35.

Ol Bilding

35.1

Stamba Tingting

Jos i stap pem graon mo i bildim ol bilding blong givim wan ples long ol memba blong Jos blong oli save wosip, tij, lan, prea tugeta, mekem mo riniu ol kavenan, mo kasem ol tabu odinens. Wanwan bilding blong Jos i sapos blong (1) givim wan ples blong ol memba oli save filim Spirit mo wosip mo (2) presentem wan pikja blong fasin blong gat respek mo gat wan tabu ples long komuniti.

35.2

Oganaesesen

35.2.1

Mitinghaos Bilding Dipatmen

Anda long daereksen blong Prisaeding Bisoprik, Mitinghaos Bilding Dipatmen i stanemap ol polisi mo fasin blong wok we i help blong givim ol bilding long ol memba blong Jos raon long wol.

35.2.2

Ol Eria Ofis

Ol eria presidensi mo ol temporol afea daerekta, oli responsibol blong pem mo lukaotem ol propeti blong Jos. Ol propeti ia, i gat ol mitinghaos, ol institiut blong relijin, ol misin hom mo ofis, ol welfea wok, mo ol narawan moa.

Ol lokol bilding wokman oli wok anda long daereksen blong temporol afea daerekta.

35.2.3

Stek Presidensi

Ol memba blong stek presidensi oli meksua se, ol bilding blong Jos, oli yusum long stret wei, oli lukaot gud long olgeta, mo oli protektem olgeta. Oli tijim ol lida mo ol memba abaot responsabiliti blong olgeta blong stap yusum mo stap kea long ol bilding ia. Oli givim wok long wan hae kaonsela blong hem i stek bilding ripresentativ. Oli mit wetem hem olsem we i nid blong oli luklukbak long ol nid mo ol projek.

35.2.4

Stek Bilding Ripresentativ

Stek bilding ripresentativ (wan hae kaonsela) i helpem stek presidensi long saed blong ol poen abaot bilding olsem we i stap ia:

• Hem i help blong tijim mo kareaot ol standet blong yusum mo lukaot long ol mitinghaos.

• Hem i kodinetem wei we hem i serem mo kontrolem ol ki.

• Hem i kodinetem instraksen blong wod bilding ripresentativ long saed blong diuti blong olgeta.

• Hem i tekpat long wan yia inspeksen blong mitinghaos we bilding maneja i oganaesem, be hem i no tekpat sapos stek presidensi i jusum wan narawan blong i tekpat.

35.2.5

Ejen Bisop

Sapos i gat moa bitim wan wod we i stap mit long wan bilding, stek presidensi i jusum wan bisop blong i ejen bisop. Hem i kodinetem ol wok blong wanwan memba blong tekpat long kea mo wok blong klinim mitinghaos. Hem i kodinetem tu sefti mo sekiuriti blong mitinghaos. Antap long hemia, hem i kodinetem ol dei blong yusum bilding wetem stek mo ol nara wod we oli yusum bilding ia, nomata hem i save yusum wan nara memba blong i lukaotem taemtebol.

35.2.6

Bisoprik

Ol memba blong bisoprik oli responsibol long wei we oli yusum, kea mo putum sekiuriti long mitinghaos. Oli tijim ol memba blong wod wei blong lukaotem mo kea long mitinghaos. Oli kodinetem ol wok blong wanwan memba blong tekpat long kea mo wok blong klinim mitinghaos, mo i givim wok olsem we i nid. Oli serem tu ol ki blong mitinghaos.

Ol memba blong bisoprik oli meksua se i gat stret sefti tul insaed long mitinghaos mo long graon blong hem (luk long 35.3.5).

35.2.7

Wod Bilding Ripresentativ

Wanwan wod i mas gat wan wod bilding ripresentativ. Bisop i save putum wan memba blong bisoprik blong i holem wok ia, o bisoprik i save singaotem wan nara memba blong mekem hemia.

Wod bilding ripresentativ i helpem bisoprik wetem ol responsabiliti blong mitinghaos, olsem fasin blong sevem paoa, sefti, sekiuriti, karemaot sno (long ol ples we i gat), mo memba i tekpat blong klinim mo lukaot gud long mitinghaos. Hem i tekem kea long ol nid we i go wetem bilding long taem blong ol miting, aktiviti, mo ol imejensi. Sapos i nid, hem i kasem instraksen i kam long stek bilding ripresentativ blong stap mekem ol samting ia oli wok gud, olsem saon, mekem rum i wom, ea kondisen, mo ol nara sistem blong bilding.

