25. Galuega o le Malumalu ma Talafaasolopito o Aiga i Uarota ma Siteki
“25. Galuega o le Malumalu ma Talafaasolopito o Aiga i Uarota ma Siteki,” Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (2024).
“25. Galuega o le Malumalu ma Talafaasolopito o Aiga i Uarota ma Siteki,” Tusitaulima Aoao.
Ata
malumalu
25.
Galuega o le Malumalu ma Talafaasolopito o Aiga i Uarota ma Siteki
25.0
Faatomuaga
O le malumalu o le maota o le Alii. O sauniga ma feagaiga o le malumalu e faamanuiaina ai fanau a le Tama Faalelagi. Ua valaaulia e le Tama Faalelagi Ana fanau uma lava ia agavaa mo, ma ia mauaina sauniga o le malumalu.
O le tuufaatasia o aiga mo le faavavau o se vaega lea o le galuega a le Atua mo le faaolataga ma le faaeaga (tagai i le 1.2). O galuega o le malumalu ma talafaasolopito o aiga o auala ia mo le tuufaatasia ma le faamauina o aiga mo le faavavau (tagai i le Mataio 16:19). O lenei galuega e aofia ai le:
O lenei mataupu e taialaina ai taitai ma tagata o le Ekalesia i le auala e tuufaatasia ai aiga mo le faavavau e ala i galuega o malumalu ma talafaasolopito o aiga. O loo maua nisi faamatalaga i “Malumalu,” “Papatisoga Sui,” ma le “Talafaasolopito o Aiga” (Autu ma Fesili, Potutusi o le Talalelei).
25.1
Auai o Tagata o le Au Paia ma Taitai i Galuega o le Malumalu ma Talafaasolopito o Aiga
Ua i ai i tagata o le Ekalesia le avanoa ma le tiutetauave e fesoasoani ai e tuufaatasia o latou aiga mo le faavavau. Latou te saunia i latou lava e osia feagaiga a o latou mauaina sauniga o le malumalu. Latou te tauivi malosi e tausia na feagaiga.
Latou te fesoasoani foi i tagata o aiga ia malamalama, maua, ma taumafai malosi e tausia feagaiga o le malumalu. Ua i ai i matua le uluai tiutetauave e fesoasoani ia latou fanau ia maua ni aafiaga i faamanuiaga o le malumalu ma le galuega o talafaasolopito o aiga mo tagata o o latou aiga ua maliliu.
Ua uunaia tagata o le Ekalesia e faailoa o latou tauaiga ua maliliu ae lei mauaina sauniga o le malumalu. Ona faatino ai lea e tagata o le Ekalesia ia sauniga mo na tauaiga (tagai i le Mataupu Faavae ma Feagaiga 128:18). I le lalolagi o agaga e mafai e tagata taitasi ua maliliu ona filifili e talia pe teena sauniga ua faatinoina mo i latou.
E valaaulia foi e tagata o le Ekalesia ia aiga ma uo e a’oa’o e uiga i o latou tuaa ma ia latou iloa o latou tala.
E tele meafaigaluega o loo maua e fesoasoani ai i tagata o le ekalesia i a latou galuega o le malumalu ma talafaasolopito o aiga. O nisi o nei mea o loo faamatalaina i le 25.4.1 ma le 25.4.2.
E lagolagoina e taitai o le Ekalesia tagata o le ekalesia i a latou taumafaiga mo le malumalu ma talafaasolopito o aiga e pei ona faamatalaina i le 25.2 ma le 25.3.
25.1.1
Tiutetauave a le Tagata Lava Ia mo le Tapuaiga i le Malumalu
E filimaoti e tagata o le au paia mo i latou lava pe o afea ma pe o le a le tele e tapuai ai i totonu o le malumalu. E le faatuina e taitai se sini faafuainumera po o se faiga e lipoti ai le tapuai i le malumalu.
E mafai e tagata taitoatasi o le ekalesia ma aiga o loo i ai pepa faataga o aoga o le malumalu, ona auai i soo se malumalu latou te mananao ai. E mafai ona latou faia se taimi faatulagaina ma le malumalu. Tagai i le temples.ChurchofJesusChrist.org mo faamatalaga e faafesootai ai malumalu taitasi.
25.1.2
O Malaga a Uarota ma Siteki i le Malumalu
Ua tofia iunite taitasi o le Ekalesia i se itulagi o i ai se malumalu. E le fautuaina ni malaga faatulagaina faaleuarota i malumalu i fafo atu o le itulagi ua atofa i ai le malumalu.
O malaga uma i le malumalu a uarota ma siteki e tatau ona faatulagaina faatasi ma le malumalu. Tagai i le temples.ChurchofJesusChrist.org mo faamatalaga e faafesootai ai malumalu taitasi.
