Ol Koling long Misin
Japta 1: Mekem Stamba Tingting blong Yu Olsem Misinari I Kam Tru

“Japta 1: Mekem Stamba Tingting blong Yu Olsem Misinari I Kam Tru,” Prijim Gospel blong Mi: Wan Gaed blong Stap Serem Gospel blong Jisas Kraes (2023)

“Japta 1,” Prijim Gospel blong Mi

Dan Jons prij

Dan Jones, wan long ol gudfala misinari long dispensesen ia, i prijim gospel long Wels.

© 1993 Clark Kelley Price. No mekem kopi

Japta 1

Mekem Stamba Tingting blong Yu Olsem Misinari I Kam Tru

Stamba Tingting blong Yu: Invaetem ol narafala man blong kam long Kraes tru long fet long Jisas Kraes mo Atonmen blong Hem, fasin blong sakem sin, baptaes, kasem presen ia we i Tabu Spirit, mo stap strong kasem en.

Tingting long Hemia

  • ?Wanem nao stamba tingting blong mi olsem wan misinari?

  • ?Wan atoriti mo paoa i kam wetem koling blong mi?

  • ?Olsem wanem nao bae mi dipen long, luksave mo tij wetem Spirit?

  • ?Wanem nao i gospel blong Jisas Kraes?

  • ?Wanem nao i mesej blong Restoresen? ?From wanem nao i impoten tumas?

  • ?Wanem i responsabiliti blong mi blong mekem i hapen mo bildimap Jos Ia blong Jisas Kraes?

  • ?Olsem wanem nao bae mi save se mi gat sakses olsem wan misinari?

Bigfala Wok blong Yu i blong Tijim Gospel blong Jisas Kraes we I Bin Kambak

I gat ol pipol we oli stap raon long yu. Yu pas bitim olgeta long rod mo travel long medel blong olgeta. Yu visitim olgeta long hom blong olgeta mo konek wetem olgeta onlaen. Oli, evri pikinini blong God—ol brata mo ol sista blong yu. God i lavem olgeta i semmak olsem we Hem lavem yu.

Plante long ol pipol ia oli stap lukaotem wan stamba tingting long laef. Oli gat wari from fiuja blong olgeta mo ol famli blong olgeta. Oli nidim blong filim save se oli pat, we filing ia i kam taem oli save se oli ol pikinini blong God mo oli ol memba blong famli blong Hem we i no save finis. Oli wantem blong filim sef long wan wol we oli valiu blong hem oli stap jenis. Tingting long hat blong olgeta i wantem “pis long olgeta long wol ia mo long laef we i no save finis long wol we i stap kam” (Doktrin mo Ol Kavenan).

Plante oli “no bin save trutok from se oli no bin save wea ples blong faenem” (Doktrin mo Ol Kavenan 123:12). Gospel blong Jisas Kraes, we i bin kambak tru long Profet Josef Smit, i givim ol trutok we oli no save finis. Ol trutok ia oli tokbaot ol nid blong ol pipol long saed blong spirit mo helpem olgeta blong mekem ol tingting blong hat blong olgeta i kam tru.

Olsem wan we i gat raet mo we i ripresentem Jisas Kraes, yu tijim se “fasin blong pemaot man i kam long, mo, tru long Tabu Mesaea” (2 Nifae 2:6). Yu invaetem ol pipol blong kam long Kraes mo blong konvet i kam long Hem mo gospel blong Hem we i bin kambak. Taem oli akseptem invitesen blong yu, bae oli kasem bigfala glad, hop, pis mo stamba tingting blong olgeta.

Ol pipol oli nid blong fet long Sevya, blong kam long Hem. Yu save helpem olgeta blong developem fet ia taem yu:

  • Tijim olgeta abaot gospel blong Jisas Kraes we i bin kambak mo testifae abaot ol trutok blong hem.

  • Invaetem olgeta blong mekem komitmen blong laef folem ol tijing blong hem.

  • Folemap mo helpem olgeta blong tekem aksen folem ol komitmen we oli mekem.

  • Helpem olgeta blong kasem eksperiens we i mekem se oli save filim paoa blong Tabu Spirit (luk long 1 Nifae 10:17–19).

Fet long Jisas Kraes bae i lidim ol pipol blong sakem sin. Blong Hem i ded from ol sin blong yumi, Jisas i mekem fasin blong sakem sin i posibol long yumi. Taem ol pipol oli sakem sin, bae oli kam klin aot long ol sin mo gro i kam moa kolosap long Papa long Heven mo Jisas Kraes. Bae oli gat eksperiens blong gat glad mo pis blong taem oli kasem fogivnes.

Fasin blong sakem sin i mekem rere ol pipol from kavenan blong baptaes mo presen ia we i Tabu Spirit. “Kam long Mi,” Sevya i talem, “mo kasem baptaes long nem blong mi, blong yufala i save kam tabu taem we yufala i kasem Tabu Spirit, blong yufala i save stanap mo yufala i no gat mak long fored blong mi long las dei” (3 Nifae 27:20).

Taem we andasting mo testemoni blong yu abaot Sevya mo Atonmen blong Hem i gro, tingting blong hat blong yu blong wantem serem gospel bae i kam antap. Bae yu filim, olsem we Lihae i bin filim, se “hem i impoten tumas blong talem ol samting ia i go long evri man we oli stap laef long wol” (2 Nifae 2:8).

visen blong Tri blong Laef

Tri blong Laef, i kam long Damir Krivenko.

Stadi blong Yuwan mo Kompanion Stadi

Stadi gud long pikja long pej ia taem yu stadi long visen blong tri blong laef long 1 Nifae 8 mo 11.

  • Wanem nao tri blong laef i ripresentem long visen ia? (Luk long 1 Nifae 11:21–23.)

  • ?Wanem nao Lihae i wantem afta we hem i bin kakae long frut? (Luk long 1 Nifae 8:10–18.)