35.2.8

Ol Memba

Ol prishud lida oli tokbaot bigwan se blong wanwan memba i tekpat long kea mo wok blong klinim mitinghaos, i wan ki pat. Oli leftemap tingting blong ol memba, olsem wanwan man mo woman, o olsem ol grup, blong oli givim seves folem skil mo paoa blong olgeta.

35.3

Administresen blong Ol Bilding

35.3.1

Fasin blong Yusum mo Kea long Ol Mitinghaos

Ol lokol lida blong Jos mo ol memba oli responsibol long wei we oli yusum mo kea long mitinghaos. Ol lokol bilding wokman we oli pem olgeta, oli helpem olgeta. Ol lida oli traehad blong meksua se ol mitinghaos mo yad blong olgeta oli oltaem luk naes, oli klin, i pulum ae, mo oli mekem ol gudfala ripea wok long hem. Ol bilding blong Jos, oli mas soem stret fasin blong kea mo fasin blong gat respek long evri wei.

Ol memba blong Jos, wetem ol yut, oli mas help blong klinap mo kea long ol mitinghaos. Taem ol memba oli givim kaen seves ia, bae respek blong olgeta long haos blong Lod bae i kam moa bigwan. Long ol ples we i posibol, ol memba oli sapos blong mekem responsabiliti ia olsem pat blong ol wok o aktiviti blong wik taem we oli stap finis long mitinghaos. Oli save askem ol memba blong help blong klinap ol nara bilding blong Jos.

35.3.2

Mentenem mo Jekem Mitinghaos

Bilding maneja i jekem wanwan mitinghaos evri yia. Stek bilding ripresentativ, o wan narawan we stek presiden i jusum hem, i tekpat long taem ia we bae oli jekem mitinghaos. Hem i mas gat ful raet blong tekem aksen long bihaf blong stek presidensi anda long wok ia. Olgeta we oli tekpat long ol taem ia blong jekem mitinghaos, oli faenemaot ol nid blong lukaotem bilding, mo oli mekem ol plan blong mekem ripea, mo jenisim ol sistem mo ol nara samting, mo blong mekem ol nara wok we bae i mekem samting i kam gud moa.

35.3.3

Plan blong Yusum Mitinghaos

Stek presidensi i givim infomesen long Eria Presidensi; infomesen ia bae i helpem temporol afea daerekta blong stap rere mo stap apdeitem wan masta plan blong ol projek blong ol nid blong gat ol fiuja ples blong bildim ol bilding, mo sam niu o sam moa spes blong mitinghaos.

35.3.4

Sevem Paoa mo Wota

Jos i stap pem ol bigfala bil blong wota mo paoa blong ol mitinghaos. Ol lida oli save help blong daonem ol bil ia bigwan taem oli tijim ol memba blong tanemof ol laet, mo ol tul taem oli no nidim olgeta, mo blong folem ol nara fasin blong sevem paoa mo wota. Ol lida oli meksua se laet, hot ea, ea kondisen, ol tul mo wota, oli yusum gud blong no spendem tumas mane long ol.

Olsem we i nid, wan memba blong stek presidensi, o wan hae kaonsela we i kasem wok ia, i save singaotem wan stek bilding speselis blong lukaot blong sevem wota mo paoa long wanwan mitinghaos mo propeti we oli yusum long aktiviti insaed long stek. Olgeta speselis ia givim seves anda long daereksen blong stek bilding daerekta.

Oli leftemap tingting blong ol lida tu blong folem ol program blong sevem paoa mo wota we ol lokol gavman oli putum i stap.

35.3.5

Sefti mo Sekiuriti

Ol lida oli givim instraksen long ol memba, —speseli ol woman mo ol yut— blong no stap olgetawan long wan bilding blong Jos.

Ol lida oli mas tekem ol stret step blong meksua se ol korido (ples blong wokbaot long saedsaed blong bilding), ol step, ol step blong go long nara floa blong bilding, ol “exit” doa (ol doa blong ronwe aot long ol), ol toelet mo batrum, o ples blong swim, mo ol ples blong wokbaot oli no gat ol samting we i blokem olgeta, o i no gat ol samting we oli stap olsem denja. Ol lida oli meksua tu se ol samting we oli save stap olsem wan denja, o ol samting we faea i save laet long hem, olsem ol tul we i gat fiul, o gras, bandel blong stamba blong kon, oli no yusum o storem insaed long ol mitinghaos (luk tu long 35.4.2).

