Japta 13: Wok Wan wetem Ol Lida mo Ol Memba blong Stanemap Jos
“Japta 13: Wok Wan wetem Ol Lida mo Ol Memba blong Stanemap Jos,” Prijim Gospel blong Mi: Wan Gaed blong Stap Serem Gospel blong Jisas Kraes (2023)
“Japta 13,” Prijim Gospel blong Mi
Pikja
Yufala I Harem Hem, i kam long Simon Dewey
Japta 13
Wok Wan wetem Ol Lida mo Ol Memba blong Stanemap Jos
Tingting long Hemia
?Olsem wanem bae mi wok wetem ol lida mo ol memba blong stanemap Jos?
?Wanem nao ol wok blong ol lida blong stek mo wod insaed long misinari wok?
?Wanem i mas tekem ples long kodinesen miting blong evri wik wetem ol lida blong wod?
?Olsem wanem mi save sapotem ol lida blong serem gospel mo mekem ol niu memba mo olgeta we oli stap kambak oli kam strong?
Ol misinari oli wok wetem ol lokol lida mo memba blong faenem pipol blong tijim mo lidim olgeta i go long Sevya. Yufala i kam wan tru long lav blong yufala long God mo ol pikinini blong Hem. Hem bae i mekem hadwok blong yufala i kam long wan level we yufala i wok wan wetem ol lokol lida mo memba. Mekem ol plan mo gol blong wok wetem olgeta i kam wan impoten pat blong wok blong yu.
Taem yu kam blong save mo lavem ol lokol lida mo memba, bae yu luk ol rod yu save sapotem olgeta long ol koling mo misinari wok blong olgeta. Givimaot ol presen mo talen blong yu long ol wei we i leftemap mo mekem olgeta i kam strong.
Japta ia i eksplenem olsem wanem yu save wok wetem ol memba blong serem gospel mo mekem ol niu memba mo olgeta we oli stap kambak oli kam strong. Blong gat moa infomesen, luk long japta 23 long Jeneral Hanbuk.
Stadi blong Yuwan mo Kompanion Stadi
Lukluk bak long stori blong King Lamonae taem laef blong hem, blong waef blong hem, mo ol pipol blong hem i jenis long Alma 18–19.
?Wanem nao Hem i rol blong Abis long stori ia? ?Wanem nao Abis i save mekem we Amon i no save mekem?
?Wanem yu lanem long eksampol blong hem abaot ol memba mo ol misinari oli stap wok tugeta?
Tingting long ol nara eksampol ia blong ol memba oli stap help wetem misinari wok:
?Olsem wanem yu save leftemap tingting blong ol lida mo ol memba blong folem eksampol blong olgeta ia?
Bildim Rilesensip wetem Ol Lokol Lida mo Memba
Ol Lokol Jos lida mo memba oli ol patna blong yu long wok blong God. Bildim ol rilesensip we bae i helpem yufala i wok tugeta blong karem gospel we i kambak i go long ol pikinini blong Papa long Heven. Ol rilesensip ia oli save blesem yu oltaem long laef ia.
Bildim tras mo gudfala frensip wetem ol lokol lida mo memba. Visitim olgeta mo lan abaot famli blong olgeta, ol bakgraon, ol intres, mo jos eksperiens. Gat gudfala intres long laef blong olgeta.
Taem yu visitim olgeta, mekem wetem wan stamba tingting. Soem se yu rili laekem blong mekem wok blong faenem man blong tijim. Respektem taem blong olgeta mo taem tebol blong olgeta.
Taem yu mitim o tijim gospel long hom blong olgeta, lukaotem blong helpem olgeta blong mekem fet blong olgeta i strong. Prea blong gat Spirit wetem yu. Serem ol eksperiens yu gat long misinari wok long eria blong yu.
Pikja
Grup miting
Sapotem Ol Lokol Lida Long Rol blong Olgeta
Sam lidasip koling oli gat ol responsabiliti blong misinari wok. Taem yu andastanem ol responsabiliti ia bae i helpem yu blong yu sapotem ol lida ia. Ol eksplenesen we i stap ia oli kam long japta 23 long Jeneral Hanbuk.
