“Fas Toktok blong Prijim Gospel blong Mi,” Prijim Gospel blong Mi: Wan Gaed blong Serem Gospel blong Jisas Kraes (2023)
“Fas Toktok,” Prijim Gospel blong Mi
Fas Toktok blong Prijim Gospel blong Mi
Lod i talem long ol wokman blong Hem “blong prijim gospel blong mi folem Spirit, we i Spirit blong Givhan we mi bin sendem i kam blong tijim trutok” (Doktrin mo Ol Kavenan 50:14).
Prijim Gospel blong Mi oli mekem blong helpem yu fulfilim stamba tingting blong yu olsem wan misinari. Buk ia i tokbaot ol impoten wok blong misinari wok. I no ansarem evri kwestin o givim daereksen long evri situesen we bae yu fesem. Be, i wan impoten risos blong yu blong gro long paoa long saed blong spirit mo fasin blong save mekem wok. Stadi mo laef folem doktrin mo ol prinsipol blong gospel we i stap long ol skripja mo long buk ia.
Prijim Gospel blong Mi i blong helpem yu long ol wei we i stap ia:
-
Andastanem stret wok blong yu olsem wan misinari.
-
Lanem mo tijim doktrin
-
Gro mo developem laef blong yu long saed blong spirit mo jenisim laef blong yuwan
-
Kam moa gud long wok blong yu blong invaetem mo helpem ol pipol blong kasem gospel we i kambak
Stadi long ol japta ia bakegen mo bakegen truaot long misin blong yu. Evaluetem wok blong yu. Setemap ol gol mo mekem ol plan blong mekem ol wok ia i hapen. Ol misinari we oli rere gud long olgetawan evri dei mo stap mekem i gud evri dei bae oli blesem laef blong olgeta we oli tijim mo givim seves long olgeta. Bae oli kasem blesing tu long laef blong olgetawan.
Ol Janis blong Stadi mo Stap Lanem Samting
Taem yu stadi gud long taem blong misin blong yu bae i helpem testemoni blong yu long gospel i kam moa strong mo bae yu kam wan moa fetful disaepol blong Jisas Kraes.
Stap stadi long ol skripja mo Prijim Gospel blong Mi bae i helpem yu blong tij wetem paoa blong spirit. Bae i helpem yu tu blong mekem tijing blong yu i go stret long ol nid blong olgeta we yu stap tijim olgeta.
Impoten stadi mo ol janis blong lanem samting i tekem tu:
-
Stadi blong yuwan.
-
Kompanion Stadi.
-
Jenisim ol kompanion.
-
Ol distrik kaonsel miting.
-
Ol son konfrens.
-
Misin lidasip kaonsel (blong ol yang misinari lida).
Kolosap evri dei, misinari taem tebol blong yu i gat insaed taem blong stadi blong yuwan mo wetem kompanion blong yu. Luk long Ol Misinari Standet blong Ol Disaepol blong Jisas Kraes, 2.4, blong infomesen abaot taem tebol blong yu evri dei.
Wanem yu lanem long stadi blong yuwan bae i helpem yu long stadi wetem kompanion mo long ol nara janis blong lanem samting olsem we i stap antap ia. Long ol seting olsem, yufala “i tijim long wanwan long yufala bakegen, doktrin blong kingdom” (Doktrin mo Ol Kavenan 88:77).
Ol Aedia blong Mekem Stadi blong Yu blong Prijim Gospel blong Mi I Kam Gud Moa
Prijim Gospel blong Mi i joenem ol skripja mo ol prinsipol blong gospel tugeta blong helpem yu kam blong save Sevya mo gospel blong Hem. Stamba tingting blong buk ia i blong draonem yu i go insaed long ol skripja mo mekem stadi blong yu i kam moa rij long ol skripja ia. Stadi ol refrens blong skripja long wanwan japta truaot long misin blong yu.
