Japta 3: Lesen 2—Plan Ia blong Fasin blong Sevem Man blong Papa long Heven
“Japta 3: Lesen 2—Plan Ia blong Fasin blong Sevem Man blong Papa long Heven,” Prijim Gospel blong Mi: Wan Gaed Buk blong Stap Serem Gospel blong Jisas Kraes (2023)
“Japta 3: Lesen 2,” Prijim Gospel blong Mi
Japta 3: Lesen 2
Plan Ia blong Fasin blong Sevem Man blong Papa long Heven
Pikja
Kraes we oli katem pikja blong hem long Ston
Ol Pipol Oli Save Tingting long Olgetawan
?Wanem nao i stamba tingting blong laef?
?Mi kam Wea?
?I gat wan God we i stap kea long mi? ?Olsem wanem nao mi save filim se Hem i stap kea?
?Olsem wanem nao mi save biliv long God taem i gat plante nogud samting i hapen?
?From wanem laef i had samtaem? ?Olsem wanem nao mi save faenem paoa long ol kaen taem olsem?
?Olsem wanem nao mi save kam wan gudfala man o woman?
?Wanem i hapen afta we mi ded?
Gospel blong Jisas Kraes we i bin kambak, i helpem yumi blong ansarem ol kwestin blong sol. Tru long gospel, yumi lanem abaot tabu aedentiti blong yumi mo hamas paoa we i no save finis we i blong yumi olsem ol pikinini blong God. Gospel i givim hop long yumi mo helpem yumi blong faenem pis, fasin blong stap glad mo mining. Blong stap laef folem gospel i helpem yumi blong faenem paoa taem yumi fesem ol jalenj blong laef.
God i wantem gud blong ol pikinini blong Hem mo wantem blong givim ol bigfala blesing long yumi, we hem i blong kasem wan bodi we i nomo save ded mo laef we i no save finis (luk long Moses 1:39; Doktrin mo Ol Kavenan 14:7). From se Hem i lavem yumi, Hem i givim wan plan long yumi blong kasem ol blesing ia. Insaed long ol skripja, plan ia oli singaotem plan ia blong fasin blong sevem man, bigfala plan ia blong stap glad, mo plan blong fasin blong pemaot man (luk long Alma 42:5, 8, 11, 13, 15, 16, 31).
Insaed long plan blong God, wanwan long yumi i bin folem wan rod we i pas tru long laef bifo laef long wol ia, i bon i kam long wol, bae i ded mo laef bakegen afta long ded. God i givim wanem we bae yumi nidim long rod ia mekem se afta we yumi ded, long en bae yumi save gobak long ples we Hem i stap long hem mo kasem wan glad we i fulwan.
Jisas Kraes i stamba blong plan blong God. Tru long Atonmen mo Laef Bakegen long Ded blong Hem, Jisas i mekem i posibol blong wanwan long yumi blong kasem bodi we i nomo save ded mo laef we i no save finis.
Long taem we yumi stap laef long wol, yumi no save tingbaot laef blong yumi bifo laef ia long wol. Mo tu yumi no save andastanem fulwan laef we bae i kam afta long ded. Be, God i bin talemaot tru long revelesen plante trutok abaot ol pat ia blong rod we yumi stap folem we i no save finis. Ol trutok ia oli givim inaf save long yumi blong andastanem stamba tingting blong laef, blong kasem eksperiens blong stap glad, mo blong gat hop abaot ol gudfala samting we i stap kam. Save ia i wan tabu save we i gat valiu blong lidim yumi taem yumi stap long wol ia.
Sam Tingting blong Stap Tij
Seksen ia i givim wan eksampol blong aotlaen blong helpem yu rere blong tij. I tekem tu ol eksampol blong ol kwestin mo ol invitesen we yu save yusum.
Taem yu stap rere blong tij, prea mo tingting long situesen blong wanwan man o woman mo ol nid blong go long saed blong spirit. Jusum wanem we i save help bigwan long taem blong tij. Rere blong talem mining blong ol toktok we ol pipol bae oli no save andastanem. Mekem plan folem hamas taem we bae yu gat, taem yu stap tingbaot blong mekem ol lesen oli sot.
Jusumaot ol skripja blong yusum taem yu tij. Seksen blong “Doktrin Fandesen” blong lesen i tekem tu plante long skripja we oli save help.
Tingting long wijwan kwestin blong askem taem yu stap tij. Mekem plan blong givimaot ol invitesen we bae i leftemap tingting blong wanwan man o woman blong tekem aksen folem.
Tokbaot bigwan ol promes blesing blong God, mo serem testemoni blong yu abaot wanem we yu tijim.
Pikja
ol misinari oli stap tijim wan famli
Wanem Nao YU Save Tijim long Ol Pipol long 15-25 minit
Jusum wan o moa long ol prinsipol ia abaot plan ia blong sevem man, blong tijim. Doktrin fandesen blong wanwan prinsipol oli givim afta long aotlaen ia.
Laef bifo laef long wol ia: Stamba tingting mo Plan blong God from Yumi
Yumi evri wan ol pikinini blong God. Hem i krietem yumi folem pikja blong Hemwan.
