Jisas I Stap Tij long Wes Saed blong Wol (Jisas Kraes I Visitim Amerika), i kam long John Scott

Japta 5

Yusum Paoa blong Buk blong Momon

Tingting long Hemia

• ?Olsem Wanem Nao Buk blong Momon i ki ston blong relijin blong yumi?

• ?From wanem Buk blong Momon i gat moa paoa blong jenisim laef blong wan man?

• ?Wanem nao Buk blong Momon i tijim abaot Jisas Kraes?

• ?Olsem wanem mi save yusum Buk blong Momon blong helpem mi mo ol nara man i go moa kolosap long God?

• ?Olsem wanem Buk blong Momon i tokbaot ol kwestin blong sol blong man?

• ?Olsem wanem mi save helpem ol man i ridim mo kasem wan testemoni blong Buk blong Momon?

Yu putum tugeta Buk blong Momon wetem Spirit, i wan risos we i gat moa paoa blong jenisim laef blong man. Buk ia i wan rekod we i blong bifo, i holem ol tabu rekod we oli raetem blong helpem evri pipol blong save se Jisas Hem i Kraes (luk long taetol pej blong Buk blong Momon). Olsem nara smol taetol i talem, Buk blong Momon i “wan narafala testeman blong Jisas Kraes.” Hem i wan strong pruf se God i singaotem Josef Smit olsem wan profet mo putum bak gospel blong Jisas Kraes tru long hem.

Ak doa wei wetem ki ston

Buk blong Momon I Ki Ston blong Relijin blong Yumi

Profet Josef Smit i tijim se Buk blong Momon i “ki ston blong relijin blong yumi” (fas toktok long Buk blong Momon). Long wan nara taem hem talem: “Tekemaot Buk blong Momon mo ol revelesen, nao?wehem relijin blong yumi? Yumi no gat” (Teachings of Presidents of the Church: Joseph Smith [2007], 196).

Wan ak i wan strong doa wei o windo we oli bildim wetem ston we sep blong olgeta i kolosap olsem traengol putum wan antap long narawan. Ston we i stap long medel, o ki ston, i oltaem bigwan moa long ol narawan mo i holemtaet olgeta evriwan long ples blong olgeta.

Presiden Ezra Taft Benson i talem se Buk blong Momon i ki ston blong relijin blong yumi long tri wei:

Witnes blong Kraes. “Buk blong Momon i ki ston long witnes blong yumi long Jisas Kraes, we i kona ston blong evri samting we yumi mekem. I holem wan klia witnes we i gat paoa, se Jisas Kraes i ril.”

Doktrin we i Fulwan. “Lod i talem hemwan se Buk blong Momon i holem ‘gospel blong Jisas Kraes we i fulwan’ [Doktrin mo Kavenan 20:9; 27:5]. … Insaed long Buk blong Momon bae yumi faenem doktrin we i fulwan we yumi nidim blong sevem laef blong yumi. Mo we oli tijim i klia mo i simpol mekem se ol pikinini tu oli save lanem ol wei blong fasin blong sevem man mo fasin blong kam olsem wan god.”

Fandesen blong testemoni. “Semmak olsem ak bae i brokbrok mo i foldaon sapos yu karemaot ki ston, semmak tu long Jos wetem Buk blong Momon we i fulwan. … Sapos Buk blong Momon i tru … wan i mas akseptem se Restoresen i bin hapen tru.” (Teachings of Presidents of the Church: Ezra Taft Benson [2014], 129, 131, 128.)

Taem yumi kasem wan testemoni se Buk blong Momon i toktok blong God, bae yumi save kasem tu se Josef Smit i wan profet. Tru long hem, prishud atoriti blong God i bin kambak tru long ol wokman blong heven. God i givim raet tu long Josef Smit blong oganaesem Jos blong Jisas Kraes. Revelesen i stap gogohed tudei tru long ol profet we oli stap laef.

yang man i stap ridim ol skripja

Buk blong Momon I Nid blong Stap blong Jenisim Laef blong Man

Wan impoten pat blong fasin blong jenisim laef i blong kasem wan witnes tru long paoa blong Tabu Spirit se Buk blong Momon i tru. Taem yu rid mo stadi long hem wetem wan tru hat, bae yu filim ol toktok blong hem i gro insaed long sol blong yu. Ol toktok blong hem oli givim gudfala save long saed blong laef, long plan blong God, mo blong Jisas Kraes (luk long Alma 32:28). Prea abaot buk wetem wan tru tingting blong wantem save mo fet long Kraes. Taem yu mekem olsem, bae yu kasem wan witnes tru long Tabu Spirit se hem i toktok blong God (luk long Moronae 10:4–5).

