“Kapitulo 10: Pagtudlo aron Mapalig-on ang Hugot nga Pagtuo diha ni Jesukristo,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Kapitulo 10,” Isangyaw ang Akong Ebanghelyo

Kapitulo 10

Pagtudlo aron Mapalig-on ang Hugot nga Pagtuo diha ni Jesukristo

Hunahunaa Kini

Unsaon nako sa pagtudlo pinaagi sa Espiritu?
Unsaon nako sa pagtudlo gikan sa mga kasulatan?
Unsaon nako sa pagpakigbahin sa akong pagpamatuod kon magtudlo?
Unsaon nako nga makaplano ug makapahiangay sa akong pagtudlo aron matubag ang mga panginahanglan sa mga tawo?
Unsaon nako sa pagpangutana og mas maayo nga mga pangutana ug mahimong usa ka mas maayong tigpaminaw?
Unsaon nako sa pagtabang ang mga tawo nga makakaplag og mga tubag sa ilang mga pangutana ug makadawat og giya ug kalig-on?

Ikaw gitawag sa pagtudlo sa gipahiuli nga ebanghelyo ni Jesukristo ngadto sa daghang tawo kutob sa modawat kanimo. Ang pagtudlo mao ang sentro sa tanang butang nga imong buhaton. Samtang mosalig ka sa Ginoo alang sa tabang, Siya misaad:

“Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libot kaninyo, aron sa pagtabang kaninyo” (Doktrina ug mga Pakigsaad 84:88).

Pag-ampo, pagtuon, ug pagbansay aron molambo ang imong abilidad sa pagtudlo. Gamita ang mga baroganan niining kapitulo ug sa uban nga mga kapitulo niining basahon. Matinguhaon nga mangita sa gasa sa pagtudlo aron ka makapanalangin sa uban ug mohimaya sa Dios. Ang Dios motabang kanimo sa pagtudlo uban sa gahom ug awtoridad samtang ikaw makugihon nga magtinguha Kaniya ug magkat-on sa Iyang mga pulong.

Paningkamot sa Pagtudlo sama sa Gitudlo sa Manluluwas

Atol sa Iyang yutan-on nga pangalagad, si Jesus “[naglibot] … nagtudlo … , nagwali … , ug nag-ayo” (Mateo 4:23). Siya nagtudlo diha sa daghang mga sitwasyon—sa sinagoga, sa mga panimalay, ug sa kadalanan. Siya nagtudlo diha sa dako nga panagpundok ug sa pribado nga mga panag-istoryahanay. Pipila sa Iyang labing gamhanan nga pakighinabi mubo ra kaayo o anaa sa dili kasagaran nga mga sitwasyon. Siya nagtudlo pinaagi sa Iyang mga lihok ingon man sa Iyang mga pulong.

Ang Manluluwas nagtudlo sa matag tawo sumala sa iyang talagsaon nga mga panginahanglan. Pananglitan, sa dihang mialagad sa usa ka tawo nga paralitiko, Siya mipasaylo sa iyang mga sala ug miayo kaniya (tan-awa sa Marcos 2:1–12). Sa dihang nangalagad ngadto sa usa ka babaye nga nakahimo sa pagpanapaw, Siya mipanalipod kaniya ug miimbitar kaniya nga dili na magpakasala pa (tan-awa sa Juan 8:2–11). Sa dihang nakig-estorya sa usa ka adunahan nga lalaki nga nagtinguha og kinabuhi nga dayon, Siya “mitutok kaniya uban sa gugma” bisan pa man sa pagdumili sa batan-ong lalaki sa pagdawat sa Iyang imbitasyon sa pagsunod Kaniya (Marcos 10:21; tan-awa sa mga bersikulo 17–21).

Kini makapalambo sa imong pagtudlo pinaagi sa pagkat-on kon giunsa sa Manluluwas pagtudlo. Pananglitan, Siya nahigugma sa Amahan ug niadtong Iyang gitudloan. Siya nagmainampuon. Siya nagtudlo gikan sa mga kasulatan. Siya andam sa espirituhanong paagi. Siya nangutana og dinasig nga mga pangutana. Siya miimbitar sa mga tawo sa paglihok diha sa hugot nga pagtuo. Siya mipahisama sa baroganan sa ebanghelyo ngadto sa matag adlaw nga kinabuhi.

Ang pagtinguha sa pagtudlo sama sa pagtudlo sa Manluluwas mao ang usa ka paningkamot sa tibuok kinabuhi. Kini moabot kanimo nga pagtulon-an human sa usa ka pagtulon-an samtang ikaw magsunod Kaniya (tan-awa sa 2 Nephi 28:30; Ether 12:41).

“Pagbaton sa Akong Pulong”

Sa pagtudlo sa ebanghelyo ni Jesukristo, ikaw kinahanglang masayod sa sukaranan nga doktrina ug mga baroganan. Nagkinahanglan usab ka og espirituhanong kahibalo ug kompirmasyon sa mga kamatuoran sa ebanghelyo. Ang Ginoo miingon, “Ayaw pagtinguha sa pagpahayag sa akong pulong, apan unaha ang pagbaton sa akong pulong.”

Ang “pagbaton” sa pulong sa Ginoo nagpasabot sa pagtuon niini ug ipatuhop kini pag-ayo sa imong kasingkasing. Sa imong pagpaningkamot niini, Siya misaad, “Unya ang imong dila makasulti; unya, kon ikaw magtinguha, ikaw makabaton sa akong Espiritu ug sa akong pulong, oo, ang gahom sa Dios ngadto sa pagkabig sa mga tawo” (Doktrina ug mga Pakigsaad 11:21).

Ang Ginoo nag-ingon usab nga “mahala sa kanunay diha sa inyong mga hunahuna ang mga pulong sa kinabuhi” (Doktrina ug mga Pakigsaad 84: 85). Ang pagmahal sa mga pulong sa Ginoo mopalambo sa imong kahibalo ug molig-on sa imong pagpamatuod. Ang imong tinguha ug abilidad sa pagtudlo sa ebanghelyo molambo usab. (Tan-awa sa Jacob 4:6–7; Alma 32:27–42; 36:26; 37:8–9.)

Sa mainampoon nga paagi pagbaton ug mahala ang mga pulong sa Ginoo pinaagi sa pagtuon sa mga kasulatan, sa mga pulong sa buhi nga mga propeta, ug sa mga leksiyon sa kapitulo 3.

Pagtudlo pinaagi sa Espiritu

Ang ebanghelyo ni Jesukristo mao “ang gahom sa Dios aron pagluwas sa tanan nga motuo” (Mga Taga-Roma 1:16). Tungod niana nga rason, ang mensahe sa Pagpahiuli sa ebanghelyo gikinahanglan nga matudlo pinaagi sa balaan nga gahom—ang gahom sa Espiritu Santo.

Importante nga ikaw makaugmad og mga kahanas sa pagtudlo. Importante usab nga ikaw makakat-on sa doktrina ug mga baroganan nga imong itudlo. Apan, kon magtudlo og espirituhanong mga kamatuoran, ikaw dili lamang magsalig sa imong kaugalingong mga abilidad ug kahibalo.

Ang espirituhanong mga kamatuoran itudlo pinaagi sa gahom sa Espiritu Santo. Ang Ginoo nag-ingon, “Ang Espiritu ihatag nganha kaninyo pinaagi sa pag-ampo diha sa hugot nga pagtuo; ug kon kamo dili makadawat sa Espiritu kamo dili motudlo” (Doktrina ug mga Pakigsaad 42:14; tan-awa usab sa Doktrina ug mga Pakigsaad 50:13–14, 17–22).

Unsay Ipasabot sa Pagtudlo pinaagi sa Espiritu

Kon ikaw magtudlo pinaagi sa Espiritu, mag-ampo ka nga makabaton sa gahom sa Espiritu Santo sa imong pagtudlo. Ikaw mag-ampo usab nga ang mga tawo modawat sa mga kamatuoran pinaagi sa Espiritu. Ang mga tawo mahimong maagni sa pipila ka kamatuoran, apan aron makabig, sila kinahanglan nga makabaton og mga kasinatian uban sa Espiritu (tan-awa sa Doktrina ug mga Pakigsaad 8:2–3).

Andama ang imong kaugalingon nga mamahimong usa ka instrumento diin pinaagi kanimo ang Espiritu makatudlo. Hunahunaa ang Espiritu Santo isip imong kompanyon sa pagtudlo.

Salig sa Espiritu nga motabang kanimo nga makahibalo kon unsa ang isulti. Siya modala sa doktrina nga imong gitun-an nganha sa imong panumdoman. Siya motabang nimo sa pagplano ug pagpahiangay kon unsa ang imong itudlo sumala sa mga panginahanglan sa tawo.

Kon ikaw magtudlo pinaagi sa Espiritu, Siya modala sa imong mensahe ngadto sa kasingkasing sa mga tawo. Siya mokompirmar sa imong mensahe kon ikaw mohatag sa imong pagpamatuod. Ikaw ug kadtong modawat sa unsay imong gitudlo pinaagi sa Espiritu makadawat og kaayohan, makasabot sa usag usa, ug maglipay nga maghiusa. (Tan-awa sa 2 Nephi 33:1; Doktrina ug mga Pakigsaad 50:13–22.)

“Ang Espiritu mao ang labing importante nga nag-inusarang elemento niini nga buhat. Inubanan sa Espiritu nga nagpalambo sa imong tawag, makahimo ka og mga milagro alang sa Ginoo diha sa natad sa misyon. Kon wala ang Espiritu, ikaw dili gayod molampos bisan pa sa imong talento ug abilidad” (Ezra Taft Benson, seminar alang sa bag-ong mga presidente sa misyon, Hunyo 25, 1986).

Ang Saad sa Imong Tawag

Ikaw gitawag ug gi-set apart “sa pagsangyaw sa akong ebanghelyo pinaagi sa Espiritu, gani ang Maghuhupay nga gipadala aron sa pagtudlo sa kamatuoran” (Doktrina ug mga Pakigsaad 50:14). Usahay ikaw mahimong mobati og kakulba o kakulang. Tingali ikaw mabalaka nga dili igo ang imong kahibalo o nga ikaw walay igong kasinatian.

Apan ang imong Langitnong Amahan, kinsa hingpit nga nakaila kanimo, mitawag kanimo tungod sa unsay imong matanyag isip usa ka mapasaligon nga sumusunod ni Jesukristo. Siya dili mosalikway kanimo. Salig nga ang Espiritu mopalambo sa imong mga abilidad ug motudlo sa kamatuoran ngadto niadtong andam nga modawat.

Si Elder Neil L. Andersen miingon: “Samtang ako namalandong sa hagit sa misyon, ako mibati og pagkadili gayod angayan ug pagkadili andam. Akong nahinumdoman nga nag-ampo, ‘Langitnong Amahan, unsaon man nako sa pagserbisyo sa misyon nga ang akong nahibaloan gamay ra man kaayo?’ Ako mituo sa Simbahan, apan akong gibati nga ang akong espirituhanong kahibalo limitado kaayo. Samtang ako nag-ampo, ang pagbati miabot: ‘Ikaw wala masayod sa tanan, apan ikaw igo nga nasayod!’ Kana nga binalik nga kasegurohan mihatag kanako og kadasig sa paghimo sa sunod nga lakang ngadto sa natad sa misyon” (“Kamo Igo nga Nasayod,” Liahona, Nob. 2008, 13).

