“Japta 3: Stadi mo Tijim Gospel blong Jisas Kraes,” Prijim Gospel blong Mi: Wan Gaed Buk blong Stap Serem Gospel blong Jisas Kraes (2023)
“Stadi mo Tijim Gospel blong Jisas Kraes,” Prijim Gospel blong Mi
Japta 3
Stadi mo Tijim Gospel blong Jisas Kraes
Ol lesen long japta ia oli gat insaed ol impoten doktrin, ol prinsipol, mo ol komanmen blong gospel blong Jisas Kraes. Ol lesen ia oli wanem we ol profet mo ol aposol we oli stap laef oli bin givim instraksen long yu blong lanem mo tijim. Oli putum long ples ia mekem se yu save helpem ol narawan blong oli andastanem doktrin blong Kraes i klia moa.
Fas seksen blong japta ia hem invitesen blong baptaes. Ful japta i gat insaed ol lesen ia:
Stadi long ol skripja mo holemtaet doktrin long wanwan lesen. Taem yu mekem olsem, Spirit bae i talemaot witnes blong ol trutok we yu stadi long hem. Hem bae i helpem yu blong save wanem blong talem mo mekem blong helpem ol narawan blong kasem wan witnes abaot trutok. (Luk long Doktrin mo Ol Kavenan 84:85.)
Ol pipol bae oli kam blong save Sevya moa fulwan taem oli mekem wanem Hem i invaetem olgeta blong mekem. Givimaot ol invitesen long wanwan lesen, mo helpem Ol pipol blong mekem ol komitmen blong olgeta. Taem ol pipol oli kipim ol komitmen blong olgeta, oli stat blong laef folem gospel blong Jisas Kraes mo rere blong mekem ol kavenan wetem God.
Tijim evri lesen bifo mo afta long taem we oli baptaes. Ol fultaem misinari oli lidim ol tijing long taem blong ol lesen long tugeta taem ia. Ol wod misinari o ol narafala memba oli tekpat taem we i posibol. Luk long ol japta 10 mo 13 blong kasem infomesen abaot taem we yu save yusum ol memba long taem blong tij.
Rere blong Tij
Taem yu rere blong tij, luklukbak long ol infomesen blong wanwan man long ap blong Prijim Gospel blong Mi. Mekem wan lesen plan folem nid blong man o woman ia. Tingting long wanem we hem bae i mas save mo filim long taem blong tijing visit blong yutufala. Spirit bae i blesem ol hadwok blong yu taem yu tekem taem blong rere mo plan.
Hemia samfala kwestin blong yu mo kompanion blong yu blong prea mo tingting taem yutufala i stap rere blong tij.
-
?Wanem invitesen nao bae yumi givimaot blong helpem wan blong bildimap fet long Kraes mo mekem progres? Ol invitesen oli wanem we yu yusum blong helpem ol pipol blong sakem sin mo kasem eksperiens long saed blong “paoa blong Ridima” (Hileman 5:11). Tingting long hamas hem i progres, situesen mo ol nid blong hem. Afta, putum wan o moa invitesen long lesen plan blong yu.
-
?Wanem ol doktrin mo ol prinsipol we bae i helpem hem blong kipim ol komitmen blong hem we yumi bin invaetem hem blong mekem? Wetem prea, faenem doktrin mo ol prinsipol we bae oli helpem ol pipol blong andastanem from wanem hem i impoten blong oli stap kipim komitmen blong olgeta mo long Lod.
-
?Olsem wanem bae yumi helpem hem blong lanem doktrin? Blong rere blong tijim doktrin, oganaesem mo talem sot stori abaot wanem we bae yu tijim taem yu stap yusum ol lesen 1–4. Faenem ol kwestin, ol skripja, ol eksampol mo ol stret media we bae oli helpem hem blong andastanem wanem we yu tijim. Luk long japta 10 blong kasem ol infomesen abaot olsem wanem blong mekem fasin blong tij blong yu i kam antap.
-
?Wanem ol blesing we God i bin promesem taem yumi akseptem mo stap kipim ol komitmen? Taem yu stadi long doktrin, faenemaot ol promes blesing blong God. Taem yu tij, promesem ol blesing mo serem testemoni blong yu abaot olgeta.
-
?Huia nao ol memba we oli save tekpat? Long kodinesen miting blong evri wik, faenem huia ol memba we oli save helpem yu blong tij mo sapotem hem. Bifo long lesen, toktok raon long taem we bae oli tekpat. Luk long japta 10.
