Japta 8: Mekem Wok I Hapen tru long Ol Gol mo Ol Plan
“Japta 8: Mekem Wok I Hapen tru long Ol Gol mo Ol Plan,” Prijim Gospel blong Mi: Wan Gaed blong Stap Serem Gospel blong Jisas Kraes (2023)
“Japta 8,” Prjim Gospel blong Mi
Pikja
Yufala I Mas Go (Yufala I Mas Go, mo Tijim Evri Nesen), I kam long Harry Anderson
Japta 8
Mekem Wok I Hapen tru long Ol Gol mo Ol Plan
Tingting long Hemia
?From wanem mi nidim blong setemap ol gol?
?Olsem wanem ol ki indiketa blong jenisim laef blong man i helpem mi lukluk nomo long progres long saed blong spirit blong wanwan man o woman?
?Olsem wanem nao mi setemap ol gol, mekem ol plan blong mekem ol gol ia i hapen, mo karemaot ol plan blong mi?
?Olsem mi kondaktem ol sesen blong mekem plan evri dei mo evri wik?
?Olsem wanem mi save yusum Prijim Gospel blong Mi ap blong helpem mi mekem finisim wok ia?
?Wanem i prinsipol blong stap akaontebol (o blong givim ripot blong ol wok blong mi)? ?Olsem wanem prinsipol ia bae i blesem ol hadwok blong mi?
Oli givim wok long yu blong help long wok blong Lod long wan eria we yu go long hem. Hem i wantem yu blong blesem wanwan man o woman wetem lav mo trutok blong Hem. Hem i wantem yu blong invaetem mo helpem olgeta blong kam long Hem.
Lod i wantem se yu “mas wok wetem strong tingting long gud wok [ia].” Hem i askem se yu “mekem plante samting long tingting blong [yuwan] nomo, mo mekem plante stret mo gud wok oli kam tru” (Doktrin mo Ol Kavenan 58:27; luk long ol ves 26–29). Mekem evri samting we yu save mekem blong lego wod o branj ia we yu stap givim seves long hem i kam moa strong bitim taem we yu bin kam long hem.
Japta ia bae i helpem yu blong setemap ol gol, mekem ol plan blong mekem ol gol ia oli hapen, mo wok wetem strong tingting oltaem blong karemaot ol plan blong yu. I eksplenem ol ki indiketa blong jenisim laef blong man, we bae i lidim traehad blong yu blong helpem ol pikinini blong God oli progres long saed blong spirit. I soemaot wan simpol proses blong setemap gol we yu save yusum long evri fasin blong misinari wok, mo tu ol gol blong yuwan mo wetem kompanion blong yu. I aotlaenem tu olsem wanem blong yu kondaktem ol sesen blong mekem plan blong evri wik mo evri dei wetem kompanion blong yu.
Blong lanem blong stap setemap ol gol mo mekem plan i save blesem yu long ful laef blong yu. I save helpem yu mekem kavenan wetem God, givim seves long Jos wetem fet, gohed long edukesen, stap gro long wok blong yu, mo bildim wan strong famli.
Skripja Stadi
?Wanem yu lanem aot long ol skripja ia abaot mekem plan blong help finisim wok blong God?
Hem i Hilim Plante Kaen Sik, i kam long J. Kirk Richards
Helpem Ol Narawan Oli Jenisim Laef I Kam long Sevya
Lukluk Nomo long Stamba Tingting blong Yu Olsem Misinari
Maet bae yu stap askem yuwan se wanem long ol plante diuti blong misinari i moa impotent. Hemia i wan gudfala kwestin taem yu stap setemap ol gol mo mekem ol plan evri wik mo evri dei. Blong help ansa long kwestin ia, tingbaot stamba tingting blong yu olsem misinari:
“Invaetem ol narafala man blong kam long Kraes taem yu helpem olgeta i kasem gospel blong Jisas Kraes we i kambak tru fet long Jisas Kraes mo Atonmen blong Hem, fasin blong sakem sin, baptaes, kasem presen we i Tabu Spirit, mo stanap strong kasem en.”
Letem stamba tingting blong yu olsem misinari i lidim ol gol mo plan blong yu. Lukluk moa long olsem wanem yu save helpem wanwan man o woman oli yusum fridom blong olgeta blong mekem joes blong oli jenisim laef blong olgeta i kam long Sevya mo kasem gospel blong Hem.
Lukaotem blong Spirit i lidim yu mo toktok wetem kompanion blong yu taem yu stap setemap ol gol mo mekem ol plan. Afta folem gud ol plan blong yu mo yusum gud taem blong yu.
Pikja
Presiden Dallin H. Oaks
“Yumi no stap prij mo tij blong yumi ‘karem pipol i kam long Jos’ o blong mekem namba blong ol memba blong Jos i go antap. Yumi no stap prij mo tij nomo blong talem long ol pipol blong laef long ol gudfala laef. … Yumi invaetem evriwan blong kam long Kraes tru fasing blong sakem sin mo baptaes mo kasem konfemesen blong mekem ol doa blong selestial kingdom i save open long ol pikinini boe mo gel blong God. I no gat man moa blong mekem wok ia” (Dallin H. Oaks, “The Purpose of Missionary Work,” missionary satellite broadcast, Apr. 1995).
Skripja Stadi
?Olsem wanem nao ol misinari ia mo ol profet oli finisim gud ol plan blong olgeta wetem help blong Lod?