Imbitara ang Espiritu sa Imong Pagsugod sa Pagtudlo

Ang unang pipila ka gutlo uban sa mga tawo importante kaayo. Magpakatinuod ug magmamatinahoron. Pagpakita og sinsero nga kaikag ug gugma. Tinguhaa nga maangkon ang ilang pagsalig. Usa sa paagi nga maangkon ang pagsalig mao ang higayon nga ang tawo mobati sa Espiritu uban kanimo.

Pangutana og pipila ka yano nga pangutana aron imong masabtan ang ilang kaagi ug ang ilang mga gilaoman mahitungod sa inyong pagbisita. Paminaw og maayo.

Sa dili pa kamo magsugod, hangyoa ang tanan kinsa anaa sa pag-apil sa leksiyon. Awhaga sila sa pagtangtang sa mga makabalda aron ang Espiritu sa Ginoo mahimong mabati.

Ipasabot nga gusto ninyo nga magsugod ug motapos sa matag leksiyon pinaagi sa pag-ampo. Motanyag sa paghatag og pangbukas nga pag-ampo. Pag-ampo sa yano ug sinsero nga paagi nga ang Dios mopanalangin sa mga tawo nga imong gitudloan diha sa matag aspeto sa ilang kinabuhi. Pag-ampo nga sila mobati sa kamatuoran sa unsay inyong itudlo. Hinumdomi nga ang “pag-ampo sa [tawo] nga matarong dakog kahimoan” (Santiago 5:16).

Pagbaton og hugot nga pagtuo diha sa makakabig nga gahom sa Espiritu Santo. Sumala sa giya sa Espiritu, ikaw mahimong mopahayag og mga hunahuna sama sa mosunod samtang magsugod kamo sa pagtudlo:

Ang Dios mao ang atong mahigugmaon nga Langitnong Amahan. Kitang tanan managsoon. Gusto Siya nga kita makasinati og hingpit nga kalipay.
Kitang tanan adunay mga hagit ug mga panlimbasog. Bisan unsa pa man ang inyong giagian, si Jesukristo ug ang Iyang mga pagtulon-an makatabang kaninyo. Siya makatabang ninyo nga makaplagan ang kalinaw, paglaom, pagkaayo, ug kalipay. Si Jesukristo makatabang kaninyo nga makabaton og mas dakong kalig-on alang sa mga hagit sa kinabuhi.
Kitang tanan makahimo og mga kasaypanan, nga makamugna og mga pagbati nga sad-an, kaulaw, ug pagbasol. Kini nga mga pagbati mawala lamang kon kita maghinulsol ug magtinguha sa kapasayloan sa Dios. Pinaagi lamang sa Pag-ula ni Jesukristo kita mahimong hingpit nga maayo gikan sa atong mga sala.
Kami ang mahimong giya aron inyong makat-onan ang kamatuoran sa among mensahe alang sa inyong kaugalingon. Kami moimbitar kaninyo sa pagbuhat og pipila ka butang, sama sa pagbasa, pag-ampo, ug pagtambong sa simbahan. Ang among tahas mao ang pagtabang kaninyo sa paglihok niining mga imbitasyon ug mopasabot sa mga panalangin nga inyong madawat. Palihog pangutana.
Kami gitawag pinaagi sa usa ka propeta sa Dios aron mopakigbahin kon unsa ang among nahibaloan. Kami nasayod nga ang among mensahe tinuod.
Kami motudlo kaninyo kon unsaon sa paghimo og mga pakigsaad, o espesyal nga mga saad, uban sa Dios. Kini nga mga pakigsaad mokonektar kaninyo ngadto sa Dios ug motugot kaninyo nga makadawat og kalipay, kalig-on, ug espesyal nga mga saad alang Kaniya.
Kamo makakat-on kon unsaon sa paghimo og mga kausaban sa inyong kinabuhi ug mosunod ni Jesukristo ug sa Iyang mga pagtulon-an. Usa ka mahinungdanon nga pagtulon-an ni Jesukristo, ug ang unang pakigsaad nga atong himoon, mao ang pagsunod sa Iyang ehemplo ug magpabunyag pinaagi sa tukma nga awtoridad (tan-awa sa Juan 3:5; Doktrina ug mga Pakigsaad 22).

Sa dili pa ang leksiyon sa pagtudlo, paghatag og yano nga kinatibuk-ang pagpasabot sa unsay inyong itudlo. Tabangi ang mga tawo nga makita kon sa unsang paagi nga kini may kalabotan ngadto kanila. Pananglitan, mahimong moingon ka, “Ania kami aron ipakigbahin ang mensahe nga si Jesukristo mitukod sa Iyang Simbahan dinhi sa yuta karon ug nagtawag og buhi nga mga propeta aron sa paggiya kanato.” O mahimong moingon ka, “Ania kami aron sa pagtabang kaninyo nga masayod nga ang Dios nahigugma kaninyo ug adunay usa ka plano alang sa inyong kalipay.”

Ang tanang tawo makabenepisyo kon sila modawat ug mosunod sa ebanghelyo ni Jesukristo. Ang Langitnong Amahan mahimong mipanalangin sa mga tawo nga inyong nakit-an uban sa bililhon nga espirituhanong pagpangandam (tan-awa sa Alma 16:16–17).

Ang pag-imbitar sa Espiritu ug ang pagpakigbahin sa kamatuoran diha sa unang panaghimamat makatabang sa mga tawo sa pag-ila kaninyo isip mga sulugoon sa Ginoo.

Personal nga Pagtuon o Pagtuon uban sa Kompanyon

Gamita ang mga sugyot niini nga seksiyon aron sa pagraktis sa lain-laing paagi sa pagsugod sa leksiyon.

Gamita ang mga Kasulatan

Ang mga sumbanang basahon sa Simbahan mao ang inyong nag-unang tinubdan alang sa pagtudlo sa gipahiuli nga ebanghelyo ni Jesukristo. Adunay daghan nga mga rason nganong importante kaayo nga mogamit sa mga kasulatan isip basehanan sa inyong pagtudlo. Pananglitan:

Ang mga kasulatan nagdapit sa Espiritu Santo nganha sa inyong pagtudlo (tan-awa sa Lucas 24:13–32).
Ang mga kasulatan adunay mas gamhanan nga epekto diha sa mga hunahuna sa katawhan kay sa bisan unsa pa (tan-awa sa Alma 31:5).
Ang mga kasulatan motubag sa mahinungdanong mga pangutana sa kinabuhi (tan-awa sa kapitulo 5; tan-awa usab sa 2 Nephi 32:3; Jacob 2:8).
Ang mga kasulatan mohatag og awtoridad ug pagkabalido sa inyong gitudlo.
Ang Ginoo ug ang Iyang mga propeta nagsulti sa pagbuhat sa ingon (tan-awa sa Doktrina ug mga Pakigsaad 42:12, 56–58; 71:1).

Pinaagi sa paggamit sa mga kasulatan diha sa inyong pagtudlo, makatabang kamo sa uban nga makasugod sa pagtuon sa mga kasulatan nga sila ra. Samtang ang inyong gugma alang sa mga kasulatan makita, sila madasig sa pagtuon. Ipakita kon sa unsang paagi nga ang pagtuon sa mga kasulatan makatabang kanila nga makat-on sa ebanghelyo ug mobati sa gugma sa Dios. Paghatag og mga ehemplo kon sa unsang paagi nga ang mga kasulatan makatabang kanila nga makakaplag og mga tubag sa ilang mga pangutana ug makadawat og giya ug kalig-on.

Ipahinungod ang inyong kaugalingon sa pagtuon sa mga kasulatan aron kamo epektibong makatudlo gikan niini (tan-awa sa kapitulo 2). Ang inyong abilidad sa pagtudlo gikan sa mga kasulatan molambo samtang kamo magtuon niini sa matag adlaw, sa personal ug uban sa imong kompanyon.

Tabangi ang mga tawo nga makapalambo og hugot nga pagtuo diha ni Jesukristo pinaagi sa pagtuon sa mga kasulatan, ilabi na sa Basahon ni Mormon. Ang mosunod nga mga sugyot mahimong makatabang.

Pagpaila sa mga Kasulatan

Sa minubo nga paagi ihulagway ang kaagi sa tudling. Ang mosunod nga mga ehemplo magpakita og mga paagi sa pagpaila sa kasulatan:

“Sa kasaysayan ni Joseph Smith, si Joseph nagsulti kanato sa iyang kaugalingong mga pulong unsa ang nahitabo sa iyang pag-adto sa kakahoyan aron sa pag-ampo. Siya miingon, ‘Ako nakakita og usa ka dako nga gilis sa kahayag …’”
“Niini nga tudling ang propeta nga si Alma nagtudlo sa mga tawo nga mga kabos sa pagpakita sa ilang hugot nga pagtuo diha sa pulong sa Dios. Iyang gitandi ang pulong sa Dios ngadto sa usa ka liso nga mahimong itanom diha sa atong mga kasingkasing. Mahimo ba nimong sugdan sa pagbasa ang bersikulo … ?”

Basaha ang Tudling

Basaha og kusog ang mga bersikulo o hangyoa ang usa ka tawo nga inyong gitudloan sa pagbasa og kusog. Magmahimong sensitibo niadtong kinsa maglisod sa pagbasa. Kon ang usa ka tudling lisod nilang masabtan, magbasa uban kanila ug ipasabot kon gikinahanglan. Ipasabot ang lisod nga mga pulong o hugpong sa mga pulong. O hatagi sila og mas sayon nga tudling aron basahon. Imbitara sila sa pagpangita sa piho nga mga punto diha sa tudling.

Gamita ang mga Kasulatan

Si Nephi miingon, “Kay ako mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23). Ang “ipahisama” nagpasabot sa paggamit sa mga kasulatan sa imong kinabuhi.

Ipahisama ang mga kasulatan niadtong inyong gitudloan pinaagi sa pagpakita kon sa unsang paagi nga ang mga estorya ug mga baroganan personal nga may kalabotan ngadto kanila. Pananglitan:

“Sama nimo, ang katawhan ni Alma adunay bug-at nga palas-anon, hapit labaw kay sa ilang maantos. Apan samtang sila mipakita og hugot nga pagtuo ug nag-ampo, ang Dios milig-on kanila aron sila makalahutay sa mga hagit. Dayon Siya mipalingkawas kanila gikan sa ilang mga pagsulay. Sama sa Iyang gibuhat niini nga katawhan, nasayod ko nga ang Dios motabang nimo sa imong mga pagsulay kon kamo …” (Tan-awa sa Mosiah 24.)
“Ang panudlo ni Alma ngadto sa katawhan didto sa katubigan sa Mormon atong magamit karon. John, andam ka ba nga … ?” (Tan-awa sa Mosiah 18.)

Tudloi ang mga tawo kon unsaon nga “ipahisama” ang mga kasulatan diha sa ilang kaugalingon. Ang pagdiskobre sa personal nga mga paggamit makatabang kanila sa paggamit ug pagsinati sa gahom sa pulong sa Dios.