Stek presiden: I holem ol prishud ki long stek blong serem gospel mo mekem ol memba we oli stap kambak oli kam strong. Hem mo ol kaonsela blong hem, oli givim daereksen blong ol wok ia.
Bisoprik: I wok tugeta wetem presidensi blong kworom blong elda mo Rilif Sosaeti taem oli stap lidim ol strong blong wod blong serem gospel mo mekem ol niu memba mo olgeta we oli stap kambak oli kam strong.
Presidensi blong kworom blong ol elda mo Rilif Sosaeti: Oli lidim ol wok blong wod blong serem gospel evri dei mo mekem ol niu memba mo olgeta we oli stap kambak bakegen oli kam strong. Oli wok tugeta blong lidim ol wok ia wetem wod kaonsel, anda long kodinesen blong bisop. Luk long Jeneral Hanbuk, 8.2.3 mo 9.2.3.
Wod misin lida (sapos oli singaotem wan i stap): Hem i kodinetem wok blong ol memba mo lida, ol wod misinari, mo ol ful-taem misinari. Sapos oli no singaotem wan wod misin lida, wan memba blong kworom blong ol elda i tekem rol ia. Luk long Jeneral Hanbuk, 23.5.3.
Oltaem askem yuwan, “?Mi wan blesing blong ol lokol lida?” Developem fasin ia blong “?Olsem wanem mi, mi save help?”
Kompanion Stadi
Putum taem blong gat sot visit nomo wetem wan lida blong wod. Askem hem olsem wanem yu save givim gud sapot long hem. Makem plan blong kam moa gud.
Pikja
kaonsel miting
Ol Kodinesen Miting blong Evri Wik
Kodinesen wetem ol lokol lida—i gat ol lida blong ol yut—i impoten blong stap wan long ol wok blong yufala. Sapos oli singaotem wan misin lida, Hem i kondaktem kodinesen miting blong evri wik. Sapos no, memba blong presidensi blong kworom blong ol elda we i kasem wok ia, i lidim miting.
Long ol sot miting ia, yu mo ol lokol lida putum tugeta ol hadwok blong yufala blong serem gospel mo mekem ol niu memba mo olgeta we oli stap kambak bakegen oli kam strong (luk long Jeneral Hanbuk, 23.4). Oli save holem ol miting ia long wn ples o tru long fon o intanet. Kodinesen i save hapen long ol defren wei long taem blong wik, olsem mekem fon kol, sendem teks, mo ol imel.
Pikja
Elda Quentin L. Cook
“Long ples we plan mo gol blong misinari i wok tugeta wetem plan mo gol blong wod mo branj, bae i help bigwan blong karemaot wok ia blong karem Isrel i kam tugetal” (Quentin L. Cook, “Purpose and Planning,” mission leadership seminar, June 25, 2019).
Stap Rere From Ol Kodinesen Miting blong Evri Wik
Yu stap sapotem ol lida blong wod taem yu rere long yuwan blong tekempat long kodinesen miting blong evri wik. Bifo long miting, tekem taem long taem blong kompanion stadi blong tokbaot olsem wanem yu save tekempat long miting ia.
Kipim ol rekod i apdeit long Prijim Gospel blong Mi app, mekem se ol lida oli gat ol infomesen blong olgeta we yu stap wok wetem olgeta. Rere blong ripot long ol wok we oli givim long yu long ol miting we i pas finis.
Tekempat long Kodinesen Miting blong Evri Wik
Ol kodinesen miting blong evri wik i blong lukluk moa long nid blong wanwan man o woman. Long taem blong miting, talemaot tingting blong yu blong olsem wanem yu wantem blong sapotem ol memba blong wod, mo ol yut, blong help mitim nid blong wanwan man o woman.
Wan kodinesen miting blong evri wik oltaem i kavremap fofala topik ia:
?Olsem wanem yumi save helpem olgeta we oli bin tijim olgeta? Ol samting we yumi save toktok raon long hem:
?Huia ol memba we oli tekempat long ol lesen blong wik ia we i stap kam? ?Huia bae i invaetem olgeta blong tekempat?
