34.

Veika Vakailavo kei na Dikevi ni Fika

34.0

Ai Vakamacala Taumada

Na ikatini kei na isolisoli tale eso e rawa kina vua na Lotu me tosoya na Nona cakacaka ni veivakabulai kei na bula vakacerecerei na Kalou (raica na 1.2). Era sa ka tabu na ilavo oqo. Era matataka na nodra solibula kei na nodra vakabauta na lewe ni Lotu (raica na Marika 12:41–44).

Eso na vakayagataki ni ikatini kei na isolisoli tale eso ena kena tokoni na cakacaka ni Turaga e oka kina na:

• Tara kei na maroroi ni valetabu, veivalenisoqoni, kei na veivale tale eso ni Lotu.

• Tokona na itaviqaravi kei na cakacaka ni Lotu kei ira na kena ivavakoso e veivanua.

• Wasei ni kosipeli e vuravura raraba.

• Tokona na veiparokaramu ni Lotu, me vaka na vuli kei na tuva kawa.

• Vakarautaki ni kakana, vale, kei na veika tale eso e gadrevi vei ira na tamata era vakaleqai tu.

Sa nodra itavi tabu na peresitedi ni iteki kei na bisopi me ra raica raraba na ilavo ni Lotu (raica na Vunau kei na Veiyalayalati 72:9–10). Na ilavo oqo me ra na vakayagataka walega o ira na lewenilotu vakadonui ka me vakayagataki ena inaki vakadonui ni Lotu. Sa dodonu me ra na volaitukutukutaki sara vakavinaka ka taqomaki.

34.1

Veiliutaki ni Veika Vakailavo ena iTeki

34.1.1

Mataveiliutaki ena iTeki

Sa ikoya oqo na itavi ni peresitedi ni iteki me baleta na ilavo ni iteki. Me lesia eso na cakacaka oqo ki vei rau na nona daunivakasala kei na vunivola.

Na peresitedi ni iteki ena:

• Vakavulici ira ka vakauqeti ira na lewenilotu me ra dau sauma vakadodonu na nodra ikatini ka solia vakalevu na isolisoli tale eso (raica na 34.3).

• Ena vakadeitaka o koya na kena vakayagataki vakavinaka ka vakaivolataki na ilavo ni iteki (raica na 34.5).

• Railesuva na itukutuku vakailavo ena veivula ka vakadeitaka ni sa qaravi vakatotolo na veika a dodonu me cakacakataki.

• Raica me ra vulica na matabisopi, iliuliu ni mataisoqosoqo, kei na vunivola na nodra itavi me baleta na ilavo tabu ni Lotu.

• Vakarautaka ka vakatulewataka na ilavovakarau vakayabaki ni iteki (raica na 34.6).

• Raica me vakamuri na idusidusi ni ilavovakarau ni iteki (raica na 34.6.2).

• Dau veitalanoa vakawasoma kei na bisopi yadua me veivosakitaki na ilavo ni tabanalevu.

• Vakadeitaka ni veitabanalevu yadua era dau ciqoma na itukutuku vakayabaki ni nodra soli ikatini.

• Raica me kakua ni wasei na vosanicuru e dau vakayagataki ena parokaramu ni veika vakailavo ni Lotu.

• Vakadeitaka ni sa tauyavutaki ka cakacaka vinaka tiko na komiti ni dikevi fika ni iteki (raica na 34.7.1).

• Me dau tuvakarau me sauma na taro ena gauna ni dikevi fika me baleta na ivolatukutuku vakailavo ni iteki (raica na 34.7).

• Railesuva na dikevi fika ni ivolatukutuku vakailavo ni iteki kei na tabanalevu ka vakadeitaka ni sa wali vakatotolo na veika taucoko a dodonu me cakacakataki (raica na 34.7).

• E raica talega o koya ni vakamuria na iteki kei na tabanalevu na lawa kece ni ivakacavacava (raica na 34.8).

34.1.2

Vunivola ni iTeki

Me na lesia o peresitedi ni iteki na vunivola ni iteki se dua na ivukevuke ni vunivola ni iteki me na veivuke ena kena maroroi na ivolatukutuku vakailavo ni iteki. Me ra na vakamuria vakadodonu o ira na vunivola na lawatu ni gauna oqo me na taqomaki vakavinaka kina na ilavo ni Lotu ka raica me dodonu vakavinaka tu na ivolatukutuku ni Lotu.

Sa koto oqori e ra na nona itavi na vunivola:

• Volaitukutukutaka ka vakacuruma na ilavo kecega e ciqomi kei na dua na lewe ni mataveiliutaki ni iteki.

• Railesuva na itukutuku vakailavo ena veivula ka vakadeitaka ni sa wali vakatotolo na veika kece a dodonu me cakacakataki.

• Vukei iratou na mataveiliutaki ni iteki ena kena vakarautaki na ilavovakarau vakayabaki ni iteki (raica na 34.6.1 kei na 34.6.2).

• Vakadeitaka ni sa vakauta mai na tabanalevu yadua na ripote vakayabaki veivakadeitaki ni ikatini.

• Vakaitavi ena dikevi fika kei ira na daudikevi fika ni iteki ka vakayacora na cakacaka eso ni veivakadodonutaki kevaka e gadrevi vakakina (raica na 34.7).

• Vukei ira na matabisopi ena nodra tuberi na vunivola ni tabanalevu.

E dodonu me ra lewe ni Matabete i Melikiseteki na vunivola ka tiko na nona ivolatara ni valetabu. Me baleta na ikuri ni ivakamacala ni nodra kacivi na vunivola ni iteki, raica na 33.3.2 kei na 33.3.3.

34.2

Veiliutaki ni Veika Vakailavo ena Tabanalevu

34.2.1

Matabisopi

Sa ikoya oqo na itavi ni bisopi me baleta na ilavo ni tabanalevu. Me lesia eso na cakacaka oqo ki vei rau na nona daunivakasala kei na vunivola.

Na bisopi:

• Ena vakavulici ira ka vakauqeti ira na lewenilotu me ra dau sauma vakadodonu na nodra ikatini ka solia vakalevu na isolisoli tale eso (raica na 34.3).

• Ena vakadeitaka ni ra sa vakayagataki vakadodonu ka volaitukutukutaki na ilavo ni tabanalevu (raica na 34.5).

• Railesuva na itukutuku vakailavo ena veivula ka vakadeitaka ni sa qaravi vakatotolo na veika a dodonu me cakacakataki.

