9.

iSoqosoqo ni Veivukei

9.1

iNaki kei na Mataisoqosoqo

Na iSoqosoqo ni Veivukei sa vukea na luve ni Kalou me ra vakavakarau ni lesu tale ki na Nona iserau. Ni ra sa luvena yalewa na itubutubu vakalomalagi, na lewe ni iSoqosoqo ni Veivukei era “vakamacalataka na ivolanikalou,” “veivakauqeti vei ira na lewe ni lotu,” reki ka marau, ka “dei tikoga ki na veiyalayalati [era sa] cakava” (Vunau kei na Veiyalayalati 25:7, 13).

9.1.1

iNaki

Na iSoqosoqo ni Veivukei e sa dua na mataisoqosoqo yavutaki vakalou me baleti ira kece na marama uabula ena Lotu. A vakavulica na Parofita o Josefa Simici ni sa inaki ni iSoqosoqo ni Veivukei me vakabula yalo ka vakacegui ira na vakaleqai. A kaya o koya ni a sega ni tauyavutaki tu vakaoti na Lotu i Jisu Karisito me yacova ni ra sa vakarau tu na marama.

Era cakacaka vata na lewe ni iSoqosoqo ni Veivukei me ra vukea na kena vakayacori na Nona cakacaka ni veivakabulai kei na bula vakacerecerei na Kalou. Era qaravi ira tale eso, vakayacora na veiitavi ni veiyalayalati, taracake na duavata, ka vulica ka bulataka na ivunau.

Na ibole ni iSoqosoqo ni Veivukei na “Sa sega ni mudu na loloma” (1 Korinica 13:8). Na ibole oqo e sa vakatakilai ena ivau ni iSoqosoqo ni Veivukei.

9.1.2

Leweni Tu ni iSoqosoqo ni Veivukei

Na iSoqosoqo ni Veivukei e sa dua na mataveitacini bulabalavu. Na marama uabula taucoko yabaki 18 ka qase cake e sa lewe ni iSoqosoqo ni Veivukei. Era sa lewena kevaka mada ga era sega ni tiko ena veisoqoni ni iSoqosoqo ni Veivukei.

Sa rawa ni tekivu tiko ena iSoqosoqo ni Veivukei e dua na goneyalewa ni sa yabaki 18. Na veivosaki o koya kei rau na nona itubutubu kei na bisopi me baleta na kena gauna donu. Ni sa yabaki 19 se gauna e biubiu kina mai vale, me curuma na univesiti se laki kaulotu, sa dodonu me vakaitavi o koya ena iSoqosoqo ni Veivukei.

Era sa lewe talega ni iSoqosoqo ni Veivukei na marama vakawati lailai mai na yabaki 18.

Me baleta na kedra ivakamacala na itubutubu tawavakawati lailai mai na yabaki 18, raica na 38.1.5.

9.1.3

Veiganiti tu ki na Noda Gagadre

E tiko ena so na tabanalevu e dua na iwiliwili levu ni marama uabula bulabula. Me baleti ira na tabanalevu oqo, sa rawa ni vakadonuya na bisopi kei na peresitedi ni iteki me dua ga na nodra tabanalevu na iSoqosoqo ni Veivukei. Na iSoqosoqo ni Veivukei yadua e tiko kena mataveiliutaki vakaikoya. Kevaka e rawa, na iSoqosoqo ni Veivukei yadua sa dodonu me lewena o ira ka tiko ena wase ni yabaki eso ka kilaka.

9.2

Vakaitavi ena Nona Cakacaka ni Veivakabulai kei na Bula Vakacerecerei na Kalou

Na Kalou sa sureta tu na tamata taucoko mera lako mai ki vei Karisito ka vakaitavi ena Nona cakacaka ni veivakabulai kei na bula vakacerecerei na Kalou ena:

• Bulataki ni kosipeli i Jisu Karisito.

• Veivukei vei ira na vakaleqai tu.

• Sureta na tamata kecega me ra ciqoma na kosipeli.

• Vakaduavatataki ni matavuvale me tawamudu.

Era tuvalaka na iliuliu ni iSoqosoqo ni Veivukei na soqoni ni Sigatabu, itaviqaravi, veisiko, veiqaravi, kei na veimaliwai tale eso me vukei ira na marama ni vakaitavi ena Nona cakacaka ni veivakabulai kei na bula vakacerecerei na Kalou. Era cakacaka ena duavata na lewe ni iSoqosoqo ni Veivukei kei na kuoramu ni italatala qase me rawati kina na cakacaka oqo.