  • ?Long visen, wanem nao ol pipol oli nid blong mekem blong kakae frut? ?Wanem nao yumi nidim blong mekem blong kasem ol blesing blong Atonmen blong Sevya? ?Long ol wanem wei nao ol komitmen mo ol kavenan oli helpem yumi blong tekpat long ol blesing ia?

  • ?Olsem wanem nao yu save helpem ol narawan blong kakae long ol frut blong gospel?

Atoriti mo Paoa blong Koling blong Yu

Oli bin singaotem yu mo setem apat long yu blong “[talemaot] ol gudfala nius blong bigfala glad, we i gospel we i no gat en.” (Doktrin mo Ol Kavenan 79:1). Olsem ol boe blong Mosaea, yu save tij wetem atoriti mo paoa blong God (luk long Alma 17:2–3).

Tru long daereksen blong Kraes, atoriti blong prijim gospel i bin kambak tru long Profet Josef Smit. Taem oli setem apat yu olsem misinari, yu kasem atoriti ia. Wetem hemia, raet, spesel janis mo responsabiliti blong ripresentem Lod mo tijim gospel blong Hem, bae i kam.

Atoriti ia i tekem tu wan responsabiliti blong stap klin inaf from koling blong yu. Tekem fasin we oli setem apat yu i kam impoten long yu. Stap longwe long sin mo longwe long eni samting we i mekem wan samting o talem wan toktok long wan we bae i harem nogud. Stap longwe long ol wei mo tingting blong wol. Folem ol standet insaed long Ol Misinari Standet blong Ol Disaepol blong Jisas Kraes. Olsem wan we i ripresentem Lod, stap “wan gudfala eksampol blong Ol Kristin Man” (1 Timoti 4:12). Givim ona long nem blong Jisas Kraes tru long ol aksen mo toktok blong yu.

Blong ademap long atoriti, yu nidim paoa long saed blong spirit blong mekem koling blong yu i wok. God i givim ol paoa long saed blong spirit taem oltaem yu wok blong mekem testemoni blong yu i kam strong long Hem, Jisas Kraes mo ol trutok blong gospel we yu tijim. Hem i givim ol paoa long saed blong spirit taem yu prea, stadi long ol skripja, mo lukaotem blong mekem stamba tingting blong yu olsem wan misinari. Hem i givim ol paoa long saed blong Spirit taem yu traehad blong obei long ol komanmen blong Hem mo kipim ol kavenan we yu bin mekem taem yu kasem ol odinens blong sevem man (luk long Doktrin mo Ol Kavenan 35:24).

Paoa long saed blong spirit bae yu luksave taem yu:

Stadi long Ol Skripja

?Olsem wanem nao yu kasem mo mekem wan testemoni i kam strong?

?Olsem wanem ol odinens oli givim paoa long saed blong spirit?

Stadi blong Yuwan

Luklukbak mo tingting hevi long ol kavenan ia we yu bin mekem wetem God. Stadi long ol blesing we God i promesem long olgeta we oli kipim ol kavenan ia. Luklukbak long ol blesing we yu bin kasem taem yu kipim olgeta. Raetemdaon ol filing mo tingting blong yu insaed long stadi jenol blong yu.

Baptaes mo Konfemesen

Prishud Odinesen (blong ol elda)

Tempol Endaomen

  • Laef folem loa blong fasin blong stap obei.

  • Obei long loa blong sakrifaes.

  • Obei long loa blong gospel blong Jisas Kraes.

  • Obei long loa blong jastiti.

  • Obei long loa blong konsekresen.

  • (Luk long Jeneral Hanbuk, 27.2.)

Stadi blong Yuwan mo Kompanion Stadi

Ridim Jon 15:1–16. ?Long wanem wei nao Kraes i olsem rop blong grep? ?Long wanem wei nao yu, yu wan branj blong rop blong grep ia? ?Olsem wanem nao wanem nao blong setem yu apat i go wetem rilesensip ia?

Ridim setifiket blong yu blong seves blong yu. Raetemdaon ol filing mo ol tingting blong yu abaot wanem yu ridim. Evri taem we yu stadi long japta ia, tingting blong stap ripripitim proses ia. Luksave olsem wanem ol filing blong yu oli jenis ova long taem.

Stadi blong Yuwan

Stadi long Doktrin mo Ol Kavenan 109:13–15, 21–30, 38–39, 55–57. Ol ves ia oli karemaot long prea blong dedikesen blong Profet Josef Smit we i kam tru insperesen blong Ketlan Tempol.

Raetem wan lis blong ol blesing we Josef Smit i askem blong olgeta we oli fetful we oli kasem endaomen blong olgeta insaed long tabu haos blong Lod. ?Wanem ol filing we i kam abaot ol blesing ia?

Lukaotem blong Gat Tabu Spirit wetem Yu

Yu kasem presen ia we i Tabu Spirit taem oli konfemem yu olsem wan memba blong Jos. Olsem wan misinari—mo truaot long laef blong yu—wan long ol bigfala nid blong yu, bae hem i blong gat Tabu Spirit i stap wetem yu (luk long 1 Nifae 10:17; 3 Nifae 19:9). Tabu Spirit i nambatri memba blong Godhed.

Tabu Spirit i lidim, tijim mo givim kamfot long yu. Hem i mekem yu kam klin mo mekem yu kam tabu. Hem i testifae abaot trutok mo talemaot witnes long saed blong Papa mo Pikinini. Hem i mekem fasin blong jenisim laef i kam long yu mo olgeta we yu tijim. (Luk long 3 Nifae 27:20; 28:11; Ita 12:41; Moronae 8:26; 10:5; Jon 15:26.)

Tabu Spirit “bae hem i soem long yufala evri samting we bae yufala i mas mekem.” (2 Nifae 32:5). Hem bae i dabdabolem ol janis blong yu mo seves blong yu i bitim hamas we yu save mekem yuwan.