?Wanem ol jalenj blong olgeta we oli bin tijim olgeta? ?Olsem wanem nao ol memba oli save help?
?Wanem ol nid blog olgeta we oli gat deit blong baptaes finis i stap? ?Oli mekem plan blong baptaes? (Luk long “Seves blong Baptaes” long japta 12.)
?Olsem wanem yumi save helpem olgeta we oli jes kasem baptaes nomo? Ol samting we yumi save toktok raon long hem:
?Huia ol memba we long fas yia blong membasip blong olgeta, oli stap atendem sakramen miting? ?Olsem wanem yumi save helpem olgeta we oli stap atendem?
?Huia long ol niu memba ia oli gat ol fren long wod? ?Olsem wanem ol givhan brata mo sista oli save help? ?Olsem wanem ol kworom blong yut mo ol klas i save help?
?Huia long ol niu memba i gat wan wok o koling?
?Olsem wanem yumi save helpem ol niu memba blong lukaotem ol bubu blong olgeta we oli lus finis blong mekem tempol odinens blong olgeta? ?Ol niu memba oli gat tempol rekomen? Sapos wan tempol i stap kolosap, ?olsem wanem yumi save helpem olgeta oli go long tempol blong mekem baptaes blong ol bubu ia?
?Wanem lesen i long japta 3 we i nidim blong tijim bakegen? ?Olsem wanem ol memba oli save tekempat?
Lukluk bak long Kavenan Rod blong Mi progres blong wanwan niu memba.
?Olsem wanem yumi save help blong karem ol memba i kambak? Ol samting we yumi save toktok raon long hem:
?Huia pat blong famli memba we ol misinari oli save visitim mo tijim?
?Huia long ol memba we oli stap kambak bakegen, misinari i save visitim mo tijim?
?Huia long ol memba we oli stap kambak bakegen oli gat ol fren long wod mo we oli gat gudfala janis blong givim seves?
?Olsem wanem yumi save helpem ol memba ia?
?Olsem wanem yumi save faenem moa pipol blong tijim? Ol samting we yumi toktok raon long hem:
?Olsem wanem yumi save helpem wanwan man o woman, wetem ol yut, mo ol famli oli yusum ol prinsipol blong lavem, serem, mo invaetem? (Luk long “Wok Wan wetem Ol Memba” long japta 9.)
Olsem wanem yumi save helpem ol memba, wetem ol lida blong Praemeri blong invaetem ol fren i kam long ol wod aktiviti?
Kompanion Stadi
Wajem vidio blong kodinesen miting blong evri wik long Jeneral Hanbuk, 23.4. ?Wanem nao yu lanem, we bae yu save yusum long kodinesen miting blong nekis wik? ?Olsem wanem nao yu save rere blong tokbaot ol nid mo plan wetem ol lida blong wod? Long nekis sesen blong mekem plan, setem ol gol blong olsem wanem blong kam moa gud.
Sapotem Plan blong Wod blong Serem Gospel
Wod kaonsel i krietem wan simpol plan blong serem gospel (luk long Jeneral Hanbuk, 23.5.6). Kam blong save gud plan ia. Long kodinesen miting blong evri wik, lukaotem ol wei blong helpem ol lida blong oli wok from ol gol blong olgeta. Kipim ol lida oli save abaot wanem yu stap mekem blong sapotem ol memba blong serem gospel.
Sapos yu kasem wan invitesen blong atendem wan wod kaonsel miting, rere blong givim wan sot apdeit long progres blong olgeta we yu stap tijim mo eni wok we yu bin kasem (luk long Jeneral Hanbuk, 29.2.5). Lukluk long janis olsem wan taem blong bildim tras mo tru tingting blong ol lida blong wod.
Pikja
Ol pipol oli stap sekhan
Mekem Yu Kam blong Save Gud Ol Nid blong Lokol Eria
Wanwan wod mo branj i gat ol stret nid blong yu wok long hem mo kam blong save gud yuwan. Maet bae yu wok long wan smol branj o wan wod blong yang singgel adalt, o maet bae yu wok long ol defren wod. Sam long ol lida bae oli gat moa eksperiens mo sam bae oli gat smol nomo. Sam lida bae oli gat moa taem blong stap mo ol samfala oli nogat.
