“36. Stap Krietem, Jenisim, mo Givim Nem long Ol Niu Yunit,” Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent (2024).
“36. Stap Krietem, Jenisim, mo Givim Nem long Ol Niu Yunit,” Jeneral Hanbuk.
36
Stap Krietem, Jenisim, mo Givim Nem long Ol Niu Yunit
36.0
Fas Toktok
Ol memba blong Jos oli pat blong ol kongregesen folem ples we oli stap laef long hem (luk long Mosaea 25:17–24). I nid blong gat ol kongregesen ia blong stap oganaesem mo mekem wok blong Jos anda long stret prishud atoriti. Ol lida blong ol kongregesen oli kasem ol ki blong prishud we i givim raet blong mekem ol odinens blong prishud. Ol kongregesen oli helpem tu ol memba blong mekem fet blong wanwan i kam strong moa taem oli stap wosipim God, stap lanem ol tijing blong Jisas Kraes, mo stap givim seves.
Ol yunit blong Jos (we oli singaotem yunit tu), i gat ol stek, ol distrik, ol wod, mo ol branj. Oli stap krietem, jenisim, o klosem olgeta nomo taem i gat nid from.
Ol lida oli wok blong mekem paoa long saed blong spirit blong ol memba i kam antap bifo oli proposem blong krietem wan niu yunit, o bifo oli jenisim ol baondri blong wan yunit. Oli mas krietem ol niu yunit nomo taem we olgeta we oli stap oli strong inaf.
Blong kasem sapot long ol ples insaed long Yunaeted Stet mo Kanada, ring long 1-801-240-1007. Blong ol ples aotsaed long Yunaeted Stet mo Kanada, ringim eria ofis.
36.1
Stap Krietem o Stap Jenisim Ol Stek mo Ol Distrik
Oli krietem ol stek aot long ol distrik, o taem oli serem ol stek we oli stap finis. Wan stek o misin presiden i save askem blong oli krietem wan niu stek. Faswan, hem i meksua se bae i mitim ol minimom samting olsem we oli soem long tebol we i stap andanit ia.
Minimom Samting blong Kasem blong Krietem Wan Stek
Oli krietem ol distrik aot long ol branj insaed long wan misin, o wan stek we i stap finis. I no gat wan stret minimom namba blong ol memba o ol branj we oli nidim blong save krietem wan distrik.
Wan distrik i mas gat wan mak blong paoa we i nid blong wan stek blong sikis manis o moa, bifo wan misin presiden i save askem blong oli mekem i kam wan stek.
Ol baondri blong wan stek o distrik i folem ol baondri blong ol yunit we oli stap insaed long hem. Blong proposem blong jenisim ol baondri blong wan stek o distrik, o blong transferem wan yunit i go long wan stek o distrik we i stap kolosap, stek presiden mo misin presiden we oli stap oli mekem plan mo oli kodinetem rikwes ia.
Wan stek o misin presiden i save askem blong oli krietem wan niu rikwes long “Baondri mo Lidasip Rikwes.” Sapos hem i no save yusum onlaen sistem, hem i save daonlodem pepa fom taem hem i klikim link we i stap.
Bae Fas Presidensi mo Kworom blong Olgeta Twelef Aposol nomo oli save givim apruvol blong mekem ol jenis blong ol stek. Plante taem, i save tekem kasem eit wik blong oli mekem wan desisen, afta we oli kasem wan komplit proposol.
36.2
Stap Krietem o Stap Jenisim Ol Wod mo Branj insaed long Ol Stek
Ol wod mo ol branj we oli stap finis insaed long ol stek, oli krietem aot long ol yunit we oli stap finis. Wan stek presiden i save rikwestem blong stap krietem wan niu wod o branj insaed long stek. Faswan, hem i meksua se bae i mitim ol minimom samting olsem we oli soem long tebol we oli stap andanit ia.
