31.

Ol Intaviu mo Givim Kaonsel

31.1

Ol Intaviu

Wanwan stek presiden mo bisop i wan “jaj long Isrel” (Doktrin mo Ol Kavenan 107:72). Wetem atoriti ia, hem i lidim ol intaviu blong faenem sapos wan i klin inaf, mo hem i lidim ol prishud intaviu. Hem i ripresentem Lod taem hem i stap lidim ol intaviu ia. Semmak, hem i mas wantem blong blesem olgeta memba mo helpem olgeta blong laef folem gospel blong Jisas Kraes.

31.1.1

Ol Jeneral Instraksen blong Stap Mekem Intaviu blong Faenem Sapos Wan I Klin Inaf

Ol stek presiden, ol bisop, mo (taem oli givim raet long olgeta) ol kaonsel blong olgeta, oli lidim ol intaviu blong faenemaot sapos wan i klin inaf taem oli folem wanem oli putum i stap long seksen ia. Oli mas rere long saed blong spirit blong mekem se Spirit i lidim olgeta long taem blong ol intaviu ia. Oli mas lukaotem blong kasem paoa blong luksave samting i klia. Hemia i wan presen we i kam long Spirit, we bae i helpem olgeta blong luksave samting we i tru, mo tu, blong luksave ol nid blong ol memba (luk long Doktrin mo Ol Kavenan 46:27–28).

Ol intaviu blong tokbaot hamas wan i klin inaf, oli ol praevet intaviu. Sapos hem we oli stap intaviu long hem i wantem, hem i save askem wan nara adalt blong i stap wetem hem.

Blong lisin gud evriwan, i impoten long taem blong ol intaviu blong faenem sapos wan i klin inaf. Memba blong stek presidensi o bisoprik i mas givim ful mo tru tingting i go long hem ia we oli stap intaviu long hem. Hem we i stap mekem intaviu, i meksua tu se memba i andastanem gud ol kwestin ia we hem i stap askem. Hem i putum inaf taem i stap long saed blong lidim intaviu long wan fasin we i gat respek, mo i no hariap.

31.1.2

Ol Jeneral Instraksen blong Prishud Intaviu

Ol stek presiden, ol bisop mo ol kaonsela blong olgeta, oli intaviu oltaem long ol prishud lida we oli stap ripot i go long olgeta. Wan stamba tingting biaen long ol intaviu ia, hem i blong kasem wan ripot long saed blong ol responsabiliti blong ol lida, o blong harem ol lida oli ansa from ol responsabiliti blong olgeta. Wan nara stamba tingting, hem i blong helpem lida blong setem ol gol mo mekem ol plan blong mekem ol responsabiliti ia. Taem we i gat nid, long taem blong ol intaviu ia, oli luklukbak tu long ol bajet mo hao oli spenem mane.

Hem we i lidim wan prishud intaviu i mas givim instraksen, i mas leftemap tingting, mo givim insperesen long ol lida long ol traehad blong olgeta blong mekem ol koling blong olgeta. Hem i mas talem tangkyu tu, mo mekem lida ia i kam strong moa long laef blong hemwan, mo long famli laef blong hem.

31.1.3

Ol Intaviu we Stek Presiden I Mekem

Stek presiden i mekem olgeta intaviu ia wetem ol memba blong stek:

• Blong ol tempol rekomen blong olgeta we oli stap go kasem endaomen blong olgeta, o bae oli mared o sil insaed long wan tempol (luk long 26.3.1).

• Blong givim nem blong ol fultaem misinari (luk long 24.4.2).

• Blong rilis blong ol fultaem misinari afta we oli kambak hom (luk long 24.8.2).

• Blong ol koling blong stap olsem ol kaonsela insaed long stek presidensi, olsem ol petriak, mo olsem ol bisop, taem oli givim raet long hem from.

• Blong ol koling blong stap olsem presiden blong kworom blong ol elda, stek Rilif Sosaeti presiden, o ol stek klak.

• Blong stap helpem ol memba blong oli sakem ol sin we oli series (luk long japta 32).

Stek presiden i intaviu tu long wanwan bisop, oltaem, blong leftemap tingting blong hem, mo blong givim instraksen long hem. Hem i stap intaviu long stek petriak tu (2) taem long wan yia, o moa (luk long 6.6.4).

