“Jerbal ko,” Ajri ro im Jodikdik ro ilo Kabun̄ eo an Jisōs Kraist im Armej ro Rekwojarjar ilo Raan ko Āliktata: Juon Unin Tōl in Kōmeļeļe n̄an ro Jinen im Jemān im Ritōl ro (2019)
“Jerbal ko”
Jerbal ko
M̧weo im ro Jinen im Jemān
Ta eddo eo aō?
Juon waanjon̄ak ejim̧we n̄an ajri ro nejūm̧. Katakin er ewi wāween eddōkļo̧k ilo aolep jekjek ko an mour ko aer. Kappukōt wāween ko n̄an jipan̄ er ekkatak lan̄lōn̄ eo an kōjparok bujen ko, lo tōļan ko rekāāl, im kōm̧m̧ane men ko reppen. Jipan̄ baam̧le eo am̧ epaakeļo̧k Jemedwōj Ilan̄ im Jisōs Kraist im mour kōn gospel eo aolep raan.
Ta eo in kōm̧m̧ane?
Kōm̧m̧an bwe ajri ro nejūm̧ ren jeļā ewi jon̄an am̧ iakwe er. Bōk kuņaam̧ ilo mour ko aer. Lukkuun jar n̄an kile aikuj ko aer kajjojo im karōk iien ekkatak gospel eo im m̧akūtkūt ko n̄an ņa mejļan aikuj ko. En emakijkij am̧ kwaļo̧k naan in kam̧ool eo am̧ ippāer. Kōnono ippān ritōl ro kōn ekōjkan aer maron̄ jipan̄ rejtake ajri ro nejūm̧.
Ia eo in ijjino ie?
Wōnm̧aanļo̧k wōt im ekōnono ippān im ron̄jake ajri ro nejūm̧. Jar kōn ekōjkan am̧ maron̄ rejtake er. Jipan̄ er lo im jino jerbale eria in ekkatak ko rej itok limoier ie. Jino ak wōnm̧aanļo̧k wōt kōn jar an baam̧le, ekkatak jeje ko rekwojarjar, iien ko rem̧m̧an jerbal in jipan̄, im m̧akūtkūt ko n̄an jipan̄ ajri ro nejūm̧ eddōkļo̧k.
Ritōl ro im Rūkaki ro an Būraimere
Ta eddo eo aō?
Iakwe im kōkajoorļo̧k ajri ro. Jipan̄ ro jinen im jemān n̄an jipan̄ ajri ro en̄jake iakwe eo an Jemedwōj Ilan̄ n̄an er, meļeļe gospel eo an Jisōs Kraist, en̄jake im kile kareel eo an Jetōb Kwojarjar, im m̧aanjabpopo n̄an kōm̧m̧an im kōjparok bujen ko rekwojarjar.
Ta eo in kōm̧m̧ane?
Lale bwe kūlaaj ko an Būraimere im iien al eo en jipan̄ ajri ro en̄jake Jetōb eo, ļapļo̧k ilo tōmak, im en̄jake lan̄lōn̄ eo an gospel eo an Jisōs Kraist ilo mour ko aer. Ippān eria ko an eddōkļo̧k kar elmakoti ilo Luke 2:52 āinwōt juon unin tōl, karōk jerbal in jipan̄ eo me ekalimomo im jej bōk kuņaadn ie im im m̧akūtkūt ko me rej kalōk naan in kam̧ool ko, kōkajoorļo̧k baam̧le ko, im kōketak ippān doon im eddōkļo̧k an juon make.
Ia eo in ijjino ie?
Kōm̧m̧an bwe kwon jeļā kajjien ajri ro im baam̧le ko aer, im jerbal in karejar n̄an aikuj ko aer. Āinwōt juon Būraimere būreejtōnji, kanooj jar im kajjitōk ekōjkan ami maron̄ jipan̄ rūkaki ro ami, ritōl al ro, im ritōl ro an m̧akūtkūt jipan̄ ajri ro ļoor Rilo̧mo̧o̧r.
Ritōl ro an Doulul eo an Jiron̄ ro
Ta eddo eo aō?
Jipan̄ ro jinen im jemān im bisoprik eo ilo tōl im im̧we jiron̄ ro meļeļe piktok kwojarjar eo aer āinwōt leddik ro nejin Anij, m̧aanjabpopo n̄an bujen ko an tampeļ, im kakūrm̧ool jibadbad ko aer rekwojarjar. Tōl kūlaaj būreejtōnji ko ilo aer tōl, im jerbal n̄an ro uwaan kūlaaj ko aer.
Ta eo in kōm̧m̧ane?
Kōm̧m̧ane juon waanjon̄ak āinwōt juon rikaļoor an Jisōs Kraist. Tōl kūlaaj būreejtōnji ko ilo aer kanooj jar ilo karōke im jipan̄ katakin katak ko jān Itok, Loor Eo—N̄an Doulul eo an Jiron̄ ro. Kōketak er n̄an tōl ilo karōk im kōm̧m̧an jerbal in jipan̄ im m̧akūtkūt ko me renaaj jipan̄ jiron̄ ro eddōkļo̧k ilo aolep eria ko an mour ko aer. Leļo̧k elōn̄ļo̧k rejtak n̄an jiron̄ ro me rej aikuji.
Ia eo in ijjino ie?
Jeļā kajjien jiron̄ ro kajjojo. Ekōnono ippān jiron̄ ro, ro jineer im jemāer, im bisoprik eo kōn ekōjkan am̧ maron̄ rejtake eddōkļo̧k eo an jiron̄ ro. Jar n̄an jeļā ewi wāween am̧ maron̄ jipan̄ kūlaaj būreejtōnji ko tōprak ilo kūr ko aer.
Ritōl ro an Priesthood eo an Aron
Ta eddo eo aō?
