakegen olgetawan afta long wan hadtaem, mo developem fasin blong gat wan indipenden laef.
Maet bae ol lida oli nid blong toktok, wetem kea mo tingting, wetem wan kandidet abaot ol helt jalenj blong hem bifo hem i sendem nem blong hem i go. Sam kandidet, bae oli nid blong kasem profesonol kea from helt jalenj blong olgeta (luk long 31.3.6). Wan kandidet we i stap tekem meresin we dokta i givim long hem from wan sik we hem i gat, i mas komitim hem blong i gohed blong tekem meresin ia truaot long seves blong hem olsem we helt kea dokta blong hem i talemaot long hem.
24.3.4
Ol Faenens
Faenens sakrifaes i pat blong misinari seves (luk long Mak 1:17–18; Alma 15:16). Ol misinari mo ol famli blong olgeta oli gat fasfala responsabiliti ia blong givim mane kontribusen blong misinari seves ia. Oli mas rere long wan stret fasin, mo mekem sakrifaes. Oli mas save dipen long olgetawan long saed blong faenens, i go kasem poen we bae oli save pem evri kontribusen komitmen blong olgeta.
24.3.4.1
Blong Pem Faenens blong Ol Yang Misinari we Oli Givim Seves Longwe long Hom
Ol yang kandidet we oli bin rere folem hamas we oli save mekem, oli no mas pusumbak taem blong givim seves from problem blong faenens. Olgeta we oli nidim help long saed blong faenens blong save mitim ol kontribusen komitmen blong olgeta, oli save kasem help ia long ol nara memba blong famli, mo ol fren.
Sapos i gat nid i stap, bisop o stek presiden i save askem ol memba insaed long wod o stek blong oli givim donesen i go long misinari basket.
Oli no save yusum ol bajet blong ol yunit mo ol mane blong fast ofring.
Manis kontribusen komitmen. Ol yang tijing misinari mo famli blong olgeta, oli save pem wan spesifik amaon, evri manis, blong help kavremap evri mane blong spendem long misinari program ia. Amaon ia, oli setemap long tufala wei ia:
-
Ol misinari we oli kam long sam kantri oli tekpat long ikwol kontribusen program. Hemia i minim se semfala amaon ia, bae wan i mas pem blong wanwan misinari, i nomata wanem ples we misinari ia bae i mekem misin blong hem long hem. Amaon ia, Jos hedkwota nao i disaed long hem. Ol lida oli save kontaktem Misinari Dipatmen (luk long 24.9.3) o eria ofis blong kasem wan lis blong ol kantri we oli stap insaed long program ia, wetem ikwol amaon.
-
Long ol nara kantri, bisop, stek presiden, misinari mo famli oli toktok tugeta abaot amaon blong manis kontribusen. Bisop mo stek presiden i tekem not tu long gaed we i kam long Eria Presidensi. Oli leftemap tingting blong misinari i mekem wan faenens sakrifaes we i stret mo blong oli dipen long olgetawan, hemia folem ol situesen blong misinari mo famli blong hem. Oli agri long wan amaon blong kontribusen, mo oli raetemdaon long misinari aplikesen fom. Misinari mo famli blong hem oli komitim olgeta blong folemap hemia go kasem en. I gat ol narawan tu we oli save givim wan kontribusen i go long amaon ia sapos nomo oli stap laef insaed long hom kantri blong misinari ia (luk long “Wod Misin Mane Basket” we i kam afta insaed long seksen ia).
Oli pem ol kontribusen i go long wod misin mane basket. Ol bisop oli jekem se oli pem amaon ia evri manis. Ol mane we oli pem evri manis, i no mas ova long amaon ia; oli no save pem ol kontribusen bifo manis i stat. Ol mane we oli pem bifo manis i kam, bambae oli no save givimbak sapos wan misinari i gobak hom eli.
Ol mane we oli spendem long fil. Evri manis, ol yang misinari oli kasem inaf mane we i kam long misin blong lukluk long saed blong helti kaekae, transpot, mo ol nara samting we wanwan i nidim. Ol mane ia, oli tabu. Ol misinari oli yusum olgeta nomo blong ol samting we i blong misin. Oli no mas yusum blong pem samting we i blong olgeta nomo, oli no save sevem mane ia, o oli no save sendem i go long ol memba blong famli, o long nara man. Ol misinari oli givimbak eni mane we oli no nidim, i gobak long misin.
Ol misinari oli yusum mane we i blong olgeta nomo blong lukluk long ol nara samting blong pem. Ol samting we oli stap pem blong olgeta, i no mas sas tumas. (Luk long Ol Misinari Standet blong Ol Disaepol blong Jisas Kraes, 4.8.)