Ena ikuri ni vakamacala me baleta na Nona cakacaka ni veivakabulai kei na bula vakacerecerei na Kalou, vulica na wase e 1.

9.2.1

Bulataki ni Kosipeli i Jisu Karisito

Era tokoni ira na lewenilotu na iliuliu ni iSoqosoqo ni Veivukei ena bulataki ni kosipeli i Jisu Karisito. Era vakabibitaka na cakacakataki ni vakabauta, veivutuni, vakalevutaki ni bula rawati koya, kei na caka veiyalayalati kei na Kalou ena ciqomi ni cakacaka vakalotu eso. Na cakacaka vakalotu vakaoqo e oka kina na edaumeni ni valetabu. Raica na 1.2.1.

9.2.1.1

Vulici ni Kosipeli e Vale

Ni ra vulica ka bulataka na lewenilotu na kosipeli e vale, sa vakatitobutaki na nodra saumaki mai kivua na Tamada Vakalomalagi kei Jisu Karisito. Era vakayaloqaqataki ira na marama na iliuliu ni iSoqosoqo ni Veivukei me ra vulica na ivolanikalou kei na nodra vosa na parofita bula, vakai ira kei na nodra matavuvale Lako Mai, Mo Muri Au kei na ivurevure tale eso sa rawa ni tokona na nodra vuli.

Na lotu vakamatavuvale sa dua na sala bibi me vulici kina na kosipeli e vale. Era sa dau vakayacori tu e veimacawa ena Sigatabu, ena yakavi ni Moniti, se na dua tale na gauna. E rawa ni oka kina na masu, vuli kosipeli, ivakadinadina, lagasere, kei na itaviqaravi lasa eso.

9.2.1.2

Vulici ni Kosipeli ena Soqoni ni iSoqosoqo ni Veivukei

Era dau soqoni vata na iSoqosoqo ni Veivukei ena Sigatabu ena vuku ni inaki oqo:

• Vaqaqacotaka na vakabauta.

• Tara cake na duavata.

• Vaqaqacotaka na matavuvale kei na itikotiko.

• Vakaduavatataka na sasaga me vukea na Kalou ena Nona cakacaka ni veivakabulai kei na bula vakacerecerei ena tabanalevu.

Sa dau vakayacori na soqoni e nai karua kei nai kava ni Sigatabu ena veivula. E 50 na miniti na kena dede. E tuvalaka na veisoqoni oqo na mataveiliutaki ni iSoqosoqo ni Veivukei. Na liutaka e dua na lewe ni mataveiliutaki.

Na soqoni ena tekivu ena masu. Me qai liutaki ira na marama edua na lewe ni mataveiliutaki ena veivakasalataki vata me lima ki na tini na miniti me baleta na bolebole, gagadre, kei na madigi eso era sotava tiko. Nida vakanamata vua na iVakabula ena veivakasalataki vata oqo ena vukei ira na marama mera tara cake nodra ivakadinadina, ciqoma na cakacaka vakalotu ni valetabu, maroroya na veiyalayalati, ka vakaikuritaki na bula vakatisaipeli. Eratou na digitaka na mataveiliutaki ni iSoqosoqo ni Veivukei na ulutaga ni veivakasalataki vata me yavutaki ena nodra gagadre na marama.

Sa dodonu me tiko na gauna veirauti me vakaibalebale kina na veidusimaki kei na veivosakitaki ni kosipeli. E dodonu me vakanamata na veivosaki ki na dua se rua na ulutaga mai na vosa ena koniferedi raraba se qai oti oqo. Eratou na digitaka ena masumasu na mataveiliutaki ni iSoqosoqo ni Veivukei na itukutuku ni koniferedi mera veivosakitaka na marama. Era na cakava na digidigi oqo ka yavutaki ena nodra gagadre na marama.

Sa rawa ni lagati na sere me vakabulabulataka na lesoni.

Sa dodonu me cava na soqoni ena masu.

E rawa nira dau cokovata vagauna na iSoqosoqo ni Veivukei kei na kuoramu ni italatala qase me baleta e dua na lesoni ni Sigatabu. Na bose oqo ena raici vakatautauvata mai vei iratou na matabisopi kei na iSoqosoqo ni Veivukei kei na mataveiliutaki ni kuoramu ni italatala qase.

Me baleta na ikuri ni ivakamacala, raica na “To Sit in Council (Meda Bose Vata).”

9.2.1.3

iTaviqaravi Eso

Sa rawa ni tuvalaka na mataveiliutaki ni iSoqosoqo ni Veivukei na itaviqaravi eso. Ena raica raraba o peresitedi na itaviqaravi. E rawa ni kerea o koya e dua na daunivakasala se dua tale na marama me liutaka na kena tuvai ka vakayacori (raica na 9.3.4). Na veivosakitaka kei na bisopi na mataveiliutaki na itaviqaravi eso me tiki ni nodra ituvatuva.

