28.

Ol Tempol Odinens blong Ol Bubu

28.0

Fas Toktok

Wan bisop i mas toktok wetem stek presiden blong hem sapos hem i gat kwestin abaot ol tempol mo wok blong tempol, we oli no ansarem insaed long japta ia, o long 38.4. Stek presiden i save daerektem ol kwestin i go long Ofis blong Fas Presidensi.

Ol stek presiden mo ol bisop oli helpem ol memba blong oli kasem ol gudfala eksperiens taem oli stap mekem ol odinens blong ol bubu blong olgeta we oli ded finis. Oli mekem hemia taem oli stap tijim ol memba long saed blong doktrin we i stamba blong tempol wok mo taem hem i meksua se ol memba oli andastanem ol taem blong wet from wan odinens mo ol nara polisi we i go wetem tempol wok.

28.1

Jeneral Gaedlaen

Plante taem, ol memba oli save mekem ol tempol odinens blong olgeta we oli ded ova wan yia finis. Sapos wan we i ded i bin bon long ol las 110 yia, mo man o woman ia we i wantem mekem ol odinens i no wan stret famli (olsem wan waef o hasban we i no divos, wan adalt pikinini, wan papa o mama, o brata mo sista), bae hem i mas askem raet long wan stret famli bifo hem i stap bukum ol tempol odinens ia.

Ol odinens we oli stap mekem blong ol dedman, oli wok nomo sapos hem we i ded, i jusum blong akseptem olgeta mo i kwalifae blong kasem olgeta (luk long Doktrin mo Ol Kavenan 138:19, 32–34).

Long saed blong ol polisi blong ol siling, luk long 38.4.

28.2

Stap Mekem Ol Odinens blong Olgeta Dedman

28.2.1

Hu I Save Tekpat long Ol Odinens long Bihaf blong Ol Dedman

Ol memba we yia blong olgeta i inaf blong go insaed long tempol, mo oli gat wan limit yus tempol rekomen, bae oli save mekem ol baptaes mo ol konfemesen blong olgeta dedman (luk long 26.4.3). Ol memba we oli endao mo oli gat wan tempol rekomen we i laef i stap, oli save tekpat long evri odinens long bihaf blong olgeta dedman (luk long 26.5).

Ol memba we oli gat ol disabiliti oli save mekem ol tempol wok blong olgeta we oli ded finis sapos:

• Tingting blong olgeta i inaf blong andastanem odinens ia.

• Oli save lukaotem olgetawan, o oli gat ol famli o ol fren we oli kam wetem olgeta mo oli gat tempol rekomen, mo oli save givim help sapos i nid.

28.2.2

Ol Baptaes mo Ol Konfemesen blong Olgeta Dedman

Ol grup we oli oganaes, olsem ol famli, ol wod mo ol stek, we oli wantem tekpat long ol odinens long ples blong mekem baptaes, plante taem bae oli putum wan taem i stap wetem tempol, bifo oli kam. Wan o moa long wan adalt i mas kam wetem ol grup ia we oli oganaes, mo hem i meksua se i gat wan gudfala namba blong ol lida we oli ripresentem ol man mo ol woman insaed long grup. Ol adalt ia, oli mas gat ol tempol rekomen we oli laef i stap.

Ol brata mo sista we oli stap helpem long ples blong baptaes, i no nid blong oli setem olgeta apat blong stap olsem ol tempol odinens wokman. Ol brata we oli endao, olgeta we oli holem Melkesedek Prishud, mo ol pris insaed long Aronik Prishud, oli save mekem ol baptaes.

Be ol brata ia nomo we oli endao bae oli save mekem wok long taem blong ol konfemesen mo givim seves olsem man we i kipim rekod long ples blong baptaes, o long konfemesen rum.

Eni memba we i holem wan tempol rekomen we i laef, mo tu, wan limit yus rekomen, i save stap olsem wan witnes long wan proksi baptaes. Olgeta adalt mo yut ia oli save help tu long wok blong mekem long ples blong baptaes, olsem blong helpem ol petron, serem ol klos mo ol tawel, mo taem we i posibol, rekodem ol baptaes mo konfemesen odinens i go long kompiuta sistem.

28.3

Ol Spesifik Situesen

28.3.1

Ol Memba we Oli No Save Go long Wan Tempol bifo Oli Ded

Taem ia blong wan yia blong wet blong mekem ol proksi tempol odinens, i no blong ol memba we oli klin inaf mo oli ded, we, bae oli go long tempol sapos i no from samting we i hapen insaed long laef blong olgeta, we i bin blokem olgeta. Olgeta ia, i gat tu ol pikinini we oli gat 8 yia o moa, mo ol yut we oli bin klin inaf long taem blong ded blong olgeta, be oli no bin kasem endaomen blong olgeta from se oli no bin karem stret yia blong olgeta (luk tu long 28.3.4). Ol pikinini mo ol yut olsem, bae oli no berem olgeta long klos blong tempol.

Blong mekem odinens ia, ol memba blong famli oli mas gat tempol rekomen blong hem we i ded, mo tempol rekomen ia i bin laef i stap long taem we hem i ded, o wan leta blong bisop blong hem we i ded, we i talem se i tru se man o woman ia i bin klin inaf. Tempol rekomen ia o leta ia, bae oli presentem long tempol bifo oli mekem odinens.

28.3.2

Ol Memba we Oli Ded we I No Wan Yia Yet Afta long Baptaes

Sapos wan memba we i klin inaf i ded, be i no wan yia yet afta we hem i baptaes mo kasem konfemesen, oli save finisim ol tempol odinens taem wan yia i pas stat long deit we hem i kasem konfemesen (luk long 28.3.1).

