Ang Imong Katuyoan: Pag-imbitar sa uban sa pagduol ngadto kang Kristo pinaagi sa pagtabang kanila nga makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan.
Hunahunaa Kini
Unsa man ang akong katuyoan isip usa ka misyonaryo?
Unsa man ang awtoridad ug gahom nga moabot uban sa akong tawag?
Unsaon nako sa pagsalig, pag-ila ug pagtudlo pinaagi ang Espiritu?
Unsa ang ebanghelyo ni Jesukristo?
Unsa ang mensahe sa Pagpahiuli? Nganong importante man kaayo kini?
Unsa ang akong responsibilidad sa pag-establisar ug pagpalig-on sa Simbahan ni Jesukristo?
Unsaon man nako sa pagkahibalo nga ako usa ka malamposon nga misyonaryo?
Ang Imong Katungdanan sa Pagtudlo sa Gipahiuli nga Ebanghelyo ni Jesukristo
Ikaw gilibotan sa katawhan. Imo silang malabyan sa kadalanan ug mobiyahe uban nila. Ikaw mobisita nila sa ilang mga panimalay ug online nga mokonektar nila. Silang tanan mga anak sa Dios—imong mga igsoong lalaki ug babaye. Ang Dios nahigugma kanila sama sa Iyang paghigugma kanimo.
Kadaghanan niining mga tawhana nagpangita og unsay katuyoan sa kinabuhi. Sila may kabalaka alang sa ilang kaugmaon ug sa ilang mga pamilya. Gikinahanglan nila nga mobati nga nahisakop nga naggikan sa kahibalo nga sila mga anak sa Dios ug mga sakop sa Iyang mahangtoron nga pamilya. Gusto nila nga mobati nga luwas sa usa ka kalibotan nga nagkausab ang mga mithi. Sila nagtinguha og “kalinaw niini nga kalibotan, ug kinabuhi nga dayon sa kalibotan nga umaabot” (Doktrina ug mga Pakigsaad 59:23).
Daghan ang “natago gikan sa kamatuoran tungod kay sila wala masayod asa kini pangitaa” (Doktrina ug mga Pakigsaad 123:12). Ang Ebanghelyo ni Jesukristo, sigon sa gipahiuli pinaagi ni Propeta Joseph Smith, naghatag og mahangtoron nga kamatuoran. Kini nga kamatuoran nagtubag sa espirituhanong mga panginahanglan sa mga tawo ug motabang kanila sa pagtuman sa ilang labing dakong mga tinguha.
Isip usa ka awtorisado nga representante ni Jesukristo, ikaw magtudlo nga ang “katubsanan moabot pinaagi sa atong Balaan nga Mesiyas” (2 Nephi 2:6). Ikaw moimbitar sa mga tawo sa pagduol ngadto ni Kristo aron mahimong makabig ngadto Kaniya ug sa Iyang gipahiuli nga ebanghelyo. Kon sila modawat sa imong imbitasyon, sila makabaton og mas dakong kalipay, paglaom, kalinaw, ug katuyoan.
Sa pagduol ngadto sa Manluluwas, ang mga tawo kinahanglan nga magbaton og hugot nga pagtuo diha Kaniya. Ikaw makatabang kanila nga makapalambo niini nga hugot nga pagtuo kon ikaw:
Motudlo kanila sa gipahiuli nga ebanghelyo ni Jesukristo ug mopamatuod sa kamatuoran niini.
Moimbitar kanila nga mopasalig sa pagsunod sumala sa mga pagtulon-an niini.
Mo-follow up ug motabang kanila sa pagbuhat sa mga pasalig nga ilang gihimo.
Motabang kanila nga makaangkon og mga kasinatian diin ilang mabati ang impluwensya sa Espiritu Santo (tan-awa sa 1 Nephi 10:17–19).
Ang hugot nga pagtuo diha ni Jesukristo mahimong moaghat sa mga tawo sa paghinulsol. Pinaagi sa pag-ula alang sa atong mga sala, gihimo ni Jesus ang paghinulsol nga posible. Kon ang mga tawo maghinulsol, sila malimpyo gikan sa sala ug mas mapaduol ngadto sa Langitnong Amahan ug ni Jesukristo. Masinati nila ang hingpit nga kalipay ug kalinaw sa pagdawat og kapasayloan.
Ang paghinulsol nag-andam sa katawhan alang sa pakigsaad sa bunyag ug sa gasa sa Espiritu Santo. “Duol ngari kanako,” ang Manluluwas miingon, “ ug magpabunyag diha sa akong ngalan, aron kamo mahimo nga pagasantoson pinaagi sa pagdawat sa Espiritu Santoaron mobarog nga walay lama sa akong atubangan sa kataposan nga adlaw.” (3 Nephi 27:20).
Samtang ang imong pagsabot ug pagpamatuod sa Manluluwas ug sa Iyang Pag-ula motubo, ang imong tinguha sa pagpakigbahin sa ebanghelyo modako. Imong mabati, sama sa gibati ni Lehi, nga “dako … ang pagkamahinungdanon sa paghimo niini nga mga butang nga masayran ngadto sa mga lumulupyo sa yuta” (2 Nephi 2:8).
Imahe
ang panan-awon sa Kahoy sa Kinabuhi
Ang Kahoy sa Kinabuhi, ni Damir Krivenko.
Personal nga Pagtuon o Pagtuon uban sa Kompanyon
Susiha ang kauban nga hulagway samtang magtuon ka sa panan-awon sa kahoy sa kinabuhi 1 Nephi 8 ug 11.
Unsa ang gisimbolo sa kahoy sa kinabuhi niining panan-awon? (Tan-awa sa 1 Nephi 11:12–23.)
Unsa ang gitinguha ni Lehi human siya mikaon sa bunga? (Tan-awa sa 1 Nephi 8:10–18.)
Sa panan-awon, unsa ang gikinahanglan nga buhaton sa mga tawo aron makakaon sa bunga? Unsa ang kinahanglan natong buhaton aron makadawat sa tanang panalangin sa Pag-ula sa Manluluwas? Sa unsang paagi ang mga pasalig ug mga pakigsaad makatabang kanato nga makaambit niini nga mga panalangin?
Unsaon nimo pagtabang ang uban nga makaambit sa mga bunga sa ebanghelyo?
Ang Awtoridad ug Gahom sa Imong Tawag
Ikaw gitawag ug gi-set-apart aron “[magpahayag] og maayong nga balita sa dako nga kalipay, gani ang walay kataposan nga ebanghelyo” (Doktrina ug mga Pakigsaad 79:1). Sama sa mga anak nga lalaki ni Mosiah, ikaw magtudlo uban sa awtoridad ug gahom sa Dios (tan-awa sa Alma 17:2–3).