Na itaviqaravi e dodonu me vaqaqacotaka na nodra gagadre na marama mera cakava ka maroroya na veiyalayalati ka solia vei ira na madigi mera vakasoqoni ka veiqaravi vata. Na itaviqaravi e dodonu me vukea na kena rawati na inaki ni iSoqosoqo ni Veivukei (raica na 9.1 kei na 9.1.1). Me baleta na ivakamacala ni itaviqaravi ni iSoqosoqo ni Veivukei ena iteki, raica na 6.7.1.

9.2.2

Nodra Vukei na Vakaleqai Tu

Vaka imuri i Jisu Karisito, sa itavi ni marama me ra sudra yani ena loloma kivei ira na vakaleqai tu. Vakayadudua ka vaka e dua na iSoqosoqo ni Veivukei, era qara na sala eso me qaravi kina na tani ena tabanalevu kei na vanua vakaitikotiko. Ena vanua e tiko kina, na JustServe.org e vakatura na madigi eso ni veiqaravi vakaitikotiko.

Me baleta na ikuri ni ivakamacala ena sala era veivuke kina na lewe ni iSoqosoqo ni Veivukei kei na kuoramu ni italatala qase kivei ira na vakaleqai tu, raica na 22.6.2.

9.2.2.1

Veiqaravi

Na veiqaravi sai koya na nodra vukei na tani me vaka a vakayacora na iVakabula. Era taura na nodra ilesilesi ni veiqaravi na marama mai na mataveiliutaki ni iSoqosoqo ni Veivukei. Me baleta na ikuri ni ivakamacala, raica na wase 21.

9.2.2.2

Gagadre Vakalekaleka

Era qara na marama dauveiqaravi mera kila deivaki ka sausaumi ki na nodra gagadre o ira era qarava. Era na rairai gadreva na lewenilotu na veivuke vakalekaleka ena gauna ni tauvimate, vakasucu, mate, leqa ni cakacaka, kei na ituvaki tale eso.

Ni sa gadrevi tu, era na kere veivuke na marama dauveiqaravi ki na mataveiliutaki ni iSoqosoqo ni Veivukei. Sa rawa ni vakatura na mataveiliutaki me kaciva e dua na kodineita ni veiqaravi me vakarautaka na veisasaga oqo (raica na 9.3.4).

Na cakacaka vata na iSoqosoqo ni Veivukei kei na kuoramu ni italatala qase ena sasaga ni kena tutaki na gagadre vakalekaleka eso (raica na 22.3.2). Sa rawa ni vakarautaka na bisopi na veivuke ni isolisoli ni lolo ke gadrevi.

Ena so na vanua, sa tiko na digidigi kivua na bisopi me vakarautaka vei ira na lewenilotu vakaleqai tu e dua na ota ni bisopi me baleta na kakana kei na iyaya rawarawa tale eso. Na bisopi sa dau lesia raraba na peresitedi ni iSoqosoqo ni Veivukei me veisotari kei ira na lewenilotu ka vakalewena na fomu ni ota. Ia, sa rawa talega vua me lesia na peresitedi ni kuoramu ni italatala qase. Sa rawa ni lesi tu e dua na daunivakasala ena iSoqosoqo ni Veivukei se mataveiliutaki ni kuoramu ni italatala qase ke sega ni tiko na peresitedi. Na vakauta na fomu vakaleweni na iliuliu sa lesi kivua na bisopi me baleta na nona veivakadonui.

Me baleta na ikuri ni ivakamacala, raica na 22.6.2 kei na “iVurevure ni Welefeaena iVurevure ni iLiuliu kei na Vunivola.

9.2.2.3

Gagadre Vakabalavu kei na Bula Rawati Koya

Ena veidusimaki ni bisopi, na mataveiliutaki ni iSoqosoqo ni Veivukei kei na kuoramu ni italatala qase e vukei ira na lewenilotu ena gagadre vakabalavu eso kei na bula rawati koya. Era vakatavulica na ivakavuvuli ni bula rawati koya vakayago ka vakayalo. Raica na wase 22 kei na “Bula Rawati Koya” ena icurucuru ni Gospel Library.

Ke gadreva tu na veivuke e dua na tamata se matavuvale, na veivosaki vata na peresitedi ni iSoqosoqo ni Veivukei kei na kuoramu ni italatala qase ena ruku ni veidusimaki ni bisopi me baleta na sala ni veivuke (raica na 22.4).

