“Faatomuaga,” Tamaiti ma le Autalavou o Le Ekalesia a Iesu Keriso o le Au Paia o Aso e Gata Ai: O Se Taiala Tomua mo Matua ma Taitai (2019)

“Faatomuaga”

Faatomuaga

O le galulue faatasi, e fesoasoani ai matua ma taitai i tamaiti ma le autalavou ia faalolotoina lo latou liua, avea ma soo agavaa o le Alii o Iesu Keriso, ma avea ma ni alii ma ni tamaitai o le amiosa’o e ala i le:

Aoaoina o le Talalelei lea e uunaia ai tautinoga faaletagata lava ia.
Auaunaga ma gaoioiga ia e faagaeetiaina ai le tino ma le agaga.
Atinaega faaletagata lava ia lea e fua mai ai le tuputupu ae faamalieina.

O mataupu faavae taiala ma matafaioi lautele o loo otootoina i lenei tamaitusi e fetuutuunai. E le tasi se auala sa’o e faaaoga ai. O loo maua isi manatu ma faataitaiga i le initoneti i le ChildrenandYouth.ChurchofJesusChrist.org. Saili i musumusuga ia iloa po o le a le mea e silisili mo tagata taitoatasi (tagai i le “Fetuunai ma le Faamasani (Adjust and Adapt)”).

O Le Tupulaga Faiae

Ua saunoa perofeta e faapea o lenei tupulaga o tamaiti ma le autalavou ua i ai faatasi ma tagata silisili ua auina mai e le Alii i le lalolagi (tagai ia Russell M. Nelson, “Faamoemoe o Isaraelu,” faigalotu a le autalavou i le lalolagi atoa, 3 Iuni, 2018, 16). Ua i ai ia i latou le gafatia e faia ai se aafiaga tele i le lalolagi. Ua valaaulia i latou e fesoasoani e faapotopoto Isaraelu i itu uma e lua o le veli. Ua manaomia se auala maualuga atu, ma paia atu e tausia ai ma auauna atu ai ia i latou. O lenei auala o le a fesoasoani ai i tamaiti ma le autalavou ia:

Iloa lo latou faasinomaga ma le faamoemoega e faavavau.
Faaloloto lo latou liuaina ia Iesu Keriso, moliooina o Lana talalelei i o latou loto ma musuia i latou ia filifili e mulimuli ia te Ia.
Faataunuu tiute o le Perisitua Arona.
Auai faatasi i le galuega o le faaolataga.
Atiae le tagata lava ia faatasi ma le lagolagosua a matua ma le fesoasoaniga a taitai pe a manaomia.
Ia agavaa e auai i le malumalu ma maua le olioli tumau i luga o le ala o feagaiga.

A maua e tamaiti ma le autalavou faaaliga mo o latou olaga, atiae sootaga e faatotonugalemu i le talalelei, ma faatino le faitalia a o latou tuputupu ae, o le a latou manuia i le ausiaina o nei faamoemoega.

Taumafai e Mulimuli i le Faaola

I Lona talavou, sa manaomia ai e Iesu ona aoao i Lona faasinomaga paia ma le misiona, e pei lava ona tatau ai i atalii ma afafine taitasi o le Atua. Sa “tupu le poto ma le tino [o Iesu], ua alofagia o Ia e le Atua atoa ma tagata” (Luka 2:52). Sa Ia tuputupu ae i se ala paleni, ma e mafai foi ona faia e tamaiti ma autalavou uma.

Fesoasoani i tamaiti ma le autalavou ia aumai le Faaola i totonu o vaega uma o o latou olaga—ae le na o le Sapati. Pe a latou taumafai ia avea Iesu Keriso ma totonugalemu o o latou olaga, ua Ia folafola mai e auina mai le Agaga Paia e avea ma faamafanafana ma taiala.

O le mea moni, o le mulimuli i le Faaola e amata i le aiga. E mafai ona tuuina atu e taitai o le Ekalesia le lagolago taua mo tagata taitoatasi ma aiga.

Faatotonugalemu-i-le-Aiga

E fuafua e matua aafiaga ma talanoaga faaleaiga e aoao atu le talalelei a Iesu Keriso ma faafetaiaia manaoga tupito o tamaiti taitasi. E tupu lenei mea pe a galulue ma taaalo faatasi aiga i auala e aoao atu ai tomai taua, faamalosia ai uiga faaletagata, ma maua ai avanoa e tuputupu ae ai.

