?Huia i Jisas Kraes? ?Olsem wanem nao Hem i save helpem mi mo famli blong mi?
?Wanem nao i minim blong gat fet long Jisas Kraes? ?Olsem wanem nao taem mi gat fet long Hem i blesem laef blong mi?
?Hem i minim wanem blong sakem sin?
?Olsem wanem nao mi filim pis blong God mo fogivnes blong Hem afta we mi bin mekem ol nogud joes?
?Wanem nao i stamba tingting blong baptaes?
?Wanem i presen ia blong Tabu Spirit?
?Hem i minim wanem blong stap stap strong kasem en?
Gospel blong Jisas Kraes hem i olsem wanem yumi kam long Kraes. Hem i isi inaf blong wan pikinini i save andastanem hemia. Lesen ia i lukluk nomo long gospel mo doktrin blong Kraes, we i tekem tu fet long Jisas Kraes, fasin blong sakem sin, baptaes, presen ia blong Tabu Spirit, mo stanap strong kasem en. Hem i lukluk nomo tu long olsem wanem nao gospel i blesem evri pikinini blong God.
Toktok ia gospel i minim stret se “gud nius.” Gospel blong Jisas Kraes hem i gud nius from se hem i givim doktrin—trutok we i no save finis—yumi nid blong kam long Hem mo bae oli sevem yumi (luk long 1 Nifae 15:14). Gospel i tijim yumi Olsem wanem nao blong laef long wan gudfala laef mo laef we i gat mining. Gud nius blong gospel i givim wan wei long yumi blong kasem fogivnes long ol sin blong yumi.
Sam Tingting blong Stap Tij
Seksen ia i givim wan eksampol blong aotlaen blong helpem yu rere blong tij. I tekem tu ol eksampol blong ol kwestin mo ol invitesen we yu save yusum.
Taem yu stap rere blong tij, prea mo tingting long situesen blong wanwan man o woman mo ol nid blong go long saed blong spirit. Jusum wanem we i save help bigwan long taem blong tij. Rere blong talem mining blong ol toktok we ol pipol bae oli no save andastanem. Mekem plan folem hamas taem we bae yu gat, taem yu stap tingbaot blong mekem ol lesen oli sot.
Jusumaot ol skripja blong yusum taem yu tij. Seksen blong “Doktrin Fandesen” blong lesen i tekem tu plante long skripja we oli save help.
Tingting long wijwan kwestin blong askem taem yu stap tij. Mekem plan blong givimaot ol invitesen we bae i leftemap tingting blong wanwan man o woman blong tekem aksen folem.
Tokbaot bigwan ol promes blesing blong God, mo serem testemoni blong yu abaot wanem we yu tijim.
Pikja
ol misinari oli stap tijim wan famli
Wanem Nao YU Save Tijim long Ol Pipol long 15-25 minit
Jusum wan o moa long ol prinsipol ia blong tijim. Doktrin fandesen blong wanwan prinsipol oli givim afta long aotlaen ia.
Tabu Misin blong Jisas Kraes
God i sendem Pikinini blong Hem we i lavem tumas, Jisas Kraes, i kam long wol blong pemaot yumi long sin mo ded.
Tru long atonmen mo sakrifaes blong Jisas, yumi save klin aot long ol sin blong yumi mo kam tabu taem yumi sakem sin.
Afta we oli hangem Jisas long kros, Hem i laef bakegen long ded. From laef bakegen long ded blong Hem, bae yumi evri wan i laef bakegen long ded afta we yumi ded. Hemia i minim se spirit blong wanwan man mo bodi bae i joen bakegen, mo wanwan long yumi bae i laef blong oltaem long wan bodi we i stret gud evri wan mo we i laef bakegen long ded.
Fet long Jisas Kraes
Fet hem i fas prinsipol long gospel blong Jisas Kraes.
Fet long Jisas Kraes i tekem tu filing blong gat tras se Hem i Pikinini blong God mo stap trastem Hem olsem Sevya mo Ridima blong yumi.
Fet long Jisas Kraes i wan prinsipol blong aksen mo paoa.
Yumi mekem fet blong yumi i kam strong taem yumi stap prea, stap stadi long skripja, mo blong stap obei long ol komanmen.
Fasin blong Sakem Sin
Fet long Jisas Kraes i lid i go blong sakem sin. Fasin blong sakem sin i stap long rod ia blong stap tanem yu longwe long sin. Taem yumi sakem sin, ol aksen blong yumi, ol tingting blong hat mo tingting blong yumi oli jenis i kam blong stap wan moa wetem tingting blong God.
Taem yumi sakem sin wetem tru hat, bambae God i fogivim yumi. Fogivnes i posibol from se Jisas Kraes i ded from ol sin blong yumi.
Taem yumi sakem sin, yumi filim pis mo ol bigfala harem nogud oli kam oraet.