Lukaotem ol wei blong helpem ol lokol lida. Oli maet askem yu blong sapotem ol memba long ol blong olgeta blong givhan. Oli maet askem yu blong leftemap tingting blong ol niu memba blong invaetem ol fren blong olgeta blong kam long jos. Yu save givim ol gudgudfala save abaot misinari wok taem ol lida mo ol memba oli stap lanem ol wei blong serem gospel.
Long ples we Jos i niu, ol lida blong branj oli maet askem yu blong helpem ol niu memba blong andastanem olsem wanem Lod i oganaesem Jos blong Hem.
Wok blong yu wetem ol lida i maet defren long ol defren eria, be ol aktiviti ia oli impoten blong blesem laef blong wanwan man o woman mo stanemap Jos blong Lod.
Helpem Ol Memba mo Ol Lida blong Lavem, Serem, mo Invaetem
Leftemap tingting blong ol memba blong serem gospel folem nomol fasin blong laef we i stap. Jeneral Hanbuk i givim instraksen mo ol vidio blong helpem ol memba mo lida blong save mekem hemia i hapen taem oli laef folem ol prinsipol blong lavem, serem, mo invaetem (luk long Jeneral Hanbuk, 23.1.1, 23.1.2, mo 23.1.3). Kipim ol prinsipol ia long maen taem yu stap wok wetem ol lida.
Bae yu stap wan blesing long ol lida ia taem yu stap sapotem traehad blong olgeta long wok ia. Long nara saed blong hem, bae eksampol blong olgeta i helpem ol memba kam tekempat moa blong serem gospel mo mekem ol niu memba mo olgeta we oli stap kambak bakegen oli kam strong.
Luk long “Wok Wan wetem Ol Memba” long japta 9 abaot ol tingting blong sapotem ol memba long ol wok blong olgeta blong serem gospel.
Skripja Stadi
Stadi long ol ves ia. ?Olsem wanem Sevya mo ol disaepol blong Hem oli lavem, oli serem, mo oli invaetem? ?Wanem aksen long ol eksampol ia i givim paoa long tijing blong yu? ?Olsem wanem nao yu save helpem ol memba oli serem gospel folem nomol fasin blong laef we i stap?
Sapotem Ol Lokol Lida blong Mekem Ol Niu Memba Oli Kam Strong
Taem pipol oli kasem baptaes mo konfemesen, oli kam “olsem ol narafala man blong God nomo” (Efesas 2:19; luk tu long 1 Korin 12:12–27). Wok wetem ol lokol lida blong help “fidim ol niu memba wetem gudfala toktok blong God, blong holemtaet olgeta i stap long stret rod, … mo stap dipen nomo long ol gudfala wok blong Kraes” (Moronae 6:4).
Pikja
Elda Ulisses Soares
“Ol niu konvet oli kam long Jos wetem gudfala tingting mo glad blong wanem we oli faenem. Mo yumi mas bildim kwiktaem long gudfala tingting mo glad ia. … Ol misinari oli save konektem ol pipol we oli stap tijim mo ol niu konvet long ol fetful memba we oli save go long olgeta, lisin long olgeta, lidim olgeta, mo mekem olgeta oli fil welkam long jos bifo oli baptaes. … Taem yumi stap [givhan] long olgeta we oli go insaed long wota blong baptaes, bae yumi luk moa long ol pikinini blong God oli stap strong kasem en mo kasem laef we i no save finis” (Ulisses S. Soares, “Convert Retention,” mission leadership seminar, Jun 25, 2018).
Helpem Ol Niu Memba Oli Atendem Sakramen Miting
Yu gat wan impoten rol blong helpem ol niu memba blong atendem jos. Wok wetem ol lida ia blong mekem sua se yu o ol memba blong wod oli helpem olgeta i atendem jos. Wan ki samting we i soemaot wan niu memba i stap atendem sakramen miting i save helpem yu mo ol lida blong wod i luk taem man o woman ia i nidim ekstra wok blong helpem hem.