-
?Wanem nao yumi save mekem blong helpem ol pipol oli kipim ol komitmen blong olgeta afta we yumi aot? Biaen long olgeta taem yu mekem wan sot evri dei kondak blong helpem ol pipol oli kipim ol komitmen blong olgeta. Lukaotem ol wei blong tekem tu ol memba blong stap helpem olgeta we yu tijim blong kipim ol komitmen blong olgeta. Kondak ia i minim blong ridim wan japta blong Buk blong Momon o ol narafala skripja. Sapos wan i no stap kipim wan fas komitmen blong hem, bae i moa gud blong helpem hem wetem hemia fastaem bifo yu givimaot wan narafala komitmen. Luk long japta 11.
-
?Olsem wanem yumi save helpem olgeta moa gud long nekis taem? Afta long evri situesen blong fasin blong stap tij, skelem ol eksperiens blong ol pipol we yu stap tijim. ?Fet blong olgeta long Kraes i stap gro? ?Oli stap filim Spirit? ?Oli stap sakem sin mo mekem mo kipim ol komitmen blong olgeta? ?Oli stap prea, stap stadi long Buk blong Momon, mo kam long jos? Mekem ol plan blong helpem olgeta.
Tij folem Hat blong Yu olsem we Spirit i Lidim Yu
Blong toktok long evri elda mo ol sista, Fas Presidensi mo Kworom blong Olgeta Twelef Aposol oli bin talem:
“Stamba tingting blong yumi i blong tijim mesej blong gospel we i bin kambak long wan wei we i letem Spirit i lidim tugeta, ol misinari mo olgeta we oli tijim olgeta. Hem i impoten blong lanem ol tingting blong ol [lesen], be oli no mas tijim folem wan kaen presentesen nomo. Misinari i mas filim se hem i mas fri blong yusum ol toktok blong hemwan olsem we Spirit i stap talem long hem. Hem i no mas givim wan toktok we hem i bin lanem baehat, be hem i mas toktok wetem wanem we i stap kamaot long hat blong hem, wetem ol toktok blong hemwan. Hem i save kamaot long oda blong ol lesen, mo givim wanem we hem i kasem insperesen blong givimaot, folem ol intres mo ol nid blong [man o woman] we oli stap tijim. Hem i mas toktok folem wanem we hem i save se hem i tru mo wetem ol toktok blong hemwan, hem i mas serem testemoni blong hem se ol tijing we hem i givimaot oli tru.”
Tij mo Invaetem folem Ol Nid blong Wanwan Man O Woman
Yu save tijim ol lesen ia long wei we i save helpem ol pipol moa blong oli rere from baptaes mo konfemesen. Wijwan lesen yu tijim, wanem taem yu tijim, mo hamas taem yu givim, bae yu save faenemaot folem ol nid blong man o woman we yu tijim mo folem wanem Spirit i talemaot long yu. Eksampol. Taem yu stap tijim ol pipol we oli no gat wan Kristin bakgraon, yu save stat blong helpem olgeta blong developem wan bigfala koneksen wetem Papa long Heven mo wan andastaning abaot plan blong Hem (luk long “Stap Tijim Ol Pipol we Oli No Gat wan Kristin Bakgraon” long japta 10).
Letem Spirit i lidim yu long wanem invitesen blong givimaot mo wetaem blong givimaot olgeta. Stret invitesen long stret taem i save givim insperesen long ol pipol blong mekem ol samting we bae i bildimap fet blong olgeta. Ol aksen ia i save lid i go long bigfala jenis long hat (luk long Mosaea 5:2; Alma 5:12–14).
Tijim ol lesen we oli simpol, klia mo sot. Oltaem, wan tijing visit i no mas longfala bitim 30 minit, mo yu save tijim wan man o woman blong sot taem nomo olsem 5 minit.
Oltaem bae yu nidim plante defren taem blong mit blong tijim ol prinsipol long wan lesen. Oltaem ol pipol oli andastanem moa gud mesej blong yu sapos yu tijim ol sot lesen, tij plante taem, mo tijim smosmol pat blong lesen.
Stadi long Ol Skripja
Wanem nao oli talem long yu blong yu tijim?
?From wanem hem i impoten blong stadi ol doktrin insaed long ol lesen?