Na peresitedi ni iSoqosoqo ni Veivukei, peresitedi ni kuoramu ni italatala qase, se dua tale na iliuliu e vukea na tamata se matavuvale ni yavutaka e dua na iTuvatuva ni Bula Rawati Koya. Sa rawa talega ni ra veivuke na marama kei na turaga dauveiqaravi ena ituvatuva. Dau wasoma, ni tiko na kila vakacakacaka se kilaka ki na so tale na lewe ni iSoqosoqo ni Veivukei se kuoramu ni italatala qase e rawa ni veivuke. Era na maroroya na tauri ni tukutuku o ira kece na veivuke. Me baleta eso tale na kena itukutuku, raica na 22.3.3 kei na 22.8.

9.2.2.4

Ni Mate e dua na Lewe ni Tabanalevu

Ni mate e dua na lewe ni tabanalevu, na dolele na mataveiliutaki ni iSoqosoqo ni Veivukei kei na kuoramu ni italatala qase me veivuke ka veivakacegui. Ena ruku ni veidusimaki ni bisopi, sa rawa ni ra veivuke ena veibulu.

Ke sa rawa, era sa bulu na lewenilotu mate se kama ka a vakaedaumeni tu ena isulu ni valetabu. Na yagona e dua na marama e rawa ni vakasuluma na watina se mai vua e dua na lewe ni matavuvale yalewa sa edaumeni oti. Kevaka e sega ni tiko e dua na lewe ni matavuvale se sega beka ni vinakata me vakasuluma na yagona e dua na marama sa edaumeni oti, me kerea o bisopi na peresitedi ni iSoqosoqo ni Veivukei me sureta e dua na marama sa edaumeni oti me vakasuluma na yago se raica me vakasulumi ena kena ivakarau dodonu. Me baleta na ikuri ni ivakamacala, raica na 38.5.10.

Era tomana na mataveiliutaki ni iSoqosoqo ni Veivukei kei na kuoramu ni italatala qase, turaga kei na marama dauveiqaravi, kei na so tale na dolei ni veivuke kei na veivakacegui ni oti na veibulu.

9.2.3

Sureti na Tamata Kecega me Ciqoma na Kosipeli

Sa tiko na itavi ni lewe ni iSoqosoqo ni Veivukei me ra sureta na tamata kecega me ciqoma na veivakalougatataki ni kosipeli i Jisu Karisito (raica na Mosaia 18:9). Era cakava oqo ena wasei na kosipeli, vaqaqacotaki ni lewenilotu vou, ka sudra yani vei ira ka bulabula tu vakalailai. Raica na 23.2 kei na 23.3.

Ena soqoni ni mataveiliutaki kei na iSoqosoqo ni Veivukei, na veivosakitaka na mataveiliutaki ni iSoqosoqo ni Veivukei na sala eso era rawa ni sureta kece kina na tamata na marama me ciqoma na veivakalougatataki ni kosipeli. Raica na 23.1.1, 23.1.2, kei na 23.1.3.

Ena lesia o peresitedi ni Soqosoqo ni Veivukei e dua na lewe ni mataveiliutaki me veivuke ena kena liutaki na cakacaka ni kena wasei na kosipeli ena tabanalevu. Ena cakacaka vata o koya kei na lewe ni mataveiliutaki ni kuoramu ni italatala qase sa lesi me vakacokotaki kina na veisasaga oqo (raica na 23.6.2).

Na lewe ni mataveiliutaki ni iSoqosoqo ni Veivukei e lesi ena vakaitavi ena bose vakamacawa ni veivakaduavatataki me veitalanoataki kina nodra sureti na tamata kecega mera ciqoma na veivakalougatataki ni kosipeli. Na iliuliu ni kaulotu ena tabanalevu, ka rawa ni lewe ni mataveiliutaki ni kuoramu ni italatala qase, ena liutaka na veisoqoni oqo. Era na tiko kina na daukaulotu ni tabanalevu, dua na ivukevuke ni kuoramu ni bete, dua na lewe ni mataveiliutaki ni kalasi ni Goneyalewa qase duadua, kei ira na daukaulotu tudei. Raica na 23.4.

9.2.4

Vakaduavatataki na Matavuvale me Tawamudu

Era tokoni ira na lewenilotu na iSoqosoqo ni Veivukei ena vakaduavatataki ni matavuvale me tawamudu. Oqo e oka kina na:

• Vakayacori ni veiyalayalati kei na Kalou ena ciqomi ni cakacaka vakalotu eso, oka kina na edaumeni ni valetabu.