Ol Minimom Samting blong Kasem blong Krietem Wan Wod o Branj Insaed long Wan Stek
Wan stek presiden i save askem blong jenisim wan branj i kam wan wod taem we yunit ia i mitim ol minimom samting blong kasem, mo taem hem i gat wan man i stap blong hem i stap olsem wan bisop.
Wan stek presiden i save askem blong oli jenisim baondri o klosem ol wod mo ol branj, taem we i gat wan klia nid blong mekem olsem.
Wan stek presiden i statem wan niu rikwes long “Baondri mo Lidasip Rikwes.” Sapos hem i no save yusum onlaen sistem, hem i save daonlodem pepa fom taem hem i klikim link we i stap.
Apruvol blong ol jenis we oli proposem blong ol wod mo branj, i kam long long Fas Presidensi. Plante taem, i save tekem kasem sikis wik blong oli mekem wan desisen, afta we oli kasem wan komplit proposol.
36.3
Stap Krietem o Stap Jenisim Ol Branj insaed long Ol Misin
Wan misin presiden i save proposem blong oli krietem ol niu branj insaed long wan misin. I no gat wan stret minimom namba blong ol memba we oli nidim blong save krietem wan branj insaed long wan misin. Be, plante taem, ol niu branj oli mas gat fo man we oli kasem prishud i stap. Wan long olgeta i mas holem Melkesedek Prishud mo i aktiv mo stap pem ful taeting.
Wan misin presiden i statem wan niu rikwes long “Baondri mo Lidasip Rikwes.” Sapos hem i no save yusum onlaen sistem, hem i save daonlodem pepa fom taem hem i klikim link we i stap.
Eria Presidensi i save givim faenol apruvol o i save sakemaot rikwes blong wan misin presiden blong:
-
Krietem mo givim nem blong wan niu branj insaed long wan misin.
-
Klosem wan branj insaed long wan misin.
-
Jenisim ol baondri blong wan branj insaed long wan misin sapos jenis ia i no mekem eni samting i defren insaed long wan stek, distrik, o nara misin.
Eria Presidensi i mas sendem rikwes ia we oli apruvum i go long hedkwota blong Jos blong oli pusum i go bifo oli save krietem branj ia, o bifo oli save mekem ol jenis insaed long sistem blong Jos.
Eria Presidensi i save givim agrimen, be i no save givim faenol apruvol blong rikwes blong wan misin presiden blong:
-
Transferem wan branj i go long wan nara stek, distrik, o misin.
-
Jenisim nem blong wan branj, we i stap finis, insaed long wan misin.
-
Jenisim ol baondri blong branj insaed long wan misin sapos jenis ia i minim se bae i mekem eni samting i defren insaed long wan stek, wan distrik, o wan nara misin.
-
Krietem o jenisim wan misin branj blong ol yang singgel adalt o ol singgel adalt; ol memba we oli toktok wan lanwis we i defren long lanwis blong yunit blong olgeta; ol memba we oli yusum saen lanwis; ol memba we oli stap insaed long ol kea senta, ol tritmen program, o long kalabus; o ol memba insaed long militeri.
Long ol situesen olsem, Eria Presidensi i luklukbak long rikwes, mo sapos oli agri wetem, oli sendem i go blong oli apruvum. Apruvol blong ol jenis we oli proposem long branj, i kam long long Fas Presidensi. Plante taem, i save tekem kasem sikis wik blong oli mekem wan desisen, afta we oli kasem wan komplit proposol.
36.4
Givim Nem long Ol Jos Yunit
Nem blong wan yunit i sapos blong talemaot huia olgeta we oli stap laef long eria ia. Plante taem, ol nem blong ol wod mo branj we oli stap finis bae oli no save jenisim olgeta.
Sapos nem blong yunit i nid blong jenis from wan baondri i bin jenis, stek o misin presiden i statem wan niu rikwes taem hem i yusum onlaen sistem long Baondri mo Lidasip Rikwes. Sapos hem i no save yusum onlaen sistem, hem i save daonlodem pepa fom taem hem i klikim link we i stap.