Testemoni blong yu blong Buk blong Momon i save lidim yu blong kasem wan dip fet we i stap olsem paoa blong helpem ol narafala man blong jenisim laef. Helpem pipol we yu tijim blong luksave wanem oli kasem mo filim, taem oli ridim buk ia wetem wan tru hat. Talem stret hamas paoa buk ia i gat blong witnes long Jisas Kraes. Leftemap tingting blong olgeta blong prea blong kasem witnes blong olgetawan se buk ia i tru.

Leftemap tingting blong ol pipol blong lukaotem wan witnes we i kam long Tabu Spirit abaot Buk blong Momon i stap olsem stamba tingting long tijing blong yu. Buk blong Momon i save jenisim laef blong olgeta blong oltaem.

Yusum Buk blong Momon blong Tijim Gospel blong Jisas Kraes

Profet Josef Smit i talem, “Buk blong Momon [i] moa stret bitim eni narafala buk long wol” (fas toktok long Buk blong Momon). I testifae abaot Kraes mo tijim doktrin blong Hem long wan fasin we i moa klia (luk long 2 Nifae 31; 32:1–6; 3 Nifae 11:31–39; 27:13–22). I tijim ful gospel blong Hem. Ol fas prinsipol mo odinens blong gospel we Buk blong Momon i tijim oli ol wei we i lid i go long wan laef we i fulap tumas long laef.

Yusum Buk blong Momon olsem mein tul blong yu blong tijim gospel we i kambak. Long pej we i stap ia hem i ol lis blong sam long ol trutok insaed long Buk blong Momon we bae yu tijim.

Misinari Lesen long Japta 3	Doktrin	Ol Refrens
Misinari Lesen long Japta 3 Mesej blong Restoresen blong Gospel blong Jisas Kraes	Doktrin Laef blong God, ministri mo Atonmen blong Sevya, trutok i bin lus, Restoresen, Josef Smit, prishud atoriti	Ol Refrens 1 Nifae 12–14 2 Nifae 3; 26–29 Mosaea 2–5
Misinari Lesen long Japta 3 Plan blong Fasin blong Sevem Man blong Papa long Heven	Doktrin Long “bigfala plan blong God We I No Save Finis,” i gat, Foldaon blong Adam mo Iv, Atonmen blong Jisas Kraes, Laef bakegen long ded, mo Jajmen	Ol Refrens 2 Nifae 2; 9 Mosaea 3; 15–16 Alma 12; 34:9; 40–42
Misinari Lesen long Japta 3 Gospel blong Jisas Kraes	Doktrin Fet long Kraes, fasin blong sakem sin, baptaes, presen we i Tabu Spirit, mo stap strong kasem en	Ol Refrens 2 Nifae 31–32 3 Nifae 11; 27:13–22
Misinari Lesen long Japta 3 Kam Olsem Disaepol blong Kraes long Ful Laef	Doktrin Ol odinens olsem baptaes, prishud odinesen, mo sakramen	Ol Refrens 3 Nifae 11:22–28; 18 Moronae 2–6

Skripja Stadi

?Wanem nao Sevya i talem abaot Buk blong Momon?

• Doktrin mo Ol Kavenan 1:29; 3:19–20; 19:26–27; 20:5–16; 33:16; 42:12

• Moses 7:62

Buk blong Momon I Testifae abaot Kraes

Stamba tingting blong Buk blong Momon i blong testifae abaot Jisas Kraes. I testifae se laef, misin, laef bakegen long ded, mo paoa blong Hem i tru. I tijim tru doktrin abaot Kraes mo Atonmen blong Hem.