Yumi bin laef wetem God bifo yumi bon i kam long wol ia. Yumi ol memba blong famli blong Hem. Hem i save mo lavem wanwan long yumi.
God i bin mekem wan plan blong mekem yumi stap hapi mo progres long laef ia mo blong taem we i no save finis.
Long laef blong yumi bifo we yumi kam long wol ia, yumi bin jusum blong kam folem plan ia blong God. Hemia i minim blong kam long wol mekem se yumi save tekem narafala step we i blong progres i go long laef we i no save finis.
Jisas Kraes i stamba blong plan blong God. Hem i mekem i posibol blong yumi save kasem wan bodi we i nomo save ded mo laef we i no save finis.
Kriesen
Tru long daereksen blong God, Jisas Kraes i krietem wol.
Foldaon blong Adam mo Iv
Adam mo Iv tufala i fas spirit pikinini blong God blong kam long wol. God i krietem bodi blong tufala mo putum tufala long Garen blong Iden.
Adam mo Iv tufala brekem komanmen, God i sakemaot tufala long garen, mo tufala i stap longwe long ples we God i stap long hem. Taem ia, oli singaotem Foldaon long Sin.
Afta long Foldaon blong Adam mo Iv, bae tufala i ded. Olsem we tufala i kasem bodi we i save ded, tufala i save lan, progres mo gat ol pikinini. Tufala i kasem eksperiens tu long saed blong harem nogud, sin mo ded.
Foldaon blong Adam mo Iv i wan step blong evri man blong muv i go fored. Foldaon blong Adam mo Iv i mekem i posibol blong yumi bon i kam long wol mo progres long plan ia blong Papa long Heven.
Laef blong Yumi long Wol ia
Insaed long plan ia blong God, yumi nidim blong kam long wol blong kasem bodi blong mit mo bun, lan mo gro.
Long wol, yumi lanem blong wokbaot wetem fet. Be, Papa long Heven i no lego yumi stap yumiwan. Hem i bin givim plante presen mo ol daereksen blong helpem yumi gobak long ples we Hem i stap long hem.
Atonmen blong Jisas Kraes
Wanwan long yumi i mekem sin, mo wanwan long yumi bae i ded. from se God i lavem yumi, Hem i sendem Pikinini blong Hem, Jisas Kraes, i kam long wol blong pemaot yumi long sin mo ded.
From se tru long Atonmen mo sakrifaes blong Jisas, yumi save kasem fogivnes mo kam klin aot long ol sin blong yumi. Hat blong yumi i save jenis blong i kam moa gud taem yumi sakem sin. Hemia i mekem i posibol blong yumi evri wan blong gobak long ples we God i stap long hem mo kasem wan glad we i fulwan.
Tru long Laef Bakegen long Ded blong Jisas Kraes, bae yumi evriwan i laef bakegen afta long ded. Hemia i minim se spirit blong wanwan man mo bodi bae i joen bakegen, mo wanwan long yumi bae i laef blong oltaem long wan bodi we i stret gud evri wan mo we i laef bakegen long ded.
Jisas Kraes i givim kamfot, hop mo hiling. Atonmen mo sakrifaes blong Hem i bigfala samting we i soem lav blong Hem. Evri samting we oli mekem i no stret, bae oli save mekem i kam gud tru long Atonmen blong Jisas Kraes.
Spirit Wol
taem we bodi blong yumi i ded, spirit blong yumi i gohed blong laef long spirit wol. Ples ia i blong wan sot taem nomo blong we man i save stap lanem samting mo stap rere bifo Laef Bakegen long Ded.
Oli tijim gospel blong Jisas Kraes long spirit wol, mo yumi save gohed blong gro mo progres.
Laef Bakegen long Ded, Fasin Ia blong Sevem Man, mo Fasin blong Kam Olsem Wan God
Afta long taem blong yumi long wol, Laef Bakegen long Ded i nekis step blong yumi blong folem rod we i go blong kasem laef we i no save finis.
Laef Bakegen long Ded i taem we spirit i kambak joen tugeta wetem bodi. Wanwan long yumi bae i laef bakegen long ded mo kasem wan bodi we i stret gud evriwan we i nomo save ded. Bae yumi laef blong oltaem we i no save finis. Hemia i save hapen tru long Atonmen mo Laef Bakegen long Ded.
Jajmen mo Ol Kingdom blong Glori
Taem yumi laef bakegen long ded, Jisas Kraes bae i jajem yumi. Bae i gat sam nomo we bae oli we God bae i akseptem olgeta, evri pikinini blong God bae oli kasem wan ples insaed long wan kingdom blong glori.
Nomata se bae yumi kasem laef bakegen long ded, bae yumi evri wan i no kasem semmak glori we i no save finis. Jisas bae i jajem yumi folem fet blong yumi, ol wok, mo fasin blong yumi blong sakem sin taem yumi stap laef long wol ia mo long spirit wol. Yumi save gobak blong stap long ples we God i stap long hem sapos nomo yumi stap fetful.
Ol Kwestin we Yu Save Askem long Ol Pipol
Ol kwestin ia oli ol eksampol blong wanem yu save askem long ol pipol. Ol kwestin ia oli save helpem yu blong gat wan storian we i gat moa mining mo andastanem nid blong wan man o woman mo tingting blong hem.
