6.

Ang Bishopric

6.1

Ang Bishop ug ang Iyang mga Magtatambag

Ang bishop naghupot sa mga yawe sa pagkapari aron sa pagdumala sa buhat sa Simbahan diha sa ward (tan-awa sa 3.4.1). Siya ug ang iyang mga magtatambag mao ang bishopric. Sila makadawat og giya gikan sa kapangulohan sa stake. Sila moatiman sa mga miyembro sa ward uban sa gugma, motabang kanila nga mahimong tinuod nga mga sumusunod ni Jesukristo (tan-awa sa Moroni 7:48).

Ang bishop adunay lima ka dagkong mga responsibilidad:

• Siya mao ang tigdumalang high priest diha sa ward.

• Siya ang presidente sa Aaronic nga Pagkapari.

• Siya ang maghuhukom sa kadaghanan [common judge].

• Siya makigsabot sa buhat sa kaluwasan ug kahimayaan, lakip na sa pag-amuma alang niadtong nanginahanglan.

• Siya ang modumala sa mga rekord, mga panalapi, ug sa paggamit sa meetinghouse.

Tungod kay ang bishop naghupot sa mga yawe sa pagkapari, siya adunay katungod sa pagdawat og pagpadayag alang sa ward (tan-awa sa Doktrina ug mga Pakigsaad 128:11). Busa, ang pipila ka responsibilidad iyaha lamang. Gihulagway kini niini nga kapitulo.

Ang labing importanting responsibilidad sa bishop mao ang nagtubo nga henerasyon diha sa ward, lakip sa mga young single adult. Aron siya makahimo sa pagtutok niini nga responsibilidad, siya motugyan sa daghang mga buluhaton (tan-awa sa 4.2.6). Siya mahimong motugyan ngadto sa iyang mga magtatambag, sa klerk ug sa kaabag nga mga klerk, sa executive secretary, sa mga lider sa korum ug organisasyon, ug sa uban.

Kon ang bishop dili makahimo sa iyang mga responsibilidad, ang usa ka magtatambag mahimong temporaryong molihok sa iyang dapit, gawas kon gipahibalo niini nga tamdanan nga basahon. Ang bishop o iyang magtatambag mokonsulta sa presidente sa stake kon siya adunay mga pangutana mahitungod sa magtatambag nga naglihok alang sa bishop.

6.1.1

Tigdumalang High Priest

Ang bishop mao ang nag-unang espirituwal nga lider sa ward. Siya mopakita og ehemplo pinaagi sa pagserbisyo “uban ang kabalaan sa kasingkasing” (Mosiah 18:12). Siya motudlo, mobayaw, ug modasig (tan-awa sa Mateo 20:28). Siya mosunod sa mga baroganan sa pagkapangulo diha sa Doktrina ug mga Pakigsaad 121:34–46.

Ang bishop usa ka matinud-anong disipulo ni Jesukristo. Matinuoron siya sa iyang mga pakigsaad. Siya maunongon sa iyang asawa ug pamilya. Siya magpakita og ehemplo sa pagkamatarong alang sa iyang pamilya, sa ward, ug sa komunidad. (Tan-awa sa 1 Timoteo 3:2–7.) Ang iyang mga magtatambag mga tawo nga adunay samang kinaiya.

Ang bishop mohatag og giya ug tambag sa ubang mga lider sa ward. Siya moawhag kanila sa ilang mga katungdanan.

6.1.1.1

Mga Organisasyon sa Ward ug mga Korum sa Pagkapari

Ang bishop adunay responsibilidad sa mga organisasyon sa Relief Society ug sa Young Women sa ward. Siya mosangon sa iyang mga magtatambag og responsibilidad alang sa mga organisasyon sa Sunday School ug Primary ug sa ubang mga programa sa ward. (Tan-awa sa 9.3.1, 11.3.1, 12.3.1, ug 13.2.1.)

Ang mga responsibilidad sa bishop alang sa mga korum sa Aaronic nga Pagkapari gilatid sa 6.1.2. Ang iyang mga responsibilidad alang sa mga korum sa elder gilatid sa 8.3.1.

Ang bishop mogiya usab sa mga presidente sa korum sa mga elder ug Relief Society sa pagdumala sa pagpangalagad. Siya makigmiting niining duha ka presidente dili mominos matag tulo ka bulan aron sa pagtubag sa mga panginahanglan sa mga indibidwal ug sa mga pamilya (tan-awa sa 21.2).

