“Pasiuna sa Isangyaw ang Akong Ebanghelyo,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Pasiuna,” Isangyaw ang Akong Ebanghelyo

Pasiuna sa Isangyaw ang Akong Ebanghelyo

Ang Ginoo misugo sa Iyang mga sulugoon, “sa pagsangyaw sa akong ebanghelyo pinaagi sa Espiritu, gani ang Maghuhupay gipadala aron sa pagtudlo sa kamatuoran” (Doktrina ug mga Pakigsaad 50:14).

Ang Isangyaw ang Akong Ebanghelyo gidesinyo aron sa pagtabang nimo nga matuman ang imong katuyoan isip usa ka misyonaryo. Kini nagtutok sa mga gikinahanglan sa misyonaryo nga buhat. Kini dili motubag sa matag pangutana o mohatag og direksiyon alang sa matag sitwasyon nga imong masugatan. Apan, usa kini ka importante kaayo nga kapanguhaan aron ikaw molambo sa espirituwal nga gahom ug abilidad. Tun-i ug gamita ang doktrina ug mga baroganan sa ebanghelyo nga makita diha sa mga kasulatan ug niini nga basahon.

Si Juan Bautista nga nagbunyag ni Jesukristo

Ang Isangyaw ang Akong Ebanghelyo giorganisar aron sa pagtabang kanimo sa mosunod nga mga paagi:

Makasabot sa imong katuyoan isip usa ka misyonaryo
- Kapitulo 1: Tumana ang Imong Misyonaryo nga Katuyoan
Magkat-on ug motudlo sa doktrina
- Kapitulo 3: Magtuon ug Motudlo sa Ebanghelyo ni Jesukristo
Motubo diha sa imong espirituwal nga paglambo ug sa personal nga pagkakabig
Palamboa ang imong abilidad sa pag-imbitar ug pagtabang sa mga tawo nga makadawat sa gipahiuli nga ebanghelyo

Tun-i og balik-balik ang mga kapitulo sa tibuok nimong misyon. Timbang-timbanga ang imong buhat. Pagtakda og mga tumong ug paghimo og mga plano sa pagtuman niini. Ang mga misyonaryo kinsa mag-andam sa ilang mga kaugalingon kada adlaw ug makanunayon nga mopalambo makapanalangin sa mga kinabuhi niadtong ilang gitudloan ug giserbisyohan. Sila usab makadawat og mga panalangin sa ilang kaugalingon nga mga kinabuhi.

Mga Oportunidad sa Pagtuon ug Pagkat-on

Ang epektibo nga pagtuon atol sa imong misyon motabang kanimo sa paglig-on sa imong pagpamatuod sa ebanghelyo ug mahimong usa ka mas matinud-anon nga disipulo ni Jesukristo.

Ang pagtuon sa mga kasulatan ug sa Isangyaw ang Akong Ebanghelyo motabang kanimo sa pagtudlo uban ang espirituwal nga gahom. Kini usab motabang kanimo sa paghimo sa imong pagtudlo nga mahinungdanon ngadto sa mga panginahanglan sa mga indibidwal.

Ang importante nga mga oportunidad sa pagtuon ug pagkat-on naglakip sa:

Personal nga pagtuon.
Pagtuon uban sa kompanyon.
Mga panagbaylo og kompanyon.
Mga miting sa konseho sa district.
Mga komperensiya sa zone.
Konseho sa pagpangulo sa misyon (alang sa batan-on nga mga lider sa misyonaryo).

Sa kasagaran nga mga adlaw, ang imong misyonaryo nga eskedyul naglakip og panahon alang sa personal nga pagtuon ug pagtuon uban sa kompanyon. Tan-awa sa Mga Sumbanan sa Misyonaryo alang sa mga Disipulo ni Jesukristo, 2.4, alang sa impormasyon mahitungod sa imong inadlaw nga eskedyul.

Ang unsay imong makat-onan sa personal nga pagtuon motabang kanimo diha sa pagtuon uban sa kompanyon ug sa ubang mga kahigayonan sa pagkat-on nga gilista sa ibabaw. Dinhi niini nga mga kahimtang kamo “motudlo sa usag usa sa doktrina sa gingharian” (Doktrina ug mga Pakigsaad 88:77).

Mga Ideya sa Pagpalambo sa Imong Pagtuon sa Isangyaw ang Akong Ebanghelyo

Ang Isangyaw ang Akong Ebanghelyo naghiusa sa mga kasulatan ug mga baroganan sa ebanghelyo aron sa pagtabang kanimo nga makaila sa Manluluwas ug sa Iyang ebanghelyo. Kini gituyo aron sa pagtabang sa pagpaduol kanimo ngadto sa mga kasulatan ug sa pagpalambo sa imong pagtuon niini. Tun-i ang mga pakisayran sa kasulatan diha sa matag kapitulo sa tibuok nimong misyon.