Imbitara ug Tabangi ang mga Tawo sa Pagbasa nga Sila ra

Ang mga tawo nga inyong gitudloan kinahanglan nga mobasa sa mga kasulatan, ilabi na sa Basahon ni Mormon, aron makabaton og usa ka pagpamatuod sa kamatuoran. Pinaagi sa epektibong paggamit sa mga kasulatan diha sa inyong pagtudlo, makatabang kamo sa mga tawo sa pagsugod og tuon sa mga kasulatan nga sila ra.

Pagkahuman sa kada pagbisita, magsugyot og piho nga mga kapitulo o mga bersikulo nga ilang basahon. Pagsugyot og mga pangutana nga ilang hunahunaon samtang sila magbasa. Awhaga sila sa pagtuon sa mga kasulatan sa matag adlaw nga sila ra ug uban sa ilang mga pamilya. Mahimo usab nimong hangyoon ang mga miyembro sa pagbasa uban kanila taliwala sa mga leksiyon.

Sa dili pa magsugod ang sunod nga leksiyon, mag-follow up pinaagi sa paghisgot sa unsay inyong gipabasa sa mga tawo. Kon gikinahanglan, tabangi sila nga makasabot ug “ipahisama” kini sa mga kasulatan. Awhaga sila sa pagrekord sa ilang mga hunahuna ug mga pangutana.

Kon inyong matabangan ang mga tawo sa pagbasa, pagsabot, ug paggamit sa mga kasulatan—ilabi na sa Basahon ni Mormon—sila makabaton og espirituhanon nga mga kasinatian uban sa pulong sa Dios. Sila adunay mas dakong kalagmitan sa pagbasa nga sila ra ug mohimo sa mga kasulatan nga usa ka importanteng bahin sa ilang kinabuhi.

Tabangi ang mga Tawo nga Mogamit sa mga Kasulatan

Ang mga kasulatan ug mga pulong sa buhi nga mga propeta maanaa sa mas daghang paagi ug sa mas daghang pinulongan kay sa kaniadto. Pagkat-on unsa ang inimprinta ug digital nga mga opsiyon nga magamit sa mga tawo nga inyong gitudloan. Tabangi ang mga tawo nga makaakses sa mga kasulatan sa mga paagi nga mohaom sa ilang mga panginahanglan ug mga gusto. Ikonsiderar ang mosunod:

Pangutan-a ang mga tawo kon unsa nga pinulongan ang ilang gusto nga basahon o paminawon nga mga kasulatan.
Kadtong kinsa naglisod sa pagbasa, o naglisod sa pagsabot sa unsay ilang gibasa, mahimong makabenepisyo gikan sa pagdungan sa pagbasa og kusog o sa pagpaminaw sa mga girekord nga mga audio. Kini anaa diha sa libre nga mga app ug mga website sa Simbahan.
Kon ang usa ka tawo adunay usa ka digital nga device, tabangi siya sa pag-akses sa mga kasulatan, ilabi na sa Basahon ni Mormon. Ang Basahon ni Mormon nga app ug ang Gospel Library libre ug sayon ra nga ipakigbahin.
Kon naggamit og mga text, chat, o email, pagpadala og mga link o mga imahe sa mga kasulatan. Kon magtudlo gamit ang video chat, ikonsiderar ang pagpakigbahin sa imong screen aron kamo magkadungan og basa sa mga bersikulo.
Tabangi ang mga tawo nga makaakses sa mga pulong sa buhi nga mga propeta.

Personal nga Pagtuon o Pagtuon uban sa Kompanyon

Seguroa nga ikaw ug ang imong kompanyon adunay na-update nga mga kapanguhaan sa mga kasulatan diha sa inyong telepono, lakip ang Basahon ni Mormon nga app ug ang Gospel Library.

Pagpili og usa sa mosunod nga mga tudling sa kasulatan: ulohan nga pahina sa Basahon ni Mormon; 3 Nephi 11; Moroni 10:3–8; Juan 17:3; Mga Taga-Roma 8:16–17; 1 Mga Taga-Corinto 15:29; Santiago 1:5; 1 Pedro 3:19–20; Amos 3:7.

Tinoa kon unsaon ninyo sa:

Pagpaila ang tudling.
Paghatag sa background ug sa konteksto.
Pagbasa sa tudling ug pagpasabot ang kahulogan niini.
Pagpasabot sa lisod nga mga pulong.
Pagtabang niadtong inyong gitudloan sa paggamit niini sa ilang mga kinabuhi.

Pagtuon sa Kasulatan

Nganong importante man ang pagtudlo gikan sa mga kasulatan?

Ipakigbahin ang Imong Pagpamatuod

Ang pagpamatuod usa ka espirituwal nga pagsaksi nga gihatag sa Espiritu Santo. Ang pagpakigbahin sa imong pagpamatuod mao ang paghatag og yano, direkta nga pagpahayag sa kahibalo o pagtuo mahitungod sa ebanghelyo. Ang pagpakigbahin sa imong pagpamatuod makadugang sa imong personal nga pagsaksi sa mga kamatuoran nga imong gitudlo gikan sa mga kasulatan.

Ang pagpakigbahin sa imong pagpamatuod usa ka gamhanan nga paagi sa pag-imbitar sa Espiritu ug pagtabang sa uban nga mabati ang Iyang impluwensya. Usa sa mga misyon sa Espiritu Santo mao ang pagpamatuod sa Langitnong Amahan ug ni Jesukristo. Siya sa kasagaran motuman ninii diha sa pagpanag-uban kanimo samtang ikaw mohatag og pagpamatuod.

Ang usa ka gamhanang pagpamatuod wala magdepende sa pagkalarino o sa kakusgon sa imong tingog—apan sa kombiksiyon ug sinseridad sa imong kasingkasing. Pag-amping nga dili magdali-dali o ipinadrama ang imong pagpamatuod. Ihatag sa mga tawo ang usa ka kahigayonan sa pagbati sa Espiritu Santo nga mohatag og pagsaksi ngadto kanila nga unsay imong gitudlo tinuod.

Ang imong pagpamatuod mahimong sama ka yano niini “Si Jesukristo mao ang atong Manluluwas ug Manunubos” o “Akong nahibaloan sa akong kaugalingon nga ang Basahon ni Mormon tinuod.” Mahimo usab kang mopakigbahin og mubo nga kasinatian mahitungod kon giunsa nimo sa pag-angkon niining pagpamatuod.

Kon ikaw magtudlo, ipakigbahin ang imong pagpamatuod kon ikaw giaghat, dili lang sa kataposan. Kon ang imong kompanyon nagtudlo, ipakigbahin ang imong pagpamatuod aron sa pagsangkap og ikaduha nga pagsaksi sa unsay iyang gitudlo.

Ipakigbahin ang imong pagpamatuod nga ang baroganan nga imong gitudlo mopanalangin sa kinabuhi sa tawo kon siya mosunod niini. Isulti kon sa unsang paagi nga ang pagsunod sa baroganan nakapanalangin sa imong kinabuhi. Ang imong sinsero nga pagpamatuod makatabang sa pagmugna og palibot alang sa mga tawo nga mobati sa Espiritu Santo nga mokompirmar sa kamatuoran.

Personal nga Pagtuon

Ang mosunod nga mga tudling sa kasulatan mga ehemplo sa paghatag og pagpamatuod. Ikonsiderar ang mga pangutana samtang imong basahon ang kasulatan. Irekord ang imong mga tubag diha sa imong journal sa pagtuon.

Dinhi niini nga mga bersikulo, unsa ang gipamatuod ni Jesus ug sa Iyang apostoles ug mga propeta?
Unsaon nimo pagkahibalo nga sila nakombinser sa kamatuoran sa unsay ilang gisulti?
Kon moingon ka, “Nasayod ko nga tinuod,” unsa ang imong buot ipasabot? Unsay laing mga pulong nga imong magamit aron sa pagpahayag sa imong mga patuo?

Pagtuon sa Kasulatan

Unsa ang gitudlo sa mosunod nga mga kasulatan mahitungod sa mga baroganan ug mga saad sa paghatag og papamatuod?

Planoha ug Ipahiangay ang Imong Pagtudlo aron Matubag ang mga Panginahanglan

Ang matag tawo nga inyong tudloan talagsaon. Pagtinguha sa pagsabot sa iyang espirituhanong kaikag, panginahanglan, ug mga kabalaka. Mangutana ug maminaw sa maampingong paagi. Bisan og dili nimo hingpit nga masabtan ang panginahanglan sa tawo, hinumdomi nga nakasabot ang Langitnong Amahan. Siya mogiya kanimo pinaagi sa Espiritu Santo.

Tugoti nga ang Espiritu ang Mogiya sa Han-ay sa mga Leksiyon

Tugoti nga ang espiritu ang mogiya sa han-ay sa imong pagtudlo sa mga leksiyon. Makapailin-ilin ka sa pagtudlo sa mga leksiyon diha sa han-ay nga labing maayo alang sa panginahanglan, mga pangutana, ug mga kahimtang niadtong inyong gitudloan.

Usahay mahimo nimong isagol ang mga baroganan gikan sa lahi nga mga leksiyon aron matubag ang mga panginahanglan ug kaikag sa tawo. Tan-awa ang mosunod nga tulo ka ehemplo.

Nakit-an kamo ni Yuki sa internet ug nangutana kon nganong ang iyang mga higala sa Simbahan dili manigarilyo o moinom. Mahimo ninyo siyang tudloan mahitungod sa mga panalangin sa mga sugo pinaagi sa paggamit sa mosunod nga mga seksiyon gikan sa kapitulo 3:

Si Samuel wala mobati nga siya nahisakop sa bisan asa. Mahimo ninyong itudlo kaniya ang mahitungod sa iyang pagkatawo ug ang iyang luna diha sa pamilya sa Dios pinaagi sa paggamit sa mosunod nga mga seksiyon gikan sa kapitulo 3:

Si Tatyana nagtuon og daghang relihiyon ug gusto nga masayod kon unsa ang nakapalahi sa Simbahan. Mahimo ninyong itudlo kaniya ang mahitungod sa Pagpahiuli sa ebanghelyo ni Jesukristo pinaagi sa paggamit sa mosunod nga mga seksiyon gikan sa kapitulo 3:

Ang Langitnong Amahan nakaila sa Iyang mga anak, busa tinguhaa ang inspirasyon sa paghimo niini nga mga desisyon samtang kamo mag-andam sa pagtudlo. Pag-ampo alang sa gasa sa pagsabot kon kamo modesisyon unsa ang itudlo. Hatagi og pagtagad ang mga hunahuna ug mga pagbati nga moabot kaninyo.

Hatagi og Igong Panahon ang mga Tawo nga Mogamit kon Unsa ang Ilang Nakat-onan

Kon magtudlo ka, hatagi og panahon ang nga tawo nga mogamit kon unsa ang ilang nakat-onan (tan-awa sa 3 Nephi 17:2–3). Pangita og tukma nga mga paagi aron makasuporta kanila sa pagtuman sa ilang mga pasalig. Tutoki ang pagtabang kanila pinaagi sa mga buhat nga makaugmad og pundasyon sa hugot nga pagtuo, sama sa pag-ampo, pagbasa, ug pagtambong sa simbahan. Kini makapahimo kanila nga motuman og dugang pa nga mga pasalig.