Fasin blong sakem sin i wan rod blong folem we i blong ful laef. God i welkamem yumi i kambak evri taem we yumi sakem sin. Bae Hem i neva givap long yumi.
Baptaes: Fas Kavenan blong Yumi wetem God
Baptaes hem i olsem wanem yumi mekem fas kavenan rilesensip wetem God.
Baptaes i gat tu pat: baptaes long wota mo long Tabu Spirit. Taem yumi kasem baptaes mo konfemesen, yumi kam klin aot long ol sin blong yumi, we i givim wan niufala stat long laef blong yumi.
Yumi kasem baptaes andanit long wota, folem eksampol blong Jisas.
Ol pikinini oli no baptaes kasem we oli gat eit yia nomo. Ol pikinini we oli ded bifo long yia ia, oli pemaot olgeta tru long Atonmen blong Jisas Kraes.
Yumi tekem mo kaekae sakramen evri wik blong tingbaot sakrifaes blong Jisas mo blong mekem i kam niu bakegen ol kavenan blong yumi.
Presen we I Tabu Spirit
Tabu Spirit i nambatri memba blong Godhed.
Afta we yumi kasem baptaes, yumi kasem presen ia blong Tabu Spirit tru long odinens blong konfemesen.
Taem yumi kasem presen ia blong Tabu Spirit, yumi save gat Hem olsem kompanion blong yumi truaot long laef blong yumi sapos yumi stap fetful.
Tabu Spirit i mekem yumi kam tabu, i lidim yumi, i givim kamfot mo helpem yumi blong save trutok.
Stanap Strong Kasem En
Blong stap gohed strong i tekem tu fasin blong praktisim fet long Jisas Kraes evri dei. Yumi gohed blong kipim ol kavenan blong yumi wetem God, sakem sin, lukaot Tabu Spirit olsem kompanion blong yumi mo kaekae sakramen.
Taem yumi fetful blong lukaotem Jisas Kraes, God i promes se bae yumi kasem laef we i no save finis.
Gospel blong Jisas Kraes I Blesem Evri Pikinini blong God
Blong stap laef folem gospel, i mekem glad blong yumi i kam bigwan, i givim insperesen long ol aksen blong yumi mo mekem ol rilesensip i kam moa strong.
Bae yumi save stap hapi—long tugeta, yumi wanwan mo olsem ol famli—taem yumi laef folem ol tijing blong Jisas Kraes.
Tru long gospel blong Jisas Kraes, o famli bae oli kasem blesing long laef ia mo save kam tugeta blong taem we i no save finis ples we God i stap long hem.
Ol Kwestin we Yu Save Askem long Ol Pipol
Ol kwestin ia oli ol eksampol blong wanem yu save askem long ol pipol. Ol kwestin ia oli save helpem yu blong gat wan storian we i gat moa mining mo andastanem nid blong wan man o woman mo tingting blong hem.
?Wanem nao yu save abaot Jisas Kraes?
?Wanem nao i minim long yu blong gat fet long Jisas Kraes?
?Wanem ol jenis nao yu wantem mekem long laef blong yu?
?Olsem wanem nao Tabu Spirit i helpem yu long rod blong yu blong gobak long ples we God i stap long hem?
?Wanem jalenj nao we yu o famli blong yu i stap fesem? ?Letem yumi serem sam wei we gospel blong Jisas Kraes i save help?
Ol Invitesen we Yu Save Givimaot
?Bae yu askem God tru long prea blong helpem yu blong save se wanem we mifala i bin tijim long yu i tru? (Luk long “Ol Niufala Tingting blong Stap Tij: Prea” long las seksen blong lesen 1.)
?Bae yu kam long jos long Sandei ia blong lanem moa abaot wanem we mifala i bin tijim long yu?
?Bae yu ridim Buk blong Momon mo prea blong save se hem i toktok blong God? (Yu save givim sam spesel japta mo ol ves.)
Bae mifala save putum wan taem blong nekis visit blong mifala?
Doktrin Fandesen
Seksen ia i givim ol doktrin mo ol skripja blong yu blong stadi blong mekem save blong yu i kam strong mo testemoni blong yu abaot gospel mo helpem yu blong tij.
Pikja
Olgeta Twelef ia Jisas i Sendem Olgeta, i kam long Walter Rane
Tabu Misin blong Jisas Kraes
Papa long Heven i sendem Pikinini blong Hem we Hem i lavem tumas, Jisas Kraes, i kam long wol blong mekem se evri pikinini blong God bae oli gat janis blong kasem eksperiens long saed blong glad long wol ia mo laef we i no save finis long wol we i stap kam. “Mo hemia i gospel, ol gudfala nius, … se [Jisas Kraes] i bin kam long wol … blong hem i tekem ol sin blong wol, mo blong hem i mekem wol ia i kam tabu, mo blong hem i klinim wol ia long evri fasin we i no stret mo i no gud; tru long hemwan, bae hem i sevem evriwan,” (Doktrin mo Ol Kavenan 76:40–42).