28.3.3

Ol Pikinini we Oli Ded Bifo Oli Bon

Mo tu, oli no nidim ol tempol odinens blong ol pikinini we oli ded bifo oli bon i kam long wol ia. Hemia i no minim se i no gat janis blong wan pikinini we i ded bifo i bon i kam long wol ia blong hem i no pat blong famli long ol taem we oli no save finis. Oli leftemap tingting blong papa mo mama blong trastem Lod mo ol promes blong Hem. Blong kasem moa infomesen, luk long 38.7.3.

28.3.4

Ol Pikinini we Oli Ded Bifo Oli Kasem Eit Yia

Oli no mekem baptaes o endaomen blong wan pikinini we i ded bifo hem i gat 8 yia. Oli stap mekem nomo ol siling blong olgeta long papa mo mama, blong ol pikinini olsem. Sapos pikinini ia i bin sil long papa mo mama blong hem taem hem i bin laef i stap, o sapos pikinini ia i bin bon insaed long kavenan, oli no nid blong mekem wok long bihaf blong hem.

28.3.5

Olgeta we Oli Ded mo Oli Bin Gat Disabiliti long Tingting

Oli stap mekem ol tempol odinens blong olgeta pipol ia we oli ded finis, we oli bin gat ol disabiliti long tingting:

• Olgeta we oli save se oli bin save akaontebol long laef blong olgeta (luk long Doktrin mo Ol Kavenan 20:71)

• Olgeta we oli no save se oli bin save stap akaontebol o no.

Sapos wan i save klia se wan we i ded finis, i bin gat disabiliti long tingting mo i no bin save stap akaontebol, wan odinens ia nomo we bae oli mekem long bihaf blong hem, i blong hem i sil long papa mo mama blong hem, sapos hem i no bin bon insaed long kavenan. Bae i no nid blong mekem ol nara odinens blong tempol, iven sapos hem i bin laef kasem 8 yia o ova long 8 yia (luk long Doktrin mo Ol Kavenan 137:10).

28.3.6

Olgeta we Oli Talem se Maet Oli Ded

Oli save mekem ol tempol odinens blong wan man o woman we oli talem se maet hem i ded, o afta we 10 yia i pas stat long taem ia we oli talemaot se hem i ded. Polisi ia, i blong (1) olgeta man o woman we oli go long wo mo oli lus mo no faenem bodi blong olgeta, olgeta we oli lus long solwota, o olgeta we oli talemaot se oli ded folem loa; mo (2) i blong olgeta we oli lus be i no gat pruf se oli ded, mo oli no faenem ded bodi blong olgeta.

Long evri nara kes blong ol man o woman we oli lus, bae oli no save mekem ol odinens blong tempol blong olgeta kasem taem we 110 yia i pas stat long taem we man o woman ia i bon.

28.3.7

Olgeta we Oli Tekemaot Laef blong Olgetawan

Olgeta we i tekemaot laef blong hemwan bakegen, oli save mekem ol tempol odinens blong hem wan yia afta long deit blong ded blong hem.

28.3.8

Ol Man o Woman we Oli Karemaot Jos Membasip long Olgeta, o Oli Sakemaot Membasip

I nidim raet blong Fas Presidensi blong save mekem ol tempol odinens blong wan we i ded, we long taem we hem i ded, oli bin karemaot Jos membasip blong hem, o hem i bin sakemaot membasip blong hem. Wan memba blong famli i mas raetem wan leta i go long Ofis blong Fas Presidensi. I no nidim wan fom. Bisop o stek presiden i save help wetem rikwes ia sapos i gat nid.

28.4

Jekem Ol Odinens Bifo Wan I Kasem Endaomen

Samtaem, baptaes mo konfemesen blong wan we i ded finis, we oli bin mekem taem we hem i laef yet i stap, oli no save jekem iven afta we oli lukaotem gud olbaot. Sapos wan i kasem endaomen tru long proksi, be baptaes mo konfemesen we hem i bin kasem taem hem i bin stap laef yet, oli no save jekem, nao bae oli mas baptaesem mo konfemem hem tru long proksi. Hem i no nid blong mekem endaomen mo ol siling bakegen afta we oli mekem proksi baptaes mo konfemesen.

28.5

Putumbak Ol Tempol Blesing

Olgeta we oli bin endao we oli karemaot Jos membasip blong olgeta, o oli bin sakemaot membasip blong olgeta, mo afta oli karembak olgeta tru long baptaes mo konfemesen, oli save kasem ol prishud mo tempol blesing nomo tru long odinens blong putumbak ol blesing. Olgeta olsem ia, oli no odenem olgeta long ofis blong prishud, o oli no mekem endaomen blong olgeta bakegen, from se oli putumbak ol blesing ia tru long odinens ia. Blong kasem moa infomesen abaot wei blong mekem odinens ia blong olgeta we oli laef i stap, luk long 32.17.2.

I nidim blong Fas Presidensi i givim raet blong wan i mekem ol odinens ia long bihaf blong ol dedman. Ol memba blong famli blong hem we i ded, bae oli save askem blong oli putumbak prishud mo ol tempol blesing blong memba ia blong famli we i ded finis; blong mekem hemia oli mas raetem wan leta i go long Ofis blong Fas Presidensi. Bisop o stek presiden i save help wetem rikwes ia sapos i gat nid.

Sam pipol oli no bin endao, be oli bin bon insaed long kavenan, o oli bin sil long papa mo mama blong olgeta bifo oli karemaot membasip blong olgeta, o bifo oli sakemaot membasip blong olgeta. Olgeta ia, oli no nid blong silim olgeta bakegen afta we oli bin kambak long Jos tru long baptaes mo konfemesen.