• Raica me ra vulica na iliuliu ni mataisoqosoqo kei na vunivola na nodra itavi me baleta na ilavo tabu ni Lotu.

• Vakarautaka ka vakatulewataka na ilavovakarau vakayabaki ni tabanalevu (raica na 34.6).

• Raica me vakamuri na idusidusi ni ilavovakarau ni tabanalevu (raica na 34.6.2).

• Sota vakayabaki kei ira na lewe ni tabanalevu me ra ciqoma na nodra itukutuku ni ikatini.

• Raica me kakua ni wasei na vosanicuru e dau vakayagataki ena parokaramu ni veika vakailavo ni Lotu.

• Sa dau tu vakarau me sauma na taro ena gauna ni dikevi fika ni ivolatukutuku vakailavo ni tabanalevu ka vakadeitaka ni sa wali vakatotolo na leqa kece (raica na 34.7).

34.2.2

Vunivola ni Tabanalevu

Me lesia o bisopi na vunivola ni tabanalevu se dua na ivukevuke ni vunivola me na veivuke ena kena maroroi na ivolatukutuku ni veika vakailavo. Me ra na vakamuria vakadodonu o ira na vunivola na lawatu ni gauna oqo me na taqomaki vakavinaka kina na ilavo ni Lotu ka raica me dodonu vakavinaka tu na ivolatukutuku ni Lotu.

Sa koto oqori e ra na nona itavi na vunivola:

• Volaitukutukutaka ka maroroya na ilavo kece e ciqomi vata kei na dua na lewe ni matabisopi.

• Railesuva na itukutuku vakailavo ena veivula ka vakadeitaka ni sa wali vakatotolo na veika kece a dodonu me cakacakataki.

• Vukei iratou na matabisopi me ratou vakarautaka na ilavovakarau vakayabaki ni tabanalevu (raica na 34.6.1 kei na 34.6.2).

• Vakadeitaka ni ra rawa ni raica na lewenilotu na nodra itukutuku ni cau ka veivuke kevaka e gadrevi.

• Vukea na bisopi me vakarautaka ka vola na itukutuku ni ikatini.

• Vakaitavi ena dikevi fika kei ira na daudikevi fika ni iteki ka vakayacora na cakacaka eso ni veivakadodonutaki kevaka e gadrevi vakakina (raica na 34.7

E dodonu me ra lewe ni Matabete i Melikiseteki na vunivola ka tiko na nona ivolatara ni valetabu. Me baleta na ikuri ni ivakamacala ni nodra kacivi na vunivola ni tabanalevu, raica na 33.4.2 kei na 33.4.3.

34.3

Na Cau

Sa nodra itavi na iliuliu ni Lotu me ra vakavulica vei ira na lewenilotu na ivakavuvuli ni soli ikatini kei na isolisoli tale eso ka vakayaloqaqataki ira me ra bulataka na ivakavuvuli oqo. O ira era sega ni lewe ni Lotu e rawa talega ni ra cau. Ia, o ira ga na lewe ni Lotu e rawa ni ra sauma na ikatini.

Era sa vakauqeti na lewenilotu mera cau ena monalivaliva ena veivanua e rawa kina (raica na donations.ChurchofJesusChrist.org). Era na solia na lewenilotu na nodra isolisoli kei na dua na fomu ni iKatini kei na iSolisoli Tale Eso sa vakaleweni oti vua na bisopi se dua nona daunivakasala (raica na 34.5.2). Kevaka era solia edua na jeke na lewenilotu, e dodonu me saumi ki na Lotu i Jisu Karisito ni Yalododonu Edaidai.

34.3.1

iKatini

Na ikatini sa ikoya na kena soli na ikatini ni ilavo e rawata e dua ki na Lotu ni Kalou (raica na Vunau kei na Veiyalayalati 119:3–4; ni ka era rawata e kena ibalebale na ilavo era rawata). O ira kece na lewenilotu era rawa ilavo e dodonu me ra sauma na ikatini.

Era bulataka na lawa ni ikatini na tamata ni veiyalayalati ni Turaga mai na gauna makawa (raica Nai Vakatekivu 14:18–20; Na Tiko Mai na Lekutu 27:30–32). Sa kaya na Turaga, “Ia na nodra ikatini na noqu tamata … ia oqo me sa lawa tudei vei ira me sega ni mudu” (Vunau kei na Veiyalayalati 119:3–4).

Sa savasava vua na Turaga na ikatini, ka ra vakarokorokotaki Koya na lewenilotu ena nodra sauma na ikatini. Oqo e dua na ivakaraitaki ni vakabauta na Kalou kei na Nona yalayala. O ira era dau sauma na ikatini era sa rawata na yalayala oqo mai vua na Turaga: “Ka vakatovolei au mada kina, sa kaya ko Jiova ni lewevuqa, se’u na dolava se segai na katuba ni lomalagi ka sovaraka vei kemuni na ka ni veivakalougatataki me na sautu dina sara.(Malakai 3:10).

34.3.1.1

Vakayagataki ni iLavo ni iKatini

E dau vakayagataki ga na isolisoli ni ikatini ena inaki ni Turaga, me vaka na veidusimaki mai na Matabose ni Veiwaseyaka na iKatini (raica na Vunau kei na Veiyalayalati 120). Eso na inaki oqo era sa tuvai toka ena 34.0.

34.3.1.2

Veivakadeitaki ni iKatini

Ena dau sota vata kei ira yadua na lewenilotu o bisopi ena iotioti ni vica na vula e veiyabaki me ciqoma kina na nona itukutuku ni ikatini. Ena veigauna vakavudua eso ni yali na bisopi, sa rawa vei peresitedi ni iteki me lesia e dua vei rau na daunivakasala nei bisopi me qarava na itavi oqo.

Era sa sureti kece na lewenilotu me ra sota vata kei na bisopi me:

• Vakaraitaka vei bisopi na kedra ituvaki ni saumi ikatini.

• Vakadeitaka ni sa dodonu vinaka na nodra ivolatukutuku ni cau.

Ke rawa, me ra tiko na lewe ni matavuvale kece, oka kina o ira na gone ena veivakatarogi ni soli ikatini.

Ena gauna ni veivakatarogi ni ikatini, sa dau vakavinavinakataki ira na lewenilotu o bisopi ena vuku ni nodra yalodina. E vakavulica talega na ivakavuvuli ni ikatini, vakayaloqaqataki ira na lewenilotu me ra dau solia na isolisoli ni lolo ena lomasoli, ka veitalanoataka na veika bibi tale eso.