Ubos sa direksiyon ni Kristo, ang awtoridad sa pagsangyaw sa ebanghelyo gipahiuli pinaagi ni Propeta Joseph Smith. Sa dihang ikaw gi-set-apart isip usa ka misyonaryo, imong gidawat kini nga awtoridad. Uban niini moabot ang katungod, pribilehiyo, ug responsibilidad aron morepresentar sa Ginoo ug motudlo sa Iyang ebanghelyo.
Kini nga awtoridad naglakip og usa ka responsibilidad sa pagpakabuhi nga takos sa imong tawag. Sabta ang imong pagset-apart sa tinuoray nga paagi. Palayo gikan sa sala ug gikan sa bisan unsang butang nga hilas o malaw-ay. Palayo gikan sa mga paagi ug mga panghunahuna sa kalibotan. Sunda ang mga sumbanan diha sa Mga Sumbanan sa Misyonaryo alang sa mga Disipulo ni Jesukristo. Isip representante sa Ginoo, “Himoa hinuon ang imong kaugalingon nga panig-ingnan sa mga magtutuo” (1 Timoteo 4:12). Tahora ang ngalan ni Kristo pinaagi sa imong mga lihok.
Agig dugang sa awtoridad, ikaw nagkinahanglan og espirituhanong gahom sa pagtuman sa imong tawag. Ang Dios mohatag og espirituhanong gahom samtang ikaw magmakanunayon nga motrabaho sa pagpalig-on sa imong pagpamatuod Kaniya, ni Jesukristo, ug sa mga kamatuoran sa ebanghelyo nga imong gitudlo. Siya mohatag og espirituhanong gahom kon ikaw mag-ampo, magtuon sa mga kasulatan, ug magtinguha sa pagtuman sa imong misyonaryo nga katuyoan. Siya moganti og espirituhanong gahom samtang ikaw maningkamot sa pagtuman sa Iyang mga sugo ug sa mga pakigsaad nga imong gihimo sa dihang ikaw midawat sa mga ordinansa sa kaluwasan (tan-awa sa Doktrina ug mga Pakigsaad 35:24).
Ang espirituhanong gahom mahimong mapakita kon ikaw:
Mogamit sa mga kasulatan sa pagtudlo sa katawhan, mopalawom sa ilang mga pagsabot sa mga kamatuoran sa ebanghelyo, ug motabang kanila nga makita kon sa unsang paagi nga kining mga kamatuoran magamit sa ilang mga kinabuhi (tan-awa sa 1 Nephi 19:23; Alma 26:13; 31:5).
Mopadayag og gugma ug pasalamat alang sa Ginoo, sa imong pamilya, ug sa uban nga mga misyonaryo, ug sa mga tawo nga imong giserbisyohan (tan-awa sa Doktrina ug mga Pakigsaad 59:7; 78:19).
Rebyoha ug pamalandongi ang mosunod nga mga pakigsaad nga imong gihimo ngadto sa Dios. Tun-i ang mga panalangin nga gisaad sa Dios niadtong kinsa motuman niini nga mga pakigsaad. Pamalandongi ang mga panalangin nga imong nadawat pinaagi sa pagtuman niini. Irekord ang imong mga impresyon diha sa imong journal sa pagtuon.
Bunyag ug Kompirmasyon
Magmahimong andam nga modala nganha kanimo sa ngalan ni Jesukristo.
(Tan-awa sa Kinatibuk-ang Tamdanan nga Basahon, 27.2.)
Personal nga Pagtuon o Pagtuon uban sa Kompanyon
Basaha ang Juan 15:9–10. Sa unsang paagi nga si Kristo mao ang tanom nga parras? Sa unsang paagi nga ikaw usa ka sanga nianang tanom nga parras? Sa unsang paagi nga ang imong pag-set-apart may kalabotan ngadto niini nga relasyon?
Basaha pag-usab ang imong sertipiko sa pagpangalagad. Irekord ang imong mga pagbati ug mga hunahuna kabahin sa imong nabasa. Sa matag higayon nga magtuon ka niini nga kapitulo, ikonsiderar ang pagbalik niini nga proseso. Bantayi ang pagkausab sa imong mga pagbati sa paglabay sa panahon.
Paglista og mga panalangin nga gihangyo ni Joseph Smith alang sa matinud-anon kinsa natugahan diha sa balaan nga balay sa Ginoo. Unsa ang imong mga gibati mahitungod niini nga mga panalangin?
Tinguhaa ang Pagbaton sa Espiritu Santo uban Kanimo
Ikaw nakadawat sa gasa sa Espiritu Santo sa dihang ikaw gikompirmahan nga usa ka miyembro sa Simbahan. Isip usa ka misyonaryo—ug sa tibuok nimong kinabuhi—usa sa imong labing gikinahanglan mao ang pagbaton sa Espiritu Santo uban kanimo (tan-awa sa 1 Nephi 10:17; 3 Nephi 19:9). Ang Espiritu Santo mao ang ikatulong sakop sa Dios nga Kapangulohan.
Ang Espiritu Santo mogiya, motudlo, ug mohupay kanimo. Siya molimpyo ug mobalaan kanimo. Ang Espiritu Santo mopamatuod ug mosaksi sa Amahan ug sa Anak. Siya ang nagpahinabo sa imong pagkakabig ug sa pagkakabig niadtong imong gitudloan. (Tan-awa sa 3 Nephi 27:20; 28:11; Ether 12:41; Moroni 8:26; 10:5; Juan 15:26.)
Ang Espiritu Santo “mopakita nganha kaninyo sa tanan nga mga butang nga kinahanglan inyong buhaton” (2 Nephi 32:5). Siya mopadako sa imong abilidad ug serbisyo nga labaw pa sa unsay imong mabuhat sa imong kaugalingon.
Ang pagtinguha sa pagbaton og Espiritu Santo uban kanimo kinahanglan mao ang usa sa imong labing bug-os nga mga tinguha. Ikaw mobati sa Iyang pakig-uban kon ikaw:
“Mohangyo ko kaninyo sa pagpagpalambo sa inyong espirituhanong kapasidad sa pagdawat og pagpadayag. … Pilia ang paghimo sa espirituwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96).
Pagkat-on sa Pag-ila sa Espiritu
Mas matuman nimo ang imong misyonaryo nga katuyoan kon ikaw magkat-on sa pag-ila ug pagsunod sa giya gikan sa Espiritu Santo. Ang Espiritu kasagaran makighinabi sa hilom nga paagi, pinaagi sa imong mga pagbati ug mga hunahuna. Ipahinungod ang imong kaugalingon sa pagtinguha, pag-ila, ug pagsunod niining dili kasagaran nga mga pag-aghat. Moabot kini sa daghang paagi (tan-awa sa kapitulo 4; tan-awa usab sa Doktrina ug mga Pakigsaad 8:2–3; 11:12–14; Mga Taga-Galacia 5:22–23).