25.2
O Le Faatulagaina o le Galuega o Malumalu ma Talafaasolopito o Aiga i le Uarota
Ua i ai i taitai o uarota ia tiutetauave nei mo galuega o le malumalu ma talafaasolopito o aiga i le uarota:
Fesoasoani i tagata taitoatasi o le au paia e saunia e osia feagaiga ma le Atua e ala i le mauaina o sauniga o le malumalu (tagai i le 27.1).
Fautuaina tagata o le au paia e tapuai i totonu o le malumalu i le tele e mafai ona faatagaina ai e o latou tulaga.
Uunaia tagata taitoatasi ma aiga e a’oa’o i a’oa’oga faavae ma faamanuiaga o le galuega o le malumalu ma talafaasolopito o aiga.
Ia mautinoa o loo aoao atu e le aunoa ia aoaoga faavae ma faamanuiaga o le galuega o le malumalu ma talafaasolopito o aiga i fonotaga po o sauniga a le Ekalesia. O lenei galuega e tuufaatasia ai aiga mo le faavavau.
Fautuaina tagata o le au paia e aoao e uiga i o latou tuaa ma faatino ia sauniga o le malumalu mo i latou.
Lagolago matua i le fesoasoani i a latou fanau e auai i le galuega o malumalu ma talafaasolopito o aiga.
Fautuaina le autalavou uma ma tagata matutua o le ekalesia, e aofia ai tagata fou, ia i ai se pepa faataga o le malumalu o loo aoga.
Tagai i le mataupu 26 mo faamatalaga e uiga i pepa faataga o le malumalu.
25.2.1
Au Epikopo
O le au epikopo e galulue faatasi ma le au peresitene o le korama a toeaina ma le Aualofa a o latou taimua i taumafaiga a le uarota mo le malumalu ma talafaasolopito o aiga. E fefautuaai faatasi e le aunoa nei taitai.
Ua i ai foi i le au epikopo ia tiutetauave faaopoopo nei mo le galuega o le malumalu ma talafaasolopito o aiga:
E galulue faatasi ma le au peresitene o le korama a toeaina ma le Aualofa a o latou ta’ita’ia le galuega a le uarota mo le malumalu ma talafaasolopito o aiga (tagai i le 25.2.2).
E faamautinoa o loo faamaopoopo i le aufono a le uarota ma fonotaga a le aufono a le autalavou le galuega o malumalu ma talafaasolopito o aiga.
Iloilo ma faamaonia le fuafuaga a le uarota mo le malumalu ma talafaasolopito o aiga (tagai i le 25.2.6).
E vaavaaia le faatulagaga o kosi o tapenaga mo le malumalu (tagai i le 25.2.8).
E tuuina atu pepa faataga o le malumalu, (tagai i le mataupu 26).
E feutagai le au epikopo ma le peresitene o le siteki, e filimaoti ai pe valaau se taitai o le uarota mo le malumalu ma talafaasolopito o aiga (tagai i le 25.2.3 mo nisi faamatalaga).
25.2.2
Au Peresitene o Korama a Toeaina ma le Aualofa
O au peresitene o le korama a toeaina ma le Aualofa e taimua i taumafaiga mo malumalu ma talafaasolopito o aiga i lea aso-ma-lea-aso i totonu o le uarota (tagai i le 8.2.4 ma le 9.2.4). O le au peresitene o le korama a toeaina e taitaia nei taumafaiga mo sui auai o le korama a toeaina. O le au peresitene o le Aualofa e taitaia nei taumafaiga mo sui auai o le Aualofa. Latou te galulue faatasi e taitai nei taumafaiga faatasi ma le aufono a le uarota, i lalo o le faamaopoopoga a le epikopo.
Ua i ai i taitai nei ia tiutetauave faaopoopo nei:
Fai atu i se faufautua o malumalu ma talafaasolopito o aiga a le uarota e fesoasoani i tagata o le uarota o e na maua talu ai nei ni valaauga faamisiona e saili ma saunia igoa o tuaa ua maliliu mo sauniga o le malumalu.
Fesoasoani i le aufono a le uarota e atina’e ma faatino le fuafuaga mo le malumalu ma talafaasolopito o aiga i le uarota (tagai i le 25.2.6).
Faamautinoa o loo fuafua ma lipotia le galuega o le malumalu ma talafaasolopito o aiga i le aufono a le uarota ma fonotaga faamaopoopo o le malumalu ma talafaasolopito o aiga.
Taitaia le galuega a le taitai o le malumalu ma talafaasolopito o aiga i le uarota. Afai e lei valaauina lenei taitai, o se tasi o le au peresitene o le korama a toeaina e faatinoina lenei matafaioi (tagai i le 25.2.3).