Uunaia le Tuputupu A’e

Tatalo mo le taitaiga. E silafia e le Tama Faalelagi lau fanau ma o le a fesoasoani atu ia te oe e aoao i latou.
Fesoasoani i lau fanau e saili ma iloa le faatosinaga a le Agaga Paia.
Faailoa atu le alofa ma ia faamālo soo atu i lau fanau i a latou taumafaiga e fai ia lelei ma mo uiga auau mama FaaKeriso e te vaaia ia i latou.
Tagai mo ni avanoa e auauna atu ai i isi o se aiga.

Tuu Atu le Taitaiga

Fesoasoani i lau fanau ia iloa pe mafai faapefea ona latou faaaoga le talalelei i vaega uma o o latou olaga.
Taiala lau fanau ma uunai i latou ia seti a latou lava sini ma fuafuaga.
Fesoasoani ia i latou ia maua e i latou lava ia a latou vaifofo i faafitauli.
Ofo atu le lagolagosua, fesoasoaniga, ma le faamalosiauga i le gasologa o le ala.

Talatalanoa ma Taitai

Fesootai ma faiaoga ma taitai e fuafua ai pe mafai faapefea ona latou lagolago i lau fanau i auala silisili. Ia faaeteete e aua ne’i talepeina le talitonuga i lau fanau pe faamaasiasi i latou.

Lagolagoina-e-le-Ekalesia

O le matafaioi a le Ekalesia e aofia ai le aoaoina atu o le talalelei a Iesu Keriso, tuuina atu o sauniga, ma le lagolagoina o le aiga. E lagolagoina e taitai ma faiaoga ia matua e ala i le faamautuina o sootaga malolosi ma faafaileleina faatasi ma tamaiti ma le autalavou latou te auauna i ai.

Talanoa ma Matua

Fesootai faasamasamanoa ma matua ia iloa ai pe faapefea ona lagolagoina a latou fanau. Faasoa atu malosiaga e te matauina.
Fesili i ai po o a mea latou te faamoemoe ma aoaoina i korama o le Perisitua Arona, i vasega o Tamaitai Talavou, ma i gaoioiga.

Pe afai o matua e le o ni tagata toaaga o le Ekalesia:

Faamalamalama i matua lenei taumafaiga e lagolago tamaiti ma le autalavou, ma fesili i ai pe mananao e, ma pe faapefea ona latou mananao e faaaofia a latou fanau.
Fesili i tamaiti po o talavou po o a ituaiga o lagolago latou te mananao ai.
Talanoa ma le aufono a le uarota pe faapefea ona faaaofia matua i le tele e mafai ai.

Lagolago Tamaiti ma le Autalavou

Fesoasoani i tamaiti ma le autalavou ia iloa faatosinaga a le Agaga Paia.
Fesili i ai po o a mea latou te mananao e aoao ma lagona i korama ma vasega ma i gaoioiga.
Uunai i latou ia ta’imua i le fuafuaina ma le faatautaiga o gaoioiga.
Lagolago e umia le Perisitua Arona i le faataunuuina o tiutetauave o le korama.

Aoaoina o le Talalelei

I le Aiga

O suesuega o tusitusiga paia ma tatalo faaletagata lava ia ma faaleaiga o le a fesoasoani i tamaiti ma le autalavou ia lagona ma iloaina le faatosinaga a le Agaga Paia ma aoao ia alolofa i le Faaola. Ua uunaia tagata taitoatasi ma aiga ia faaaoga le Sau, Mulimuli Mai ia te A’u—Mo Tagata Taitoatasi ma Aiga ma upu a perofeta soifua e suesue ai i le talalelei a Iesu Keriso.

I le Lotu

E feiloai faatasi tamaiti ma le autalavou e aoao le talalelei a Iesu Keriso. E aoao e tamaiti le talalelei e ala i aoaoga i vasega ma taimi o pesepesega a le Peraimeri. E aoao e le autalavou aoaoga faavae i vasega ma korama. Ua valaauliaina tamaiti ma le autalavou e faasoa atu mea latou te aoaoina i le aiga ma ia faaaoga le talalelei i o latou olaga.

Auaunaga ma Gaoioiga

I le Aiga

O auaunaga ma gaoioiga e atiae ai mausa amiotonu i aso taitasi, fausia ai sootaga faaleaiga, aoao ai tomai o le olaga, atiae ai uiga FaaKeriso, ma fesoasoani ai i tamaiti ma le autalavou ia tuputupu ae. E mafai ona taulai atu auaunaga faaleaiga ma gaoioiga i manaoga o tagata taitoatasi ma le aiga ma maua ai avanoa e faaaoga ai mataupu faavae o le talalelei i aafiaga o aso uma.