Ol lida oli kontrolem fasin blong serem ol ki, mo oli putum ol stret rod mo fasin blong wok blong lokem bilding. Oli mas lukluk tu se insaed long ol klasrum mo ol nara rum we oli no gat ol samting we i sas long hem, oli no lokem olgeta i stap.

Ol lida oli meksua se ol lokol imejensi telefon namba blong polis, faea dipatmen, mo ambulens oli putum notis blong hem i stap kolosap long wanwan telefon wetem ol sot instraksen. Oli ripotem ol man we oli trespas i go stret long polis.

35.3.6

Ripotem Aksiden

Ol aktiviti blong Jos oli no mas gat denja blong man i kasem kil o kam sik, o i no mas gat denja blong damejem propeti. Long taem blong ol aktiviti, ol lida oli mekem bes blong meksua se i gat sefti. Taem oli mekem ol stret plan mo taem oli folem ol sefti rul, ol lida oli save daonem denja blong aksiden i hapen.

Oli mas talem kwik long bisop o stek presiden sapos:

• Wan i kasem wan aksiden, sik, o kil long propeti blong Jos, o long taem blong wan aktiviti we Jos i sponsarem.

• Wan we i bin tekpat long wan aktiviti we Jos i sponsarem, i go lus.

• Wan i damejem propeti blong wan praevet, blong pablik o blong Jos long taem blong wan aktiviti we Jos i sponsarem.

Sapos wan i bin kasem bigfala kil, o i go lus, sapos oli damejem bigwan sam propeti, o sapos i gat tingting blong putum man o jos long kot, nao stek presiden (o bisop, anda long daereksen blong stek presiden), i tekem wan long ol aksen ia kwiktaem:

• Long Yunaeted Stet o Kanada, hem i talemaot long Risk Management Division (Denja Manejmen Dipatmen) long hedkwota blong Jos (1-801-240-4049 o 1-800-453-3860, ekstensen 2-4049; afta taem blong wok, long ol wiken, ring long 1-801-240-1000 o 1-800-453-3860, mo bae opereta bae i kasem wan kwiktaem).

• Blong ol ples aotsaed long Yunaeted Stet mo Kanada, hem i kontaktem eria ofis.

Ol lida oli givim ripot tu blong ol kil mo damej we insaed i gat ol bilding blong Jos o ol propeti blong Jos, i go long bilding maneja.

Ol lida oli mas lukluk sapos oli save yusum Jos Aktiviti Medikol Help Program sapos i gat wan i kasem kil long taem blong wan aktiviti, o wok we Jos i sponsarem. Blong gat moa ditel long saed blong insurens, luk long 20.7.3.

Stek presiden (o wan bisop anda long daereksen blong stek presiden) i sendem ol kwestin long saed blong sefti o ol klem agensem Jos i go long Denja Manejmen Dipatmen, o i go long eria ofis.

Luk long 20.7 blong kasem moa instraksen long wei blong wok folem sapos i gat wan aksiden o wan imejensi.

35.4

Ol Polisi blong Fasin blong Yusum Ol Bilding mo Ol Nara Propeti

Ol bilding blong Jos mo ol nara propeti, oli yusum blong wosip, tijing blong relijin, mo ol nara aktiviti we Jos i sponsarem. Oli no leftemap tingting tumas blong yusum ol mitinghaos blong yumi long ol nara wei. Bae i gat samfala taem nomo we stek presiden i save givim raet long wan grup we oli no mekem mane, mo oli folem ol standet blong jos blong oli save yusum wan mitinghaos, o yad blong mitinghaos blong wan sot taem (luk long Bilding Manejmen Gaedlaen blong Ol Mitinghaos mo Ol Nara Propeti blong Jos 2). Hemia i wan lis blong sam eksampol we oli no apruvum blong yusum propeti from:

• Rentem o lisim ol bilding blong Jos blong mekem bisnis long hem.

• Promotem ol bisnis o ol invesmen, mo blong putum ol bisnis advataesmen, o blong sponsarem ol bisnis entetenmen.

• Blong pem, salem, o promotem ol prodak, ol seves, ol pablikesen o wok we oli krietem, o blong soemaot ol prodak.

• Stap holem ol fanresing aktiviti we oli no givim raet from (luk long 20.6.5).

• Ol spika o instrakta we oli pem wan fi long olgeta, we oli tekem ol patisipen long wok, o oli stap lukaotem kastoma taem oli givim ol semina, ol lesen, ol aerobik klas, mo ol narawan moa. Oli save givim raet blong oli yusum piano mo organ blong mitinghaos blong ol lesen we oli pem (luk long 19.7,).