E taufai tofi e le peresitene o le korama a toeaina ma le peresitene o le Aualofa se tasi o le au peresitene e fesoasoani e taitai le galuega o le malumalu ma talafaasolopito o aiga i le uarota. E galulue faatasi sui nei e toalua o au peresitene. E auai i la’ua i fonotaga faamaopoopo o malumalu ma talafaasolopito o aiga (tagai i le 25.2.7).
Taitai mo Malumalu ma Talafaasolopito o Aiga a le Uarota
E feutagai le epikopo ma le peresitene o le siteki, e filimaoti ai pe valaau se taitai o le malumalu ma talafaasolopito o aiga i le uarota. Afai e tonu ia i laua e tuuina atu lenei valaauga, e fefautuaai le au epikopo ma peresitene o le korama a toeaina ma le Aualofa e filima’oti ai pe o ai e valaau. O lenei tagata e tatau lava o sē e umia le Perisitua Mekisateko. Afai e le’i valaauina lenei taitai, o se tasi o le au peresitene o le korama a toeaina e faatinoina lenei matafaioi.
O le taitai mo le malumalu ma talafaasolopito o aiga a le uarota e lagolagoina le au peresitene o le korama a toeaina ma le Aualofa i o latou tiutetauave o le malumalu ma talafaasolopito o aiga. Ua ia te ia foi tiutetauave nei:
E faamaopoopoina faatasi ma taitai o faalapotopotoga o le uarota ia taumafaiga mo malumalu ma talafaasolopito o aiga, e aofia ai ia au peresitene o korama ma vasega a le autalavou.
E taitai i fonotaga faamaopoopo o malumalu ma talafaasolopito o aiga (tagai i le 25.2.7).
E auai i fonotaga a le aufono a le uarota pe a valaaulia ai.
Fesoasoani i le aufono a le uarota e atina’e ma faatino le fuafuaga mo le malumalu ma talafaasolopito o aiga i le uarota (tagai i le 25.2.6).
E aoaoina ia faufautua mo malumalu ma talafaasolopito o aiga a le uarota. Faamaopoopo a latou taumafaiga e fesoasoani i tagata o le ekalesia e sue igoa o tuaa ma faatino sauniga o le malumalu mo i latou.
E galulue faatasi ma le taitai misiona a le uarota ma faifeautalai e fesoasoani ai ia i latou o loo aoaoina le talalelei, o tagata fou [o le ekalesia], ma tagata ua toe foi mai ia punouai i le galuega mo malumalu ma talafaasolopito o aiga (tagai i le 23.2 ma le 23.3).
I nofoaga e tatau i ai, tofi ni faufautua o malumalu ma talafaasolopito o aiga i le uarota, e galulue i le nofoaga autu o le FamilySearch (tagai i le 25.3.6).
25.2.4
Faufautua mo Malumalu ma Talafaasolopito o Aiga a le Uarota
O faufautua mo malumalu ma talafaasolopito o aiga a le uarota, e galulue i lalo o le taitaiga a le taitai mo le malumalu ma talafaasolopito o aiga a le uarota. E valaauina e le au epikopo nei tagata o le au paia e galulue. E mafai ona valaauina tagata matutua ma le autalavou. E mafai e peresitene o le korama a toeaina, Aualofa, ma Tamaitai Talavou ona fautuaina atu po o ai e mafai ona auauna atu.
E aoao atu e faufautua isi i ni auala faigofie i le auala e auai ai i galuega o le malumalu ma talafaasolopito o aiga. O o latou tiutetauave nei:
E fesoasoani i tagata o le au paia ia saunia mo le mauaina o sauniga ma osia feagaiga o le malumalu.
Fesoasoani i tagata ia maua aafiaga o faamanuiaga o le iloa o o latou tuaa ma faatinoina ia sauniga o le malumalu mo i latou. O nei aafiaga e faapitoa le taua mo i latou o loo aoao i le talalelei, o tagata fou ma i latou ua toe foi mai, ma i latou o loo sauniuni mo le mauaina o se pepa faataga mo papatisoga sui ma faamauga.
E auai i fonotaga faamaopoopo o malumalu ma talafaasolopito o aiga (tagai i le 25.2.7
E galue i se nofoaga autu o le FamilySearch i le lotoifale pe a tofia ai (tagai i le 25.3.6).
O punaoa e fesoasoani ai i faufautua o malumalu ma talafaasolopito o aiga o loo lisiina i le 25.4.1 ma le 25.4.2.
25.2.5
Aufono a le Uarota
E atiina ae ma le agaga tatalo e sui o le aufono a le uarota se fuafuaga mo le malumalu ma talafaasolopito o aiga i le uarota. Mo faamatalaga e uiga i le fuafuaga, tagai i le 25.2.6.
E mafai e le epikopo ona valaaulia le taitai o le malumalu ma talafaasolopito o aiga a le uarota e auai atu i fonotaga a le aufono a le uarota.