Blong stap lukaotem Tabu Spirit blong i stap wetem yu, i mas kam wan long ol fas tingting blong hat blong yu. Bae yu filim Hem i stap olsem kompanion blong yu taem yu:

Presiden Russell M. Nelson

“Mi plis long yufala blong kam antap long paoa blong yufala long saed blong spirit blong kasem revelesen. … Jusum blong mekem wok long saed blong spirit we bae i mekem yu gat presen we i Tabu Spirit mo harem voes blong Spirit plante taem moa, mo moa klia” (Russell M. Nelson, “Revelesen blong Jos, Revelesen blong Laef blong Yumi,” Liahona, Mei 2018, 96).

Lanem blong Luksave Spirit

Bae yu kam moa gud taem yu stap mekem stamba tingting blong yu olsem wan misinari i kam tru, taem yu lanem blong folem daereksen we i kam tru long Tabu Spirit. Oltaem Spirit i stap toktok long kwaet voes, tru ol filing mo tingting blong yu. Givim fultaem blong yu blong stap lukaotem, stap luksave, mo stap folem naesfala kwaet voes blong spirit. Oli kam long plante defdefren wei (luk long japta 4; luk tu long Doktrin mo Ol Kavenan 8:2–3; 11:12–14; Galesia 5:22–23).

Tij wetem Spirit

Gospel blong Jisas Kraes hem i “paoa blong God blong sevem olgeta man we oli bilif long hem” (Rom 1:16). From risen ia, oli nid blong tijim mesej blong Restoresen blong gospel tru long tabu paoa—paoa blong Tabu Spirit.

Lod i talem, “bae mi givim Spirit long yufala tru long prea blong fet; mo sapos yufala i no kasem Spirit, bae yufala i no save tij.” (Doktrin mo Ol Kavenan 42:14; luk tu long 50:13–14, 17–22). Taem yu tij tru long paoa blong Tabu Spirit, Hem bae i:

  • Tijim yu trutok mo bae hem i save mekem yu tingbaot bakegen ol samting we yu bin stadi long olgeta (luk long Jon 14:26).

  • Givim ol toktok long yu blong talem long taem we yu nidim olgeta (luk long Doktrin mo Ol Kavenan 84:85).

  • Karem mesej i go long hat blong ol pipol we yu tijim (luk long 2 Nifae 33:1).

  • Helpem yu—mo olgeta we oli kasem tru long Spirit—blong andastanem wanwan long olgeta mo kam antap mo stap glad tugeta (luk long Doktrin mo Ol Kavenan 50:17–22).

  • Testifae long trutok we i fulwan abaot mesej blong yu mo konfemem ol toktok blong yu long olgeta we oli akseptem yu (luk long Doktrin mo Ol Kavenan 100:5–8).

Lod bae i blesem yu bigwan taem yu lukaotem, dipen long, mo tij tru long Tabu Spirit (luk long ol japta 4 mo 10).

Wan afta Wan, i kam long Walter Rane

Gospel blong Kraes mo Doktrin blong Kraes

Gospel blong Jisas Kraes i talem tugeta mining blong mesej mo stamba tingting blong yu. I talem tugeta “wanem” mo “from wanem” yu stap givim seves olsem wan misinari. Gospel blong Hem i gat evri doktrin, ol prisibol, ol loa, ol komanmen, ol odinens mo ol kavenan we oli nidim blong sevem man mo blong kam olsem god.

Mesej blong gospel i we yumi save kasem paoa blong Jisas Kraes blong sevem man mo pemaot man long sin i kam taem yumi praktisim fet long Hem, stap sakem sin, kasem baptaes, kasem presen ia we i Tabu Spirit, mo stap strong kasem en (luk long 3 Nifae 27:13–22).

Oli save hemia olsem doktrin blong Kraes. Blong stap laef folem doktrin ia, hem i olsem wanem yumi kam long Kraes mo blong oli sevem yumi (luk long 1 Nifae 15:14). Hemia oli tijim wetem paoa insaed long Buk blong Momon (luk long 2 Nifae 31; 32:1–6; 3 Nifae 11:31–40). Stamba tingting blong yu i blong helpem ol pipol blong kam long Kraes taem yu stap helpem olgeta blong laef folem doktrin blong Hem.

Haeram Smit

“Prijim ol fas prinsipol blong Gospel—prij long olgeta bakegen mo bakegen: bae yu faenem se, dei afta dei, ol niu aedia mo sam moa laet long saed blong ol samting ia bae oli kam long yu long revelesen. Tingting blong yu i save kam bigwan … blong yu andastanem olgeta klia moa. Mo afta, bae yu mekem i kam moa klia long olgeta we yu stap tijim olgeta” (Hyrum Smith, long Histri, 1838–1856, buk E-1 [1 July 1843–30 April 1844], 1994, josephsmithpapers.org).

Stadi long Ol Skripja

?Wanem nao ol skripja ia mo ofisol toktok oli tijim abaot gospel blong Jisas Kraes mo doktrin blong Kraes? Mekem ol not insaed long stadi jenol blong yu blong helpem yu andastanem mo tingbaot.

Paoa blong Konvet insaed long Buk blong Momon, i kam long Ben Sowards

Fet long Jisas Kraes

Fet i fandesen blong evri narafala prinsipol blong gospel. Hem i wan prinsipol blong aksen mo paoa.

Fet blong yumi i nidim Jisas Kraes blong i stap long medel, blong i save sevem yumi. Sevya i tijim, “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis” (Jon 3:16).