• Vakayacori ni cakacaka ni valetabu kei na tuva kawa (raica na 1.2.4).

Ena soqoni ni mataveiliutaki kei na iSoqosoqo ni Veivukei, na veivosakitaka na mataveiliutaki ni iSoqosoqo ni Veivukei na sala eso era rawa ni vakaitavi kina na marama ena veisasaga oqo. Eratou na tuvanaka talega na lewe ni mataveiliutaki na sala eso me ra vukei kina na lewenilotu me ra vakalevutaka na nodra kila ka gadreva me ra ciqoma na veicakacaka tabu vakalotu ka cakava na veiyalayalati kei na Kalou e valetabu. E ratou na vakayaloqaqataki ira na marama me ra sokalou vakawasoma ena valetabu ena veivanua e rawa kina.

Eratou vakauqeti ira na marama na mataveiliutaki me ra vulica na veika e baleta na nodra tuva kawa. Era na vukei ira na lewenilotu vou kei ira era sa lesu tale mai, lewe ni iSoqosoqo ni Veivukei vou, kei ira na daukaulotu kacivi vou mera kunea ka vakarautaka na yacadra na nodra qase e liu me baleta na cakacaka vakalotu ni valetabu.

Na lesia na peresitedi ni iSoqosoqo ni Veivukei e dua na lewe ni mataveiliutaki me veivuke ni liutaka na cakacaka ni valetabu kei na tuva kawa ena tabanalevu. Na cakacaka vata o koya kei na lewe ni mataveiliutaki ni kuoramu ni italatala qase sa lesi me tutaki kina na veisasaga oqo (raica na 25.2.2).

E vakaitavi na lewe ni mataveiliutaki ni iSoqosoqo ni Veivukei sa lesi ena veivosaki lekaleka, rawarawa me tutaki kina na cakacaka ni valetabu kei na tuva kawa. Era sa vakayacori wasoma na veivosaki oqo. Na iliuliu ni valetabu kei na tuvakawa ena tabanalevu, ka rawa ni lewe ni mataveiliutaki ni kuoramu ni italatala qase, ena liutaka na soqoni cokovata ni valetabu kei na tuvakawa (raica na 25.2.7). Era oka talega kina e dua na ivukevuke ni kuoramu ni bete, dua na lewe ni mataveiliutaki ni kalasi ni Goneyalewa qase duadua, kei na daunivakasala ni valetabu kei na tuvakawa.

9.3

iLiuliu ni iSoqosoqo ni Veivukei

9.3.1

Bisopi

Erau na dau sota na peresitedi ni iSoqosoqo ni Veivukei kei na bisopi, ke lailai sara, ena veivula. Rau veivosakitaka na Nona cakacaka ni veivakabulai kei na bula vakacerecerei na Kalou, oka kina na nodra veiqaravi na marama dauveiqaravi. Rau veivosakitaka talega (1) na rawaka kei na gagadre ni marama ena tabanalevu kei na (2) soqoni ni iSoqosoqo ni Veivukei, veidusimaki, kei na itaviqaravi.

9.3.2

Mataveiliutaki ni iSoqosoqo ni Veivukei

9.3.2.1

Kacivi ni Mataveiliutaki ni iSoqosoqo ni Veivukei

Na kaciva na bisopi e dua na marama me veiqaravi vaka peresitedi ni iSoqosoqo ni Veivukei ena tabanalevu. Ke levu vakarauta tu na tabanilotu, na vakatura o koya kivua (bisopi) e dua se rua na marama me veiqaravi vaka nona daunivakasala. Sa vakasamataka na matabisopi na nona vakatutu ka vakayacora na veikacivi.

Ena kacivaka e dua ena matabisopi na yacadra na lewe ni mataveiliutaki ena soqoni ni sakaramede me baleta na veitokoni. Na bisopi sa vakatikora na peresitedi ni iSoqosoqo ni Veivukei. E dua ga vei rau na lewe ni matabisopi e rawa ni vakatikori rau na nona daunivakasala.

Eso na tabanilotu lailai e rairai sega kina na peresitedi ni Goneyalewa se Lalai. Ena veitabanilotu oqo, sa rawa ni vukei ira na itubutubu na peresitedi ni iSoqosoqo ni Veivukei me tuvalaka na idusidusi me baleti ira na itabagone kei na gonelalai.

9.3.2.2

iTavi

Sa ikoya oqo na itavi ni peresitedi ni iSoqosoqo ni Veivukei. Rau vukei koya na nona daunivakasala.