Wok Folem Ol Ki Indiketa blong Jenisim Laef blong Man
Ol lida blong Jos oli faenemaot siks ki indiketa blong jenisim laef blong man. Ol ki indiketa oli helpem yu lukluk moa long progres blong ol pikinini blong God long saed blong spirit. Oli blong helpem yu, putum ol traehad blong yu evri dei i go wetem stamba tingting blong misinari wok blong yu.
Ol ki indiketa blong jenisim laef blong man oli stap daon ia.
Pikja
ol misinari oli stap sekem han wetem man
Tijim Ol Niu Pipol. Wanwan man o woman (i no baptaes) we i bin kasem wan lesen long wan wik (be oli no bin tijim hem long ol tri manis we i pas) mo i bin akseptem wan apoenment blong kambak. Wan lesen i tekem prea (taem i situesen i gud blong mekem), tijim wan gospel prinsipol, mo givim wan invitesen.
Pikja
ol misinari oli stap tij
Ol Lesen Wetem wan Memba I Tekpat. Namba blong ol lesen long wan wik we oli bin givim long wan man o woman (i no baptaes) mo wan memba i tekpat.
Pikja
famli long jos
Ol pipol we Oli Tijim Olgeta mo Oli Atendem Sakramen Miting. Wanwan man o woman (i no baptaes) we yu stap tijim mo i atendem sakramen miting long wan wik.
Pikja
famli i stap prea
Ol pipol wetem wan deit blong baptaes. Wanwan man o woman we i agri blong i baptaes mo kasem Baptaes mo konfemesen long wan deit we i agri long hem.
Pikja
baptaes
Pipol we Oli Kasem Baptaes mo Konfemem. Wanwan niu memba we i bin kasem ol odinens blong baptaes mo konfemesen mo we oli sabmitim elektronik fom blong hem long wan wik. (Luk long japta 12 blong save moa wanem Hem i konvet baptaes mo infomesen long krietem ol rekod.)
Pikja
ol woman long jos
Ol Niu Memba we Oli stap Atendem Sakramen Miting. Wanwan niu memba we oli sabmitim Baptaes mo Konfemesen Fom blong olgeta insaed long ol pas 12 manis we oli bin atendem sakramen miting long wan wik.
Long sot toktok, givim janis blong helpem ol pipol i jusum blong tekem pat long ol eksperiens ia. Putum ol hadwok blong yu long ol aktiviti we i stap ia:
Olgeta we oli helpem yu blong fanem ol niu pipol blong tijim
Olgeta we oli helpem ol piol oli progres i go blong mekem mo kipim ol kavenan.
Olgeta we oli helpem ol pipol we oli bin kasem baptaes mo konfemesen long wan yia we i pas
Sapos yu luk se ol hadwok blong yu i no save helpem wan man o woman i progres long wei we i soem long ol ki indiketa blong yu, evaluetem sapos aktiviti ia i gud long yus blog taem blong yu o no.
Blong ol pipol we yu spendem smol taem nomo wetem olgeta gohed blong stap fidim intres blong olgeta long gospel ia. Yu save invaetem ol memba blong oli go luk olgeta. Yu save yusum teknoloji tu blong leftemap tingting blong ogleta mo gohed blong givhan long olgeta. Luk long “Yus blong Teknoloji” long japta 9 blong gat moa aedia.
Pikja
Elda Quentin L. Cook
“Stamba tingting blong mekem plan mo setemap ol gol hem i blong mekem ol disaepol—i minim se, blong mekem i kam tabu ol konvet we oli mekem mo kipim ol tabu kavenan, statem wetem wan kavenan blong baptaes lid i go long ol kavenan insaed long tempol” (Quentin L. Cook, “Purpose and Planning,” mission leadership seminar, June 25, 2019).
Setemap Ol Ki Indiketa Gol mo Mekem Ol Plan
Long taem blong mekem plan blong evri wik, yu mo kompanion blong yu i setem ol gol blong ol ki indiketa. Ki indiketa gol blong yu i mas soem disaea blong yu blong helpem moa pipol i ekperiensem ol blesing blong fasin blong jenisim laef.
Setem ol gol mo mekem ol plan blong mekem ol samting long kontrol blong yu we i save mekem ki indiketa i wok. Eksampol:
Yu maet setem wan ki indiketa gol blong stat tijim wan stret namba nomo blong ol niu pipol truaot long wik. I nomata sapos yu kasem gol ia o no, i dipen plante long wanwan joes blong nara pipol. Be mekem wanem i stap long kontrol blong yu blong mekem i hapen. Wan wei i blong setem wan gol blong toktok wetem sam numba blong sam niu pipol evri dei. Afta mekem plan blong olsem wanem yu save mekem hemia. Luk long aedi long Apendiks 2 blong japta ia mo long japta 9.
Yu maet setem ol ki indiketa gol blong gat wan stret numba blong ol niu memba mo ol pipol we yu stap tijim olgeta oli atendem sakramen miting. I no mata saspos oli kam o no, i dipen long joes blong olgeta. Be mekem wanem i stap long kontrol blong yu blong mekem ol ki indiketa ia i wok. Mekem plan blong wanem taem blong invaetem olgeta mo olsem wanem blong folemap.
Yu maet setemap ol ki indiketa gol blong mekem ol memba oli tekpat long wan stret namba blong ol lesen long wik. I no mata sapos yu kasem gol ia o no, i dipen plante long ol memba ia mo long ol pipol we yu stap tijim olgeta. Be yu mekem wanem yu save mekem blong save mekem ol ki indiketa ia oli wok. Setem wan gol blong wok wetem ol wod lida blong gat ol memba oli stap. Afta plan blong olsem wanem bae yu mekem olgeta i tekpat.