Na idusidusi me baleta na veivakatarogi ni ikatini e dau vakarautaki mai na valenivolavola liu ni Lotu se na valenivolavola ni wasewase sa lesi kina.

34.3.2

Na iSolisoli ni Lolo

Me ra vakayaloqaqataki ira na lewenilotu o ira na iliuliu ni Lotu me ra bulataka na lawa ni lolo. Oqo e oka kina na soli ni isolisoli ni lolo ena lomasoli (raica na 22.2.2).

Ena so na tabanalevu, sa rawa vei bisopi me vakatarai ira na lewe ni Matabete i Eroni me ra kumuna vata na isolisoli ni lolo. Ena nona vakatulewataka oqo, ena raica o bisopi na iwiliwili ni lewe ni Matabete i Eroni, nodra taqomaki, kei na veivakalougatataki vei ira na lewenilotu era rawa ni a sega ni cau.

Me ra lakolako yarua na lewe ni matabete ni ra sokumuna na isolisoli ni lolo. Era na solia ena kena gauna totolo na isolisoli ni lolo vua e dua na lewe ni matabisopi.

Me ra kakua ni solia na lewenilotu na nodra isolisoli tale eso, me vaka na ikatini kei na so tale, vei ira ka sokomuna na isolisoli ni lolo.

Na idusidusi ni kena vakayagataki na isolisoli ni lolo sa vakarautaki tu ena 22.5.2

34.3.3

iLavo ni Kaulotu

Na cau ki na ilavo ni kaulotu ni tabanalevu e vakayagataki vakatabakidua me veivuke ki na ilavo lavaki vei ira na daukaulotu tudei mai na tabanalevu. Sa rawa ni vakayagataki na ilavo soli sivia mai ena dua na tabanalevu me sotavi kina na nodra yalayala eso tale na daukaulotu ena iteki. Sa rawa me vakayagataki na ilavo soli sivia mai ena iteki vei ira na iteki tale eso ena matabose veivakacokotaki me vaka na nona veidusimaki na Vitusagavulu ni iWasewase ka veiliutaki tiko ena matabose.

Na ilavo ni kaulotu ni tabanalevu e sega ni dodonu me vakau vakadodonu vei ira na daukaulotu. E sega ni dodonu me vakayagataki ena dua na itaviqaravi ni kaulotu ena loma ni tabanalevu se iteki na ilavo oqo.

Na cau ki na iLavo Raraba ni Daukaulotu e vakayagataka na Lotu me baleta na sasaga taucoko ni kaulotu.

E dodonu vei ira na peresitedi ni iteki kei ira na bisopi me ra dau vakauta na ilavo ni kaulotu e sivia na veika e gadrevi ena iteki kei na tabanalevu ki na iLavo Raraba ni Kaulotu ena valenivolavola liu ni Lotu se na valenivolavola ni wasewase.

Ena ikuri ni itukutuku me baleta na ilavo ni kaulotu kei na kena vakailavotaki na veiqaravi vakadaukaulotu, raica na 24.3.4.

34.3.4

iKuri ni Cau

E rawa ni ra cau vakailavo na lewenilotu ki na so tale na iwasewase vakadonui. Kevaka era vakayagataka tiko na daucau na fomu ni iKatini kei na iSolisoli Tale Eso, era na vola na yaca ni iwasewase ena iwasewase ni “So Tale” ena fomu.

Me ra kakua ni tauyavutaka na iteki kei na tabanalevu na iwasewase ena iwasewase ni “Eso Tale” me kerei, kumuni, se vakayagataki kina na ilavo me baleta na cakacaka ka sega ni vakadonui mai vei iratou na Mataveiliutaki ni iWasewase. Me baleta na lisi ni veiwasewase vakadonui, me ra veitaratara na lewenilotu vua na vunivola ni tabanalevu.

34.3.5

Veivuke ki na Kawatamata

Na Yalo ni Loloma e Na Lotu i Jisu Karisito ni Yalododonu Edaidai e tabacakacaka ni Valenivolavola ni Matabisopi Vakatulewa. Na tabacakacaka oqo e vakacokotaka ka cakacakataka na cau ni lomasoli ki na Lotu kei na kena veisoqosoqo ni yalololoma kei na kena itaviqaravi, ka sega ni ikatini kei na isolisoli tale eso. Na veivuke me baleta na soli cau ena rawa ena noda veitaratara ki na valenivolavola ni iSolisoli ni Yalololoma:

Philanthropies

1450 North University Avenue

Provo, UT 84604-6080

Talevoni: 1-801-356-5300 se 1-800-525-8074

Imeli: [e-mail]

34.3.6

Soli ni iYau Eso kei na iKatini

E sega ni dau vakayaloqaqataka na Lotu na cau ena veika vakayalovinaka (sega ni ilavo) me ikatini kei na isolisoli tale eso. E vinaka cake vei ira na lewenilotu me ra volitaka na iyauqaqa ka qai sauma na ikatini kei na cau tale eso ena ilavo. Ia, e rawa ni ciqomi ena so na gauna na isolisoli ena yalovinaka. Na cau vakaoqo e rawa ni dua na ivakarau matau ena so na vanua e vuravura.

E dau ciqoma na Lotu na (1) sea, veidinadinati vakailavo, se na ivakadei vakaivola tale eso ka rawa ni dau volitaki vakatotolo kei na (2) so na iyauqaqa ka na rawarawa na kedra volitaki. E dodonu vei ira na lewenilotu mera imeli kina [e-mail] me baleta na ivakamacala ni kena vakayacori na vei cau vakaoqo. Kevaka era vinakata na lewenilotu me ra cau ena veika tale eso, ena veitaratara na peresitedi ni iteki ki na itikotiko liu ni Lotu se na valenivolavola ni iwasewase me vakadonui ni bera ni vakadonuya vua na bisopi me ciqoma.

Na nodra risiti na lewenilotu era dau cau ena veika tale eso ka sega ni vakailavo e dau soli ga mai na itikotiko liu ni Lotu se na valenivolavola ni iwasewase.

34.3.7

E Sega ni Rawa ni Vakalesui Tale na Cau

Ni sa soli na ikatini kei na isolisoli tale eso ki na Lotu, era sa nona na Turaga. Era sa vakatabui Vua. Na cau kece oqori e isolisoli ni dui vuniyaloda sara ga. Era soli ena yalo sega ni vakataratutu, sega ni qai via lewa tale, sega tale ni qai via taukena ena ivakarau cava ga, se me namaka e dua na kena ivakayaga o koya e solia ia na nona veivakalougatataki ga na Turaga.