Fet long Jisas Kraes i blong gat tu biliv ia se Hem i Wan Stret Pikinini Ia Nomo blong God. Hem i blong stap trastem Hem olsem Sevya mo Ridima blong yumi (luk long Mosaea 3:17; 4:6–10; Alma 5:7–15). Hem i blong gat ful tras long Hem mo toktok blong Hem, ol tijing, mo ol promes blong Hem. Fet blong yumi i stap gro taem yumi folem ol tijing blong Hem mo eksampol wetem evri tingting blong hat (luk long 2 Nifae 31:6–13; 3 Nifae 27:21–22).

Olsem wan misinari, helpem ol pipol blong mekem mo kipim ol komitmen we oli bildim fet blong olgeta long Jisas Kraes. Ol komitmen ia oli mekem olgeta oli rere blong kasem ol odinens mo mekem mo kipim ol tabu kavenan wetem God.

Fasin blong Sakem Sin

Fet long Jisas Kraes i lidim yumi blong sakem sin (luk long Hileman 14:13). Fasin blong sakem sin i stap long rod ia blong stap tanem yu longwe long sin. Taem yumi sakem sin, ol aksen blong yumi, ol tingting blong hat mo tingting blong yumi oli jenis i kam blong stap wan moa wetem tingting blong God.

Tru long sakrifaes mo atonmen blong Hem, Sevya i pemaot praes blong ol sin blong yumi (luk long Mosaea 15:9; Alma 34:15–17). Taem yumi sakem sin, yumi save kasem fogivnes tru long Jisas Kraes mo sakrifaes blong Hem, from Hem i askem ol raet blong Hem blong sore blong olgeta we oli wantem blong sakem sin (luk long Moronae 7:27–28). Insaed long ol toktok blong Lihae, “fasin blong pemaot man i kam long … tru long Tabu Mesaea from hem i fulap long gladhat mo trutok.” (2 Nifae 2:6, 8).

Fasin blong sakem sin i moa bitim blong stap praktisim blong mekem wan samting blong jenisim wan fasin o winim wan samting we yumi no strong long hem. Fasin blong sakem sin i blong tanem yu i go long Kraes wetem tru hat, we i givim long yumi paoa blong gat wan “bigfala jenis” long hat blong yumi (luk long Alma 5:12–14). Hemia i tekem tu fasin blong givim hat blong yumi we i stap daon long Spirit mo letem tingting blong God i wok long yumi. Taem yumi sakem sin, yumi kam antap long komitmen blong yumi blong givim seves long God mo obei long ol komanmen blong Hem. Yumi stap bon bakegen long saed blong spirit long Kraes.

Fasin blong sakem sin i wan positif prinsibol we i givim glad mo pis. Hemia i tekem yumi i kam “long paoa blong Ridima, mekem se hem i save sevem sol blong [yumi]” (Hileman 5:11).

Gat strong paoa long tingting mo lavem blong stap helpem ol pipol blong andastanem from wanem oli mas sakem sin. Taem yu stap invaetem ol pipol we yu tijim blong mekem ol komitmen, yu invaetem olgeta blong sakem sin mo givim hop long olgeta.

Stadi long Ol Skripja

?Wanem nao yu save lanem aot long ol skripja ia abaot stap talemaot fasin blong sakem sin?

Baptaes

Fet long Jisas Kraes mo fasin blong sakem sin i mekem rere yumi blong kasem odinens blong baptaes. “Ol fasfala frut blong fasin blong sakem sin i baptaes” (Moronae 8:25). Yumi kam insaed long get blong laef we i no save finis taem yumi kasem baptaes andanit long wota tru long wan we i gat atoriti blong God.

Taem yumi kasem baptaes, yumi mekem wan kavenan wetem God. Taem yumi kipim kavenan ia, God i promesem blong givim Tabu Spirit olsem kompanion blong yumi, fogivim ol sin blong yumi, mo givim membasip blong yumi insaed long Jos Ia blong Jisas Kraes (luk long Doktrin mo Ol Kavenan 20:77, 79; Moronae 6:4). Yumi kam tugeta long Lod mo bon long saed blong spirit tru long odinens we i givim bigfala glad mo hop.

Blong stap baptaesem mo mekem konfemesen blong ol pipol, oli stamba blong wok blong yu olsem wan misinari. Helpem olgeta blong andastanem se blong kwalifae from baptaes, oli nidim blong folem ol kondisen long Doktrin mo Ol Kavenan 20:37.

Kompanion Stadi

Lukaotem ol skripja ia:

Folem stadi blong yu long ol skripja antap ia, mekem tu lis we yu raetem:

  1. Ol samting we wan i nid blong mekem blong baptaes

  2. Ol kavenan we oli bin mekem long taem blong baptaes

Toktok raon wetem kompanion blong yu blong olsem wanem blong tijim hemia long narawan.

Konfemesen mo presen we i Tabu Spirit.

Baptaes i kam long tu pat: baptaes long wota mo baptaes long Spirit. Afta we yumi baptaes long wota, baptaes ia bae i komplit taem oli mekem konfemesen blong yumi tru olgeta we oli gat atoriti blong God oli putum han antap long hed blong yumi. Tru long konfemesen, yumi save kasem presen ia we i Tabu Spirit mo gohed blong stap klin long ol sin blong yumi.

Profet Josef Smit i bin tijim se, “Baptaes andanit long wota, hem i wan haf baptaes, mo i no gat yus sapos i no gat nara haf blong hem—we i baptaes blong Tabu Spirit” (Teachings of Presidents of the Church: Joseph Smith [2007], 95).

Alma i bin talem se, “Evri man, … oli mas bon bakegen; yes, oli mas bon long God, oli mas jenis long fasin blong wol mo fasin blong foldaon blong olgeta we oli stap long hem, i go long wan stret mo gud fasin, from God i bin pemaot olgeta, mo oli kam ol boe mo ol gel blong hem” (Mosaea 27:25–26).

Blong hem we i sakem sin, baptaes long wota mo long Spirit i blong bon bakegen long saed blong spirit.

