“Japta 11: Helpem Ol Pipol blong Mekem mo Kipim Ol Komitmen,” Prijim Gospel blong Mi: Wan Gaed Buk blong Serem Gospel blong Jisas Kraes (2023)

“Japta 11,” Prijim Gospel blong Mi

Pikja

Bae Mi No Wantem, i kam long Yongsung Kim

Japta 11

Helpem Ol Pipol blong Mekem mo Kipim Ol Komitmen

Tingting long Hemia

?Olsem wanem kipim ol komitmen i lid i go long fasin blong jenisim laef?
?Olsem wanem kipim ol komitmen i lid i go long fasin blong kipim ol kavenan?
?Olsem wanem mi save givim ol invitesen blong helpem ol pipol i gro long saed blong spirit mo mekem fet blong olgeta long Jisas Kraes i kam moa strong?
?From wanem hem i impoten blong serem wan tru testemoni?
?Wanem ol blesing we mi save mekem promes from?
?Olsem wanem mi save helpem pipol i kipim komitmen?

Sakem Sin, Komitmen, mo Fasin blong Jenisim Laef

Olsem wan misinari mo disaepol blong Jisas Kraes, tingting blong yu i blong sevem ol sol blong man (luk long Mosaea 28:3). Sevya “i gat bigfala paoa blong sevem” olgeta we oli kipim ol kavenan we oli mekem taem oli kasem ol impoten prishud odinens, statem wetem baptaes (luk 2 Nifae 31:19). Givim ol invitesen mo helpem ol pipol blong kipim ol komitmen bae i mekem olgeta i rere from baptaes.

Ol pipol oli stap sef tru nomo long fasin blong sakem sin (luk long Hileman 5:11). Fasin blong sakem sin i minim blong tanem yu fulwan mo tanem yu wetem tru tingting i go long Jisas Kraes. Komitmen i wan impoten pat blong fasin blong sakem sin. Taem yu invaetem ol pipol blong mekem komitmen olsem pat blong tijing blong yu, yu stap invaetem olgeta blong sakem sin.

Komitmen i minim blong jusum wan rod blong wok mo go tru long rod ia folem joes we i stap. Wok folem ol trutok blong gospel oltaem i lid i go long fasin blong jenisim laef.

Fasin blong jenisim laef i wan jenis blong bilif, hat, mo laef blong wan man o woman blong akseptem mo folem God. Hem i wan desisen blong maen mo hat blong kam wan disaepol blong Kraes. Fasin blong jenisim laef i kam taem pipol oli putum fet blong olgeta long Kraes, sakem sin blong olgeta, kasem baptaes, kasem presen ia we i Tabu Spirit, mo stap strong kasem en. Lod mo ol profet blong Hem oli tokbaot jenis ia olsem bon bageken long saed blong spirit (luk long Jon 3:3–5; Mosaea 27:25–26).

Atonmen blong Sevya i mekem fasin blong jenisim laef i posibol, mo Tabu Spirit nao i mekem bigfala jenis blong hat ia i hapen (luk long Mosaea 5:2; Alma 5:12–14).

Fasin blong jenisim laef i wan proses, hem i no wan iven. Blong stap helpem ol pipol blong jenisim laef i kam long Kraes i stamba tingting blong wok blong yu olsem misinari. Taem Spirit i lidim yu, yu save invaetem ol pipol blong oli mekem ol komitmen we bae i helpem olgeta oli gro long saed blong spirit mo filim paoa blong Tabu Spirit long laef blong olgeta. Afta yu sapotem ol pipol blong kipim ol komitmen we oli bin mekem. Yu helpem olgeta oli wok wetem fet from wan jenis we bae i stap blong oltaem (luk long Mosaea 6:3).

Ol pipol we oli kipim komitmen bifo long baptaes i stap soem we bae oli save mekem mo kipim ol tabu kavenen afta long baptaes. Taem yu tijim ol pipol blong kipim ol komitmen, yu stap tijim olgeta blong kipim ol kavenan. Blong mekem mo kipim ol kavenan i wan impoten pat blong gospel blong Jisas Kraes mo plan blong God blong ol pikinini blong Hem.