Sam profet we stori blong olgeta i stap long Buk blong Momon oli bin luk Kraes long ae blong olgeta. Brata blong Jared, Nifae, mo Jekob oli luk Kraes taem i no bon yet. Fulap man oli bin stap long taem blong ministri blong Sevya long Ol Man blong Nifae (luk long 3 Nifae 11–28). Sam taem afta, Momon mo Moronae tufala i luk Kraes we i laef bakegen long ded (luk long Momon 1:15; Ita 12:39).

Taem oli pipol oli rid mo prea abaot Buk blong Momon, bae oli kam blong save Sevya moa gud mo eksperiensem lav blong Hem. Bae oli gro long testemoni blong olgeta abaot Kraes. Oli save olsem wanem blong kam long Hem, mo nao, Hem i save sevem olgeta. (Luk long 1 Nifae 15:14–15.)

Presiden Russell M. Nelson

“Buk blong Momon i givim andastaning we i moa fulwan mo i gat moa paoa long Atonmen blong Jisas Kraes, we yu save faenem long eni ples. I tijim yumi wanem tru mining blong bon bakegen. … Yumi save from wanem yumi stap long wol ia. Olgeta ia mo ol nara trutok oli tijim wetem moa paoa insaed long Buk blong Momon bitim we i stap long eni nara buk. Ful paoa blong gospel blong Jisas Kraes i stap insaed long Buk blong Momon” (Russell M. Nelson, “The Book of Mormon: What Would Your Life Be Like without It?” Liahona, Nov. 2017, 62).

Stadi blong Yuwan

Truaot long misin blong yu, raetem daon ol ansa blong ol kwestin we i stap ia long stadi jenol blong yu:

• ?Wanem nao yu lanem abaot Jisas Kraes long stadi blong yu insaed long Buk blong Momon?

• ?Olsem wanem nao stadi blong yu long Buk blong Momon i helpem testemoni blong yu long Jisas Kraes?

• ?Olsem wanem nao yu save yusum Buk blong Momon blong helpem testemoni blong ol nara pipol?

Skripja Stadi

?Wanem risen nao ol profet blong Buk blong Momon oli givim, we i mekem olgeta i raet long ol buk blong olgeta?

• 1 Nifae 6:4–6; 9:3–5

• 2 Nifae 4:15–16; 25:23–29; 26:15–16; 29:11–14; 33:13–15

• Jekob 1:4–8; 4:1–6, 12

• Inos 1:13

• Jerom 1:2

• Omnae 1:25–26

• Ol Toktok blong Momon 1:3–8

• Alma 37:2, 14

• 3 Nifae 5:14–15

• Momon 8:35

Stadi blong Yuwan mo Kompanion Stadi

Oli bin raetem Buk blong Momon “blong winim tingting blong [evri pipol] se Jisas Hem i Kraes” (taetol pej blong Buk blong Momon). Long tebol we i stap i gat ol lis blong sam japta blong Buk blong Momon we i testifae long laef, ol tijing, mo ministri blong Jisas Kraes. Selektem ol ves blong stadi long hem truaot misin blong yu.

Antap long hemia, tingbaot ol nid blong ol pipol we yu stap tijim. Mekem ol plan blong ridim sam long ol ves ia wetem olgeta blong mekem save mo testemoni blong olgeta long Sevya i kam moa strong.

Taetol pej mo fas toktok	Mekem klia stamba tingting blong buk ia.
1 Nifae 10–11	Lihae mo Nifae i testifae abaot Sevya.
2 Nifae 2; 9	Lihae mo Jekob tufala i testifae abaot Jisas Kraes mo Atonmen blong Hem.
2 Nifae 31–33	Nifae i tijim doktrin blong Kraes.
Mosaea 2–5	King Benjamin i testifae abaot Kraes.
Alma 5; 7	Alma i testifae abaot Sevya.
Alma 36	Alma i eksperiensem paoa blong Atonmen blong Kraes.
3 Nifae 9–10	Sevya i invaetem ol pipol blong kam long Hem.
3 Nifae 11–18	Sevya i tijim Ol Man Nifae abaot Papa mo abaot doktrin blong Hem.
3 Nifae 27	Sevya i tijim gospel blong Hem.
Ita 12	Ita mo Moronae i tijim se fet long Jisas Kraes i wan prinsipol blong aksen mo paoa.
Moronae 7–8	Momon i tijim bigfala lav blong Kraes mo Atonmen blong Hem.
Moronae 10	Moronae i tijim evriwan blong kam long Kraes mo kam stret gud evriwan tru long Hem.