31.1.4

Ol Intaviu we Stek Presiden I Mekem o Wan Kaonsela we I Kasem Wok From

Stek presiden o wan kaonsela we hem i givim wok ia long hem, i mekem olgeta intaviu ia wetem ol memba blong stek. Bifo intaviu i tekem ples blong eniwan long ol stamba tingting ia we i kam afta, memba blong stek presidensi i meksua se man o woman we bae oli intaviu long hem, bisop blong hem, o wan kaonsela blong bisoprik i kliarem hem finis.

• Blong riniu ol tempol rekomen (luk long 26.3.1).

• Blong odinesen long ol ofis blong elda mo hae pris (luk long 38.2.5.1

• Blong ol koling blong stap givim seves long ol posisen blong Jos olsem we i stap insaed long 30.8.

• Blong endosmen blong wan i aplae long ol yunivesiti mo kolej blong Jos (luk long 15.3

• Blong wan endosmen blong tekpat long lon program blong Pepetuol Edukesen Fand, long ol ples we oli givim raet blong program ia i stap long hem (luk long 22.13).

Sapos wan kaonsela long stek presidensi i faenem sam series poen, olsem ol fasin blong brekem loa we i nidim man o woman blong konfes, nao hem i mas sendembak memba ia i go long bisop kwiktaem, mo i no wet.

31.1.5

Ol Intaviu we Bisop I Mekem

Bisop i mekem olgeta intaviu ia wetem ol memba blong wod:

• Blong ol tempol rekomen blong olgeta we oli stap go kasem endaomen blong olgeta, o bae oli mared o sil insaed long wan tempol (luk long 26.3.1).

• Intaviu blong ol limit yus tempol rekomen blong ol niu konvet (luk long 26.4.2).

• Blong givim nem blong ol misinari kandidet (luk long 24.4.2).

• Blong odinesen long ol ofis blong elda mo hae pris, taem we stek presidensi i givim raet long hem from (luk long 38.2.5.1).

• Blong ol yia taeting setelmen (luk long 34.4.1.5).

• Blong ol koling blong stap olsem ol presiden blong ol wod oganaesesen.

• Blong odinesen long ofis blong pris (luk long 38.2.5.2).

• Blong odinesen long ol ofis blong elda mo hae pris (luk long 38.2.5.2).

• Blong ol koling blong stap olsem ol asisten long kworom blong ol pris.

• Intaviu blong ol yut (luk long 31.1.7).

• Blong ol help we i yusum fas ofring (luk long 22.2.2).

• Blong endosmen blong wan i aplae, o i gohed blong skul long ol yunivesiti mo kolej blong Jos (luk long 15.3).

• Blong stap helpem ol memba blong oli sakem ol sin we oli series (luk long japta 32).

Bisop i mit tu, oltaem, wetem presiden blong kworom blong ol elda mo presiden blong Rilif Sosaeti; hem i mit wetem tufala wanwan, mo tufala tugeta tu (luk long 8.3.1 mo 9.3.1).

31.1.6

Ol Intaviu we Bisop I Mekem o Wan Kaonsela we I Kasem Wok From

Bisop o wan kaonsela we hem i givim wok ia long hem, i mekem olgeta intaviu ia wetem ol memba blong wod. Bisop nomo i save lukluk long ol problem abaot loa blong jastiti mo ol nara mata long saed blong klin fasin, mo ol nara series sin, long taem blong ol intaviu ia. Sapos wan kaonsela i faenem sam series poen, olsem ol sin we i nidim man o woman blong konfes, nao hem i mas sendembak memba ia i go long bisop kwiktaem, mo i no wet.

• Blong riniu ol tempol rekomen mo ol limit yus rekomen (luk long 26.3, 26.4, mo 26.5).

• Blong ol koling blong stap givim seves long ol posisen blong Jos olsem we i stap insaed long 30.8.1.

• Blong baptaes mo konfemesen blong ol pikinini we oli gat 8 yia, we oli ol memba blong rekod, o, sapos oli no ol memba blong rekod, oli mas gat papa, o mama, o wan we i lukaotem long hem we i wan memba blong Jos, we i mas stap long taem blong intaviu (luk long 38.2.3.3).