Japta ia i gat ol gaedlaen blong givim ol invitesen, ol promes blesing, serem testemoni blong yu, mo helpem ol pipol i kipim ol komitmen blong olgeta blong mekem se oli save kam long Sevya mo stap sef.

Pikja

ol misinari oli stap tijim wan woman

Givim Ol Invitesen

Olsem wan representatif blong Jisas Kraes, yu invaetem pipol blong folem Hem mo kasem glad blong gospel blong Hem. Yu invaetem olgeta blong mekem ol samting we bae i bildim fet blong olgeta long Kraes. Afta yu sapotem olgeta blong kipim ol komitmen blong olgeta.

Ol invitesen mo ol komitmen oli impoten from ol risen we i stap ia:

Oli helpem ol pipol oli laef folem ol prinsipol we oli lanem mekem se oli save filim Spirit i konfemem witnes ia long olgeta.
Blong stap kipim ol komitmen i wan wei we ol pipol oli stap soemaot fasin blong sakem sin (luk long Doktrin mo Ol Kavenan 20:37).
Fasin blong sakem sin i helpem ol pipol blong kasem eksperiens blong pis mo glad blong fogivnes blong God. Mo tu bae God i helpem olgeta bigwan from ol jalenj blong olgeta.
Blong stap kipim ol komitmen i helpem ol pipol blong oli mekem mo kipim ol tabu kavenan.
Yu save soem lav blong yu long ol pipol mo fet blong yu long ol promes blong God tru long fasin blong stap helpem ol pipol i kipim ol komitmen blong olgeta.

Invaet Taem Spirit I Lidim Yu

Lukaotem blong Spirit i lidim yu blong givimaot wanem kaen invitesen mo wanem taem nao blong givimaot. Tingting long wanem tijing o wanem doktrin, bae man o woman i andastanem klia mo stret, bae i helpem hem blong akseptem invitesen. Stret invitesen long stret taem i save mekem pipol oli mekem ol samting we bae i bildim fet blong olgeta. Ol wok ia oli save lid i go long bigfala jenis blong hat (luk long Mosaea 5:2; Alma 5:12–14).

Ol invitesen we yu givimaot oli maet ol smol samting, olsem ridim wan japta blong skripja o kam long sakramen miting. O oli save stap olsem ol impoten samting olsem hemia blong kasem baptaes. Ol invitesen i mas stap long stret ples we man o woman ia i stap long hem, o long rod blong hem long saed blong spirit.

Taem Spirit i lidim yu blong givimaot ol invitesen, ol invitesen ia oli bild wan afta narawan blong helpem wan man o woman i progres long saed blong spirit (luk long 2 Nifae 28:30; Doktrin mo Ol Kavenan 93:12–13). Askem yuwan, “?Wanem ol komitmen we man o woman ia i stap kipim? ?Wanem nekis samting nao hem i nidim blong mekem blong hem i progres?”

Lisin long olgeta we yu stap toktok wetem o tijim. Long wanem yu harem mo filim, lukaotem blong spirit i lidim yu blong save wanem invitesen nao bae i helpem wanwan man o woman i progres i go blong mekem ol tabu kavenan.

Ol Prinsipol blong Givimaot Ol Invitesen

Givimaot ol invitesen i nidim blong gat fet long Jisas Kraes. Gat fet se bae Hem i blesem ol pipol taem oli akseptem mo folem ol invitesen blong yu.

Pipol bae oli save jenis taem yu invaetem olgeta blong wok long wan trutok blong gospel mo helpem olgeta oli luk olsem wanem jenis ia bae i helpem olgeta. Bae oli jenis long wan level we bae oli filim Spirit mo eksperiensem glad blong laef folem gospel blong Jisas Kraes.

Evri taem yu stap toktok wetem ol pipol, long man o onlaen, tingting long wanem invitesen i save help blong mekem fet blong olgeta i kam moa strong long Jisas Kraes mo filim Spirit. Samtaem hemia i save stap olsem wan simpol invitesen nomo olsem, blong mitim yu bageken o blong kam long wan Jos aktiviti.