24.3.4.2
Blong Pem Faenens blong Ol Senia Misinari we Oli Givim Seves Longwe long Hom
Manis kontribusen komitmen. Ol senia misinari we oli stap givim seves longwe long hom, oli putum mane i go long homwod misinari mane basket evri manis. Ol kontribusen ia, oli help blong kavremap mane blong haos mo trak (luk tu long “Sam Moa Mane blong Spendem” we i kam afta, insaed long seksen ia). Ol kontribusen blong ol rent blong haos i folem averej praes blong wanwan misin. Ol mane ia oli save bigwan moa o daon moa long valiu blong wan haos we Jos i givim.
-
Ol senia misinari blong samfala kantri we oli tekpat long ikwol kontribusen program ia, oli givim wan amaon we oli putum insaed long paket blong misinari koling.
-
Long ol nara kantri, bisop, stek presiden mo misinari oli toktok tugeta abaot amaon blong manis kontribusen. Ol lida oli leftemap tingting blong mekem faenens sakrifaes we i stret folem situesen blong misinari. Oli agri long wan amaon, mo oli raetem i go long misinari aplikesen fom. Amaon ia, i mas kasem amaon we Eria Presidensi i putum blong ol senia misinari (amaon ia we oli agri long hem wetem Misinari Dipatmen). Ol narawan we oli stap laef long hom kantri blong misinari, oli save givim mane i go long amaon ia.
Ol bisop oli jekem se oli pem amaon ia evri manis. Ol mane we oli pem evri manis, i no mas ova long amaon ia; oli no save pem ol kontribusen bifo manis i stat.
Sam moa mane blong spendem. Antap long manis kontribusen komitmen, we i help blong kavremap mane blong pem haos mo trak, ol senia misinari oli mas lukluk fulwan long ol nara mane we oli nidim blong spendem, we i tekem tu kaekae, ol samting blong olgetawan, mo bensin o masut blong trak.
24.3.4.3
Blong Pem Faenens blong Ol Senia Misinari we Oli Givim Seves long Homples
Ol misinari we oli givim seves long homples blong olgeta, oli responsibol blong lukluk long evri samting we oli nidim long saed blong faenens. Olgeta we oli nidim help long saed blong faenens, oli save kasem help ia long ol nara memba famli memba, mo ol fren. Oli no save yusum mane blong ol misinari blong wod, o stek blong yusum long ol samting we i go wetem misin ia.
24.3.4.4
Medikol Insurens mo Ol Mane blong Spendem
Evri misinari we i tekem tu ol yang misinari we oli stap tij, oli leftemap tingting bigwan blong oli holemtaet eni medikol insurens we oli gat sapos i posibol.
Ol misinari we oli givim seves long homples blong olgeta, oli mas lukluk long medikol insurens blong olgetawan, mo tu ol nara insurens. Ol senia misinari, we oli givim seves longwe long homples, olgeta tu oli mas lukluk blong gat wan kaen insurens olsem. Ol senia misinari we bae oli givim seves aotsaed long hom kantri blong olgeta, bae oli save karem insurens tru long Senia Seves Medikol Plan.
24.3.5
Rol blong Ol Memba blong Famli mo Ol Lida blong Stap Mekem Ol Misinari Oli Rere
Ol memba blong famli, ol bisop, mo ol nara lida oli helpem ol yut blong oli rere blong givim seves long wan misin. Ol bisop oli invaetem evri yang man blong kam wan misinari, mo ol yang woman tu we oli gat strong tingting ia blong givim seves.
-
Helpem olgeta blong kam ol memba misinari we oli wok gud blong serem gospel bifo oli kasem wan koling blong givim seves long misin.
-
Givim ol janis blong oli givim seves mo stap tij.
-
Putum sam taem blong oli gat janis blong oli go wetem ol fultaem misinari.
-
Invaetem ol misinari we oli stap wok naoia, o ol narawan we oli bin go long wan misin, blong oli serem ol eksperiens blong stap tij mo stap givim seves.
-
Lavem mo givim insperesen long wanwan blong i rere blong givim seves long wan misin.
-
Leftemap tingting blong olgeta blong givim moa taem blong oli prea mo stadi long ol skripja, speseli long Buk blong Momon.
-
Oganaesem wan kos blong rere blong go long misin.
Ol memba blong famli mo ol lida oli leftemap tingting blong ol senia memba blong tingting blong go long wan misinari seves. Hemia bae i minim tu blong helpem olgeta blong:
-
Luklukbak long paoa blong olgeta long saed blong bodi mo faenens, blong save go long wan misin, hemia longwe long homples, o taem oli stap laef long hom nomo.
-
Faenem ol misinari janis blong givim seves, we bae oli save mekem.
-
Kam ol memba misinari, we oli mekem gud wok blong stap serem gospel bifo oli kasem wan koling blong givim seves.
-
Andastanem blesing ia we bae misinari seves i givim long famli blong olgeta (luk long Doktrin mo Ol Kavenan 31:5–6).
Ol memba blong famli mo ol lida oli leftemap tingting blong evri misinari kandidet blong oli stadi long:
-
Buk blong Momon mo ol narafala skripja.
-
Prijim Gospel blong Mi: Wan Gaed blong Stap Serem Gospel blong Jisas Kraes.