Evri man long wol ia, yumi mekem sin, mo bae yumi evriwan i ded. Sin mo ded bae i save stopem yumi blong kasem laef we i no save finis wetem God, be sapos nomo yumi gat wan Ridima (luk long 2 Nifae 9). Bifo oli krietem wol ia, Papa long Heven i bin jusum Jisas Kraes blong pemaot yumi. Tru long bigfala lav we Oli soem, Jisas i bin kam long wol blong mekem tabu misin ia i hapen. Hem i mekem i posibol blong Hem i pemaot ol sin blong yumi,mo Hem i mekemsua se bae yumi evriwan i laef bakegen long ded afta we yumi ded.
Jisas i laef long laef we Hem i nogat sin. Long en blong seves blong Hem long wol ia, Hem i tekem antap long Hemwan ol sin blong yumi taem Hem i stap safa long garen blong Getsemane mo taem we oli hangem Hem long Kros (luk long 1 Nifae 11:33). Safaring blong Jisas i bigwan tumas we i mekem se Hem i “seksek from soa long bodi, mo blad i ronaot long evri hol long skin” (Doktrin mo Ol Kavenan 19:18). Afta we oli hangem Hem long kros, Jisas i laef bakegen long ded, we i winim ded. Tugeta, tufala samting we i hapen ia, tufala i Atonmen blong Jisas Kraes.
Ol sin blong yumi oli mekem yumi no klin long saed blong spirit, mo “i nogat wan samting we i klin i save stap wetem God” (1 Nifae 10:21). Blong ademap, loa jastis i mas gat wan risal blong ol sin blong yumi.
Atonmen mo sakrifaes blong Jisas i mekem wei blong yumi blong kam klin aot long ol sin mo kam tabu taem yumi sakem sin. Hemia i mekem tu wei blong jastis i glad mo kasem wanem we oli wantem (luk long Alma 42:15, 23–24). Sevya i talem, “Mi … safa evri samting ia long bihaf blong yumi, blong mekem se bae yumi no safa long ol samting ia sapos yumi sakem sin; be sapos yumi no wantem sakem sin, bambae yumi mas safa semmak nomo olsem we Hem i bin safa” (Doktrin mo Ol Kavenan 19:16–17). Sapos hem i no Jisas Kraes,sin bae i endem evri hop blong save laef long fiuja wetem Papa long Heven.
Taem Hem i givim Hemwan olsem wan sakrifaes blong yumi, Jisas i no karemaot responsabiliti blong yuwan. Yumi nid blong gat fet long Hem, sakem sin, mo traehad blong obei ol komanmen. Taem yumi sakem sin, Jisas bae i askem ol raet blong sore blong hem long Papa blong Hem long bihaf blong yumi (luk long Moronae 7:27–28). From se Sevya i toktok long bihaf blong yumi, Papa long Heven bae i fogivim yumi, karem ol hevi samting mo ol sem from ol sin blong yumi (luk long Mosaea 15:7–9). Yumi kam klin long saed blong spirit mo long en bae oli welkamem yumi long ples we God i stap long Hem.
Tabu misin blo Jisas hem i blong sevem yumitu long ded. From we Hem i laef bakegen long ded, bae yumi evriwan i laef bakegen afta we yumi ded. Hemia i minim se spirit blong wanwan man mo bodi bae i joen bakegen, mo wanwan long yumi bae i laef blong oltaem long wan bodi we i stret gud evri wan mo we i laef bakegen long ded. Sapos hem i no Sevya Jisas Kraes, ded bae i endem evri hop blong save laef long fiuja wetem Papa long Heven.
Fas prinsipol blong gospel hem i fet long Lod Jisas Kraes. Fet i fandesen blong evri narafala prinsipol blong gospel.
Fet long Jisas Kraes i blong gat tu tras ya se Hem i Wan Stret Pikinini Ia Nomo blong God. Hemia i tekem tu tras blong yumi long Hem olsem Sevya mo Ridima blong yumi—se Hem nomo i rod blong yumi blong gobak long ples we God i stap long hem (luk long Ol Wok 4:10–12; Mosaea 3:17; 4:6–8). Oli invaetem yumi blong praktisim “fet long hem we i no seksek, mo stap hang fulwan long ol gud wok blong hem, we i gat paoa blong sevem man” (2 Nifae 31:19).