Buk blong Momon I Helpem Yumi Kam Moa Kolosap long God

Abaot Buk blong Momon, Josef Smit i talem se “wan man [o woman] bae i kam moa kolosap long God sapos Hem i folem ol tijing blong hem, bitim eni nara buk” (fas toktok long Buk blong Momon). Taem yu stap tij oltaem mo stap invaetem ol pipol blong laef folem ol prinsipol insaed long Buk blong Momon, yu helpem olgeta developem fet long Jisas Kraes mo kam moa kolosap long God.

Buk blong Momon i bildim testemoni mo invaetem revelesen blong yuwan. Yusum Buk blong Momon blong helpem ol pipol i gat eksperiens long saed blong spirit, speseli wan witnes we i kam long Tabu Spirit se buk ia i toktok blong God.

Yu serem moa ol ves insaed long Buk blong Momon taem yu stap tij. Oli gat paoa ia we i kam long Tabu Spirit blong jenisim laef blong man. Taem yu yusum Buk blong Momon blong tijim gospel, tijing blong yu bae i saon wetem paoa mo i klia long hat mo maen blong ol man.

Presiden Gordon B. Hinckley i bin tijim “olgeta we oli bin ridim [Buk blong Momon] mo prea from, nomata oli rij o pua, oli gat save o nogat, bae oli gro tru long paoa blong buk ia.” I tijim moa se:

“I no gat samting i holemtaet mi blong promesem yufala se, sapos yufala i ridim Buk blong Momon wetem prea, i nomata hamas taem yufala i bin ridim buk ia bifo, bae insaed long hat blong yufala, bae i gat wan moa mak blong Spirit blong Lod i kam antap long wanem i stap finis. Bae yufala i gat wan moa strong tingting blong wokbaot wetem fasin blong stap obei long ol komanmen blong Hem, mo bae yufala i gat wan moa strong testemoni se, i tru, Pikinini blong God i stap laef mo i ril” (“The Power of the Book of Mormon,” Ensign, June 1988, 6).

ol misinari oli stap ridim skripja

Buk blong Momon I Stap Tokbaot Ol Kwestin blong Sol blong Man

Taem pipol i rid long Buk blong Momon wetem gaed blong Spirit, i save helpem olgeta oli faenem ol ansa o wanem oli stap lukaotem o ol kwestin we oli gat—o ol kwestin blong sol blong man. Helpem ol pipol oli luk olsem wanem ol tijing blong Buk blong Momon i tokbaot ol kwestin blong laef.

Sam long ol kwestin ia oli stap long lis we i stap daon ia, wetem ol ves insaed long Buk blong Momon we i tokbaot ol kwestin ia.

• ?God i stap? ?Huia i God? (Mosaea 4:9; Alma 18:24–40; 22:4–23; 30:44)

• ?God i save mi mo i kea long mi? ?Olsem wanem bae mi filim lav blong hem? ?Olsem wanem bae mi kam moa kolosap long Hem? (2 Nifae 26:24; Mosaea 4:9–12; Inos 1:1–12; Alma 18:32; Moronae 10:32–33)

• ?Wanem nao i stamba tingting blong laef? (2 Nifae 2:25; Alma 34:32)

• ?From wanem laef i had samtaem? ?Olsem wanem mi save faenem paoa long ol hadtaem? (1 Nifae 17:3; 2 Nifae 4:20–21; Alma 36:3; Ita 12:27)

• ?Olsem wanem mi save faenem pis long ol hadtaem? (Mosaea 24:13–15; Hileman 5:47)

• ?Olsem wanem bae mi stap hapi moa? (Mosaea 2:41; Alma 22:15–16)

• ?Olsem wanem bae mi save stap olsem wan gudfala man o woman? (Mosaea 26:30–31; Alma 5:12–13; 7:23–24; Ita 12:27)

• ?Olsem wanem bae mi save filim se God i fogivim mi? (Inos 1:2–8; Alma 36:17–21)