Fas Presidensi nomo i save givim ol apruvol ia.
Ol Eria Presidensi oli save apruvum ol rikwes blong krietem mo givim nem long ol niu branj insaed long ol misin (luk long 36.3).
36.4.1
Blong Stap Givim Nem long Ol Stek mo Ol Distrik
Fas toktok blong nem blong stek o distrik, hem i nem blong wan long ol samting ia:
-
Taon we stek o distrik hedkwota i stap long hem
-
Wan nara taon insaed long stek o distrik we ol memba oli save gud long hem
-
Wan samting we i stap long graon ia insaed long stek o distrik baondri
Long Yunaeted Stet mo Kanada, seken toktok, hem i nem blong stet o provins we stek o distrik ia i stap long hem. Long ol nara kantri, seken toktok, plante taem i nem blong kantri.
Taem we i gat moa long wan stek o distrik insaed long sem taon, nambatri toktok i wan toktok we i talem nem blong wan samting we i stap insaed long ol baondri blong yunit. Sam samting we i oraet blong talemaot ples blong ol stek o distrik i stap daon ia:
-
Kampas daereksen (Not, Saot, Is o Wes)
-
Komuniti o ol ples raonabaot
-
Wan samting we fulap man i save we i stap long wan ples
Sam samting we i no oraet blong yusum long nem blong ol stek mo distrik, oli soem daon ia:
-
Ol nara daereksen toktok (eksampol Saot Wes)
-
Nem blong ol pipol
Taem we nem blong wan taon i semmak long hemia blong stet, provins, o kantri, oli no ripitim nem ia insaed long nem. Eksampol:
-
Aedaho Fol Teila Maonten Stek, i no Aedaho Fol, Aedaho Teila Maonten Stek
-
Meksiko Siti Asteka Stek, i no Meksiko Siti Meksiko Asteka Stek
36.4.2
Stap Givim Nem long Ol Wod mo Branj
Oli putum nem blong wan wod o branj folem wan samting we i stap insaed long ol baondri blong hem. Sam nara samting we oli letem blong yusum blong putum nem blong ol wod mo ol branj, oli soem andanit ia:
-
Taon
-
Komuniti o ol ples raonabaot
-
Rod
-
Park
-
Skul
-
Wan samting we fulap man i save we i stap long wan ples
Sam samting we oli stap, we oli no letem blong yusum blong givim nem blong ol wod mo ol branj, oli soem andanit ia:
-
Kampas daereksen (eksampol, Is o Not Wes)
-
Nem blong ol pipol
-
Ol nem folem wan ples blong luk ples (eksampol, Tempol Lukluk, Maonten Lukluk, o Reva Lukluk)
-
Blong kombaenem tu (2) nem blong krietem wan niu nem
Nem blong wan samting we i tokbaot ples, oli yusum insaed long nem blong wod o branj. Sapos i gat moa long wan wod o branj wetem semfala nem, oli ademap wan namba olsem pat blong nem, olsem Preston Wod 1, mo Preston Wod 2.
Nem blong wod o branj i mas stap long lanwis blong eria ia. Sapos lanwis ia i no yusum ol Rom alfabet, oli save yusum translesen blong ol Rom leta insaed long rikwes.
36.5
Stap Yusum Ol Jenis we Oli Proposem
36.5.1
Ol Jenis long Stek mo Distrik
Apruvol leta blong stap krietem o klosem wan stek o distrik, plante taem, insaed long hem i gat deit blong ol jenis oli hapen. Deit ia, oli no mas anaonsem kasem taem we Jeneral Atoriti i toktok raon long ol ditel blong hem wetem stek o misin presiden. Ol jenis ia, oli no stap anaonsem kasem taem we stek o distrik konfrens i hapen.
Ol stek o misin presiden oli sendem wan notis i go long hedkwota blong Jos, o eria ofis blong olgeta, afta we oli mekem olgeta jenis ia.