Olsem wan kompanionsip, setemap ol ki indiketa gol blong eria we yutufala i stap long hem. Mekem ol gol ia blong wok long (1) progres blong olgeta we yu stap tijim olgeta mo (2) nid blong faenem ol pipol blong tijim. Blong faenem ol niu pipol blong tijim i wan nid we i stap oltaem.
Ol ki indiketa gol blong ful misin oli blong wok long ol gol we wanwan kompanionsip oli setem.
Prijim Gospel blong Mi ap bae i helpem yu lukluk nomo long ol pipol taem yu setemap ol ki indiketa gol. Ap ia bae i helpem yu tu blong lanem ol gol blong bifo mo bae i soem progres blong yu blong ol gol blong naoia.
Ol ki indiketa gol mo ol risal oli ripot otomatik nomo i go long ol misin lida blong yu mo ol yang misinari lida tru long Prijim Gospel blong Mi ap.
Mekemsua se yu no tokbaot wan ki indiketa nomo bitim ol narawan. Sapos yu gohed oltaem blong wok long evri ki indiketa bae i helpem yu oltaem blong invaetem ol narawan blong kam long Kraes mo mekem ol kavenan.
Pikja
Presiden Thomas S. Monson
“Blong mekem wan wok i kam moa gud, yu mas save hamas wok nao i nid blong mekem. Taem yu save hamas wok i nid blong mekem mo givim ripot blong wanem wok i bin hapen, paoa blong mekem wok ia i kam moa gud bae i kam antap hariap” (quoted by Thomas S. Monson, “Thou Art a Teacher Come from God,” Improvement Era, Dec. 1970, 101).
Hem i ol tingting blong Lod blong yu mas “wok strong wetem strong tingting” long misinari seves blong yu (Doktrin mo Ol Kavenan 107:99). Fasin blong wok strong wetem strong tingting i wan traehad we i stap oltaem.
Wok strong wetem strong tingting long ol ki indiketa gol blong yu. Invaetem ol pipol blong mekem komitmen we i lid i go long fasin blong jenisim laef. Ol hadwok blong yu wetem strong tingting bae i save givim tingting long olgeta blong mekem ol wok we bae i helpem olgeta blong kam long Kraes (luk long 2 Nifae 2:14–16).
Tijim gospel long ol wei we i mitim nid blong ol pipol. Taem oli andastanem doktrin tru long Spirit, i moa bitim eni nara samting blong leftemap tingting blong olgeta blong mekem wok.
Long sem taem, blong luksave ol ki indiketa gol ia i dipen long joes blong ol narawan. Oltaem, respektem fridom blong mekem joes blong ol narafala man.
Tingbaot se ol ki indiketa oli no en blong setem gol. Be, oli ripresentem progres blong wan man o woman long saed blong spirit blong kasem baptaes, konfemesen, mo stap strong long fasin blong jenisim laef. Progres blong ol pipol bae i dipen long ol joes blong olgeta. Yu sapotem progres blong olgeta tru eksesaesem fet long Kraes long bihaf blong olgeta taem yu stap setemap ol gol, mekem plan, wok wetem strong tingting, mo givhan long olgeta long wan gudfala wei.
Olsem Wanem blong Setemap Ol Gol mo Mekem Ol Plan blong Mekem Ol Gol Ia Oli Hapen
Setem ol gol mo mekem ol plan oli ol wok blong fet. Ol gol oli soemaot wanem i stap long hat blong yu mo lukluk blong yu blong helpem yuwan mo ol narawan blong kam long Sevya.
Taem yu tingting blong putum gud ol gol mo plan bae i givim long yu klia pikja blong wea ples blong go mo wanem blong mekem. Bae oli save helpem yu fanem moa pipol blong tijim. Oli save lidim yu blong helpem olgeta we yu tiji olgeta oli kam strong long fet blong olgeta mo progres i go long fasin blong jenisim laef.
Mekem gol seting mo planing blong yu i kam wan eksperiens we i givim insperesen. Prea wetem tru tingting , eksesaesem fet, toktok wetem kompanion blong yu, mo folem ol toktok blong Spirit. Taem yu plan folem wei ia, bae yu filim Lod i wok tru long yu blong helpem ol narawan.
Pikja
Presiden M. Russell Ballard
“Wan gol i wan ples we i stap finis we yu stap go blong kasem o wan en, be wan plan, hem i rod we bae yu folem blong kasem ples ia. … Setem gol hem i impoten blong statem wetem en blong hem long maen. Mo mekem plan i blong faenem wan rod blong go kasen en blong hem” (M. Russell Ballard, “Return and Receive,” Liahona, May 2017, 62–63).
Ol Prinsipol blong Setemap mo Mekem Ol Gol Ia Oli Hapen
Proses we i stap ia bae i helpem yu setemap mo mekem ol gol ia oli hapen.
Pikja
graf blong setemap gol
Prea blong setemap ol gol mo mekem ol plan. Setemap ol gol we oli ril mo we bae i mekem yu gro mo i nidim fet. No setem ol gol we oli hae tumas o we oli low tumas. Mekem plan blong olsem wanem bae yu mekem olgeta i hapen.
Rekodem mo mekem taemtebol Rekodem ol gol blong yu mo mekem ol plan long wan taemtebol we i gat evri infomesen.
Wok folem ol plan blong yu. Wok strong oltaem blong mekem ol gol ia oli hapen. Eksesaesem fet long Lod blong helpem yu.
Luklukbak mo folemap. Evaluetem progres mo rekodem ol hadwok blong yu evridei. Disaed blong mekem samting i defren mo olsem wanem blong kam moa gud. Stretem ol plan sapos i nid.