Stadi long Ol Skripja

?Wanem i sam long olgeta blesing blong stap get presen Ia we I Tabu Spirit?

?From wanem nao yumi mas wantem blong gat presen ia we i Tabu Spirit?

Stap Strong kasem En

Blong stap folem Jisas Kraes, i wan rod blong folem blong wan ful laeftaem komitmen. Yumi stap strong kasem en taem yumi gohed blong praktisim fet long Jisas Kraes truaot long laef blong yumi, sakem sin evri dei, kasem evri odinens mo ol kavenan blong gospel, kipim ol kavenan ia, mo gat Tabu Spirit olsem kompanion blong yumi. Hemia i minim tu blong stap mekem i kam niu bakegen ol kavenan we yumi bin mekem tru taem yumi stap tekem sakramen.

Hae God I Stap Lukaot Gud long Mi Olsem We Mi Mi Sipsip blong Hem, i kam long Yongsung Kim

Lod I Stap Lukaot Gud long Mi Olsem We Mi Mi Sipsip blong Hem.”, i kam long Yongsung Kim. Pikja blong Havenlight wetem respek.

Gospel—Rod blong Papa long Heven we I Gobak long Hem

Gospel blong Jisas Kraes i save jenisim wei we yumi stap laef long hem mo jenisim huia we yumi bin kam. Ol prinsipol blong hem oli no ol step nomo we yumi eksperiensem wantaem long laef blong yumi. Taem yumi ripitim olgeta truaot long laef blong yumi, oli tekem yumi kam moa kolosap long God mo blong kam wan paten we i kam kam antap mo i stap blesem yumi long laef ia. Oli givim pis, hiling mo fogivnes. Oli givim tu mining blong rod we Papa long Heven i bin givim long yumi blong kasem laef we i no save finis.

Gospel blong Jisas Kraes i lidim yu long olsem wanem bae yu wok olsem wan misinari. Hemia i lukluk nomo long ol efot blong yu. Helpem ol pipol blong oli save gat fet long Jisas Kraes blong oli save sakem sin (luk long Alma 34:15–17). Tijim mo testifae se gospel blong Jisas Kraes we i i fulwan mo atoriti blong prishud i bin kambak bakegen. Invaetem ol pipol blong kasem baptaes mo laef folem ol tijing blong Sevya.

Gospel blong Jisas Kraes I Blesem Evri Pikinini blong God

Gospel blong Jisas Kraes hem i blong evri pikinini blong God. Ol skripja oli tijim se “evriwan i semmak” long God. Hem i stap invaetem “evriwan long yumi, “blong kam long hem mo tekpat long gud fasin blong hem; mo hem i no tanem baksaed blong hem long eniwan we i kam long hem” (2 Nifae 26:33).

Gospel i blesem yumi truaot long laef blong yumi long wol ia mo truaot long taem we i no save finis. Bae i posibol blong yumi evriwan i stap hapi—tugeta olsem yumi wanwan mo olsem ol famli—taem yumi laef folem ol tijing blong Jisas Kraes (luk long Mosaea 2:41; “Famli: Wan Ofisol Toktok I Go long Wol,” ChurchofJesusChrist.org). Blong stap laef folem gospel, i mekem glad blong yumi i kam bigwan, i givim insperesen long ol aksen blong yumi mo mekem ol rilesensip i kam moa strong.

Wan long ol bigfala mesej blong gospel we i bin kambak i we yumi evriwan i pat blong famli blong God. Yumi ol pikinini boe mo gel blong Hem we Hem i lavem tumas. Nomata long ol famli situesen blong yumi long wol, wanwan long yumi i wan memba blong famli blong God.

Wan narafala pat blong mesej blong yumi i we ol famli oli save joen tugeta blong taem we i no save finis. Famle, God nao i odenem. Ol Lata-dei profet oli bin tijim se:

“Tabu plan blong [Papa long Heven] blong stap hapi, i mekem se fasin blong holem taet famli tugeta i save gohed afta long ded. Ol tabu odinens mo ol kavenan we i gat insaed long ol tabu tempol i mekem rod i klia long wanwan man o woman i save go bak long wea ples God i stap mo ol famli i save joen tugeta kasem taem we i no save finis” (“Famli: Wan Ofisol Toktok I Go long Wol”).

Plante pipol oli no gat tumas janis blong mared o gat wan famli we i lavem olgeta o gat gudfala rilesensip. Plante oli bin eksperiensem divos mo ol narafala had situesen blong famli. Be, gospel i blesem yumi wanwan nomata i gat ol situesen blong famli. Taem yumi stap fetful, bae God i mekem wan wei blong yumi kasem ol blesing blong gat ol famli we oli lavem yumi, nomata se long laef ia o long laef we i stap kam (luk long Mosaea 2:41).

Mesej blong Restoresen: Fandesen blong Fet

Nomata huia yu givim seves long hem o yu tijim, putum Jisas Kraes long medel blong tijing blong yu mo Restoresen blong gospel blong Hem. Taem yu stadi long doktrin long ol lesen blong misinari, bae yu luk se yumi gat wan mesej: Jisas Kraes, Sevya mo Ridima blong yumi. Tru long wan profet blong taem tedei, Papa long Heven i bin putumbak save ia abaot plan ia blong Hem blong sevem man. Jisas Kraes i stap long medel blong plan ia. Tru long atonmen mo sakrifaes blong Hem, Sevya i mekem i posibol blong sevem yumi aot long sin mo ded mo kambak long Hem.

Helpem ol pipol we yu tijim blong andastanem olgeta samting ia:

  • God, Hem i stret Papa blong yumi long Heven. Hem i lavem yumi, fulwan. Evri man mo woman long wol oli wan pikinini blong God mo wan memba blong famli blong Hem.