• Blong ol koling blong givim seves olsem presiden, ol kaonsela, mo sekretari blong kworom blong ol dikon; presiden, ol kaonsela, mo sekretari blong kworom blong ol tija; mo sekretari blong kworom blong ol pris; presiden, ol kaonsela, mo sekretari blong ol klas blong Ol Yang Woman. Be, bisop nomo i save setem apat ol presiden blong kworom blong ol dikon, mo hemia blong ol tija.

• Intaviu blong olgeta we oli gat 11 yia taem oli stap muv aot long Praemeri. Long taem blong intaviu ia, bisop o kaonsela we hem i givim wok ia long hem, oli stap intaviu tu long ol yang man blong faenemaot sapos oli klin inaf mo oli rere blong kasem Aronik Prishud. Hem i stap intaviu long ol yang woman blong stap rere blong go joenem program blong Ol Yang Woman.

• Blong odinesen long ofis blong dikon o tija (luk long 38.2.5.2).

• Ol intaviu blong ol yut mo ol yang singgel adalt (luk long 31.1.7 mo 31.1.8).

• Intaviu blong kasem petriakel blesing (luk long 38.2.12).

• Intaviu blong wan we i kasem prishud we i wantem stap olsem voes long wan prishud odinens long wan nara wod, be i no gat tempol rekomen. Sapos wan i klin inaf, bae bisoprik i fulumap mo saenem fom ia: Givim Nem blong Mekem Wan Odinens.

• Blong ol memba we bae oli go joenem militeri seves (luk long 38.9.2).

• Blong wan endosmen blong tekpat long lon program blong Pepetuol Edukesen Fand, long ol ples we oli givim raet blong program ia i stap long hem (luk long 22.13).

31.1.7

Ol Gaedlaen blong Ol Yut Intaviu

31.1.7.1

Wok blong Papa mo Mama

Papa mo mama, tufala i gat fas wok ia blong tijim gospel blong Jisas Kraes long ol pikinini blong tufala. Oli helpem ol pikinini blong tufala blong oli gro long saed blong spirit, mo blong mekem olgeta oli rere blong mekem mo kipim ol tabu kavenan. Papa mo mama i toktok tugeta oltaem wetem ol pikinini blong tufala blong luk se oli stap klin inaf, mo tufala i helpem olgeta blong oli sakem sin mo mekem gud moa. Ol bisop mo ol nara lida blong Jos oli sapotem ol papa mo mama wetem ol wok ia.

31.1.7.2

Komunikesen blong Bisop long saed blong Ol Intaviu

Taem wan yang woman i stap rere blong go joenem oganaesesen blong Ol Yang Woman, mo taem wan yang man i stap rere blong kasem Aronik Prishud, bisop i serem olgeta infomesen ia i go long yangfala mo papa mo mama blong hem long saed blong ol intaviu. Hem i save mekem hemia olsem pat blong Yia Miting blong Tempol mo Prishud Priperesen, o hem i save mekem long sam nara taem olsem we i nid.

• Papa mo mama, tufala i gat fas wok ia blong tijim mo fidim ol pikinini blong tufala.

• Bisop, o wan long tufala kaonsela blong hem, bae i intaviu long yang man o yang woman, tu taem long wan yia o moa, folem ol risen we oli stap long 31.1.7.3. Wan memba blong bisoprik i save mit tu wetem ol yut blong ansarem ol kwestin, givim sapot, o givimaot ol wok blong mekem.

• Blong helpem ol yut blong rere long saed blong spirit, i nidim blong gat ol intaviu blong lukluk long ol tabu samting olsem ol tempol rekomen, ol prishud odinesen, mo ol misin koling. Ol lida oli wok wetem papa mo mama blong helpem ol yut blong rere from ol intaviu ia.

• Papa mo mama, tufala i leftemap tingting blong pikinini blong tufala blong oli mit wetem bisop taem oli nidim help blong hem, blong i lidim olgeta long saed blong spirit, o blong oli sakem sin.

• Sapos wan yut i wantem, hem i save invaetem wan papa o mama, o wan nara adalt blong i stap wetem hem taem hem i stap mit wetem bisop o wan long ol kaonsela blong hem.