?Wanem nao yu filim we i stamba tingting blong laef?
?Wanem nao i givim hapines long yu?
?Wanem ol jalenj we yu nidim God blong i helpem yu long olgeta?
?Wanem nao yu bin lanem long ol jalenj we yu bin fesem?
?Wanem nao yu save abaot Jisas Kraes? ?Wanem nao we i jenisim laef blong yu abaot laef mo misin blong Hem?
Ol Invitesen we Yu Save Givimaot
?Bae yu askem God tru long prea blong helpem yu blong save se wanem we mifala i bin tijim long yu i tru? (Luk long “Ol Niufala Tingting blong Stap Tij: Prea” long las seksen blong lesen 1.)
?Bae yu kam long jos wetem mifala long Sandei ia blong lanem moa abaot wanem we mifala i bin tijim long yu?
?Bae yu ridim Buk blong Momon mo prea blong save se hem i toktok blong God? (Yu save givim sam spesel japta mo ol ves.)
Bae mifala save putum wan taem blong nekis visit blong mifala?
Pikja
graf mo plan ia blong fasin blong sevem man
Doktrin Fandesen
Seksen ia i givim ol doktrin mo ol skripja blong yu blong stadi blong mekem save blong yu i kam strong mo testemoni blong yu abaot gospel mo helpem yu blong tij.
Pikja
ol milian sta
Laef bifo laef long wol ia: Stamba tingting mo Plan blong God from Yumi
Yumi Ol Pikinini blong God, mo Yumi Laef wetem Hem bifo yumi Bon i Kam long Wol
God i Papa blong spirit blong yumi. Yumi ol stret pikinini blong Hem, we Hem i krietem yumi folem pikja blong Hem. Yumi evri wan i gat wan tabu fasin olsem wan pikinini blong God. Save ia i save helpem yumi go tru ol hadtaem mo i save givim insperesen long yumi blong mekem bes blong yumi.
Yumi bin laef wetem God olsem ol spirit pikinini blong Hem bifo yumi bin bon i kam long wol. Yumi ol memba blong famli blong Hem.
Pikja
Presiden M. Russell Ballard
“I gat wan impoten aedentiti we yumi evriwan i serem naoia mo blong oltaem, wan we bae yu neva stop blong luksave, mo wan we bae yumi mas talem tangkyu from. Hemia i we yu wan mo oltaem bae yu wan pikinini boe o gel blong God we i gat wan rus long saed blong spirit blong taem we i no save finis.
“… Blong stap andastanem trutok ia—mo andastanem gud mo stap holemtaet—i save jenisim laef. Hemia i givim nambawan aedentiti we wan i no save tekemaot long yu. Be wanem we i moa long hemia i we, hemia i mas givim long yu wan bigfala filing abaot valiu mo wan filing abaot hamas yu impoten mo we i no gat en. Wanem we i stap long en i we, hemia i givim long yu wan tabu, gudfala man o woman mo wan laef blong hem i klin inaf long laef” (M. Russell Ballard, “Children of Heavenly Father” [Brigham Young University devotional, Mar. 3, 2020], 2, speeches.byu.edu).
Yumi Jusum blong Kam long Wol
Papa long Heven i lavem yumi mo wantem blong kam olsem Hem. Hem i wan hae God mo wan bodi blong mit mo bun we i fulap long glori.
Long taem we yumi stap long laef bifo yumi kam long wol ia, yumi lanem se God i gat wan plan blong yumi blong kam olsem Hem. Wan pat blong plan ia blong Hem i we bae yumi lego hom blong yumi long heven mo kam long wol blong kasem bodi blong mit mo bun. Mo tu, yumi nid blong kasem eksperiens mo developem fet long wan taem we yumi stap longwe long God. Bae yumi no save tingbaot se yumi bin stap laef wetem God. Be, Hem bae i givim wanem we yumi nidim mekem se bae yumi save gobak stap laef wetem Hem.
Fridom blong mekem joes, o fridom mo janis blong save jusum samting, hem i wan impoten pat long plan ia blong God we i mekem from yumi. Long laef blong yumi bifo long laef ia, wanwan long yumi i bin jusum blong folem plan ia blong God mo kam long wol mekem se yumi save tekem nekis step long wol ia blong yumi i go from laef we i no save finis. Yumi mas andastanem se taem yumi stap long ples ia, bae yumi save gat plante janis blong kam antap mo kasem eksperiens blong stap glad. Mo tu, yumi andastanem se bae yumi save fesem ol samting we i kam agens. Bae yumi kasem eksperiens long saed blong temtesen, ol tes, bigfala harem nogud mo ded.
Taem yumi jusum blong kam long wol, yumi bin gat tras long lav mo help blong God. Yumi gat tras long plan ia blong hem blong sevem yumi.
Papa long Heven I Bin Jusum Jisas Kraes blong Pemaot Yumi
Jisas Kraes i stamba blong plan blong God. Bifo yumi kam long wol, yumi bin save se bae yumiwan yumi no save mekem blong gobak long ples we God i stap long hem. Papa long Heven i bin jusum Jisas Kraes, fasbon Pikinini blong Hem, blong mekem i posibol blong yumi blong kambak long Hem mo kasem laef we i no save finis.
