“Matafaioi,” Tamaiti ma le Autalavou o Le Ekalesia a Iesu Keriso o le Au Paia o Aso e Gata Ai: O Se Taiala Tomua mo Matua ma Taitai (2019)
“Matafaioi”
Matafaioi
Aiga ma Matua
O le a la’u matafaioi?
Ia avea o se faataitaiga amiotonu i lau fanau. Aoao i latou i le auala e tuputupu a’e ai i vaega uma o o latou olaga. Saili ni auala e fesoasoani ai ia iloa le olioli o le tausiga o feagaiga, iloaina o taleni fou, ma le faia o mea faigata. Fesoasoani i lou aiga ia ola latalata i le Tama Faalelagi ma Iesu Keriso ma ola i le talalelei i le olaga i aso uma.
O le a le mea ou te faia?
Ia iloa e lau fanau le tele o lou alofa ia i latou. Ia e aofia i o latou olaga. Ia iloa ma le agaga tatalo o latou manaoga patino ma fuafua suesuega faaletalalelei ma gaoioiga ia taulimaina na manaoga. Ia faasoa soo atu lau molimau ia te i latou. Talanoa ma taitai e uiga i auala e mafai ai ona latou fesoasoani e lagolago lau fanau.
O fea ou te amata ai?
Faaauau pea ona talanoa ma faalogo i lau fanau. Tatalo po o le a le auala e mafai ai ona e lagolagoina i latou. Fesoasoani ia latou iloa ma amata galulue i vaega o le aoaoina o loo latou fiafia i ai. Amata pe faaauau ia tatalo faaleaiga, suesuega o le talalelei, avanoa mo auaunaga, ma gaoioiga e fesoasoani ai i lau fanau ia tuputupu a’e.
Taitai ma Faiaoga o le Peraimeri
O le a la’u matafaioi?
Alofa ma faamalosia le fanau. Lagolago i matua i le fesoasoani atu i fanau ia lagona le alofa o le Tama Faalelagi mo i latou, malamalama i le talalelei a Iesu Keriso, lagona ma iloa le faatosinaga a le Agaga Paia, ma saunia e osia ma tausia feagaiga paia.
O le a le mea ou te faia?
Faamautinoa e fesoasoani vasega a le Peraimeri ma taimi o pesepesega i tamaiti e lagona ai le Agaga, faateleina le faatuatua, ma lagonaina le olioli o le talalelei a Iesu Keriso i o latou olaga. Faatasi ma vaega o le tuputupu a’e o loo fautuaina mai i le Luka 2:52 i le avea ma se taiala, fuafua auaunaga ma gaoioiga malie ma tinou e fausia ai molimau, faamalosia ai aiga, ma faafailele ai le lotogatasi ma le tuputupu a’e faaletagata lava ia.
O fea ou te amata ai?
Ia iloa le fanau ma o latou aiga, ma auauna atu i o latou manaoga. I le avea ai ma se au peresitene o le Peraimeri, ia fesili ma le agaga tatalo pe mafai faapefea ona e fesoasoani i au faiaoga, o taitai musika, ma taitai o gaoioiga ia fesoasoani i fanau ia mulimuli i le Faaola.
Taitai o Tamaitai Talavou
O le a la’u matafaioi?
Fesoasoani i matua ma le au epikopo i le taialaina ma le musuiaina o tamaitai talavou ia malamalama i lo latou faasinomaga o ni afafine o le Atua, saunia mo feagaiga o le malumalu, ma faataunuu o latou faamoemoega paia. Taiala au peresitene o vasega a o latou taitai, auauna atu i, ma tautuaina tagata o o latou vasega.
O le a le mea ou te faia?
Seti se faataitaiga o se so’o o Iesu Keriso. Taiala au peresitene o vasega a o latou fuafuaina ma le agaga tatalo ma fesoasoani e aoao atu lesona mai le Sau, Mulimuli Mai ia te A’u—Mo Tamaitai Talavou. Uunaia i latou e taitai i le fuafuaina ma le faataunuuina o auaunaga ma gaoioiga o le a fesoasoani ai i tamaitai talavou ia tuputupu ae i vaega uma o o latou olaga. Ofo atu se lagolagosua faaopoopo i tamaitai talavou o e manaomiaina.
O fea ou te amata ai?
Ia iloa tamaitai talavou taitoatasi. Talanoa ma tamaitai talavou, o latou matua, ma le au epikopo e uiga i auala e mafai ai ona e lagolago i le tuputupu ae o tamaitai talavou. Tatalo ia iloa pe mafai faapefea ona e fesoasoani i au peresitene o au vasega ia manuia i o latou valaauga.
Taitai o le Perisitua Arona
O le a la’u matafaioi?