Taem yu yusum proses ia blong setemap gol, Lod bae helpem yu luksave ol hadwok blong yu. Bae yu gro long wanem yu save mekem blong stap olsem wan tul long ol han blong Hem. Bae yu mekem plante gudfala wok blong blesem ol pikinini blong Papa long Heven.
Setem Ol Gol mo Mekem Ol Plan long Evri Eria blong Wok
Prea blong lukaotem gaedens blong Spirit taem yu yusum proses blong setem gol long evri eria blong misinari wok. Sam long ol wok ia i gat:
Helpem ol pipol we yu stap tijim olgeta blong mekem progres (luk long Apendiks 1 long japta ia).
Faenem ol niu pipol blong tijim (luk long Apendks 2 long japta ia).
Wok wetem ol memba mo givim seves long ol piol insaed long kominiti mo long wod (luk long japta 9 mo 13).
Wok long yuniti wetem kompanion blong yu (luk long aetem 6 long “Sesen blong Mekem Plan blong Evri Wik”).
Mekem fet blong yu long Jisas Kraes i kam strong.
Mekem save blong yu, mo save blong mekem ol wok, wetem lanem lanwis i kam antap (luk long japta 7).
Setem Ol Gol we Oli Stret
Yu no setemap ol ki indiketa gol blong ol nara misinari. Be, yu save lidim mo leftemap tingting blong olgeta blong yusum ol prinsipol blong setemap ol gol taem oli stap setem ol gol blong olgetawan.
Lukaot gud blong no save mekem kompanion wetem ol narawan.
Taem wan i mekem gol blong hem i hapen yu no tekem olsem wan samting we pablik i mas selebretem, o blong mekem gud long wan o leftemp nem blong wan long pablik.
Pikja
Presiden Spensa W. Kimbol
“Yumi biliv long setem ol gol. Yumi laef tru long ol gol. … [Wan] impoten gol hem i blong karem gospel ia i go long evri pipol. … Gol blong yumi i blong kasem laef we i no save finis. Hemia i moa bigfala gol long wol” (Spencer W. Kimball, regional representatives’ seminar, Apr. 3, 1975, 6).
Kondaktem Ol Sesen blong Mekem Plan blong Evri Wik mo Evri Dei
Plan blong evri wik i helpem yu blong luk bigfala pikja mo lukluk nomo long ol pipol. I helpem yu tu blong lukluk nomo long ol aktiviti we oli moa impoten. Plan blong evri dei i helpem yu kam blong luksave ol wok mo mekem yu rere blong karemaot ol stret wok evri dei. Yu wantem blong mekem wan wok, be i no blong stap bisi nomo.
Long taem blong sesen blong mekem plan, askem yuwan ol kwestin abaot wanem nao yu filim se Lod i wantem yu blong mekem. Lukaotem insperesen blong ansarem ol kwestin ia long ol wei we i stret folem wanwan situesen mo wanwan man o woman. Afta bae ol ansa ia oli mas wok folem plan blong yu.
Sesen blong Mekem Plan blong Evri Wik
Holem wan sesen blong mekem plan blong evri wik wetem kompanion blong yu. Folem ol step we i stap daon ia.
Prea mo lukaotem blong kasem insperesen. Askem Papa long Heven blong lidim yu mekem ol plan we bae i mekem ol stamba tingting blong Hem i hapen. Askem Hem blong blesem hadwok blong yu blong helpem ol pipol oli progres mo kam long Kraes.
yusum Prijim Gospel blong Mi ap blong setemap ol gol mo mekem ol plan blong evri ki indiketa. Yusum proses blong setem gol we oli bin eksplenem long stat blong japta ia. Statem wetem:
Ol pipol we oli bin baptaes mo kasem konfemesen long las yia.
Ol pipol we oli gat det blong baptaes.
Ol pipol we oli stap tijim olgeta we oli atendem sakramen miting.
Ol niu pipol we oli stap tijim olgeta.
Ol memba we oli stap kambak bakegen, ol pat memba famli, mo olgeta we oli stap rere blong kam elda.
Ol pipol we oli bin tijim olgeta finis.
Luk long Apendiks 1 long japta ia blong gat ol aedia abaot yusum proses blong setem gol blong wok wetem ol pipol we yu stap tijim olgeta.
Yusum proses blong setem gol blong faenem ol pipol blong tijim olgeta (luk long Apendiks 2 long japta ia mo japta 9 blong kasem help blong faenem blong faenem ol pipol blong tijim olgeta).
Yusum proses blong setem gol blong bildim ol rilesensip wetem ol lida mo ol memba blong wod. Setem ol gol mo mekem ol plan blong olsem wanem yu save sapotem olgeta long ol hadwok blong ogleta blong serem gospel (luk long ol aedia long japta 9 mo 13). Rere from kodinesen miting blong evri wik (luk long japta 13).
Lukluk bak long ol plan mo ol gol blong yu long Prijim Gospel blong Mi ap. Konfemem ol apoenmen mo ol miting blong yu.
Holem wan kaonsel blong kompanionsip. Hemia oltaem i go wetem ol pat ia:
Sapos yu wantem, serem ol gol blong yuwan we oli gud mo askem kompanion blong yu blong help blong mekem oli hapen.
Tokbaot paoa blong rilesensip blong yutufala. Tokbaot ol jalenj we yu fesem taem yu stap obei o wok long yuniti. Sapos i gat sam samting we i wok agensem yu, stretem tru long (1) letem evri man o woman i talemaot hat o wanem lukluk blong olgeta, (2) andastanem mo akseptem ol wori blong evriwan, mo (3) bildim wan ansa tugeta we bae i lukluk long ol wari ia we oli moa impoten.