Sa dodonu vei peresitedi ni iteki kei na bisopi me rau dau tukuna vei ira era cau mai ena ikatini kei na veisolisoli tale eso ni cau oqori ena sega ni rawa ni soli lesu tale. E sega talega ni rawa ni vakalesui mai na ilavo ni kaulotu saumi taumada.

34.4

Taqomaki ni iTukutuku ni iKatini kei na iSolisoli Tale Eso

Sa itukutuku taqomaki na ikatini kei na isolisoli tale eso e solia e dua na lewenilotu. O bisopi duadua ga kei ira sa vakadonui me ra qarava se raica na cau oqo e dodonu me ra rawa ni raica na itukutuku oqo. E sega ni dodonu vei ira na mataveiliutaki ni iteki, matabisopi, kei na vunivola me ra veitalanoataka vakatawadodonu na ituvaki ni nona soli ikatini e dua na lewenilotu. Me ra kakua talega ni veitalanoataka na levu taucoko ni ikatini kei na isolisoli tale eso e ciqomi.

34.5

Qaravi ni Lavo ni Lotu

Me rau vakadeitaka na peresitedi ni iteki kei bisopi ni sa qaravi vakavinaka na ilavo taucoko ni Lotu. Oqo e dua na itavi tabu ni nodrau ilesilesi. Sa tuvanaki tu na kena ivakavuvuli raraba ena wase e tarava. Mera dau raicalesu na matabisopi kei na vunivola na vidio “Sacred Funds, Sacred Responsibilities (iLavo Tabu, iTavi Tabu)” ke lailai me vakadua e veiyabaki.

34.5.1

iVakavuvuli ni Veitokani

Na ivakavuvuli ni veitokani e gadrevi kina e rua na tamata—e dua mai na matabisopi kei na dua na vunivola, se rua mai na matabisopi—me rau vakaitavi kina vakavinaka ena kena volaitukutukutaki ka vakayagataki na ilavo ni Lotu. Sa ka bibi sara na ivakavuvuli oqo ena taqomaki ni ilavo tabu kei na nodra taqomaki na iliuliu ni Lotu.

E dodonu me ra taqomaka ka kakua ni wasea na nodra vosanicuru o ira na iliuliu (raica na 33.9.1.1).

34.5.2

Ciqomi ni iKatini kei Na iSolisoli Tale Eso

Sa solia na Turaga vei ira na bisopi na veivakabauti tabu ni kena ciqomi ka vakaivolataki vakadodonu na nodra ikatini kei na isolisoli tale eso na Yalododonu (raica na Vunau kei na Veiyalayalati 42:30–33; 119). O bisopi duadua ga kei rau na nona daunivakasala ena ciqoma na ikatini kei na isolisoli tale eso. E tabu dredre sara vei ira na watidra, lewe ni matavuvale tale eso, vunivola, se so tale na lewenilotu ena tabanalevu me ra ciqoma na isolisoli oqo. E vakavo ga ena gauna era vakasokomuna mai kina na isolisoli ni lolo o ira na Matabete i Eroni era sa lesi (raica na 34.3.2).

E sega ni dodonu vei ira na iliuliu ni Lotu kei ira na lewenilotu me ra biuta tu vakaveitalia na nodra cau.

34.5.3

Wiliki kei na Volaitukutukutaki ni iKatini kei na iSolisoli Tale Eso

Me na vakadeitaki ka volai na cau ena Sigatabu era ciqomi kina. E rau na dolava vata na waqanivola yadua e dua ena matabisopi kei na dua na vunivola, se rua ena matabisopi. E rau na vakadeitaka ni sa tautauvata na ilavo e volai tu ena fomu ni iKatini kei na iSolisoli Tale Eso kei na ilavoqaqa e tiko ena waqanivola. E rau na volaitukutukutaka vakavinaka na cau yadua. Ke rau duidui na levu ni ilavo kei na kena e volai tiko, me na laurai sara vakatotolo o koya a solia mai me vakadodonutaki kina na duidui o ya.

34.5.4

Vakacurumi ni iKatini kei na iSolisoli Tale Eso

E dodonu me vakarautaki e dua na risiti ni vakacuruilavo ni sa vakadeitaki ni veidonui na levu ni ilavo e volaitukutukutaki kei na ilavoqaqa e ciqomi.

Ena vanua e tiko kina na misini ni vakacuru ilavo ka dola tu vaka 24 na auwa, me rau na vakacuruma na ilavo ki na baqe na lewe ni matabisopi kei na dua mai na Matabete i Melikiseteki ena siga vata ga a dolavi ka veidutaitaki kina na ilavo.

Na vanua e sega kina na baqe ni vakacuruilavo 24 na auwa ka dau sogo na baqe ena Sigatabu me lesia o bisopi e dua na Matabete i Melikiseteki me na vakacuruma na ilavo ena siga ni cakacaka ka tarava. E dau kena ivakarau me lewe ni matabisopi na tamata oqo. O koya ena saumitaro ena vuku ni ilavo oqo. E dodonu o koya me:

• Raica ni sa taqomaki vakavinaka tiko na ilavo me yacova ni sa vakacurumi.

• Taura mai e dua na risiti ni vakacuru ilavo ka tiko kina na tikinisiga kei na levu ni ilavo e vakacurumi.

Me kena ikuri, me rau na vakacavara na cakacaka ka koto e ra e dua ena matabisopi kei na dua na vunivola, se rau lewe rua ena matabisopi, ena Sigatabu ka tarava ni sa bera ni rau cakacakataka na cau ni siga ko ya:

• Veidutaitaka na risiti ki na ivolaitukutuku ni vakacuruilavo ena macawa sa oti me vakadeitaki ni sa dodonu na ilavo a vakacurumi.

• Sainitaka na risiti ni vakacuru ilavo ka maroroya vata kei na itukutuku ni cau ni macawa sa oti.

34.5.5

Taqomaki ni iLavo ni Lotu

O ira na lewenilotu ka nodra ilesilesi me ra raica na ilavo ni Lotu, me ra kakua ni biuta tu vakabogi e valenilotu se biuta tu vakaveitalia ena dua na gauna, me vaka ena gauna ni soqoni kei na itaviqaravi.