Jisas i akseptem wetem tru hat. Hem i agri blong kam long wol blong pemaot yumi tru long atonmen mo sakrifaes blong Hem. Atonmen mo Laef Bakegen long Ded blong Hem bae i mekem evri stamba tingting blong God long yumi bae i hapen.
Gospel Topik: “Laef Bifo Laef long Wol,” “Plan Ia blong Sevem Man”
Pikja
sanset long en blong solwota
Kriesen
Plan ia blong Papa long Heven i mekem se Oli krietem wol, long ples ia ol spirit pikinini blong Hem bae oli save kasem bodi blong mi mo bun mo kasem eksperiens. Laef blong yumi long wol i impoten long rod we yumi stap folem blong go kasem mo kam olsem God.
Tru long daereksen blong Papa long Heven, Jisas Kraes i krietem wol mo evri samting we oli stap laef long hem. Afta, Papa long Heven i krietem man mo woman folem pikja blong Hemwan. Kriesen i wan wei blong soem lav mo God mo tingting blong hat blong Hem from yumi blong gat janis blong kam antap.
Stap Lego Garen blong Iden i kam long Joseph Brickey
Foldaon blong Adam mo Iv
Bifo long Foldaon
Adam mo Iv, oli ol fas spirit pikinini blong Papa long Heven we tufala i kam long wol. God i krietem bodi blong tufala folem pikja blong Hem mo putum tufala insaed long Garen blong Iden. Insaed long garen, tufala i no gat sin, mo God i givhan long ol nid blong tufala.
Taem we Adam mo Iv tufala i stap long garen, God i givim komanmen long tufala blong no kakae frut blong tri blong save gud mo nogud. Sapos tufala i obei long komanmen ia, bae tufala i stap semmak nomo insaed long garen. Mo bae tufala i no save progres blong lanem samting aot long wanem we i kam agens mo ol jalenj blong laef long wol ia. Tufala i no save se wanem ia glad, from se tufala i no bin go tru long hadtaem mo harem nogud.
Setan i bin temtem Adam mo Iv blong tufala i kakae tabu frut ia, mo tufala i bin jusum blong mekem olsem. Tru long joes ia, oli sakemaot tufala aot long garen mo stap longwe long ples we God i stap long hem. Taem ia, oli singaotem Foldaon long Sin.
Afta long Foldaon
Afta long Foldaon blong Adam mo Iv, bae tufala i save ded. Tufala i mekem sin, tufala i andastanem tugeta wanem we i gud mo nogud. Tufala i save yusum fridom blong mekem joes blong tufala blong jusum bitwin gud mo nogud. From se Adam mo Iv tufala i fesem ol samting we oli kam agens mo ol jalenj, tufala i save lan mo kam antap. From se tufala i kasem eksperiens blong bigfala harem nogud, tufala i save kasem eksperiens tu blong bigfala glad. (Luk long 2 Nifae 2:22–25.)
Nomata long ol hadtaem we tufala i fesem, Adam mo Iv tufala i filim se blong stap laef long wol i wan bigfala blesing. Wan blesing i we bae tufala i save gat ol pikinini. Hemia i givim janis long ol narafala spirit pikinini blong God blong kam long wol blong kasem bodi blong mit mo bun.
Folem ol blesing blong Foldaon, tugeta Adam mo Iv i bin glad. Iv i talem, “Sapos yumitu no bin brekem loa, bae yumitu neva gat [pikinini], mo neva bae yumitu save gud mo nogud, mo save glad long fasin blong pemaot man, mo laef we i no save finis we God i stap givim long evriwan we i stap obei” (Moses 5:11; luk tu long ves 10).
Gospel Topik: “Foldaon blong Adam mo Iv,” “Fridom blong Mekem Joes mo Fasin blong Stap Akaontebol”
Laef blong Yumi long Wol ia
Plante pipol oli stap tingting se, “?From wanem mi stap long wol?” Laef blong yumi long wol i wan impoten pat blong plan blong God blong yumi save progres i go long kasem laef we i no save finis. Nambawan stamba tingting blong yumi i blong gobak long ples we God i stap long hem blong kasem glad we i fulwan. Aotlaen andanit ia oli sam long ol wei we laef long wol ia i stap rere long yumi from hemia.
Pikja
boe i stap smael
Kasem wan Bodi blong Mit mo Bun
Wan stamba tingting blong kam long wol i blong kasem wan bodi blong mit mo bun blong mekem se spirit blong yumi i stap insaed long hem. bodi blong yumi oli tabu, merikel blesing blong ol kriesen blong God. Wetem ol bodi blong yumi, yumi save lan, mo kasem plante eksperiens we spirit blong yumi i no save mekem. yumi save kam antap long ol wei we spirit blong yumi i no save mekem hemwan.
From ol bodi blong yumi oli save laef, yumi kasem eksperiens blong harem soa long bodi, ol sik mo kasem ol tes blong laef long wol ia. Ol eksperiens ia oli save helpem yumi blong lanem blong gat fasin blong save stap wet longtaem, sore, mo ol narafala tabu kwaliti. Oli save stap olsem pat long rod blong yumi i go from glad. Blong jusum raet taem we i had blong mekem, oltaem hem i olsem hamas, fet, hop mo jareti i kam ol pat blong fasin blong yumi.