Samtang magplano ka ug magtudlo, magmahimong sensitibo mahitungod kon unsa ka daghan ang impormasyon nga imong ipakigbahin. Ang nag-unang tumong sa imong pagtudlo mao ang pagtabang sa usa ka tawo sa pag-ugmad og hugot nga pagtuo diha ni Jesukristo aron kini mosangpot ngadto sa paghinulsol. Ang imong tumong dili aron makita kon unsa kadaghan nga impormasyon ang imong mahatag.

Pagtudlo sa gipaspason nga tukma alang sa tawo. Pangutana ug paminaw og maayo aron inyong masabtan kon unsa siya ka maayo nagkat-on ug naggamit sa unsay inyong gitudlo.

Ang kamatuoran nga imong gitudlo, inubanan sa gahom sa Espiritu Santo, makaimpluwensya sa mga tawo sa pagpakita sa ilang kabubut-on diha sa mga paagi nga makaugmad sa ilang hugot nga pagtuo diha ni Kristo. Samtang sila mopakita og hugot nga pagtuo sa Ginoo pinaagi sa paggamit sa unsay ilang nakat-onan, sila makahibalo pinaagi sa Espiritu nga ang ebanghelyo tinuod.

Paggamit og Lain-laing mga Oportunidad sa Pagtudlo

Ang oportunidad sa pagtudlo adunay daghang porma, sama sa mga pagbisita sa tawo, mga video chat, mga tawag sa telepono, mga mensahe sa text, ug social media.

Morespeto sa Oras sa mga Tawo

Himoa ang imong pagtudlo nga yano ug mubo. Ang mga tawo mas adunay kalagmitan nga makigkita kaninyo kon kamo morespeto sa ilang oras ug mga hangyo. Pangutana kon pila man ka oras nga ilang magahin alang sa pagbisita. Pagsugod ug taposa ang bisan unsa nga panag-estorya sa gikasabotan nga oras, personal man kamo nga nagtudlo sa tawo o diha sa internet. Pagbantay nga sa uban nga dapit, ang mga tawag sa telepono o mga video chat basin mahal.

Magkinahanglan kamo og daghang miting aron matudlo ang mga baroganan sa usa ka leksiyon. Kasagaran ang usa ka pagbisita nga magtudlo kinahanglang dili molapas sa 30 minutos, ug kamo makatudlo sa usa ka tawo og ingon ka mubo sama sa 5 minutos. Ipahaom ang inyong pagtudlo sumala sa oras sa mga tawo.

Gamita ang Teknolohiya sa Maalamon nga Paagi

Kamo adunay daghang oportunidad sa pagtudlo sa mga tawo gamit ang teknolohiya. Ang mga tawo mas gusto og sayon o pribado nga pakighinabi pinaagi sa elektronik nga mga paagi. Bisan ang mga tawo nga inyong gibisita makabenepisyo gikan sa dugang nga suporta gamit ang teknolohiya. Hisgoti ang mga kapanguhaan nga anaa aron makig-estorya. Dayon ifollow-up ug magpabilin nga konektado. Itugot ang gusto sa mga tawo sa paggiya sa inyong pakighinabi.

Ang teknolohiya sama sa bidyo nga mga tawag mahimong makatabang gayod alang sa pagtudlo sa mga tawo nga adunay busy nga mga eskedyul o nagpuyo sa layo. Usahay mas sayon kini alang sa usa ka miyembro sa pag-apil diha sa leksiyon gamit ang teknolohiya.

Tabangi ang Mas Bata nga mga Tigkat-on

Atol sa pangalagad sa Manluluwas, Siya mitudlo sa iyang mga disipulo, “Paduola kanako ang gagmayng kabataan, ug ayaw ninyo sila pagpugngi, kay ang gingharian sa Dios ila sa mga sama kanila’ (Marcos 10:14). Kon magtudlo kamo sa mga bata, ipahiangay ang inyong pamaagi ug mensahe aron matubag ang ilang mga panginahanglan. Tabangi sila nga makakat-on sa ebanghelyo pinaagi sa paghisgot og mga butang nga pamilyar ngadto kanila. Seguroa nga ilang masabtan kon unsa ang inyong gitudlo.

Pagtuon sa Kasulatan

Basaha ang Doktrina ug mga Pakigsaad 84:85. Unsa ang gipasabot sa mahatagan “[niana] nga bahin nga igahin ngadto sa matag tawo”? Unsaon ninyo paggamit niini diha sa inyong pagtudlo?

Unsa ang gisaad sa Ginoo sa matinud-anon nga mga misyonaryo mahitungod sa pagkahibalo sa unsay isulti?

Pagtudlo uban sa Imong Kompanyon diha sa Panaghiusa

Ang Ginoo miingon, “Kamo manglakaw pinaagi sa gahom sa akong Espiritu, magsangyaw sa akong ebanghelyo, sa tinagurha” (Doktrina ug mga Pakigsaad 42:6). Siya nagmando usab kanimo ug sa imong kompanyon nga “maghiusa” (Doktrina ug mga Pakigsaad 38:27). Ang imong pagtudlo mahimong mas gamhanan ug makapaikag kon ikaw ug ang imong kompanyon magkahiusa sa pagtrabaho. Magpuli-puli sa paghatag og mugbo nga porsiyon sa mga leksiyon.

Atol sa pagtuon uban sa kompanyon, hisgoti ug praktisa kon unsaon ninyo sa pagtudlo aron kamo magkahiusa. Pag-andam kon unsaon ninyo sa pagtinabangay kon magtudlo sa mga tawo diha sa internet. Sunda ang mga pag-amping alang sa paggamit sa teknolohiya, gilatid sa kapitulo 2.

Kon ang imong kompanyon nagtudlo, pag-ampo, paminaw, ug motan-aw kaniya. Suportahi ang imong kompanyon pinaagi sa paghatag og ikaduhang pagsaksi sa mga kamatuoran nga iyang gitudlo (tan-awa sa Alma 12:1). Sunda ang imong mga impresyon kon ang Espiritu nag-aghat kanimo sa pagsulti og usa ka butang.

Sinsero nga mopakita nga interesado sa mga tawo nga imong gitudloan. Paminawa sila. Magpabilin nga motan-aw sa mata kon sila o ikaw mag-estorya. Mainampingon nga mag-obserbar sa ilang mga tubag, ug maminaw alang sa espirituhanon nga mga pag-aghat.

Imbitara ang mga Miyembro sa Pag-apil

Imbitara ang mga miyembro nga motabang kaninyo sa pagtudlo ug sa pagsuporta sa mga tawo nga inyong gitrabaho. Kini mahimong mahitabo sa personal o birtuwal. Atol sa sinemana nga miting sa pakigsabot, makigtambagay sa mga lider sa ward mahitungod kon kinsa ang makatabang.

Kon ang mga miyembro moapil diha sa pagtudlo ug pag-abi-abi, sila makadugang og mga panabot ug mohimo og koneksiyon isip mga higala. Ilang mabati ang kalipay sa misyonaryo nga buhat.

Imbitara ang mga Miyembro nga Motabang Kaninyo sa Pagtudlo

Sa dili pa ang mga leksiyon, pagplano uban sa mga miyembro kon unsaon sa pagbuhat nga magtinabangay. Makagamit ka sa mensahe sa text o kadiyot nga pagtawag sa telepono aron pagkompirmar kon unsa ang inyong itudlo, kinsa ang mag-ampo, kinsa ang mangulo sa panag-estorya, ug uban pang mga detalye.

Ang nag-unang papel sa mga miyembro diha sa mga leksiyon mao ang pagtanyag og sinsero nga pagpamatuod, pagpakigbahin og mubo nga personal nga mga kasinatian, ug pagpalambo og relasyon uban niadtong gitudloan. Mahimo nimong hangyoon ang mga miyembro sa pagpakigbahin kon giunsa nila sa pagkat-on, pagdawat, ug pasunod sa partikular nga baroganan sa leksiyon. Kon sila mga kinabig, imbitara sila sa pagpakigbahin kon sa unsang paagi nga sila midesisyon nga magpasakop sa Simbahan.

Kon ang mga miyembro mo-refer og tawo, hangyoa sila sa pag-apil diha sa pagtudlo. Ang mga miyembro mahimong mas malambigit niining mga sitwasyon. Makigtambag uban kanila mahitungod kon unsaon nila aron makaapil.

Ikonsiderar kon unsaon kaha ang tukmang paggamit sa teknolohiya sa pagtudlo uban sa mga miyembro. Ang teknolohiya makatugot sa mga miyembro sa pag-apil kaninyo nga walay pasalig sa oras sama sa gikinahanglan sa personal nga pagbisita.

Diha sa sinemana nga miting sa pakigsabot, magplano uban sa mga lider sa ward nga adunay usa ka miyembro nga moapil diha sa daghang leksiyon kutob sa mahimo (tan-awa sa kapitulo 13). Ikonsiderar ang paghangyo sa bag-ong mga miyembro sa pagtabang kaninyo sa pagtudlo.

Personal nga Pagtuon o Pagtuon uban sa Kompanyon

Hunahunaa nga kamo adunay pakigsabot nga motudlo og usa ka leksiyon sa usa ka pamilya diha sa panimalay sa usa ka miyembro. Hisgoti kon unsaon ninyo sa pagpaapil sa matag usa sa mosunod nga mga miyembro sa pagtabang kaninyo sa pagtudlo:

Usa ka ward missionary kinsa bag-o lang nga nauli gikan sa full-time nga misyon
Usa ka priest
Usa ka bag-ong miyembro
Ang presidente sa korum sa mga elder o Relief Society

Imbitara ang mga Miyembro sa Paghatag og Suporta

Ang mga miyembro makahatag usab og bililhon nga suporta ngadto sa mga tawo taliwala sa mga pagtudlo nga mga pagbisita. Sila makatext, makadungan sa pagbasa sa mga kasulatan, makaimbitar sa mga tawo ngadto sa ilang panimalay o sa mga kalihokan, o makaimbitar kanila nga magtupad diha sa Simbahan. Sila makatubag sa mga pangutana ug makapakita kon unsa ang ilang kinabuhi isip mga miyembro sa Simbahan. Ang ilang kasinatian sa kinabuhi ug panglantaw makatabang kanila nga makasabot sa mga tawo sa mga paagi nga usahay lahi kaayo kaysa paagi nga gisaysay sa mga misyonaryo.

Makigtambag sa mga miyembro mahitungod sa mga paagi nga kamo magkatinabangay sa pagsuporta sa mga tawo gawas sa mga pagtudlo nga mga pagbisita.

Pagtudlo alang sa Pagsabot

Itudlo ang ebanghelyo ni Jesukristo aron ang mga tawo makasabot niini. Pagtuon sa mga kasulatan ug sa mga leksiyon aron kamo makatudlo og klaro gikan niini. Kon mas klaro ang inyong pagtudlo, mas maayo ang oportunidad alang sa Espiritu Santo nga makapamatuod sa kamatuoran.

Pangutana aron matabangan ang mga tawo sa paghunahuna mahitungod sa unsay inyong gitudlo. Dayon paminaw aron maseguro kon sila nakasabot ba ug modawat niini.