31.1.7.3

Ol Stamba Tingting blong Ol Intaviu

Ol bisop mo tufala kaonsela blong hem, oli gat wan tabu responsabiliti blong lidim, tijim mo givim insperesen long ol yut. Ol intaviu we i gat risal, wetem wanwan long ol yangfala, oli wan impoten wei blong mekem hemia i hapen. Long taem blong ol intaviu ia, bisop mo ol kaonsela blong hem, oli tijim ol yut abaot wei blong kam disaepol blong Sevya. Oli helpem ol yut blong tingting long hamas nao oli mekem gud blong folem Sevya mo ol tijing blong Hem. Ol intaviu oli mas ol eksperiens we oli leftemap tingting long saed blong spirit.

Ol intaviu oli givim wan janis blong talem bakegen long wan yut se hem i gat paoa we i no gat limit blong hem, we hem i save kasem, from se hem i wan pikinini blong God. Ol intaviu oli givim tu wan janis blong givim insperesen long ol yut blong developem ol plan blong oli kam kolosap moa long Papa long Heven, mo blong oli kam antap long ol defren eria blong laef blong olgeta.

Olsem ol ripresentativ blong Sevya, ol bisop oli ol jaj long Isrel we Lod i jusum olgeta. Wetem rol ia, oli lidim ol intaviu blong faenemaot se wan i klin inaf o no, mo oli helpem ol yut blong oli sakem sin blong fasin blong olgeta blong stap brekem loa.

Olgeta we oli lidim ol intaviu, oli soem lav, mo oli mas lisingud. Oli leftemap tingting blong ol yut blong oli toktok, be i no blong olgeta nomo oli toktok.

31.1.7.4

Hamas Taem Oli Mas Holem Ol Intaviu

Bisop i intaviu wanwan yang man mo yang woman, wan taem long wan yia, o moa sapos i nid. Sapos i posibol, hem intaviu olgeta we oli gat 16 mo 17 yia, tu (2) taem long wan yia. Sapos i no posibol, hem i givim wok ia long wan kaonsela blong hem blong lidim sam long ol intaviu ia.

Afta long yia intaviu wetem bisop, wanwan yang man mo yang woman, we i gat 11 kasem 15 yia, oli save intaviu long wan nara taem long yia wetem kaonsela long bisoprik we i stap lukluk ova long Aronik Prishud kworom, o klas blong Ol Yang Woman, i dipen se yangfala ia i stap long wanem grup.

Ol bisop, we oli tekem aksen wetem insperesen mo waes tingting, oli save jenisim hamas taem ol intaviu ia oli tekem ples. Samfala yut, oli nidim blong oli wok moa wetem olgeta, be sam narawan, oli no nidim blong gat fulap intaviu wetem olgeta; be nomata hemia, evriwan i mas gotru long wan intaviu wan taem long wan yia. Saes blong wod, ples we oli stap long hem, ol taem tebol, mo ol nara situesen oli save mekem tu se bae ol intaviu ia oli hapen, o oli no hapen oltaem.

31.1.7.5

Ol Samting blong Toktok Raon long Olgeta

Ol ki poen blong toktok raon long olgeta, i gat insaed olsem wanem testemoni blong yangfala ia i gro long saed blong Papa long Heven, misin mo Atonmen blong Jisas Kraes, mo gospel we i kambak. Bisop mo tufala kaonsela blong hem, oli tokbaot bigwan hamas i impoten blong kipim ol kavenan blong baptaes. Oli tijim ol yut blong oli rere blong mekem mo kipim ol tabu kavenan taem oli stap laef folem wan stret mo gud laef evri dei. Ol memba blong bisoprik oli mas leftemap tingting blong ol yut blong prea oltaem olgetawan long praevet, mo wetem famli blong olgeta, mo blong oli stadi long ol skripja. Mo tu, oli leftemap tingting blong ol yut blong stap kolosap long papa mo mama blong olgeta.

Taem oli tokbaot fasin blong stap obei long olgeta komanmen, bisop mo tufala kaonsela blong hem oli yusum gud ol kwestin blong limit yus tempol rekomen, mo ol standet mo ol eksplenesen we oli stap long Blong Ol Yut Oli Kam Strong. Ol lida oli stretem storian i folem wanem yut i haremsave, mo ol kwestin we oli go long hem. Oli mekemsua se ol storian ia long saed blong stap klin long saed blong seks, oli no mekem se bae yangfala i wantem save moa long saed blong topik ia, o bae i wantem go traem.

