“Ai Vakamacala Taumada,” Ira na Gone kei na iTabagone e Na Lotu i Jisu Karisito ni Yalododonu Edaidai: E Dua na iDusidusi ni iVakamacala Taumada vei ira na iTubutubu kei na iLiuliu (2019)

“Ai Vakamacala Taumada”

Ai Vakamacala Taumada

Na nodra cakacaka vata, na itubutubu kei na iliuliu ena vukei ira na gone kei na itabagone mera vakatitobutaka na nodra saumaki, mera bula kilikili vaka-tisaipeli ni Turaga o Jisu Karisito, ka yaco mera tagane ka yalewa bula dodonu ena:

Vulica na kosipeli ka veivakauqeti ki na yalodina ni tamata yadua.
Na veiqaravi kei na itaviqaravi e veivakatataki ki na yago kei na yalo.
Na Torocake yadudua e solia na tubu e vakayaco-ka.

Na ivakavuvuli veidusimaki kei na itavi raraba e vakamacalataki tiko ena ivolalailai oqo e rawa me bulataki. E sega ni dua walega na sala donu mera vakayagataki kina. Eso na vakasama kei na ivakaraitaki sa vakarautaki tu ena initaneti ena ChildrenandYouth.ChurchofJesusChrist.org. Vakasaqara na veivakauqeti me kilai na veika e vinaka duadua vei ira na tamata yadua (raica na “Adjust kei na Adapt”).

Na iTabatamata Tubu Cake Tiko Mai

Era sa tukuna na parofita ni itabatamata oqo ni gone kei na itabagone era sa maliwai ira sa vinaka taucoko sa tala mai na Turaga ki vuravura (raica na Russell M. Nelson, “iNuinui nei Isireli,” lotu ni itabagone e vuravura raraba, 3 ni June, 2018, 16). Sa tu vei ira na kaukauwa mera vakayaco-ka cecere e vuravura. Era sa sureti mera veivuke ena kena vakasokumuni o Isireli ena yasa ruarua ni ilati. Sa gadrevi kina e dua na sasaga me ra vukei ka qaravi. Na sasaga oqo mena vukei ira na gone kei na itabagone:

Kila na kedra ivakatakilakila tawamudu kei na inaki.
Vakatitobutaka na nodra saumaki vei Jisu Karisito, vakatikori na Nona kosipeli ki yalodra ka vakauqeti ira me ra digitaka me ra muri Koya.
Vakayacora na itavi ni Matabete i Eroni.
Vakaitavi vata ena cakacaka ni veivakabulai.
Tarai cake vakatamata yadua ena veitokoni vaka-itubutubu kei na iliuliu ena veivukei ni gadrevi vakakina.
Mo kilikili kaya mo lako ki na valetabu ka vosota ena reki ena salatu ni veiyalayalati.

Ni ra sa ciqoma na gone kei na itabagone na ivakatakila me baleta na nodra bula, tara cake na veimaliwai sa yavutaki ena kosipeli, ka vakayagataka na galala ni digidigi ni ra toro cake tiko, era na rawa-ka vakalevu sara ena kena rawati na inaki oqo.

Saga mo Muria na iVakabula

Ena nona gauna vakaitabagone, a gadreva o Jisu me kila na Nona ivakatakilakila vakalou kei na kena ilesilesi, me vaka ga ni dodonu me cakava na luve ni Kalou yadua. E a “tubucake ko koya ena vuku kei na yagona talega a sa vinakati koya vakalevu cake tikoga na Kalou kei ira talega na tamata.” (Luke 2:52). A tubu cake o Koya ena sala e veiraurau raraba, ka rawa vakakina vei ira kece na gonelalai kei na itabagone.

Vukei ira na gone kei na itabagone mera kauta mai na iVakabula ki na ituvaki kece ni nodra bula—sega walega ena siga ni Vakacecegu. Ena nodra saga me yaco o Jisu Karisito me iusutu ni nodra bula, sa yalataka kina o Koya me tala mai na Yalo Tabu me nodra dauveivakacegui ka idusidusi.

Sai koya, na muria na iVakabula e tekivu mai vale. Sa rawa mera vakarautaka na iliuliu ni Lotu na veitokoni bibi me baleti ira na tamata yadua kei na matavuvale.

iUsutu ena Vuvale

Era na tuvanaka na itubutubu na veika mera cakava ka veivosakitaka na nodra matavuvale me ra vakavulica na kosipeli i Jisu Karisito, ka sotava na nodra gagadre bibi na gone yadua. Oqo ena yaco ni ra cakacaka ka qito vata na matavuvale ena sala eso e vakavulici kina na kila-ka maqosa, vaqaqacotaki na itovo ni bula, ka vakarautaki na veimadigi ni tubu cake.