Serem wetem kompanion wanem ol samting yu ting se hem i strong long hem. Askem hem blong givim sam tingting blong olsem wanem yu save kam gud.
Setem ol gol we bae i mekem rilesensip blong yutufala i kam moa gud.
Ol komaniosip kaonsel oli save helpem yutufala i developem ol impoten skil we yu save yusum long laef blong yuwan mo famli blong yu, givim seves long Jos, wok, mo ol nara asosiesen.
Finis wetem prea.
Sesen blong Mekem Plan Evri Dei
Setem ol gol mo mekem ol plan wetem kompanion blong yu blong 30 minit evri moning. Folem ol step we oli stap daon ia.
Prea mo lukaotem insperesen.
Lukluk bak long progres blong ol ki indiketa gol blong yu blong evri wik.
Lukluk bak long ol plan blong yu blong helpem ol pipol we yu stap tijim olgeta. Putum gud ol wok blong yu blong helpem olgeta we oli stap mekem moa progres. Arenjem gud ol gol mo plan blong evri dei olsem we i nidim.
Komitim yu long ol wok we bae yu tekem long dei ia blong faenem ol niu pipol blong tijim mo helpem ol pipol we yu stap tijim ogeta.
Plan olsem wanem bae yu wok wetem ol lokol lida mo ol memba.
Finis wetem prea.
Kompanion Stadi
Lukluk bak long Apendiks 1 mo Apendiks 2 long en blong japta ia blong gat sam aedia abaot olsem wanem blong yusum proses blong setem gol blong stap tij mo stap faenem pipol. Luksave olsem wanem yu save yusum sam long ol aedia ia.
Yusum Prijim Gospel blong Mi Ap
Moronae i talem abaot olgeta we oli baptaes long taem blong hem se, “Oli tekem ol nem blong ogleta, blong oli save tingbaot olgeta mo fidim olgeta wetem gudfala toktok blong God, blong holemtaet olgeta i stap long stret rod” (Moronae 6:4). Kipim gud ol rekod i wan wei we yu save yusum prinsipol ia.
Raetemdaon Ol Hadwok blong Yu
Blong kipim ol rekod i pat blong lukaotem gud eria blong yu wetem lav mo strong tingting. Kipim ol rekod blong yu i stret mo i apdeit oltaem. Hemia bae i helpem yu blong tingbaot waem yu nidim blong helpem ol pipol.
Prijim Gospel blong Mi ap i letem yu wok wetem mo serem impoten infomesen wetem ol lokol lida mo memba abaot progres blong ol pipol mo wok.
Folem Data mo Ol Praevet Gaedlaen
Folem data memori mo ol praevet gaedlaen taem yu stap raetemdaon ol gol mo ol plan long Prijim Gospel blong Mi ap mo long ol tul we oli printim. Blong infomesen, luk long Ol Misinari Standet blong Ol Disaepol blong Jisas Kraes, 7.5.
Askem yuwan ol kwestin ia bifo yu raetemdaon o serem infomesen long Prijim Gospel blong Mi ap, imel, sosol media, ol not, o ol nara kominikesen:
?Olsem wanem man o woman ia bae i filim abaot wanem mi stap raetemdaon?
?Bae mi filim olsem wanem sapos samwan i serem kaen infomesen olsem abaot mi wetem ol narawan?
?Mi mi folem polosi blong Jos mo loa blong praevet data blong eria blong mi sapos mi rikodem o serem infomesen ia?
Pikja
ol misinari oli stap prea
Fasin blong Stap Akaontebol
Prinsipol blong stap akaontebol i wan impoten pat blong plan blong God we i no save finis Alma 5:15–19; Doktrin mo Ol Kavenan 104:13; 137:9). Prinsipol ia i mekem yu, yu tingting mo filim olsem wanem abaot ol tabu wok we Lod i givim long yu. Blong stap akaontebol i mekem yu tu yu olsem wanem yu mekem wok blong yu.
Long taem blong ministri blong Hem, Sevya i givim ol wok long ol disaepol blong Hem blong helpem olgeta oli gro, develop, mo mekem wok blong Hem i hapen. Hem i bin givim tu long olgeta janis ia blong oli givim ripot blong wok we oli givim long olgeta blong mekem (luk long Luk 9:10; 3 Nifae 23:6–13). Olsem wan misinari, yu tu yu mas givim ripot blong wanem wok we Lod i bin givim long yu blong mekem.
Mekem long yuwan blong setem gol mo mekem plan wetem aedia ia se bae yu givim ripot long Lod tru long prea evri dei. Mo tu stap akaontebol long yuwan mo tu long ol misin lida blong yu.
Blong givim ripot blong wan wok i mas stap olsem wan eksperiens we i gat lav, mo i soemaot hamas hadwok yu putum long wok ia mo faenemaot ol wei blong mekem i kam gud moa.
Tingting long ol toktok ia we i stap long leta blong yu blong misin koling blong yu: “Taem yu givim taem mo kea blong yu long wok blong Lod, livim bihaen ol nara samting we yu wantem blong mekem blong yuwan, Lod bae i blesem yu wetem bigfala save mo testemoni blong Jisas Kraes mo Gospel blong Hem we i kambak bageken.” Askem yuwan ol kwestin ia, mo reatemdaon ol filing mo tingting blong yu.
?Olsem wanem nao mi givim taem mo kea blong mi long wok blong Lod?