Bisop mo tufala kaonsela blong hem, oli save tokbaot tu olgeta poen we oli stap long lis daon ia:

Prishud odinesen Wetem ol yang man, oli save tokbaot ol blesing mo ol diuti blong stap holem Aronik Prishud (luk long Doktrin mo Ol Kavenan 20:46–60; 84:31–48 o ol las toktok blong jeneral konfrens long saed blong topik ia; mo 10.1.1 mo 10.1.2).

Seminari Long saed blong ol yut we yia blong olgeta i inaf blong go long seminari, oli leftemap tingting blong olgeta blong go long seminari oltaem mo oli tokbaot bigwan ol blesing we i kam taem wan i tekpat oltaem long seminari.

Misinari seves. Oli luklukgud speseli blong rere gud long ol yang man blong go givim seves long wan fultaem misin (luk long 24.4.2). Oli leftemap tingting blong ol yang man blong givim seves, mo oli save givim tingting long ol yang woman, sapos oli wantem, blong givim seves (luk long 24.0). Oli toktok raon long fasin blong rere long saed blong spirit taem we oli gohed blong stap klin inaf, stap stadi long gospel, mo stap bildimap wan testemoni. Oli toktok raon tu long fasin blong stap rere long saed blong bodi, long saed blong tingting, filing, mo long saed blong mane.

Ol standet intaviu kwestin blong olgeta we oli stap rere blong kam ol fultaem misinari, oli stap long ChurchofJesusChrist.org/mss. Bisop i luklukbak long ol kwestin ia wetem ol kandidet ia wetem papa mo mama blong olgeta bifo oli holem misin intaviu ia.

Ol memba blong bisoprik oli mas gat tingting mo mas save ol situesen we bae oli talem tangkyu wetem ona long ol yang man we oli no save givim wan fultaem misin seves (luk long 24.3.3) Bisop i toktok raon wetem ol yang man mo ol yang woman, long ol janis we i stap blong oli save mekem wan Jos seves misin, olsem we i posibol (luk long 24.2.2).

Tempol. Oli mekemsua se yangfala i andastanem ol blesing blong kavenan blong tempol, mo mared long tempol, mo wanem i nid blong mekem blong save kasem olgeta blesing ia. Blong givimaot, o blong riniu wan tempol rekomen, oli askem ol standet kwestin we oli stap long saed blong wan limit yus tempol rekomen. Olsem we i nid, oli stretem ol kwestin ia i folem yia mo situesen blong yut.

31.1.8

Ol Intaviu blong Ol Yang Singgel Adalt

Bisop, o wan kaonsela we hem i givim wok ia long hem, i intaviu long wanwan yang singgel adalt. Olgeta intaviu ia, plante taem oli stap holem olgeta wan taem long wan yia. Be bisoprik, we oli tekem aksen wetem insperesen mo waes tingting, oli save jenisim hamas taem ol intaviu ia oli tekem ples long wan yia.

31.1.9

Ol Intaviu blong Olgeta we Oli Karembak Olgeta tru long Baptaes mo Konfemesen

Blong luk ol instraksen abaot ol intaviu blong olgeta we oli bin eskomuniketem olgeta mo oli wantem kam joen bakegen tru long baptaes mo konfemesen, luk long 32.16.2.

31.2

Givim Advaes o Kaonseling

31.2.1

Jeneral Gaedlaen

Ol stek presiden, mo ol bisop oli givim advaes long ol memba blong stek mo wod we oli stap lukaotem help long saed blong spirit, we oli gat ol hevi problem blong olgetawan, we oli gat ol kwestin long saed blong doktrin, o, we oli mekem ol series sin. Ol stek presiden mo ol bisop oli save givim sam long ol wok ia blong givim kaonsel o advaes, i go long ol kaonsela blong olgeta, be i no taem wan memba i mekem ol series sin. Long ol kes we i stret, o taem wan famli i gat problem wetem mane, wan bisop o stek presiden i save givim wok tu, blong givim advaes o kaonsel, i go long wan we i holem Melkesedek Prishud, we oli kwalifae blong givim help. Wan we wan bisop o stek presiden i givim wok long hem blong givim advaes long wan memba, i givim ripot oltaem long lida ia we i givim wok ia long hem. Hem we i kasem wok blong givim advaes ia, i mas kipim ol samting oli konfidensiol i stap.