34.5.6

iTukutuku ni Cau

Sa vakarautaki tu na iTukutuku ni Cau nei Koya e Solia vei ira kece na lewenilotu ena donations.ChurchofJesusChrist.org O ira na iliuliu e dodonu me ra vakauqeti ira na lewenilotu me ra dau railesuva wasoma na nodra itukutuku ni cau. Ena vanua e gadrevi kina, sa tu talega na ivolatukutuku vakadonui ni ivakacavacava ena donations.ChurchofJesusChrist.org, mai na tabanilotu, se mai na valenivolavola ni iwasewase.

34.5.7

Qaravi ni Sausaumi ni iTeki kei na Tabanalevu

Na ilavo taucoko ni iteki era na qaravi ena parokaramu ni veika vakailavo ni Lotu. Me na vakatulewataka na peresitedi ni iteki na veika vakailavo ni iteki. E rau na vukei koya na nona daunivakasala kei na vunivola. Na daunivakasala ka veiqaravi vakajeameni ni dikevi fika ni iteki e dodonu me na kua ni vakaitavi ena vakaivolataki ni itukutuku vakailavo ni iteki.

Na ilavo taucoko ni tabanalevu e vakatulewataki ena parokaramu ni veika vakailavo ni Lotu. Ena vakatulewataka na bisopi na ilavo ni tabanalevu. E rau na vukei koya na nona daunivakasala kei na vunivola.

E dau vakayacori na sausaumi ena sala vakalivaliva se ena jeke. Ena so na vanua, e rawa ni ra vakadonui na tabanilotu me ra vakayagataka na kadi ni baqe.

Ena sega ni vakadonui se saumi e dua na vakayagataki ilavo ni iteki se tabanalevu ke sega ni vakadonuya o koya e vakatulewa tiko kina.

Me rau na vakadonuya e rua na iliuliu vakadonui na sausaumi yadua. E dua vei rau e dodonu me lewe ni mataveiliutaki ni iteki se matabisopi. E dina ga ni rawa ni vakatarai vei rau na daunivakasala me rau vakadonuya na sausaumi, e dodonu me rau railesuva na peresitedi ni iteki se bisopi na sausaumi yadua. Me ra kakua ni vakadonuya na iliuliu e dua na sausaumi e baleti ira.

E gadrevi na veivakadonui vakaivola nei peresitedi ni iteki ni bera ni qai vakayagataka o bisopi e dua na isolisoli ni lolo se vakadonuya na ota ni bisopi me baleti koya se nona matavuvale. Ena gadrevi taumada na veivakadonui vakaivola mai vua e dua ena Mataveiliutaki ni iWasewase ni bera ni vakayagataka o bisopi na isolisoli ni lolo se vakadonuya e dua na ota ni bisopi me baleti peresitedi ni iteki se nona matavuvale. Raica na 22.5.1.2 me baleta na idusidusi.

E dua na lewenilotu e kerea na sausaumi lesu ena vakarautaka e dua na ilavelave pepa se vakalivaliva ni dua na risiti se inivosi. Ena okata talega kina o koya na inaki, kena levu, kei na tikinisiga ni volivoli.

Kevaka e soli iliu na ilavo, ena vakauta na lewenilotu e dua na fomu ni kerei ni sausaumi, ka vola toka kina na kena inaki, levu ni ilavo, kei na tikinisiga. Ni sa saumi oti na ilavo, sa na qai vakarautaka na lewenilotu (1) na risiti se inivosi me baleta na ilavo e vakayagataki ka (2) vakasuka na ilavo sega ni vakayagataki. Na ilavo e vakasukai mai e dodonu me vakacurumi lesu tale.

O ira na iliuliu kei na vunivola vakadonui me ra kakua ni vakadonuya na sausaumi kevaka era sega ni railesuva vakavinaka na vakayagataki ilavo kei na risiti se inivosi.

Me ra kakua ni dolava na iteki kei na tabanalevu na nodra akaude ni baqe se maroroya e dua na ilavoqaqa.

34.5.7.1

Sausaumi vakalivaliva

Kevaka e vakayagataka na iteki se tabanalevu na sausaumi vakalivaliva, era sa vakauqeti na lewenilotu mera vakacuruma na veika matailalai ni nodra akaude ni baqe ena iwasewase ni Expense Reimbursement Account ena ruku ni Settings ena Online Donations ena donations.ChurchofJesusChrist.org Me kakua ni maroroya na tabanalevu se iteki na ilavelave pepa se vakalivaliva ni itukutuku ni akaude ni baqe ni lewenilotu.

34.5.7.2

Jeke

Kevaka e vakayagataka na jeke na iteki se tabanalevu, me na kakua ni sainitaki e dua na jeke me yacova ni sa vakaleweni taucoko. Me na maroroi vakavinaka na ivola ni jeke kei na kena e sa bera ni vakayagataki ena faile lokataki se kebineti. Me ra kakua ni biu wale tu vakaveitalia ena gauna era sega kina ni lokataki. Kevaka e yali eso na jeke se bera tiko ni vakaleweni, me na tukuna sara vakatotolo na naba ni jeke oqori na peresitedi ni iteki se na bisopi ki na itikotiko liu ni Lotu se na valenivolavola ni wasewase.

34.5.7.3

Kadi ni Sausaumi

Kevaka e dau vakayagataka na iteki se tabanalevu na kadi ni sausaumi me baleta na vakayagataki ilavo ena noda tabanilotu, sa rawa ni vakayagataki me baleta na volivoli se me caka kina na tara ilavoqaqa. Na vakayagataki ni kadi kei na tara ilavoqaqa sa vakavodoki sara ga vakaikoya ki na tabana vakailavo ni Lotu. Na vakayagataki taucoko ni kadi e dodonu me volaitukutukutaki ena kena gauna otolo. Kevaka e sega ni volaitukutukutaki na ivakavakayagataki oqo, sa rawa ni tarovi na kena vakayagataki na kadi oqori.

Na ilavo taucoko ni kadi ni sausaumi e dodonu me dau saiva ena veiyabaki ke lailai.

34.5.8

Kato ni iLavoqaqa

Ena vakarautaka na valenivolavola ni iwasewase na idusidusi matailalai me baleta na tabanilotu e sega ni rawa ni curuma e dua na akaude ni baqe vakarautaki ena Lotu.