Wan narafala stamba tingting blong laef long wol i blong lanem blong yusum fridom blong mekem joes wetem waes tingting—blong jusum wanem we i stret. Blong lanem blong stap yusum fridom blong mekem joes blong yumi wetem waes tingting hem i impoten blong stap kam olsem God.
Papa long Heven mo Jisas Kraes Tufala i tijim yumi wanem we i raet mo givim ol komanmen blong lidim yumi blong kasem hapines. Setan i givim temtesen long yumi blong mekem rong samting, blong wantem yumi blong harem nogud olsem hem. Yumi fesem fasin blong kam agens bitwin gud mo nogud, we i mas gat blong save stap lanem olsem wanem blong stap yusum fridom blong yumi blong mekem joes(luk long 2 Nifae 2:11).
Taem yumi obei long God, yumi kam antap mo kasem ol blesing blong Hem. Taem yumi no obei, yumi putum yumiwan longwe long Hem mo kasem ol risal blong sin. Nating samtaem yumi tingting se i no olsem, long en, sin i mekem yumi no stap hapi. Oltaem ol blesing blong stap obei—mo ol risal blong sin—oli no save kamaot kwiktaem olsem wan pruf o man i save luk. Be bae i gat, from God i semmak nomo.
Iven taem yumi mekem bes blong yumi, yumi evri wan i mekem sin mo “stap aotsaed long ol gudfala fasin blong God” (Rom 3:23). Blong save hemia, Papa long Heven i mekem wan wei blong yumi blong sakem sin mekem se yumi save kambak stap wetem Hem.
Fasin blong sakem sin i karem paoa blong Ridima blong yumi, Jisas Kraes, i kam insaed long laef blong yumi (luk long Hileman 5:11). Taem yumi sakem sin, yumi kam klin aot long sin blong yumi tru long atonmen mo sakrifaes blong Jisas Kraes blong presen ia blong Tabu Spirit (luk long 3 Nifae 27:16–20). Tru long fasin blong sakem sin, yumi kasem eksperiens blong bigfala glad. Rod blong kambak long Papa long Heven i open long yumi, from we Hem i gat bigfala sore. (Luk long “Fasin blong Sakem Sin” long lesen 3.)
Lan blong Wokbaot tru long Fet
Wan narafala stamba tingting blong laef ia i blong kasem eksperiens we i save kam tru nomo long wei we yumi save seperet long God. From se yumi no luk Hem, yumi nidim blong lanem blong wokbaot tru long fet (luk long 2 Korin 5:6–7).
God i no lego yumiwan blong wokbaot long rod ia. Hem i bin givim Tabu Spirit blong lidim yumi, givim paoa, mo mekem yumi kam tabu. Hem i givim ol skripja tu, ol profet, prea mo gospel blong Jisas Kraes.
Evri pat blong laef blong yumi long wol—ol glad, ol harem nogud, ol sakses mo ol problem—oli save helpem yumi blong kam antap taem yumi rere blong kambak long God.
Tru long Foldaon blong Adam mo Iv, bae yumi evri i mekem sin mo mas ded. Yumi no save winim risal blong sin mo ded yumiwan. Long plan ia blong sevem man blong Papa long Heven, Hem i mekem wan wei blong winim ol risal blong Foldaon blong Adam mo Iv mekem se yumi save kambak long Hem. Bifo Oli krietem wol, Hem i bin jusum Jisas Kraes blong kam Sevya blong yumi mo Ridima.
Jisas Kraes nomo i save sevem yumi long sin mo ded. Hem i stret Pikinini blong God. Hem i laef long wan laef we i no gat sin, Hem i obei fulwan long Papa blong Hem. Hem i bin rere mo wantem blong tingting blong Papa long Heven.
Atonmen blong Sevya i tekem tu safaring blong Hem long Garen blong Getsemane mo safaring blong Hem mo ded blong Hem long kros, mo hem i bin en wetem Taem we Hem i bin Laef Bakegen long Ded. Hem i safa i bitim wanem we yumi save tingting long hem—i bigwan tumas we i mekem se blad blong Hem i ronaot long evri hol blong skin (luk long Doktrin mo Ol Kavenan 19:18).
Atonmen blong Jisas Kraes i wan samting we i hapen we i fulap long glori long evri histri blong man long wol ia. Tru long atonmen mo sakrifaes blong Hem, Jisas i mekem plan ia blong Papa i wokaot. Bae Oli no save helpem yumi sapos i no gat Atonmen blong Jisas Kraes from se yumi no save sevem yumiwan aot long sin mo ded (luk long Alma 22:12–15).
Sakrifaes blong Sevya blong yumi i wan bigfala lav we Hem i gat long Papa blong Hem mo long yumi. “ Mi wantem blong yufala i save we fasin ya i bigwan olsem wanem, mo i longfala olsem wanem, mo i hae olsem wanem, mo i dip olsem wanem” we i lav blong Kraes we i go bitim hamas we yumi save andastanem (Efesas 3:18; luk tu long ves 19).
Pikja
Taem Oli Hangem Hem long Kros, i kam long Hari Andeson.