Pagtudlo pinaagi sa Espiritu
Ang ebanghelyo ni Jesukristo mao “ang gahom sa Dios aron pagluwas sa tanan nga motuo” (Mga Taga-Roma 1:16). Tungod niana nga rason, ang mensahe sa Pagpahiuli sa ebanghelyo gikinahanglan nga matudlo pinaagi sa balaan nga gahom—ang gahom sa Espiritu Santo.
Ang Ginoo miingon, “Ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo” (Doktrina ug mga Pakigsaad 42:14; tan-awa usab sa Doktrina ug mga Pakigsaad 50:13–22). Samtang ikaw magtudlo pinaagi sa gahom sa Espiritu Santo, Siya:
Motudlo kanimo sa kamatuoran ug mopahinumdom nimo sa doktrina nga imong natun-an (tan-awa sa Juan 14:26).
Modala sa imong mensahe ngadto sa mga kasingkasing sa mga tawo nga imong gitudloan (tan-awa sa 2 Nephi 33:1).
Motabang kanimo—ug niadtong kinsa modawat pinaagi sa Espiritu—nga makasabot sa usag usa ug makadawat og kaayohan ug maglipay nga maghiusa (tan-awa sa Doktrina ug mga Pakigsaad 50:17–22).
Mopamatuod sa kamatuoran sa imong mensahe ug mokompirmar sa imong mga pulong ngadto niadtong kinsa modawat nimo (tan-awa sa Doktrina ug mga Pakigsaad 100:5–8).
Ang Ginoo mopanalangin kanimo sa madagayaon nga paagi samtang ikaw magtinguha, mosalig, ug motudlo pinaagi sa Espiritu Santo (tan-awa sa mga kapitulo 4 ug 10).
Imahe
One by One [Tinagsa-tagsa], ni Walter Rane
Ang Ebanghelyo ni Kristo ug Doktrina ni Kristo
Ang ebanghelyo ni Jesukristo maghatag og kahulogan sa imong mensahe ug sa imong katuyoan. Kini magsangkap sa “unsa” ug sa “ngano” kabahin sa imong misyonaryo nga pagserbisyo. Ang Iyang ebanghelyo maglakip sa tanan nga doktrina, mga baroganan, mga balaod, mga sugo, mga ordinansa, ug mga pakigsaad nga gikinahanglan alang sa kaluwasan ug sa kahimayaan.
Ang mensahe sa ebanghelyo mao nga kita makaakses sa makaluwas, matubsanong gahom ni Jesukristo pinaagi sa pagpakita og hugot nga pagtuo diha Kaniya, pagdawat sa gasa sa Espiritu Santo, ug paglahutay hangtod sa kataposan (tan-awa sa 3 Nephi 27:13–22).
Kini nailhan usab isip ang doktrina ni Kristo. Ang pagsunod niining doktrina mao ang paagi nga kita makaduol ngadto ni Kristo ug maluwas (tan-awa sa 1 Nephi 15:14). Kini gamhanan gayod nga gitudlo diha sa Basahon ni Mormon (tan-awa sa 2 Nephi 31; 32:1–6; 3 Nephi 11:31–40). Ang imong katuyoan mao ang pagtabang sa uban nga moduol ngadto kang Kristo pinaagi sa pagtabang kanila nga mosunod sa Iyang doktrina.
Imahe
Hyrum Smith
“Isangyaw ang unang mga baroganan sa Ebanghelyo—balik-balika kini sa pagsangyaw: imong makita nga sa matag adlaw, ang bag-o nga mga ideya ug dugang nga lamdag mahitungod niini ipadayag diha kanimo. Ikaw mahimong mopalambo niini aron masabtan kini sa mas klaro nga paagi. Makahimo na dayon ka niini nga mas sayon nga masabtan niadtong imong gitudloan” (Hyrum Smith, in History, 1838–1856, volume E-1 [1 July 1843–30 April 1844], 1994, josephsmithpapers.org).
Pagtuon sa Kasulatan
Unsa ang gitudlo sa mosunod nga mga kasulatan ug pamahayag mahitungod sa ebanghelyo ni Jesukristo ug sa doktrina ni Kristo? Paghimo og mubo nga mga sulat sa imong journal sa pagtuon nga makatabang kanimo nga makasabot ug makahinumdom.
The Converting Power of the Book of Mormon [Ang Makapakabig nga Gahom sa Basahon ni Mormon], ni Ben Sowards
Hugot nga Pagtuo diha ni Jesukristo
Ang hugot nga pagtuo mao ang pundasyon alang sa tanan nga ubang baroganan sa ebanghelyo. Kini mao ang baroganan sa paglihok ug gahom.
Ang atong hugot nga pagtuo kinahanglang nakasentro diha ni Jesukristo tungod kay kini ang modala kanato ngadto sa kaluwasan. Ang Manluluwas nagtudlo, “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon” (Juan 3:16).
Ang hugot nga pagtuo naglakip sa pagtuo nga Siya mao ang Bugtong Anak sa Dios. Kini mao ang pagsalig Kaniya isip atong Manluluwas ug Manunubos (tan-awa sa Mosiah 3:17; 4:6–10; Alma 5:7–15). Kini ang pagbaton og hingpit nga pagsalig diha Kaniya ug sa Iyang pulong, mga pagtulon-an, ug mga saad. Ang atong hugot nga pagtuo diha ni Kristo magtubo samtang kita mosunod sa Iyang mga pagtulon-an ug panig-ingnan uban sa hingpit nga katuyoan sa kasingkasing (tan-awa sa 2 Nephi 31:6–13; 3 Nephi 27:21–22).
Isip usa ka misyonaryo, tabangi ang mga tawo nga makahimo ug motuman sa mga pasalig nga makapalig-on sa ilang hugot nga pagtuo diha ni Jesukristo. Kini nga mga pasalig mag-andam kanila nga modawat sa mga ordinansa ug mohimo ug motuman sa sagrado nga mga pakigsaad sa Dios.
Paghinulsol
Ang hugot nga pagtuo diha ni Jesukristo mosangpot ngadto sa paghinulsol (tan-awa sa Helaman 14:13). Ang paghinulsol mao ang proseso sa pagdangop ngadto sa Dios ug sa pagpalayo gikan sa sala. Samtang kita maghinulsol, ang atong mga lihok, mga tinguha, ug mga hunahuna mausab aron mahimong mas mahiuyon sa kabubut-on sa Dios.