34.5.9

Maroroi ni iVolatukutuku Vakailavo

Sa nona itavi na iteki kei na tabanalevu yadua me maroroya tiko na ivolatukutuku dodonu ni vakayagataki ilavo sa vakayacori tiko. Na ivolatukutuku oqo ena veivuke vei peresitedi ni iteki kei bisopi me qarauni ka taqomaki tiko kina na ilavo tabu ni Lotu. Sa gadrevi talega na ivolatukutuku dodonu me baleta na:

• Vakarautaki ni ilavovakarau.

• Vakatulewataki ni ilavovakarau.

• Vakarautaka na itukutuku vei ira na lewenilotu me baleta na nodra cau vakailavo.

• Saumitaro me baleta na dikevi fika.

Ena itukutuku me baleta na kena vakayagataki ka maroroi na ivolatukutuku kei na ripote, e dodonu me ra rai na vunivola ki na idusidusi mai na valenivolavola liu ni Lotu se na valenivolavola ni iwasewase. Me na dau maroroi tu ga na ivolatukutuku vakailavo me tolu sara na yabaki ke lailai ka oka kina na yabaki oqo. Na lawa ni vanua ena rairai gadrevi kina me dede cake na gauna ni mamaroroi oqo.

34.6

iLavovakarau kei na Kena Vakayagataki

Na parokaramu ni ilavo tuvanaki e vakarautaka na ilavo raraba ni Lotu me saumi kina na vei itaviqaravi kei na parokaramu ena iteki kei na tabanalevu. Na parokaramu oqo e kauti laivi na kena gadrevi na nodra cau mai na lewenilotu me baleta na ilavo vakarau. Na saumi tiko ni ikatini ena yalodina sa mai rawa kina ni rawati na ilavovakarau.

Kevaka e gadrevi, sa dodonu vei ira na iliuliu me ra vakalailaitaka ka vakarawarawataka na itaviqaravi me da tiko ga kina ena loma ni ilavo vakarautaki. Na itaviqaravi e dodonu me ra rawarawa ga ka lailai se sega sara ga ni dua na ilavo e vakayagataki kina.

34.6.1

iLavovakarau ni iTeki kei na Tabanalevu

Era na vakarautaka ka cici na iteki kei na tabanalevu kece sara ena dua na ilavovakarau. Ena vakatulewataka na peresitedi ni iteki na ilavovakarau ni iteki, ka vakatulewataka na bisopi na ilavovakarau ni tabanalevu. E rawa ni rau lesia e dua na daunivakasala me raica raraba na ilavovakarau ena ruku ni nodrau veidusimaki. E rawa talega vei rau me rau lesia e dua na vunivola me veivuke ena kena vakarautaki ka qarauni na ilavovakarau.

Me ra dau vakarautaka na mataveiliutaki ni iteki kei na matabisopi na ilavovakarau ni sa bera ni tekivu na yabaki yadua. Na idusidusi sa tuvai koto e ra:

• Vakadikeva na levu ni ilavo a vakayagataki ena yabaki sa oti ka me nanumi tiko na veika vakatabakidua e gadreva na sausaumi ena veiyabaki.

• Kerei ira na veisoqosoqo me ra dau cakacakataka vakamatailalai na nodra gagadre ni ilavovakarau.

• Biuta vata na ilavovakarau ena kena vakayagataki na ivakarau vakadonui ni tuvailavo. Na ilavovakarau e dodonu me vakadeitaka ni ilavo sa nakiti me na vakayagataki me kakua ni sivia na ilavo vakarau ka namaki me na soli mai.

Na iyaya ni tuvailavo e okati ena ivakarau ni veika vakailavo ni Lotu e dodonu me vakayagataki ena vanua era rawa kina.

34.6.2

iLavo Vakarau

34.6.2.1

Votai ni iLavovakarau

Sa vakarautaki vakavulatolu na ilavo ni tuvailavo ka yavutaki mai na iwiliwili nodra era tiko rawa ena iwasewase eso oqo:

• Soqoni ni sakaramede

• Cauravou

• Goneyalewa

• Gonelalai ena Lalai yabaki 7-10

• iTabagone qasecake sega ni vakawati

Sa ka bibi me ripotetaki vakadodonu na iwiliwili nodra era dau tiko rawa ka vakayacori ena kena gauna (raica na 33.5.1.1).

Ni bera na ivotavota ni veivulatolu yadua, ena ciqoma o peresitedi ni iteki na itukutuku ni ilavo me veiwaseyaki. Ena qai vakatulewataka na levu ni ilavo me votai vei ira na tabanalevu. Ena cakacaka vata kei ira na bisopi ena dua na ivakarau duavata, ka yalovata me vakadeitaki kina ni sa vakailavotaki vakadodonu ka veirauti na iteki kei na tabanalevu. Kevaka e sotavi e dua na leqa tubu koso ka na gadrevi kina e dua na veisau ki na ilavovakarau taumada, ena raica na peresitedi ni iteki me na savasava na veisau e vakayacori.

Ena raica raraba o bisopi na votai ni ilavovakarau ena tabanalevu. Ena vakadeitaka me veiganiti na votai ni ilavo ki na veisoqosoqo ena tabanalevu.

Me ra vakadeitaka na iliuliu ni matabete ni sa veiraurau na ilavo vakarau kei na itaviqaravi me baleti ira na cauravou kei na goneyalewa ka veirauti na kena e vakarautaki vei ira na gonelalai ena Lalai.

34.6.2.2

Vakayagataki Donu ni iLavoVakarau

Me raica o peresitedi ni iteki kei bisopi na kena vakayagataki vakayalomatua na ilavo vakarau. Me vakayagataki ga na ilavo ena nodra vakalougatataki na tamata ka vakatetei kina na inaki ni kosipeli. Me ra raica talega na iliuliu me tiko ga e loma ni ilavovakarau na ilavo sa vakayagataki tiko.

E dodonu me vakayagataki ga na ilavo tuvanaki ni iteki kei na tabanalevu me saumi kina na itaviqaravi, parokaramu, ivolavakarau, kei na iyaya ni veiqaravi. Me ra kakua ni dau sauma na lewenilotu na vakaitavi ena itaviqaravi. Me ra kakua talega ni vakarautaka mai na iyaya, kakana, ilavo ni rede se icurucuru, se ivodovodo ni ilakolako balavu. E rawa ni ra vakarautaka na leweniotu na kakana kevaka e sega ni dua na icolacola bibi vei ira (raica na 20.6.1).

O ira na lewenilotu era gadreva me ra vakuria na nodra cau vakailavo ki na Lotu me ra kakua ni lewa na kena soli ki na ilavovakarau ni iteki se ki na tabanalevu. Ia, sa rawa vei ira na iliuliu me ra vakayaloqaqataki ira me ra solia na ilavo ki na isolisoli ni lolo, ilavo ni kaulotu, ilavo ni veivuke raraba, se ki na isolisoli vakadonui sa virikotori tu.