Fet long Jisas Kraes i tekem tu bilif ia se Hem i bin safa from ol sin blong yumi tru long atonmen mo sakrifaes blong Hem. Tru long sakrifaes blong Hem, bae yumi save kam klin mo Hem bae i sevem yumi taem yumi sakem sin. Fasin ia blong kam klin i helpem yumi faenem pis mo hop long laef ia. Hem i letem yumi tu blong kasem wan glad we i fulwan afta we yumi ded.
Fet long Jisas Kraes i tekem tu tras ia se tru long Hem, bae yumi evri wan i laef bakegen afta we yumi ded. Fet i save sapotem mo givim kamfot long yumi long taem we yumi lusum wan. Filing ia blong bigfala harem nogud i save kamaot tru long promes ia blong Laef Bakegen long Ded.
Fet long Jisas Kraes i tekem tu bilif mo tras blong yumi se Hem i bin tekem long Hemwan ol sin mo ol hadtaem blong yumi (luk long Aesea 53:3–5). Hem i save tru ol eksperiens blong Hem long olsem wanem blong gat sore mo givim sapot long yumi tru long taem blong ol jalenj blong laef (luk long Alma 7:11–12; Doktrin mo Ol Kavenan 122:8). Taem yumi praktisim fet, Hem i helpem yumi blong muv i go fored nomata ol hadtaem.
Tru long fet blong yumi long Hem, Jisas i save mekem yumi kam oraet long saed blong bodi mo long saed blong spirit. Oltaem Hem i rere blong helpem yumi taem yumi tingbaot invitesen blong Hem blong “lukluk long mi long evri tingting blong yufala; no gat tu tingting, no fraet” (Doktrin mo Ol Kavenan 6:36).
Wan Prinsipol blong Aksen mo Paoa
Fet long Jisas Kraes i lid i go long aksen. Yumi soem fet blong yumi taem yumi stap obei long ol komanmen mo stap mekem gudfala samting evri dei. Yumi sakem ol sin blong yumi. Yumi stap fetful long Hem. Yumi traehad blong kam moa olsem Hem.
Taem yumi gat eksperiens abaot fet, yumi save kasem eksperiens long paoa blong Jisas long ol evri dei laef blong yumi. Hem bae i givim ona long ol bes efot blong yumi. Hem bae i helpem yumi blong kam antap mo stap longwe long temtesen.
Stap Mekem Fet blong Yumi I Kam Strong
Profet Alma i bin tijim se blong bildimap fet i save stat wetem wan simpol filing blong “wantem blong biliv” (Alma 32:27). Afta, blong mekem se fet blong yumi long Jisas Kraes i kam antap, yumi nid blong lukaotem gud wetem fasin blong stap lanem ol toktok blong Hem, yusum ol tijing blong Hem, mo stap obei long komanmen blong Hem. Alma i tijim se taem gat fasin blong save wet longtaem, gat strong tingting blong holemtaet toktok blong God insaed long hat blong yumi “bae hem i givim rus blong hem i gro; mo … bae i kam wan tri we i gro i kam antap we i lid i go long laef we i stap oltaem”—olsem ia nao bae i mekem fet blong yumi i kam moa strong (Alma 32:41; luk long ol ves 26–43).
Fasin blong sakem sin hem i nambatu prinsipol blong gospel. Fet long Jisas Kraes mo lav blong yumi long Hem i lidim yumi i go blong sakem sin (luk long Hileman 14:13). Fasin blong sakem sin i stap long rod ia blong stap tanem yu longwe long sin. Taem yumi sakem sin, ol aksen blong yumi, ol tingting blong hat mo tingting blong yumi oli jenis i kam blong stap wan moa wetem tingting blong God. Blong kasem fogivnes blong ol sin, oli mekem i posibol tru long atonmen mo sakrifaes blong Hem.
Fasin blong sakem sin i moa bitim blong stap praktisim blong mekem wan samting blong jenisim wan fasin o winim wan samting we yumi no strong long hem. Fasin blong sakem sin i blong tanem yu i go long Kraes wetem tru hat, we i givim long yumi paoa blong gat wan “bigfala jenis” long hat blong yumi (Alma 5:12–14). Taem yumi kasem eksperiens ia blong jenisim hat, yumi bon long saed blong spirit (luk long Mosaea 27:24–26).
Tru long fasin blong sakem sin, yumi developem wan lukluk long God, lukluk long yumiwan, mo lukluk long wol long wan niufala wei. Yumi filim se lav blong God i kam niu bakegen long yumi olsem ol pikinini blong Hem—mo lav blong Sevya long yumi. Janis ia blong sakem sin, i wan long ol blesing blong God we i moa hae, we Hem i bin givim long yumi tru long Pikinini blong Hem.