• Holem ol komuniti o klab aktiviti we Jos i no sponsarem, olsem ol Skaot miting mo aktiviti, o ol spot aktiviti mo praktis.

• Holem ol politik miting o kampen. Be nomo, oli save yusum ol bilding blong Jos blong rejistarem ol man blong vot, mo yusum olsem ol puling stesen sapos ol gavman ofisa oli askem, sapos:

  • I no gat wan nara wei moa bakegen.

  • Ol ofisol mo ol vota oli holemtaet standet blong Jos insaed long bilding.

  • Taem ia bae i no mekem se bae i gat eni denja long bilding.

  • Taem ia bae i no spolem nem blong Jos.

Yus blong propeti blong Jos i no mas stap olsem wan denja long man o long propeti. Mo tu, hem i no mas mekem se Jos bae i save responsibol long sam samting, o i no mekem se Jos bae i distebem ol neba.

Blong kasem sam moa instraksen long fasin blong yusum mo kea long ol bilding blong Jos mo ol nara propeti, luk long Bilding Manejmen Gaedlaen blong Ol Mitinghaos mo Ol Nara Propeti blong Jos o kontaktem hedkwota blong Jos, o eria ofis we i gat wok blong lukaot long yufala.

35.4.1

Artwok

Artwok we oli apruvum blong ol mitinghaos blong Jos, oli kasem tru long bilding maneja, mo oli yusum Jos Bilding Artwok katalog blong faenem. Bilding maneja i save kasem ol artwok we oli stret blong ol mitinghaos tru long Jos Distribusen Seves.

Ol pikja mo ol nara artwork bae oli putum long ol stret ples insaed long mitinghaos. Be, oli no save putum olgeta insaed long japel, o kolosap long ples blong baptaes. Ol statiu, ol peinting long bigfala wol, mo ol mosaik, oli no apruvum. Polisi bae i no save aplae long ol artwok we oli bin yusum finis blong plante yia long ol japel insaed long ol mitinghaos we oli stap finis.

Ol artwok insaed long ol mitinghaos oli mas stap gud insaed long wan stret frem blong hem.

35.4.2

Dekoresen

Ol dekoresen blong Krismes, ol nara holidei, mo ol nara semmak taem, bae oli save putum blong sot taem long foyer o long kalja o aktiviti rum blong wan mitinghaos, olsem we oli givim raet from anda long daereksen blong stek presidensi. Oli no save putum ol dekoresen insaed long japel blong wan mitinghaos. I save gat ol flaoa nomo. Oli no save dekoretem tu aotsaed blong wan mitinghaos, o yad blong mitinghaos.

Ol dekoresen oli mas ol simpolwan mo oli no sas, mo oli no save ol dekoresen we faea i save kamaot long hem. Ol drae gras, ol bandel drae stik, ol drae kokonat lif, o eni nara drae lif, mo ol kandel we oli laet long faea, bae oli no save yusum olgeta. Sapos oli yusum ol Krismes tri, bae oli ol giamanwan, o olgeta we oli no save kasem faea, mo oli soem we i no gat lektrik laet o kandel long hem. Lokol faea mo sefti rul mo polisi, bae oli mas folem gud.

35.4.3

Stap Dediketem Ol Bilding

Evri niu mitinghaos, mo tu, ol bigfala wok blong ademap moa bilding we i gat wan japel, wan aktiviti rum, o wan moa bigfala eria bitim bilding we i stap finis, bae oli mas dediketem stret afta we projek i finis.

Ol smol bilding, olsem ol misin hom, ol institiut, ol seminari, mo ol klasrum o ofis we oli ademap i go long ol mitinghaos, bae oli save dediketem olgeta sapos ol lokol lida oli wantem.

Las apruvol blong dedikesen, Eria Presidensi nao i givim taem hem i kodinetem hemia wetem temporol afea daerekta. Eria Presidensi i wok wetem stek o misin presiden mo i talemaot huia i responsibol blong dediketem bilding.

Program blong wan dedikesen seves bae i go stret wetem stamba tingting blong taem ia. Hem i no mas longwan o tekem tumas miusik presentesen. Oli mas putum inaf taem blong lida we i kasem wok ia, blong i toktok mo i dediketem bilding. Afta long dedikesen prea, bae i gat wan hym, we i stret, o i save gat wan miusik namba we i stret, mo wan sot prea blong klosem seves ia.