-
Ol Jenis long Misinari Laef.
Ol memba blong famli mo ol lida oli helpem evri kandidet blong oli komitim olgeta blong folem ol misinari standet. Oli leftemap tingting blong ol kandidet blong oli stadi long hanbuk blong ol misinari standet, we i lukluk long ol wok we bae oli save kasem.
-
Blong ol yang tijing misinari: Ol Misinari Standet blong Ol Disaepol blong Jisas Kraes
-
Blong ol yang seves misinari: Ol Misinari Standet blong Ol Disaepol blong Jisas Kraes—Ol Seves Misin
-
Blong evri misinari: seksen ia “Yusum Teknoloji long Stret mo Gud Fasin” long japta 2 blong Prijim Gospel blong Mi.
24.4
Stap Sendem Nem blong Ol Misinari
Samfala memba, oli no bin stap gogohed blong laef insaed long wod blong wan ful yia. Long ol situesen olsem, long stat blong wok blong sendem nem i go, bisop i toktok wetem bisop blong man o woman ia long las wod we hem i bin stap long hem.
24.4.1
Skelem Helt
Misinari wok i askem blong wan i mas komitim hem long saed blong bodi, tingting, mo long saed blong filing. Evri kandidet, bambae oli mas gat ol medikol profesonol we oli skelem helt blong olgeta blong luk se oli rere o no.
Ol tes blong skelem helt ia, eria ofis mo Misinari Dipatmen nao i luklukbak long hem. Samtaem, ol wari long saed blong helt i save spolem paoa blong wan blong givim seves longwe long homples. Long samfala situesen, bae oli save sendembak aplikesen ia wetem samfala instraksen long wei we, man o woman, bae i save kam antap blong rere long saed blong helt blong hem.
24.4.2
Ol Fom blong Intaviu mo blong Sendem Nem
Bisop mo stek presiden i holem ol intaviu we i lukluk dip mo i luklukgud long laef blong wan, mo i holem ol intaviu we oli leftemap tingting blong wanwan kandidet. Oli yusum ol intaviu kwestin blong sendem nem blong ol misinari. Oli toktok raon long ol poen ia abaot kandidet:
-
Testemoni abaot Jisas Kraes mo gospel we i kambak, we i blong Hem (luk long 24.3.1).
-
I laef i folem ol standet blong fasin blong stap klin inaf (luk long 24.3.2).
-
I mas rere long helt long saed blong bodi, tingting mo filing (luk long 24.3.3).
-
Rere long saed blong Faenens (luk long 24.3.4).
Bisop mo stek presiden tu oli luklukbak long infomesen abaot ol standet blong stap klin inaf, mo ol standet blong stap rere long saed blong helt we oli stap long Sistem blong Sendem Nem blong Misinari Onlaen, o Missionary Online Recommendation System. Sapos wan stek presiden long Yunaeted Stet o Kanada i gat ol kwestin, hem i kontaktem Misinari Dipatmen (luk long 24.9.3). Long eni nara ples, hem i kontaktem eria ofis. Bisop mo stek presiden i no ademap eni standet blong save kwalifae. Mo tu, oli no jenisim ol intaviu kwestin.
Infomesen we i stap long fom blong sendem nem blong misinari, i givhan long rod ia, we i kam tru long revelesen, blong givimaot ol misin koling. Ol lida oli meksua se evri infomesen we oli bin askem, i kamaot fulwan.
Sapos bisop mo stek presiden oli gat ol wari abaot wan kandidet, se hem i mitim ol standet blong fasin blong stap klin inaf o no, o abaot helt blong hem, tufala i toktok tugeta, mo afta, tufala i toktok wetem kandidet. Wetem raet blong wan yang kandidet, tufala i save toktok tu wetem papa mo mama blong hem. Bisop mo stek presiden, tufala i no sendem wan nem i go kasem taem we man o woman ia i bin sakem ol series sin (luk long 24.3.2.1). Folem helt blong wan long saed blong bodi, tingting, o filing, bae oli save toktok raon long janis blong save givimaot wok long hem blong stap olsem wan seves misinari.
Long ol kes we i ejen, we bisop o stek presiden i no stap, hem i save givim raet long wan long ol kaonsela blong hem blong i holem ol intaviu ia.
Long ol distrik, misin presiden o wan kaonsela we hem i givimaot wok ia long hem i mekem intaviu mo i sendem nem blong ol misinari kandidet. Ol distrik presiden oli no holem olgeta intaviu ia.
24.4.3
Givim O Sendem Nem blong Man o Woman long Misinari Seves
Stek presiden i save sendem wan rekomendesen blong wan yang misinari kandidet stat long 150 dei bifo hem i fri blong go long misin. Stek presiden i save sendem wan rekomendesen blong wan senia misinari kandidet stat long naen manis bifo hem i fri blong go long misin. Deit ia we bae hem i fri blong stat long hem, i mas stap long taem we kandidet i mitim olgeta kondisen ia:
-
Kandidet i kasem yia blong kwalifae blong go long seves.