Taem yu rere blong tijim wan lesen, tingting long nid mo progres blong wanwan man o woman. Mekem sua plan blong lesen blong yu i gat wan o moa invitesen we bae i helpem man o woman ia i progres.

Lukaot blong no givimaot plante invitesen long wan taem. Wan man o woman i nidim taem blong mekem wok, i gro, mo lanem samting aot long wanwan invitesen.

Talem stret samting, yu no mekem olsem yu fos taem yu stap invaetem ol pipol blong mekem ol komitmen (luk long Alma 38:12). Respektem fridom blong mekem joes blong ol pipol.

Stadi long Ol Skripja

?From wanem ol komitmen oli impoten?

Invaet wetem Kaen mo Klia Lanwis

Wan invitesen oltaem i tekem toktok olsem “bae you” kwestin, we i nidim wan yes o no ansa. Mekem invitesen blong yu i kaen, i go stret long poen, mo i klia. Ol invitesen ia oli invaetem o lidim pipol blong mekem wan komitmen blong wok wetem fet long Jisas Kraes.

Nomata invitesen blong yu i blong wanwan man o woman mo i go stret long olgeta, tingting long eksampol we i stap ia:

Blong stap atendem jos i givim wan taem mo ples long yu blong wosip long God mo filim Spirit blong Hem. I save helpem yu tu blong kam pat blong wan kominiti we i gat sapot taem yu mekem ol jenis blong kam moa klosap long Sevya. ?Bae yu kam wetem mifala long sakramen miting long Sandei ia?
Naoia we yumi tokbaot hamas i impoten blong stadi long ol skripja, ?bae yu save ridim [wan ves blong skripja]? ?Bae yu raetem daon eni filing mo tingting o kwestin we yu gat? Yumi save tokbaot ol tingting blong yu nekis taem we yumi mit.
Yumi bin stap tokbaot laef blong Sevya mo ol komanmen blong Hem. ?Bae yu folem eksampol blong Hem blong kasem baptaes insaed long Jos blong Hem mo mekem ol promes wetem Hem? (Luk long “Invitesen blong Wan I Kasem Baptaes mo Konfemesen” long japta 3.)
Yu soemaot intres blong konek moa wetem God long laef blong yu. ?Bae yu prea wetem fet long ol nekis dei we i stap kam, blong yu save eksperiensem ol blesing blong prea?
Mifala i gat wan vidio we mifala i ting se bae i helpem yu. ?Mifala i save soem long yu o sendem ling blong hem long yu? ?Bae yu watjem? ?Mifala i save jekem yu tumoro blong save wanem tingting blong yu long hem?

Lukaotem blong Tabu Spirit i toktok long yu taem yu stap tingting blong givim ol invitesen we i kaen, i go stret long poen, mo i klia gud.

Stadi blong Yuwan o Kompanion Stadi

Long stadi jenol blong yu, raetem wan invitesen we i simpol, i go stret long poen, mo i klia blong wanwan komitmen long wan lesen. Sapos yu mekem aktiviti ia bifo, ripitim bakegen mo komperem niufala invitesen blong yu wetem ol olfala wan.

Lukluk bak long ol invitesen we yu bin raetem wetem kompanion blong yu. Afta tokbaot ol kwestin we i stap ia:

?Olsem wanem yumi save helpem ol pipol i andastanem ol promes blesing blong Lod we i go wetem invitesen ia?
?From wanem invitesen ia i impoten long miwan?
?Olsem wanem bae mi save helpem ol pipol blong filim lav blong God taem mi stap givim ol invitesen ia long olgeta?
?Olsem wanem mi save helpem ol narawan i wok long ol invitesen we mi stap givimaot i kam moa gud?

Tingting long wan we yu stap tijim. Praktis blong stap givimaot ol invitesen ia olsem se yu stap toktok long man o woman ia. Rivaesem ol invitesen blong yu sapos i gat nid.