• ?Wanem i hapen afta we mi ded (2 Nifae 9:3–6, 11–13; Alma 11:42–44; 40:11)

Buk blong Momon i givim gaed tu abaot ol nara kwestin, olsem:

• ?Olsem wanem mi save kontribiut long gud laef blong spirit blong famli blong mi? (1 Nifae 1:1; 8:36–38; Mosaea 2:5–6; 4:14–15; 3 Nifae 18:21)

• ?Olsem wanem bae mi mekem ol pikinini blong mi oli strong blong fesem temtesen? (1 Nifae 15:23–25; Hileman 5:12; 3 Nifae 18:15, 18–21, 24–25)

• ?Olsem wanem taem mi obei long ol komanmen blong God i helpem mi gat wan laef we i moa fulap long glad? (2 Nifae 2:25–28; 4:35; Mosaea 2:41; 4 Nifae 1:15–18)

Presiden Dallin H. Oaks

“Ol misinari oli mas save olsem wanem blong yusum Buk blong Momon blong ansarem ol kwestin blong olgetawan mekem se oli save yusum gud blong helpem ol narawan oli lanem blong mekem i semmak. … Oli mas putum paoa blong Buk blong Momon i go insaed long tijing blong gospel we i kambak, faswan blong stap yusum long laef blong olgetawan mo afta serem wetem olgeta we oli stap tijim” (Dallin H. Oaks, “Counsel for Mission Leaders,” seminar for new mission leaders, June 25, 2022).

Stadi blong Yuwan o Kompanion Stadi

Listim ol kwestin blong sol blong man we yu gat o we yu harem long ol narawan. Faenem ol ves long Buk blong Momon we oli help blong tokbaot ol kwestin ia. Raetem ol tingting mo ol ves blong Buk blong Momon insaed long stadi jenol blong yu. Yusum olgeta taem yu stap tij.

Buk blong Momon mo Baebol Tufala I Wok Tugeta

Lod i talem blong “tijim ol prinsipol blong gospel blong mi, we oli stap long Baebol mo long Buk blong Momon, we i holem ful gospel” (Doktrin mo Ol Kavenan 42:12). Ol Lata-dei Sent oli “biliv we Baebol i toktok blong God sapos oli transletem i stret gud” (Ol toktok blong Bilif 1:8; luk tu long 1 Nifae 13:29). Baebol i tabu skripja. Buk blong Momon i kompanion tabu skripja we i holem gospel blong Jisas Kraes we i fulwan.

Baebol mo Buk blong Momon tufala i sapsapotem tufala mo mekem wanwan long tufala i kam moa rij (luk long Esekiel 37:16–17; 1 Nifae 13:40; Momon 7:8–9). Tugeta skripja ia oli ol tijing blong ol profet blong bifo we oli putum ol tijing blong olgeta tugeta. Baebol i tokbaot ol wok we God i mekem wetem ol pipol we oli stap long westen pat blong wol plante taosen yia i pas. Buk blong Momon i tokbaot ol wok we God i mekem wetem ol pipol we oli stap long olfala Amerika bitim moa long wan taosen yia.

man o woman i stap kalarem ol skripja

Moa impoten long hemia, Baebol mo Buk blong Momon tufala i sapsapotem tufala long witnes blong Jisas Kraes. Baebol i givim storian blong taem Sevya i bon, ministri blong hem long wol ia, mo Atonmen—wetem ded mo Laef Bakegen long Ded. Buk blong Momon i gat ol profesi blong taem Sevya i bon mo misin blong hem, ol tijing abaot Atonmen blong Hem, mo stori blong ministri blong Hem long ol Amerika. Buk blong Momon i konfemem mo i mekem i moa bigwan testemoni long Baebol abaot Jisas we i Wan Stret Pikinini Ia Nomo blong God mo Sevya blong wol ia.

Tugeta Baebol mo Buk blong Momon tufala i tijim loa blong ol witnes: “long toktok blong tu(2) no tri witnes, bae evri toktok ia i stanap” (2 Korin 13:1; luk tu long 2 Nifae 11:2–3). Tugeta buk blong skripja tufala i folem loa ia oltaem blong testifae abaot Jisas Kraes (luk long 2 Nifae 29:8).