Process of Repentance
Taem yumi sakem sin, yumi luksave ol sin blong yumi mo filim sem we i kam long tru hat from. Yumi talemaot ol sin blong yumi long God mo askem fogivnes blong Hem. Yumi talemaot tu ol sin blong yumi we oli bigwan long ol Jos lida we oli gat raet blong helpem yumi blong sakem sin. Yumi mekem wanem we yumi save mekem blong stretem, we i minim blong stap traem blong stretem ol problem mo ol aksen blong yumi we oli no stret. Fasin blong sakem sin we i kam stret long hat i nambawan wei blong soem tru ol aksen blong yumi we oli stret mo gud ova long wan sam taem.
Fasin blong sakem sin i wan evri dei proses truaot long laef blong yumi. “Evriwan [yumi] mekem nogud finis, mo [yumi] stap afsaed olgeta long ol gudfala fasin blong God” (Rom 3:23). Yumi mas gohed blong sakem sin, taem yumi tingbaot se yumi “save mekem evri samting long paoa blong Kraes ya we i stap mekem [yumi] strong (Filipae 4:13). Lod i bin leftemap tingting blong yumi mo talem “evri taem we ol pipol blong mi oli sakem sin, bae mi fogivim olgeta long ol rong blong olgeta agensem mi” (Mosaea 26:30).
Ol Blesing blong Fasin blong Sakem Sin
Fasin blong sakem sin i wan gudfala prinsipol we i givim glad mo pis. Hemia i tekem yumi i kam “long paoa blong Ridima, mekem se hem i save sevem sol blong olgeta” (Hileman 5:11).
Taem yumi sakem sin, sem mo harem nogud oli kamaot tru long proses blong taem. Bae yumi filim paoa blong Tabu Spirit i fulap moa long yumi. Tingting blong hat blong yumi blong wantem folem God i gro moa strong.
Pikja
Presiden Russell M. Nelson
“Plante pipol i ting se fasin blong sakem sin, i wan panismen—wan samting blong stap longwe long hem. … Be filing ia, blong kasem panismen, i kam long Setan. Hem i stap traem blong blokem yumi blong lukluk i go long Jisas Kraes, we i stanap wetem ol han blong Hem i open i stap, i stap hop mo i wantem hilim, fogivim, klinim, mekem i kam strong, klinim evriwan, mo mekem yumi kam tabu” (Russell M. Nelson, “Yumi Save Mekem Gud Moa mo Stap Gud Moa,” Liahona, Mei 2019, 67).
Gospel Topik: “Fasin blong Sakem Sin,” “Atonmen blong Jesus Christ”
Pikja
wan yang woman we i stap kasem baptaes
Baptaes: Fas Kavenan blong Yumi wetem God
Fet long Jisas Kraes mo fasin blong sakem sin i mekem yumi rere blong kasem ol odinens blong baptaes mo konfemesen. Baptaes i fas odinens blong sevem man blong gospel blong Jisas Kraes. Taem yumi kasem naesfala odinens ia blong hop, yumi mekem fas kavenan blong yumi wetem God.
Wan odinens hem i wan samting o seremoni we oli mekem, we hem i tabu, tru long atoriti blong prishud. Samfala odinens olsem baptaes, oli impoten blong yumi blong oli sevem yumi.
Tru long odinens, yumi mekem kavenan wetem God. Ol kavenan ia oli ol tabu promes bitwin yumi mo God. Hem i promes blong blesem yumi taem yumi kipim ol promes blong yumi wetem Hem. Yumi mas gat strong komitmen blong holemtaet ol promes blong yumi wetem God.
God i bin givim ol odinens mo ol kavenan blong helpem yumi blong kam long Hem mo kasem laef we i no save finis. Taem yumi kasem ol odinens blong prishud mo kipim olgeta we oli joen wetem, yumi save kasem eksperiens long saed blong “paoa olsem hemia blong God” long laef blong yumi (Doktrin mo Ol Kavenan 84:20).
Kavenan blong Baptaes
Sevya i tijim se baptaes hem i impoten long yumi blong kam insaed long kingdom blong heven (luk long Jon 3:5). Hem i impoten tu long yumi blong kam ol memba blong Jos Ia blong Jisas Kraes Sevya blong yumi i soem eksampol taem Hem i kasem baptaes (luk long Matiu 3:13–17).
Taem yumi baptaes mo kipim ol kavenan blong yumi, God i promes blong fogivim ol sin blong yumi (luk long Ol Wok 22:16; 3 Nifae 12:1–2). Bigfala blesing ia i kam tru long atonmen mo sakrifaes blong Jisas Kraes, we Hem i “lavem yumi tumas, mo long ded blong hem, we blad blong hem i ron, hem i tekemaot ol sin blong yumi” (Revelesen 1:5). God i promesem tu blong blesem yumi wetem Tabu Spirit olsem kompanion blong yumi mekem se yumi save kam tabu, kasem daereksen mo kasem kamfot.