Pinaagi sa Iyang maulaon nga sakripisyo, ang Manluluwas mibayad sa bugti alang sa atong mga sala (tan-awa sa Mosiah 15:9; Alma 34:15–17). Kon kita maghinulsol, kita mapasaylo tungod ni Jesukristo ug sa Iyang sakripisyo, tungod kay Iyang giangkon ang Iyang mga katungod sa kaluoy alang sa mahinulsolon (tan-awa sa Moroni 7:27–28). Sa mga pulong ni propeta Lehi, ang atong “katubsanan moabot … pinaagi sa maayo nga buhat, ug kaluoy. ug grasya sa Balaang Mesiyas” (2 Nephi 2: 6, 8).
Ang paghinulsol mas labaw pa kaysa pagpakita og determinasyon sa pag-usab sa kinaiya o pagbuntog sa kahuyang. Ang paghinulsol mao ang sinsero nga pagdangop ngadto ni Kristo, kinsa makahatag kanato og gahom aron masinati ang “dako nga kausaban” sa atong mga kasingkasing (tan-awa sa Alma 5:12–14). Kini naglangkob sa mapainubsanong pagnunot ngadto sa Espiritu ug sa pagtugyan ngadto sa kabubut-on sa Dios. Samtang kita maghinulsol, atong mapalambo ang atong pasalig sa pagserbisyo sa Dios ug pagtuman sa Iyang mga sugo. Kita sa espirituhanon nga paagi matawo pag-usab diha ni Kristo.
Ang paghinulsol mao ang usa ka positibo nga baroganan nga magdala og hingpit nga kalipay ug kalinaw. Kini magdala kanato “ngadto sa gahom sa Manunubos, ngadto sa kaluwasan sa [atong] mga kalag” (Helaman 5:11).
Magmaisugon ug magmahigugmaon sa pagtabang sa mga tawo nga makasabot kon nganong kinahanglan sila nga maghinulsol. Pinaagi sa pag-imbitar sa mga tawo nga imong gitudloan sa paghimo og mga pasalig, ikaw nagdapit kanila sa paghinulsol ug ikaw nagtanyag kanila og paglaom.
Pagtuon sa Kasulatan
Unsa ang imong nakat-onan gikan sa mosunod nga mga kasulatan mahitungod pagpahayag og paghinulsol?
Ang hugot nga pagtuo kang Kristo ug ang paghinulsol mag-andam kanato alang sa ordinansa sa bunyag. “Ang unang bunga sa paghinulsol mao ang bunyag” (Moroni 8:25). Kita mosulod sa ganghaan ngadto sa kinabuhi nga dayon kon kita nabunyagan pinaagi sa pagpaunlod pinaagi sa usa ka tawo nga adunay awtoridad gikan sa Dios.
Sa dihang kita gibunyagan, kita naghimo og usa ka pakigsaad uban sa Dios. Samtang kita motuman niining pakigsaad, ang Dios nagsaad nga mohatag kanato sa pakig-uban sa Espiritu Santo, mopasaylo sa atong mga sala, ug mohatag kanato nga mahimong miyembro sa Simbahan ni Jesukristo (tan-awa sa Doktrina ug mga Pakigsaad 20:77, 79; Moroni 6:4). Kita gipundok ngadto sa Ginoo ug sa espirituhanong paagi natawo pag-usab pinaagi niining malipayon ug malaumon nga ordinansa.
Ang pagbunyag ug pagkompirma sa mga tawo nga imong gitudloan mao ang sentro sa imong katuyoan. Tabangi sila nga makasabot nga aron mosarang alang sa bunyag, kinahanglan ilang matuman ang mga kondisyon nga anaa sa Doktrina ug mga Pakigsaad 20:37.
Base sa imong pagtuon sa mga kasulatan sa ibabaw, paghimo og duha ka sinulat nga mga lista:
Ang kwalipikasyon alang sa bunyag
Ang mga pakigsaad nga himoon atol sa bunyag
Hisgoti uban sa imong kompanyon kon unsaon pagtudlo niini ngadto sa uban.
Kompirmasyon ug ang Gasa sa Espiritu Santo
Ang bunyag moabot sa duha ka bahin: bunyag sa tubig ug bunyag sa Espiritu. Human kita bunyagi pinaagi sa tubig, ang bunyag nakompleto sa dihang kita gikompirmahan pinaagi sa pagpandong sa mga kamot sa usa ka tawo kinsa adunay awtoridad gikan sa Dios. Pinaagi sa kompirmasyon kita makadawat sa gasa sa Espiritu Santo ug kapasayloan sa atong mga sala.
Si Propeta Joseph Smith nagtudlo, “Ang bunyag pinaagi sa tubig katunga lamang sa bunyag, ug walay bili kon wala ang laing katunga—kana mao, ang bunyag sa Espiritu Santo” (Mga Pagtulun-an sa mga Presidente sa Simbahan: Joseph Smith [2007], 112).
Nagtudlo dayon siya nga “ang tanan nga katawhan … kinahanglan matawo pag-usab; oo, matawo sa Dios, mausab gikan sa ilang kalibutanon ug napukan nga kahimtang, ngadto sa usa ka kahimtang sa pagkamatarong, ingon nga natubos sa Dios, nahimo nga iyang anak nga mga lalaki ug anak nga mga babaye; ug sa ingon sila nahimo nga bag-o nga mga linalang” (Mosiah 27:24–26).
Alang sa mahinulsolon, ang bunyag sa tubig ug sa Espiritu mao ang espirituhanon nga pagpakatawo pag-usab.
Pagtuon sa Kasulatan
Unsa ang pipila ka panalangin sa pagbaton sa gasa sa Espiritu Santo?
Ang pagsunod ni Jesukristo mao ang tibuok kinabuhi nga pasalig. Kita molahutay hangtod sa kataposan samtang kita magpadayon sa pagpakita og hugot nga pagtuo diha ni Kristo, maghinulsol kada adlaw, modawat sa tanang ordinansa ug mga pakigsaad sa ebanghelyo, motuman niadto nga mga pakigsaad, ug magbaton sa pakig-uban sa Espiritu Santo. Kini naglakip sa pagbag-o sa mga pakigsaad nga atong gihimo pinaagi pag-ambit sa sakramento.
Imahe
The Lord Is My Shepherd [Ang Ginoo Mao ang Akong Magbalantay], ni Yongsung Kim
The Lord Is My Shepherd [Ang Ginoo Ang Akong Magbalantay], ni Yongsung Kim. Hulagway pinaagi sa maayong kabubut-on sa Havenlight.