Kabahin sa pagtudlo alang sa pagsabot mao ang pagpasabot sa mga pulong, hugpong sa mga pulong, ug mga ideya. Inyong mapalambo ang inyong abilidad sa pagtudlo sa ebanghelyo pinaagi sa:

Pagsabot sa mga pulong nga inyong gigamit.
Paghatag og kahulogan sa mga pulong nga mahimong wala masabti sa uban.
Pagpangutana sa mga tawo og mga pangutana sama sa “Mahimo ba nimong ipakigbahin kanamo ang imong nasabtan sa unsay among gipasabot?” o “Andam ka ba nga mo-summarize sa unsay atong gihisgotan?”

Sa inyong pagtudlo sa doktrina diha sa kapitulo 3, ilista ang bisan unsa nga mga pulong, hugpong sa mga pulong, ug mga ideya nga mahimong wala masabti sa mga tawo. Hatagi og kahulogan kini pinaagi sa paggamit sa mga kapanguhaan diha sa Gospel Library, sama sa Ang Giya ngadto sa mga Kasulatan.

Himoa ang imong pagtudlo nga yano ug mubo. Himoa nga kini nakatutok diha sa ebanghelyo ni Jesukristo, sa paglig-on sa pagsabot sa sukaranang doktrina ug mga baroganan. Tabangi ang mga tawo sa pagtinguha og panabot nga naggikan sa Espiritu Santo. Samtang sila makabaton niini nga panabot sila motuo sa mensahe sa ebanghelyo.

Pagtuon sa Kasulatan

Nganong kinahanglan man natong ipasabot og maayo ang doktrina?

Sa unsa nga paagi nga kita makat-on? Nganong importante man ang pagtudlo sa impormasyon nga anam-anam?

Nganong ang kayano importante?

Unsa ang inyong nakat-onan gikan sa mosunod nga mga bersikulo mahitungod kon sa unsang paagi ang Dios makigsulti sa Iyang mga anak?

Pangutana

Ang Manluluwas nangutana og mga pangutana nga nakadapit sa mga tawo nga maghunahuna ug mobati og maayo mahitungod sa mga kamatuoran nga Iyang gitudlo. Ang Iyang mga pangutana nag-aghat sa kalag sa paghinuklog ug sa pagpasalig.

Ang maayo nga mga pangutana importante usab sa inyong pagtudlo. Kini makatabang kaninyo nga masabtan ang kaikag, kabalaka, ug mga pangutana sa mga tawo. Ang maayo nga mga pangutana makadapit sa Espiritu ug motabang sa mga tawo nga makakat-on.

Pangutana og Dinasig nga mga Pangutana

Tinguhaa ang giya sa Espiritu diha sa pagpangutana og maayo nga mga pangutana. Ang saktong mga pangutana sa husto nga mga panahon makatabang sa mga tawo nga makakat-on sa ebanghelyo ug mobati sa Espiritu.

Ang dinasig nga mga pangutana ug sinsero nga pagpaminaw makatabang sa mga tawo nga mahimong mas komportable nga makasulti sa dayag ug makapakigbahin sa ilang mga gibati. Kini makatabang kanila sa pagdiskobre og usa ka nagtubo nga pagpamatuod. Sila usab mas komportable nga mangutana kaninyo kon sila wala makasabot sa usa ka butang o adunay usa ka kabalaka.

Ang mosunod nga table mopakita og pipila ka mga baroganan pinaagi sa pagpangutana og dinasig nga mga pangutana, lakip sa mga ehemplo.

Mga Baroganan ug mga Ehemplo sa Dinasig nga mga Pangutana

Mga Baroganan	Mga ehemplo
Ipangutana ang mga pangutana nga makatabang sa mga tawo nga mobati sa Espiritu.	Mahimo ka ba nga mopakigbahin og kasinatian sa dihang imong nabati ang impluwensya sa Dios sa imong kinabuhi? Sa unsang paagi nga imong nabati ang gugma sa Dios alang kanimo?
Ipangutana ang mga pangutana nga yano ug sayon masabtan.	Unsa ang inyong nakat-onan mahitungod ni Jesukristo gikan niini nga kasulatan?
Ipangutana ang mga pangutana nga makatabang sa mga tawo nga maghunahuna mahitungod sa unsay inyong gitudlo.	Sa unsang paagi kini susama ngadto sa unsay imoha nang gituohan? Sa unsang paagi nga kini managlahi?
Ipangutana ang mga pangutana nga makatabang ninyo nga makahibalo kon unsa ka maayo nasabtan sa mga tawo ang unsay inyong gitudlo.	Unsa ang inyong mga pangutana mahitungod sa unsay among natudlo karon? Unsaon nimo sa pag-summarize ang atong mga panaghisgotan karon?
Ipangutana ang mga pangutana nga makatabang sa mga tawo nga mopakigbahin kon unsa ang ilang gibati.	Sa unsang paagi nga si Jesukristo nakatabang sa imong kinabuhi? Unsa ang labing importante diha kanimo gikan sa unsay atong nahisgotan karon?
Ipangutana ang mga pangutana nga magpakita og gugma ug pakabana.	Sa unsang paagi kami makatabang kanimo?
Ipangutana ang mga pangutana nga makatabang sa mga tawo nga mogamit kon unsa ang ilang nakat-onan.	Unsay atong makat-onan gikan niini nga kasulatan? Sa unsang paagi nga kining kasulatan makatabang kanimo sa imong kinabuhi? Sama sa atong naestoryahan, unsa ang imong gibati nga naaghat ka sa pagbuhat gikan sa unsay imong nakat-onan?

Pagtuon uban sa Kompanyon

Rebyoha ang imong plano sa leksiyon gikan sa bag-ohay nga leksiyon nga inyong gitudlo. Pagsulat og usa ka pangutana alang sa matag usa sa mahinungdanong mga baroganan nga gilatid diha sa imong plano.

Rebyoha ang imong mga pangutana aron maseguro kon kini nahiuyon ba sa mga baroganan niini nga seksiyon.

Sunod, tubaga ang matag pangutana nga morag ikaw ang tawo nga gitudloan.

Ipakigbahin ang imong mga pangutana ngadto sa imong kompanyon. Kamong duha, magtimbang-timbang sa inyong mga pangutana.

Personal nga Pagtuon o Pagtuon uban sa Kompanyon

Ang mga tawo nga inyong gitudloan lagmit nakasugat sa mosunod nga mga kasinatian:

Nakabaton sila og espirituhanon nga kasinatian samtang nagbasa sa Basahon ni Mormon.
Ang mga kauban sa trabaho kanunay nga nagbugal-bugal sa espirituhanon nga mga butang.
Ang mga sakop sa pamilya lig-ong mga miyembro sa laing simbahan.
Ang mga higala nagtuo nga “ang mga Mormon dili Kristiyano”.

Paghunahuna og pangutana nga imong ipangutana mahitungod sa matag usa niini nga sitwasyon. Isulat kini nga mga pangutana diha sa inyong journal sa pagtuon. Hisgoti uban sa imong kompanyon kon unsaon ninyo pagpalambo ang mga pangutana nga imong gisulat.

Likayi ang Dili Epektibo o Naghinobra nga mga Pangutana

Ayaw ipangutana ang mga pangutana nga:

Adunay klaro kaayo nga mga tubag.
Tingali ikaulaw sa usa ka tawo kon siya wala masayod sa tubag.
Paglakip og sobra sa usa ka ideya.
May kalabotan sa doktrina nga wala pa ninyo matudlo.
Walay klarong katuyoan.
Naghinobra.
Makalaay o makairita ug makapasilo sa tawo.

Ang mosunod mao ang mga ehemplo sa dili kaayo epektibo nga mga pangutana:

Kinsa ang unang propeta? (Ang tawo tingali wala masayod sa tubag.)
Sa unsa nga paagi nga ang pagpabilin sa atong lawas nga putli makatabang kanato nga makabaton sa Espiritu ug makapakita nga andam kitang mosunod sa propeta sa Dios? (Adunay sobra sa usa ka ideya.)
Importante ba nga masayod kabahin sa mga sugo sa Dios? (Kini usa ka oo-dili nga pangutana, ug ang tubag klaro ra kaayo.)
Unsa man ang butang nga atong mabuhat kada adlaw nga makatabang kanato nga mobati nga duol sa Dios? (Kini dili klaro nga pangutana nangita og pihong tubag: pag-ampo.)
Kinsa man ang sunod nga propeta human ni Noe? (Ang tawo tingali wala masayod sa tubag, ug ang pangutana dili importante alang sa inyong mensahe.)
Nasabtan ba nimo unsay akong gisulti? (Ang tawo tingali mobati nga imo siyang gipakaubos.)

Personal nga Pagtuon o Pagtuon uban sa Kompanyon

Hunahunaa ang mga panginahanglan sa tawo nga inyong gitudloan. Hisgoti kon unsaon kaha niya sa pagtubag ang inyong mga pangutana. Planoha ang mga ipangutana nga nagsunod sa mga lagda niini nga seksiyon. Hisgoti kon sa unsa nga paagi kini nga mga pangutana makaimbitar sa Espiritu ug makatabang sa tawo nga makat-on sa ebanghelyo.

Maminaw

Kon maminaw ka og maayo sa uban, mas makasabot ka nila. Kon mahibalo sila nga ang ilang mga hunahuna ug mga pagbati importante kanimo, mas dali silang modawat sa imong mga gitudlo, mopaambit og personal nga mga kasinatian, ug mohimo og mga pasalig.

Sa imong pagpaminaw, makabaton ka og salabotan ngadto sa pagpahaom sa inyong pagtulon-an ngadto sa ilang mga panginahanglan ug mga interes. Mas makasabot ka kon hain sa mga kamatuoran sa ebanghelyo ang labing makahatag og kaayohan ngadto kanila.

Paminaw gyod ilabi na sa mga paghunghong sa Espiritu. Kon ang uban mopakigbahin sa ilang mga pagbati, ang Espiritu Santo mahimong moaghat kanimo og mga hunahuna o mga ideya. Ang Espiritu makatabang usab nimo nga makasabot kon unsa ang gustong ipahayag sa uban.

Paminaw inubanan sa Tinud-anay nga Pagpakabana

Ang pagpaminaw nagkinahanglan og paningkamot ug tinud-anay nga pagpakabana. Samtang nag-estorya ang uban, seguroa nga ikaw naminaw og maayo sa unsay ilang gisulti. Likayi ang kalagmitan nga magplano unsa ang imong isulti.

Si Elder Jeffrey R. Holland nagtudlo: “Mas importante kaysa pagsulti mao ang pagpaminaw. Kining mga tawhana dili mga butang nga walay kinabuhi nga nagtakuban isip usa ka estatistika sa bunyag. … Pangutan-a kini nga mga higala kon unsay labing importante kanila. Unsa ang ilang gimahal, ug unsa ang ilang gipangga pag-ayo? Ug dayon, maminaw. Kon ang sitwasyon tukma mahimo kamong mangutana kon unsay ilang mga kahadlok, unsay ilang gihandom, o unsay ilang gibati nga kulang sa ilang mga kinabuhi. Ako mosaad kaninyo nga adunay butang diha sa ilang masulti nga kanunayng magpasabot sa usa ka kamatuoran sa ebanghelyo diin makapamatuod kamo mahitungod niini ug diin kamo makatanyag og dugang mahitungod niini. … Kon maminaw kita uban sa gugma, dili na kita kinahanglang maghunahuna kon unsay isulti. Ihatag ra kini kanato—pinaagi sa Espiritu ug pinaagi sa atong mga higala” (“Witnesses unto Me,” Ensign, Mayo 2001, 15).