-
Kandidet i kasem konfemesen olsem wan memba blong Jos ova long wan yia i pas finis.
-
Kandidet i bin finisim, o i nomo go long hae skul, o sekendri skul, o wan level blong skul we i semmak. (Hemia i blong ol yang misinari kandidet we bae oli no kasem19 yia blong olgeta long deit we bae oli fri long hem.)
Ol yang misinari kandidet mo stek presiden blong olgeta oli mekem plan blong taem ia we bae stek presiden i sendem nem i go. Oli save yusum Submission Planning Tool mo Mission Release Date Planning Tool blong kasem help.
Ol nem blong sendem blong misinari seves, oli stap sendem olgeta tru long homwod mo homstek. Bisop blong wan wod we i stap longwe long homwod, olsem wan yang singgel adalt wod, i save sendem nem blong wan misinari i go. Oli mas toktok faswan wetem bisop blong homwod. Bae oli putum homwod nao olsem wod we bae i givim faenens blong misin ia.
24.4.4
Olgeta We Oli No Save Givim Seves olsem Ol Fultaem Misinari
Samtaem, wan memba we i wantem givim seves mo oli givim nem blong hem blong stap olsem wan misinari seves, bae oli no save singaotem hem olsem wan misinari blong stap tij o seves misinari. Maet hemia i from ol jalenj long saed blong helt, o i no mitim ol standet blong fasin blong stap klin inaf, ol problem long saed blong loa, o ol nara situesen. Bisop mo stek presiden, tufala i talemaot lav mo tangkyu blong tufala from tingting blong memba blong wantem givim seves. Ol lida oli save askem ol kwestin i go long Misinari Dipatmen long 801-240-2179-2179 o Missionary.Prefield@ChurchofJesusChrist.org.
Stek presiden mo bisop, tufala i leftemap tingting blong memba blong muv fored long kavenan rod ia olsem wan disaepol blong Jisas Kraes, blong wan laeftaem. Mo tu, tufala i leftemap tingting blong hem blong mekem sam nara impoten samting, olsem gohed long skul, o wok blong ol yang memba.
24.5
Afta we Wan I Kasem Misin Koling
Ol misinari we oli jes singaotem olgeta, oli leftemap tingting blong olgeta blong mas ridim, o ridim bakegen Buk blong Momon bifo oli statem misin blong olgeta. Oli folem kaonsel blong King Benjamin blong oli “ lukaot gud long [olgetawan], mo ol tingting blong [olgeta], mo ol toktok blong [olgeta], mo ol wok blong [olgeta]” (Mosaea 4:30).
Oli ansa kwik blong mekem folem ol instraksen we oli givim wetem koling. Oli stadi doktrin mo ol prinsipol insaed long ol skripja mo long Prijim Gospel blong Mi, oli tokbaot plante long japta 3. Oli luklukbak tu long wanem i stap insaed long buklet ia: Stretem Yuwan long Misinari Laef o Stretem Yuwan long Seves Misinari Laef: Risos Buklet. Olgeta ia, wetem ol memba blong famli blong olgeta, oli stadi tu long kaen ples we bambae oli givim seves long hem.
Ol memba blong famli mo ol lida, oli sapotem ol misinari long ol bigfala wok ia. Mo tu, oli talemaot bigwan se i impoten blong mekem gud, mo gohed blong stap klin inaf blong kasem Spirit.
24.5.1
Tempol Endaomen mo Seves Insaed long Tempol
Oli leftemap tingting blong ol misinari we oli jes singaotem olgeta blong kasem tempol endaomen blong olgeta kwik taem olsem we i posibol mo blong go long tempol plante taem olsem we situesen blong olgeta i save letem olgeta (luk long (luk long Doktrin mo Ol Kavenan 43:15–16; 105:33). Hemia i semmak blong ol misinari we oli stap tij mo ol seves misinari, sapos hemia i go stret wetem situesen blong olgeta. Blong kasem infomesen long saed blong rod blong kasem endaomen, luk long 27.2.
Ol niu misinari we oli jes singaotem olgeta, we oli endao, oli save stap olsem ol tempol odinens wokman bifo oli statem misinari seves blong olgeta, hemia sapos i stret (luk long 25.5).
24.5.2
Ol Sakramen miting
Bisoprik i stap invaetem ol misinari we oli jes singaotem blong oli toktok long sakramen miting bifo oli statem misin blong olgeta. Hemia i wan nomol sakramen miting. Stamba lukluk i mas stap long sakramen mo Sevya. Misinari ia, oli mas invaetem olgeta blong oli toktok abaot Jisas Kraes, gospel blong Hem we i kambak, glad ia blong stap serem gospel, mo blong givim seves long ol narawan.
Ol memba blong famli mo ol fren blong misinari, oli no stap invaetem olgeta blong givim toktok. Oli no mas mekem nomol taem blong sakramen miting i go longwan moa.