25.2.6
Fuafuaga mo le Malumalu ma Talafaasolopito o Aiga a le Uarota
E tatau i uarota taitasi ona i ai se fuafuaga faigofie mo le malumalu ma talafaasolopito o aiga. E fesoasoani lenei fuafuaga i tagata o le uarota, e aofia ai tamaiti ma le autalavou, e saunia e tapuai i le maota o le Alii ma auai i le faatinoina o le galuega o talafaasolopito o aiga i le tele o taimi e faatagaina ai e o latou tulaga.
E fesoasoani ia peresitene o le korama a toeaina ma le Aualofa i le aufono a le uarota e atia’e le fuafuaga. E fesoasoani ai foi le taitai o malumalu ma talafaasolopito o aiga. I le atiina a’e o le fuafuaga, latou te:
Mafaufau ma le agaga tatalo i manaoga o tagata o le au paia ma punaoa o loo maua.
Faailoa faatinoga e fai i le aluga o le tausaga.
Filimaoti pe faapefea ona faatino le fuafuaga ma fai ia tofitofiga e tusa ai.
O loo lisi atu i lalo ia faataitaiga o mea e ono aofia ai i le fuafuaga:
Fesoasoani i tagata patino o le au paia e sauniuni mo le mauaina o sauniga o le malumalu.
Fesoasoani i tagata o le au paia e faaaoga le vaega o le Ordinances Ready i luga o le FamilySearch.org po o le FamilySearch Family Tree app e ave ai le igoa o se tuaa i le malumalu.
Faaaofia ia tagata fou ma tagata ua toe foi mai, autalavou, ma tamaiti i le galuega o talafaasolopito o aiga.
E le tatau i le fuafuaga o le malumalu ma talafaasolopito o aiga a le uarota ona faatulaga ni aofaiga po o ni faiga e lipoti atu ai mo tapuaiga i le malumalu (tagai i le 25.1.1).
O le epikopo na te iloiloina ma faamaoniaina le fuafuaga. E taulamua tagata o le aufono a le uarota i le faatinoina o le fuafuaga. Latou te lipoti atua le alualu i luma i fonotaga a le aufono a le uarota. Latou te faia foi faafouga i le fuafuaga pe a manaomia ai.
25.2.7
O Fonotaga Faamaopoopo mo Malumalu ma Talafaasolopito o Aiga a le Uarota
E faia e le aunoa ni fonotaga puupuu faamaopoopo, faasamasamanoa mo le malumalu ma talafaasolopito o aiga o le uarota. E faatautaia e le taitai o malumalu ma talafaasolopito o aiga nei fonotaga.
O isi e valaaulia e aofia ai:
Sui ua tofia o au peresitene o le Aualofa ma le korama a toeaina.
O se fesoasoani i le korama a ositaulaga (po o le peresitene o le korama a a’oa’o po o tiakono, pe afai e leai ni ositaulaga i le uarota).
Se tasi o le au peresitene o le vasega aupito matutua o Tamaitai Talavou.
Faufautua mo malumalu ma talafaasolopito o aiga.
O i latou uma e auai, e aofia ai le autalavou, e fefautuaai faatasi o ni tagata auai e tutusa aiā. O le faamoemoega o nei fonotaga e:
Faamaopoopoina o taumafaiga e faatino le fuafuaga a le uarota mo le malumalu ma talafaasolopito o aiga (tagai i le 25.2.6).
Fuafua pe faapefea ona fesoasoani i tagata patino o le uarota e saunia e maua sauniga o le malumalu.
Fuafua pe faapefea ona fesoasoani i tagata patino o le uarota ia latou galuega mo malumalu ma talafaasolopito o aiga.
E mafai ona faia nei fonotaga faafesagai pe i nofoaga vava mamao. E mafai foi ona faia le faamaopoopoga i nisi auala, e aofia ai le valaau i le telefoni, tesi, ma imeli.
25.2.8
Vasega Sauniuni mo le Malumalu
I lalo o le taitaiga a le epikopo, e mafai ona faatulaga se vasega sauniuni mo le malumalu e fesoasoani ai i tagata ia saunia e osia feagaiga a o latou mauaina sauniga o le malumalu. O nei vasega e faia i fafo mai o sauniga masani o le Aso Sa i se taimi e faigofie mo tagata o le au paia. E mafai ona faia i se falelotu po o se fale o se aiga.