Obserbahi ang Wala Gipamulong nga mga Mensahe

Ang mga tawo makigsulti usab pinaagi sa ilang linihokan sa lawas. Himatikdi ang ilang liningkoran, ang ilang ekspresiyon sa nawong, unsa ang gibuhat sa ilang mga kamot, ang tuno sa ilang tingog, ug asa sila nagtan-aw. Ang pag-obserbar niining wala gipamulong nga mga mensahe makatabang kanimo nga masabtan ang mga pagbati niadtong inyong gitudloan.

Pagbantay usab sa imong kaugalingong linihokan. Ihatag ang mensahe nga adunay tinguha ug kadasig pinaagi sa sinserong pagpaminaw.

Hatagi ang mga Tawo og Panahon sa Paghunahuna ug Pagtubag

Ang Manluluwas kanunay nga mangutana og mga pangutana nga nagkinahanglan og panahon aron ang usa katawo makatubag. Kon mangutana kamo, hunong aron mahatagan ang tawo og higayon sa paghunahuna ug pagtubag. Ayaw kahadlok sa kahilom. Ang mga tawo sa kasagaran magkinahanglan og panahon sa paghunahuna ug sa pagtubag sa mga pangutana o sa pagpadayag kon unsay ilang gibati.

Mahimo kang mohunong human ka makapangutana, human makapaambit og espirituhanong kasinatian, o kon ang mga tawo maglisod sa pagpahayag sa ilang mga kaugalingon. Seguroa nga mahatagan sila og panahon sa pagkompleto sa ilang mga hunahuna sa dili pa ang imong tubag. Ayaw pagsapaw samtang sila nag-estorya.

Motubag nga may Pagsabot

Kon ang tawo motubag sa usa ka pangutana, sugdi ang imong tubag pinaagi sa pagpahayag og pagsabot kon tukma. Ang pagsabot nagpakita nga ikaw matuod nga nagpakabana. Likayi ang pagdahom dayon, motanyag dayon og mga solusyon, o magpakita nga ang tanang tubag anaa.

Ikompirmar Nga Kamo Nakasabot Unsa ang Gisulti sa mga Tawo

Kon magtinguha sa pagsabot unsa ang gisulti sa usa ka tawo, pangutana aron makaseguro nga kamo nakasabot. Pananglitan, mahimo ka nga mangutana, “Ang buot ba nimong ipasabot nga . Sakto ba?” o “Kon husto ang akong pagsabot, gibati nimo nga .” Kon dili ka segurado nga kon nasabtan ba nimo, hangyoa ang tawo sa paghatag og katin-awan.

Unsaon sa Pag-atubang sa Mahagiton ug Malisod nga mga Inter-aksiyon

Matabangan nimo og maayo ang tawo pinaagi sa pagtudlo kanila sa ebanghelyo ni Jesukristo. Ang ubang mga tawo tingali gusto nga maoy moestorya pirme. Usahay ang mga tawo nagkinahanglan lang og usa ka tawo nga maluloy-ong maminaw sa ilang mga panglimbasog ug mga pagbati. Ang uban nga mga tawo mahimong magtinguha sa pagdominar o makiglalis.

Pagkat-on sa pagdumala sa maong mga sitwasyon sa mahunahunaong paagi ug uban sa gugma. Tingali makapahiangay kamo sa inyong pagtudlo aron matubag ang butang nga gipakigbahin sa tawo. O tingali kinahanglan kamo nga matinahurong mosulti nga ganahan ninyong hisgotan ang ilang mga kabalaka sa laing panahon. Ang Espiritu makatabang kaninyo sa pagtubag sa lisod nga mga sitwasyon.

Tabangi ang mga Tawo nga Mobati nga Komportable sa Pagpakigbahin sa Tinuod nga mga Pagbati

Aron makalikay og kaulawan, ang ubang mga tawo motubag sa mga pangutana sa paagi nga sa ilang pagtuo maoy inyong gusto nga ilang itubag imbis nga mopakigbahin sa ilang tinuod nga mga pagbati. Tinguhaa ang pag-ugmad og usa ka relasyon nga nagtugot kanila nga mahimong komportable sa pagpaambit sa ilang tinuod nga mga pagbati nganha kaninyo.

Ang pagsabot ug pagkonektar sa mga tawo makatugot kaninyo sa pagtabang kanila, pagtubag sa ilang interes ug mga panginahanglan, ug pagpahayag sa gugma sa Manluluwas ngadto kanila. Pagmugna og usa ka relasyon sa pagsalig pinaagi sa pagkamatinuoron ngadto kanila, pagpabilin og usa ka tukma nga misyonaryo nga relasyon, ug pagpakita og pagtahod.

Personal nga Pagtuon o Pagtuon uban sa Kompanyon

Pamalandongi kon unsa kamo ka maayo maminaw sa uban. Isulat ang mga tubag sa mga pangutana sa ubos diha sa imong journal sa pagtuon. O hisgoti kini uban sa imong kompanyon.

A =Dili gayod tinuod nga ingon niana ako, B = Usahay tinuod nga ingon niana ako, C = Kasagaran tinuod nga ingon niana ako, D = Kanunayng tinuod nga ingon niana ako

Kon ang uban makig-estorya nako, maghunahuna ko sa susamang mga kasinatian nga akong ikapakigbahin imbis nga maminaw og maayo.
Kon ang uban mosulti nako kabahin sa ilang mga pagbati, mosulay ko sa pagbutang sa akong kaugalingon sa ilang nahimutangan aron masuta nako kon unsay akong bation.
Kon magtudlo ko sa mga tawo, maghunahuna ko unsa ang akong isulti o itudlo sa sunod.
Mawad-an ko og kadasig kon ang mga tawo magtabi og maayo.
Nanglimbasog ko sa pagsunod o sa pagsabot kon unsay gustong isulti sa uban ngari nako.
Ang akong hunahuna usahay maglatagaw samtang ang akong kompanyon nagtudlo.
Maglagot ko kon dunay tawo nga mag-estorya ngari nako ug ang uban mosalga o mobalda sa akong atensiyon.
Makadawat ko og nga mga espirituhanong pag-aghat sa pagsulti o pagbuhat og usa ka butang, pero ako mobaliwala niini.

Tabangi ang mga Tawo nga Makakaplag og mga Tubag sa Ilang mga Pangutana ug mga Kabalaka

Paghimo og matinguhaon nga paningkamot sa pagtubag sa mga pangutana sa mga tawo ug motabang kanila sa pagsulbad sa ilang mga kabalaka. Apan, dili kini imong responsibilidad nga motubag sa matag pangutana. Sa kataposan, ang mga tawo ang mosulbad sa ilang mga pangutana ug mga kabalaka alang sa ilang kaugalingon.

Hibaloi nga dili tanang pangutana ug mga kabalaka hingpit nga matubag. Ang uban nga mga tubag mahimong mas tin-aw paglabay sa panahon. Ang uban wala pa gipadayag. Tutoki ang pagtukod og usa ka lig-on nga pundasyon sa sukaranan, mahinungdanon nga mga kamatuoran sa ebanghelyo. Kini nga pundasyon makatabang kanimo ug niadtong inyong gitudloan nga mopadayon sa unahan uban sa pailob ug hugot nga pagtuo kon adunay wala matubag o lisod nga mga pangutana.

Ang pipila ka baroganan sa pagtubag sa mga pangutana gilatid niini nga leksiyon.

Sabta ang Kabalaka

Ang uban nga inyong gitudlo sa mga tawo ingon og lisod ug dili nila pamilyar. Kon ang mga tawo adunay mga pangutana o kabalaka, ang unang lakang mao ang pagtinguha sa tin-aw nga pagkasabot niini. Usahay ang mga kabalaka sa mga tawo parehas sa usa ka iceberg. Gamayng bahin lang ang makita sa ibabaw. Kini nga mga kabalaka mahimong komplikado. Pag-ampo alang sa gasa sa pagsabot, ug sunda ang Espiritu kon unsaon ninyo sa pagtubag. Ang Langitnong Amahan nasayod sa mga kasingkasing ug mga kasinatian sa tanang katawhan (ang kompleto nga iceberg). Siya motabang kanimo nga masayod unsa ang labing importante alang sa matag tawo.

Sa kasagaran ang mga kabalaka maglabaw ang kabahin sa mga tawo kaysa doktrina. Pananglitan, ang ubang tawo tingali mahadlok sa oposisyon gikan sa mga sakop sa pamilya kon sila mopasakop sa Simbahan. O tingali mahadlok sila nga isalikway sa ilang mga higala sa trabahoan.

Tinguhaa ang pagsabot sa tinubdan sa kabalaka pinaagi sa pagpangutana ug sa pagpaminaw. Mitumaw ba ang kabalaka tungod kay ang tawo walay espirituhanong kompirmasyon sa kamatuoran sa Pagpahiuli? Mitumaw ba kini tungod kay ang tawo dili gustong mopasalig sa pagsunod sa baroganan sa ebanghelyo? Ang pagkasayod sa gamot sa ilang kabalaka makatabang kanimo nga masayod kon motutok ba sa pagpamatuod o sa pasalig.

Gamita ang mga Kasulatan, Ilabi na ang Basahon ni Mormon, sa Pagtabang og Tubag sa mga Pangutana

Ipakita sa mga tawo kon sa unsang paagi nga ang mga kamatuoran diha sa mga kasulatan makatabang og tubag sa ilang mga pangutana ug sa pagtubag ilang mga kabalaka. (Tan-awa sa “Ang Basahon ni Mormon Makatubag sa Mahinungdanong mga Pangutana sa Kinabuhi” diha sa kapitulo 5.) Kon ang mga tawo magtinguha og pagdasig pinaagi sa pagtuon ug paggamit sa mga kasulatan, ilang madugangan ang ilang kapasidad sa pagpaminaw ug pagsunod sa Ginoo. Ang ilang hugot nga pagtuo Kaniya molambo. Uban sa paglambo sa hugot nga pagtuo moabot ang pagpamatuod, paghinulsol, ug ang ordinansa sa bunyag.

“Usahay mobasa ako sa mga kasulatan alang sa doktrina. Usahay mobasa ako sa mga kasulatan alang sa instruksyon. Mobasa ako nga adunay pangutana, ug ang pangutana sa kasagaran mao ang ‘Unsa may gustong ipahimo sa Dios kanako?’ o ‘Unsa may gusto Niya nga akong bation?’ Sa matag higayon ako makakaplag og bag-o nga mga ideya, mga hunahuna nga wala pa sukad mosantop kanako kaniadto, ug ako makadawat og inspirasyon ug mga tubag sa akong mga pangutana” (Henry B. Eyring, in “A Discussion on Scripture Study,” Ensign, Hulyo 2005, 22).