Ol dedikesen prea blong ol bilding bae oli rekodem wetem raet we i kam long prisaeding atoriti.

Ol mitinghaos we oli lisim o rentem, oli save dediketem olgeta, sapos oli mitim evri kondisen ia:

1. Evri spes we oli lisim o rentem, be i no ol eria we evriwan i yusum (olsem ol rod blong kam insaed long bilding, ol korido, mo toelet), Jos nomo i stap yusum.

2. Lis o rent ia i blong moa long wan yia.

3. Eria Presidensi i apruvum blong oli dediketem mitinghaos ia we oli rentemaot.

Sapos oli mitim evri kondisen ia mo oli dediketem mitinghaos, insaed long prea, bae oli mas talemaot se mitinghaos ia, bae oli dediketem “blong kasem taem we lis o rent i finis.”

35.4.4

Ol Imejensi

Long taem blong wan imejensi, stek presidensi i save talemaot sapos yes, o no, bae oli holem ol nomol wod miting.

Long wan imejensi o disasta we i tajem ful komuniti, o bigfala komuniti, bae stek presiden i save helpem ol oganaesesen we gavman i apruvum olgeta, mo letem oli yusum ol mitinghaos olsem ol imejensi selta. Jos i mas gat kontrol. Ol lida blong stek mo wod oli meksua se ol pipol we oli yusum ol bilding oli mas folem ol standet blong Jos, long saed blong mekem samting, fasin, mo tu, Tok blong Waes, taem oli stap long ol bilding ia. Blong gat moa infomesen long saed blong ol imejensi, luk long 22.9.1.3.

35.4.5

Ol Masket

Ol jos, oli dediketem olgeta long wosip i go long God mo oli stap olsem ol sef ples blong haed long ol samting we wol i ting se oli impoten. Blong tekem ol tul blong faet i kam long propeti blong Jos, ol tul we oli lukaotgud long olgeta o no, i tabu, i no gat raet. Olgeta ofisa nomo blong loa we oli mekem loa i stanap, olgeta nomo oli gat raet.

35.4.6

Ol Faea mo Kandel

Ol open flem o faea, mo ol kandel we oli laetem long faea, oli no save yusum insaed long ol bilding blong Jos.

35.4.7

Ol Flag

Nasonal flag i save flae long yad blong propeti blong Jos long eni taem, be i mas folem ol lokol kastom mo loa. Oli save hangem nasonal flag insaed long ol bilding blong Jos long ol spesel taem, olsem ol patriotik program. Blong soem tru fasin blong stap tru long nesen, i no nidim blong oli hangem nasonal flag oltaem long ol ples blong wosip.

35.4.8

Seves blong Brekem Graon blong Bilding

Afta we oli apruvum wan niufala bilding projek, ol lokol lida oli save gat wan seves blong brekem graon blong bilding, blong rere long wok blong stat bildim bilding. Seves ia, oli no save holem long Sandei.

35.4.9

Holemtaet Histri

Evri kwestin abaot fasin blong putum ol propeti o ol bilding we Jos i ona long hem i go long nasonal o lokol histri prisevesen lis o rejistri, oli mas sendem i go long ol hedkwota blong Jos tru long Eria Presidensi. Long saed blong ol kwestin blong holem taem blong makem, blong tingbaot, o prisevem ol nara ples, ol kalja samting, ol art wok, o pepa, kontaktem Jos Histri Dipatmen long 1-801-240-2272 o 1-800-453-3860, ekstensen 2-2272.

35.4.10

Bildim, Rentem, o Pem Wan Mitinghaos

Long saed blong ol polisi abaot fasin blong bildim, rentem o pem wan mitinghaos, luk long Bilding Manejmen Gaedlaen blong Ol Mitinghaos mo Ol Nara Propeti blong Jos o kontaktem temporol afea daerekta.

35.4.11

Ol Plan blong Mitinghaos

Jos i bin rere finis ol defren plan blong ol standet mitinghaos we oli stret wetem ol ples mo ol nid blong ol memba raon long wol. Taem i gat wan niu mitinghaos we oli bildim, oli jusum wan stret standet plan i stap. Plan ia, i givim aotlaen polisi blong ol rum, ol samting insaed, mo ol tul insaed long mitinghaos ia.

35.4.12

Ol Mandei Naet

Luk long 20.5.3.

35.4.13

Slip Samples Kasem Delaet o Gat Kamp

Ol propeti blong ol mitinghaos blong Jos, oli no save yusum blong slip kasem delaet, blong gat kamp, o gat danis pati we bae oli slip long mitinghaos.