Fesoasoani i matua ma le au epikopo i le sauniaina o alii talavou mo faauuga i tofi o le perisitua, feagaiga o le malumalu, misiona, ma matafaioi paia. Uunaia i latou ia malamalama i lo latou faamoemoega ma le faasinomaga o ni atalii o le Atua. Taiala au peresitene o korama a o latou taitai, auauna atu i ai, ma auauna atu i tagata o lo latou korama ma a o latou faatautaia i le sauniga o le faamanatuga.
O le a le mea ou te faia?
Seti se faataitaiga o se so’o o Iesu Keriso. Taiala au peresitene o le korama a o latou faatinoina a latou ki, taitai i sauniga o le faamanatuga, ma fuafua ma le agaga tatalo ma fesoasoani e aoao atu lesona mai le Sau, Mulimuli Mai ia te A’u—Mo Alii Talavou. Fesoasoani ia i latou i le fuafuaina ma le faataunuuina o auaunaga ma gaoioiga o le a fesoasoani ai i alii talavou ia tuputupu ae i vaega uma o o latou olaga. Tuu atu ia i latou e taitai. Ofo atu se lagolagosua faaopoopo i alii talavou o e manaomiaina.
O fea ou te amata ai?
Faaalu se taimi ma alii talavou. Ia iloa ma alofa ia i latou taitoatasi. Talanoa ma le au epikopo, alii talavou, ma o latou matua e fuafua ai pe mafai faapefea ona e lagolagoina i latou a o latou tuputupu ae e avea atili e faapei o le Faaola. Tatalo ia iloa pe mafai faapefea ona e fesoasoani i lau au peresitene o korama e faatino o latou ki ma ia manuia i o latou valaauga.
Faiaoga o le Aoga Sa
O le a la’u matafaioi?
Taumafai e fesoasoani i le autalavou ia o mai ia Keriso e ala i le aoaoina ma le mulimuli i Lana aoaoga faavae. Aoao le autalavou ia malamalama, faasoa atu, ma ola i le talalelei a Keriso.
O le a le mea ou te faia?
Seti se faataitaiga o se so’o o Iesu Keriso, ma fesoasoani i le autalavou ia fausia lo latou faatuatua. Faamalosia i latou ia suesue i tusitusiga paia i le aiga—taitoatasi ma faatasi ma o latou aiga. Fesoasoani ia i latou ia saunia ma aoao atu mataupu faavae faaleaoaoga faavae. Valaaulia i latou e faaaoga mea o loo latou aoaoina i lo latou tuputupu ae faaletagata lava ia.
O fea ou te amata ai?
Taumafai e aoao atu e pei ona sa faia e le Faaola. Ia iloa le autalavou taitoatasi. Tatalo ia iloa pe mafai faapefea ona e fesoasoani ia i latou ia tuputupu ae ia avea atili e faapei o le Faaola. Faamalosia tagata o le vasega ma o latou matua i taumafaiga ia aoao mai ma aoao atu le talalelei i le lotu ma i o latou aiga.
O Le Au Epikopo ma Au Peresitene o Korama ma Vasega
O le a le latou matafaioi?
O le au epikopo o le au peresitene o le Perisitua Arona i le uarota ma e nafa ma tamaitai talavou ma alii talavou. E galulue au peresitene o korama o le Perisitua Arona i ki pe a vaetofia peresitene o korama. E gaoioi au peresitene o vasega a Tamaitai Talavou i lalo o le pule o le perisitua pe a mavae le vaetofiaina o i latou e se sui o le au epikopo.
O le a le mea latou te faia?
E tatau i au peresitene ona taumafai ia avea ma ni soo moni o Iesu Keriso a o latou fesoasoani i tagata taitoatasi o le korama po o le vasega ia lagonaina le alofagia ma iloaina le olioli o le ola i le talalelei. I lalo o le taitaiga a le au epikopo, e taitai e au peresitene o korama e umia le Perisitua Arona a o latou taitai i le sauniga o le faamanatuga. E taitai uma au peresitene o korama ma vasega i le faapotopotoina o Isaraelu i itu uma o le veli ma i le tausiga o i latou e manaomia le fesoasoani.
O fea latou te amata ai?
E aoao e au peresitene o latou tiute mai le Alii ma mai o latou taitai. Latou te tatalo mo tagata o le korama po o le vasega ma iloa o latou manaoga. Latou te lagolagoina i latou i le avea ai ma soo o Iesu Keriso. Latou te fefautuaai faatasi po o a lesona, gaoioiga, ma auaunaga o le a manuia ma faamalosia ai le autalavou ma aumai ai le lotogatasi i o latou korama ma vasega.