Promesem Ol Pipol Ol Blesing

God i promes blong blesem yumi taem yumi kipim ol komanmen blong Hem (luk long Doktrin mo Ol Kavenan 130:20–21). Olgeta we oli kipim ol komanmen mo gohed blong stap fetful “Lod i blesem olgeta long evri samting” mo bae “oli save stap wetem God long wan ples blong hapi we i neva gat en” (Mosiah 2:41).

Taem yu invaetem ol pipol blong mekem ol komitmen, promesem olgeta ol blesing blong kipim ol komitmen blong olgeta. Yu save kam blong save plante long ol blesing ia sapos yu stadi long ol skripja, ol tijing blong ol profet blong ol las dei, mo ol lesen long japta 3. Tingbaot tu ol blesing long laef blong yuwan. Prea mo disaed long wanem ol blesing blong promesem wanwan man o woman taem yu givimaot ol invitesen.

Taem yu invaetem wan man o woman blong laef folem wan komanmen, tijim ol samting ia:

Blong stap obei ol komanmen i soemaot lav blong yumi long Papa long Heven mo Pikinini blong Hem, Jisas Kraes (luk long Jon 14:15).
Blong stap obei ol komanmen i soemaot long God se yumi trastem Hem (luk long Ol Proveb 3:5–6).
Ol blesing blong God oli ol samting blong laef ia tugeta wetem blong spirit (luk long Mosaea 2:41).
Blesing blong God we i moa bigwan long evriwan i laef we i no save finis (luk long Doktrin mo Ol Kavenan 14:7).
Taem yumi prea wetem wan tru hat mo wok wetem fet, God bae i helpem yumi mekem ol samting we i komandem yumi blong mekem i hapen (luk long 1 Nifae 3:7).
God i mekem ol promes blong hem oli kam tru blong blesem yumi folem ol wei mo taem blong Hem (luk long Doktrin mo Ol Kavenan 88:68).

Oltaem ol pipol i fesem fasin blong agens taem oli stap kipim ol komanmen. Sapotem olgeta we yu stap tijim ogleta, mo talem long olgeta se God bae i blesem olgeta taem oli stap traehad blong mekem wanem Hem i wantem. Helpem olgeta i andastanem se fasin blong agens i wan janis blong gro tru fasin blong stap jusum blong folem Kraes long taem blong hadtaem (luk long 2 Nifae 2:11, 13–16).

Elda Jeffrey R. Holland i bin tijim: “Samfala blesing oli kam hariap, sam oli kam let, mo sam oli no kam kasem taem yumi go long heven, be long olgeta we oli akseptem gospel blong Jisas Kraes, ol blesing ia, oli kam” (“An High Priest of Good Things to Come,” Ensign, Nov. 1999, 38).

Stadi long Ol Skripja

?Wanem nao ol skripja we oli stap ia oli tij abaot wanem Lod i wantem blesem yumi from?

Stadi blong Yuwan

Rid long Doktrin mo Ol Kavenan 82:10 mo 130:20-21 Afta stadi long ol skripja we oli stap ia. Mekem tu(2) kolomn (wan laen we i kam daon i seperetem wan pej long tu) long stadi jenol blong yu. Long wan saed, raetem komanmen we yu faenem long wanwan ves ia. Long nara saed, raetem promes blong kipim komanmen.

Serem testemoni blong yu.

Serem testemoni blong yu evri taem, taem yu givimaot wan invitesen mo ol promes blesing. Talem long olgeta olsem wanem yu kasem blesing taem yu laef folem ol prinsipol we yu stap tijim. Serem testemoni se prinsipol ia bae i blesem laef blong man o woman ia sapos hem i laef folem.

Testemoni blong yu we i tru bae i helpem, bae i krietem wan invaeronmen blong ol pipol i filim Tabu Spirit i konfemem trutok. Hemia bae i leftemap tingting blong olgeta blong akseptem ol invitesen we bae yu givim.

Blong gat moa infomesen, luk long “Serem Testemoni blong Yu” long japta 10.