Stadi blong Yuwan o Kompanion Stadi

Lukaotem ol kros-refrens long ol topik we i stap ia, insaed long Buk blong Momon mo Baebol. Oli givim ol eksampol long ol parentes afta long wanwan topik. Givim ol topik mo ol ves blong yuwan.

• Ol profet (Jekob 4:4–6; Amos 3:7)

• Apostasi (2 Nifae 28; 2 Timoti 4:3–4)

• Restoresen (1 Nifae 13:34–42; Ol Wok 3:19–21)

• Yumi ol pikinini blong God (1 Nifae 17:36; Ol Wok 17:29)

Helpem Ol Pipol I Ridim mo I Andastanem Buk blong Momon

Olgeta we oli no rid o andastanem Buk blong Momon bae oli gat hadtaem blong kasem wan witnes se i tru. Yu save helpem olgeta blong andastanem buk taem yu ridim wetem olgeta. Rid long taem blong wan tijing apoenmen, long taem blong wan foloap visit, o tru long teknoloji. Yu save arenjem tu blong ol memba oli rid wetem olgeta. Wajem wan Buk blong Momon vidio mo afta ridim ol japta we oli go wetem ol vidio ia bae i save helpem olgeta.

Prea blong kasem help taem yu selektem ol ves we i tokbaot wari blong ol pipol mo ol nid blong olgeta. Ridim mo tokbaot ol sot ves, olsem olgeta ia 1 Nifae 3:7 o Mosaea 2:17. Mo tu ridim mo tokbaot ol ves we oli longfala o wan ful japta, olsem 2 Nifae 31, Alma 7, o 3 Nifae 18. Leftemap tingting blong ol pipol blong ridim Buk blong Momon stat long stat, wetem ol testemoni blong Tri mo Eit Witnes mo testemoni blong Profet Josef Smit.

Sandei skul klas

Tingting long ol tingting we i stap ia taem yu ridim Buk blong Momon wetem ol pipol:

• Prea bifo yu rid. Askem God blong i helpem yu andastanem. Prea blong Tabu Spirit i witnes long olgeta se buk ia i tru.

• Tekem taem blong rid wan afta narawan. Folem spid we oli filim gud long hem. Eksplenem ol toktok mo ol sentens we oli no save gud.

• Stop wanwan taem blong eksplenem wanem yu ridim.

• Eksplenem bakgraon mo stori blong ves, olsem huia i toktok, man o woman ia i olsem wanem, wanem situesen nao i stap. Sapos i gat wan Buk blong Momon vidio we i go wetem, tingting blong soem.

• Talemaot ol ki mesej o doktrin we oli nid blong lukaotem.

• Serem testemoni blong yu mo ol gudfala toktok, ol filing, mo eksperiens blong yuwan.

• Tijim stret ol doktrin aot long profet blong Buk blong Momon. Hemia bae i helpem ol pipol blong filim paoa blong spirit blong buk ia.

• Helpem ol pipol blong “yusum” wanem oli ridim long laef blong olgeta (1 Nifae 19:23). Helpem olgeta blong luk olsem wanem ol skripja i konek long wanwan laef blong olgeta.

Taem yu yusum ol prinsipol ia, bae yu helpem ol pipol oli developem fasin blong save mekem samting mo filing blong wantem ridim Buk blong Momon olgetawan. Talemaot se blong ridim Buk blong Momon evri dei hem i ki blong stap progres i go long baptaes mo blong kam konvet long ful laef.

Dipen long promes we i stap long Moronae 10:3–5. Leftemap tingting blong ol pipol blong rid long Buk blong Momon wetem tru hat mo prea wetem tru tingting blong save se i tru. Eksplenem se tru tingting i minim se wantem blong folem wanem oli kasem tru long Tabu Spirit. Evriwan we oli rid wetem tru hat mo prea wetem tru tingting abaot Buk blong Momon oli save save trutok tru long paoa blong Tabu Spirit.

Yu mas folem promes ia tu evri taem blong mekem testemoni blong yu blong Buk blong Momon i kam moa strong. Testemoni blong yu bae i mekem yu bilif se olgeta we oli folem promes ia bae oli kasem wan witnes se Buk blong Momon i toktok blong God.