6.1.1.2

Mga Ordinansa ug mga Panalangin

Ang bishop mogiya sa pagpangalagad sa mosunod nga mga ordinansa ug mga panalangin diha sa ward:

• Ang sakramento

• Paghatag og ngalan ug pagpanalangin sa mga bata

• Bunyag ug kompirmasyon sa 8 anyos nga mga bata nga anaa na sa rekord (alang niadtong adunay intelektuwal nga mga kakulangan, tan-awa sa 18.3; alang sa mga kinabig, tan-awa sa 18.7.1.2)

• Pagtugyan sa Aaronic nga Pagkapari ug ordinasyon ngadto sa mga katungdanan sa deacon, teacher, ug priest

Alang sa impormasyon mahitungod sa mga ordinansa ug mga panalangin, tan-awa sa kapitulo 18.

6.1.1.3

Mga Konseho ug mga Miting

Ang bishop mangulo sa konseho sa ward ug sa konseho sa kabatan-onan sa ward (tan-awa sa 29.2.5 ug 29.2.6). Siya mogamit niini nga mga konseho sa pagtabang sa pagpakigsabot sa buhat sa kaluwasan ug kahimayaan diha sa ward. Siya motugyan sa kadaghanan niini nga buhat ug mosusi sa mga buluhaton (tan-awa sa 4.2.6).

Ang bishop modapit sa mga lider sa pagtinambagay mahitungod kon unsaon sa pagtukod og epirituhanong kalig-on ug panaghiusa diha sa ward. Siya moawhag sa tanang sakop sa konseho sa pagtinguha og inspirasyon ug pag-apil sa mga panaghisgotan. (Tan-awa sa Doktrina ug mga Pakigsaad 88:122; tan-awa usab sa 7.6 niini nga tamdanan nga basahon.)

Ang bishopric moplano sa mga panagtigom alang sa sakramento ug sa ubang mga miting sa ward nga nalista diha sa kapitulo 29. Ang bishop modumala sa mga miting sa ward gawas kon ang usa ka sakop sa kapangulohan sa stake, usa ka Area Seventy, o usa ka Kinatibuk-ang Awtoridad motambong. Ang mga magtatambag sa bishop mahimong mopahigayon niini nga mga miting. Sila usab modumala kon wala diha ang bishop.

6.1.1.4

Mga Calling ug mga Pag-release

Ang mga responsibilidad sa bishop alang sa mga calling ug mga pag-release gilatid diha sa kapitulo 30. Siya mahimong mosangon sa iyang mga magtatambag sa paghatag og mga calling ug mga pag-release sumala sa gilatid diha sa Tsart sa mga Calling (30.7).

6.1.2

Presidente sa Aaronic nga Pagkapari

“Ang bishopric mao ang kapangulohan [sa Aaronic] nga pagkapari, ug naghupot sa mga yawe o awtoridad sa sama nga pagtugot” (Doktrina ug mga Pakigsaad 107:15; tan-awa usab sa bersikulo 20). Ang bishop aduna sa mosunod nga mga responsibilidad isip presidente sa Aaronic nga Pagkapari diha sa ward. Ang iyang mga magtatambag moabag kaniya.

• Mosuporta sa mga ginikanan sa pagtudlo sa kabatan-onan. Motabang sa kabatan-onan nga moserbisyo sa matinud-anong paagi, mohimo ug motuman sa sagrado nga mga pakigsaad, ug moandam sa pagdawat sa mga ordinansa sa templo. Motabang sa mga batan-ong lalaki nga mag-andam nga maordinahan ngadto sa mga katungdanan sa pagkapari ug moserbisyo og full-time nga mga misyon. Kon ang mga batan-ong babaye magtinguha nga moserbisyo og full-time nga mga misyon, motabang kanila sa pagpangandam. Ang programa sa Kabataan ug Kabatan-onan makatabang niini nga mga paningkamot (tan-awa sa ChildrenandYouth.ChurchofJesusChrist.org).