• Veiqaravi ena matabose ni tabanalevu. E veiqaravi o koya vaka (1) dua na lewe ni matabose ka vukea na tutaki ni gagadre eso ena tabanalevu ka vakaraica na iwali eso ka (2) dua na mata ni iSoqosoqo ni Veivukei (raica na 29.2.5).

• Liutaka na sasaga ni iSoqosoqo ni Veivukei me vakaitavi ena Nona cakacaka ni veivakabulai kei na bula vakacerecerei na Kalou (raica na wase e 1).

• Vakarautaka ka raica raraba na nodra veiqaravi na marama dauveiqaravi. Tutaka na ilesilesi ni veiqaravi eso kei na mataveiliutaki ni kuoramu ni italatala qase, soqoni mada ga vakavulatolu. Qara na veivakadonui ni bisopi me baleta na ilesilesi ni veiqaravi eso. Vakayaco veivakatarogi ni veiqaravi vakavulatolu mada ga. Raica na wase 21.

• Ena veidusimaki nei bisopi, veivakasalataki vata kei ira na lewe ni tabanalevu itabaqase (raica na 31.1 kei na 31.3). Na bisopi duadua ga ena vakasalataki ira na lewe ni tabanalevu me baleta na veika eso ni bula kilikili, na veivakacacani, kei na veivakadonui me vakayagataki na ilavo ni isolisoli ni lolo. Raica na iVurevure Veivakasalataki. Ena itukutuku me baleta na veivakacacani, raica na 38.6.2.

• Veivuke vata kei na mataveiliutaki ni kuoramu ni italatala qase, ena liutaki ni sasaga ena tabanalevu me sureti na tamata kecega me ra ciqoma na veivakalougatataki ni kosipeli (raica na 8.2.3 kei na 9.2.3).

• Veivuke vata kei na mataveiliutaki ni kuoramu ni italatala qase, ena liutaki ni cakacaka ni valetabu kei na tuva kawa ena tabanalevu (raica na 8.2.4 kei na 9.2.4).

• Vakacokotaka na sasaga ni iSoqosoqo ni Veivukei me ra vaqaqacotaki na sisita itabagone qase cake ena tabanalevu, ira na dawai kei na vakawati. Sa rawa me lesi e dua na daunivakasala me veiqaravi vata kei ira na itabagone qase cake (raica na 14.1.2.2).

• Sota vakayadua kei na lewe ni iSoqosoqo ni Veivukei yadua ena dua mada ga na yabaki. Veivosakitaka na tiko vinaka ni marama kei na nona matavuvale.

• Vakavulica vei ira na marama na nodra itavi ena veiyalayalati kei na veivakalougatataki, ka oka kina na veivakalougatataki e lako mai na kaukauwa ni matabete ni Kalou (raica na 3.5 kei na 3.6). Vukei ira mera kila vakavinaka na kaukauwa, veitaqomaki, veidusimaki, reki, kei na vakacegu e yaco mai ena kena susugi cake edua na veiwekani ena veiyalayalati kei na Tamada Vakalomalagi kei Jisu Karisito.

• Raica raraba ka vukea na vakavinakataki ni veivakavulici ena iSoqosoqo ni Veivukei (raica na wase 17).

• Tuva ka liutaka na soqoni ni iSoqosoqo ni Veivukei.

• Raica raraba na itaviqaravi ni iSoqosoqo ni Veivukei (raica na 9.2.1.3).

• Vukea na goneyalewa me ra vakavakarau ni vakaitavi ena iSoqosoqo ni Veivukei (raica na 9.4).

• Raica raraba na ivolatukutuku ni Soqosoqo ni Veivukei, ripote, kei na veika vakailavo (raica na LCR.ChurchofJesusChrist.org). Sa rawa ni veivuke na sekeriteri (raica na 9.3.3).

Na mataveiliutaki ni iSoqosoqo ni Veivukei ena iteki e sa vakavulica na mataveiliutaki ni iSoqosoqo ni Veivukei ena tabanalevu ena veiitavi oqo. E rawa nira cakava oqo ena gauna ni soqoni ni veiliutaki ena iteki, bose ni mataveiliutaki ni iSoqosoqo ni Veivukei ena tabanalevu, kei na nodra veitalanoa vakayadua kei ira na peresitedi ni iSoqosoqo ni Veivukei (raica na 29.3.4).

Mai na nona veiqaravi, sa tokona na bisopi na peresitedi ni iSoqosoqo ni Veivukei ena tabanalevu ena nodra raici matua na itabagone kei na nona itavi vakasakiti eso.