Vakauqeta na Tubu Cake

Masulaka na veidusimaki. Na Tamada Vakalomalagi e kilai ira na luvemu ka na vukei iko mo vakavulici ira.
Vukei ira na luvemu mera vakasaqara ka kila na veivakauqeti ni Yalo Tabu.
Vakaraitaka na nomu loloma ka vakacaucautaki ira vakawasoma ena nodra sasaga mera caka vinaka kei na ivakarau va-Karisito o sa raica vei ira.
Vakasaqara na madigi mo dou veiqaravi vakamatavuvale vei ira na tamata.

Vakarautaka na Veidusimaki

Vukei ira na luvemu mera raica na sala mera bulataka kina na kosipeli ki na veitiki kece ni nodra bula.
Dusimaki ira na luvemu ka vakayaloqaqataki ira mera tuvanaka na nodra dui takete kei na ituvatuva.
Vukei ira mera vakaraitaka mai na nodra iwali ni leqa.
Solia nomu veitokoni, veivuke, kei na veivakayaloqaqataki ena nodra ilakolako.

Veivosaki kei ira na Veiliutaki

Veitaratara kei ira na qasenivuli kei na iliuliu me ra vakadeitaka na sala vinaka duadua mera tokoni ira kina na luvemu. Qarauna mo kakua ni voroka nodra yalonuidei tiko na luvemuni, se vakamadualaki ira.

Tokoni-mai na Lotu

ivakatakilakila ni veiqaravi kei na itaviqaravi

Na itavi ni Lotu e okati kina na vakatavulici ni kosipeli i Jisu Karisito ka me tokona na itikotiko. O ira na iliuliu kei na qasenivuli mera tokoni ira na itubutubu ena nodra tauyavutaka na veimaliwai e kaukauwa, e veisusugi cake vata kei ira na gone kei na itabagone era qarava.

Veivosaki kei ira na iTubutubu

Veitaratara ena gauna cava ga kei ira na itubutubu mo kila kina na sala mo vukei ira kina na luvedra. Wasea na kaukauwa o raica rawa.
Taroga na veika era sa nuitaka era na sotavi ira na luvedra ka vulica ena veikuoramu ni Matabete i Eroni, ena kalasi ni Goneyalewa, kei na itaviqaravi.

Ena gauna era luluqa vaka-Lotu kina na itubutubu:

Vakamacalataka vei ira na itubutubu na sasaga oqo ni nodra tokoni na gone kei na itabagone, ka tarogi ira na sala cava era gadreva mera vakaitavi kina na luvedra.
Tarogi ira na gone se itabagone na mataqali veitokoni cava era na gadreva.
Veivosaki vata kei na matabose ni tabanalevu me baleta na sala mera okati kina na itubutubu ena kena levu ga e rawa.

Tokoni Ira Tiko na Gone kei na iTabagone

Vukei ira na gone kei na itabagone mera kila na veivakauqeti ni Yalo Tabu.
Tarogi ira na veika era vinakata me ra vulica ka vakila ena kalasi kei na itaviqaravi.
Vakayaloqaqataki ira mera veiliutaki ena kena tuvalaki ka qaravi na itaviqaravi.
Tokoni ira na lewe ni Matabete i Eroni ena nodra qarava na itavi ni kuoramu.

Vulici ni Kosipeli

Ena iTikotiko

Na vulica na ivolanikalou vakatamata yadua ka vakamatavuvale kei na masumasu ena vukei ira na gone kei na itabagone mera vakila ka kila na veivakauqeti ni Yalo Tabu ka vulica mera lomana na iVakabula. Era sa vakayaloqaqataki na tamata yadua kei na matavuvale me ra vakayagataka na Lako Mai, Mo Muri Au—Baleta na Tamata Yadua kei na Matavuvale kei na nodra vosa na parofita bula me vulici kina na kosipeli i Jisu Karisito.

Ena Lotu

Era na soqoni vata na gone kei na itabagone me ra vulica na kosipeli i Jisu Karisito. Era na vulica na gone na kosipeli ena veidusimaki ni kalasi kei na gauna ni sere ni Lalai. Era na vulica na itabagone na vunau ena kalasi kei na kuoramu. Era sa sureti na gone kei ira na itabagone me ra wasea na veika era sa vulica mai vale ka mera bulataka na kosipeli ena nodra bula.

Veiqaravi kei na iTaviqaravi

O ira na volodia ni Mormon Helping Hands

Ena iTikotiko

Na veiqaravi kei na itaviqaravi e tauyavutaka na itovo dodonu ena veisiga, tara cake na veimaliwai vakamatavuvale, vakavulica na maqosa ni bula, tara cake na ivakarau va-Karisito, ka vukei ira na gone kei na itabagone mera tubu. Sa rawa ki na veiqaravi kei na itaviqaravi vakamatavuvale me vakanamata ki na gagadre ni tamata yadua kei na matavuvale ka vakarautaki kina na madigi me ra vakayagataka na ivakavuvuli ni kosipeli ena veika era sotava e veisiga.