Ol memba oli mas traehad strong wetem strong tingting, wetem strong prea mo skripja stadi, blong faenem ol wei mo ol ansa, olgetawan. Sapos oli stil nidim help, oli mas askem advaes faswan wetem bisop blong olgeta. Sapos i nid, bisop i save sendem olgeta i go long stek presiden. Ol lokol lida oli no mas leftemap tingting blong ol memba blong ringim, blong visitim, o stap raet i go long hedkwota blong Jos long saed blong ol mata we i blong olgetawan nomo (luk long 38.8.26).

Stek presiden mo bisop, tufala i gat raet blong kasem paoa blong luksave ol samting mo blong kasem insperesen we i nid blong givim advaes long saed blong spirit, mo stap ol kaonsela long laef ia blong ol memba we oli nidim kaen help olsem. Oli mas rere long saed blong spirit bifo oli givim kaonsel long wan memba; oli mekem hemia taem oli lukaotem blong kasem paoa blong luksave ol samting we i stap, mo taem oli lukaotem blong Spirit i lidim olgeta. Bae Spirit i lidim olgeta tru long ol samting we i kam long hat mo maen blong olgeta, tru long ol tingting o filing. Plante taem, Spirit i pusum ol lida blong oli tingbaot ol tijing we oli stap long ol skripja, mo ol tijing we oli kam long ol profet blong lata dei.

Ol lida oli mas yusum ol skripja mo ol toktok blong ol lata-dei profet plante taem, taem we oli stap givim kaonsel. Olgeta toktok blong insperesen ia, oli mas yusum wetem stret tingting, wetem lav, mo wetem gud filing. Oli mas yusum olgeta blong givim insperesen, mo blong leftemap tingting, be i no blong fosem man, o mekem man i fraet.

Ol lida oli mas putum taem blong apoenmen long wan taem we i stret, mo putum inaf taem i stap blong givim kaonsel. Ol memba oli no mas filim se ol lida oli bisi tumas, mo oli gat smol minit nomo blong givim long olgeta. Ol lida oli mas helpem ol memba blong oli filim gud taem apoenmen ia i stat.

Sapos stek presiden o bisop i no filim se hem i rere blong givim kaonsel long wan memba, hem i putum taem blong wan nara apoenmen. Bitwin ol apoenmen ia, hem i lukaotem blong Spirit i lidim hem tru long stadi, prea, mo sapos i nid, tru long fasin blong livim kakae. Hem i save toktok tu wetem prishud lida blong hem.

31.2.2

Fasin blong Stap Dipen long Yuwan long Saed blong Spirit

Ol lida oli leftemap tingting blong ol memba blong developem fasin blong dipen long olgetawan long saed blong spirit. Ol lida oli mas stap longwe long tingting blong traem blong mekem ol desisen long bihaf blong olgeta we oli stap lukaotem blong kasem advaes. Be, ol lida oli helpem olgeta blong oli mekem desisen blong olgetawan wetem Lod we i lidim olgeta.

Stek presiden o bisop oli stap longwe blong givim wan ansa kwiktaem long olgeta ia we oli stap lukaot blong kasem wan advaes. Taem mo go kasem taem we i posibol, hem i helpem olgeta blong oli luklukgud long problem o kwestin blong olgeta, mo i helpem olgeta blong olgeta bakegen oli faenem ansa blong ol problem mo ol kwestin blong olgeta, hemia tru long doktrin blong gospel mo plan blong fasin blong sevem man. Wanem bae i gud tumas, i blong hem i tijim ol memba olsem wanem blong faenem ol ansa mo paoa we i kam long ol skripja, mo blong oli mekem hemia olgetawan nomo.

31.2.3

Ol Kwestin mo Fasin blong Stap Lisin

Taem hem i stap givim kaonsel, stek presiden o bisop i askem ol kwestin blong helpem hem i andastanem situesen blong memba. Hem i traem blong no askem ol kwestin we i no rili nid. Ol kwestin blong askem, oli ol kwestin we i sapos blong mekem ol memba oli taltalemaot filing mo tingting blong olgeta, be i no ol ansa olsem yes, o no. Ol memba nao oli mas toktok fulap.