Ol memba mo ol lida oli mas stap longwe long ol samting we i karemaot tingting long tabu fasin blong misinari koling, o blong stap spendem mane we i no nid blong spendem. Eksampol. Oli no sapos blong:
-
Printim ol spesel sakramen miting program.
-
Mekem longfala laen blong sekhan afta long sakramen miting.
-
Holem ol open haos, be nomo blong gat wan famli kam tugeta. Sapos oli holem wan famli kam tugeta, bae hem i no mas blokem ol Sandei miting.
24.5.3
Setem Apat Ol Misinari
Hom stek presiden i setem apat blong wanwan misinari long wan dei we i moa kolosap long dei we bae hem i aot i go long misin, o dei we i statem misin blong hem. Long ol ejen kes, taem we stek presiden i no stap, hem i save givim raet long wan long ol kaonsela blong hem blong setem apat ol misinari. Mo tu, hem i save givimaot wok ia blong setem apat ol senia seves misinari, long wan kaonsela blong hem.
Misin presiden, o wan kaonsela blong hem, i setem apat ol misinari we oli singaotem olgeta, be oli kam long ol distrik insaed long misin blong hem. Distrik presiden i no setem apat ol misinari.
Wan brata we bae i givim seves longwe long hom blong hem, i mas kasem Melkesedek Prishud bifo oli setem hem apat olsem wan misinari. Wan brata we bae i stap olsem wan seves misinari, i mas holem Melkesedek Prishud, sapos i stret wetem situesen blong hem. Blong kasem ol instraksen long saed blong odinesen long wan ofis long Melkesedek Prishud, luk long 18.10.
I no longtaem bifo oli setem apat wan misinari, bae stek presiden o wan kaonsela we hem i givimaot wok ia long hem, i holem wan intaviu wetem hem. Sapos misinari ia i nomo mitim ol standet blong stap klin inaf, o sapos i gat ol jenis long helt problem we i save spolem seves blong misinari, bambae oli no setem hem apat. Stek presiden i kontaktem Misinari Dipatmen (luk long 24.9.3) o eria ofis blong kasem sam tingting.
Taem ia blong set apat, i mas stap olsem wan spesel taem. Ol memba blong famli mo ol fren we oli kolkolosap long misinari ia, oli save stap long tetaem ia. Stek presiden i helpem olgeta blong andastanem mo filim se koling ia i tabu tumas mo i impoten; hem i blong stap ripresentem Jisas Kraes mo Jos ia blong Hem we Hem i bin putumbak.
Taem ia blong setem apat mo blesing we i kam wetem, oli no mas rekodem. Be, oli leftemap tingting blong misinari blong hem i raetemdaon long jenol blong hem abaot eksperiens ia blong hem, mo blong hem i raetemdaon samfala pat blong blesing, we i gat mining long hem.
Stek presiden i eksplenem se man o woman ia, i mas folem ol misinari standet afta we oli setem hem apat.
Taem oli setem apat misinari ia, oli setem hem apat blong koling ia blong givim seves, i no blong wan spesifik misinari asaenmen. Sapos oli jenisim misinari asaenmen ia, bae oli no setem hem apat bakegen. Sapos oli rilisim wan misinari, mo afta, oli apruvum blong hem i gobak long seves (luk long 24.6.3.2), bae oli setem hem apat bakegen olsem wan misinari.
24.6
Seves Longwe long Hom
24.6.1
Taem blong Aot I Go long Misin Fil
Jos i pem transpot blong ol yang tijing misinari blong travel i go long misinari trening senta (MTS), mo aot long misinari trening senta i go long misin asaenmen. Jos i pem tu rod blong ol senia misinari we oli givim seves longwe long hom blong moa long wan yia.
Ol stret memba blong famli oli save tekem wan misinari i go long wan MTS. Be oli no nid blong mekem. MTS i no gat wan miting blong ol famli oli talem tata long ol misinari blong olgeta.
From sekiuriti long eapot mo from ol nara risen, oli no leftemap tingting blong ol famli mo ol narawan blong stap mitim ol misinari long eapot taem ol misinari oli aot long MTS blong go long misin asaenmen blong olgeta.
24.6.2
Insaed long Fil
24.6.2.1
Ples blong Sendem Ol Misinari long Hem
Ol stek mo misin presiden oli toktok tugeta abaot nid blong ol misinari long ol spesifik wod mo branj. I no nid blong gat ol misinari i stap long evri yunit. Sam yunit oli save gat moa bitim wan kompanionsip. Misin presiden nao i talemaot weaples ol misinari oli go long hem.
24.6.2.2
Ol Memba mo Komuniti Seves
Ol stek mo misin presiden oli toktok tugeta abaot wei we ol misinari oli save givim seves long ol memba mo long komuniti. Oli save yusum JustServe.org long ol ples we i gat hemia i stap.