Pikja

grup prea

Helpem Ol Pipol Oli Kipim Ol Komitmen blong Olgeta

Taem ol pipol oli akseptem ol invitesen blong yu blong mekem wan samting, folemap blong helpem olgeta blong kipim ol komitmen blong olgeta. Yu stap helpem ol pipol oli developem fet long Kraes. Rol blong yu i blong helpem olgeta oli mekem fet blong olgeta i kam strong mo mekem pogres blong jenisim laef blong olgeta fulwan. Yu no invaetem nomo ol pipol blong oli jenis; sapotem olgeta blong oli mekem i hapen.

Pipol bae oli kasem wan witnes blong Spirit taem oli eksesaesem fet blong sakem sin tru long fasin blong stap kipim ol komitmen. Witnes ia oltaem i no stap kam “kasem afta nomo long tes blong fet blong [yufala]” (Ita 12:6). Yu no sapraes taem fasin blong agens i kam. Mekem plan olsem wanem bae yu save helpem olgeta go tru long hadtaem blong oli save kasem witnes blong Spirit. Ol nara memba blong Jos oli save givim sapot tu.

Oltaem pipol i filim paoa blong Spirit taem yu stap wetem olgeta. Toktok moa long hamas prea i impoten, ridim ol skripja, mo folemap ol invitesen blong yu blong mekem se oli gat ol filing ia taem oli stap olgetawan.

Blong stap kipim ol komitmen i mekem pipol i rere from ol odinens mo ol kavenan we i stap long rod ia blong jenisim laef. Ol hadwok blong yu i save helpem olgeta “i save soemaot tru long ol wok blong olgeta” disaea blong olgeta blong folem Jisas Kraes (Doktrin mo Ol Kavenan 20:37).

Pikja

ol woman oli stap haghagem olgeta

Plan blong Mekem Sot Kontak Evri Dei

Wok blong helpem pipol i kipim komitmen i stat taem yu visitim mo tijim olgeta blong fas taem. Askem olgeta blong rekodem komitmen blong olgeta long fon blong olgeta, kalenda, o wan samting we yu livim i stap wetem olgeta.

Askem sapos yu, o wan memba we i bin stap tekempat, i save mekem wan sot kontak evri dei long medel blong ol visit. Eksplenem se stamba tingting blong ol kontak ia i blong sapotem olgeta, mo eksplenem sam wei blong mekem hemia. Ol kontak ia oli wan wei blong yusum prinsipol insaed long Doktrin mo Ol Kavenan 84:106.

Jusum fasin blong kontak we bae i wok gud moa, olsem wan sot visit, fon kol, teks, o mesej long sosol media. Teknoloji i givim plante joes blong moa rimaenda mo sapot.

Leftemap Tingting mo Helpem Ol Pipol long Kontak blong yu Evridei

Blong evri invitesen yu givim, rekotem ol not insaed long Prijim Gospel blong Mi ap abaot olsem wanem blong folemap long nekis dei. Taem yu stap plan blong nekis dei, lukaotem blong Spirit i lidim yu taem yu tokbaot olsem wanem blong helpem ol pipol blong kipim komitmen blong olgeta.

Mekem ol positiv kontak evridei wetem ol pipol mo leftemap tingting blong olgeta. Prea from olgeta. Soem long olgeta lav mo andastaning taem yu helpem olgeta blong kipimi ol komitmen blong olgeta. Ansarem ol kwestin mo helpem olgeta blong winim ol jalenj. Sapos i gat taem, rid tugeta long buk blong Momon. Serem ol media we i kam long Jos, wetem ol miusik we i kam long Jos we maet i save leftemap olgeta. Respektem taem blong olgeta mo ol samting we oli wantem.

Soem olgeta long ol nara memba blong Jos. Sapos i stret, askem ol memba blong helpem ol pipol blong kipim ol komitmen blong olgeta (luk long japta 10).

Kongratuletem olgeta we oli wok blong kipim ol komitmen blong olgeta. Helpem olgeta blong luk olsem wanem Lod i glad wetem ol traehad blong olgeta. Ol pipol ia oli jenisim ol laef blong olgeta, we i tekem plante wok mo fasin blong save wet longtaem. Helpem olgeta oli luksave ol blesing we oli stap kasem. Talem long olgeta se oli save gat sakses.