Jisas Kraes I Winim Ded blong Evriwan
Taem Jisas Kraes i bin ded long kros, spirit blong Hem i bin seperet long bodi blong Hem. Long nambatri dei, spirit mo bodi blong hem oli bin kam wan bakegen, mo bae oli nomo save seperet bakegen. Hem i bin kamaot long plante pipol, mo Hem i bin soemaot long olgeta se Hem i gat wan bodi blong mit mo bun we i no save ded. Fasin ia we Spirit mo bodi i kam joen bakegen oli singaotem Laef Bakegen long Ded.
Olsem we yumi stap laef long wol, wanwan long yumi bae i ded. Be, from Jisas i bin winim ded, evri man mo woman we oli bon i kam long wol bae oli laef bakegen long ded. Laef Bakegen long Ded i wan tabu presen blong evri wan, we Sevya i givim tru long sore mo gladhat blong Hem blong pemaot yumi. Spirit mo bodi blong wanwan man mo woman bae oli kam joen bakegen, mo wanwan long yumi bae i laef blong oltaem long wan bodi we i stret gud evriwan mo wan bodi we i laef bakegen. Sapos i no bin Jisas Kraes, ded bae i en blong evri hop blong gat wan fiuja wetem Papa long Heven, bae i no gat (luk long 2 Nifae 9:8–12).
Jisas I Mekem I Posibol blong Yumi Kam Klin long ol Sin blong Yumi
Blong andastanem hop we yumi save kasem tru long Kraes, yumi nid blong andastanem loa blong jastis. Hemia i loa ia we oli no save jenisim we i givim ol risal blong ol aksen blong yumi. Fasin blong stap obei long God i givim ol gudfala risal, mo fasin blong no stap obei i givim ol no gud risal. (Luk long Alma 42:14–18.) Taem yumi mekem sin, yumi no klin no saed blong spirit, mo i no gat wan samting we i no klin i save laef wetem God (luk long 3 Nifae 27:19).
Pikja
Jisas i stap prea long Getsemane, i kam long Harry Anderson
Long taem blong atonmen mo sakrifaes blong Jisas Kraes, Hem i bin stanap long ples blong yumi, i safa, mo pemaot praes blong ol sin blong yumi (luk long 3 Nifae 27:16–20). Plan ia blong God i givim paoa long Jisas Kraes blong toktok long bihaf blong yumi—blong stanap bitwin yumi mo jastis (luk long Mosaea 15:9). Tru long atonmen mo sakrifaes blong Jisas, Hem bae i askem ol raet blong sore blong hem long Papa blong Hem long bihaf blong yumi (luk long Moronae 7:27; Doktrin mo Ol Kavenan 45:3–5). “Olsem ia nao i save stretem fulwan ol samting we jastis i askem, mo i raonem [yumi] wetem ol han blong sefti” (Alma 34:16).
Be tru nomo long presen blong Atonmen blong Sevya mo fasin blong yumi blong sakem sin bae yumi save kambak laef wetem God. Taem yumi sakem sin, yumi kasem fogivnes mo kam klin long saed blong spirit. Yumi kam fri long ol bigfala wari blong sem mo sin blong yumi. Sol blong yumi we i kasem kil oli kam oraet. Yumi fulap long glad (luk long Alma 36:24).
Nomata se yumi no stret mo gud evriwan mo save mekem ol mistek bakegen, i gat moa gladhat, lav mo sore long Jisas Kraes bitim we i gat long ol filing blong givap, kam slak o sin long we i stap insaed long yumi. Oltaem God i rere mo wantem tumas blong holemtaet yumi taem yumi tanem yumi i go long Hem mo sakem sin (luk long Luk 15:11–32). I no gat wan samting o wan we “i save seraotem yumi long lav blong God, we i stap long Jisas Kraes Lod blong yumi” (Rom 8:39).
Jisas I Tekem long Hemwan Ol Soa long Bodi blong Yumi, Ol Hadtaem mo Samting we Yumi Kam Slak long Olgeta
Tru long atonmen mo sakrifaes blong Hem, Jisas Kraes i tekem long Hemwan ol soa blong bodi, ol hadtaem mo ol samting we yumi kam slak long olgeta. From hemia, Hem i save “long saed blong bodi blong mit mo bun, olsem wanem blong helpem ol man blong hem long saed blong ol samting blong olgeta we oli no strong long olgeta” (Alma 7:12; luk tu long ves 11). Hem i stap invaetem yumi blong, “Kam long mi,” mo taem yumi mekem, Hem i givim spel long yumi, hop, paoa, niu lukluk mo hiling (Matiu 11:28; luk tu long ol ves 29–30).
Taem yumi stap dipen Jisas Kraes mo Atonmen blong Hem, Hem i save helpem yumi blong stanap strong long taem blong ol hadtaem blong yumi, taem yumi sik mo taem yumi harem nogud. Yumi save gat fulap glad, pis, mo haremgud. Evri samting we i no stret abaot laef i save kam stret tru long Atonmen blong Jisas Kraes.
Gospel Topik: “Jesus Christ,” “Atonment of Jesus Christ,” “Grace”
Pikja
Famil i stap visitim gref
Spirit Wol
Plante pipol oli stap tingting se, “?Wanem bae i hapen afta we mi ded?” Plan ia blong sevem man i givim sam impoten ansa long kwestin ia.