E filifili ma le agaga tatalo e sui auai o le aufono a le uarota ia tagata e valaaulia e auai i vasega taitasi. O vasega nei e faapitoa le aoga mo tagata nei:
Tagata fou o le Ekalesia
Tagata o loo sauniuni e maua o latou lava faaeega paia pe faamauina foi
O tagata ua toe malolosi mai i le Ekalesia
O tagata ua uma ona maua faaeega paia ae le’i faafouina o latou pepa faataga o le malumalu mo se taimi umi
E tofia e le au epikopo se faiaoga se toatasi pe sili atu mo sauniuniga mo le malumalu. O lesona ma faatonuga mo le faatulagaina o le kosi o loo maua i le Faaeeina mai Luga: Tusi Lesona a le Faiaoga o le Semina Sauniuni o le Malumalu.. O tagata auai e tuuina atu i ai kopi o le Saunia e Ulufale Atu i le Malumalu Paia Mo suesuega a le tagata lava ia ma punaoa o lesona, tagai i le temples.ChurchofJesusChrist.org.
25.3
O Le Faatulagaina o le Galuega o Malumalu ma Talafaasolopito o Aiga i le Siteki
E lagolago e taitai o le siteki ia taitai o le uarota ma tagata o le au paia ia latou taumafaiga mo le malumalu ma talafaasolopito o aiga.
25.3.1
Au Peresitene o le Siteki
E umia e le peresitene o le siteki ia ki mo le galuega a le Atua mo le faaolataga ma le faaeaga i le siteki. Ua i ai ia te ia ma ona fesoasoani ia tiutetauave nei mo le malumalu ma talafaasolopito o aiga i lena itu o le galuega:
Fesoasoani i tagata o le au paia ia saunia e osia feagaiga paia a o latou mauaina sauniga o le malumalu (tagai i le 27.1).
Faamalosiau i tagata o le au paia e tapuai i totonu o le maota o le Alii i le tele e mafai ona faatagaina ai e o latou tulaga.
Ia faamautinoa o loo aoao atu e le aunoa ia aoaoga faavae ma faamanuiaga o le galuega o le malumalu ma talafaasolopito o aiga i fonotaga a le siteki. O lenei galuega e tuufaatasia ai aiga mo le faavavau.
Fautuaina tagata o le au paia e aoao e uiga i o latou tuaa ma faatino ia sauniga o le malumalu mo i latou.
Faatautaia faatalanoaga o pepa faataga o le malumalu (tagai i le mataupu 26).
I ana fonotaga masani ma peresitene taitasi o le korama a toeaina, e talanoaina e se tasi o le au peresitene o le siteki le galuega o le malumalu ma talafaasolopito o aiga i le uarota (tagai i le 8.3.1). E mafai ona auai ai ia fesoasoani i le au peresitene o le korama a toeaina ma le fautua maualuga na tofia i le korama.
25.3.2
Komiti o le Au Taitai Matutua a le Siteki
O le komiti o le au taitai matutua a le siteki e aofia ai:
Le au peresitene o le siteki.
Le au peresitene o le Aualofa a le siteki.
Fautua maualuga ua tofia e galulue ma korama a toeaina.
O taitai nei e aoao ma lagolagoina au peresitene o le korama a toeaina ma le Aualofa i o latou tiutetauave mo le galuega o le malumalu ma talafaasolopito o aiga (tagai i le 25.2.2). O a’oa’oga e mafai ona faia i se faatulagaga o se vaega po o tagata taitoatasi. E mafai ona valaaulia taitai o le malumalu ma talafaasolopito o aiga a le uarota ia maua lenei a’oa’oga.
Mo nisi faamatalaga e uiga i fonotaga a lenei komiti, tagai i le 29.3.8.
25.3.3
Fautua Maualuga
E mafai e le au peresitene o le siteki ona tofia fautua maualuga e a’oa’o atu ma lagolago ia tagata nei i o latou tiutetauave mo le galuega o le malumalu ma talafaasolopito o aiga:
Au peresitene o korama a toeaina
Taitai mo malumalu ma talafaasolopito o aiga a le uarota
Faufautua mo malumalu ma talafaasolopito o aiga i le siteki
Taitai faamaopoopo o le nofoaga autu o le FamilySearch
E mafai ona tofia se fautua maualuga se toatasi pe sili atu e taitaia nei taumafaiga. Peitai, ua i ai i fautua maualuga uma nei tiutetauave mo uarota ma korama ua tofia i latou i ai.
E mafai ona fesoasoani ia fautua maualuga i taitai o le malumalu ma talafaasolopito o aiga i le aoaoina o faufautua o malumalu ma talafaasolopito o aiga a le uarota. E mafai ona lagolagoina ia fautua maualuga e le au faufautua o malumalu ma talafaasolopito o aiga a le siteki.
E mafai ona tofia e le au peresitene o le siteki se fautua maualuga e faamaopoopoa ia taumafaiga faavolenitia a le siteki mo talafaasolopito o aiga (tagai i le 25.4.3). E mafai ona tofia o ia po o se isi fautua maualuga e vaavaaia le galuega i nofoaga autu o le FamilySearch (tagai i le 25.3.6).