Soemaot lav tu sapos oli no kipim ol komitmen blong olgeta. Provaedem sapotlong olgeta long taem blong kontak blong yu evri dei. Eksampol, sapos wan i akseptem wan invitesen blong ridim wan japta long Buk blong Momon be i no mekem yet, talem blong yufala i rid tugeta wetem hem. Helpem man o woman ia blong i luksave tru long eksperiens olsem wanem blong stap kipim ol komitmen i save blesem laef blong hem.

I maet tekem plante taem blong traem kipim wan komitmen, mo yu maet nidim blong mekem plante visit blong helpem olgeta. Tokbaot olsem wanem oli save winim ol jalenj blong stap kipim ol komitmen. Gat fasin blong save wet longtaem mo stap sapot, be yu no stap tok agens o jajem.

Gat Paoa blong Tabu Spirit long Evri Dei Kontak blong Yu.

Taem yu stap folemap ol komitmen ia wetem ol pipol, askem olgeta blong serem ol eksperiens blong olgeta blong kipim ol komitmen. Askem wanem oli bin lanem mo filim. Hemia bae i helpem olgeta blong luksave paoa blong Spirit long laef blong olgeta mo helpem olgeta blong luksave wanem nekis step blong tekem.

Taem yu kontaktem ol pipol evri dei, wan impoten pat blong wok blong yu i blong invaetem paoa blong Tabu Spirit long laef blong olgeta. Helpem olgeta blong luksave olsem wanem blong filim Spirit taem yu no stap wetem olgeta. Ol kontak blong yu evridei i sapos blong mekem ol filing blong olgeta long saed blong spirit i kam strong taem yu tijim olgeta. Bae oli jenisim laef taem oli filim paoa mo Tabu Spirit i lidim olgeta.

Soem lav

Proses blong fasin blong jenisim laef i stanap long lav we i olsem blong Kraes (luk long 4 Nifae 1:15). Lukaotem presen blong jareti. Blong stap soem lav we i tru i save hepem ol pipol i filim Spirit long laef blong olgeta. Fasin blong yu blong soem lav long olgeta, i save helpem olgeta i akseptem ol invitesen mo kipim ol komitmen we i lid i go blong jenisim laef.

Taem yu lavem mo tijim ol narawan, fasin blong jenisim laef blong yuwan blong kam long Sevya bae i go dip.

Blong help sapot long wok blong jenisim laef blong wan nara man o woman i wan tabu wok. Bae yu faenem glad we bae i stap blong oltaem taem yu givim taem mo talen blong yu long wok ia blong givim seves long ol narawan (luk long Matiu 10:39; Mosaea 2:17; Alma 27:17–18; Doktrin mo Ol Kavenan 18:10–16).

Stadi blong Yuwan o Kompanion Stadi

Rikotem long Prijim Gospel blong Mi, ap blong ol plan blong kontak blong yu evridei wetem wanwan man o woman we yu stap tijim. Mekem plan sam dei bifo long wanem bae yu mekem blong folemap wetem wanwan man o woman.

Jusum wan invitesen bae yu givim taem yu tijim wanwan man o woman. Afta faenemaot ol difren wari we i kipim wan man o woman blong no akseptem komitmen ia. Toktok raon mo praktisim olsem wanem yu save helpem ol pipol i wok blong solvem ol problem blong olgeta.

Lod I Wantem blong Ol Man I Kam mo Stap

Misinari wok i gat bigfala sakses taem ol pipol oli mekem mo kipim komitmen blong laef folem gospel mo stap aktiv long Jos truaot laef blong olgeta. I no inaf blong olgeta i kam nomo long Jos. Lod i wantem olgeta blong kam mo stap (luk long Jon 15:16). Lidim ol tijing mo invitesen blong yu i go long en ia nao. Blong kasem ol blesing we Papa long Heven i gat i stap blong olgeta, ol memba oli mas gohed blong laef folem gospel tru kipim ol komanmen mo ol kavenan we oli bin mekem mo stap aktiv long Jos.