24.6.2.3
Haos, Kaekae, mo Transpot
Stek presiden mo misin presiden oli faenemaot sapos mo hamas nao ol memba blong Jos oli save mekem blong givim haos mo kaekae long ol misinari. Blong givim haos o kaekae, i no stap olsem wan hevi trabol long ol lokol memba.
I no nid blong ol memba oli givim transpot blong ol misinari, long olgeta we oli stap tijim, mo olgeta we oli jes baptaes.
Eria Presidensi i save givim sam advaes long saed blong fasin blong givim haos, kaekae, mo transpot long ol misinari long eria.
24.6.2.4
Ol Misinari long Ol Branj Posisen
Long sam situesen nomo we i no stap hapen oltaem, oli save givim wok long ol misinari we oli seves longwe long hom blong holem ol posisen insaed long ol branj. Sapos wan branj i stap insaed long wan stek, misinari ia, bae oli setem hem apat anda long daereksen blong stek presidensi, wetem apruvol blong misin presiden.
Sapos wan branj i stap insaed long wan distrik, oli no mas setem apat misinari. Atoriti ia blong givim seves long wan yunit we i stap anda long wan misin, i stap finis taem oli setem wan misinari apat. Sapos ol elda oli mekem wan wok we i nidim ol prishud ki, oli mekem olsem taem we misin presiden i givim atoriti ia long olgeta.
24.6.2.5
Ol Rikwes blong Sapotem Ol Narawan long saed blong Mane, o Wetem Skul, o Rod blong Muv I Go long Nara Kantri
Ol misinari mo famli blong olgeta oli no sapos blong givim faenens sapot long olgeta we oli stap long ples we ol misinari oli givim seves long hem, mo hemia i tekem tu mane sapot long saed blong skul. Mo tu, ol misinari mo famli blong olgeta oli no sapos blong sponsarem olgeta we oli wantem muv i go long ol nara kantri (luk long 38.8.19).
24.6.2.6
Meresin
Ol misinari oli responsibol blong eni meresin we oli nidim. Ol memba blong famli, o ol narawan oli no mas sendem, o tekem eni meresin i go long ol misinari. Sapos i no gat meresin long misin, misinari i toktok wetem misin presiden.
24.6.2.7
Ded blong Wan Stret Memba blong Famli
Sapos wan memba blong stret famli blong misinari i ded, misinari i save jusum blong gobak hom blong sot taem, blong stap long fenerol. Be, plante taem, bae oli givim advaes long misinari blong hem i stap nomo long fil. Taem we i posibol, hem i save luk fenerol seves tru long intanet.
Sapos wan misinari i jusum blong gobak hom blong fenerol ia, misin presiden i kontaktem Misinari Dipatmen.
24.6.2.8
Ol Membasip Rekod mo Taeting
Homwod blong misinari i holemtaet membasip rekod. Homwod i holemtaet tu ol faenens rekod blong misinari. Ol Misinari oli no pem taeting folem ol sapot mane we oli kasem long misin. Be, oli pem taeting sapos oli gat eni nara mane i kam insaed.
24.6.3
Stap Gobak Hom Taem Wan I Finisim Misin
24.6.3.1
Stap Gobak Hom Olsem we I Stap long Fas Taemtebol
Ol misinari mo ol memba blong famli blong olgeta oli no mas askem ol eli rilis, o blong oli seftem misin blong mekem se i stret wetem taemtebol blong olgeta.
Ol yang misinari oli mas travel i gobak stret long hom taem oli aot long misin blong olgeta. Eni nara travel, bae oli save apruvum nomo sapos misinari ia, bae papa, mama o wan we i gat raet blong lukaot long hem folem loa, bae i travel wetem hem.
Oli no rilisim ol misinari kasem taem oli ripot i gobak long stek presidensi blong olgeta. Oli folem ol misinari standet kasem taem ia i hapen.
24.6.3.2
Stap Gobak Hom Eli
Sam misinari blong stap tij mo seves misinari, bae oli rilisim olgeta from helt blong olgeta, from oli no klin inaf, o sam nara risen. Ol bisop mo ol stek presiden oli givim spesel sapot long ol riten misinari ia. Ol lida oli helpem olgeta blong wok blong karembak gud helt, o blong gobak long seves kwiktaem.
Long saed blong ol misinari we oli rere blong gobak long seves, stek presiden i kontaktem Misinari Dipatmen blong rekomendem hemia (luk long 24.9.3). Sam tijing misinari we oli kambak long seves, bae oli save sendem olgeta i go long wan nara tijing misin, o wan nara seves misin.
Taem we i no posibol blong gobak long seves, ol lida oli leftemap tingting blong memba blong hem i gohed long kavenan rod ia olsem wan disaepol blong Jisas Kraes we bae i givim seves ful laef. Mo tu, ol lida oli leftemap tingting blong olgeta blong oli gohed blong mekem ol impoten wok, olsem gobak skul, o faenem wok; hemia speseli long ol yang misinari.