Long pat blong yumi blong baptaes, yumi witnes se bae yumi glad blong tekem long yumi nem blong Jisas Kraes. Yumi promes tu se bae yumi tingbaot Hem oltaem, mo bambae yumi obei ol komanmen blong Hem. Yumi mekem promes blong lavem mo givim seves long ol narawan, “krae wetem olgeta we oli krae; … leftemap tingting blong olgeta we oli nidim fasin blong leftemap tingting, mo blong stanap olsem ol witnes blong God evri taem mo long evri samting, mo long evri ples” (Mosaea 18:9; luk long ol ves 8–10, 13). Yumi soem mo mekem tingting blong givim seves long Jisas Kraes i go kasem en blong laef blong yumi (luk long Doktrin mo Ol Kavenan 20:37; Mosaea 2:17).
Ol kavenan komitmen blong yumi we oli go wetem baptaes oli ol bigfala responsabiliti. Oli givim tu insperesen mo bigfala glad. Oli krietem wan spesel rilesensip bitwin yumi mo Papa long Heven tru lav blong Hem we i givim long yumi we i neva gat en.
Baptaes Andanit long Wota
Jisas i tijim se yumi nid blong kasem baptaes andanit long wota blong kam klin aot long ol sin blong yumi (luk long Doktrin mo Ol Kavenan 20:72–74). Baptaes andanit long wota i wan saen blong ded, taem oli berem mo Laef Bakegen long Ded blong Jisas Kraes (luk long Rom 6:3–6).
Blong baptaes andanit long wota i gat tu saen we i gat paoa long yumiwan. Hem i ripresentem ded blong olfala laef blong yumi, we oli berem laef ia, mo taem yumi kamaot long wota i soem se yumi bon bakegen long saed blong spirit. Taem yumi baptaes, yumi statem rod blong yumi blong bon bakegen mo kam ol spirit boe mo gel blong Kraes (luk long Mosaea 5:7–8; Rom 8:14–17).
Ol Pikinini
Oli no mas mekem baptaes blong ol pikinini kasem taem we oli kasem yia we oli save gud mo nogud, we hem i eit yia (luk long Doktrin mo Ol Kavenan 68:27). ol pikinini we oli ded bifo eit yia, oli sef tru long Atonmen blong Jisas Kraes (luk long Moronae 8:4–24; Doktrin mo Ol Kavenan 137:10). Bifo ol pikinini oli kasem baptaes, oli mas tijim gospel long olgeta mekem se bae oli rere from impoten step ia long laef blong olgeta blong mekem kavenan wetem God.
Sakramen
Papa blong yumi long Heven i wantem yumi blong stap fetful long ol kavenan we yumi mekem wetem Hem. Blong helpem yumi blong mekem hemia, Hem i invaetem yumi blong mit evri wik blong tekem mo kaekae sakramen. Sakramen i wan prishud odinens se Jisas i statem long Ol Aposol blong Hem nomo bifo Atonmen blong Hem.
Blong stap tekem mo kaekae sakramen i stamba tingting blong sakramen miting evri wik. Oli blesem bred mo wota mo pasem long ol kongregesen. Bred i ripresentem sakrifaes blong bodi blong Sevya from yumi. Wota i ripresentem blad blong Hem, we Hem i ron from yumi.
Yumi tekpat long tufala simpol ia blong tingbaot sakrifaes blong Sevya mo blong mekem i kam niu bakegen ol kavenan blong yumi wetem God. Yumi kasem promes we i kam niu bakegen se Spirit be i stap wetem yumi.
Baptaes i gat tu pat. Jisas i tijim se yumi nid blong “bon long wota mo long Spirit” blong kam insaed long kingdom blong God (Jon 3:5; Oli ademap italik). Josef Smit i tijim, “Baptaes andanit long wota, hem i wan haf baptaes, mo i no gat yus sapos i no gat nara haf blong hem—we i baptaes blong Tabu Spirit” (Teachings of Presidents of the Church: Josef Smit [2007], 95).
Baptaes long wota finis, afta, baptaes long Spirit blong i komplitim. Taem yumi kasem tugeta baptaes, yumi kam klin aot long ol sin blong yumi mo yumi bon bakegen long saed blong spirit. Afta, yumi statem wan niufala laef long saed blong spirit olsem ol disaepol blong Kraes.
Yumi kasem baptaes long Spirit tru long wan odinens we oli singaotem konfemesen. Wan o moa long olgeta we oli gat prishud nao bae oli mekem odinens ia taem oli putum han antap long hed blong yumi. Faswan oli konfemem yumi olsem wan memba blong Jos, mo afta oli givim presen ia we I Tabu Spirit long yumi. Semmak odinens ia oli tokbaot tu insaed long Niu Testeman mo Buk blong Momon (luk long Ol Wok 8:14–17; 3 Nifae 18:36–37).