25.3.4
Au Peresitene o le Aualofa a le Siteki
I lalo o le taitaiga a le peresitene o le siteki, o le au peresitene o le Aualofa a le siteki e aoaoina ma lagolago i au peresitene o Aualofa i uarota i o latou tiutetauave mo le galuega o malumalu ma talafaasolopito o aiga (tagai i le 9.2.4).
Faufautua a le Siteki mo Malumalu ma Talafaasolopito o Aiga
O faufautua a le siteki mo le malumalu ma talafaasolopito o aiga e lagolagoina le galuega mo malumalu ma talafaasolopito o aiga i le siteki atoa. Latou te galulue i lalo o le taitaiga a le au peresitene o le siteki ma se tasi pe sili atu foi o fautua maualuga e tofia i le galuega o malumalu ma talafaasolopito o aiga.
E lagolago atu nei faufautua i fautua maualuga ma le au peresitene o le Aualofa a le siteki ia latou taumafaiga e aoao isi i le galuega o malumalu ma talafaasolopito o aiga (tagai i le 25.3.3 ma le 25.3.4). E mafai foi ona tuu atu i ai tofitofiga nei:
Fesoasoani e a’oa’o atu ma lagolago ia tagata o le uarota i o latou valaauga mo le malumalu ma talafaasolopito o aiga.
Afai o maua punaoa, e mafai e le siteki ona faatulaga se nofoaga autu se tasi pe sili atu o le FamilySearch. E tatau ona fesoasoani nei nofoaga autu i e asiasi atu i ai ia maua ai, faaputuputu mai faamatalaga e uiga i, ma tuufaatasia ai tauaiga o soifua ma e ua maliliu e ala i sauniga o le malumalu. Soo se tasi lava e mafai ona faaaogaina nei nofoaga tutotonu.
E valaauina e le peresitene o le siteki se taitai faamaopoopo o le nofoaga autu o le FamilySearch e vaavaaia taumafaiga i nofoaga autu taitasi o le FamilySearch. O nofoaga autu taitasi e masani ona faafaigaluega ai le au faufautua a siteki ma uarota mo malumalu ma talafaasolopito o aiga. E tatau ona tatala ia nofoaga autu o le FamilySearch i taimi talafeagai. E mafai e nofoaga autu o le FamilySearch e latalata i malumalu ona fetuunai a latou taimi faatulagaina ina ia ogatasi ma taimi faatulagaina o le malumalu i le lotoifale.
E avea o se tuusaunoaga, o nisi o nofoaga autu tetele o le FamilySearch e vaaia e Au Peresitene o Eria.
25.3.7
Taitai Faamaopoopo o le Nofoaga Autu o le FamilySearch
O le taitai faamaopoopo o le nofoaga autu o le FamilySearch e faatulagaina le faagaoioiga i aso taitasi o le nofoaga autu o le FamilySearch. E galue o ia i lalo o le taitaiga a le peresitene o le siteki po o se fautua maualuga ua tofia. O tiutetauave e mafai ona aofia ai tiutetauave o loo lisiina i lalo:
Fesoasoani i tagata o le ekalesia e saunia igoa o aiga ina ia mafai ona latou faatinoina sauniga i le maota o le Alii.
Faamaopoopo gaoioiga a le nofoaga autu e fesoasoani ai i tagata o le Ekalesia ma tagata asiasi mai i le alalafaga ia iloa o latou tuaa.
Galulue faatasi ma (1) le fautua maualuga ua tofia e lagolagoina galuega o malumalu ma talafaasolopito o aiga ma le (2) tagata tomai faapitoa mo tekinolosi a le siteki e faafetaiaia manaoga o le faagaoioiga o le nofoaga autu ma tausia ona punaoa.
Faufautua mo Malumalu ma Talafaasolopito o Aiga a le Eria
E mafai e Au Peresitene o Eria ona valaauina faufautua o malumalu ma talafaasolopito o aiga i le eria. Afai e faatagaina e tulaga, e mafai ona valaauina se tagata se toatasi po o se ulugalii e toatasi mo aufono faamaopoopo taitasi. E masani ona auauna atu faufautua mo le tolu i le lima tausaga.
E mafai e le Au Peresitene o le Eria ona tofia Fitugafulu Eria e faamaopoopo le galuega a nei faufautua i aufono faamaopoopo. E tatau ona ogatusa le galuega a faufautua ma le taulaiga a le eria.