24.7
Ol Seves Misin
24.7.1
Faenem Ol Seves Janis blong Ol Seves Misinari
Blong ol senia seves misinari, bisop, stek presiden mo ol misinari oli toktok tugeta blong faenemaot ol lokol janis blong givim seves.
Blong ol yang seves misinari, ol seves misin lida oli faenemaot ol janis blong givim seves. Plante taem, ol papa, mama o hem we i lukaotem misinari, oli tekpat long storian.
Seves ia, oli save mekem fes tu fes, o onlaen taem oli yusum teknoloji. Ol lida oli save yusum olgeta risos ia blong faenem sam infomesen abaot ol janis blong givim seves:
-
Intanet: ChurchofJesusChrist.org/service-missionary o SeniorMissionary.ChurchofJesusChrist.org.
-
Telefon: 1-801-240-4914
24.7.2
Haos mo Transpot
Ol seves misinari oli stap long homtaon blong olgeta, o wetem wan nara memba blong famli we Misinari Dipatmen i apruvum. Oli givim o arenjem transpot blong olgeta i go long ples blong seves blong olgeta sapos i nid.
Ol yang seves misinari oli no mas silip delaet o stap laef long ol haos blong ol tijing misinari.
24.7.3
Trening mo Wok blong Supavaesem Ol Jos Seves Misinari
Ol seves misinari, oli trenem mo supavaesem olgeta long ples ia we oli stap givim seves long hem. Ol seves misin lida (blong ol yang seves misinari) o maneja blong seves asaenmen blong olgeta (blong ol senia seves misinari), oli wajem olgeta, kasem help mo trening evri dei abaot diuti blong olgeta.
Stek presiden hem i eklesiastik lida blong ol senia mo yang seves misinari. Hem mo bisop tufala i stap gat ol intaviu blong stap klin inaf oltaem wetem ol yang seves misinari. Oli save gat ol intaviu tu blong tempol rekomen, muv i go long wan moa hae ofis long prishud, mo ol petriakel blesing taem i nidim.
Misin presiden mo waef blong hem oli putum wanem ol misinari oli sapos blong folem long saed blong spirit mo fasin, insaed long misin. Tufala i kaonsel oltaem wetem ol seves misin lida we oli stap lukluk long ol taemtebol, asaenmen mo helt blong ol misinari. Tugeta, tufala i helpem misinari blong andastanem mo folem ol standet blong seves misinari.
Misin presiden i givim ol samting long fasin blong stap klin inaf blong wanwan misinari long stek presiden.
Ol yang seves misinari oli no go long wan MTS. Oli kasem trening onlaen, folem wetem ol trening long ples we bae oli givim seves long hem.
Blong gat moa infomesen abaot trening mo stap supavaesem, luk long Ol Misinari Standet blong Ol Disaepol blong Jisas Kraes—Ol Seves Misin.
24.7.4
Ol Seves Misinari long Ol Koling blong Wod o long Stek
Bisop o stek presiden i save givim ol wod o stek koling long ol seves misinari sapos ol koling ia oli no blokem olgeta blong mekem ol misin asaenmen blong olgeta, o i no fasfas wetem taemtebol blong olgeta. Long saed blong ol yang seves misinari, ol lida ia oli kodinetem wok wetem ol seves lida.
24.7.5
Endem Wan Seves Misin
Ol yang seves misinari, plante taem oli stap singaotem olgeta blong givim seves blong 18 o 24 manis. Plante taem, wanwan misinari bae i finisim taem blong seves blong hem long taem we oli soem long asaenmen blong hem.
Be long sam situesen, afta long taem we wan misinari i kasem kol, papa mo mama blong misinari, mo ol seves misin lida oli save kaonsel tugeta blong luk wan nara deit we i stret blong misinari i rilis long hem. Ol seves misin lida oli givim eni jenis we oli wantem mekem long deit ia, i go long misin presiden. Sapos hem i apruvum jenis ia, ol seves misin lida oli letem stek presiden blong misinari ia, i save abaot niufala rilis deit ia.
Samtaem wan seves misinari i nidim blong finisim misin blong hem eli from helt, fasin blong stap klin inaf, o ol narafala risen. Long ol situesen olsem, stek presiden i letem misin presiden i save, ol seves misin lida, mo ol eria seves misin speselis. Afta stek presiden bae i kontaktem ripresentativ we oli asaenem we i stap long misin fil long Misinari Dipatmen, blong oli luklukbak long wanwan eli rilis mo bae wan Jeneral Atoriti we oli asaenem, bae i apruvum.
Ol seves misin blong ol yangfala misinari, i no stap ova long 24 manis blong ol man. Ol misin ia oli no ova long 18 manis blong ol woman.
Ol senia seves misinari oli save seftem seves deit blong olgeta olsem we stek presiden, operesen maneja mo misinari i agri long hem.