Ang Ebanghelyo—Mao ang Dalan sa Langitnong Amahan sa atong Pagbalik ngadto Kaniya
Ang ebanghelyo ni Jesukristo makausab kon sa unsang paagi kita nagpakabuhi ug kon kinsa kita mamahimo sa umaabot. Kini nga mga baroganan dili lang mga lakang nga atong masinati sa usa ka higayon sa atong mga kinabuhi. Kon atoa kining balik-balikon sa tibuok kinabuhi, kini makadala kanato nga mas mapaduol ngadto sa Dios ug mamahimong mag-anam ka magantihon nga sundanan sa pagpakabuhi. Makahatag kini og kalinaw, pagkaayo, ug pagpasaylo. Kini usab motino sa dalan nga gihatag sa Langitnong Amahan alang kanato aron makabaton og kinabuhi nga dayon uban Kaniya.
Ang ebanghelyo ni Jesukristo mogiya kon unsaon nimo pagtrabaho isip usa ka misyonaryo. Kini nakatutok usab sa imong mga paningkamot. Motabang sa mga tawo nga makaangkon og hugot nga pagtuo diha ni Jesukristo ngadto sa paghinulsol (tan-awa sa Alma 34:15–17). Motudlo ug mopamatuod nga ang kahingpitan sa ebanghelyo ni Jesukristo ug ang awtoridad sa pagkapari gipahiuli na. Imbitara ang mga tawo nga magpabunyag ug magpakabuhi pinaagi sa mga pagtulon-an sa Manluluwas.
Ang Ebanghelyo ni Jesukristo Nagpanalangin sa Tanang Anak sa Dios
Ang ebanghelyo ni Jesukristo alang sa tanang anak sa Dios. Ang mga kasulatan nagtudlo nga “ang tanan managsama” ngadto sa Dios. Siya nag-imbitar sa tanan sa “pagduol ngadto kaniya ug sa pag-ambit sa iyang kaayo; ug siya wala maglimod kang bisan kinsa nga moduol ngadto kaniya” (2 Nephi 26:33).
Ang ebanghelyo mopanalangin kanato tibuok natong mortal nga mga kinabuhi ug sa tibuok kahangtoran. Kita lagmit magmalipayon—isip mga indibidwal ug isip mga pamilya—kon kita magsunod sa mga pagtulon-an ni Jesukristo (tan-awa sa Mosiah 2:41; “Ang Pamilya: Usa ka Pamahayag ngadto sa Kalibotan,” ChurchofJesusChrist.org). Ang pagsunod sa ebanghelyo makapadako sa atong kalipay, makapadasig sa atong mga lihok, ug makapalambo sa atong mga relasyon.
Usa sa labing mahinungdanon nga mga mensahe sa gipahiuli nga ebanghelyo mao nga kitang tanan kabahin sa pamilya sa Dios. Kita ang Iyang pinalangga nga mga anak nga lalaki ug mga anak nga babaye. Bisan unsa pa ang sitwasyon sa atong pamilya dinhi sa kalibotan, ang matag usa kanato usa ka sakop sa pamilya sa Dios.
Laing mahinungdanon nga bahin sa atong mensahe mao nga ang mga pamilya mahimong mahiusa alang sa kahangtoran. Ang pamilya gi-orden sa Dios. Ang mga propeta sa ulahing mga adlaw nagtudlo:
“Ang balaan nga plano sa kalipay [sa Langitnong Amahan] makahimo sa mga relasyon sa pamilya nga magpadayon human sa kamatayon. Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangtoran” (“Ang Pamilya: Usa ka Pamahayag ngadto sa Kalibotan”).
Daghang tawo adunay limitado nga mga oportunidad alang sa kaminyoon o alang sa mahigugmaong mga relasyon sa pamilya. Daghan ang nakasinati og diborsiyo ug uban pang lisod nga mga kahimtang sa pamilya. Apan, ang ebanghelyo indibidwal nga mopanalangin kanato bisan pa sa kahimtang sa atong pamilya. Kon kita magmatinud-anon, ang Dios mohatag og usa ka paagi alang kanato sa pagbaton og mga panalangin sa mahigugmaon nga mga pamilya, niini man nga kinabuhi o sa kinabuhi nga umaabot (tan-awa sa Mosiah 2:41).
Ang Mensahe sa Pagpahiuli: Ang Pundasyon sa Hugot nga Pagtuo
Bisan asa ka moserbisyo o kon si kinsa ang imong tudloan, isentro ang imong pagtudlo diha sa Pagpahiuli sa Iyang ebanghelyo. Samtang ikaw magtuon sa doktrina sa mga leksiyon sa misyonaryo, imong makita nga kita adunay usa ka mensahe: Si Jesus mao ang Kristo, ang atong Manluluwas ug Manunubos. Pinaagi sa moderno nga propeta, ang Langitnong Amahan mipahiuli sa kahibalo mahitungod sa Iyang plano alang sa atong kaluwasan. Kini nga plano nakasentro diha ni Jesukristo. Pinaagi sa Iyang maulaon nga sakripisyo, ang Manluluwas naghimo niining posible alang kanatong tanan nga mahimong maluwas gikan sa sala ug kamatayon ug makabalik ngadto sa Langitnong Amahan.
Tabangi ang mga tawo nga imong gitudloan nga makasabot sa mosunod:
Ang Dios mao ang atong tinuod nga Amahan sa Langit. Siya hingpit nga nahigugma kanato. Ang matag tawo sa kalibotan anak sa Dios ug sakop sa Iyang pamilya.
Ang Langitnong Amahan naghatag og usa ka plano alang kanato aron makadawat og pagka-imortal ug kinabuhi nga dayon, nga mao ang Iyang labing talagsaon nga mga panalangin (tan-awa sa Moises 1:39). Kita mianhi sa yuta aron makat-on, molambo, ug mangandam alang sa kahingpitan sa Iyang mga panalangin.
Isip kabahin sa Iyang plano, ang Langitnong Amahan naghatag og mga sugo sa paggiya kanato atol niining kinabuhia ug sa pagtabang kanato nga makabalik ngadto Kaniya (tan-awa, pananglitan sa, Exodo 20:3–17).
Niini nga kinabuhi, kitang tanan makasala, ug kitang tanan mamatay. Tungod sa gugma sa Langitnong Amahan alang kanato, Siya mipadala sa Iyang Anak, si Jesukristo, sa pagtubos kanato gikan sa sala ug kamatayon.
Tungod sa maulaon nga sakripisyo ni Jesus, kita mahimong malimpyohan sa atong mga sala kon kita maghinulsol ug mabunyagan ug makompirmahan. Kini makahatag kanato og kalinaw ug makapahimo kini kanato nga makabalik ngadto sa presensya sa Dios ug makadawat og kahingpitan sa kalipay.
Tungod sa Pagkabanhaw ni Jesus, kitang tanan mabanhaw human kita mamatay. Kini nagpasabot nga ang matag espiritu ug lawas sa tawo mahiusa pag-usab ug mabuhi hangtod sa kahangtoran.