Yusum Buk blong Momon long Evri Eria blong Wok blong Yu

Buk blong Momon i wan tul we i gat paoa blong jenisim laef. Yusum olsem mein tul blong tijim trutok we i kam bakegen. Presiden Russell M. Nelson i talem:

“Wan samting we i gat moa paoa i hapen taem wan pikinini blong God i wantem blong moa abaot Hem mo Pikinini blong Hem we i Lavem Tumas. I no gat wan moa ples we oli tijim ol trutok ia i moa klia bitim we oli tijim insaed long Buk blong Momon. …

“Taem mi tingbaot Buk blong Momon mi tingbaot toktok ia paoa. Ol trutok blong Buk blong Momon oli gat paoa blong hilim, kamfotem, putum bak, helpem, mekem i kam strong, filim sore, mo mekem sol blong yumi i glad” (“The Book of Mormon: What Would Your Life Be Like without It?” 61, 62).

Taem yu ridim Buk blong Momon wetem ol pipol, serem testemoni blong yu abaot paoa blong spirit we yu filim taem yu ridim. Mekem i klia gud se witnes blong buk ia abaot Jisas Kraes mo Atonmen blong Hem i impoten tumas. Serem ol ves we i save helpem ol pipol blong filim lav blong Sevya blong olgeta. Helpem olgeta blong luk olsem wanem oli save kam blong save Sevya moa gud tru long ol pej blong hem.

Ridim ol ves we i leftemap mo mekem ol pipol i kam strong. Lukluk moa long ol nid blong olgeta. Serem ol eksampol blong olsem wanem o tijing blong Buk blong Momon i aplae long laef blong yumi tedei.

Tingbaot Hemia

• Buk blong Momon i ki ston blong witnes blong yumi long Kraes, doktrin blong yumi, mo testemoni blong yumi.

• Buk blong Momon i tijim klia doktrin we i stap insaed long ol lesen blong misinari.

• Buk blong Momon i tokbaot ol kwestin blong sol blong man.

• Rid oltaem long Buk blong Momon wetem ol pipol yu stap tijim. Helpem olgeta oli rid olgetawan evri dei mo folem wanem oli lanem.

• Trastem promes blong Lod se evriwan we oli rid wetem tru hat mo prea abaot Buk blong Momon bae oli save trutok blong buk ia tru long paoa blong Tabu Spirit.

---

Ol Aedia blong Stadi mo Yusum

Stadi blong Yuwan

• Rid long 2 Nifae 2; 9; 30; 31; 32. Kalarem evri refrens we i tokbaot Jisas Kraes. Mekem wan lis blong ol defren nem mo taetol blong Kraes long ol japta ia. Makem ol toktok we Hem i talem. Haelaetem ol fasin blong Hem mo ol wok we i stap mekem.

• Taem yu stap rid evri dei long Buk blong Momon, rekodem long stadi jenol blong yu, ol ves we oli gat spesel mining long yu. Raetem olsem wanem bae yu yusum long laef blong yu.

• Raetem long stadi jenol blong yu, olsem wanem yu filim taem yu kasem fas witnes blong yu long saed blong spirit, se Buk blong Momon i tru.

• Raetem ol trifala kwestin ia long stadi jenol blong yu. Truaot long misin blong yu, stap ansarem ol trifala kwestin ia.

  • ?Laef blong mi bae i olsem wanem sapos i nogat Buk blong Momon?

  • ?Wanem nao bae mi no save sapos Buk blong Momon i no gat?

  • ?Wanem nao bae mi no gat sapos Buk blong Momon i no gat?

• Ridim stori blong Toktok Antap long Hil long Matiu 5–7 mo toktok blong Kraes long tempol long 3 Nifae 12–14. ?Olsem wanem nao taem yufala i ridim tugeta ol stori ia i helpem yu andastanem moa ol tijing blong Sevya?

• Stadi ol stori insaed long Buk blong Momon we i tokbaot wan i stap prea. Long stadi jenol blong yu, raetem wanem yu lanem abaot prea insaed long Buk blong Momon.

• Long japta heding blong Mosaea 11–16, raetem long sot stori wanem Abinadae i bin tijim. Afta ridim ful japta ia mo raetem sam moa long sot stori blong yu.