Makatabang ang pagpasabot nga kadaghanan sa atong panabot sa ebanghelyo ni Jesukristo nagagikan sa unsay gipadayag ngadto ni Propeta Joseph Smith ug niadtong kinsa misunod kaniya. Ang mga pangutana mahitungod sa katinuod sa ebanghelyo masulbad pinaagi sa pagbaton og usa ka pagpamatuod nga si Joseph Smith usa ka propeta sa Dios. Ang pagbasa ug pag-ampo mahitungod sa Basahon ni Mormon usa ka mahinungdanong paagi sa pagbaton niini nga pagpamatuod.

Tabangi ang mga tawo nga tutokan ang pagpalig-on sa ilang hugot nga pagtuo ni Jesukristo. Ang pagbasa ug pag-ampo mahitungod sa Basahon ni Mormon usa ka mahinungdanong paagi sa pagpalig-on sa ilang hugot nga pagtuo.

Imbitara ang mga Tawo sa Paglihok inubanan sa Hugot nga Pagtuo

Kon ang mga tawo nagpalambo ug nagpalig-on sa ilang pagpamatuod sa gipahiuli nga ebanghelyo, sila makahimo sa pagtubag sa ilang mga pangutana ug kabalaka gikan sa usa ka pundasyon sa hugot nga pagtuo. Kon sila molihok pinaagi sa hugot nga pagtuo base sa mga kamatuoran nga ilang gituohan, sila makahimo sa pagbaton og mga pagpamatuod sa uban pa nga mga kamatuoran sa ebanghelyo.

Ang uban nga mga paagi sa paglihok pinaagi sa hugot nga pagtuoo naglakip sa:

Pag-ampo kanunay ug sa tinuod nga tumong alang sa inspirasyon ug giya.
Pagtuon sa mga kasulatan, ilabi na sa Basahon ni Mormon.
Pagtambong sa simbahan.

Pagtuon uban sa Kompanyon

Pagpili og usa ka imbitasyon nga ipadangat kon ikaw magtudlo og usa ka leksiyon. Dayon ilha ang mga kabalaka nga tingali makapugong sa usa ka tawo sa pagdawat sa imbitasyon o sa pagtuman sa pasalig. Hisgoti ug praktisa kon unsaon nimo sa pagtabang ang mga tawo aron masulbad ang ilang mga kabalaka.

Personal nga Pagtuon o Pagtuon uban sa Kompanyon

Sa imong journal sa pagtuon, isulat kon unsaon nimo pagkutlo gikan ni Joseph Smith ug sa Basahon ni Mormon sa pagtubag sa mosunod nga mga kabalaka:

“Dili ako motuo nga ang Dios makigsulti pa sa tawo.”
“Nagtuo ko nga makasimba ko sa Dios sa akong kaugalingong pamaagi kaysa pinaagi sa naorganisar nga relihiyon.”
“Nganong biyaan man nako ang pag-inom sa bino uban sa akong pagkaon kon moapil ko sa inyong simbahan?”
“Nganong nagkinahanglan man ako og relihiyon?”

Pagbilin og Butang nga Matun-an ug Maampoan

Sa kataposan sa matag pagbisita sa pagtudlo, hatagi ang mga tawo og butang nga matun-an, mapamalandongan, ug angayng iampo sa pagpangandam alang sa sunod nga panagkita. Ang pagbasa, pag-ampo, ug pagpamalandong taliwala sa pagtudlo nga pagbisita makaimbitar sa impluwensya sa Espiritu Santo ngadto sa ilang kinabuhi.

Mahimo nimong dapiton ang mga tawo sa pagbasa og piho nga mga kapitulo sa Basahon ni Mormon. O mahimo nimong awhagon sila sa paggamit sa mga tinubdan sa Simbahan, sama sa Gospel Library, sa pagpangita og mga tubag sa mga pangutana, pagkat-on mahitungod sa hilisgotan, o motan-aw sa bidyo. Mahimo kining usa ka pangbukas nga hilisgotan nga tukion sa sunod ninyong panagkita.

Likayi ang paghatag sa mga tawo og daghan ra kaayo nga buluhaton, ilabi na kon kamo adunay mubo, kanunay nga mga pakighinabi sa pagtudlo uban kanila.

Personal nga Pagtuon o Pagtuon uban sa Kompanyon

Hunahunaa ang matag tawo nga inyo nang gieskedyul aron tudloan karong semanaha. Unsa nga mga kapitulo diha sa Basahon ni Mormon ang labing makatabang ngadto kanila? Unsa pa ang uban nga mga kapanguhaan ang makahatag kanila og kaayohan? Irekord kon unsa ang inyong tumong nga isangkap sa matag tawo. Irekord usab kon unsa ang inyong buhaton aron sa pag-follow up atol sa sunod ninyong pagbisita.

Pagtabang sa mga Tawo nga adunay mga Adiksiyon

Makatabang kamo sa tawo nga nanglimbasog sa pagbuntog sa adiksiyon pinaagi sa mahigugmaong paghisgot sa ilang mga panglimbasog, pagsuporta kanila, ug pagkonektar kanila ngadto sa mga kapanguhaan. Kamo mahimong moawhag kanila sa pagtambong sa usa sa suporta nga mga grupo sa Simbahan aron maulian gikan sa pagkaadik. Kini nga mga grupo mahimong magkita sa personal o online. (Tan-awa sa AddictionRecovery.ChurchofJesusChrist.org.) Awhaga sila sa paggamit sa mga kapanguhaan diha sa “Pagkaadik” nga seksiyon sa Tabang sa Kinabuhi diha sa Gospel Library.

Ang lokal nga mga lider sa Simbahan ug mga miyembro makahatag usab og suporta. Ang ubang mga tawo nga naadik mahimong magkinahanglan og propesyonal nga pagtambal sa alang sa kahimsog sa medikal ug sa mental.

Ania ang pipila ka sugyot alang sa paagi nga kamo makasuporta sa mga tawo nga nanglimbasog sa pagbuntog sa adiksiyon:

Palig-ona ang ilang mga paningkamot sa pagduol ngadto kang Kristo. Tabangi sila nga makakita nga ang ilang mga paningkamot nga maulian ug mamaayo giila ug gihatagan og bili sa Langitnong Amahan ug ni Jesukristo. Tudloi sila nga sila mahimong malig-on pinaagi sa Manluluwas ug sa Iyang Pag-ula. Siya hingpit nga moila sa tumong sa ilang kasingkasing sa pagbuhat og maayo.
Pag-ampo alang kanila diha sa imong personal nga mga pag-ampo, ug pag-ampo uban kanila. Kon tukma, awhaga sila sa pagtinguha og usa ka panalangin sa pagkapari gikan sa lokal nga mga lider sa pagkapari.
Ipadayon ang pagtudlo kanila sa ebanghelyo ni Jesukristo. Tudloi sila nga ang Langitnong Amahan, ang Manluluwas, ug ang Espiritu Santo nahigugma kanila ug gusto nga sila molampos.
Awhaga sila nga regular nga motambong sa simbahan ug makaugmad og panaghigalaay uban sa mga miyembro.
Magmalaumon ug maabagon—bisan pa kon masipyat sila.

Si Jesus nagtabang ngadto sa usa ka babaye

Ang adiksiyon lisod buntogon, ug ang pagbalik-balik mahimong mahitabo. Ang mga lider ug mga miyembro sa Simbahan kinahanglan dili mahibulong niini. Sila kinahanglang mopakita og gugma, dili paghukom.

Ang bag-ong miyembro nga mihunong sa pagtambong sa Simbahan mahimong mibalik sa naandang pagkaadik ug mibati nga dili takos ug nawad-an og paglaom. Ang dinalian nga pagbisita nga maghatag og kadasig ug suporta makatabang. Ang mga miyembro kinahanglang mopakita diha sa pulong ug sa buhat nga ang Simbahan usa ka dapit diin ang gugma ni Kristo makita (tan-awa sa 3 Nephi 18:32).

Personal nga Pagtuon o Pagtuon uban sa Kompanyon

Paghunahuna og usa ka tawo nga inyong gitudloan o usa ka bag-o o mibalik nga miyembro kinsa naningkamot sa pagbuntog sa adiksiyon. Rebyoha ang “Hugot nga Pagtuo diha ni Jesukristo” ug “Paghinulsol” gikan sa leksiyon nga “Ang Ebanghelyo ni Jesukristo” diha sa kapitulo 3.

Unsa ang inyong itudlo niini nga tawo gikan niana nga leksiyon ug gikan niini nga kapitulo nga makatabang kaniya?
Paghimo og usa ka plano sa leksiyon aron sa pagtabang niini nga tawo.

Pagtudlo sa mga Tawo Nga Walay Kristiyanong Kagikan

Ang ubang mga tawo nga inyong gitudloan mahimong walay Kristiyanong Kagikan o mahimong wala motuo sa Langitnong Amahan ug ni Jesukristo. Apan, kadaghanan niining mga tawhana adunay mga pagtuo, mga naandang buhat, ug mga dapit nga ilang gipakabalaan. Mahinungdanon nga mopakita kamo og pagtahod alang sa ilang relihiyosong mga pagtuo ug mga tradisyon.

Tabangi Sila nga Makasabot kon si Kinsa ang Dios

Posibleng maghunahuna mo kon unsaon ninyo sa pagpahiangay sa inyong pagtudlo alang sa mga tawo nga walay Kristiyanong kagikan. Ang mga baroganan nga makatabang sa usa ka tawo sa pag-ugmad og hugot nga pagtuo managsama ra sa tanang kultura. Tabangi ang mga tawo nga makabaton og husto nga panabot kabahin sa Dios ug sa balaan nga misyon ni Jesukristo. Ang labing maayo nga paagi alang kanila sa pagkat-on niining mga kamatuoran mao ang pag-angkon og personal nga espirituhanong mga kasinatian. Pipila ka paagi nga kamo makatabang kanila nga makabaton niining mga kasinatian gilatid sa ubos:

Itudlo nga ang Dios mao ang atong Langitnong Amahan, ug Siya nahigugma kanato. Kita Iyang mga anak. Imbitara sila sa pagtinguha niana nga pagsaksi alang sa ilang kaugalingon.
Itudlo ang mahitungod sa plano sa kaluwasan.
Itudlo nga ang Dios Amahan ug si Jesukristo mipakita ngadto kang Propeta Joseph Smith.
Paghatag og sinsero nga pagpamatuod sa ebanghelyo, lakip na kon sa unsang paagi nga imong gibati ang gugma sa Langitnong Amahan ug nganong imong gipili ang pagsunod ni Jesukristo.
Imbitara sila sa paghatag og yano, kinasingkasing nga mga pag-ampo—uban kanimo ug sa ilang kaugalingon.
Imbitara sila sa pagbasa sa Basahon ni Mormon matag adlaw—uban kanimo ug sila ra.
Imbitara sila sa pagtambong sa simbahan.
Ipaila-ila sila ngadto sa mga miyembro sa Simbahan nga makapasabot kon sa unsa nga paag nga sila mituo sa Langitnong Amahan ug ni Jesukristo.
Imbitara sila sa pagtuman sa mga sugo.