Sa tibuok biblikanhon nga kasaysayan, ang Ginoo mipadayag sa Iyang ebanghelyo ug miorganisar sa Iyang Simbahan pinaagi sa mga propeta. Gibalik-balik, kadaghanan sa mga tawo misalikway niini. Ang nagbalik-balik nga pagbiya sa kamatuoran gikan sa ebanghelyo ug ang panginahanglan sa pagpahiuli niini gisugdan diha sa kapanahonan sa Daang Tugon.
Human sa kamatayon ug Pagkabanhaw sa Manluluwas, ang Iyang mga Apostoles nangulo sa Simbahan sulod sa usa ka panahon. Sa kadugayan, sila namatay, ang awtoridad sa pagkapari nawala, ug dihay laing pagbiya sa kamatuoran gikan sa mga pagtulon-an sa Manluluwas. Giusab sa mga tawo ang doktrina ug mga ordinansa.
Ang ebanghelyo ni Jesukristo gipahiuli sa Langitnong Amahan pinaagi ni Propeta Joseph Smith. Ang Langitnong Amahan ug si Jesukristo mipakita ngadto ni Joseph niadtong tingpamulak sa 1820. Si Joseph Smith sa kaulahian midawat sa awtoridad sa pagkapari aron sa pag-organisar pag-usab sa Simbahan ni Jesukristo dinhi sa yuta.
Itudlo nga ang Simbahan ni Jesukristo dili basta lang lain nga relihiyon. Dili usab kini usa ka simbahan sa mga Amerikano. Hinuon, kini mao ang usa ka pagpahiuli sa “kahingpitan [sa] ebanghelyo” ni Jesukristo (Doktrina ug mga Pakigsaad 1:23). Kini dili na gayod kuhaon pag-usab gikan sa yuta.
Ang Basahon ni Mormon: Lain nga Tugon ni Jesukristo nagsaksi ni Jesukristo ug sa Iyang balaanong misyon isip ang Manluluwas sa kalibotan. Kini usab usa ka gamhanang saksi nga si Jesukristo mipahiuli sa Iyang ebanghelyo ug sa Simbahan pinaagi ni Propeta Joseph Smith. Imbitara ug tabangi ang mga tawo sa pagbasa sa Basahon ni Mormon ug sa pag-ampo kabahin sa mensahe niini.
Salig sa talagsaon nga saad nga anaa sa Moroni 10:3–5. Awhaga ang mga tawo sa pagpangutana sa Dios sa sinsero nga paagi ug uban sa tinuod nga katuyoan kon ang Basahon ni Mormon mao ba ang pulong sa Dios. Ang pag-ampo uban sa tinuod nga katuyoan nagpasabot sa pagkaandam sa pagbuhat sa tubag nga moabot nga naggikan sa pagsaksi sa Espiritu Santo. Kana nga pagsaksi mamahimo nga pundasyon sa hugot nga pagtuo sa usa ka tawo nga si Kristo mipahiuli sa Iyang Simbahan. Tabangi kadtong imong gitudloan sa pagtinguha nianang espirituhanon nga kompirmasyon.
Pagtuon sa Kasulatan
Unsaon nimo sa paggamit ang Basahon ni Mormon sa misyonaryo nga buhat?
Tan-awa usab sa Isangyaw ang Akong Ebanghelyo, kapitulo 5
Personal nga Pagtuon
Paghunahuna nga ikaw magsulat og usa ka parapo mahitungod sa mensahe sa Pagpahiuli diha sa social media o alang sa usa ka lokal nga pamantalaan. Sa imong journal sa pagtuon, pagsulat og usa ka ulohan nga maghulagway sa sentro nga mensahe. Dayon irekord ang imong mga hunahuna ug mga pagbati mahitungod niini nga mensahe. Ilakip kon sa unsang paagi nga ang pagsabot niini og maayo nakausab sa paagi sa imong pagpakabuhi ug sa paagi sa imong panglantaw sa kalibotan sa imong palibot.
Moestablisar ug Molig-on sa Simbahan
Sa dihang gipahiuli ni Jesukristo ang Iyang Simbahan, Siya mimando ni Propeta Joseph Smith ug sa uban nga “motukod” niini ug sa “pagtukod [niini]” (Doktrina ug mga Pakigsaad 31:7; 39:13). Ang Simbahan maestablisar ug malig-on kon ang mga tawo nga adunay mga pagpamatuod nabunyagan ug nakompirmahan, motuman sa ilang mga pakigsaad, ug mag-andam sa pag-adto sa templo, ug motabang sa pagpalig-on sa ilang ward o branch.
Imahe
tawo nga nag-ampo
Isip usa ka misyonaryo, ikaw motabang sa pag-establisar ug sa paglig-on sa Simbahan sa Manluluwas. Adunay daghang paagi nga ikaw makabuhat niini. Ikaw makasuporta sa mga miyembro samtang sila mopakigbahin sa ebanghelyo pinaagi sa mga baroganan sa paghigugma, pagpakigbahin ug pagdapit (tan-awa sa Kinatibuk-ang Tamdanan nga Basahon, 23.1). Ikaw makatabang sa mga tawo nga madawat ang bunyag ug molambo diha sa ilang hugot nga pagtuo. Ikaw makatabang sa bag-ong mga miyembro nga mopahiangay sa ilang bag-o nga kinabuhi ug mopadayon sa paglambo sa espirituhanong paagi. Ikaw makatabang usab sa mibalik nga mga miyembro nga molig-on ang ilang pagtuo diha ni Jesukristo.
Ang bag-o ug mibalik nga mga miyembro molambo diha sa pagpamatuod ug hugot nga pagtuo kon ilang masinati ang ebanghelyo nga naglihok diha sa ilang mga kinabuhi. Aron makatabang nga mahitabo kini, importante nga sila:
Makabaton og mga higala kinsa mga miyembro sa Simbahan.
Nahatagan og responsibilidad diha sa Simbahan.
Giamuma pinaagi sa pulong sa Dios.
(Tan-awa sa Gordon B. Hinckley, “Converts and Young Men,” Ensign, Mayo 1997, 47.)
Ang mga misyonaryo, lokal nga mga lider, ug uban nga mga miyembro sa Simbahan kinahanglang malipayon nga modawat sa oportunidad sa pag-amuma ug pagpalig-on sa bag-o ug mibalik nga mga miyembro. Kini nga serbisyo makatabang aron “pag-agak kanila sa matarung nga dalan” (Moroni 6:4).
Lakaw sa Paghimo og mga Kaayohan
Atol sa Iyang mortal nga pagpangalagad, ang Manluluwas miserbisyo sa uban. Nagpangadto-adto Siya sa “paghimo og mga kaayohan” ug “nagsangyaw sa ebanghelyo”(Mga Buhat 10:38; Mateo 4:23). Samtang ikaw mosunod sa Iyang ehemplo, imong makaplagan ang mga tawo nga imong maserbisyohan ug kinsa modawat kanimo.