• Modumala sa mga korum sa Aaronic nga Pagkapari ug sa mga klase sa Young Women. Ang bishop mao ang presidente sa korum sa mga priest (tan-awa sa Doktrina ug mga Pakigsaad 107:87–88). Ang iyang unang magtatambag adunay responsibilidad alang sa korum sa mga teacher. Ang ikaduhang magtatambag adunay responsibilidad alang sa korum sa mga deacon. Alang sa dugang nga impormasyon mahitungod sa pagpangulo sa korum sa Aaronic nga Pagkapari, tan-awa sa 10.3, 10.4, ug 10.5.

• Motambag sa presidente sa Young Women sa ward. Dili itugyan sa bishop kini nga buluhaton ngadto sa usa ka magtatambag. Siya ug ang iyang mga magtatambag kanunay usab nga moapil sa mga miting, serbisyo, ug mga kalihokan sa Young Women (tan-awa sa 11.3.1).

• Mohimo og mga interbiyo kanunay uban sa kabatan-onan. Alang sa mga lagda mahitungod niini nga mga interbiyo sa katakos, tan-awa sa 31.1.7.

• Mosuporta sa mga pamilya ug sa mga lider ug mga magtutudlo sa Primary sa ilang mga paningkamot sa pagtabang sa mga bata nga mohimo ug motuman sa mga pakigsaad (tan-awa sa kapitulo 12).

6.1.3

Maghuhukom sa Kadaghanan [Common Judge]

Ang bishop mao ang maghuhukom sa kadaghanan diha sa ward (tan-awa sa Doktrina ug mga Pakigsaad 107:71–74). Siya maningkamot sa pagsunod sa ehemplo sa Manluluwas isip usa ka matarong nga maghuhukom (tan-awa sa 3 Nephi 27:27). Siya aduna sa mosunod nga mga responsibilidad:

• Motabang sa kabatan-onan ug mga hamtong nga mahimong sarang ug takos sa usa ka rekomend sa templo.

• Mopahigayon og mga interbiyo sa katakos sumala sa gilatid diha sa 31.1.5. Mahimo usab niyang tugotan ang iyang mga magtatambag sa pagpahigayon og mga interbiyo (tan-awa sa 31.1.6). Alang sa mga lagda bahin sa mga interbiyo sa katakos, tan-awa sa 31.1.1.

• Motambag sa mga miyembro sa ward nga nagtinguha og espirituhanong giya, nga adunay bug-at nga personal nga mga problema, o nakahimo og seryosong mga sala, motabang kanila nga makaangkon sa makaayo nga gahom ni Jesukristo. Ang bishop mahimong mohangyo sa iyang mga magtatambag, sa mga presidente sa korum sa mga elder ug Relief Society, ug sa uban sa pagtambag sa mga miyembro sa ward mahitungod sa pipila ka butang. Hinoon, ang bishop lamang ang motambag sa mga miyembro sa ward mahitungod sa mga butang sa katakos, abuso, ug sa pagtugot sa paggamit sa mga pundo sa halad sa puasa. Alang sa mga lagda bahin sa pagtambag, tan-awa sa 31.2.

• Ubos sa direksyon sa presidente sa stake, mopahigayon og konseho sa pagkamiyembro kon gikinahanglan sumala sa mga lagda sa kapitulo 32.

6.1.4

Pagpakigsabot bahin sa Buhat sa Kaluwasan ug Kahimayaan

Ang bishop makigsabot bahin sa buhat sa kaluwasan ug kahimayaan diha sa ward (tan-awa sa kapitulo 1). Ang iyang mga magtatambag ug ang ubang mga lider sa ward motabang kaniya.

Ang bishop motabang sa mga miyembro nga mosunod sa ebanghelyo. Siya motabang kanila nga malig-on ang ilang hugot nga pagtuo sa Langitnong Amahan ug ni Jesukristo ug sa Iyang Pag-ula (tan-awa sa Doktrina ug mga Pakigsaad 20:29). Siya motudlo kanila sa pag-ampo ug pagtuon sa mga kasulatan. Siya modapit kanila nga mohimo og mga pakigsaad pinaagi sa pagdawat sa mga ordinansa sa kaluwasan ug kahimayaan. Siya moawhag kanila sa pagtuman sa ilang mga pakigsaad.