35.4.14

Ples blong Putum Trak

Fasin blong yusum ples blong putum trak long Jos, i mas folem ol gaedlaen long stat blong seksen 35.4. Antap long hemia, oli no save yusum ples blong putum trak long Jos, olsem wan sot taem ples blong putum trak long hem sapos oli no gat raet long temporol afea daerekta.

35.4.15

Ol Foto, Ol Vidio Rekoding, mo Ol Brodkas insaed long Ol Japel

From se ol japel oli tabu tumas, fasin blong tekem foto, o mekem ol vidio rekoding insaed long ol japel, i tabu, man i no gat raet blong mekem. Blong kasem moa infomesen long saed blong fasin blong mekem onlaen vidio blong ol miting mo ol nara samting we oli holem insaed long japel, luk long 29.7.

35.4.16

Ol Raet mo Onasip blong Ol Propeti

Evri propeti we oli putum i stap, o oli holem blong gud blong ol lokol yunit, oli blong Jos, i no blong ol yunit. Be, ol lokol yunit oli gat bigfala kontrol long fasin blong yusum ol propeti we Jos i ona long ol, wetem ol bilding, graon, mo ol nara propeti, hemia folem onasip mo ol polisi blong Jos.

35.4.17

Administresen blong Ol Propeti blong Pasem Taem

Long saed blong infomesen abaot fasin blong lukaotem ol propeti blong pasem taem o gat aktiviti, luk long Bilding Manejmen Gaedlaen blong Ol Mitinghaos mo Ol Nara Propeti blong Jos o kontaktem temporol afea daerekta.

35.4.18

Ol Ples blong Kasem Kaekae

Ples blong kasem kaekae insaed long ol mitinghaos blong Jos, oli no blong rere long kaekae, o kuk; be nomo sapos hem i pat blong wan lesen, o blong soem wan samting, o nara tijing. Taem oli kasem kaekae insaed long bilding, o long yad blong Jos, oltaem, oli mas kukum long wan nara ples mo oli tekem i kam long mitinghaos; long mitinghaos nao oli save kipim i hot i stap, o i kolkol i stap, kasem taem oli kasem i go.

35.4.19

Ol Saen

Oli mas soemaot nem blong Jos long evri mitinghaos mo ol nara bilding blong Jos long lanwis we oli apruvum mo wetem logo blong hem. Oli hangem i fas i stap long bilding. Long sam situesen, oli save hangem nem blong Jos samples long yad blong Jos, olsem wan saen we i stanap hemwan.

35.4.20

Ples blong Storem Samting

Wan ples nomo we oli letem insaed long ol mitinghaos, i ples blong oli storem ol tul blong mentenem ples, mo ol nara saplae mo tul we oli givim raet from. Ol welfea samting, mo ol nara samting, oli no save storem olgeta insaed long ol mitinghaos.

Ol samting olsem, bensin, gas, mases, mo tul blong kamp, oli mas storem long ol bilding we oli seperet long mitinghaos.

Ol trak, ol trak blong yusum long aktiviti, mo ol nara tul blong wanwan man, bae oli no save storem i stap long propeti blong Jos.

35.4.21

Yusum Ol Mitinghaos Aotsaed long Ol Baondri blong Stek

Evri mitinghaos, we i stap kolosap long wan wod, oli mas yusum fulwan bifo oli save askem sam moa bilding. Taem i nid, ol stek presidensi, afta we oli toktok wetem Eria Presiden, i save putum sam wod oli yusum ol mitinghaos long wan stek we i stap kolosap. Moa long wan stek i save yusum wan stek senta sapos hem i stap long wan gudfala ples.

35.4.22

Ol Mared mo Ol Lafet blong Mared

Wan seremoni blong mared o wan lafet blong mared, i save tekem ples insaed long wan hom, o bilding blong Jos, sapos i no stopem taemtebol blong ol miting blong Jos. Be, oli no save holem lafet blong mared insaed long japel, be nomo sapos ples ia, oli yusum olsem wan rum blong holem plante defren aktiviti. Ol mared mo ol lafet blong mared oli no save tekples long Sandei, o long Mandei naet.

Jos i no letem blong oli yusum ol mitinghaos blong hem o ol nara propeti blong Jos, blong yusum blong mekem ol seremoni, lafet, o ol nara aktiviti we i go wetem ol sem seks mared.

Olgeta we oli lukaot long mared o lafet ia, oli responsibol blong klinim evri ples we oli yusum insaed long bilding.