E pei ona faatonuina ai e le Au Peresitene o le Eria ma Fitugafulu Eria, e fesoasoani faufautua i peresitene o siteki e faataunuu o latou tiutetauave mo galuega o le malumalu ma talafaasolopito o aiga. E fesoasoani faufautua i peresitene o siteki i le aoaoina o tagata o loo auauna atu i valaauga nei e uiga i o latou tiutetauave:
Fautua maualuga
Au peresitene o Aualofa a Siteki
Komiti o le au taitai matutua a le siteki
Faufautua mo malumalu ma talafaasolopito o aiga i le siteki
Taitai faamaopoopo o le nofoaga autu o le FamilySearch
E mafai ona tofia faufautua e fesoasoani i au peresitene o siteki e saunia tagata mo tapuaiga i malumalu fou ua faasilasila atu i totonu o le eria. O isi tiutetauave e ono aofia ai le aoaoina o taitai o le siteki i mataupu faavae ma faiga masani o galuega o le malumalu ma talafaasolopito o aiga. E aofia ai tulaga nei:
Auala e fesoasoani ai i tagata o le ekalesia i o latou aafiaga muamua i papatisoga sui i le malumalu (tagai i le 23.2).
O le auala e fesoasoani ai i tagata o le ekalesia o loo sauniuni e maua o latou lava faaeega paia pe faamauina (tagai i le 25.2.8, 27.2, 27.3, ma le 27.4).
Auala e faatulaga ai galuega o malumalu ma talafaasolopito o aiga i siteki ma uarota (tagai i le 25.3 ma le 25.2).
Auala e lagolago ai au peresitene o korama a toeaina ma le Aualofa i o latou tiutetauave (tagai i le 25.2.2).
O le auala e mafai ai e galuega o malumalu ma talafaasolopito o aiga ona faamanuiaina tamaiti ma le autalavou (tagai i le 10.2.4, 11.2.4, ma le 12.2.4).
Auala e faia ai fonotaga faamaopoopo anoa o malumalu ma talafaasolopito o aiga (tagai i le 25.2.7).
Auala e fesoasoani ai i taitai o le uarota e fuafua ma faatutu ni sini (tagai i le 25.2.6).
25.4
Punaoa o Talafaasolopito o Aiga
25.4.1
FamilySearch.org, Polokalama o le Ordinances Ready, ma le FamilySearch
FamilySearch.org o le uepisaite a le Ekalesia e fesoasoani ai i tagata o le ekalesia e sue ma saunia igoa o o latou tuaa mo sauniga o le malumalu. O le Ordinances Ready o se tasi lea o matapule i luga o le FamilySearch.org lea e maua ai se auala faigofie e maua ai aiga po o isi igoa e ave i le malumalu.
Ua saunia foi e le saite ni punaoa faaopoopo. E aofia ai le mauaina, faasoaina atu, ma le faasaoina o tala ma ata o tuaa.
O le tamaitusi O Lo’u Aiga: Tala e Aumaia Faatasi i Tatou e fesoasoani i tagata e faapotopoto ma faasaoina igoa ma tala o aiga. E mafai foi ona fesoasoani i tagata o le au paia e amata ai ona sauniuni ia igoa a le aiga mo sauniga o le malumalu.
O le faavasegaga o igoa, o se faagasologa o le taina i totonu o faamatalaga mai se faamaumauga tusitusia faatalaaga i totonu o se utuofaamatalaga e mafai ona saili ai i luga o le FamilySearch.org.
Iloiloina o faamaumauga mo le sa’o atoatoa.
Faaleleia le sa’o atoatoa o le Gafa o le Aiga.
O i latou e auai i nei gaoioiga, ua latou faia ia mafai ai e isi ona maua gofie o latou augatuaa ma faatino sauniga o le malumalu e fai ai ma o latou sui.
E mafai e soo se tasi ona auai i gaoioiga faavolenitia i le FamilySearch.org. E mafai ona avea lenei mea o se aafiaga anoa faapitoa mo i latou nei:
Autalavou
Talavou matutua
O tagata o le ekalesia e le mafai ona auai soo i sauniga a le Ekalesia
Tagata fou o le Ekalesia
Tagata lautele
E mafai e le au peresitene o le siteki ona tofi se faufautua o le siteki mo malumalu ma talafaasolopito o aiga po o se fautua maualuga e faamaopoopoina lenei galuega.
25.5
Fautuaina Atu ma le Valaauina o Tagata Faigaluega o le Malumalu
25.5.1
Fautuaina Atu o Tagata Faigaluega o le Malumalu
O tagata ua onomea ona faigaluega i le malumalu e iloa i auala nei:
O tagata e faailoa mai e le epikopo po o se isi taitai o le uarota
O tagata o le au paia e talanoa atu i le epikopo e uiga i le auauna atu
O tagata e fautuaina mai e le peresitene o le malumalu, le faatina, po o se isi taitai o le malumalu
O tagata o le ekalesia o ē o loo sauniuni mo, pe ua faatoa taliu mai le galuega faamisiona (tagai i le mataupu 24)
O igoa o tagata ua onomea ona faigaluega i le malumalu e auina mai e faaaoga ai le Recommend Temple Worker tool. O loo avanoa lenei meafaigaluega i epikopo, peresitene o siteki, ma au peresitene o malumalu. O loo otooto atu i lalo le faagasologa mo le auina mai o igoa.