• Long japta heding blong Mosaea 2–5, raetem wan sot stori blong wanem King Benjamin i tijim. Afta ridim ol japta ia mo raetem sam moa long ol sot stori blong yu.

Kompanion Stadi mo Jenisim Kompanion

• Ridim ol ves blong Buk blong Momon tugeta. Serem wanem yu filim mo lanem. Tokbaot olsem wanem yu save yusum ol samting ia long laef blong yu.

• Rid long Alma 26 mo 29 tugeta. Serem olsem wanem yu filim abaot misin blong yu. Raetem ol filing blong yu insaed long stadi jenol blong yu.

• Rid long Alma 37:9 mo tokbaot olsem wanem ol skripja oli impoten long Amon mo ol kompanion blong hem. Faenem ol refrens we i soemaot olsem wanem oli bin yusum ol skripja.

• Rid long Alma 11–14, wetem wan i tekem pat blong Alma o Amulek mo narawan i tekem pat blong olgeta we oli stap agens. Tokbaot olsem wanem ol misinari ia oli stap ansarem ol had kwestin.

Distrik Kaonsel, Ol Son Konfrens, mo Misin Lidasip Kaonsel

• Yusum Buk blong Momon folem wanwan wei blong ol mein heding we oli tokbaot long japta ia.

• Mekem lis blong ol kwestin we olgeta we yu stap tijim olgeta oli stap askem. Eksplenem long olgeta olsem wanem bae yu ansarem ol kwestin ia tru long Buk blong Momon.

• Ridim ol ves blong Buk blong Momon tugeta. Serem save, ol filing, mo testemoni.

• Praktis blong yusum Buk blong Momon blong konfemem mesej blong restoresen.

• Invaetem ol misinari blong serem ol eksperiens blong olsem wanem Buk blong Momon i helpem olgeta mo olgeta we oli tijim, long rod blong jenisim laef.

• Mekem ol misinari oli serem wan fevret skripja blong olgeta long Buk blong Momon we i helpem olgeta tokbaot wan kwestin blong sol blong man.

• Invaetem wan memba we i wan konvet blong serem wok blong Buk blong Momon blong jenisim laef blong hem.

Ol Misin Lida mo Ol Misin Kaonsela

• Tijim ol misinari olsem wanem blong yusum Buk blong Momon blong konfemem trutok blong mesej blong Restoresen.

• Rid long 1 Nifae 1 wetem ol misinari mo komperem wetem eksperiens blong Josef Smit.

• Givim long ol misinari wan klin kopi blong Buk blong Momon we kova blong hem i no strong. Invaetem olgeta blong ridim mo makem buk tu taem, long namba tu o namba tri taem blong transfea.

  • Long taem blong fas riding blong olgeta, askem olgeta blong makem evri samting we i tokbaot o testifae abaot Jisas Kraes.

  • Long namba tu(2) taem blong riding, askem olgeta blong makem ol gospel doktrin mo prinsipol.

  Askem ol misinari blong serem wanem oli lanem mo filim. Elda Ronald A. Rasband i eksplenem olsem wanem taem i ridim Buk blong Momon long wei ia i bin helpem hem blong kam wan gud misinari:

Elda Ronald A. Rasband

“I gat moa samting long riding blong mi bitim blong stap makem ol skripja nomo. Wetem wanwan taem blong ridim Buk blong Momon, stat kasem en, mi fulap wetem lav long Lod. Mi filim wan dip mo strong witnes blong trutok blong ol tijing blong Hem mo olsem wanem oli blong yusum “long dei ia.” Buk ia i go stret gud wetem taetol blong hem, ‘Wan Narafala Testeman blong Jisas Kraes.’ Wetem stadi ia mo witnes long saed blong spirit we oli kasem, mi kam wan misinari blong Buk blong Momon mo wan disaepol blong Jisas Kraes” (“Long dei Ia,” Liahona, Nov. 2022, 25).

• Invaetem ol misinari blong serem wetem yu ol skripja blong Buk blong Momon we i bin impoten long laef blong olgeta.

• Ansarem ol kwestin abaot laef blong pipol long misin blong yu. Invaetem ol misinari blong lukaotem ol ves long Buk blong Momon we i help ansarem ol kwestin ia.