?Mi bin eksperiensem wanem kaen blesing?
?Olsem wanem nao testemoni blong mi i kam strong?
?Bae mi kam moa gud olsem wanem?
Tekem smol taem blong tingbaot ol lasfala taem blong yu long misin fil. Taem dei ia i kam:
?Yu wantem rilesensip blong yu wetem Papa long Heven mo Jisas Kraes bae i olsem wanem?
?Yu wantem kam olsem huia o wanem kaen man o woman?
?Long stadi jenol blong yu, raetem wan ansa blong wanwan long ol kwestin ia. Yusum proses blong setem gol blong mekem plan blong wanem yu save mekem naoia blong wok from ol gol ia. Rekodem ol plan blong yu.
Kompanion Stadi mo Jenjenisim Kompanion
Yusum Prijim Gospel blong Mi ap, ansarem ol kwestin we i stap daon ia:
?Evri rekod oli apdeit mo oli stret?
?Bae misinari we i niu long eria blong yu, bae i save yusum rekod blong yu blong faenem ol niu pipol blong tijim?
?Sapos i nid blong yu ukluk bak long ap blong yu naoia, bae i helpem yu save wea ples nao ol pipol ia oli stap? ?Bae i save helpem yu blong save abaot progres blong olgeta?
Distrik Kaonsel, Ol Son Konfrens, mo Misin Lidasip Kaonsel
Invaetem ol misinari blong serem ol eksperiens wetem ol gol we oli bin setem mo ol plan we oli bin mekem blong helpem ol pipol oli progres. Ol eksampol i maet tekem ol gol mo ol plan blong helpem ol pipol:
Developem bigfala fet long Sevya.
Sakem sin mo mekem ol jenis blong kam moa kolosap long God.
Kasem baptaes mo konfemesen.
Kam long Jos mo ripitim kavenan blong baptaes blong olgeta.
Ridim wan long ol situesen ia long ol misinari. Mekem ol misinari oli divaetem olgeta long ol smol grup. Wanwan grup i yusum ol step 1 mo 2 long proses blong setem gol blong helpem ol pipol long ol eksampol we i stap ia blong oli progres i go kasem baptaes mo konfemesen. Mekem wanwan grup o serem ol aedia blong olgeta.
Wan man o woman we yu stap tijim i akseptem invitesen blong atendem jos long wik ia.
Wan man o woman i akseptem wan invitesen blong baptaes mo setem wan gol wetem yu blong kasem baptaes.
Wan man o woman i akseptem invitesen blong ridim Buk blong Momon mo i bin komitim hem blong ridim 1 Nifae 1.
Invaetem ol misinari blong yusum Prijim Gospel blong Mi ap blong helpem olgeta blong setem ol gol we oli ril be i pusum olgeta i go moa tru long:
Lukluk bak long histri mo progres blong ki indiketa blong bifo.
Setem ol gol blong evri dei, evri wik, mo evri manis.
Ademap ol pipol long ol ki indiketa gol.
Tokbaot olsem wanem ol step ia oli save helpem ol misinari oli mekem gudfala plan taem oli helpem ol pipol oli progres. Askem ol misinari blong tingting long wanem we i stap ia:
?Olsem wanem bae yu yusum Prijim Gospel blong Mi ap long fiuja, taem yu mekem plan?
?Wanem sam nara wei yu bin faenemaot blong yusum app moa gud moa?
Ol Misin Lida mo Ol Misin Kaonsela
Oltaem lukluk bak long Prijim Gospel blong Mi ap blong ol misinari. Invaetem olgeta blong serem olsem wanem oli yusum ap blong trakem ol gol mo plan blong ogleta blong helpem ol pipol oli progres.
Wanwan taem lukluk long ol sesen blong mekem plan blong evri wik o evri dei.
Apendiks 1
Yusum Proses blong Setem Gol blong Wok wetem Ol Pipol We Yu Stap Tijim Olgeta
Seksen ia i givim ol eksampol blong olsem wanem yu maet yusum proses blong setem gol blong helpem ol pipol yu stap tijim olgeta.
1. Putum Ol Gol mo Mekem Ol Plan
Prea mo tingting long ol nid long saed blong spirit blong ol pipol we yu stap tijim. Setem ol gol mo mekem ol plan blong helpem olgeta oli ansarem ol nid ia. Yusum Prijim Gospel blong Mi ap blong lukluk bak long progres blong wanwan man o woman. Yusum ol ki indiketa blong jenisim laef blong man blong fanemaot ol wok we bae i helpem wanwan man o woman tekem nekis step blong kam long Kraes.
Taem yu setem ol gol mo mekem ol plan, askem yuwan long ol kwestin olsem olgeta ia:
?Wanem ol joes man o woman i mekem, nao i soem se fet blong hem long Jisas Kraes i stap gro?
?Wanem ol eksperiens man o woman ia i gat wetem Spirit?
?Wanem ol jalenj maet man o woman ia i stap fesem?
?Wanem moa yumi save lanem long man o woman ia blog helpem hem?
?Wanem i nid blong hepen blong helpem man o woman ia i developem fet long Jisas Kraes, filim mo harem save Spirit, sakem sin, mo kasem baptaes?
?Olsem wanem nao yumi save rere long kodinesen miting blong evri wik blong givim wok long ol lida mo memba blong wod blong helpem man o woman ia? (Luk long japta 13.)
?Wanem ol ki indiketa gol we yumi save setemap we i soemaot fet blong yumi long Lod?