Ang bishop molig-on sa mga miyembro sa Simbahan. Siya moawhag sa mga pamilya sa pag-apil sa kanunay nga pag-ampo sa pamilya ug dungan nga magkat-on sa ebanghelyo, lakip na sa home evening. Siya motudlo kanila sa paghigugma ug pagserbisyo sa usag usa. Siya motudlo pinaagi sa pulong ug ehemplo nga ang mga calling sa Simbahan mahimong matuman nga dili mabalda gikan sa mga responsibilidad sa pamilya. Siya mosiguro usab nga ang mga kalihokan sa Simbahan mosuporta sa mga paningkamot sa mga ginikanan sa pagpadako sa ilang mga anak sa matarong nga paagi.

Agi og dugang sa pagtabang sa mga miyembro nga mosunod sa ebanghelyo, ang bishop adunay laing mga responsibilidad sa buhat sa kaluwasan ug kahimayaan. Pananglitan, siya:

• Motabang sa mga lalaki nga mag-andam nga maordinahan ngadto sa mga katungdanan sa pagkapari.

• Mangulo sa mga paningkamot sa pag-atiman alang niadtong nanginahanglan diha sa ward (tan-awa sa 6.1.4.1 ug 22.2.1).

• Mogiya sa mga kapangulohan sa korum sa mga elder ug Relief Society samtang mangulo sila sa mga paningkamot sa pagpangalagad diha sa ward (tan-awa sa 21.2.1).

• Makigsabot bahin sa buhat sa mga kapangulohan sa korum sa mga elder ug Relief Society samtang sila mangulo sa mga paningkamot sa ward sa pagpaambit sa ebanghelyo ug pagpalig-on sa bag-o ug mibalik nga mga miyembro (tan-awa sa 23.1).

• Makigsabot bahin sa mga paningkamot sa mga kapangulohan sa korum sa mga elder ug Relief Society samtang mangulo sila sa buhat sa templo ug family history diha sa ward (tan-awa sa 25.2).

• Motabang sa mga miyembro nga mangandam sa pagdawat og rekomend sa templo ug mga ordinansa sa templo (tan-awa sa 27.1).

6.1.4.1

Mangulo sa mga Paningkamot sa Pag-atiman alang Niadtong adunay Temporal nga mga Panginahanglan

Ang bishop adunay usa ka balaanong sugo sa pagpangita ug sa pag-atiman niadtong adunay temporal nga mga panginahanglan (tan-awa sa Doktrina ug mga Pakigsaad 84:112). Siya motugyan sa kadaghanan niini nga buhat ngadto sa mga kapangulohan sa Relief Society ug sa korum sa mga elder.

Ang pipila ka katungdanan ipahigayon lamang sa bishop. Pananglitan, siya motino sa matang, kantidad, ug gidugayon sa bisan unsa nga temporal nga tabang nga ihatag sa Simbahan. Sa pagbuhat sa ingon, siya mokonsulta kanunay sa mga presidente sa Relief Society ug sa korum sa mga elder. Alang sa dugang nga impormasyon, tan-awa sa 22.4 ug 22.5.

Ang mga sakop sa bishopric motudlo sa mga baroganan sa pag-atiman alang niadtong nanginahanglan ug sa pagpalig-on sa pagbarog sa kinaugalingong paningkamot (tan-awa sa 22.1). Sila usab motudlo sa balaod sa puasa (tan-awa sa 22.2.2). Sila modumala sa pagpangolekta sa mga halad sa puasa (tan-awa sa 34.4.2).

Ang bishop motudlo sa ubang mga lider sa ward sa ilang mga responsibilidad sa pag-atiman alang niadtong nanginahanglan. Siya usab mangulo sa konseho sa ward niini nga mga paningkamot.

Alang sa dugang nga impormasyon mahitungod kon sa unsang paagi nga ang bishop moatiman alang niadtong nanginahanglan, tan-awa sa 22.6.1.

6.1.5

Mga Rekord, mga Panalapi, ug ang Meetinghouse

Ang bishop modumala sa mga rekord sa ward, mga panalapi sa ward, ug sa meetinghouse. Mahimo niyang isangon ang kadaghanan sa trabaho bahin sa mga rekord ug mga panalapi ngadto sa iyang mga magtatambag ug mga klerk. Mahimo niyang sangonan ang usa sa iyang mga magtatambag nga moserbisyo isip representante sa gambalay sa ward, o mahimo siyang motawag og laing miyembro sa pagbuhat sa ingon.