  • Papa long Heven i mekem wan plan blong yumi blong kasem wan bodi we i nomo save ded mo laef we i no save finis (luk long Moses 1:39). Yumi kam long wol blong lan, gro mo rere from ol blesing blong Hem we i fulwan.

  • Olsem pat blong plan blong Hem, Papa long Heven i bin givim ol komanmen blong lidim yumi long laef ia mo helpem yumi blong gobak long Hem (luk long, eksampol, Eksodas 20:3–17).

  • Long laef ia, yumi evriwan i mekem sin mo bae yumi evriwan i ded. From lav blong Papa long Heven we i gat long yumi, Hem i sendem Pikinini blong Hem, Jisas Kraes, blong pemaot yumi long sin mo ded.

  • From atonmen mo sakrifaes blong Jisas, yumi save klina aot long ol sin blong yumi taem yumi sakem sin mo yumi kasem baptaes mo konfemesen. Hemia i givim pis long yumi mo i mekem i posibol blong yumi gobak long ples we God i stap long hem mo kasem glad we i fulwan.

  • From Laef Bakegen long Ded blong Jisas Kraes, bae yumi evriwan i laef bakegen afta long ded. Hemia i minim se wanwan spirit mo bodi blong wan man o woman bae oli joen bakegen mo laef blong oltaem.

  • Truaot long baebol histri, Lod i taltalemaot gospel blong Hem mo oganaesem Jos blong Hem tru long ol profet. Plante taem, plante pipol oli no akseptem. Wan paten blong long saed blong spirit i foldaon mo nid ia blong putumbak, i stat long taem blong OlTesteman.

  • Afta long ded mo Laef Bakegen blong Sevya, Ol Aposol blong Hem oli lidim Jos blong wan sot taem. Long en, oli ded, prishud atoriti i lus, mo i gat wan narafala foldaon blong ol tijing blong Sevya. Ol pipol oli jenisim doktrin mo ol odinens.

  • Gospel blong Jisas Kraes i kambak bakegen long wol tru long Papa long Heven tru long Profet Josef Smit. Papa long Heven mo Jisas Kraes, Tufala i kamkamaot long Josef long spring blong 1820. Afta long taem ia, Josef Smit i kasem prishud atoriti mo hem i kasem daereksen blong oganaesem Jos Ia blong Jisas Kraes long wol.

Tijim se Jos Ia blong Jisas Kraes i no wan narafala rilijin nomo. O i wan jos blong Amerika. Be, hem i restoresen blong “gospel we i fulwan” blong Jisas Kraes (Doktrin mo Ol Kavenan 1:23). Bae oli nomo save karemaot long wol ia bakegen.

Buk blong Momon: Wan Narafala Testeman blong Jisas Kraes i talemaot witnes abaot Jisas Kraes mo tabu misin blong Hem olsem Sevya blong wol. Hem i wan witnes tu we i fulap wetem paoa se Jisas Kraes i bin putumbak gospel mo Jos blong Hem tru long Profet Josef Smit. Invaetem mo helpem ol pipol blong ridim Buk blong Momon mo prea abaot mesej we i stap insaed.

Trastem nambawan promes long Moronae 10:3–5. Leftemap tingting blong ol pipol blong askem wetem tru hat mo wetem strong tingting blong save sapos Buk blong Momon i toktok blong God. Prea wetem strong tingting i minim blong wantem blong tekem aksen folem ansa we bae i kam tru long witnes blong Tabu Spirit. Witnes ia bae i kam fandesen blong fet blong man o woman ia se Kraes i bin putumbak Jos Ia blong Hem. Helpem olgeta we yu tijim blong lukaotem ansa we i kam long saed blong spirit.

Stadi long Ol Skripja

?Olsem wanem nao bae yu yusum Buk blong Momon long misinari wok?

Stadi blong Yuwan

Pikjarem long maen blong yu se bae yu raetem wan paragraf abaot mesej blong Restoresen blong sosol midia o blong wan lokol nius. Insaed long stadi jenol blong yu, raetem wan taetol we i tokbaot stamba mesej. Afta, raetemdaon ol tingting mo ol filing blong yu abaot mesej ia. Raetem tu se hamas we yu save andastanem i jenisim yu moa bitim wei we yu stap laef mo lukluk blong yu long ol samting we i stap raonem yu long wol.

Stanemap mo Bildimap Jos

Taem we Jisas Kraes i putumbak Jos blong Hem, Hem i givim instraksen long Profet Josef Smit mo ol nara wan blong “stanemap” mo “bildimap” (Doktrin mo Ol Kavenan 31:7; 39:13). Jos i stanap mo oli bildimap tru long ol pipol we oli gat ol testemoni mo oli baptaes mo kasem konfemesen, kipim ol kavenan blong olgeta, rere blong go long tempol, mo help blong mekem wod o branj blong olgeta i kam strong.

wan man i stap prea

olsem wan misinari, yu helpem blong stanemap mo bildimap Jos blong Sevya. I gat plante wei we yu save mekem hemia. Yu save givim sapot long ol memba taem oli serem gospel tru long ol prinsipol blong stap lavem, stap serem, mo stap invaetem (luk long Jeneral Hanbuk, 23.1). Yu save helpem ol pipol blong kasem baptaes mo kam antap long fet blong olgeta. Yu save helpem ol niufala memba blong mekem ol jenis long niufala laef blong olgeta mo gohed blong kam antap long saed blong spirit. Yu save helpem tu ol memba we oli stap kambak blong mekem fet blong olgeta long Jisas Kraes i kam strong.

Ol niufala memba mo ol memba we oli stap kambak bae oli kam antap long testemoni mo fet blong olgeta taem we oli eksperiensem gospel i stap wok insaed long laef blong olgeta. Blong help blong mekem hemia i hapen, hem i impoten se oli:

  • Gat ol fren we oli memba blong Jos.

  • Oli givim wan responsabiliti long olgeta insaed long Jos.

  • Oli gohed blong kam antap wetem toktok blong God.