Taem memba i toktok, stek presiden o bisop i lisim gud, mo i givim ful mo tru tingting i go long hem ia we oli stap intaviu long hem. Fasin blong lisin, hem i wan impoten poen blong mekem se memba i gat tras long hemwan mo tras long hu i stap intaviu long hem. Plante taem, ol pipol oli nidim wan we oli trastem blong i lisin long olgeta taem oli stap wok tru long ol jalenj mo problem blong olgeta.

31.2.4

Fasin blong Sakem Sin mo Stanap Agensem Temtesen

Taem wan memba i mekem wan series sin, stek presiden o bisop i tok strong mo wetem lav i helpem hem blong sakem sin. Hem i tijim se fasin blong sakem sin i minim blong praktisim fet long Jisas Kraes, blong gat wan hat we i fulap long sore mo wan spirit we i wantem blong sakem sin, blong stap luksave mo lego sin fogud, askem fogivnes, putumbak o stretembak ol samting, mo soem wan niu komitmen blong stap obei long ol komanmen. Sapos i nid, hem i putum ol kondisen we oli no strong long membasip blong hem long Jos. Hem i mas savegud situesen we i stap we i mekem se i nid blong gat Jos disiplin, mo hem i mas savegud fasin blong wok blong statem Jos disiplin ia (luk long japta 32).

Taem oli givim advaes long ol memba, ol lida oli stap helpem olgeta blong tekem ol step we bae i blokem olgeta blong foldaon long ol temtesen. Eksampol: ol memba we oli stap mekem fren, olgeta we oli gat hadtaem long mared laef blong olgeta, olgeta we oli seperet o olgeta we oli divos, o oli stap gat trabol wetem ol smol problem long saed blong klin fasin, bae advaes ia i save protektem olgeta mo advaes we i save mekem olgeta oli kam strong moa blong stanap strong agensem fasin blong brekem loa. Ol prisaeding ofisa oli no nid blong wet blong ol memba oli kam lukaotem kaen help olsem, be oli save singaotem olgeta tu blong oli givim advaes long olgeta.

31.2.5

Mared, Divos, mo Seperesen

I no gat wan prishud ofisa i stap blong givim advaes long wan blong huia blong save maredem. Mo tu, hem i no sapos blong givim kaonsel long wan blong hem i divosem hasban o waef blong hem. Olgeta desisen ia, oli mas kam mo stap wetem wanwan man o woman.

Taem wan mared i go finis wetem wan divos, o sapos wan hasban o waef, tufala i seperet, tufala ia i mas kasem kaonsel o advaes oltaem we i kam long ol lida blong Jos. Maet bae i nid blong holem wan Jos membasip kaonsel sapos oli bin mekem ol series sin, hemia long saed blong divos o seperesen blong tufala(luk long japta 32).

Wan memba we i seperet long hasban o waef blong hem, o i stap gotru long wan divos, i mas kasem kaonsel ia blong hem i no deit kasem taem we oda blong divos i kamaot mo i las jajmen folem loa.

31.2.6

Profesonol Kaonseling mo Tritmen

Antap long help blong ol bisop mo ol narawan we bisop i givim wok ia long olgeta, ol memba oli save go kasem sam profesonol kaonseling long ol ples we i gat hemia i stap. Kaonseling ia, o tritmen ia, i save helpem ol memba blong oli andastanem, mo blong fesem ol jalenj blong laef long sam wei we i helti.

Blong mit wetem wan profesonol kaonsela blong kasem sam niu tingting mo skil we i givhan blong kontrolem ol tingting mo filing, hem i no wan saen blong wiknes. Be, hem i wan saen blong stap strong, mo blong gat tingting i stap daon.

Ol memba oli mas lukaotgud blong respektem nem blong ol profesonol kaonsela we oli gat ol laesens blong mekem wok ia. Ol kaonsela oli mas respektem fridom blong mekem joes, ol valiu, mo ol bilif blong olgeta we oli stap lukaotem help. Blong tekem ol valiu ia i kam insaed long wok blong olgeta, i wan stret fasin blong wok long profesonol kaonseling.