Pinaagi sa pagserbisyo, imong gituman ang duha ka dakong mga sugo nga higugmaon ang Dios ug higugmaon ang imong silingan (tan-awa sa Mateo 22:36–40; 25:40; Mosiah 2:17). Pinaagi sa pagserbisyo, ikaw ug ang uban mahimong magkapundok diha sa gamhanan ug makadasig nga paagi.
Isip usa ka misyonaryo, ikaw mohatag og giplano nga serbisyo matag semana (tan-awa sa Sumbanan sa Misyonaryo, 2.7 ug 7.2, alang sa impormasyon ug mga lagda). Ubos sa direksiyon sa imong presidente sa misyon, ikaw mahimong makakaplag og mga oportunidad sa pagserbisyo diha sa komunidad pinaagi sa JustServe (diin kini giaprobahan) ug sa mga paningkamot sa Simbahan sa pagresponde sa makitawhanon ug katalagman.
Sa tibuok adlaw, pag-ampo ug pangita og wala giplano nga mga oportunidad sa pagbuhat og mga kaayohan. Paminaw sa Espiritu aron maila ang mga okasyon alang sa ginagmay nga mga buhat sa pagkamabination nga imong matanyag.
Imahe
Presidente Gordon B. Hinckley
“Gusto ba kamo nga magmalipayon? Kalimti ang inyong kaugalingon ug ipahinungod ang inyong kaugalingon niining halangdong buhat. Paningkamot sa pagtabang sa mga tawo. … Palamboa ang inyong mga kaugalingon ug tabangi ang mga tuhod nga nagluya, ipataas ang mga bukton nga nagbitay. Sunda ang ebanghelyo ni Jesukristo” (Gordon B. Hinckley, Mga Pagtulun-an sa mga Presidente sa Simbahan: Gordon B. Hinckley [2016], 245).
Pagtuon sa Kasulatan
Unsa man ang papel sa pagserbisyo diha sa kinabuhi sa Manluluwas?
Ang imong kalamposan isip usa ka misyonaryo matino labing una pinaagi sa imong tinguha ug pasalig sa pagpangita, pagtudlo, pagbunyag, ug pagkompirma sa mga kinabig ug sa pagtabang kanila nga mamahimong matinud-anon nga mga disipulo ni Kristo ug mga miyembro sa Iyang Simbahan. (tan-awa sa Alma 41:3).
Ang imong kalamposan wala gitino pinaagi kon unsa kadaghan ang mga tawo nga imong natudloan o natabangan nga mabunyagan. Wala usab kini gitino pinaagi sa paghupot og mga posisyon sa pagpangulo.
Ang imong kalamposan wala magdepende kon sa unsang paagi ang uban mopili sa pagtubag kanimo, ngadto sa imong mga pagdapit, o ngadto sa imong sinsero nga mga buhat sa pagkamabination. Ang mga tawo adunay kabubut-on sa pagpili kon modawat ba sa mensahe sa ebanghelyo o dili. Ang imong responsibilidad mao ang pagtudlo sa klaro ug sa gamhanang paagi aron sila makahimo og maalam nga pagpili nga mopanalangin kanila.
Hunahunaa ang sambingay sa Manluluwas kabahin sa mga talanton sa Mateo 25:14–28. Ang agalon, kinsa nagrepresentar sa Ginoo, midayeg sa duha sa Iyang matinud-anon nga mga sulugoon bisan kon ang gidak-on sa ilang mga halad managlahi (tan-awa sa Mateo 25:21, 23). Siya mihatag usab kanilang duha sa samang ganti, nagdapit kanila sa pagsulod “duyog sa kalipay sa imong agalon” tungod kay ilang gipadako ang unsay nahatag kanila.
Ang Dios mihatag kaninyo og mga talento ug mga gasa aron gamiton diha sa pagserbisyo Kaniya. Ang inyong mga talento ug mga gasa managlahi kaysa niadtong anaa sa uban. Ilha nga ang tanan niini importante, lakip na niadtong dili kaayo makita. Samtang imong ipahinungod ang imong mga talento ug mga gasa ngadto Kaniya, Siya mopadako niini ug mobuhat og mga milagro ngadto sa unsay imong ikatanyag.
Likayi ang pagtandi sa imong kaugalingon ngadto sa ubang mga misyonaryo ug sa pagsukod sa mga resulta sa imong mga paningkamot ngadto sa ilaha. Ang pagtandi kasagaran mosangpot ngadto sa negatibo nga sangpotanan, sama sa pagkawala sa kadasig o garbo. Ang pagtandi kasagaran makapahisalaag usab. Unsay gusto sa Ginoo mao ang imong labing maayo nga paningkamot—aron nga ikaw “moalagad kaniya sa tibuok [nimong] kasingkasing, gahom, hunahuna ug kusog” (Doktrina ug mga Pakigsaad 4:2).
Tingali maguol ka kon ang mga tawo dili pa modawat sa ebanghelyo. Usahay mahimong mawad-an ka og kadasig. Bisan ang bantogan nga mga misyonaryo ug mga propeta diha sa mga kasulatan usahay mibati nga nawad-an og kadasig (tan-awa sa 2 Nephi 4:17–19; Alma 26:27). Sa ingon nga mga panahon, sunda ang ehemplo ni Nephi pinaagi sa pagdangop ngadto sa Ginoo, nga mobutang sa imong pagsalig diha Kaniya, mag-ampo alang sa kalig-on, ug hinumdoman ang maayong mga butang nga Iyang nabuhat alang kanimo (tan-awa sa 2 Nephi 4:16–35).
Imahe
duha ka misyonaryo nga nag-ampo
Kon ikaw modangop ngadto sa Ginoo sa lisod nga mga panahon, Siya misaad nga, “Lig-onon ko ikaw ug tabangan ko ikaw, ituboy ko ikaw.” (Isaias 41:10). Pinaagi sa pagpakita og hugot nga pagtuo diha ni Kristo, ikaw makakaplag og kalinaw ug kasiguroan mahitungod sa imong mga paningkamot. Ang hugot nga pagtuo motabang kanimo nga mopadayon sa unahan ug magpadayon sa matarong nga mga tinguha.
Magpabilin nga nakatutok sa imong pasalig ngadto ni Kristo ug sa imong misyonaryo nga katuyoan—dili sa panggawas nga mga resulta. Kini nga mga resulta kasagaran dili diha-diha dayon makita. Sa samang higayon, ipabilin ang imong mga gilaoman nga taas dili igsapayan sa mga hagit nga imong giatubang. Ang taas nga mga gilaoman mopausbaw sa imong pagka-epektibo, sa imong tinguha, ug sa imong abilidad sa pagsunod sa Espiritu.