Ang matag kapitulo sa Isangyaw ang Akong Ebanghelyo naglakip og mga ideya ug mga kalihokan sa pagtabang kanimo sa pagtuon ug paggamit sa unsay imong nakat-onan. Gamita kini diha sa imong personal nga pagtuon ug pagtuon uban sa kompanyon (tan-awa sa Mga Sumbanan sa Misyonaryo, 2.4). Magamit usab nimo kini atol sa mga miting sa konseho sa district ug mga komperensiya sa zone. Ang imong pagtuon mahimong mas epektibo kon mangita ka og mga paagi sa paggamit sa unsay imong nakat-onan.

Makatabang nga adunay usa ka plano alang sa imong personal nga pagtuon. Makahimo ka og imong kaugalingon nga plano nga maghatag og prayoridad sa mga baroganan sa ebanghelyo nga ganahan nimong mas masabtan. Mahimo usab nimong han-ayon ang imong pagtuon base sa mga kapitulo diha sa Isangyaw ang Akong Ebanghelyo. Pananglitan, mahimo nimong gamiton ang mga leksiyon diha sa kapitulo 3 aron sa paggiya sa imong pagtuon sa doktrina ug mga baroganan nga imong itudlo. Gikinahanglan nimong mahibaloan gayod kini nga mga leksiyon aron ikaw makatudlo pinaagi sa Espiritu gamit ang imong kaugalingon nga mga pulong.

Paghimo og mubo nga mga sulat samtang ikaw magtuon. Gamit og papel o elektronik nga journal sa pagtuon (sama sa Gospel Library) aron sa pagtabang kanimo sa pagsabot, pagpatin-aw, ug paghinumdom unsa ang imong nakat-onan.

Sugdi ang imong pagtuon pinaagi sa pag-ampo alang sa Espiritu Santo nga motabang kanimo nga makat-on. Siya mohatag og kahibalo, pagsabot, ug kombiksyon nga mopanalangin sa imong kinabuhi ug motugot kanimo sa pagpanalangin sa uban. Ablihi ang imong hunahuna ug kasingkasing ngadto sa mga impresyon ug mga panabot nga imong madawat gikan Kaniya. Ilakip kini nga mga panabot diha sa imong mubo nga mga sulat.

Rebyoha ang imong journal sa pagtuon aron sa paghinumdom og espirituwal nga mga kasinatian, pagtan-aw og bag-o nga mga panabot, ug pag-ila sa imong pag-uswag.

Isangyaw ang Akong Ebanghelyo nga Application

Gamita ang Isangyaw ang Akong Ebanghelyo nga app aron sa pagtabang nimo sa paggamit sa mga baroganan nga imong nakat-onan. Kini nga app anaa sa imong mobile nga device. Kini adunay mga feature sa pagtabang nimo nga mas makatuman sa imong misyonaryo nga katuyoan. Kini nga mga feature naglakip sa:

Impormasyon mahitungod sa mga panginahanglan ug pag-uswag sa mga tawo nga inyong gitudloan.
Usa ka luna aron irekord ang inyong pag-uswag ngadto sa mga tumong sa importante nga mga timailhan.
Usa ka kalendaryo sa pagrekord sa inyong mga plano ug pag-eskedyul og mga kalihokan.
Usa ka mapa sa inyong dapit ug ubang importante nga impormasyon aron sa pagtabang ninyo sa pagtuman sa inyong mga tumong.

Ang Isangyaw ang Akong Ebanghelyo naglakip og daghang ideya alang sa paggamit sa app aron sa pagtabang ninyo sa pagpangita, pagtudlo, ug pagbunyag og mga tawo.

Paggamit sa Isangyaw ang Akong Ebanghelyo sa mga miyembro sa Simbahan

Ang Isangyaw ang Akong Ebanghelyo usa ka bililhon nga kapanguhaan dili lamang alang sa mga misyonaryo apan alang sa tanang miyembro sa Simbahan. Pananglitan, ang pagtuon niini makatabang sa mga miyembro sa:

Pagkat-on ug pagtudlo sa doktrina ni Jesukristo (tun-i ang mga kapitulo 1, 2, 3, ug 10).
Pagtubag sa mga pangutana mahitungod sa ebanghelyo (tun-i ang mga kapitulo 3 ug 5).
Pagsabot pa mahitungod sa pagtinguha ug pagsalig sa Espiritu Santo (tun-i ang kapitulo 4).
Pagsabot sa gahom sa Basahon ni Mormon (tun-i ang kapitulo 5).
Pagtinguha og Kristohanon nga mga hiyas (tun-i ang kapitulo 6).
Pagtuman sa ilang responsibilidad sa pakigsaad sa pagpakigbahin sa ebanghelyo pinaagi sa pagsunod sa mga baroganan sa paghigugma, pagpakigbahin, ug pag-imbitar (tun-i ang mga kapitulo 9 ug 13).
Pag-ugmad og panaghiusa uban sa full-time nga mga misyonaryo (tun-i ang kapitulo 13).

Ang pagtuon sa Isangyaw ang Akong Ebanghelyo—ilabi na sa kapitulo 3—makatabang kaayo sa kabatan-onan ug sa mga senior nga nangandam alang sa misyonaryo nga pagserbisyo.