Alang sa impormasyon mahitungod sa mga rekord, tan-awa sa kapitulo 33. Alang sa impormasyon mahitungod sa mga panalapi, tan-awa sa kapitulo 34. Alang sa impormasyon mahitungod sa mga meetinghouse, tan-awa sa kapitulo 35.

6.2

Mga Kalainan tali sa mga Kapangulohan sa Branch ug mga Bishopric

Sa usa ka branch, ang usa ka naghupot sa Melchizedek nga Pagkapari tawagon isip presidente sa branch. Siya naghupot sa mga yawe sa pagkapari nga gikinahanglan sa pagdumala (tan-awa sa 3.4.1.1). Siya ug ang iyang mga magtatambag moserbisyo sama sa usa ka bishopric apan uban sa mosunod nga mga kalainan:

• Ang usa ka presidente sa branch mahimong usa ka elder o high priest. Ang bishop kinahanglan gayod nga usa ka high priest.

• Ang usa ka presidente sa branch dili i-set apart isip tigdumalang high priest. Hinoon, siya modumala sa branch ug aduna sa tanan nga mga responsibilidad nga gihulagway diha sa 6.1.1.

• Ang mga magtatambag sa kapangulohan sa branch dili moisyu og mga rekomend sa templo (tan-awa sa 26.3.1).

6.3

Executive Secretary sa Ward

Ang bishop morekomendar og usa ka naghupot sa Melchizedek nga Pagkapari nga moserbisyo isip executive secretary sa ward. Sila mohimo niini nga rekomendasyon ngadto sa kapangulohan sa stake. Ang executive secretary kinahanglan nga takos sa usa ka rekomend sa templo. Siya tawagon ug i-set apart sa usa ka sakop sa kapangulohan sa stake o sa gisangonan nga high councilor.

Ang executive secretary makigtambayayong uban sa bishop ug sa iyang mga magtatambag, apan siya dili usa ka sakop sa bishopric. Siya aduna sa mosunod nga mga responsibilidad:

• Makigkita siya sa bishopric ug mag-andam og mga agenda kon sangonan.

• Moserbisyo isip usa ka sakop sa konseho sa ward ug motambong sa mga miting sa konseho sa ward. Kon sugoon sa bishopric, mosusi sa mga buluhaton nga gihimo niini nga mga miting.

• Moeskedyul usab siya sa mga appointment alang sa bishopric.

• Moeskedyul og mga interbiyo alang sa kabatan-onan ug mga hamtong kinsa kinahanglan nga mobag-o sa ilang mga rekomend sa templo.

• Kon gisangonan sa bishopric, makigsabot bahin sa mga paningkamot sa ward sa pagtabang sa mga miyembro nga makakuha og mga magasin sa Simbahan (tan-awa sa 38.8.8).

• Motabang sa bishopric bahin sa seminary ug institute, sama sa pagtabang sa mga miyembro sa ward nga makaparehistro alang sa mga klase (tan-awa sa kapitulo 15).

• Magtipig siya og bag-ong lista sa mga ngalan ug mga address sa mga miyembro sa ward nga anaa sa militar. Mosiguro nga ang mga lider sa ward nakahibalo niini nga mga miyembro (tan-awa sa 38.9.2). Mopahibalo sa executive secretary sa stake kon magplano ang mga miyembro nga mosulod sa militar.

6.4

Klerk sa Ward ug Kaabag nga mga Klerk sa Ward

Ang bishop morekomendar og naghupot sa Melchizedek nga Pagkapari nga moserbisyo isip klerk sa ward. Siya mohimo niini nga rekomendasyon ngadto sa kapangulohan sa stake. Ang klerk kinahanglang takos sa rekomend sa templo. Siya tawagon ug i-set apart sa usa ka sakop sa kapangulohan sa stake.

Ang kaabag nga mga klerk sa ward mahimong tawagon usab (tan-awa sa 33.4.3). Sila tawagon ug i-set apart sa usa ka sakop sa kapangulohan sa stake o sa usa ka gisangonan nga high councilor.

Ang mga klerk makigtambayayong sa bishop ug sa iyang mga magtatambag, apan sila dili sakop sa bishopric. Ang mga responsibilidad sa klerk sa ward ug sa kaabag nga mga klerk sa ward gilatid diha sa 33.4.2 ug 33.4.3.