9.3.2.3

Soqoni ni Mataveiliutaki

E sota wasoma na mataveiliutaki ni iSoqosoqo ni Veivukei kei na sekeriteri. E liutaka na veisoqoni oqo na peresitedi. Na lewe ni veivosaki e rawa ni oka kina na veika oqo:

• Tuva na sala me ra vaqaqacotaki kina na marama kei na nodra matavuvale.

• Tuvalaka na sala me vukea na vakayacori ni Nona cakacaka ni veivakabulai kei na bula vakacerecerei na Kalou.

• Tutaka na cakacaka ni kaulotu kei na cakacaka ni valetabu kei na tuva kawa.

• Sausaumi ki na ivakasala kei na ilesilesi eso mai vua na bisopi.

• Sausaumi ki na ilesilesi eso mai na soqoni ni matabose ni tabanalevu.

• Vakasamataka ena yalomasumasu na ilesilesi eso ni veiqaravi.

• Railesuva na itukutuku mai na veivakatarogi ni veiqaravi. Tuvalaka na sala eso me kilai kina na kaukauwa ka vukea na sotavi ni leqa eso. (Raica na wase 21.)

• Vakasamataki ira na marama me veiqaravi ena veikacivi kei na ilesilesi eso ni iSoqosoqo ni Veivukei.

• Tuva na soqoni kei na itaviqaravi eso ni iSoqosoqo ni Veivukei.

9.3.3

Sekeriteri

Sa rawa ni vakatura na mataveiliutaki ni iSoqosoqo ni Veivukei e dua na marama me veiqaravi vaka sekeriteri ni iSoqosoqo ni Veivukei. Ena kacivi koya e dua na lewe ni matabisopi, vakaraitaki koya me baleta na veitokoni ena dua na soqoni ni sakaramede, ka vakatikori koya.

Na itavi eso ni sekeriteri e rawa ni oka kina oqo:

• Vakarautaka na lewe ni veivosaki ni soqoni ni mataveiliutaki kei na soqoni ni iSoqosoqo ni Veivukei.

• Tauri tukutuku ena soqoni ka taleva na ilesilesi eso.

• Lokuca na veivakatarogi ni veiqaravi (raica na 21.3).

• Vakarautaka ka vakauta na ripote vakavulatolu ni iwiliwili e tiko kei na levu ni veivakatarogi ni veiqaravi e vakayacori.

• Veivuke ni vakarautaka e dua na ilavovakarau vakayabaki ka volaitukutukutaka na vakayagataki ni ilavo.

9.3.4

iKuri ni Veikacivi

Sa rawa ni veivuke tu na ikuri ni veikacivi oqo. Na veivosakitaka na bisopi kei na peresitedi ni iSoqosoqo ni Veivukei se ra na gadrevi tu.

• O ira na qasenivuli ni iSoqosoqo ni Veivukei me veivakavulici ena soqoni ena Sigatabu.

• E dua na kodineita ni veiqaravi me veivuke ni tuva ka vakayaco veiqaravi kivei ira na vakaleqai tu (raica na 9.2.2.2). Sa rawa ni kacivi talega na ivukevuke kei na lewe ni komiti eso.

• E dua na kodineita ni itaviqaravi me veivuke ni tuva ka vakayaco itaviqaravi eso ni iSoqosoqo ni Veivukei (raica na 9.2.1.3). Sa rawa ni kacivi talega na ivukevuke kei na lewe ni komiti eso.

• O ira na ivukevuke ni sekeriteri me vukea na sekeriteri ni iSoqosoqo ni Veivukei.

• Me ra vakarautaka na sekeriteri dauveiqaravi na veivakatarogi ni veiqaravi ka veivuke ni vakarautaka na ripote vakavulatolu.

Ke sa gadrevi na veika oqo kei na veikacivi tale eso, na vakatura na mataveiliutaki ni iSoqosoqo ni Veivukei na marama eso me veiqaravi. Era cakava na veivakaturi oqo ki na matabisopi. Ke sa vakadonuya na matabisopi, na kacivi ira e dua na lewe ni matabisopi. Ena kacivaka na yacadra o koya me baleta na veitokoni ena dua na soqoni ni sakaramede ka qai vakatikori ira.

Ni gadrevi tu, sa rawa ni lesia na mataveiliutaki ni iSoqosoqo ni Veivukei na marama eso me veivuke ena sasaga ni iSoqosoqo ni Veivukei ena sala tale eso. Na marama era lesi vakalekaleka e sega ni gadrevi me kacivi tu ka vakatikori.