Ded hem i pat blong “plan blong sore” blong God from yumi (2 Nifae 9:6). Ded i nekis stap blong progres blong yumi long rod we i go blong kasem laef we i no save finis, bitim we i en blong yumi blong stap laef. Blong kam olsem God, yumi mas kasem eksperiens blong ded mo afta, kasem wan bodi we i kam stret mo gud evriwan, mo kam ol bodi we oli laef bakegen long ded.
taem we bodi blong yumi i ded, spirit blong yumi i gohed blong laef long spirit wol. Ples ia blong wan sot taem nomo blong man i save stap lanem samting mo stap rere bifo Laef Bakegen long Ded mo Faenol Jajmen. Save blong yumi we yumi kasem long laef ia bae i stap wetem yumi.
Long spirit wol, ol pipol we oli akseptem mo laef folem gospel blong Jisas Kraes “bae oli kasem wan ples blong hapines, we oli singaotem paradaes” (Alma 40:12). Ol smosmol pikinini tu oli kam long paradaes taem oli ded.
Ol spirit long paradaes bae oli gat pis aot long long ol trabol blong olgeta mo ol harem nogud blong olgeta. Bae oli gohed kam antap long saed blong spirit, gohed blong mekem wok blong God mo stap givhan long ol narawan. Bae oli tijim gospel long olgeta we oli no bin kasem gospel taem oli stap laef long wol (luk long Doktrin mo Ol Kavenan 138:32–37, 57–59).
Long spirit wol, ol pipol we oli no bin save kasem gospel long wol, o we oli jusum blong no folem ol komanmen, bae oli gat limit nomo long sam samting (luk long Doktrin mo Ol Kavenan 138:6–37; Alma 40:6–14). Be, from God i semmak mo i gat bigfala sore, bae olgeta oli gat wan janis blong oli tijim gospel blong Jisas Kraes long olgeta. Sapos oli akseptem mo sakem sin, God bae i pemaot olgeta long ol sin blong olgeta (luk long Doktrin mo Ol Kavenan 138:58; luk tu long 138:31–35; 128:22). Bae oli welkamem olgeta long pis blong paradaes. Bae long en, bae oli kasem wan ples long kingdom blong glori folem ol joes we oli bin mekem long laef blong olgeta long wol mo long spirit wol.
Yumi stap insaed long spirit wol kasem taem we yumi laef bakegen long ded.
Laef Bakegen long Ded, Fasin Ia blong Sevem Man, mo Fasin blong Kam Olsem Wan God
Laef Bakegen long Ded
Plan ia blong God i mekem i posibol blong yumi blong gro mo kasem laef we i no save finis. Afta long taem blong yumi long spirit wol, nekis step hem i Laef Bakegen long Ded long rod we yumi stap folem blong progres.
Laef Bakegen long Ded hem i taem we bodi mo spirit i kam joen wan bakegen. Wanwan long yumi bae i laef bakegen long ded. Hemia i save hapen tru long Atonmen mo Laef Bakegen long Ded. (Luk long Alma 11:42–44.)
Taem yumi laef bakegen long ded, bae wanwan long yumi i gat wan bodi blong mit mo bun we i stret mo gud evriwan mo i fri long soa blong bodi mo sik. Bae bodi blong yumi ia i nomo save ded, mo bae i stap laef blong oltaem.
Fasin blong Sevem Man
From se bae yumi evri i laef bakegen long ded, bae oli sevem yumi evriwan—o bae oli sevem yumi—long ded long saed blong bodi. Presen ia oli givim long yumi tru long gladhat blong Jisas Kraes.
Mo tu, bae oli sevem yumi—o bae oli sevem yumi—long ol risal we loa blong jastis i mas tekem aksen folem from ol sin blong yumi. Presen ia oli mekem i kam posibol tu tru long ol gud wok mo sore blong Jisas Kraes taem yumi sakem sin. (Luk long Alma 42:13–15, 21–25.)
Fasin blong Kam Olsem Wan God
Fasin blong kam olsem God, o selestial glori, i wan hae ples blong hapines mo glori long selestial kingdom. Fasin blong kam olsem wan god, i wan presen we i kam wetem kondisen. Presiden Russell M. Nelson i tijim se, “Olgeta impoten kondisen ia i tekem tu, fet long Lod, fasin blong sakem sin, kasem Tabu Spirit, mo stap fetful long ol odinens mo kavenan blong tempol” (“Salvation mo Exaltation,” Liahona, Mei 2008, 9).
Fasin blong kam olsem God i minim blong oltaem, laef wetem God wetem ol famli we i no save finis. Hem i blong save God mo Jisas Kraes, mo blong kam olsem Tufala mo blong kasem eksperiens long laef we Tufala i stap glad long hem.
Not: Long fastaem blong tij abaot ol kingdom blong glori, tij folem ol simpol wei we i folem nid mo andastaning blong man o woman we yu tijim.
Taem we yumi laef bakegen long ded, bae Jisas Kraes i jajem yumi long fasin we i fea mo sore. Bae i gat sam nomo we bae God i akseptem olgeta, wanwan long yumi bae i kasem wan ples long kingdom blong glori. Nomata se bae yumi kasem laef bakegen long ded, bae yumi evri wan i no kasem semmak glori we i no save finis (luk long Doktrin mo Ol Kavenan 88:22–24, 29–34; 130:20–21; 132:5).