(Luk long Gordon B. Hinckley, “Converts mo Young Men,” Ensign, May 1997, 47.)

Ol misinari, ol lokol lida, ,paoa ol narafala memba blong Jos oli mas glad blong akseptem janis ia blong givhan mo mekem olgeta niu mo ol memba we oli stap kambak oli kam moa strong. Seves ia i stap help blong “holemtaet olgeta i stap long stret rod” (Moronae 6:4).

Go Mekem Gudfala Samting i hapen

Long taem blong seves blong Hem long wol ia, Sevya i givim seves long ol narafala man. Hem i go olbaot “o stap mekem gudfala wok” mo “stap prijim gospel ” (Ol Wok 10:38; Matiu 4:23). Taem yu folem eksampol blong Hem, bae yu faenem ol pipol we yu save givim seves long olgeta mo we bae oli akseptem yu.

Tru long seves, yu mekem i hapen tufala bigfala komanmen blong lavem God mo blong lavem neba blong yu (luk long Matiu 22:36–40; 25:40; Mosaea 2:17). Tru long seves, bae yu mo ol narafala wan i save kam tugeta long wan wei we i givim paoa mo insperesen.

Olsem wan misinari, yu givim seves we yu mekem plan from evri wik (luk long Ol Misinari Standet, 2.7 mo 7.2, blong kasem moa infomesen mo ol gaedlaen). Folem daereksen blong misin presiden blong yu, bae yu save faenem ol janis blong givim seves insaed long komuniti tru long JustServe (sapos oli agri) mo sapot we i kam long Jos Yumaniterian.

Truaot long evri dei, prea mo lukaotem ol janis we yu no mekem plan from blong mekem gud samting. Lisin long Spirit blong luksave ol taem we yu save mekem wan smol aksen blong stap kaen we yu save mekem.

Presiden Godon B. Hinckley

“?Yu yu wantem blong stap hapi? Fogetem yuwan mo go lus insaed long bigfala wok ia. Givim efot blong yu blong stap helpem ol pipol. … Stanap antap, leftemap olgeta we Nifae blong olgeta i kam slak, leftemap han blong olgeta we han i hangdaon. Laef folem gospel blong Jisas Kraes” (Gordon B. Hinckley, Teachings of Presidents of the Church: Gordon B. Hinckley [2016], 209).

Stadi long Ol Skripja

?Wanem nao rol blong seves long laef blong Sevya?

?Wanem nao rol blong seves long misin blong Amon mo Eron?

?Wanem nao Lod i askem yu blong mekem?

Wan Misinari we I Gat Sakses

Sakses blong yu olsem wan misinari oli luksave faswan tru long tingting blong hat blong yu mo komitmen blong yu blong faenem, tijim, blong baptaesem mo konfemem ol konvet mo blong helpem olgeta blong kam ol fetful disaepol blong Kraes mo kam ol memba blong Jos blong Hem Alma 41:3).

Sakses blong yu oli no luk long hamas pipol we yu tijim o help blong takem oli kam baptaes. O blong oli luk long ol posisen we yu tekem blong stap wan lida.

Sakses blong yu i no dipen long hamas ol narawan oli ansa long yu long ol invitesen blong yu, o long ol aksen blong yu we i kam wetem aksen blong soem fasin blong stap kaen. Ol pipol oli fri blong mekem ol joes, blong akseptem mesej blong gospel o no gat. Responsabiliti blong yu i blong tij i klia mo wetem paoa mekem se oli save mekem wan raet joes we bae i blesem olgeta.

Tingbaot parabol blong Sevya abaot ol talen long Matiu 25:14–28. Masta we i ripresentem Lod, hem i presem tugeta fetful wokman blong hem nomata se saes blong ofring blong tufala i defdefren (luk long Matiu 25:21, 23). Mo tu bae Hem i givim long tugeta semmak riwod nomo, invaetem olgeta blong “kam long glad blong lod” from se oli givim ona long wanem we oli givim long olgeta.

God i bin givim ol talen mo ol presen long yu blong yu yusum long seves blong Hem. Ol talen mo ol presen blong yu oli defren long ol nara man. Luksave se evri samting ia oli impoten, we i tekem tu olgeta we oli no save luk olgeta. Taem yu givim fulwan ol talen mo ol presen blong yu long Hem, bae Hem i givim ona long olgeta mo mekem ol merikel long wanem we yu givim.

Stap longwe long fasin blong komperem yu wetem ol narafala misinari mo stap skelem risal blong ol hadwok blong yu wetem blong olgeta. Fasin blong stap komperem samting i lid i go long ol risal we i no gud, olsem mekem tingting i kam slak o gat hae tingting. Blong stap komperem samting, oltaem i save lidim yu i rong. Wanem we Lod i wantem hem i, bes efot blong yuwan—blong yu blong “wok blong hem wetem ful hat blong yu ful paoa blong tingting, ful maen mo ful paoa blong yu” (Doktrin mo Ol Kavenan 4:2; Oli ademap italik).

Bae yu save harem nogud sapos ol pipol oli no akseptem gospel yet. Samtaem tingting blong yu bae i foldaon. Iven sam long ol gudfala misinari mo ol profet insaed long ol skripja, samtaem oli bin filim se tingting blong olgeta i kam slak (luk long 2 Nifae 4:17–19; Alma 26:27). Long ol kaen taem olsem, folem eksampol blong Nifae taem yu tanem yu i go long Lod, putum tras blong yu long Hem, stap prea blong kasem paoa, mo stap tingbaot ol gudfala samting we Hem i bin mekem blong yu (luk long 2 Nifae 4:16–35).

tu misinari i stap prea

Taem yu tanem yu i go long Lod long ol taem blong ol hadtaem, Hem i bin promesem se “!Mi bambae mi mekem yufala i strong! !Mi bambae mi givhan long yufala! !Mi bambae mi blokem gud yufala” (Aesea 41:10). Taem yu stap praktisim fet long Kraes, yu save faenem pis mo gat wan stret hop abaot ol hadwok blong yu. Fet bae i helpem yu blong wokbaot fored mo gohed wetem tingting blong hat we i stret mo klin.