Na vakayagataki lavo ni tara vale, kena vakavinakataki, talevoni, na wai kei na livaliva, na kompiuta, kei na nodra veilakoyaki na iliuliu ni matabete ena saumi mai na ilavo raraba ni Lotu me vaka na kena idusidusi ena gauna oqo.

34.6.2.3

iLavovakarau e Sega ni Vakayagataki

E sega ni dodonu me vakayagataki na ilavovakarau e sega ni vakayagataki. Me na vakau lesu ki na iteki na ilavo ni tabanalevu e sega ni vakayagataki. Me na vakau lesu ki na Lotu na ilavo ni iteki e sega ni vakayagataki.

Ena vakadonui walega, ki na iteki kei na tabanalevu me maroroya eso na ilavo sega tu ni vakayagataki kevaka era gadrevi ki na itaviqaravi eso era sa tuvanaki tu ena yabaki ka tarava, me vakataka na nodra koniferedi na itabagone. Ia, e sega ni dodonu me maroroi tu mai na dua na yabaki ki na dua tale na iwase levu ni ilavo vakarau ni iteki se tabanalevu.

34.6.3

Vakailavotaki ni iTavi Qaravi Digitaki kei na Kena iYaya

34.6.3.1

iTaviqaravi ni iTeki kei na Mataiteki

Era sa vakauqeti na iliuliu me ra dau vakayacora na itaviqaravi ni iteki kei na mataiteki ka me rawa ni bucini kina na duavata kei na veitokani, vakabibi vei ira na itabagone kei na itabagone qase cake sega ni vakawati. Me ra vakadeitaka na veiliutaki ni ra vakarautaka e dua na iwase ni ilavo veirauti me tokona e dua na iwiliwili veiganiti ni itaviqaravi ni iteki kei na mataiteki.

Na vakailavotaki ni levu na itaviqaravi ena veimataiteki e lako mai na ilavo vakarau ni veiteki era vakaitavi kina. Na vakailavotaki ni itaviqaravi ni wasewase e rawa ni lako mai na ilavovakarau ni wasewase se itikotiko liu ni Lotu ena gauna e vakadonui kina.

34.6.3.2

iTavi Qaravi Digitaki kei na Kena iYaya

Me baleta na itukutuku ni itaviqaravi digitaki kei na iyaya, raica na wase e 20.

34.7

Dikevi Fika

34.7.1

Komiti ni Dikevi ni Fika ni iTeki

Ena lesia o peresitedi ni iteki e dua na komiti ni dikevi fika ni iteki. Ena raica na komiti oqo me na vakayagataki na ilavo ni iteki kei na tabanalevu me vaka na lawatu ni Lotu. E ratou lewena e dua vei rau na daunivakasala nei peresitedi ni iteki me kena jeameni kei na rua tale na lewe ni iteki e rau kila se rawa ni rau tuberi ena veika vakailavo. O ira na turaga se marama oqo e dodonu me tiko na nodra ivolatara ni valetabu e vakabau.

Na daunivakasala ka veiqaravi vakajeameni e sega ni dau vakadonuya na sausaumi se vakaitavi ena vakaivolataki ni itukutuku vakailavo ni iteki.

E sega ni dodonu me ra daudikevi fika ni iteki na lewe ni komiti. Me ra kakua talega ni maroroya na ivolatukutuku vakailavo ni iteki se tabanalevu.

34.7.2

Daudikevifika ni iteki

Me na kaciva o peresitedi ni iteki se o nona daunivakasala e jeameni ni komiti ni dikevi ni fika ni iteki e rua se sivia na daudikevifika ni iteki. O ira na turaga kei na marama oqo e dodonu me tiko na nodra ivolatara ni valetabu e vakabau. Kevaka e rawa, e dodonu me ra sa buta vinaka tu ena cakacaka vakadaunifika se daudikevifika. E dodonu me ra vakadonui mai vei iratou na mataveiliutaki ni iteki kei na matabose e cake. Ia, era sega ni dau tokoni ena laveliga. Na peresitedi ni iteki ena vakatulewataka me ra vakatikori se sega.

E rawa talega ni ra veiqaravi vakadaudikevifika ni iteki na lewe ni matabose e cake. Ia, me ra na kakua ni kacivi me ra daudikevifika ni iteki na vunivola kei na ivukevuke ni vunivola ni iteki. O ira era veiqaravi vakadaudikevifika e rawa ni ra veiqaravi ena so tale na veikacivi.

34.7.3

Na Dikevifika Vakailavo

O ira na daudikevi fika ni iteki era na dikeva vakarua ena veiyabaki na ivolatukutuku vakailavo ni iteki, tabanalevu, kei na valenivolavola ni FamilySearch. Era na dikeva talega na daudikevi fika na ivolatukutuku vakailavo ni vanua ni itaviqaravi me vakadua e veiyabaki. Oqo na madigi me ra vakayaloqaqataki, tokoni, ka tuberi kina vakavinaka o ira era sa kacivi me ra qarava na ilavo ni Lotu ni Turaga.

Era na vakadeitaka na daudikevifika ni:

• Volaitukutukutaki tu vakadodonu na ikatini kei na cau tale eso.

• Vakayagataki vakadodonu, vakaivolataki, ka taqomaki na ilavo ni Lotu.

• Sa taucoko ka dodonu vinaka na ivolatukutuku vakailavo.

Me rau na dau tu vakavoleka o koya na vakaitutu e vakatulewa tiko ena tabanilotu vata kei vunivola sa lesi me rau na saumi taro tiko ena gauna ni dikevi fika.

E ratou na railesuva na peresitedi ni iteki kei na komiti ni dikevifika ni iteki na dikevi fika kece sara. Ni sa oti na railesuvi in fika, e rau na qai sainitaka na vakadidike na jeameni ni komiti ni dikevifika ni iteki kei na peresitedi ni iteki. E rawa ni sainitaki na dikevi fika ka vakau yani ni bera ni vakadodonutaki na cala kece sara. Me ratou raica na peresitedi ni iteki kei na komiti ni dikevifika ni iteki ni sa vakadodonutaki ena kena gauna totolo na cala e kunei ena dikevi fika.