Ol niu memba bae oli kam moa long sakramen miting mo tekem sakramen taem oli gat ol fren long wod. Helpem olgeta oli filim se oli pat blong jos, speseli long fas yia blong olgeta long laef blong gospel. (Luk long Doktrin mo Ol Kavenan 84:106, 108.)
Tijim Bakegen Ol Lesen long Japta 3
Helpem ol niu memba oli gohed blong mekem fet blong olgeta i kam strong long Sevya Jisas Kraes mo gospel blong hem. Ol trutok mo ol prinsipol blong gospel oli gro i go moa dip taem ol niu memba oli gohed blong lan tru long Spirit.
Afta long konfemesen, tijim ol misinari lesen bakegen. Yu yu lidim tijing. Wok tugeta wetem wod lida blong mekem ol misinari blong wod o ol nara memba oli tekem pat. Tijim bakegen lesen long japta 3 i wan impoten wei blong help “fidim ol niu memba wetem gudfala toktok blong God” (Moronae 6:4). Taem yu tij, leftemap tingting blong ol niu memba blong kipim evri komitmen long ol lesen.
Ridim ol skripja wetem ol niu memba, speseli Buk blong Momon, mo tijim ol gospel prinsipol. Helpem olgeta i serem gospel wetem ol fren mo famli blong olgeta. Wanwan niu memba i gat wan nid we i blong hemwan, mo yu save helpem hem blong filim se oli lavem hem mo welkamem hem.
Kavenan Rod Progres Ripot mo Kavenan Rod blong Mi
Ol lokol lida oli gat ol risos blong blong olgeta blong misinari wok olsem we yu yu gat blong yu. Wan long ol samting ia hem i Kavenan Rod Progres ripot, i stap long Member Tools app o Leader and Clerk Resources. Ripot ia i letem ol lokol lida oli luk ol impoten eksperiens wan man o woman i nidim blong stap progres long kavenan rod bifo mo afta long baptaes.
Kavenan Rod blong Mi i wan risos blong helpem ol niu memba “stap fasem fet blong [olgeta] long Jisas Kraes mo gat filing ia se Jos i hom blong olgeta” (Kavenan Rod blong Mi, iv). I introdiusum long ol niu memba ol aktiviti mo ol janis, olsem famli histri mo helpem ol bubu we oli ded finis kasem ol tabu odinens long tempol. Leftemap tingting blong ol lokol memba blong lidim ol niu memba go tru long eksperiens ia. Givim sapot olsem we oli askem.
Stadi blong Yuwan o Kompanion Stadi
Stadi Kavenan Rod blong Mi. ?Wanem yu bin lanem abaot rol blong stap helpem ol memba oli mekem ol niu konvet oli kam strong? ?Olsem wanem nao yu save sapotem ol wok blong wod kaonsel? Evri taem yu stadi long japta ia, rekodem wanem yu lanem.
Sapotem Ol Lokol Lida blong Mekem Ol Memba We Oli Stap Kambak Oli Kam Strong
Samfala memba oli jusum blong stop mekem wok insaed long Jos. Ol lokol lida mo ol nara memba oli wok had blong bildim rilesensip wetem olgeta mo go luk olgeta. Sevya i talem:
“from olgeta olsem ia, bae yufala i gohed blong givhan long olgeta; from yufala i no save sapos bae oli kambak mo sakem sin, mo kam long mi wetem evri tingting blong hat mo bae mi mekem olgeta i kam oraet; mo bae yufala i stap olsem ol rod blong karem fasin blong sevem man i go long olgeta” (3 Nifae 18:32
Ol lokol lida oli maet askem yu blong help bildim fet blong ol memba we oli stap kambak bakegen. Evri taem wok ia, yu mekem wetem ol memba we oli pat blong famli. Prea wetem tingting blong olsem wanem yu save invaetem Spirit i kam long o hom blong ol memba we oli stap kambak bakegen, taem yu stap tijim olgeta long ol gospel prinsipol mo invaetem olgeta blong wok long hem. Soem tru filing blong gat sore from wari blong olgeta.