Tabu Spirit i nambatri memba blong Godhed. Hem i wok wan wetem Papa long Heven mo Jisas Kraes. Taem yumi kasem presen ia blong Tabu Spirit, yumi save gat Tabu Spirit. Olsem kompanion blong yumi truaot long laef blong yumi taem yumi stap fetful.
Long Wanem Wei Nao Tabu Spirit I Stap Blesem Yumi
Presen ia blong Tabu Spirit, i presen we i moa hae blong Papa long Heven. Tabu Spirit i klinim yumi mo mekem yumi kam tabu, we i mekem se yumi kam moa tabu, moa komplit, kam moa olsem God (luk long 3 Nifae 27:20). Hem i helpem yumi blong jenis mo kam antap long saed blong spirit taem yumi lukaotem blong folem ol tijing blong God.
Tabu Spirit i stap helpem yumi blong lan mo luksave trutok (luk long Moronae 10:5). Hem i konfemem trutok tu insaed long hat mo maen blong yumi. Blong ademap, Tabu Spirit i stap helpem yumi blong tijim trutok (luk long Doktrin mo Ol Kavenan 42:14). Taem yumi lan mo tijim trutok tru long paoa blong Tabu Spirit, Hem karem ol toktok ia i go long ol hat blong yumi (luk long 2 Nifae 33:1).
Taem yumi lukaotem daereksen wetem tingting we i stap daon long Tabu Spirit, Hem bae i lidim yumi (luk long 2 Nifae 32:5). Hemia i minim tu se bae Hem i givim insperesen long yumi long olsem wanem blong givim seves long ol narafala man.
Tabu Spirit i givim paoa long saed blong Spirit blong helpem yumi blong winim ol samting we yumi strong long olgeta. Hem i helpem yumi blong stap longwe long temtesen. Hem i wonem yumi long ol samting we oli denja long saed blong spirit.
Tabu Spirit bae i helpem yumi blong winim ol jalenj we yumi stap fesem long laef. Hem bae i givhan long yumi long taem blong ol hadtaem o harem nogud, mo stap fulumap yumi wetem hop (luk long Moronae 8:26). Yumi save filim lav blong God tru long Tabu Spirit.
Gospel Topik: “Tabu Spirit,” “Ol Talen long Saed blong Spirit”
Pikja
Jisas i stap holem ol pikinini
Stanap Strong Kasem En
Taem yumi kasem baptaes mo konfemesen, yumi kam insaed long wan kavenan wetem God. Long medel blong ol narafala samting, yumi mekem promes blong obei ol komanmen blong Hem mo givim seves long Hem blong hamas taem we yumi gat blong stap laef long wol ia (luk long Mosaea 18:8–10, 13; Doktrin mo Ol Kavenan 20:37).
Afta we yumi kam insaed long gospel tru long rod blong baptaes mo konfemesen, yumi wokhad blong stap long rod ia. Taem yumi kamaot long rod ia, iven blong sot taem, yumi praktisim fet long Kraes taem yumi sakem sin. Blesing blong fasin blong sakem sin i letem yumi blong kambak rod blong gospel mo gohed blong kasem ol blesing blong ol kavenan we yumi mekem wetem God. Taem yumi sakem sin wetem tru hat, oltaem God bae i wantem blong fogivim mo welkamem yumi bakegen i kambak.
Blong stanap strong kasem en i minim blong stap fetful long God kasem en blong laef blong yumi—tru ol gudfala taem mo ol hadtaem, tru long ol rij samting we yumi gat mo ol samting we oli kam agens. Yumi putum tingting i stap daon mo letem Kraes i stretem yumi mo mekem yumi kam moa olsem Hem. Yumi lukluk long Kraes wetem fet, tras mo hop nomata wanem we i stap kam long laef blong yumi.
Blong stap strong kasem en, i no minim blong holem kasem taem yumi ded. Be i no hemia, hem i minim blong stap lukluk nomo long laef blong yumi, ol tingting, ol aksen blong yumi we i go long Jisas Kraes. Hem i tekem tu fasin blong gohed blong praktisim fet long Kraes evri dei. Mo tu, yumi gohed blong sakem sin, kipim ol kavenan blong yumi wetem God, mo lukaotem Tabu Spirit olsem kompanion blong yumi.
Blong stanap strong kasem en i tekem tu “se yumi mas wokbaot fored wetem strong bilif long Kraes wetem wan stret mo klin hop, mo wan lav blong God mo blong evri man.” Papa long Heven i promesem yumi se taem yumi stap strong kasem en, bae yumi “kasem laef we i no save finis” (2 Nifae 31:20).
Gospel blong Jisas Kraes I Blesem Evri Pikinini blong God
Gospel blong Jisas Kraes hem i blong evri pikinini blong God. Ol skripja oli tijim se “evri wan i semmak long God” nomata long bakgraon blong yumi o situesen. Hem i stap invaetem “evriwan long yumi, “blong kam long hem mo tekpat long gud fasin blong hem; mo hem i no tanem baksaed blong hem long eniwan we i kam long hem” (2 Nifae 26:33).
