Magkat-on mahitungod sa Paghigugma, Pagpakigbahin, ug Pagdapit

Ang nabanhaw nga Ginoo miingon sa Iyang Apostoles, “Panglakaw kamo sa tibuok kalibotan, ug isangyaw kining Maayong Balita ngadto sa tanang mga tawo” (Marcos 16:15). Ang samang balaan nga sugo mao ang ato karon. Diha sa Doktrina ug mga Pakigsaad, nagdapit ang Manluluwas kanato nga, “Mobuka sa [atong] [mga] ba-ba sa pagpadayag sa akong ebanghelyo” (Doktrina ug mga Pakigsaad 30:5).

Si Elder Gary E. Stevenson nagpahinumdom kanato nga “ang dakong mando sa Manluluwas matuman pinaagi sa yano, sayon sabton nga mga baroganan nga gitudlo sa matag usa kanato gikan pa sa pagkabata: paghigugma, pagpaambit, ug pagdapit” (“Paghigugma, Pagpaambit, Pagdapit,” Liahona, Mayo 2022, 85). Kini nga mga baroganan nagkahiusa ug gamhanang mga paagi nga mahimo ninyong ipakigbahin ang ebanghelyo ngadto sa mga tawo sa normal ug natural nga mga paagi. Walay tsapa sa ngalan [name badge] o sulat ang gikinahanglan. Walay pormal nga pagtawag ang gikinahanglan.

Gugma: “Ang gugma alang sa uban mao ang klaro nga pagpadayag sa ikaduhang dako nga sugo sa paghigugma sa atong silingan; kini nagpakita sa makapalimpyo nga proseso sa impluwensiya sa Espiritu Santo sulod sa atong mga kalag. Pinaagi sa pagpakita sa gugma ni Kristo ngadto sa uban, atong madasig kadtong kinsa nakakita sa atong maayong mga buhat aron ‘daygon nila ang [atong] Amahan nga atua sa langit’ [Mateo 5:16]” (Gary E. Stevenson, “Paghigugma, Pagpaambit, Pagdapit,” 85).

Pagpakigbahin: “Kitang tanan adunay mga butang nga gipakigbahin sa uban. Kita nagbuhat niini sa kasagaran. Kita manabi kon unsa ang mga salida ug pagkaon nga atong ganahan, makapakatawa nga mga butang nga atong nakita, mga dapit nga atong gibisita, art nga atong gidayeg, mga kinutlo nga nakapadasig kanato. Unsaon kaha nato aron yano nga makadugang ngadto sa lista sa mga butang nga ato nang napakigbahin kon unsa ang atong ganahan mahitungod sa ebanghelyo ni Jesukristo?” (Gary E. Stevenson, “Paghigugma, Pagpaambit, Pagdapit,” 86).

Pagdapit: “Adunay daghan kaayong mga pagdapit nga mahimo natong ipaabot sa uban. Kita makadapit sa uban sa ‘pagduol ug pagtan-aw’ sa usa ka tulumanon sa sakramento, usa ka kalihokan sa ward, usa ka online nga bidyo nga nagpasabot sa ebanghelyo ni Jesukristo. Ang ‘pagduol ug pagtan-aw’ mahimong mao ang usa ka imbitasyon sa pagbasa sa Basahon ni Mormon o pagbisita sa usa ka bag-o nga templo atol sa open house niini sa dili pa kini ipahinungod” (Gary E. Stevenson, “Paghigugma, Pagpaambit, ug Pagdapit,” 86).

Pag-ampo alang sa mga oportunidad sa pagpakigbahin sa ebanghelyo. Ang Langitnong Amahan mogiya kaninyo aron mahibalo kon sa unsa andam ang mga tawo sa inyong palibot ug unsa nga pagdapit ang inyong ikahatag.

Ayaw kabalaka kon ang usa ka tawo mobalibad sa inyong pagdapit. “Ang inyong kalamposan wala magdepende kon sa unsang paagi ang uban mopili sa pagtubag kaninyo, ngadto sa inyong mga pagdapit, o ngadto sa inyong sinsero nga mga buhat sa pagkamabination. … Unsay gusto sa Ginoo mao ang inyong labing maayo nga paningkamot—aron nga kamo ‘moalagad kaniya sa tibuok ninyong kasingkasing, gahom, hunahuna ug kusog’ (Doktrina ug mga Pakigsaad 4:2)” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 14-15).

Samtang kamo nagsunod sa inyong tinuohan ug nagsunod sa espirituhanong mga pag-aghat sa pagpakigbahin sa ebanghelyo, masinati ninyo ang kalipay nga moabot gikan sa pagtabang sa mga tawo nga moduol kang Kristo kada adlaw. “Ang pagpakigbahin sa ebanghelyo mopukaw sa hingpit nga kalipay ug paglaom sa mga kalag sa tighatag ug sa tigdawat. Sa tinuod, ‘unsa ka dako ang imong hingpit nga kalipay’ [Doktrina ug mga Pakigsaad 18:15] samtang ikaw mopakigbahin sa ebanghelyo!” (Marcus B. Nash, “Ipakita Ninyo ang Inyong Kahayag,” Liahona, Nob. 2021, 72).