Nifae i bin tijim: “afta we yufala i bin kam insaed long rod ia we i stret mo i no isi, bae mi askem yufala sapos evri samting i finis? Luk, mi talem long yufala, No; … yufala i mas wokbaot wetem strong bilif long Kraes, … mo [sapos yufala i] stap strong kasem en, luk, olsem ia nao Papa i talem: Bae yufala i kasem laef we i no save finis” (2 Nifae 31:19–20).

Givim gudfala traehad blong yu blong helpem ol pipol oli kwalifae blong kasem “laef we i no save finis, we presen ia, i presen blong God we i moa bigwan long evri narafala presen blong hem” (Doktrin mo Ol Kavenan 14:7).

Ol Aedia blong Stadi mo Yusum

Stadi blong Yuwan

Faenemaot wan komanmen long lesen 4. Faenem mo rekotem ol ves blong skripja we i kam long ol lata-dei profet we i eksplenem ol promes blesing we i go wetem komanmen ia. Tingting long ol blesing we yu kasem tru blong stap obei long komanmen ia, mo raetem olgeta long jenol blong yu.
Taem yu toktok wetem famli blong yu o ol narawan, askem olsem wanem oli bin kasem blesing ia blong stap obei wan stret komanmen (olsem eksampol, kipim sabat dei i tabu, stap obei long loa blong taeting, o kipim komanmen we i no isi blong wan we yu stap tijim).
Ansarem ol kwestin we oli stap ia blong helpem yu luksave ol eria we yu save kam moa gud blong givimaot ol invitesen. Mekem ol plan blong save kam moa gud.
- ?Ol pipol oli save se mi lavem olgeta?
- ?Mi save tru se bae oli kasem blesing sapos oli wok folem ol invitesen blong mifala?
- ?Mi spenem gud taem mo givim taem long olgeta blong mekem kontak evri dei wetem ol pipol blong helpem olgeta kipim ol komitmen blong olgeta?
- ?Ol plan blong yumi i gat tu ol invitesen blong mekem wok?

Kompanion Stadi mo Jenjenisim Kompanion

Lukluk bak long ol invitesen long wan long ol lesen blong misinari. Blong wanwan invitesen, ansarem ol kwestin we oli stap ia:
- ?Wanem nao ol blesing we Lod i promesem long olgeta we oli kipim komitmen ia?
- ?Olsem wanem nao blong obei long prinsipol ia i helpem fet mo testemoni blong ol pipol i kam antap?
- ? Olsem wanem komitmen ia i helpem pipol oli sakem sin mo stap rere moa blong save filim Spirit?
Long ol tul blong yu blong mekem plan, mekem wan lis blong ol pipol we yu bin kondaktem long tu(2) dei i pas. Wetem olgeta we yu stap tijim olgeta mo ol memba.
- Raetem ol invitesen we yu givimaot mo ol komitmen we oli bin mekem.
- Tingting long ol nara invitesen we yu save givimaot.
- Tokbaot from wanem yu save kasem ol komitmen from sam long ol pipol ia be i no long ol narawan.
- ?Bae yu mekem wanem blong folemap ol invitesen ia?

Distrik Kaonsel, Ol Son Konfrens, mo Misin Lidasip Kaonsel

Tokbaot ol tingting we oli gud mo we oli save wok long evridei kontak wetem ol pipol we yu stap tijim olgeta. ?Olsem wanem ol misinari oli wok gud wetem ol memba? ?Wanem ol tul blong media we oli save yusum, dijitol wan o hemia we oli printim? ?Wanem yu mekem taem pipol oli no stap long hom o bisi tumas blong luk yu?
Tokbaot ol wei we ol misinari oli tijim gud ol komanmen long lesen 4.

Ol Misin Lida mo Ol Misin Kaonsela

Sapos i posibol, folem ol misinari taem oli stap tij. Helpem olgeta oli lukluk nomo blong helpem ol pipol oli mekem mo kipim ol komitmen.
Leftemap tingting blong ol wod prishud lida, ol ogonaesesen lida, mo ol memba blong mekem kontak evri dei wetem ol pipol we ol misinari oli stap tijim—sapos ol pipol oli agri blong mekem kontak ia.