Jipan̄ ro jinen im jemān im bisoprik eo ilo kōpooj likao ro n̄an ekkapit n̄an opiij ko an priesthood eo, bujen ko an tampeļ, mijen ko, im jerbal ko rekwojarjar. Im̧we er n̄an meļeļe jibadbad eo aer im piktok eo āinwōt ļaddik ro nejin Anij. Tōl būreejtōnji ko an doulul eo ilo aer tōl, jerbal in karejar n̄an, im jerbal n̄an ro uwaan doulul ko aer im ilo aer kōm̧m̧ane kain̄i in kwojkwoj eo.
Ta eo in kōm̧m̧ane?
Kōm̧m̧ane juon waanjon̄ak āinwōt juon rikaļoor an Jisōs Kraist. Tōl būreejtōnji ko an doulul eo ilo aer kōjerbal kii ko aer, kōm̧m̧ane kain̄i in kwojkwoj eo, im kanooj in karōk im jipan̄ katakin katak ko jān Itok, Ļoor Eō—N̄an Doulul eo an Likao ro. Jipan̄ er karōk im kōm̧m̧ane jerbal in jipan̄ eo im m̧akūtkūt ko me renaaj jipan̄ likao ro eddōkļo̧k ilo aolep eria ko an mour ko aer. Kōtļo̧k bwe ren tōl. Leļo̧k elōn̄ļo̧k rejtak n̄an likao ro me rej aikuji.
Ia eo in ijjino ie?
Joļo̧k iien ippān likao ro. Jeļā kajjier im iakwe er kajjojo. Ekōnono ippān bisporik eo, likao ro, im ro jineer im jemāer n̄an ļōmņake ekōjkan am̧ maron̄ jipan̄ rejtake er ilo aer eddōkļo̧k n̄an erom āinwōt Rilo̧mo̧o̧r. Jar n̄an jeļā ewi wāween am̧ maron̄ jipan̄ būreejtōnji eo an doulul eo kōjerbal kii ko aer im ļe ilo kūr ko aer.
Rūkaki ro an Jabōt Jikuuļ
Ta eddo eo aō?
Kajjieon̄ jipan̄ jodikdik ro itok n̄an Kraist kōn ekkatak im ļoor katak eo An. Katakin jodikdik ro meļeļe, kwaļo̧k, im mour kōn gospel eo an Jisōs Kraist.
Ta eo in kōm̧m̧ane?
Kōm̧m̧ane juon waanjon̄ak āinwōt juon rikaļoor an Jisōs Kraist, im jipan̄ jodikdik ro. Rōjan̄ er n̄an ekkatak jān jeje ko rekwojarjar ilo m̧weo—ippāer make im ippān baam̧le ko aer. Jipan̄ er m̧aanjabpopo im katakin pedped ko an katak eo. Kajjitōk ippāer n̄an kōjerbal ta eo rej ekkatak n̄an eddōkļo̧k eo aer make.
Ia eo in ijjino ie?
Kajjieon̄ in katakin āinwōt an kar Rilo̧mo̧o̧r eo kōm̧m̧ane. Jeļā kajjien jodikdik ro kajjojo. Jar n̄an jeļā ewi wāween am̧ maron̄ jipan̄ er eddōkļo̧k n̄an erom āinwōt Rilo̧mo̧o̧r. Kōkajoorļo̧k ro uwaan kūlaaj eo im ro jineer im jemāer ilo kijejeto ko n̄an ekkatak im katakin gospel eo ilo m̧ōn jar eo im ilo m̧ōko im̧weer.
Bisporik eo im Doulul im Kūlaaj Būreejtōnji ko
Ta jerbal eo aer?
Bisoprik eo ej būreejtōnji eo an Priesthood eo an Aron eo ilo ward eo im ej eddoiki doulul ko an jiron̄ ro im likao ro. Būreejtōnji ro an doulul eo an Priesthood eo an Aron rej jerbal kōn kii ko kar liļo̧k ke būreejtōn ro an doulul eo rej kōjeno̧lok er. Būreejtōnji ro an kūlaaj an Doulul eo an Jiron̄ ro rej jerbal kōn mālim eo an priesthood eo kar bōk jān kar iien kōjeno̧lok eo jān juon uwaan bisoprik eo.
Ta eo rej kōm̧m̧ane?
Būreejtōnji ko rej aikuj kajjieon̄ n̄an erom rikaļoor ro rem̧ool an Jisōs Kraist ilo aer jipan̄ kajjojo ro uwaan doulul eo ak kūlaaj eo en̄jake iakwe im lo lan̄lōn̄ eo an mour kōn gospel eo. Ium̧win tōl eo an bisoprik eo, būreejtōnji ko an doulul eo an Priesthood eo an Aron rej tōl rikabwijer ro ilo aer kōm̧m̧ane kain̄i eo an kwojkwoj eo. Būreejtōnji ko jim̧or an doulul eo im kūlaaj eo rej tōl ilo aintok Israel ilo rejet ko jim̧or an rōn̄ōl eo im ilo kea kōn ro rej pād ilo aikuj.
Ia eo ren ijjino ie?
Būreejtōnji eo ej ekkatak eddo ko aer jān Irooj im jān ritōl ro aer. Rej jar kōn ro uwaan doulul eo ak kūlaaj eo im n̄an jeļā ta aikuj ko aer. Rej rejtake er ilo aer erom rikaļoor ro an Jisōs Kraist. Rej ko̧o̧njeļ ippān doon kōn ta katak ko, m̧akūtkūt ko, im jerbal in jipan̄ eo enaaj kōjeraam̧m̧an im kōkajoorļo̧k jodikdik ro im bōktok juon wōt n̄an doulul ko ak kūlaaj ko aer.