Wanwan japta long Prijim Gospel blong Mi i karem ol aedia mo ol aktiviti blong helpem yu stadi mo aplae wanem yu stap lanem. Yusum hemia long stadi blong yuwan mo long kompanion stadi (luk long Misinari Standet, 2.4). Yu save yusum olgeta tu long distrik kaonsel miting mo ol son konfrens. Stadi blong yu bae i kam moa gud taem yu faenem ol wei blong putum wanem yu stap lanem long praktis.
Taem yu gat wan plan blong stadi blong yuwan bae i save helpem yu bigwan. Yu save krietem plan blong yuwan we i givim taem blong yu save stadi long ol gospel prinsipol we yu wantem blong andastanem gud moa. Yu save mekem stadi blong yu tu folem wanem japta yu jusum blong stadi long hem insaed long Prijim Gospel blong Mi. Olsem eksampol, yu save yusum lesen long japta 3 blong gaedem stadi blong yu long doktrin mo ol prinsipol we bae yu tijim. Yu nid blong save gud ol lesen ia blong yu save tij wetem Spirit mo yusum ol toktok blong yuwan.
Tekem ol not (raetem daon ol filing mo tingting blong yu) taem yu stap stadi. Yusum wan pepa o lektronik jenol (olsem Gospel Laebri) blong helpem yu andastanem, mekem i kam moa klia, mo tingbaot wanem yu stap lanem.
Statem stadi blong yu wetem prea blong Tabu Spirit i helpem yu lanem samting. Bae Hem i givim save, andastaning, mo testemoni we bae i blesem laef blong yu mo mekem yu save blesem laef blong nara man. Openem maen mo hat blong yu long ol filing mo tingting we i kam long Hem. Raetem daon ol samting we yu kasem insaed long ol not blong yu.
Luklukbak long stadi jenol blong yu evri taem blong tingbaot ol eksperiens long saed blong spirit, faenemaot ol niufala wei, mo luksave gro blong yu.
Yusum Prijim Gospel blong Mi
Yusum Prijim Gospel blong Mi ap blong helpem yu yusum ol prinsipol we yu stap lanem. Ap ia i gat long mobael fon blong yu. I gat ol tul blong helpem yu blong mekem gud wok blong yu olsem misinari i kam tru. Ol tul ia i gat:
-
Infomesen abaot ol nid mo progres blong ol pipol we yu stap tijim olgeta.
-
Wan ples blong rekodem progres blong yu i go from mein gol blong yu.
-
Wan kalenda blong rekodem ol plan blong yu mo taem tebol blong ol aktiviti.
-
Wan map blong eria blong yu mo ol nara impoten infomesen blong helpem yu mekem ol gol blong yu i kam tru.
Prijim Gospel blong Mi i gat plante aedia blong yusum ap blong helpem yu faenem, tijim, mo baptaesem ol pipol.
Ol jos memba oli yusum Prijim Gospel blong Mi
Prijim Gospel blong Mi i wan impoten risos we i no blong ol misinari nomo, be i blong evri memba blong Jos. Eksampol, stadi long hem i save helpem ol memba blong:
-
Lanem mo tijim gospel blong Jisas Kraes (stadi japta 1, 2, 3, mo 10).
-
Andastanem moa abaot stap lukaotem blong gat Tabu Spirit mo stap lisin long hem (stadi japta 4).
-
Andastanem paoa blong Buk blong Momon (stadi japta 5).
-
Lukaotem ol fasin Olsem Hemia blong Kraes (stadi japta 6).
-
Karemaot wok blong kavenan blong olgeta tru long fasin blong serem gospel taem oli laef folem ol prinsipol blong lav, serem, mo invaetem (stadi japta 9 mo 13).
-
Bildim yuniti wetem ol ful taem misinari (stadi japta 13).
Stadi long Prijim Gospel blong Mi—speseli japta 3—bae i help bigwan long ol yut mo olgeta we yia blong olgeta i stret blong stap rere from misinari seves.