36.5.2
Ol Jenis long Wod o Branj
Afta we wan stek o misin presiden i kasem apruvol blong wan jenis insaed long wod o branj, plante taem, hem i gat 90 dei blong presentem ol jenis ia blong ol memba oli sastenem. Sapos hem i nidim blong pusumbak ol 90 dei ia, hem i askem raet ia long Ofis blong Fas Presidensi.
Ol stek o misin presiden oli mekem folem ol proposol ia insaed long LKR taem oli mekem ol jenis ia. Blong kasem help long Ol Yunaeted Stet mo Kanada, kolem 801-240-6243 o imelem oiservices@ChurchofJesusChrist.org. Blong kasem help aotsaed long Yunaeted Stet mo Kanada, kontaktem eria ofis. Oli no save apdeitem ol map mo ol yunit kasem taem we Jos hedkwota i rekodem olgeta.
36.6
Besik Yunit Program
Jos i bin developem Besik Yunit Program blong ol smol branj, o ol smol grup blong ol memba we oli stap kam tugeta, we oli save olgeta olsem ol grup (luk long 37.7 blong kasem moa infomesen long saed blong ol grup). Wan Eria Presidensi i save givim raet blong oli yusum Besik Yunit Program long ol grup o branj taem eni long ol kondisen ia i stap:
-
Jos i jes stat.
-
Ol memba oli stap longlongwe.
-
Namba blong ol memba i smol, lidasip i jes stat blong develop.
-
O memba oli gat ol spesel nid long saed blong lanwis.
-
Ol memba oli stap long militeri (luk long 38.9.4 from ol risen we i mekem oli save krietem wan seves memba grup).
-
Ol memba oli stap long ol kea senta, ol tritmen program, o long kalabus.
Ol Eria Presidensi mo ol nara lida oli tokbaot plante se ol yunit we oli stap yusum Besik Yunit Program, oli no mas mekem ol oganaesesen, ol miting, mo ol program, oli gro bigwan long wan fasin we i hariap tumas. Ol lidasip oli gro gud taem ol risos blong Jos oli balens gud wetem ol situesen mo nid blong ol memba.
Ol lida oli serem tu ol prinsipol ia wetem ol grup mo branj we oli stap yusum Besik Yunit Program:
-
Lukaotem insperesen we i kam long Spirit blong save wanem blong mekem mo olsem wanem blong mekem.
-
Tijim ol stamba doktrin mo prinsipol blong gospel.
-
Helpem ol memba blong (1) andastanem mo kasem ol impoten prishud odinens mo (2) mekem mo kipim ol kavenan we i go wetem.
Ol yunit ia oli save mekem ol miting blong Jos long haos, long wan bilding we oli rentem, o long wan bilding we i blong Jos (luk long 35.3). Misin, stek, o distrik presidensi i save givim infomesen blong kasem mo mentenem wan miting ples blong grup o branj.
Sapos wan grup o branj i gat smol memba nomo, bae oli mekem sakramen miting nomo mo wan smol taem blong givim ol gospel instraksen long evri memba. Blong gospel instraksen, ol memba oli yusum ol skripja mo Kam Folem Mi—Blong Hom mo Jos. Sapos oli no transletem yet ol skripja i go long lanwis we ol memba oli toktok long hem, ol memba oli yusum lesen buk blong Gospel Fundamentals blong gospel instraksen. Taem Jos i stap gro, bae i gat moa translesen blong ol skripja, ol hym mo singsing, mo ol Jos magasin we bae i gat i stap.
Taem yunit i stap gro, ol lida blong Jos oli mas oganaesem wan kworom blong ol elda mo wan Rilif Sosaeti (luk long 8.3.3 mo 9.3.2). Taem namba blong ol memba mo ol pipol we oli save kam ol lida oli gro, branj presiden i save oganaesem ol kworom blong Aronik Prishud mo ol oganaesesen blong Ol Yang Woman, Praemeri, mo Sandei Skul (luk long 10.3, 11.3.2, 12.3.2, mo 13.2.2).