Pipila sa mga paagi nga ikaw makatimbang-timbang sa imong pasalig ngadto sa Ginoo ug sa imong paningkamot nga magmalamposon nga misyonaryo gilatid sa ubos.
Tinguhaa nga mahimong usa ka disipulo ni Jesukristo, pagkat-on diha Kaniya ug pagpalambo sa hinay-hinay (tan-awa sa Juan 8:31; 2 Nephi 28:30).
Higugmaa ang mga tawo sa bug-os nga paagi ug buhata ang imong labing maayo sa matag adlaw aron makadala og mga kalag ngadto ni Kristo (tan-awa sa 1 Mga Taga-Corinto 13; Moroni 7:45–48).
Imbitara ug tabangi ang mga tawo sa paghimo ug pagtuman sa mga pasalig nga makapalig-on sa ilang pagtuo diha sa Manluluwas.
Magpakabuhi sa ingon nga ang Espiritu makagiya kanimo kon asa moadto, unsa ang buhaton, ug unsa ang isulti (tan-awa sa Doktrina ug mga Pakigsaad 18:18; 42:14).
Lakaw sa paghimo og mga kaayohan ug sa pagserbisyo sa mga tawo sa matag oportunidad, kon sila modawat man sa inyong mensahe o dili (tan-awa sa Mga Buhat 10:38).
Kon imong gibuhat ang imong labing maayo, tingali ikaw may mga kasagmuyo gihapon, apan ikaw dili masagmuyo sa imong kaugalingon. Ikaw makabati og kaseguroan nga ang Ginoo nahimuot kon imong mabati ang Espiritu nga naglihok pinaagi kanimo.
Pagtuon sa Kasulatan
Unsay bation sa mga sulugoon sa Ginoo mahitungod sa buhat? Sa unsang paagi ang mga sulugoon sa Ginoo maka-impluwensya niadtong ilang alagaran? Unsay imong gibati mahitungod sa buhat?
Basaha ang Helaman 10:1–5 ug 3 Nephi 7:17–18. Unsa man ang gibati sa Ginoo kabahin niini nga mga misyonaryo ug sa ilang pagserbisyo?
Hunahunaa ang misyonaryo nga mga paningkamot ni Abinadi ug ni Ammon (tan-awa sa Mosiah 11–18; Alma 17–20; 23–24). Ngano kaha nga ang duha ka misyonaryo gidawat sa Ginoo bisan og ang dihadiha nga resulta sa ilang mga paningkamot managlahi?
Irekord ang unsay imong nakat-onan diha sa imong journal sa pagtuon.
Ikonsiderar ang mga panghitabo sa imong kinabuhi nga nakapalig-on sa imong pagpamatuod kabahin ni Joseph Smith ug sa Pagpahiuli. Irekord ang imong mga impresyon.
Pagtuon uban sa Kompanyon ug Panagbaylo sa Kompanyon
Pagpili og usa sa mosunod nga maayo nga mga misyonaryo, ug basaha ang mga kasulatan nga gilista. Samtang ikaw magbasa, hisgoti kon giunsa niining mao nga misyonaryo (1) pagsabot ug pagpasalig sa iyang kaugalingon sa iyang tawag, (2) pagpakita sa iyang kinaiya ug tinguha alang sa buhat, ug (3) pagtabang sa uban nga modawat sa ebanghelyo.
Pagpili og duha ka himno mahitungod sa Pagpahiuli sa ebanghelyo. Basaha o kantaha ang mga himno. Hisgoti ang mga gipasabot sa mga pulong.
Konseho sa District, mga Komperensiya sa Zone, ug Konseho sa Pagpangulo sa Misyon
Imbitara ang duha o tulo ka bag-o nga mga kinabig sa pagpakigbahin sa ilang mga kasinatian sa pagkakabig. Unsa ang ilang gibati mahitungod sa mga misyonaryo? Unsa ang ilang gibati mahitungod sa unsay gitudlo sa mga misyonaryo? Unsay nakatabang nila nga matuman ang mga pasalig? Unsa gayod ang nakapaimpluwensya sa ilang pagkakabig?
Pipila ka adlaw sa dili pa ang miting, sangoni ang pipila ka misyonaryo sa pagpamalandong og pipila ka pinili nga mga pangutana gikan sa “Hunahunaa Kini” nga anaa sa sinugdanan sa kapitulo. Hangyoa ang matag misyonaryo sa pag-andam og duha ngadto sa tulo ka minuto nga pakigpulong kabahin sa gisangon nga pangutana. Atol sa konseho sa district o komperensiya sa zone, imbitara ang mga misyonaryo sa paghatag sa ilang mga pakigpulong. Pagkahuman sa mga pakigpulong, hisgoti kon unsay ilang nakat-onan ug unsaon nila paggamit niini sa ilang misyonaryo nga buhat.
Bahina ang mga misyonaryo ngadto sa upat ka grupo. Hangyoa ang kada grupo sa paglista og daghang kamatuoran kutob sa mahimo, mga pakigsaad, ug mga ordinansa nga gipahiuli ug gipadayag pinaagi ni Propeta Joseph Smith. Ipakigbahin sa matag grupo ang ilang mga lista. Imbitara ang mga misyonaryo sa pagpakigbahin kon sa unsang paagi nga ang bisan unsa sa mga kamatuoran nga gipadayag pinaagi sa Pagpahiuli nakaimpluwensya sa ilang mga kinabuhi.
Hisgoti kon unsa ang gipasabot sa pagkahimong usa ka malamposon nga misyonaryo. Imbitara ang mga misyonaryo aron mohatag og piho nga mga ehemplo.
Mga Lider sa Misyon ug Mga Magtatambag sa Misyon
Atol sa mga interbiyo o diha sa panag-estoryahanay uban sa mga misyonaryo, panagsa mohangyo nila sa pagpakigbahin uban kanimo sa:
Ilang pagpamatuod kabahin ni Jesukristo.
Ilang pagpamatuod mahitungod sa gipahiuli nga ebanghelyo ug sa misyon ni Joseph Smith.
Ilang pagpamatuod mahitungod sa Basahon ni Mormon.
Ilang mga hunahuna kabahin sa ilang katuyoan isip misyonaryo.
Imbitara ang mga misyonaryo sa pagrekord diha sa ilang journal sa pagtuon kon unsa ang ilang gibati nga mao ang pipila sa mga katuyoan sa ilang misyon. Atol sa usa ka interbiyo o sa panag-estoryahanay, hangyoa sila sa pagpakigbahin sa unsay ilang nasulat.
Pagpadala og mga sulat-pahalipay [congratulations] ngadto sa bag-o nga mga miyembro.