24.8
Afta long Misinari Seves
24.8.1
Ol Tempol Rekomen
24.8.1.1
Ol Yang Misinari we Oli Givim Seves Longwe long Hom
Blong ol instraksen long saed blong ol tempol rekomen blong ol yang misinari we oli kambak hom, luk long 26.5.3.
24.8.1.2
Ol Senia Misinari we Oli Givim Seves Longwe long Hom
Misin presiden i save holem wan intaviu blong wan tempol rekomen taem we i nid. Sapos misinari i klin inaf, misin presiden i givim wan niu rekomen we bae i ded long tu (2) yia taem.
24.8.1.3
Ol Seves Misinari
Ol yang mo senia seves misinari oli mas lukluk ol lokol lida blong olgeta blong gat ol intaviu blong riniu ol tempol rekomen (luk long 26.3.1).
24.8.2
Ol Misinari Rilis Intaviu
Stek presiden i rilisim ol tijing mo seves misinari mo i mekem wan rilis intaviu. Wan long ol kaonsela blong hem i save rilisim ol senia seves misinari. Long ol distrik, plante taem, misin presiden o wan kaonsela we hem i givimaot wok ia long hem i mekem rilis blong ol misinari. Blong ol eksepsen, luk long 6.3.
Ol gaedlaen blong mekem intaviu ia bae oli save help.
-
Talem ol gud toktok long olgeta from oli jusum blong givim seves long wan misin.
-
Invaetem olgeta blong serem ol misin eksperiens blong olgeta.
-
Leftemap tingting blong olgeta blong gohed blong stap olsem wan disaepol blong Jisas Kraes blong ful laef blong olgeta.
-
Givim kaonsel long olgeta blong oli bildimap ol gudfala habit, o ol gudfala evri dei fasin olsem wan misinari.
-
Leftemap tingting blong olgeta blong folem Spirit evri dei mo blong stap laef wetem ona.
-
Leftemap tingting blong olgeta blong lukluk mo rere from fiuja, mo hemia, long ol yang misinari i save minim blong go long skul mo faenem wok. Helpem olgeta blong setem ol gol mo mekem ol plan, sapos i nid. Luklukbak long progres blong Plan blong Mi wetem ol yang misinari.
-
No stap mekem ol spesifik blesing blong i stap olsem wan praes blong mekem misinari seves.
-
Leftemap tingting blong olgeta blong stap klin inaf blong holem wan tempol rekomen.
24.8.3
Ol Misinari Ripot mo Givim Toktok long Sakramen Miting
Stek mo distrik presiden i save invaetem ol tijing mo seves misinari we oli jes rilis blong givim ripot abaot ol seves blong olgeta long wan hae kaonsel o distrik kaonsel miting. Ol bisop oli save invaetem ol misinari we oli jes rilis blong oli givim ripot long wan wod kaonsel miting.
Long ples we i stret long saed blong distens mo ol nara situesen, ol misinari we oli jes rilis oli save givim ripot blong olgeta tru long teknoloji, o long wod kaonsel miting nomo.
Bisoprik i putum wan taem blong ol tijing mo seves misinari we oli jes rilis blong oli toktok long wan sakramen miting. Miting ia, hem i i wan nomol sakramen miting. Bisoprik i meksua se olgeta prinsipol long 24.5.2 oli folem gud.
Ol misinari we oli jes rilisim olgeta, oli save givim toktok long ol sakramen miting long ol nara wod, olsem we wan memba blong stek o distrik presidensi i invaetem olgeta blong mekem. Mo tu, wan memba blong hae kaonsel o distrik kaonsel i save invaetem hem
24.8.4
Ol Koling
Ol lida oli givim, kwiktaem, ol asaenmen blong givhan wok mo ol koling i go long ol tijing mo seves misinari we oli jes rilis. Hemia i minim tu se bae oli save lukluk olgeta blong oli stap olsem ol tempol wokman, sapos i stret (luk long 25.5).
24.9
Ol Risos blong Sendem Nem blong Misinari mo Wok blong Givim Seves
24.9.1
Ol Lesenbuk mo Ol Fom
-
Prijim Gospel blong Mi: Wan Gaed blong Stap Serem Gospel blong Jisas Kraes
-
Ol Misinari Standet blong Ol Disaepol blong Jisas Kraes—Ol Seves Misin
-
Ol Jenis long Misinari Laef
-
Ol Jenis long Seves Misinari Laef: Risos Buklet
-
My Plan: A Guide for the Returned Missionary and Mentor.” (Plan blong Mi: Wan Gaed blong Riten Misinari mo Hem we I Lidim Tingting blong Hem
24.9.2
Ol Websaet
-
MissionaryRecommendations.ChurchofJesusChrist.org (i gat blong ol lokol lida mo ol misinari kandidet nomo)
24.9.3
Kontak Infomesen
Misinari Dipatmen:
-
Telefon: 1-801-240-2222 o 1-800-453-3860, ekstensen 2-2222
Seves Misin Ofis:
-
Fon: 1-801-240-4914 o 1-800-453-3860, ekstensen 2-4914