9.4

Vukei na Goneyalewa me ra Vakarau Vakaitavi ena iSoqosoqo ni Veivukei

Na mataveiliutaki ni iSoqosoqo ni Veivukei e cakacaka vata kei ira na goneyalewa, nodra itubutubu, kei ira na iliuliu ni goneyalewa me vukea na goneyalewa me ra vakavakarau ni vakaitavi ena iSoqosoqo ni Veivukei.

Era vakarautaka talega na iliuliu na madigi tomani eso me ra vakatorocaketaka kina na goneyalewa kei na iSoqosoqo ni Veivukei na veimaliwai. Na veiqaravi vata vaka marama dauveiqaravi e sa dua na sala yaga ni veisemati.

Era vukea na goneyalewa na iliuliu me ra kila deivaki na nodra itavi ni veiyalayalati. Ni sa na veivuke tu me veiqaravi rawa e dua na goneyalewa kivua e dua na marama vakatabakidua, sa rawa ni lesi o koya me dua na marama dauveiqaravi ni sa lomana tu, rawata, ka matua. Sa rawa ni lesi o koya vakatekivu ni sa yabaki 14. Era veiqaravi vaka itokani na goneyalewa kivei ira na marama ena iSoqosoqo ni Veivukei (raica na 21.2.2).

Ni ra sa lewe ni iSoqosoqo ni Veivukei na itabagone qase cake, sa solia vei ira na mataveiliutaki ni iSoqosoqo ni Veivukei na madigi eso me ra veiqaravi ka wasea na nodra kaukauwa. Sa vukei ira talega na mataveiliutaki me ra vakavakarau ni cakava ka maroroya na veiyalayalati tabu ni valetabu (raica na 27.1.1).

9.5

iLiuliu ni iSoqosoqo ni Veivukei ena iTeki

Sa kaciva ka vakatikora na peresitedi ni iteki e dua na marama me veiqaravi vaka peresitedi ni iSoqosoqo ni Veivuke. Ke sa levu vakarauta e dua na iteki, na vakatura o koya e dua se rua na marama me veiqaravi vaka daunivakasala kei na dua tale me veiqaravi vaka sekeriteri. Era sa kacivi ka vakatikori na marama oqo mai na dua na lewe ni mataveiliutaki ni iteki se dua na lewe ni matabose e cake sa lesi. Ena ivakamacala baleta nai itavi ni mataveiliutaki ni iSoqosoqo ni Veivukei kei na sekeriteri ena iteki, raica na 6.7.1 kei na 6.7.3.

Ena sota wasoma na peresitedi ni iteki (dau veivula) kei na peresitedi se mataveiliutaki ni iSoqosoqo ni Veivukei ena iteki. Rau veivakasalataki vata me baleta na Nona cakacaka ni veivakabulai kei na bula vakacerecerei na Kalou. Rau veivosakitaka talega (1) na rawaka kei na gagadre ni marama ena iteki kei na (2) soqoni, idusidusi, kei na itaviqaravi eso ni iSoqosoqo ni Veivukei.

Na mataveiliutaki ni iSoqosoqo ni Veivukei ena iteki ena vakasalataki ira na mataveiliutaki ni iSoqosoqo ni Veivukei ena tabanalevu ena nodra itavi ni veiqaravi, cakacaka ni kaulotu, kei na cakacaka ni valetabu kei na tuva kawa. Era cakava oqo ena ruku ni veidusimaki ni mataveiliutaki ni iteki. Era sa lesi na lewe ni matabose e cake me veivuke. Raica na 23.1 kei na 25.2.

Ke tiko e dua na komiti ni itabagone qase cake ena iteki, ena veiqaravi kina e dua na lewe ni mataveiliutaki ni iSoqosoqo ni Veivukei ena iteki. Ena vakakina kevaka e tiko ena iteki e dua na komiti ni uabula sega ni vakawati. (Raica na 14.1.1.2.)

9.6

iKuri ni Dusidusi kei na Lawatu

9.6.1

Lewenilotu Vakaleqai tu Vakayago

Na mataveiliutaki ni iSoqosoqo ni Veivukei e kauwaitaki ira sara vakalevu na lewenilotu vakaleqai tu vakayago. Me baleta na ivakamacala ni nodra vukei na lewenilotu oqo, raica na disability.ChurchofJesusChrist.org; raica talega na 38.8.27 ena ivoladusidusi oqo.

9.6.2

Kila Wilivola

Ke gadrevi tu, na mataveiliutaki ni iSoqosoqo ni Veivukei ena cakacaka vata kei na bisopi, mataveiliutaki ni kuoramu ni italatala qase, kei na matabose ni tabanalevu me vukei ira na lewenilotu ni vulica me ra wilivola ka volavola.