Pe a oo ina faailoa mai e se epikopo se tagata ua onomea ona faigaluega i le malumalu pe ua maua mai se fautuaga mai se peresitene o le malumalu, e talanoa o ia ma le tagata e uiga i le avanoa e galue auauna ai. Na te iloiloina tulaga manaomia mo tagata faigaluega o le malumalu (tagai i le 25.5.2). Afai e taufai lagona e le epikopo ma le tagata ua talafeagai le avanoa, e faatumu e le epikopo ma auina atu le fautuaga e faaaoga ai le meafaigaluega o le Fautuaina Atu o Tagata Faigaluega o le Malumalu. E ao ona malamalama le tagata o le auina mai o le fautuaga e le o mautinoa ai o le a valaauina o ia pe tofia e fai ma tagata faigaluega i le malumalu.
E sosoo ai ma le iloiloina e le peresitene o le siteki le fautuaga. Afai e faamaonia e le peresitene o le siteki le fautuaga, na te auina atu i le peresitene o le malumalu mo le iloiloina e faaaoga ai le meafaigaluega o le Fautuaina Atu o Tagata Faigaluega o le Malumalu.
O tagata o le Ekalesia o e ua valaauina pe tofia o ni tagata e galulue i le malumalu e masani ona tuuto atu i se taimi masani e galue ai i le malumalu i vaiaso taitasi. E tatau i taitai ona aloese mai le tuuina atu o ni valaauga faaopoopo e ono faalavelaveina ai lo latou gafatia e auauna atu i totonu o le malumalu.
O Tulaga Manaomia mo Tagata e Faigaluega i le Malumalu
E fesoasoani tagata faigaluega o le malumalu e faatino sauniga pe fesoasoani i galuega faaletaitaiga i le malumalu. Ina ia fautuaina atu e avea o se tagata faigaluega i le malumalu, e tatau i se tagata o le au paia ona ausia agavaa nei:
E nofo i le itulagi e i ai le malumalu lea o le a galue ai.
Ua maua faaeega paia, faamamaluina feagaiga o le malumalu, ma umia se pepa faataga o loo aoga i le taimi nei o le malumalu.
Ia i ai se molimau malosi o le talalelei toefuataiina a Iesu Keriso.
Ia mafai faaletino ona faatautaia sauniga e aunoa ma se fesoasoani.
Ia agavaa mo le faaaloalogia i le Ekalesia ma le alalafaga.
Galulue lelei ma isi tagata.
Ia faatuatuaina ma ia lelei le soifua maloloina.
E le o i ai se faamatalaga faaopoopo i luga o lona pepa faamaumau i le taimi nei.
Ma le isi, e faamautinoa e le epikopo mea nei:
Afai na tapuia’ia aloaia le avea ma tagata o le ekalesia, e mafai ona fautuaina atu o ia o se tagata fai sauniga ia le itiiti ifo ma le lima tausaga talu ona aveesea ia tapuiā’iga. (Tagai i le 32.11.3ma le 32.16.1
Afai na soloia se tagata e lei maua faaeega paia mai le avea ma tagata o le Ekalesia, pe afai foi na faamavae le tagata mai le avea ma tagata o le Ekalesia, e mafai ona fautuaina atu o ia o se tagata e faigaluega i le malumalu, ia le itiiti ifo ma le lima tausaga talu ona toe faaulufale mai i le Ekalesia. (Tagai i le 32.11.4, 32.14.9, 32.16.1, ma le 32.16.2.)
Afai na soloia se tagata ua maua faaeega paia mai le avea ma tagata o le Ekalesia, pe afai foi na faamavae le tagata mai le avea ai ma tagata o le Ekalesia, e mafai ona fautuaina atu o ia o se tagata e faigaluega i le malumalu, ia le itiiti ifo ma le lima tausaga talu ona maua se toefuataiga o faamanuiaga. (Tagai i le 32.11.432.14.9ma le 32.17.2
25.5.3
Valaauina ma le Vaetofiaina o Tagata e Faigaluega i le Malumalu
A mae’a ona maua e le peresitene o le malumalu le fautuaga mo se tasi e avea ma tagata e faigaluega i le malumalu, e faatalanoa e se tasi o le au peresitene o le malumalu po o se tasi na te tofia le tagata. E pei ona musuia ai, o le tagata e faatautaia le faatalanoaga e valaauina i latou e mafai ona auauna o ni tagata e faigaluega i le malumalu ma vaetofia i latou.