Sapos situesen we i stap i luk se yu save mekem, tijim gospel long evriwan long haos ia we oli no kasem baptaes yet. Lav mo sapot blong yu i save helpem fet blong olgeta long Kraes i kam moa dip mo mekem tingting blong olgeta i kam moa strong blong kipim ol kavenan.
Wok wetem ol lokol lida taem yu wok wetem ol memba we oli stap kambak bakegen. Ol traehad olsem i save gat wan mak we i save stap longtaem long laef blong wanwan man o woman mo ol lokol pipol.
Skripja Stadi
?Wanem nao Jisas Kraes i tijim abaot helpem olgeta olgeta we oli stap traehad long laef?
Alma mo Amulek oli bin tijim plante long olgeta we oli kamaot long Jos. ?Wanem yu save lanem long ol eksperiens blong olgeta abaot mekem ol memba we oli stap kambak, oli kam strong?
Yusum app blong Prijim Gospel blong Mi blong mekem ol plan blong toktok long ol niu memba mo olgeta we oli stap kambak bakegen we oli stap jenisim laef blong olgeta mo stap atendem jos. ?Wanem nao i bin helpem olgeta bigwan? Long stadi jenol blong yu, raetem ol tingting blong yu abaot ol eksperiens blong olgeta. ?Yu bin lanem wanem we bae i helpem yu blong wok wetem olgeta we yu stap tijim olgeta naoia?
Rid mo tokbaot japta 23 long Jeneral Hanbuk. ?Olsem wanem nao yu save sapotem ol lokol lida long ol wok blong olgeta?
Long taem blong kodinesen miting blong evri wik, askem ol lida blong wod sapos i gat eni memba we oli stap kambak bakegen long eria blong yu we oli wantem yu blong visitim long wik ia. Taem yu visitim olgeta, lukaotem blong bildim fet blong olgeta long Jisas Kraes.
Faenemaot evriwan we oli bin baptaes mo kasem konfemesen long las yia. Lukluk long rekod blong wan long olgeta ia mo tokbaot olsem wanem yu save wok wetem ol lida long nekis wik kodinesen miting blong helpem man o woman ia. Rekodem ol aedia mo tingting blong yu long Prijim Gospel blong Mi app. Ripitim hemia blong evri niu konvet long eria blong yu.
Distrik Kaonsel, Ol Son Konfrens, mo Misin Lidasip Kaonsel
Invaetem wan bisop o wan nara lida long wod blong tokbaot, mekem ol niu memba mo olgeta we oli stap kambak bakegen oli kam strong. Askem man o woman ia blong talem gud olsem wanem ol misinari oli save help.
Tokbaot parabol blong sipsip we i lus, mane we i lus, mo yang boe we i lusum rod (luk long Luk 15). Invaetem ol misinari blong serem wanem oli lanem mo olsem wanem oli save yusum long misinari wok blong olgeta.
Ol Misin Lida mo Ol Misin Kaonsela
Wok wetem ol lokol lida blong leftemap tingting blong olgeta blong helpem ol niu memba:
Stap oden i go long wan prishud ofis (blong ol man we yia blong olgeta i stret long hem).
Stap ol givhan brata we oli givim wok ia long olgeta (mo ol givhan sista blong ol woman).
Kasem wan tempol rekomen blong save baptaes long tempol long bihaf blong ol bubu we oli ded finis.
Rere long nem blong ol bubu we oli ded finis blong karem i go long tempol.
Kasem wan wok o koling blong givim seves long wod o branj blong olgeta.
Long kodinesen miting wetem stek presiden, tijim ol lokol lida olsem wanem blong gat ol gudfala kodinesen miting blong evri wik.
Wanwan taem folemap wetem ol niu memba blong faenemaot olsem wanem oli stap mekem mo olsem wanem ol misinari oli save help.
Invaetem ol niu memba blong oli toktok wetem ol misinari mo talem ol eksperiens blong olgeta long Jos.