2. Rekodem mo Putum ol Plan blong Yu long Taemtebol
Yusum Prijim Gospel blong Mi ap blong rekodem mo putum long ditel ol gol mo plan blong yu long taemtebol. Hemia bae i helpem yu blong oganaesem ol wok mo luksave wanem ol samting blong mekem evri dei. Folem ol loa blong praevet data long eria blong yu.
Taem yu rekodem mo putum ol plan blong yufala long taem tebol, askem yufala ol kwestin olsem olgeta ia:
?Wanem sam long ol stret samting we yumi save mekem tedei mo long wik ia blog sapotem man o woman ia blong i progres?
?Wanem doktrin (o lesen) bae i helpem man o woman ia i developem wan strong fet long Kraes mo i laef folem gospel? ?Olsem wanem yumi save tijim doktrin ia blong mekem se hem i andastanem doktrin ia mo i harem save paoa blong Tabu Spirit?
?Olsem wanem mo wanem taem yumi save konfemem ol apoenmen?
?Wanem invitesen yumi save givim o folemap? ?Olsem wanem mo wanem taem yumi folemap?
?Olsem wanem mo wanem taem bae yumi helpem man o woman ia atendem jos, ridim ol skripja, prea, mo kipim ol komitmen we i lid i go blong mekem ol kavenan wetem God?
?Olsem wanem ol memba oli save tekem pat?
?Wanem ol risos onlaen we yumi save serem wetem man o woman ia?
?Wanem ol bakap plan yumi save mekem sapos samting i no wok olsem yumi plan from?
3. Wok long Ol Plan blong Yu
Gat wan prea long hat blong yu truaot dei ia taem yu stap wok long ol plan blong yu. Spirit bae i helpem yu save wea ples blong go, wanem blong mekem, wanem blong talem, mo wanem ol jenis blong mekem.
Truaot long dei ia, askem yufala ol kwestin olsem olgeta ia:
?Olsem wanem yumi save wok wetem fet, trastem Lod blong helpem yumi mo mekem yumi luksave ol hadwok blong yumi blong givim seves long ol pikinini blong Hem?
?Olsem wanem nao yumi save stap krietem samting mo gat strong tingting taem yumi stap wok long ol plan blong yumi?
?Olsem wanem yumi save arenjem ol plan blong yumi folem ol nid mo situesen blong ol pipol?
Ol plan oli no save go oltaem olsem yu stap hop from. No fosem yu long wok, tekem taem, mo yusum ol bakap plan taem yu nidim.
4. Luklukbak long Progres mo Folemap
Wetem kompanion blong yu, luklukbak long progres blong ol gol we yu bin setem blong tijim ol pipol mo helpem olgeta i progres. Mekem plan blong ol wei blong folemap. Arenjem ol plan blong yu olsem we yu nidim, taem yu stap wok had blong kasem ol gol blong yu.
Askem yufala ol kwestin olsem olgeta ia:
?Ol pipol we yumi stap tijim olgeta oli stap muv i go blong mekem kavenan wetem God?
?Wanem ol jalenj oli fesem? ?Wanem ol wari blong olgeta?
?Wanem yumi save mekem tedei blong helpem olgeta mo leftemap tingting blong olgeta blong mekem—olgetawan o tru teknoloji?
?Oli gat ol eksperiens blong filim Spirit?
?Oli konek wetem ol lida mo ol memba blong Jos mo oli bildim ol rilesensip? ?Huia i save tekem pat long nekis taem yumi tij?
?Wanem yumi save lanem long ol wok we i no go gud?
?Olsem wanem nao yumi bin mekem i gud blong kasem ol gol blong yumi? ?I gat eni samting we yumi nid blong arenjem gud o mekem i gud moa?
?Hem i taem blong yumi kondaktem smol namba nomo blong ol pipol?
Luk long japta 11 blong moa prinsipol mo aedia long olsem wanem blong folemap mo helpem ol pipol blong progres.
Apendiks 2
Yusum Proses blong Setem Gol blong Faenem Pipol blong Tijim
Seksen ia i givim ol eksampol blong olsem wanem yu save yusum proses blong setem gol blong faenem ol niu pipol blong tijim. Yusum proses ia long plan blong yu blong evri wik mo evri dei.
1. Setem Ol Gol mo Mekem Ol Plan
Wetem kompanion blong yu, prea mo tingting long wanem Papa long Heven bae i wantem yu blong mekem blong faenem moa pipol blong tijim. Mekem hemia evri wik mo evri dei. Gat fet se Hem i stap mekem pipol oli rere blong mitim yu (luk long Doktrin mo Ol Kavenan 100:3–8).
Setem ol gol blong faenem pipol evri dei. Mekem ol plan blong ol wok we yu save kontrolem blong mekem se ki indiketa i save wok. Ol eksampol ia i gat:
Hamas taem bae yu askem ol memba, ol pipol we yu stap tijjim olgeta, mo ol pipol we yu gat kondak wetem olgeta sapos oli save wan man o woman we i maet gat intres long mesej blong yu.
Olsem wanem bae yu wok wetem ol nem blong ol pipol o ol post we yu kasem long sosol media, ?bae yu tekem taem o wok kwiktaem long olgeta?
Lukluk bak long Prijim Gospel blong Mi ap mo askem yufala ol kwestin olsem olgeta ia:
?Wanem nao Papa long Heven i wantem yumi blong mekem tedei mo long wik ia blong faenem ol pipol blong tijim?
?Wanem ol ki indiketa gol blong evri dei mo evri wik, yumi save setem blong faenem ol pipol blong tijim?
?Wanem aktiviti blong faenem pipol i gud long taem ia blong dei mo ples?