Jos i agensem eni tritmen, wetem ol tritmen, o ol tritmen we i hapen oltaem long saed blong jenisim tingting blong wan long saed blong seks, o jenda aedentiti, we i mekem se wan i stap folem ol abius praktis. (Luk long “Filing long Wan we I Sem Seks” mo “Ol Man o Woman we oli Transjenda.”)

Long Yunaeted Stet mo Kanada, ol bisop mo ol stek presiden oli save kontaktem Famli Seves blong faenemaot ol risos we oli stap blong givim kaen kaonseling ia we i go wetem ol prinsipol blong gospel. Ol kontak infomesen ia, oli soem olgeta andanit ia.

1-801-240-1711

1-800-453-3860, ekstensen 2-1711

FamilyServices.ChurchofJesusChrist.org

Long sam nara eria, ol lida oli save kontaktem ol wokman blong Famli Seves, o maneja blong welfea mo indipenden laef; hemia oli mekem tru long eria ofis blong olgeta.

Sapos ol memba oli no save pem profesonol kaonseling olgetawan, o tru long insurens, ol bisop oli gat rod ia blong help wetem ol peimen tru long ol fast ofring. Luk long 22.4 blong kasem ol prinsipol blong stap givim help we i kam long Jos.

31.2.7

Ol Prishud Blesing

Stek presiden o bisop i save givim wan prishud blesing sapos memba we i kasem kaonsel, i rili wantem wan.

31.3

Kipim Ol Samting Oli Konfidensiol

Long taem mo afta long taem blong seves blong olgeta long wan koling, ol lida oli mas kipim ol samting oli konfidensiol i stap, hemia long saed blong ol poen we oli toktok raon long olgeta long taem blong intaviu mo long taem blong kaonseling. Taem wan i brekem hemia, i save spolem tras, testemoni mo fet. Wan lida i no mas toktok raon long ol konfidensiol samting wetem ol narawan, mo hemia i tekem tu ol kaonsela mo waef blong hem, be nomo sapos hem i kasem raet we i kam long man o woman ia we hem i stap intaviu o givim advaes long hem.

Sapos wan kaonsela insaed long bisoprik o stek presidensi i faenem sam series poen we i nid blong toktok raon long hem wetem bisop o stek presiden, hem i eksplenem hemia long memba, mo i sendem hem i go long bisop o stek presiden kwiktaem, mo i no wet.

Sapos wan i muv i go long wan niu wod o stek, prisaeding ofisa blong yunit ia we hem i muv aot long hem, bae i nidim blong serem infomesen ia wetem niufala prisaeding ofisa, abaot ol strong membasip aksen we i stap, o abaot ol nara series mata we oli stap yet wetem niu prisaeding ofisa blong man o woman ia (luk tu long 32.4.4). Taem oli mekem olsem, hemia i no agensem rul blong kipim ol samting oli konfidensiol. Be, prisaeding ofisa i no mas serem ol infomesen abaot ol sin we oli bin stretem finis.

31.4

Proteksen Agensem Ol Rong Tingting

Taem wan memba blong wan bisoprik, o stek presidensi o wan nara lida we i kasem wok ia, i mit wetem wan pikinini, wan yut, o wan woman, hem i mas askem wan papa, o wan mama, o wan nara adalt blong i stap long wan rum narasaed, o i stap aotsaed long doa. Sapos hem we oli stap intaviu long hem i wantem, hem i save askem wan nara adalt blong i stap wetem hem long taem blong intaviu. Ol lida oli mas stap longwe long ol situesen we man i save andastanem samting long wan wei we i no stret.

31.5

Fesem Abius

Taem wan prishud lida i stap intaviu o stap givim advaes long wan, bae hem i kam blong save abaot ol taem we wan i abiusum wan pikinini, o waef, o hasban, o wan narawan. Abius, oli no save akseptem eni kaen wei blong abius. Ol gaedlaen blong mekem ripot mo fesem abius oli stap long 38.6.2.1.

Blong kasem moa infomesen long saed blong fasin blong givim kaonsel, o advaes long ol viktim blong fasin blong rep, o ol nara kil long saed blong seks, luk long 38.6.18.2.