I le Lotu

Auaunaga—e aofia ai e umia le Perisitua Arona o loo faatautaia le sauniga o le faamanatuga—ma e tuuina atu e gaoioiga faifai pea ni avanoa e potopoto ai, aoao ai tomai fou, faataunuu ai galuega faigata, ma fausia ai sootaga e faatotonugalemu i le talalelei faatasi ma uo ma taitai. O nei avanoa e fesoasoani i tamaiti ma le autalavou ia tuputupu ae ai faaleagaga, faaagafesootai, faaletino, ma faaleatamai ma tuu atu ai auaunaga anoa i isi. JustServe (JustServe.org) o se punaoa taua mo avanoa o auaunaga faalenuu.

O gaoioiga o aso e tele mo le autalavou e aofia ai konafesi Mo le Malosi o le Autalavou (MMA), konafesi a le autalavou, tolauapiga, ma isi faatasiga. O nei gaoioiga e mafai ona fesoasoani i le autalavou e faaloloto ai lo latou manao e mulimuli i le Faaola, toso ese ai i latou mai mea masani latou te faia soo, ma fesoasoani ia i latou ia iloa o i latou o sina vaega o se vaega toatele atu o talavou e tutusa sini amiotonu.

Atinaega Faaletagata Lava Ia

I le Aiga

E filifili tamaiti ma le autalavou po o a mea e mafai ona latou faia e tuputupu ae ai ma aoao ai ia mulimuli i le Faaola. E mafai ona fesoasoani matua ia i latou ia iloa po o a auala ua latou tuputupu ae ai ma po o fea o loo manaomia ai ona faaleleia i latou. O gaoioiga uma lava, e aofia ai le lotu, a’oga, faigauo, taaloga, faatufugaga, galuega, ma isi mea e fiafia i ai le tagata lava ia, e mafai ona fesoasoani i tamaiti ma le autalavou ia mulimuli ai ia Iesu Keriso.

I le Lotu

E alolofa ma auauna atu taitai i tamaiti ma talavou taitasi ma nofouta i o latou manaoga ma mea e fiafia i ai. E ala i sootaga alofa, e mafai ai e taitai ona tuuina atu se faatosinaga tulagaese ma mamana e lagolago ai ma uunaia tamaiti ma le autalavou i lo latou auaunaga ma le tuputupu ae faaletagata lava ia.

Fetuunai ma le Faamasani

E tulaga ese lava tagata taitoatasi, aiga ma faapotopotoga. O le mea e sili ona aoga mo le tasi atonu e le aoga mo le isi. Fai le mea e aoga mo lou aiga, vasega, korama, po o le uarota. Talanoa e uiga i o outou avanoa ma popolega, ma saili i faaaliga mo auala e faamausali ai lenei ta’imua e fesoasoani ai i tamaiti ma talavou taitoatasi ia ausia o latou gafatia paia.

Mo se faataitaiga, o le a eseese lava tamaiti ma talavou i auala latou te taulimaina ai le tuputupu ae faaletagata lava ia: le ituaiga, aofaiga, ma le faisoo o sini, faapea ai ma le tele o le lagolagosua latou te manaomia, e tatau ona fuafuaina faaletagata lava ia. E faamasani foi vasega ma korama i le faafetaiaia o manaoga. Ma le isi, o le ituaiga ma le fai soo o gaoioiga e mafai ona eseese e tusa ma tulaga i le lotoifale.

Ia Faafaigofie. Fai le mea e aoga.

Uunaiga ma le Aloaiaina

Uunaiga

O le a meafua lava le uunaia o tamaiti ma le autalavou pe a latou lagonaina le alofagiaina, tuputupu ae, faaleleia, ma lagona le Agaga Paia i o latou olaga. A oo ina faigata suiga ma le tuputupu ae mo i latou, faamalosiau ia i latou ia tagai mo ni auala e faatoilalo ai luitau pe fetuunai a latou fuafuaga. O sootaga malolosi ma faatuatuaina ma matua, taitai, ma uo e mafai ona matou maua ai le malosi e taumafai ai pea.

Aloaiaina

A o alualu i luma tamaiti ma le autalavou, ia viia a latou taumafaiga ma uunaia i latou. Tuu atu ia i latou avanoa e faasoa atu ai mea o loo latou aoaoina, ma patipatia lo latou tuputupu ae. Ma le isi, e mafai ona maua e tamaiti ma talavou uma ni mea e pei o se mama po o se pine e faamanatu ai ia i latou o i latou o se vaega o se faalapotopotoga i le lalolagi atoa o loo tauivi e mulimuli ia Iesu Keriso. A o faataunuu ai e tamaiti ma le autalavou sini faaleagaga, faaagafesootai, faaletino, ma faaleatamai, e mafai ona latou mauaina ni faatusa faaopoopo.