Wanwan man o woman we oli no bin gat janis blong andastanem fulwan mo obei long ol loa blong God taem oli stap laef long wol, bae oli givim janis long olgeta long spirit wol. Jisas bae i jajem wanwan long yumi folem fet blong hem, ol wok, ol tingting blong hat blong hem mo fasin blong hem blong sakem sin long laef blong wol mo long spirit wol (luk long Doktrin mo Ol Kavenan 138:32–34, 57–59).
Ol skripja oli tij abaot selestial, terestrial mo telestial kingdom blong glori. Wanwan long olgeta oli stap soemaot lav blong God, jastis mo sore.
Olgeta we oli praktisim fet long Jisas Kraes, sakem sin, kasem ol odinens blong gospel, kipim ol kavenan, kasem Tabu Spirit, mo stap strong kasem en, bae oli sevem olgeta insaed long selestial kingdom. Kingdom ia tu bae i tekem tu ol pipol we oli no gat janis blong kasem gospel long taem we oli stap laef long wol be “bae oli akseptem nomo wetem ful hat blong olgeta,” mo oli mekem olsem long spirit wol (Doktrin mo Ol Kavenan 137:8; luk tu long ves 7). Ol pikinini we oli ded bifo yia blong olgeta we oli stap akaontebol (eit yia) olgeta tu bae oli sevem insaed long selestial kingdom (luk long Doktrin mo Ol Kavenan 137:10).
Insaed long skripja, oli komperem selestial kingdom wetem glori mo saen blong san. (Luk long Doktrin mo Ol Kavenan 76:50–70.)
Ol pipol we oli stap laef long wan laef we oli gat respek “we oli no bin kasem wan testemoni long saed blong Jisas taem oli gat mit mo bun, be afta, oli bin akseptem.” bae oli kasem wan ples insaed long terestrial kingdom (Doktrin mo Ol Kavenan 76:74). Hemia i semmak tu long olgeta we oli stap strong long testemoni blong olgeta long Jisas. Kingdom ia oli komperem wetem glori o saen blong mun. (Luk long Doktrin mo Ol Kavenan 76:71–80.)
Olgeta we oli stap gohed nomo wetem ol sin blong olgeta mo oli no bin sakem sin long laef ia o akseptem gospel blong Jisas Kraes long spirit wol bae oli kasem riwod blong olgeta long telestial kingdom. Kingdom ia oli komperem wetem glori o saen blong sta. (Luk long Doktrin mo Ol Kavenan 76:81–86.)
Ol aotlaen ia i wan eksampol blong wanem we yu save tijim long wan sapos yu gat wan sot taem nomo i stap. Taem yu stap yusum aotlaen, jusum wan o moa prinsipol blong tijim. Doktrin fandesen blong wanwan prinsipol oli putum i stap bifo long lesen.
Taem yu tij, askem ol kwestin mo lisin. Givimaot ol invitesen we bae i helpem ol pipol blong lanem olsem wanem blong kam antap blong kam moa kolosap long God. Wan impoten invitesen i blong man o woman ia i mit wetem yu bakegen. Longfala blong lesen bae i dipen long ol kwestin we yu askem mo hamas taem yu stap lisin.
Wanem we Save Tijim long Ol Pipol blong 3-10 Minit
Yumi evri wan ol pikinini blong God. Yumi ol memba blong famli blong Hem. Hem i save mo lavem wanwan long yumi.
God i bin mekem wan plan blong mekem yumi stap hapi mo progres long laef ia mo blong taem we i no save finis.
Insaed long plan ia blong God, yumi nidim blong kam long wol blong kasem bodi blong mit mo bun, lan mo gro.
Jisas Kraes i stamba blong plan blong God. Hem i mekem i posibol blong yumi kasem laef we i no save finis.
Tru long daereksen blong God, Jisas i krietem wol.
Ol eksperiens blong yumi long wol oli kam blong helpem yumi blong rere blong kambak long ples we God i stap long hem.
Wanwan long yumi i mekem sin, mo wanwan long yumi bae i ded. from se God i lavem yumi, Hem i sendem Pikinini blong Hem, Jisas Kraes, i kam long wol blong pemaot yumi long sin mo ded.
Evri samting we oli mekem i no stret, bae oli save mekem i kam gud tru long Atonmen blong Jisas Kraes.
Taem we bodi blong yumi i ded, spirit blong yumi i gohed blong laef. Long en, bae yumi evri wan i laef bakegen long ded. Hemia i minim se spirit blong wanwan man mo bodi bae i joen bakegen, mo wanwan long yumi bae i laef blong oltaem long wan bodi we i stret gud evri wan mo we i laef bakegen long ded.
Taem yumi laef bakegen long ded, Jisas Kraes bae i jajem yumi. Bae i gat sam nomo we bae oli we God bae i akseptem olgeta, evri pikinini blong God bae oli kasem wan ples insaed long wan kingdom blong glori. Yumi save gobak blong stap long ples we God i stap long hem sapos nomo yumi stap fetful.