Ena Lotu

Veiqaravi—oka kina o ira na lewe ni Matabete i Eroni na nona vakaitavi ena cakacaka vakalotu ni sakaramede — kei na itaviqaravi e vakarautaka na madigi me ra na vakasoqoni ira, vulica na maqosa vovou, vakayacora rawa na itavi dredre, ka tara na va-kosipeli ni veimaliwai vata kei ira na icaba kei na iliuliu . Na itaviqaravi oqo e dodonu me vukei ira na gone kei ira na itabagone mera tubucake vakayalo, vakaveimaliwai, vakayago, kei na vakasama ka veiqaravi vakaibalebale cake vei ira na tamata. Na JustServe (JustServe.org) sai koya e dua na ivurevure yaga sara me baleta na madigi ni veiqaravi ena itikotiko raraba.

Na siga ni itaviqaravi veicurumaki baleti ira na itabagone ena oka kina na koniferedi ni Me iSakisaki ni iTabagone (MST), koniferedi ni itabagone, keba kei na soqoni tale eso. Na veitaviqaravi oqo e rawa ni vukei ira na itabagone me vakatitobutaka na nodra gadreva me ra muria na i Vakabula, kauti ira tani mai na nodra ivakarau ni bula e tudei, ka vukei ira mera raica ni ra sa tiki ni dua na ilawalawa levu ni itabagone era wasea na inaki savasava.

Torocake Yadudua

Ena iTikotiko

Era na digitaka na gone kei na itabagone na cava e rawa ni ra cakava me ra tubu ka vulica mera muria na iVakabula. Sa rawa vei ira na itubutubu mera vukei ira mera kila ni ra sa tubu tiko kei na tikina era na gadreva mera vakavinakataka cake. Na itaviqaravi taucoko, oka kina na lotu, koronivuli, na veitokani, qito, na cakacaka ni liga, na cakacaka, kei na so tale na gagadre ni tamata yadua e rawa ni vukei ira na gone kei na itabagone mera muri Jisu Karisito.

Ena Lotu

Era na lomana ka qarava na gone yadua kei na itabagone o ira na iliuliu ka me ra kila na nodra gagadre kei na veika era dau taleitaka. Ena veimaliwai ni veilomani, sa rawa vei ira na iliuliu mera veivakauqeti cecere ka kaukauwa mera tokona ka vakayaloqaqataki ira na gone kei na itabagone ki na nodra tubu vakai ira yadua.

Veisautaka, ka Moica

Na tamata yadua, matavuvale, kei na ivavakoso sa cecere sara. Na ka a caka vinaka vua e dua ena rairai sega ni cakacaka vakavinaka vua e dua tale. Cakava na ka e veiganiti ki na nomu matavuvale, kalasi, kuoramu, se na tabanalevu. Veivosakitaka na nomu veimadigi kei na kauwai, ka vakasaqara na ivakatakila mo tuva vakacava na parokaramu oqo mera vukei na gone kei na itabagone yadua mera yacova na nodra rawa-ka vakalou.

Me vakataka, ni o ira na gone kei na itabagone ena duidui na sala era na goleva kina nodra dui tubu yadudua: na mataqali, iwiliwili, kei na wasoma ni lalawa, ka vakakina na levu ni veitokoni era na gadreva, me na vakadeitaka ga na tamata yadua. Na kalasi kei na kuoramu tale ga mera vakamatautaka na kena sotavi na gagadre. Me kena ikuri, na mataqali kei na wasoma ni itaviqaravi e rawa me veisau me vakatau ki na vanua o ya.

Me rawarawa toka ga Cakava na ka e rawa.

Na Veivakauqeti kei na Veivakacaucautaki

Veivakauqeti

Era na vakauqeti ga vakai ira na gone kei na itabagone ni ra sa vakila ni ra lomani, tubu, vakatorocaketaki, ka vakila na Yalo Tabu ena nodra bula. Ni sa dredre vei ira na veisau kei na tubu, vakauqeti ira mera vaqara na sala me ra na vorata rawa na bolebole se veisautaka na nodra ituvatuva. Na veimaliwai e kaukauwa ka veivakabauti vata kei ira na itubutubu, iliuliu, kei ira na icaba sa rawa me solia vei ira na kaukauwa mera tovolea tikoga.

Na veivakacaucautaki

Ni ra torocake tiko na gone kei na itabagone, vakacaucautaka na nodra sasaga ka vakayaloqaqataki ira. Solia vei ira na madigi me ra wasea na veika era sa vulica, ka marautaka na nodra tubu. Me kena ikuri, sa rawa vei ira na gone kei na itabagone kece mera ciqoma na iyaya me vaka e dua na mama se na metali me veivakananumi vei ira ni ra sa tiki ni dua na ilawalawa e vuravura raraba e segata tiko mera muri Jisu Karisito. Ni ra sa vakayacora rawa na gone kei na itabagone na nodra lalawa vakayalo, vakatamata, vakayago, kei na vuku, sa rawa mera ciqoma na ikuri ni ivakatakilakila tale eso.