34.7.4

Daudikevifika ni iWasewase kei ira na iVukevuke ni Daudikevifika ni iWasewase

Ena muria na Mataveiliutaki ni iWasewase na idusidusi e tiko ena iDusidusi ki na Parokaramu ni Dikevi Fika ni iWasewase ni kacivi e dua na daudikevi fika ni iwasewase se kena ivukevuke.

34.7.5

Yali, Butakoci se Vakayagataki Vakailoa ni iLavo ni Lotu

Me na tukuni sara vakatotolo vei peresitedi ni iteki se jeameni ni komiti ni dikevi fika ni iteki kevaka e:

• Yali se butakoci na ilavo ni Lotu.

• Lawakitaka se vakayagataka vakatani e dua na iliuliu na ilavo ni Lotu.

Ena tukutuku yani o peresitedi ni iteki se jeameni ni komiti ni dikevi fika ki na Tabacakacaka ni Dikevi Fika ni Lotu. Me na tukutuku yani vua na dauniyau ni iwasewase kevaka e tiko ena taudaku kei Amerika kei Kenada na tabanilotu.

Ena vakauta na Tabacakacaka ni Dikevifika ni Lotu (se na dauniyau ni wasewase) e dua na fomu ni ripote ni veika sa yali ki vei peresitedi ni iteki se jeameni ni komiti ni dikevi fika. Ena nona veidusimaki na Tabacakacaka ni Dikevifika ni Lotu (se dauniyau ni iwasewase), ena raica o peresitedi ni iteki se na jeameni ni komiti ni dikevi fika me vakadikevi vakamatailalai na kisi. Me vakadeitaka talega ni sa vakaleweni vakavinaka na fomu me baleta na veika e yali ka vakau yani.

Ni sa cava na vakadidike, kevaka e ratou sa vakadeitaka na Tabacakacaka ni Dikevifika ni Lotu ni sa vakayagataka vakailawaki na ilavo ni Lotu e dua na iliuliu se tamata cakacaka ena Lotu, me na vakasamataki na veika me baleta na nona lewenalotu. Na idusidusi e tiko ena 32.6.3.3.

Kevaka e kunei ni vakayagataki vakailoa e dua na ilavo levu, sa itavi nei peresitedi ni iteki se jeameni ni komiti ni dikevi fika me na tukutuku talega vei iratou na Mataveiliutaki ni iWasewase.

34.7.6

Vunivola ni iTeki se iVukevuke ni Vunivola ni iTeki e Qarava na Veika Vakailavo

Sa rawa ki na komiti ni dikevi fika ni iteki me lesia na vunivola ni iteki se o ivukevuke ni vunivola ni iteki e lesi ki na veika vakailavo me vakasalataki ira na iliuliu ni tabanalevu ena lawatu dodonu ni veika vakailavo. Ena vakasalataki ira talega ena iwalewale eso e semati ki na veika e sega ni dau vakaraitaki ena dikevifika.

34.7.7

Na iKuri ni iVakamacala

Me baleta na ikuri ni ivakamacala me baleta na komiti ni dikevi fika, daudikevi fika, kei na iwalewale ni dikevi fika, raica na Help Center [Valenivolavola ni Veivuke] ena ChurchofJesusChrist.org. Sa rawa vei ira na komiti ni dikevifika ni iteki me ra na taro vakadodonu vei ira na ivukevuke ni daudikevifika ni iwasewase.

34.8

iVakacavacava

Na ivakamacala ni ivakacavacava e tukuni tiko ena iwasewase oqo e taurivaki ga mai Amerika kei Kenada. Kevaka era gadreva na iliuliu ni matabete e Amerika kei Kenada na ikuri ni ivakamacala, me ra qai veitaratara yani ki na Tax Administration Division (iWasewase ni Tabana ni iVakacavacava):

Tax Administration

50 East North Temple Street, Rumu 2276

Salt Lake City, UT 84150-0022

Talevoni: 1-801-240-4405 se 1-800-453-3860, isema 2-4405

O ira na iliuliu ni matabete ena taudaku kei Amerika kei Kenada me ra na veitaratara yani ki na valenivolavola ni wasewase me wali kina na vakatataro baleta na ivakacavacava.

34.8.1

iTuvaki ni Sega ni Saumi iVakacavacava

Na Lotu e sega ni dau saumi ivakacavacava ni volivolitaki, volitaki ni iyauqaqa, ilavo e rawata, kei na ivakacavacava tale eso baleta ni isoqosoqo vakalotu. Na veivale taukena na Lotu kei na iyauqaqa tale eso era na vakayagataki ga ena sokalou, vuli vakayalo, kei na itaviqaravi ni Lotu tale eso. Era na qarauna na iliuliu ni tabanalevu kei na iteki me kakua ni vakayagataki na veivale taukena na Lotu me baleta na inaki vakapolitiki, bisinisi, se vakatubu ilavo me vaka e dusimaki tu ena ivakaraitaki eso ena 35.5.6.1 kei na 35.5.6.3. Ni yaco vakakina ena voroka na lawa ka vakuwai kina na veivale ni Lotu mai na saumi ivakacavacava.

Sa ka bibi ki vei ira na iliuliu ni iteki kei na tabanalevu me ra vakamuria vakavinaka na idusidusi oqo me maroroi kina na lawa ni sega ni saumi ivakacavacava e vauci tu kina na Lotu. Kevaka e dua na iteki se tabanalevu e voroka na lawa ni sega ni saumi ivakacavacava e vauci koto kina na Lotu, era na rawa ni vakaleqai kina na veitaba ni Lotu tale eso.

34.8.2

iVakacavacava ni Volivolitaki kei na kena Vakayagataki

Na lawa ni ivakacavacava ni volivolitaki kei na kena vakayagataki kei na sala e vauci kina na Lotu e duidui ena veivanua kei na veiyasana. Me ra na veitaratara na iliuliu ki na Tax Administration Division (Tabana e Qarava na iVakacavacava) ena Lotu se na valenivolavola ni iwasewase sa lesi kina me kilai kevaka e vakuwai ena saumi ivakacavacava na Lotu se e dodonu me sauma na mataqali ivakacavacava vakaoqo.

34.8.3

iVakacavacava ni iYauqaqa

Na Tabana e Qarava na iVakacavacava ena Lotu e dau vakalewena na ivakacavacava kece ni iyauqaqa e galala mai kina ka sauma na ivakacavacava kece ni iyauqaqa e dodonu me sauma. E sega ni gadrevi me ra cakava kina e dua na ka o ira na veiliutaki ena veivanua.