Putum tingting blong yu i stap nomo long komitmen blong long Kraes mo stamba tingting blong yu olsem wan misinari—be i no long wanem we man i save luk. Ol risal ia, plante taem man i save luksave kwiktaem. Long semmak taem, holemtaet ol bigfala plan o gol nomata long ol jalenj we yu fesem. Fasin blong wok blong yu bae i kam moa gud, tingting blong hat mo janis blong folem Spirit bae i kam antap tru long ol bigfala gol we yu putum.

Sam long ol wei we yu save skelem ol komitmen blong yu long Lod mo ol hadwok blong yu blong stap wan misinari we i gat sakses, oli aotlaenem andanit ia.

Taem yu bin mekem bes blong yu, maet bae yu gat yet ol tingting we i foldaon, be bae yu no slakem tingting blong long yuwan. Bae yu kasem wan stret save se Lod i glad taem yu filim Spirit i stap wok tru long yu.

Stadi long Ol Skripja

?Wanem filing blong ol wokman blong Lod abaot wok? ?Long wanem wei nao ol wokman blong Lod oli save jenisim laef blong olgeta we oli stap givim seves long olgeta? ?Wanem nao filing blong yu abaot wok ia?

Stadi blong Yuwan

  • Ridim Hileman 10:1–5 mo 3 Nifae 7:17–18. ?Wanem nao Lod i filim abaot ol misinari ia mo seves blong olgeta?

  • Tingbaot ol hadwok blong Abinadae mo Amon taem tufala i wan misinari (luk long Mosaea 11–18; Alma 17–20; 23–24). ?From wanem tugeta kaen misinari Lod i akseptem olgeta nomata se ol risal blong ol hadwok blong olgeta oli defdefren?

  • raetemdaon wanem we yu lanem insaed long stadi jenol blong yu.

Ol Aedia blong Stadi mo Yusum

Stadi blong Yuwan

  • Tingting long wanem i minim blong leftemap voes blong woning (luk long Jekob 3:12; Doktrin mo Ol Kavenan 1:4; 38:41; 63:57–58; 88:81; 112:5; Esikel 3:17–21; 33:1–12). Raetem long toktok blong yuwan wanem i minim mo olsem wanem yu save mekem.

  • Tingting long ol samting we oli stap hapen long laef blong yu we i bin mekem testemoni blong i kam strong abaot Josef Smit mo Restoresen. Raetemdaon ol filing mo tingting blong yu.

Kompanion Stadi mo Dei blong Jenisim Kompanion

  • Jusumaot wan long ol gudfala misinari, mo ridim ol sk we oli mekem lis blong hem. Taem yu rid, tokbaot olsem wanem misinari ia i (1) i andastanem mo putum ful tingting blong hem long koling blong hem, (2) i soemaot fasin mo tingting blong hat blong hem long wok ia, mo (3) helpem ol narawan blong akseptem gospel.

  • Jusum tu singsing abaot Restoresen blong gospel. Ridim o singsing ol hym. Tokbaot mining blong ol toktok.

Distrik Kaonsel, Ol Son Konfrens, mo Misin Lidasip Kaonsel

  • Invaetem tu o tri niufala konvet blong serem ol eksperiens blong olgeta taem oli bin jenisim laef blong olgeta. ?Wanem nao filing blong olgeta abaot ol misinari? ?Wanem nao oli bin filim abaot wanem we ol misinari oli bin tijim? ?Wanem i helpem olgeta blong kipim ol komitmen blong olgeta? ?Wanem nao i bin jenisim bigwan laef blong olgeta?

  • Sam dei bifo long miting, givim wok long sam misinari blong oli tingting hevi long sam kwestin we oli jusum long “Tingting long Hemia” long stat blong japta ia. Askem wanwan misinari blong rere long wan tu o tri minit toktok long kwestin we oli asaenem long hem. Long taem blong distrik kaonsel o son konfrens, invaetem ol misinari blong serem ol toktok blong olgeta. Afta long ol toktok, toktok raon long wanem oli bin lanem mo olsem wanem oli save yusum long misinari wok.

  • Seraotem ol misinari i go long fo grup. Askem wanwan grup blong mekem lis blong hamas ol trutok we oli save faenem, ol kavenan mo ol odinens we oli bin kambak bakegen mo Profet Josef Smit i bin taltalemaot. Askem wanwan grup blong serem lis blong olgeta. Invaetem ol misinari blong serem wanem oli filim abaot eni trutok we i kam tru long Restoresen, we i bin jenisim laef blong olgeta.

  • Toktok raon long wanem i minim blong stap wan misinari we i gat sakses. Invaetem ol misinari blong tokbaot ol spesel eksampol.

Ol Misin Lida mo Ol Misin Kaonsela

  • Long taem blong ol intaviu long ol storian wetem ol misinari, oltaem askem long olgeta blong serem wetem yu:

    • Testemoni blong olgeta abaot Jisas Kraes.

    • Testemoni blong olgeta abaot gospel we i bin kambak bakegen mo misin blong Josef Smit.

    • Testemoni blong olgeta abaot Buk blong Momon.

    • Ol tingting blong olgeta abaot stamba tingting blong olgeta olsem wan misinari.

  • Invaetem ol misinari blong raetemdaon long stadi jenol blong olgeta wanem oli filim we oli sam long ol stamba tingting blong misin blong olgeta. Long taem blong wan intaviu o wan storian, askem olgeta blong serem wanem we oli bin raetemdaon.

  • Sendem wan leta blong kongratulesen long ol niufala memba.