Kadaghanan sa mga tawo nagtinguha sa pagbaton og mas dakong koneksiyon uban sa Dios ug sa pagkaplag sa katuyoan ug kahulogan sa kinabuhi. Tabangi sila nga makakita kon sa unsang paagi nga sila nahimong mga anak sa mahigugmaong Langitnong Amahan ug Siya adunay plano alang kanila. Pananglitan, mahimo nimong sugdan pinaagi sa pagsulti og butang sama sa mosunod:

Ang Dios mao ang atong Amahan sa Langit, ug Siya nahigugma kanato. Kita Iyang mga anak. Kita nagpuyo uban Kaniya sa wala pa kita matawo. Tungod kay ang kitang tanan Iyang mga anak, kitang tanan managsoon. Siya nagtinguha nga kita makabalik ngadto Kaniya. Tungod sa Iyang gugma alang kanato, Siya naghatag og usa ka dalan alang kanato aron makabalik ngadto Kaniya pinaagi sa Iyang Anak, si Jesukristo.

Ipahiangay ang Inyong Pagtudlo kon Gikinahanglan

Daghang mga kinabig nga gikan sa dili Kristiyanong kagikan moingon nga sila wala kaayo makasabot kabahin sa unsay gitudlo sa mga misyonaryo. Apan, sila mibati sa Espiritu ug gusto nga mobuhat kon unsa ang gihangyo sa mga misyonaryo. Buhata ang tanan nimong mahimo aron matabangan ang mga tawo nga makasabot sa doktrina sa ebanghelyo. Pagmapailubon ug magmaabagon. Mahimong magkinahanglan kini og panahon para makakat-on ang mga tawo sa pag-ila ug pagpahayag sa ilang mga pagbati. Mahimo ninyong ipahiangay ang kapaspason ug kalawmon sa inyong pagtudlo aron sa pagtabang kanila.

Ang mosunod nga mga sugyot mahimong makatabang samtang kamo mag-andam sa pagtudlo sa mga tawo kinsa walay Kristiyanong kagikan:

Sabta kon unsa ang esprituhanong panginahanglan o interes nga miaghat kanila sa pagpakigkita kaninyo.
Paghatag og yano nga kinatibuk-ang pagpasabot ug mga pagrebyo alang sa matag leksiyon.
Hangyoa sila sa pagsulti kaninyo kon unsay ilang nasabtan ug unsay ilang nasinati.
Hatagi og katin-awan ang mahinungdanon nga mga pulong ug mga baroganan. Ang mga tawo mahimong dili kaayo pamilyar sa daghang mga pulong nga inyong gigamit samtang kamo nagtudlo.
Balika ang miaging leksiyon nga gitudlo aron sa pagtudlo sa doktrina sa mas klaro nga paagi. Kini mahimong mahinungdanon sa bisan unsa nga panahon atol sa proseso sa pagtudlo.
Tinoa ang mga imbitasyon nga inyong mapadangat sa pagtabang sa mga tawo nga masinati ang mga panalangin sa ebanghelyo.

Gilista sa ubos ang pipila sa mga kapanguhaan diha sa Gospel Library nga mahimo ninyong gamiton sa pagtabang niadtong walay Kristiyanong kaagi:

“Who Is God [Kinsa ang Dios?]”
“Who is Jesus Christ [Kinsa si Jesukristo?]”
“Jesus Christ, Son of God [Si Jesukristo, Anak sa Dios]”
“What to Expect When Visiting with Missionaries of The Church of Jesus Christ of Latter-day Saints [Unsa ang Laoman Kon Makighinabi sa mga Misyonaryo sa Ang Simbahan ni Jesukristo sa mga Santos sa Ulahing mga Adlaw]”
“Muslims and Latter-day Saints: Beliefs, Values, and Lifestyles [Mga Muslim ug mga Santos sa Ulahing mga Adlaw: Mga Gituohan, mga Mithi, ug mga Estilo sa Kinabuhi]”

Personal nga Pagtuon o Pagtuon uban sa Kompanyon

Kon mahimo, pag-ila og usa ka kinabig kinsa walay Kristiyanong kagikan sa dili pa makigkita sa mga misyonaryo. Pakigsabot nga makigkita ug mangutana mahitungod sa iyang kasinatian sa pagkakabig. Pananglitan, mahimo ninyong pangutan-on ang tawo mahitungod sa:

Unsay hinungdan nga mituo siya sa Langitnong Amahan ug ni Jesukristo.
Sama sa unsa ang kasinatian sa pag-ampo sa unang higayon.
Sama sa unsa ang iyang gibati sa unang higayon nga natubag ang pag-ampo.
Ang tahas sa mga kasulatan sa iyang pagkakabig.
Sama sa unsa ang pagtambong sa simbahan.

Isulat ang unsay imong nakat-onan diha sa imong journal sa pagtuon.

Hunahunaa ang pag-imbitar sa tawo sa pagtabang kaninyo sa pagtudlo sa tawo kinsa walay Kristiyanong kagikan.

Mga Ideya sa Pagtuon ug Paggamit

Personal nga Pagtuon

Hunahunaa nga ikaw anaa sa mosunod nga mga sitwasyon. Unsaon kaha nimo paggamit ang mga baroganan ug mga kahanas dinhi niini nga kapitulo aron sa pagtabang niining mga tawhana nga mouswag? Planohi kon unsaon nimo sa paggamit niini sa kada sitwasyon.
- Usa ka tawo nga nag-andam alang sa bunyag misulti ninyo nga siya dili na gusto nga makigkita ninyo.
- Nagkita kamo sa ikapitong higayon sa usa ka tawo kinsa gitudloan sa pipila na ka misyonaryo sulod na sa duha ka tuig. Dunay gamay ra kaayong timailhan sa pag-uswag.
Pagpili og usa sa mga leksiyon sa misyonaryo. Pag-ila og usa o duha ka tudling sa kasulatan gikan sa matag usa sa nag-unang baroganan. Praktisa ang pagtudlo gikan niadtong mga tudling diha sa seksiyon sa “Gamita ang mga Kasulatan” niini nga kapitulo.

Pagtuon uban sa Kompanyon ug Panagbaylo sa Kompanyon

Basaha ang asoy kabahin ni Ammon ug Hari Lamoni diha sa Alma 18–19 ug ang estorya kabahin ni Aaron diha sa Alma 22:4–18. Samtang nagbasa ka, ilha ug ihulagway kon giunsa ni Ammon ug Aaron:
- Pagsunod sa Espiritu ug pagtudlo uban sa gugma.
- Pagsugod sa pagtudlo.
- Pagpahiangay sa ilang pagtudlo aron matubag ang panginahanglan.
- Paghatag og pagpamatuod.
- Paggamit sa mga kasulatan.
- Pagpangutana, pagpaminaw, ug pagtabang niadtong ilang gitudloan aron masulbad ang ilang kabalaka.
- Pag-awhag niadtong ilang gitudloan aron sa paghimo og mga pasalig.
Hisgoti kon sa unsang paagi nga ang ilang pagserbisyo ug pagtudlo nakaapekto ni Hari Lamoni, sa iyang amahan, ug ni Abish.

Konseho sa District, mga Komperensiya sa Zone, ug Konseho sa Pagpangulo sa Misyon

Imbitara ang mga miyembro o kadtong kasamtangan nga gitudloan ngadto sa inyong miting. Ipasabot ngadto sa grupo nga gusto nimong mapalambo ang abilidad sa mga misyonaryo sa pagpakigbahin sa ilang importante nga mensahe. Pagpili og usa ka leksiyon ug usa ka kahanas. Hangyoa ang mga misyonaryo sa pagtudlo sa tawo o mga tawo sa leksiyon nga inyong gipili sulod sa 20 minutos, nga nagtutok sa kahanas nga imong giila. Hangyoa sila nga magbaylo kinsa ilang gitudloan human sa 20 minutos. Human nga ang mga misyonaryo nakatudlo, tapoka ang grupo. Hangyoa ang tawo o mga tawo sa pagsulti sa mga misyonaryo unsa ang labing epektibo ug usa ka paagi nga mahimo nilang palamboon.
Ipasalida ang bidyo sa mga ehemplo bahin sa mga misyonaryo nga nagtudlo o nagkontak sa mga tawo. Pagpili og usa ka kahanas ug hisgoti kon unsa ka maayo ang mga misyonaryo migamit sa mga baroganan alang niana nga kahanas.
Pagpili og usa ka kahanas, ug ilha ang doktrina o mga tudling sa mga kasulatan nga nagsuporta niini. Itudlo ang sukaranan nga doktrina sa kahanas ngadto sa mga misyonaryo.

Mga Lider sa Misyon ug Mga Magtatambag sa Misyon

Kuyogi panagsa ang mga misyonaryo samtang magtudlo sila. Planoha kon unsaon nimo sa pag-apil diha sa pagtudlo.
Awhaga ang lokal nga mga lider sa pag-apil uban sa mga misyonaryo diha sa ilang pagbisita sa pagtudlo.
Ipakita ug tabangi ang mga misyonaryo sa pagpraktis sa usa sa mga kahanas sa pagtudlo nga gihulagway dinhi niining kapitulo, sama sa pagpangutana og maayo nga mga pangutana ug pagpaminaw.
Ipakita ang epektibo nga paggamit sa mga kasulatan kon magtudlo og mga misyonaryo diha sa mga komperensiya sa zone, konseho sa pagpangulo sa misyon, ug mga interbiyo. Buhata ang sama kon kamo motudlo uban kanila.
Tabangi ang mga misyonaryo nga makasabot sa mga kasulatan ug palamboa ang gugma alang kanila. Si Elder Jeffrey R. Holland mitambag sa mga lider sa misyon:

“Himoa nga ang paghigugma sa pulong sa Dios mao gayod ang sentro sa inyong kultura sa misyon. … Himoa nga mahimong pamilyar sa mga pagpadayag ug regular nga paggamit sa sumbanan nga mga basahon nga usa sa nag-unang mga kinaiya sa inyong mga misyonaryo sulod sa tibuok nilang kinabuhi.

“Kon kamo motudlo sa inyong mga misyonaryo—ug kana sa tanang panahon—motudlo kanila gikan sa mga kasulatan. Ipakita nila kon asa nimo gikuha ang imong kalig-on ug inspirasyon. Tudloi sila sa paghigugma ug pagsalig niadtong natigom nga mga pagpadayag.

“Ang [akong] presidente sa misyon nagtudlo gikan sa Basahon ni Mormon ug sa [uban] nga mga kasulatan matag higayon nga kami maanaa sa iyang presensiya, o sa ingon niini. Ang personal nga mga interbiyo gisumpay sa kasulatan. Ang mga latid alang sa … mga miting gikuha nagagikan sa sumbanan nga mga basahon. …

“Wala kami masayod niini nianang panahona, apan ang among presidente misangkap kanamo diha sa tuo nga kamot ug sa wala, nag-awhag kanamo uban sa tanang kusog sa iyang kalag ug uban sa tanan niyang galamhan sa paggunit og maayo sa puthaw nga gunitanan nga kami dili gayod malaglag [tan-awa sa 1 Nephi 15:23–25]” (“The Power of the Scriptures” seminar alang sa bag-ong mga lider sa misyon, Hunyo 25, 2022).