Gospel i blesem yumi truaot long laef blong yumi long wol ia mo truaot long taem we i no save finis. Bae i posibol blong yumi evriwan i stap hapi—tugeta olsem yumi wanwan mo olsem ol famli—taem yumi laef folem ol tijing blong Jisas Kraes (luk long Mosaea 2:41; “Famli: Wan Ofisol Toktok I Go long Wol,” ChurchofJesusChrist.org). Blong stap laef folem gospel, i mekem glad blong yumi i kam bigwan, i givim insperesen long ol aksen blong yumi mo mekem ol rilesensip i kam moa strong.
Blong stap laef folem gospel blong Jisas Kraes i save protektem yumi taem yumi stap mekem ol joes we i save mekem yumi harem nogud long saed blong bodi mo spirit. Hem i helpem yumi blong faenem paoa mo kamfot long ol taem blong tes blong laef ia mo ol bigfala harem nogud. Hem i mekem rod blong go kasem wan laef we i no save finis wetem bigfala glad.
Wan long ol bigfala mesej blong gospel we i bin kambak i we yumi evriwan i pat blong famli blong God. Yumi ol pikinini boe mo gel blong Hem we Hem i lavem tumas. Nomata long ol famli situesen blong yumi long wol, wanwan long yumi i wan memba blong famli blong God.
Wan narafala pat blong mesej blong yumi i we ol famli oli save joen tugeta blong taem we i no save finis. Famli, God nao i odenem. Plan blong God blong hapines, i mekem se fasin blong holem taet ol famli tugeta i save gohed afta long ded. Ol tabu odinens blong tempol mo ol kavenan oli mekem i posibol blong ol famli oli save stap tugeta blong oltaem.
Tru long laet blong gospel, ol famli oli save stretem ol samting we oli andastanem rong, ol raorao mo ol jalenj. Ol famli we oli seraot from raorao, oli save kam gud bakegen tru long fasin blong sakem sin, fogivnes mo fet long paoa blong Atonmen blong Jisas Kraes.
Gospel blong Jisas Kraes i stap helpem yumi blong developem ol famli rilesensip ol kam moa strong. Hom i bes ples blong tij mo lanem ol prinsipol blong gospel. Wan hom we oli bildim antap long ol prinsipol blong gospel bae i kam wan ples blong ol rifuji mo wan sef ples. Bae hem i wan ples we Spirit blong Lod i save stap.
Ol aotlaen ia i wan eksampol blong wanem we yu save tijim long wan sapos yu gat wan sot taem nomo i stap. Taem yu stap yusum aotlaen ia, jusum wan o moa prinsipol blong tijim. Doktrin fandesen blong wanwan prinsipol oli putum i stap bifo long lesen.
Taem yu tij, askem ol kwestin mo lisin. Givimaot ol invitesen we bae i helpem ol pipol blong lanem olsem wanem blong kam antap blong kam moa kolosap long God. Wan impoten invitesen i blong man o woman ia i mit wetem yu bakegen. Longfala blong lesen bae i dipen long ol kwestin we yu askem mo hamas taem yu stap lisin.
Pikja
ol misinari oli stap tijim ol woman
Wanem we Save Tijim long Ol Pipol blong 3-10 Minit
God i sendem Pikinini blong Hem we i lavem tumas, Jisas Kraes, i kam long wol blong pemaot yumi long sin mo ded.
Fet long Jisas Kraes i wan prinsipol blong aksen mo paoa. Fet i helpem yumi blong kasem eksperiens long saed blong paoa blong Sevya we i save mekem yumi kam strong long laef blong yumi.
Fet long Jisas Kraes i lid i go blong sakem sin. Fasin blong sakem sin i stap long rod ia blong stap tanem yu longwe long sin. Taem yumi sakem sin, ol aksen blong yumi, ol tingting blong hat mo tingting blong yumi oli jenis i kam blong stap wan moa wetem tingting blong God.
Taem we yumi sakem sin, God i fogivim yumi. Fogivnes i posibol from se Jisas Kraes i ded from ol sin blong yumi.
Baptaes i gat tu pat: baptaes long wota mo long Tabu Spirit. Taem yumi kasem baptaes mo konfemesen, yumi kam klin aot long ol sin blong yumi, we i givim wan niufala stat long laef blong yumi.
Afta we yumi kasem baptaes long wota, yumi kasem presen ia blong Tabu Spirit tru long odinens blong konfemesen.
Taem yumi stap fetful blong folem rod blong gospel kasem en blong laef blong yumi, God i promesem se bae yumi kasem laef we i no save finis.