?Olsem wanem yumi save givim tingting mo sapot long ol memba blong wod long ol wok blong olgeta blong serem gospel tru long ol prinsipol blong lavem, serem, mo invaetem?
?Hiua ol niu memba we yumi save kodaktem olgeta blong helpem olgeta i atendem sakramen miting? ?Oli gat wan fren blong invaetem?
?Olsem wanem yumi save wok wetem wod kaonsel o olgeta we oli stap tekpat long kodinesen miting blong evri wik blong faenemaot mo kondaktem olgeta we oli pat blong ol famli, ol memba we oli stap kambak bakegen, mo olgeta we oli stap rere blong kam ol elda?
?Huia ol pipol we yumi stap tijim olgeta naoia, ogleta we yu bin stap tijim olgeta finis, mo olgeta we oli givim olgeta long yumi, blong kondaktem? ?Bae yumi kondaktem olget olsem wanem? (Yumi go mitim olgeta, tru teknoloji, tru long fon, o tru ol nara wei)
?Wanem sam long ol niu wei blong faenem ol pipol?
?Wanem ol talen blong yumiwan we yumi save yusum mo ol samting we yumi save mekem yumiwan?
?Olsem wanem yumi save mekem wok ia blong faenem pipol blong tijim i kam moa gud?
?Olsem wanem yumi save helpem olgeta we yumi kondaktem olgeta blong save filim paoa blong Tabu Spirit?
Blong ol eksampol long ol aktiviti blong faenem, luk long ol japta 9, 10, mo 13.
yusum Prijim Gospel blong Mi ap blong helpem yu luksave ol aktiviti blong faenem pipol we i bin wok gud bifo. Eksampol, yu save luk olsem wanem oli faenem olgeta we oli jes kasem baptaes.
Lukaotem insperesen mo stap open long ol niu tingting mo filing mo ol aedia. Yu no stak long fasin ia blong stap mekem semmak samting oltaem. Ol misinari we oli stap faenem ol niu pipol oltaem blong tijim, oltaem oli yusum plante difren kaen wei evri wik. Oli wok long hem oltaem.
2. Rekodem mo Putum Ol Plan blong Yu long Taemtebol
Yusum Prijim Gospel blong Mi ap wetem kompanion blong yu blong rekodem ol gol mo ol plan wetem evri ditel insaed long taemtebol. Taem yu rekodem ol plan blong yu insaed long taemtebol, bae i helpem yu blong luksave wanem ol wok blong mekem mo wanem taem blong mekem olgeta.
Askem yufala ol kwestin olsem olgeta ia:
?Wanem taem mo olsem wanem bae yumi kondaktem ol pipol? ?Wanem ol gudfala wei blong toktok long ogleta? ?Wea ples nao i moa gud? ?Wanem ol gudfala taem long dei blong ol defren wei blong faenem ol pipol?
?Olsem wanem yumi save gat wan gudfala storian wetem ol pipol we yumi mitim olgeta?
?Olsem wanem mo wanem taem yumi save faenem mo yusum sosol media mo ol nara teknoloji?
?Wanem taem bae yumi kondaktem ol riferol?
?Wanem ol bakap plan bae yumi mekem taem ol nara plan oli no go tru?
3. Wok long Ol Plan blong Yu
Wok strong oltaem long gol blong yu blong faenem ol pipol blong tijim. Mekem prea long hat blong yu truato long dei. Stap open blong talem halo mo toktok long ol pipol we yu mitim. Spirit bae i helpem yu blong save wea ples blong go, wanem blong mekem wanem blong talem, mo wanem arenjmen blong mekem.
Truaot long dei, askem yufala long ol kwestin ia:
?Olsem wanem yumi save wok wetem fet, trastem Lod blong helpem yumi mo luksave ol hadwok blong yumi blong givim seves long ol pikinini blong Hem?
?Olsem wanem nao yumi save stap kritem samting mo gat strong tingting taem yumi stap wok long ol plan blong yumi?
?Olsem wanem yumi save arenjem ol plan blong yumi folem ol nid mo situesen blong ol pipol?
?Olsem wanem yumi save helpem ol pipol blong filim paoa blong Tabu Spirit?
Ol plan bae oli oltaem wok long wei we yu stap hop from. No fosem yu long wok, tekem taem, mo yusum ol bakap plan taem yu nidim.
4. Luklukbak long Progres mo Folemap
Truaot long dei mo long wik, prea mo luklukbak long progres blong kasem ol gol blong yu blong faenem pipol blong tijim. Askem yufala ol kwestin olsem olgeta ia:
?Olsem wanem nao yumi bin mekem gud blong kasem ol gol blong yumi mo folem ol plan blong yumi?
?Wanem arenjman nao yumi save mekem blong mitim ol gol blong yumi blong faenem ol pipol?
?Olsem wanem nao yumi save mekem blong no save go bak long olfala stael blong wok we i no gudgud tumas blong faenem pipol blong tijim?
?Wanem niu samting we yumi save traem blong mekem long dei blong tedei?
?Wanem sam tingting yumi save tokbaot long kodinesen miting blong evri wik blong helpem yumi faenem pipol blong tijim? (Luk long japta 13
Olsem wan kompanionsip, yusum “Ol Wok blong Faenem Ol Pipol” graf long japta 9 blong mekem evaluesen blong ol wok blong faenem pipol blong tijim evri wik mo evri dei. Luksave ol samting we yu stap mekem gud, mo tingting long olsem wanem yu save mekem i gud moa.
Truaot long dei stop blong sam minit blong luksave hand blong God long wok blong yu.